كل شئ عن كيبك

[aboaya]

السلام عليكم

اخي الفاضل

انا مهندس كمبيوتر وزوجتي مدرسة ومعاها دبلومتين بعد الجامعة وخبرتنا في الشغل تصل الى 8 سنوات

المفروض اننا بنعرف انجليزي كويس ودراستنا انجليزي لكن للاسف لا نستطيع تحقيق درجات الايلس المطلوبة

ليس لنا دراية باللغة الفرنسية

1- فهل لنا فرصة للتقديم في كيوبك؟

2- ام هناك طريقة اخرى تزيد نقاطنا 4 نقاط للتقديم في الفيدرال؟

3- ولو اردنا التقديم باسم زوجتي للدراسة حيث انها كانت متفوقة في الجامعة وحاصلة على 4 نقاط وتقدير A+ في كل مواد الدراسة فكيف يكون ذلك؟

4- وما هي التكلفة لدراسة الماجستير هي بكالوريوس تربية تعليم اساسي علوم ورياضيات؟

5- وهل يساعدنا ذلك على التقدم للهجرة ؟

6- وهل يمكنني الحصول على عمل اثناء الاقامة؟

ثانيا اخي خريج جديد فهل يمكنه التقدم للهجرة او للدراسة؟

مع خالص شكري لخدماتك

[gadolly]

aslamo alaykom

For quebec, the french is preferred but it is not a must, you have to know that as many think accepting the immigrants to quebec depends on the officer not on the point system, there is a pointing sysmem, but we think that the officer is the one who is holding the main decision. So I recommend that you take some courses in french and it is not hard to have them, so in the interview you will appear to know frecnch and have the ability to know it. You have to know that they like anyone who speaks or eager to speak french.

Any one of you who will study here, his husband or wife will have a work permit to work legal in canada.

For the Master fees, I know how much in quebec it is around 5000 dollars for one term, in Newbrunswick it is around 2000 dollars for one term, but in quebec if you will be able to have a scholarship you will pay only 1000 dollars.

I don't know how can't you acquire the needed points although you have 8 yrs of experience and engineer !!

[eritrea]

لو سمحتم اريد ان اعرف هل شهادة ال TEF فى الفرنساوى مطلوبة ولا لا بالنسبة لهجرة كيبك ولا توصل الى المستوى السابع او الثامن و خلاص و شكرااااا

[AL Sadig]

hello again mr.gadolly

i have a short Q if I may:

the Q is about the date of the new yaer begin,in LAVAL UNIVIRSITY<,or any UNIVIRSITy you might know

thanks in regard

al-sadig

[gadolly]

السنة الدراسية بتبدأ اول سبتمبر و هي غبارة عن ثلاث ترمات. 9-12 1-4 5-8 و التسجيل ممكن في الترم لحد بعد ما يبدأ باسبوع, يعني مش زي الجامعات الانجليزي

[friendskhaled]

أخى العزيز Gadolly :

أنا مقدم على الهجرة لكيبك . ما هى أرخص المقاطعات الكندية المتحدثة بالفرنسية من حيث المعيشة وإكمال الدراسات العليا وإيجاد عمل بسهولة فيها ؟ مع العلم إن عملى فى برمجة الحاسب الآلى .

فى انتظار ردكم ،،،

[gadolly]

quebec is the only french province in canada :unsure:

[friendskhaled]

عزيزى Gadolly :

بصفتك واحد من المقيمين حاليا فى كيبك هل ترى انها مدينة جيدة للحياة بها ( أقصد العمل والدراسة ) فى كندا ام انه يوجد مدن أخرى فى كندا افضل منها ؟

فى انتظار ردكم ،،،

[gadolly]

انا من ساعة ما جئت الي كيبك و انا في كيبك سيتي, حتي ما شفتش مونتريال, بس من الكلام اللي بسمعه من اللي هناك ان اللي يحب الهدوء يبقي يعيش في كيبك و اللي بيحب الهيصة يبقي مونتريال

الحياة هنا هدوء جدا, مفيش عرب كتير و تقريبا مفيش مصريين, كل المصريين هنا ميجوش مائة, الشغل قليل بس اللي بيدوروا علي الشغل بردوا قليلين فالنسبة متعادلة مع موريال, الحياة اغلي شوية بس السكن ارخص فالكفة متساوية

الجامعة هنا لافال الاساس و هي دلوقتي تعتبر رقم واحد في الجامعات الفرنسية.

