ماذا تفعل لو كنت مكانى؟

[امانى]

بسم الله الرحمن الرحيم

كثيرا ما تصادفنا قصصا خياليه هى صورة بالكربون لقصص واقعية فى حياتنا ومن منطلق ذلك افتح هذا الموضوع

لمناقشة تللك الصور الواقعية وساسردها على لسان بطلها او بطلتها ويبقى فى النهاية هذا السؤال

ماذا تفعل او تفعلى لو كنت مكانى ؟ دعوة للمناقشة والحوار................

القصة الاولى........

انا فتاه ابلغ من العمر 22 عاما حاصلة على شهادة جامعية من احدى الكليات النظريه

ابدا قصتى بنبذة عن طفولتى حيث نشات فى اسرة متوسطة الحال من ام واب واخت تكبرنى بعامين

ابى يعمل باحدى المصالح الحكومية ذات المرتب الضئيل وام ربه منزل لا تعمل ومن اجل ان يوفر ابى قوت يومنا

ويقوم بتلبية متطلباتنا كان يعمل عملا اضافيا بعد الظهر . كان كل همه ان نكمل تعليمنا ويوصل بنا الى بر

الامان ولكن للاسف لم يمهله القدر.......... مرض والدى بمرض لعين لم يعد يستطع معه العمل او الحركة

حتى وافته المنية وانا فى سن الثالثة عشر.

تبدل حال هذه الاسرة الصغيرة والسعيدة الى حال اخر من البؤس والشقاء ......... معاش ضئيل لا يكفى حتى

العيش الحاف طول الشهر . طرقت امى جميع الابواب من اجل الحصول على عمل شريف و باءت محاولاتها

بالفشل حتى اقربائنا من ساعدنا مرة تهرب منا مرات ........... لن اطيل عليكم بعض الاقارب نصحوا امى

بالزواج من اجل اولادها ومن اجل ان يرعانا ويصرف علينا هذا الزوج وبعد رفض امى هذا المبدا الا انها فى

النهاية وافقت من اجلى واختى

تزوجت امى وانتقلنا للعيش معها فى شقة زوجها وتركنا شقتنا بما فيها من زكريات وبقايا عفش بعد ان قامت

امى ببيع معظمه للصرف علينا وسد جوعنا

الحق يقال هذا الزوج كان بمثابة طوق النجاه لنا وكان يعاملنا احسن معاملة ويصرف علينا واعتبرنا بناته حيث

انه محروم من هذه النعمة وبسبب هذا فشل فى زيجته الاولى

مرت بنا الحياة هادئة تخرجت اختى من المدرسة التجارية وتزوجت من احد جيراننا وارتاحت امى من عبئ

مصاريفها وبقيت انا مع امى وزوجها . لم يبخل فى تحمل نفقات تعليمى حتى حصلت على شهادتى

الجامعية . كنت اجد فيه العوض عن ابى وكنت اكن له كل الاحترام والحب

والان جاء دور مشكلتى التى تؤرقنى ليلا ونهارا........ واريد مساعدتكم فى الحل..........

منذ فترة بدأ زوج امى يسهر خارج المنزل لفترات طويلة والرجوع فى حالة غريبة وبدات امى تتزمر لذلك

لفتت انتباهه كذا مرة دون جدوى وبدأ الشجار يتسلل الى بيتنا ليل نهار بعد ان علمت امى ان زوجها بدا

فى تناول المخدرات . حاولت مرارا وتكرارا ان ترجعه عن هذا الطريق دون فائدة

تغيرت اخلاق زوج امى بدأ ينهرها واحيانا يضربها امامى وامى تمنعنى من التدخل خيفة ان يضربنى

انا الاخرى . اصبحت حياتنا جحيما لا يطاق ويا ليت وقف هذا الجحيم عند هذا الحد........