في مدرسة واحدة اسلامية و تقريبا مسجد واحد, بس الجامعة فيها مسجد و دي حاجة كويسة,

المسجد بيعمل انشطة و الميزة انه اهل سنة و جماعة يعني مفيش تصوف و ا شيعة و لا افكار غريبة

انا في رأي ان اللي نازل مع العائلة يجي كيبك سيتي اول ما يستقر احسن من دوشة موريال و يبدأ يدور علي شغل او دراسة لو لقي حاجة في حتة تانية يبقي يروح

[gadolly]

بالله عليكم يا جماعة, انا خلاص اعصابي اتحرقت من الانتظار, اي حد يعرف محامي هجرة او واحد جالو انترفيو يسأله هم وصلوا لحد شهر كام دلوقتي, موقع كيبك بقاله 3 شهور مقهوش اي ابديت. بس اللي يطمن ان لبنان و سوريا اللي معانا في نفس المكتب حصل تقدم جامد اوي و وصلوا لحد اكتوبر 2006, علي فكرة الملفات بتاعتنا كلها ماشية مع بعض و هو مسلسل واحد للدول كلها في مكتب سوريا حسب ما انا فاهم, باردو ياريت لو حد عنده اي معلومات علي ترتيب الملفات في مكتب سوريا يفيدنا عشان نعرف وضعنا, و بعدين كان في ناس مقدمين مارس 2006 دول الفروض يكون جواب القابلة جالهم, اخبارهم ايه و لا لما جالهم الجواب نسونا خلاص :closedeyes:

الغريب ان عدد الناس اللي بتكتب في المنتدي بتاع كيبك قليلين جدا مع علي فكرة عدد المصريين اللي بيهاجروا علي كيبك كل سنة حوالي 400 مصري, طيب فين هم !! انا حاسس ان كتير بيدخلوا المنتدي عشان يقرأو و يستفادوا و بيستخسروا يقولوا اي معلومة, طبعا مش بتكلم عن الاعضاء اللي مشتركين, بتكلم علي الزوار اللي من برة و دول كتير جدا, و علي فكرة كمان ده المنتدي الوحيد بتاع هجرة كندا اللي بالعربي يعني لو دورت علي النت مش حتلاقي غيره, يعني محدش يقولي ان الناس مش عرفاه. لو كانت اجراءات العضوية ملخبطة ممكن المشرفين يسهلوها شوية, انا بارده تعبت شوية لحد ما سجلت و مش عارف ليه :closedeyes:

يا ريت باردو اللي عنده اخبار عن اللي هاجروا ومان يقولنا, انا عرفت ان مكتب سوريا كان سريع جدا لحد ما جت حرب العراق و المكتب نقلوه الي مونتريال و بعد الحرب رجعوه تاني سوريا و من ساعتها و بدأ التأخير اللي ان شاء الله لو مصر نطت زي سوريا و لبنان نرجع زي الاول ال سي اس كيو في سنة و نصف بس و الفيدرال سنة ان شاء الله و تكون مهاجر

معلش انا اتكلمت كتير بس بجد مخنوق, بقالي تقريبا سنتين مقدم و الفايل اتحول من مونتريال علي سوريا و عندي صعوبات لازم تتحل بالهجرة ان شاء الله.

يا ريت دعواتكم لاخوكم جادوللي الايام اللي جاية. و اني احبكم في الله

[الأهلاوي الأصيل]

عندي سؤالين مهمين

أنا مقدم هجرة (فيدرال) وفي نفس الوقت باسعى للحصول على فيزا للدراسة في كندا ، لو رحت كندا بفيزا دراسية وكملت إجراءات الهجرة من هناك ، المدة اللي عشتها في كندا قبل ما أبقى PR سمعت إنها بتتحسب كل يومين بيوم بحد أقصى سنة...الكلام ده صح ولا غلط؟

السؤال التاني مرتبط بالسؤال الأول ، لو أنا عشت في كيبك المدة تتحسب برضه علماً بإني مقدم فيدرال مش كيبك؟

[gadolly]

عندي سؤالين مهمين

أنا مقدم هجرة (فيدرال) وفي نفس الوقت باسعى للحصول على فيزا للدراسة في كندا ، لو رحت كندا بفيزا دراسية وكملت إجراءات الهجرة من هناك ، المدة اللي عشتها في كندا قبل ما أبقى PR سمعت إنها بتتحسب كل يومين بيوم بحد أقصى سنة...الكلام ده صح ولا غلط؟

السؤال التاني مرتبط بالسؤال الأول ، لو أنا عشت في كيبك المدة تتحسب برضه علماً بإني مقدم فيدرال مش كيبك؟

انت كويس جدا اللي سألت السؤال ده

بس انت لو طالب في كيبك منوع تقدم هجرة لكيبك قبل ما تكون في اخر سنة في الدراسة و دي بتتحسب الماستر سنتين و الدكتوراة 3 سنين, يعني لو رايح دكتوراة لازم تستني سنتين عشان تقدم هجرة من كيبيك, و دي كانت مشكلتي اني قدمت قبل سنتين و الملف راح سوريا و لا كأني طالب في كندا, بس لو قدمت في اخر سنة الاجراءات كلها كيبيك و الفيدرال بتاخد سنة واحدة

لو عايز تقدم فيدرال من كندا, اولا لازم تعرف ان التقديم كله متجمد لحد شهر نوفمبر عشان الاجراءات الجديدة, و لازم تتأكد ان تخصصك يكون مطلوب السنة دى. ثانيا انا اعرف واحد قدم فيدرال و هو طالب في كيبك ملفه اتجمد و قالولو لازم تجيب هجرة كيبيك الاول, و اعرف ناس قدموا فيدرال و الملف مشي و خلصوا, تقديم الفيدرال و انت في كيبي مش بيشترط تستني لحد اخر سنة, بتقدم في امريكا و بياخد تقريبا سنة و نص الي سنتين.

المهم انت قدمت خلاص و عندك فايل نمبر, يعني ممنوع تقدم تاني فيدرال في اي حتة تانية, اللي ممكن تعمله انت تحول ملفك علي مكتب امريكا بس انا مش عارف اجراءاتها, و بارده مقدرش اقولك هم حيمشوا الملف ولا يطلبوا كيبيك الاول, و لو سبت الملف و انا مش عارف انت بقالك كام سنة يعني لو الملف قرب يخلص من مصر سيبو احسن و اعمل ابتيد لي انك عايش في كندا و هم حيحولو لوحدهم

انا علي فكرة طالب دكتوراه بارده في كيبك و في انتظارك و بالتوفيق

محدش باردو رد علي استفساري اللي فات

[AL Sadig]

md2:

السلام عليكم ورحمة الله تعالى وبركاته

اخ gadolly لدي بضعة أسئلة إذا تكرمت

هل انت في جامعة لافال لإني أريد أن اسألك عن مستواها الأكاديمي وهل معترف بها عالميا,؟؟؟؟؟؟وأيضا هل لديك فكرة عن الطب ما إذا كان بي الإنجليزي أو الفرنسي,؟؟؟إذا ما تعرف الطب ممكن تقولي بشكل عام الدراسة فيها إنجليزي ولا فرنسي ؟؟؟؟؟؟؟؟

جزاك الله عني كل خير وشكرا مقدما

[gadolly]

يا باشا لافال رقم واحد في الجامعات الفرنساوي علي مستوي العالم

بالنسبة للمستوي العام لافال من احسن مائة جامعة في امريكا الشمالية يعني الولايات المتحدة و كندا

الدراسة فرنساوي بس للطلبة للماستر و الدكتوراة ممكن تعمل الرسالة بالنجليزي بس التمهيدي فرنساوي و ممكن تحل بالعربي, يعني المحاضرات فرنساوي س علي العموم معظم المراجع و ان كانتش كلها بالانجليزي

[medopharm]

أخ gadolly

ممكن بس تقولى انت ازاى سافرت كندا

بأى تأشيره

[AL Sadig]

السلام عليكم ورحمة الله تعالى وبركاته

أخ جادوللي

جزاك الله كل خير ووفقك في الدارين وأزاح عنك كل الصعوبات التي تواجهها

أخي الفاضل معذرة على كثرة الأسئلة ولكن لكي تتضح الرؤية أمامي كان لابد من هذه الأسئلة,ولا أملك إلا أن ادعو لك بالتوفيق والسداد.