لم يكتف زوج امى بالسب والضرب لامى ولكن.......... بدأ ينظر لى نظرة لم اتعود عليها منه منذ زواجه

من امى . نظرة ليست نظرة اب لابنته اطلاقا . بدات اراه يتقرب منى ويحاول ارضائى بكل وسيلة على

حساب امى المريضة . حاول اكثر من مرة اغرائى بهدايا ويطلب منى الا اقول لامى ورفضتها مهددة اننى

سابلغها بما يحدث منه اذا لم يبتعد عنى. للاسف لا يخجل ويحاول ملاحقتى ومطاردتى باستمرار فى

كل مكان اذهب اليه . شكوته لاختى وزوجها عما يحدث منه وعرضت اختىان اعيش معها فى بيتها

الذى يشاركها فيه حماتها واخت زوجها ولكن ماذا سنقول لامى ؟ وماذا لو سالتنا عن السبب؟ وماذا

سيكون موقف حماة اختى من هذا؟

شقتنا القديمة ما زالت موجودة ويمكننى العيش بها ولكن من يتحمل نفقاتى ؟ من ايجار واكل وملبس

الى جانب ان امى لن تقبل هذا الوضع وان اعيش بمفردى وانا فى هذا السن الصغير

هل اصارح امى بالحقيقة الشنيعة؟ اخاف عليها هول الصدمة وهى مريضة والانفعال يؤدى بحياتها.

اتزوج هذا الرجل الذى تقدم لى وكنت قد رفضته لانه ليس متعلم ويعمل كل يوم بمهنة شكل ولكننى

اخاف فشل هذه الزيجة لعدم التوافق بيننا فى كل شئ

ماذا افعل دبرونى ؟ شبح هذا الغول يطاردنى واعيش الان حياة مرعبة لا انام الليل خوفا منه وشاردة الزهن نهارا

والخوف يطاردنى فى كل مكان اذهب اليه

والان اقولها لكم

ماذا تفعل لو كنت مكانى لا قدر الله لكم هذه الكارثة

امانى

ز

.

تم تعديل 16 مايو 2008 بواسطة امانى

[medopharm]

الأخت المحترمه أمانى

عندك حق فعلا دى حكايه ولا فى الأفلام

الواحد عمره مايتخيل ان الآنحطاط يوصل بالناس للدرجه دى

طب فين الدين وفين الخوف من ربنا

انتى فعلا حاليا فى حكم بنته ازاى يفكر فى حاجه زى كده

ع العموم الله يعينك ويقويكى وان شاء الله طول ما انتى متمسكه بالله

ربنا هيوقف جنبك

طيب انا ليا سؤال

هو مفيش ليكى مثلا خال او عم تروحى تقعدى عنده واعتقد انك خلاص انتهيتى من الدراسه

يبقى المصاريف هتخف شويه وممكن ربنا يكرمك بشغلانه ولا حاجه

المهم اصبرى

وان مع العسر يسر

[badroora]

السلام عليكم ورحمة الله وبركاتة ..........

الاخ العزيز ميدو فارم توضيح بسيط فقط .......مدام امانى زوجة وأم لرجلين كدا عقبال عندك يا رب :lol: هى بالطبع مش صاحبة المشكلة

كثيرا ما تصادفنا قصصا خياليه هى صورة بالكربون لقصص واقعية فى حياتنا ومن منطلق ذلك افتح هذا الموضوع

لمناقشة تللك الصور الواقعية وساسردها على لسان بطلها او بطلتها ويبقى فى النهاية هذا السؤال

العزيزة أمانى ......قصتك فكرتنى ببرنامج زمان اسمة حياتى وكان بيجيب القصة مصورة كنت باتفرج عليها وكان قلبي بيتقطع

وكنت باحمد ربنا ع النعمة اللى كنت فيها .........

شوفى يا امانى .......القصة دي تبان للوهلة الاولى انها مشكلة وكبيرة مش صغيرة لكن بعد قليل من التفكير بهدوء هتلاقي مافيش مشكلة

نوهائي ........ليه ؟......عشان الاتى :

فى بداية القصة كانت المشكلة الكبرى هى ام تعول بنتين بلاسند او مرتب يكفي احتياجاتهم .

الحمدلله اتحلت المشكلة بزواج الام برجل كان فى الاول كويس ربى البنتين وجوز واحدة والتانية اتخرجت من الجامعة .

يبقي هنا لا يوجد اى مشكلة ....دور اى اب فينا من الناحية المادية بينتهى بعد التخرج وتبدأ بقي رحلة الاعتماد ع النفس والعمل.

البنت خلاص اتخرجت وبقي معاها شهادة يبقي من الاولى ان تبحث عن شغل وتستقر هى ومامتها فى شقتهم القديمة مهما ان كانت حالتها

.

ومافيش داعى البقاء فى بيت زوج اختها ولا زوج امها ولا حتى تترك امها هناك ........مش لازم تخبر مامتها بسلوك زوجها .

لان المخدرات بتتلف اول شيء القيم والمباديء والاخلاق وبتغير طبيعة البنى ادم .........والام مش هتستوعب دا .

الام هتعتبر جوزها جانى بافعاله تجاه بنتها .....ولكنه فى الحقيقة مجنى عليه نتيجة المخدرات التى يتعطاها.

يبقي تلخيص حل المشكلة فى الاتى

البنت يجب ان تبحث عن اى عمل شريف ........والعائد تستقر به هى ومامتها فى شقتها القديمة

محاولة مساعدة زوج الام والوقف بجانبة للتوقف عن المخدرات ولو ان دا صعب ولكن حقه عليهم زى ما رباهم وكبرهم انهم يقفوا جنبوا

ويستحملوا ولكن لازم تكون هى ف امان والامان فى البعد عنه اى ان تعمل وتول نفسها........

اما الجواز لمجرد حد يصرف عليها فكرة مرفوضة تماما المفروض . الجواز جانب انسانى قيم جدا لا يصح ان ننظر له على انه

خلاص او هروب من واقع مرير .

اتمنى ان اكون قدرت اساهم ولو بقدر بسيط فى حل المشكلة

والله الموفق باذن الله ........

بدرية

تم تعديل 17 مايو 2008 بواسطة Badria Mekkawy

[Nonna]

يبقي هنا لا يوجد اى مشكلة ....دور اى اب فينا من الناحية المادية بينتهى بعد التخرج وتبدأ بقي رحلة الاعتماد ع النفس والعمل.

فيتوووووووو

اسمحيلي يعني يا بدورة معلش

دور الاب مع الابن اصلا لا ينتهي الا بعد ان يجلب له سكن يتزوج فيه

عملا بموقف لعمر بن الخطاب رضي الله عنه

لما ساله واحد الابن له عند ابوه ايه

قاله يجيبله ام صالحة

و يسميه اسم كويس و يوفر له سكن يتزوج فيه

ده الكلام ده بالنسبة للشباب

ماابالك بالبنات؟!!

دور الاب لا ينتهي ماديا مع بنته الا اذا تزوجت و اصبح لها عائل اخر

_جوزو يعني :lol: _

بالنسبة للمشكلة نفسها

هافكر كدة و احط نفسي مكانها

و ارد ان شاء الله

[Folana]

السلام عليكم ورحمة الله....

عودا احمد يا امانى....

ابطال المشكلة هنا هم:

- صاحبة المشكلة....خريجة جامعة....شخصية متواكلة تنتظر الحلول من المحيطين....ظروف حياتها الصعبة ساعدت على تكوين جانب سلبى فى شخصيتها هو المحرك الاساسى لها...مما جعلها تعيش فى حالة انتظار دائم لما سوف تجود به الايام دون محاولة البحث عن الافضل ...وبالرغم من انتقالها لتعيش فى كنف زوج الام الذى قام بتربيتها وعوضها عن شظف العيش ..الا ان شبح الفقر ظل يحاصرها ..

- الأم....تحملت الكثير من اجل بناتها...وتتحمل سوء معاملة الزوج حتى تطمئن على ابنتها صاحبة المشكلة فى بيت الزوجية

- زوج الام....تبدل حاله لسبب او اخر...وبدأ ينظر الى ربيبته (المحرمة عليه شرعا )على انها انثى يشتهيها..نتيجة انهيار جهاز القيم بداخله...سواء لتعاطيه المخدرات ام لاسباب اخرى...وان كنت ارى انه يطاردها فى جميع الاوقات بل يحاول اغرائها بالهدايا مما يبعد عنه شبهة انه يقدم على هذا التصرف وهو مغييب او تحت تأثير المخدر...بالاضافة الى انه يسىء معاملة الام

- الاخت وزوجها...على علم بما يحدث ولكنهم اختاروا ابسط الحلول واسهلها...وهى ان تنتقل الفتاة للعيش معهم..