ساورد هنا كل ما اذكره من اسئلة واتمنى ان تجيبني عنها بقدر استطاعتك:

1-لقد ذكرت في بداية موضوعك أن تقيم مع اسرتك في كيبيك,ممكن تشرحلي كيفية ذهاب أهلك مع ,مع أن تأشيرتك دراسية!؟

2-هل الفيزا الدراسية تتطلب فحص طبي أو لا؟

3-هل هنالك مقابلة في السفارة بالنسبة للفيزا الدراسية,وغذا كانت موجودة ممكن تتكر وتوضح لي كيفيتها!؟

4-حصلت ولله الحمد على منحة للدراسة ,هل لازلت مطالب بالإثبات المالي؟؟

5-وصلتني الآن ما يقارب السبعة مستندات من كندا,وطلب من تعبئتها واعطائها للسفارة مع الجواز الاصلي,ما هو الوقت المتوقع بعد هذا حتى اتمكن من السفر !؟؟!

شكرا جزيييييلا على اهتمامك بالتوفيق في كل مساعيك

الصادق......ز

[gadolly]

السلام عليكم

يا جماعة براحة عليا شوية md2:

انا روحت كندا بفيزا دراسة, و الاسرة كمان ممكن يسافروا معاك بدال انت طالب و علي فكرة كمان الزوجة بتسافر مرافق معاك و بتاخد تصريح عمل

بعد ما تقدم في الجامعة و تبعت لك الاوراق بتروح السفارة عشان التأشيرة, لو الجامع معروفة تقريبا مفيش مشاكل, يعني واحد بيدرس ماستر او دكتوراة سهل اوي ياخد التأشيرة. هم بس ممكن يسألوك علي ضمان مادي و دة بيكون حساب بنك في فلوس تغطي مصاريفك انت و الاسرة اول سنة. لو ماستر بتاخد فيزا سنتين و اقامة سنتين و لو دكتوراة بتبقي 3 سنين

مفيش كشف طبي للطلبة

[friendskhaled]

أخى العزيز Gadolly :

أشكرك كثيرا على سرعة الرد علينا . أنا متخرج من كلية التجارة شعبة المحاسبة ما هى الاجراءات المطلوبة منى حتى يتم إكتمال المعادلة للشهادة ؟ ؟

وهل يمكن أقدم عليها من مصر ؟ علشان لما ييجى ميعاد الهجرة يكون معى المعادلة على طول .

فى انتظار ردكم الكريم ،،،

وشكرا لكم جزيلا ،،،

[gadolly]

السيد الفاضل جادوللي قرات ردك والذى ترك لى انطباع بانك على درايه جيده باحوال الهجرة وكذللك استجاباتك السريعه والدائمه وانت مشكورا عليها

فهل يمكن الرد على استفساراتي التاليه

انا مقدم عن طريق كيبك واحب اروح الى مقاطعه من المقاطعات ذوات الدخل الجيد وكذلك التى يتحدثون فيها الانجليزيه نظرا لانه ليس لى تقل على الفرنسية وذلك بعد اللاندينج فهل افقد اى مزايا والا نفس مجانية التعليم للاولاد ومنح الدراسه الجامعيه لي وزوجتي والخ

سوال اخر هل الجامعات فى كيبك ممكن تتيح لك انك تاخد الدروس باللغه الانجليزيه بدلا من الفرنسيه وشكرا

وهل يوجد مدارس مجانيه بالانجليزيه فى كيبك

من الممكن ان تذهب الي اي ولاية اخري بعد اللاندنج

اذا كان معك الاقامة لا يسمح لك بالمجانية للاولاد في المدارس الانجليزية, و يختلف الوضع لو كنت مقيم مؤقت و لكن انت سوف تأتي هجرة فلا يسمح لك

مجانية التعليم واحدة لكل كندا و لكن للمدارس الانجليزية في المقاطعات الانجليزية, و للمدارس الفرنسية في المقاطعات الفرنسية

بعض التخصصات في الجامعات الفرنسية تسمح لك بكتابة الرسالة بالنجليزية و تكون بالاتفاق مع المشرف و لكن الكورسات بالفرنسية و الشرح طبعا, نفس وضع مصر, المراجع بالنجليزية و كتابة الرسالة بالانجليزية و لكن كيف يشرح الدكتور, بالطبع بالعربية, و لكن في بعض الاحوال اذا كان العدد قليل ممكن الاتفاق مع الدكتور ان يقوم بالشرح بالانجليزية, الموضوع مش مكلكع زي مانتم حاسيين

يوجد جامعات انجليزية بالكامل في كيبك مثل ماكجيل و كونكورديا

مصاريف الجامعة في كيبك تقريبا مثل الولايات الاخري للمقيمين, و لكن تختلف من جامعة لاخري, المتوسط 3000 دولار في السنة و ممكن اقل