رائى الشخصى....ان يذهب زوج الاخت لمقابلة زوج الام وليكن معه احد افراد الاسرة كعم او خال ..ويواجهه بما يفعله...وتهديده بفضحه والابلاغ عنه اذا عاود التحرش بالفتاة مرة اخرى

وعلى الفتاة ان تبحث عن عمل ..اى عمل..حتى وان كان عاملة فى احد المحلات..الى ان تأتيها وظيفة مناسبة ..وبمجرد ان تبدأ حياتها العملية ويصبح لها دخل خاص..حيتبدل حالها وتشعر بشىء من الاستقلالية يؤهلها لاتخاذ القرارات السليمة...

الام لابد ان تكون على علم بما يحدث....لانها من وجهة نظرى تتحمل ماتعانيه من اجل ابنتها...اما وان الحال كذلك..فأعتقد انها لن تقبل بما تتعرض له ابنتها

طبعا اللى ايده فى الميه مش زى اللى ماسك النار.....وممكن تكون الظروف اقسى من شجاعة الجميع على اتخاذ هذه الخطوة لان النتيجة المؤكدة ان الام ستطلق ويعودوا مرة اخرى الى الفقر والحاجة......ولكن هناك من يعيش فى ظروف اسوأ من اجل الحفاظ على كرامته وكرامة ابنائه.....

حل المشكلة فى الاساس يعتمد على الفتاة....لابد ان تستشعر قوتها وان تبحث عن عمل يقيها وأمها (المُهانة والتى تتعرض للضرب ) شر الاحتياج لرجل لا يراعى الحرمات...

والله المستعان..

[~Heba~]

السلام عليكم

الاخت الغالية امانى :lol:

انا من رأيى المتواضع

ان الراجل زوج الام ده اهتم بأم البنت و بناتها لغايةما كبروا وعلى حد قولها انه كان بمثابة طوق النجاة ليهم

يبقى ليه يردوا الاحسان بالاساءة

هو بقى مدمن

اعتبروه مريض و تصرفاته تجاه البنت و امها هى نتيجة حتمية للادمان

الادمان يدمر و يغيب العقل تماما...المدمن لا يعى عواقب ما يفعله

انا من رأيى انها لازم تتفق مع امها انهم يودوه مصحة لعلاج الادمان و عندما يشفى اكيد سيعود ذلك الرجل الطيب الذى رعى الارملة و بناتها

و بذلك لا تخسره و لا تخسر امها و لا تسبب فى قلب حياتها رأس على عقب

و مين عارف يمكن بعدما يشفى يزوجها بنفسه لابن الحلال كما زوج اختها

وكمان لازم البنت تدور على اى شغل شريف يغنيها عن السؤال

انا شكلى مضفتش كتير على كلام بدرية...لكن على كل حال قلت رأيى

[Nonna]

مع احترامي لرأي فلانة جدا

الا انى شايفة ان المفروض كنا بدأنا بالأم

بصراحة انا شايفاها سبب كل اللي حصل و اللي بيحصل و اللي هيحصل

والهي لا أحملها فوق طاقتها انما يعني اتغظت منها

واحدة زوجها اتوفى وهو على ذمة الحكومة كان مرتبه ملاليم ماشي انما في بيت يأويها هي و بناتها

و معاش اكيد لزوجها ماداام كان على ذمة حكومة

و حتى لو ماكانش كدة

انما في بيت في حيطان بتداريهم

اتذكر فيلم مش فاكرة اسمه بتاع شادية و امينة رزق لما اشتغلت فراشة مدرسة و بعدين خدامة

مااتجوزتش تاني ليه

اعتقد يعني والدة البنت صاحبة المشكلة حضرت ايام الفيلم ده و هلكته فرجة ان ماكانتش هلكته عياط كمان

بلاش الفيلم ده كمثال

في مثال أوقع

كان في سيدة جوزها توفى عنها و ترك لها اربع بنات ومنزل بيقيموا فيه انما مش معاها قوت يومها

و اللي عندها نفذ خلاص

كانت بتجري على المقابر و تقطع من لحم الميتين و تاخده لبناتها تطعهم دون ما تقوللهم ده ايه و لا منين

الى ان شافها راجل عابد صالح

اعتقد اسمه عبد الله بن المبارك

نهرها على فعلتها طبعا و سالها هي بتعمل كدة ليه

قالتله ان لله في خلقه شئون

و هكذا كان كل مرة يشوفها يسالها بتعمل كدة ليه

ترد بنفس الرد

لحد ما جه يوم كان طالع حج

و اقسم انه مش هيرحل من غير ما يعرف حجتها ايه

حكتله ظروفها و انها مش عارفةتعمل ايه غير كدة

الراجل راح اعطاها مال الحج و ماسافرش لما رجع الناس اللي سبقوه للحج بقوا يقولوله انهم انبسطوا بشرحه في الحج

و استفادوا

قاللهم انه ما سافرش اصلا

المهم ان المولى عز وجل جزاء فعلته مع الست ده جعل له ملك يتمثل في هيئته و يحل محله في الحج

و كان كأنه حج سبعين مرة او حاجة كدة

هنا الام ليه ما اتجوزتش ؟!!

انا مابقولش ان الام في المشكلة هنا غلطت

انما بقول استسهلت

حتى لما اتجوزت ركنت على انفاق جوزها الجديد و خلاص

ماأجرتش ليه الشقة اللي تركتها

و حوشت فلوسها لحد ما بناتها يكبروا

شايافها من الاول للاخر مااحسنتش التصرف بصراحة

فراشة في مسجد كليتي عندها 8 اولاد جوزها مات وهي 32 سنة و ترك لها 8 اولاد منهم اربع بنات

مااتجوزتش ليه ؟

ربت التمانية و ماشاء الله كلهم خريجين جامعات

سالتها ده معاش جوزك بقى كبير

قالتلى انه كان سواق

يعني مالوش معاش ولا يحزنون

انما هي اشتغلت بياعة مناديل

فراشة في الكلية و هكذا

ربنااااا اللي بيرزق

نيجي بقى للانداااااااااال

_معلش انى قلت كدة _

الاعمام و الاخواااااال_ده ان وجدوا اصلا_

لو راعوا ربنا فيهم ماكانش اللي بيحصل ده حصل

لو فهموا ان كل واحدة اصلا من بنات ونساء المسلمين هي عرض محمد صلى الله عليه و سلم

مااعتقدتش انهم كانوا تركوا بناتهم يتربوا في بيت غيرهم

انما نقول ايه

باينها القيامة خلاص

ضياع النخوة و برودة الدم الحامي

مش عارفة اصلا ازاى ممكن يعني يقفوا للبنت دلوقت في محنتها

وهما اللي ما وقفوش معاها قبل كدة لما كانت عيلة !!

بيتهيالي انا فرغت شوية من غيظي

هافكر تاني عدل في حل عشان الحل هو المهم :lol:

[جويرية]

تتجوز العريس اللي متقدمللها

[nash]

مساء الخير يا أينو

والله رأيي لن يخرج عن ماقيل...

الصدق أقصر الطرق للوصول إلي النجاة من المهالك...

علي الإبنه مصارحه والدتها بما يحدث من زوجها...ولا اظن أن الأم ستضحي بأبنتها مقابل الأيواء والصرف عليهما...

الله يرزق من يشاء...وفي السماء رزقكم......أي أن الرزق أمر مفروغ منه...وعد من الله سبحانه وتعالي

تستطيع الإبنه ووالدتها الإنتقال إلي المسكن القديم.....وتحاول الفتاة البحث عن مصدر رزق يقيها وأمها شر سؤال الناس...

وأظن أن والدتها سيده مريضه...وبالتالي في حاله أن تقدم لها عريس لن تستطيع ترك والدتها..وعند هذا من الممكن إذا تقدم لها شاب لا يزال في مقتبل حياته العمليه...تكون هي قد ساعدته و قدمت له المسكن ...وهونت عليه نصف الطريق...

[galaxy]

موضوع رائع بجد يا اماني وعودا احمد.. :sad:......طول عمرك مدلعانا ومعودانا علي المواضيع التقيله...بجد رائع :wub:

ممكن مش هقول جديد..............بس هجمع بين راي عجبني لهبه واراء كل من شاركوا..... wst::

انا مع زعل نونا اوي...........وعارفه معني كلامها ومعاها اوي كمان :wub: .............بس بصراحه محدش عارف ظروف الناس ايه...........عشان كدا مش هقول ان دا غلط..........عشان الغلط حصل وخلاص.