نفس المزايا الفيدرالية للولايات كلها و ان كان يوجد بعض الاختلافات البسيطة بين بعض الخدمات التي تقدمها بعض الولايات زيادة عن خدمات الفيدرال

مين قالك ان كيبك ولاية مش غنية :(

[gadolly]

انا يا جماعة حاخد مقطع مهم لوجدي (مش بتاعي )و احطه هنا عشان هو خاص اكتر بكيبك ممكن ينفع

أنا حاحاول أرد عليكي... طبعاً على أساس إنك حتيجي مونتريال... أما تورونتو فممكن العزيز هادي أو اي من الأخوة الأفاضل هناك يفيدوكي...

معلش أنا ممل شوية وباحب التفاصيل...يمكن لأني مؤمن إن التفاصيل الصغيرة دي هيا دايماً إلى بتعمل فرق في كل حاجة...إستحمليني...

شوفي يا ست الكل...

قبل ما تسافري تعملي ليستة موفتكسة بكل إلى عندك ولو تقدري إلي عند الجيران بالمقتنيات الشخصية بتاعتكم... طبعاً أهم حاجة المجوهرات وما خف حمله وغلا ثمنه... وبعدين تلفي البيت كدة أوضة أوضة... وتكتبي... عدد 3 سجادة عدد 2 لوحة عدد 1 شمعدان فضي.. وهكذا...

وتعملي نسختين من الليستة دي...وحاقولك فايدتها بعدين...

ثانياً... الفلوس إلى حاتخديها معاكي... حاولي تاخدي معاكي كاش بس مش كتير... يعني عشر ألاف أخضر أو كندي على الأكثر... (وياريت أقل...)...أما باقي الفلوس –خاصة لو مبلغ كبير- فتروحي البنك تخليهم يعملولك شيك بنكي بأسمك...وتاخديه معاكي...(أوعي تنسيه)

وبعدين... تبتدي تدوري على النت على أوتيل في الdowntown....

أنا عن نفسي كنت حاجز قبل ما أجي في chateau royal ... ده في شارع crescent في قلب قلب نص البلد...

هو مش قد كدة... بس ميزته إن أوضه واسعة وسعره معقول وأهم حاجة (بالنسة لي وأعتقد بالنسبة لأي حد عنده أولاد صغيرين) إن فيه في الأوض kitchenette... أيام ما جيت كان ب 170 دولار في الليلة.... إعملي حسابك في حوالي عشر أيام... فترة معقولة تكوني خلصتي فيها أوراقكم وتكوني شوفتي سكن وفرشتيه بالأساسيات...

هو الموقع بتاعه www.chateauroyal.com.... بس مش عارف ليه مش شغال...عامة تقدري تعملي بحث عليه وحتقدري تاخدي فكرة... وعامة قبل وصولك إن شاء الله ممكن نبقى نقولك على معلومات طازة....

لما حتوصلي المطار إن شاء الله المواضيع حتلاقيها أبسط ما تتصوري.... خاصة إن معاكي أطفال... والأطفال هنا ميزة كبيرة حتعرفي فايدتهم ...بيفتحوا كل الأبواب المتقفلة... يعني لو فيه طابور حتلاقى واحد جاي وفاتحلك سكة علشان تعدي...وتخشي على الemigration... هناك حتقعدي مع شخص ظريف تبع الحكومة الكندية حيقولكوا بقين حلوين من عينة bienvenu وكدة....وبعدين حايملا معاكم إستمارة الدخول لكل شخص فيكم وحايسألك معاكي فلوس كاش قد إيه وحيسجلها... وحيدردش معاكم شوية يقولكوا إلى لكوا وإلى عليكوا...الإستمارة غلى حايدهالكوا (IMM 5292) تحافظوا عليهم زي عنيكوا...لانكم حتستخدموها كتير في الشهور التالية...

هنا حيسألكوا سؤال حيوي... عنوانكوا إيه... وده العنوان إلى حيبعتوا عليه الPR بتاعكم... أنا فهمت إن مالكيش قرايب هنا... لو ليكي إديهم عنوانهم والجواب حيبقى يروحلهم... لو مالكيش... قوليله إحنا لسة معندناش عنوان... حيديكي نمرة تليفون تتكلمي فيها علشان تبلغيهم بعنوانك في أقرب وقت...