عشان كدا هتكلم في حلول...............الحل من راي الجميع .........البنت خلاص بقت كبيرة ومعاها شهاده تشتغل بيها...........وتصرف علي نفسها هي ووالدتها.............ويرجعوا لشقتهم القديمه فعلا..............وربنا يكرمها بالزوج اللي يراعي ربنا فيها بجد............بس في نقطه...............عجبتني لفته وفاء من هبه ............انها اشارت ان مساعدتهم للرجل مطلوبه..........الراجل دا يا جماعه صرف عليهم وكان نعم الاب بشهادتهم...............اكيد برضه ليه حق الوفاء من الزوجه اللي هي الام..............ياريت لو يبدأوا معاه بالحسني وهو فايق ومدرك انه مخطئ................وانه كان نعم الاب وتحول فجاة .........واذا لم يعتبر من الكلام ويبدي مسئوليته ورغبته في العلاج............يبقي لا نفع فيه ومش هيقدر بجد يقدم اكتر من اللي قدمه................يبقي ترحم والدتها من البهدله وتعتمد علي نفسها وتشوف حياتها وتشتغل ويرجعوا شقتهم فعلا .................. :blink:

اختي الحبيبه جويريه. :cry: .....من رايي ان ارتباطها بالرجل اللي مش متعلم دا مش حل ابدا............فعلا يا بدور :cry: الزواج اكرم واقيم من كدا كتير.............هي علاقه ود ورحمه واحترام..............مش مجرد شخص يتكفل بمصاريفها...............مش كل مشاكل الدنيا مين هيصرف عليها............لو كانت كدا كانت هانت والله.......الخواء النفسي في النوع دا من الجواز اكثر مضرة من المخدرات ذاتها............ :sad:

تحياتي لكل من شارك....................ولاحلي اماني ولموضوعها الرائع :cry:

[vipwithyou]

ايه يا جماعة ليه كدة حرام عليكوا دا انا كنت فاكر ان دى بطلتها الاخت امانى ولما بدرية قالت ردها بجد فرحت انها مش هى ولم اكمل حتى الآن الموضوع لكن الرد الآن سيختلف

عموما ً سأقرأ الردود وأضع ردى باذن الله

[vipwithyou]

رأيي الشخصى ..

عدم زواج البنت من هذا الشخص حيث انها بالتأكيد تفتقد فيه الأمان

ان تخبر امها بما يحدث لينتقلا للعيش فى مسكنهما القديم

تبحث الفتاه عن عمل شريف يقيهم السؤال وستجده باذن الله

العمل الذى يوفر لهم حتى المعيشة العادية

وربنا ان شاء الله هيرزقها بزوج صالح يعولها هى وامها

بس

شكرا

بس بجد حرقتوا دمى

تامر السيد

تم تعديل 17 مايو 2008 بواسطة vipwithyou

[جويرية]

اختي الحبيبه جويريه. .....من رايي ان ارتباطها بالرجل اللي مش متعلم دا مش حل ابدا............

أهلا أختي الغالية جلاكسي f((:

هوه فيه ظاهرة دلوقتي ان نسبة عدد البنات المتعلمين اكتر من الأولاد

فلازم ناس تضحي وتقبل بالوضع الموجود ده

اتزوج هذا الرجل الذى تقدم لى وكنت قد رفضته لانه ليس متعلم ويعمل كل يوم بمهنة شكل ولكننى

اخاف فشل هذه الزيجة لعدم التوافق بيننا فى كل شئ

وبعدين هيا معندهاش حل تاني

وهيا بتقول خايفة من فشل الزيجة يعني كلها احتمالات و احتمال يطلع انسان كويس

و بعدين التعليم عملية مستمرة مش عارفة احنا ليه قصرناها علي سنين الدراسة و زي ما بيقولوا الحياة مدرسة

يعني لو ادت من وقتها يوميا وقت ثابت يقروا مع بعض او يتصفحوا مواقع من النت او يتفرجوا علي برامج مهمة في التلفزيون ده اكيد حيزود ثقافتهم هما الأتنين

[فتافيت]

بجد الموضوع شدني وعايزة اقولكم انة لازم الام تعرف ولازم تترك هدا الرجل حتي لو كان مريض او ادخالة مصحة للعلاج والبنت اللي بنسال عنها المفروض لو امها مارضيتش تسيب البيت ترجع لبيت ابوها وتتحامي فية وتشتغل وهي خريجة جامعة يعني لو موظفة في حضانة ها تلاقي مرتب تنفق بية علي نفسها هي لية متراخية ولازم اختها تقف جنبها وتطلعها من البيت مش تقولها تعيش معاها او تدير لها شغل كويس

[somayasaleh]

رأي الشخصي هو لن يختلف عن بعض اراء الاخوة الاعضاء

البنت لازم تصارح الام مهما حصل

لازم ينتقلوا بيتهم القديم ليعيشوا لوحدهم

ربنا ما بينساش حد البنت تدو ر علي شغلة شريفة ولو القصة حقيقية كلنا ممكن نساعدها

المدمن لا يمكن شفاءه الا في حالات نادرة جدا (وده مش قلة اصل من الام وبنتها) لكن ربنا قال

لا تروموا بايدكم في التهلكة ممكن يحاولوا يراعوا الرجل من بعيد لبعيد

وبعدين فين بقية الاسرة؟؟؟؟؟ دورهم ايه؟

البنت ممكن تحصل علي شغلة شريفة لو حاولت فعلا

وما ننساش فيلم شاويش نص الليل بتاع فريد شوقي واثار الحكيم اللي ابنهم كان مدمن ومافيش منه فايدة

كمان فيلم شريهان وماجدة الخطيب وسامي العدل لما زوج الام المدمن اغتصب بنت زوجته شريهان

كل ده نماذج تحدث في الواقع

وربنا يستر علي بناتنا كلهم

[م.سامح المصرى]

هيا فعلا مشكلة كبيرة

ويمكن مالهاش حل لانه لما هددتة انها ممكن تقول لوادتها ما خجلش

طب ما هيا تحاول تشوف كبير لية وتكلمة

او تهددة انها ممكن تقولة

تشوف فى العيلة بتاعته لو كان فى حد بيعملة حساب

اكيد فى

انما تقول لامها المريضة ... اعتقد انه ممكن يضر امها اكتر

ولاقدر الله ممكن يأذيها الخبر دا زى ما قالت

فتضحى هيا شويها علشان امها بس مش معنى انها تضحى تبقى تسك

لا تشوف حل صارم للحكاية دى

بس

[galaxy]

غيبتي ليه يا اماني علينا......... :lol:

الموضوع بجد شيق وبيلمس كتير في حياتنا.......منتظرين باقي المشاكل عشان نفكر في حلولها سوي :rolleyes: :happy:

[~Heba~]

الله يرجعك بالسلامة يا امانى و احشانا

انا عندى موضوع كده ليكم تفلوا فيه (على رأى ام مازن) لغاية ما امانى ترجع

ماذا تفعل لو كنت مكانى؟

شاب مصرى فى الخليج...عازب

عرضت عليه سيدة مواطنة تكبره فى السن الزواج (مسيار)

طبعا مش بشكل مباشر

السيدة ارملة غنية الى حد ما

و الشاب يائيس مفيش فرصة قريبة فى انه يقدر يدبر مصاريف الزواج العادى من مصرية

لوكنت مكان هذا الشاب هل تقبل ام لا؟

ملحوظة : القصة حقيقية و ليست من وحى خيالى

[امانى]

السلام عليكم ورحمة الله وبركاته

اولا وقبل كل شئ اتوجه بالشكر لجميع من ساهموا فى الرد على هذه المشكلة وابداء حلول لها

والجميع دون استثناء كانت ردودهم مقنعة وواقعية اضافت للموضوع واثرته

ثانيا_ ثانيا لاحظت ان بعض الاخوة الذين ساهموا فى الرد اعتقدوا ان المشكلة تخصنى انا وليست مشكلة كتبتها على لسان

صاحبها . ولذلك قررت ان اقدم باقى المشاكل كل على حدة وباسم مختلف عن الاخر

اشكركم جميعا وان شاء الله سأقدم لكم مشكله جديدة من الحياة ومستنية ردودكم ورأيكم الذى يثرى الموضوع :closedeyes: :closedeyes: :tease:

امانى