وبعدين حايخدكم يصوركم (خلي المشط معاكي في الشنطة) علشان كارت الPR... (ملحوظة...لو معاكي طفل صغير أوي حاولي على قد ما تقدري إنه يبقى ثابت في الصورة وتتأكدي من الراجل إن الصورة إلى طلعت مطابقة للمواصفات لأن هما ساعات بيستسهلوا خاصة في تصوير الأطفال وبعدين بكام شهر يجيلك جواب يقولك الصورة ماتنفعش تعالي صوري الأولاد تاني...حصلت معايا)....وحايديكوا شوية فلايرز وكتيبات شبيهة بإلى السفارة بعتتهالك قبل السفر...

وبعدين يا ستي حاتخشوا على بتوع quebec... هنا حيشوفوا ال csq (certificat de sélection du Québec ( بتاع كل فرد... الست حتبقى بتتكلم بالفرنساوي... تردوا عليها بالفرنساوي...وحتديكوا برضه كبشة فلايرز وكتيبات...

وبعدين...تخشوا على بتوع الجمارك... هما عادة اغلس من الغلاسة بس مع المهاجرين الجدد ألطف من اللطف...وخاصة لو معاكوا أطفال...حتسألك معاكي إيه...قوليلها (ولو معاكي أي اكل للأطفال قولي...مهم أوي)...وقوليلها بس إحنا لسة في حاجات جاية ورانا... وإديها الليستة (فاكراها؟؟ حاتقولك قيمتهم أد إيه...قوليلها خمسين ألف ميت ألف...زي ما أنت عايزة... زبعدين حايختم على الورقة دي... برضه ؛ايسالك على الفلوس إلى معاكي... تقوليله على الكاش (إلى مكتوب في الورقة إلى الراجل صاحبنا لسة ماليها) وتقوليلها على أي شيك بنكي معاكي وقيمته...وعادة حاتتطلب تشوفه... وحتثبت المبلغ ده.... الكلام ده مهم أوي... ممكن ما ينفعكيش بس ممكن ينفعك أوي أوي بعد كدة في تظبيط الضرايب... وعامة شئ مابيخسرش...

أنا شايفك دلوقتي أتفجعتي وحسيتي إن الموضوع مكلكع... أحب أقولك كل إلى أنا قلته ده من أول وصولك المطار لحاد ركوبك التاكسي برة المطار مش حياخد أكتر من نص ساعة... وغالباً أقل...

حتركبوا التاكسي..الأوتيل يا باشا لو سمحت... (معظمهم لبنانيين ومغاربة على فكرة)... تروحوا الأوتيل تعملوا check in ... تطلعوا الأوضة....قبل ما تفتحوا الشنط وقبل ما تكلموا الأهل تطمنوهم في حاجة مهمممممممممة أوييييييييي..... تفتحوا الbooklets إلى إيدوهالكوا في المطار حتلاقوا عناوين لكذا شركة تأمين صحي خاص... نقي اي واحدة فيهم... تكلموهم وتعملوا insurance لكم كلكم لمدة 3 شهور على الأقل... إعملوه بميت ألف أو ربع مليون...مهم اويييي....ولو ينفع تعملوه قبل ما تسافروا إعملوه.... (أنا بنتي سخنت أول يوم جينا... رحنا مستشفى أطفال جنب الأوتيل... دفعت 500 دولار علشان بس دكتور يشوفها... وبعدين طلع مافيش أي حاجة...نظام كمادات ساقعة وتمبرا...

تاني يوم الصبح جوزك ممكن يخلص موضوع الsocial insurance لوحده... بس الmedicare لازم تكوني معاه... وتفتحوا حساب في البنك...وتحطوا الشيك في حسابكم...(على فكرة...هو حيخش في حسابك بس حيفضل متجمد شهر...يعني ماتقدريش تصرفي منه...لذلك خلي معاكي كاش كفاية والأهم كريدت كارد من مصر إن أمكن تصرفي بيه الشهر الأول وحد يبقى يسدد لك في مصر...نظام بابا بعت فلوس...

بالنسبة للسكن...وده مهم إنك تحدديه بدري بدري علشان تقدري تبعتي العنوان لبتوع الهجرة علشان يبعتولك كارت الPR عليه....

حاولي في البداية إنك تتعاملي مع شركة مش أفراد...يعني شركة بتبقى مسئولة عن عدد المباني...أولاً حيبقى عندك إختيارات كتير... ثانياً بيبقوا مسئولين لو حاجة حصلت في الشقة...يعني مثلاً لو التدفئة حصل فيها حاجة بتكلميهم بيبعتولك واحد بتاع صيانة على طول...كدة...

عادة حتضطري تدفعي شهرين مقدم لأنك معندكيش اي تاريخ في كندا...ولو العقد سنوي (ومعظم البيوت كدة) وحبيتي تخلعي من الشقة قبل السنة حيروح عليكي الشهرين (وده برضه نظام في كل حتة)...

في حاجات كتير لازم تشوفيها في البيت إلى حتسكني فيه بس ده موضوع لوحده ممكن نبقى نتكلم فيه لما يجي وقته...خلينا في المناطق...

انا عن نفسي سكنت في Ile des soeurs ... وكنت متكلم مع إحدى الشركات إلى بتدير عدة مباني وبيوت في الجزيرة... بالإيميل طبعاً... وكنت محدد ميعاد معاهم تاني يوم وصلت...رحت فرجوني على كذا شقة... نقيت واحدة ومضيت العقد يوميها وكلمت علطول الهجرة أديهم العنوان... هو العيب إن العقد سنوي... ودي كانت مخاطرة مني... بس الصراحة المكان جميل جداً... ويعتبر من أرقى وأمن المناطق في مونتريال... وله مميزات كتيرة...منها إنه 10 دقايق بالعربية من الdowntown... وأنا على حسب ما فهم إنك عايزة تشتغلي في التصدير... ومعظم شركات النصدير والملاحة بتبقى في الdowntown...ده غير الجامعات...ده غير إن واصل إتنين هاي وايز (10 ، 20) ودول بيعتبروا شرايين مونتريال ومنهم تقدري توصلي أي حتة... ده غير إن المنطقة هنا أمن حتة للأطفال... في طريق للعربيات...وطريق للعجل...وطريق للبني أدمين...وبيفكروا يعملوا طريق للكلاب والقطط... فيه باركات كتير ...حضانات كتير... معظمهم حلوين...(لاحظي إن علية القوم ساكنين هنا)...غير إن المكان له طابع خاص في البني أدمين إلي ساكنين فيه... يعني لا هو west وتلزيق...ولا هو east وغباوة ولا هو downtown وزحمة...جزيرة...جوة جزيرة....فيه غابة صغنونة لو بتحبوا المشي... فيه ملاعب تنس وحمامات سباحة مترمية في كل حتة... وموقع المنطقة إستراتيجي بين Ile de montreal والsouth shore....

طبعاً مافيش حاجة من غير عيب... والعيوب هيا...

مافيش مترو بيعدي هنا... أوتوبيس بس... وإن كان فيه خطين اوتوبيس...ومثلاً انا لو عايز أروح ال downtown

ومش عايز أوجع دماغي بالركنة باخد أوتوبيس بأكون هناك في تلت ساعة...بس لازم عربية... (وإن كان في جميع الأحوال العربية أمر ضروري)

تاني حاجة المنطقة غالية حبتين في الإيجارات... بس لو حتحطي في إعتبارك كل الخدمات إلى بتخديها حتلاقيها مربوحة...يعني مثلاً شقة أوضة واحدة تخشلها في حوالي 800-900، وشقة أوضتين فوق ال1100...بيت تلات أربع أوض..فوق ال2000.... طبعاً ال900 دولار إلى بتدفعيهم هنا في أوضة ممكن تاخدي بيهم أوضتين في ختو نص نص...أو حتى بيت كامل في الأدغال...بس مانصحكيش.... لأن بيتك والمنطقة إلى إنت حتعيشي فيها حتأثر جامد على تكيفك وتقبلك للوضع الجديد...يعني يا حتحبي البلد وغلى فيها...يا حاتكرهي كندا وإلى فيها....

شوفي مثلاً الأخ العزيز إيهاب سالم لما راح عمل لاندينج وأصدقاءه إلى قعد معاهم كانوا عايشين في حتت حلوة...الراجل نفسه إتفتحت وأخد صور وتفكيره للقرار الهجرة بقى إيجابي... أما مثلاً لو كان راح لأصدقاءه لقاهم عايشين في منطقة مش قد كدة...كان نفسه إتصدت وبدأ عقله يودي ويجيب....

تالت عيب...وإن كنت لا أعتقد إنه عيب أوي بالنسبة للي عندهم اطفال هو إن المنطقة هاااادييييية.... يعني لو واحد جاي بطوله وعايز كل يوم يخرج يروح حتة مش حتاكل معاه خالص... وبالعكس إلى عنده أطفال ممكن دي تبقى ميزة....

أنا عامة شفت مناطق كتير...وبالمقارنة لقيت هنا أحسن حاجة... خاصة في السنين الأولى... وبعدين لما يستقر بكم الأمر إن شاء الله...وتفكروا تشتروا بيت مثلاً ففي الحالة دي ممكن يبقى فيه كلام تاني....

عامة...ده موقع الجزيرة...

www.ile-des-soeurs.ca

وده موقع شركة هنا تدير العديد من المباني والبيوت

www.structuresmetropolitaines.com

ممكن تخشي وتتفرجي وتاخدي فكرة....

ده موقع المدرسة

www2.csmb.qc.ca/iledessoeurs

الحضانات فيه كتير... وزي ما قلتلك...إلى مسجلين مع الحكومة ب 7 دولار في اليوم...وإلى مش مسجلين مع الحكومة فأسعارهم بتتراوح من 18 إلى 35 دولار في اليوم... وبعدين إنت بتبعتي تاخدي الفرق من الحكومة...

ومتسأليش أي حضانة أحسن من التانية لأن ده موضوع نسبي بحت... والمهم تبقي إنتي مستريحة للمكان والناس إلى فيه...لأنك لو مستريحة فبنتك برضه حيستريح والعكس صحيح...

فيه هنا عرب مسلمين كتير يسكنون المنطقة (معظمهم سعوديين أو مصريين وأغلبهم أطباء ومهندسين يدرسون في mcgill و Concordia )....

في أماكن برضه حلوة للسكن .westmount و rockland و Plateau Mont Royal ....بس اغلى شوية...ومحتاجة خبرة شوية في التنقية...

طبعاً الأخوة الأفاضل هنا ممكن يفيدونا أكثر كل حسب المنطقة التي يعيش فيها....

بالنوسبة للتطعيمات فدي ما تشغليش بالك بها...إنت إمشي مع التطعيمات بتاعة مصر عادي لحاد ما توصلي... وقبل ما تسافري تروحي للدكتور بتاعك خليه يكتبلك شهادة أو على الروشتة بتاعته التطعيمات إلى بنتك خدتها كلها بالإنجليزي...لما تيجي هنا إن شاء الله... وبعد ما الmedicare يجيلك...تاخدي البنت وتروحي على أقرب عيادة جنب البيت... كل طفل هنا لازم يبقى فيه له دكتور... فالدكتور حيملى ورقة وتمضي عليها وتديله قائمة التطعيمات إلى البنت أخدتها...هو حيعملها carnet de vaccination وحايكتب التطعيمات إلى هيا خدتها في مصر وبعدين حايشوف إيه إلى ناقصها من التطعيمات حسب النظام هنا ويحدد معاكي ميعاد تودي البنت تطعم وبعد كدة عادي بقى...كل تطعيم في ميعاده زي بقية الشعب (نظام كمل شهرين يطعم ضد الدرن...السل يعني لو ناسي).... كدة...

لو فيه اي مشكلة لا قدر الله ممكن تروحي لأي دكتور على فكرة...إنت حرة... بس التطعيمات والمتابعة الدورية فيفضل يبقى في أقرب عيادة جنب البيت...أما لو أي حاجة تانية فأنا بودي بنتي في عيادة إسمها tiny tots....هيا بعيدة شوية...بس فيها أحسن دكاترة أطفال في البلد... وده الموقع بتاعهم

www.tinytots.ca

خد فكرة وأشتري بكرة...

معلش طولت عليكي يا ست نانسي...

ربنا يوفقك ويكرمك إن شاء الله...ونصيحة أخيرة...

ماتعمليش حاجة في البلد دي قبل ما تسألي وتستشيري حد عايش هنا.... لأن الواحد أتخم في حاجات كتيرة أوي لو كان لقى حد ينصحه كان ممكن يوفر عليه كتير أوي.... لا خاب من إستشار حتى لو إستشار حمار....

وعامة لسة بدري وقبل السفر إن شاء الله حيبقى فيه كلام تاني ونمدك بما هو طازج وحديث من المعلومات....

أخوكم وجدي.... دكتوراه في الهجرة تخصص كيبك لجميع إكسسوارات المحمول...