كل شئ عن كيبك

[galaxy]

اولا شكرا لسرعه الرد ......... :blush2:

انا فعلا اتجاهي كيبك :lol:

ثانيا انا بالفعل عندي اقامه بالامارات بحكم وجودي شبه الدائم مع اهلي وهي قائمه من عام 2007 لمده ثلاث سنوات..........ولكن قد لا تجدد لرجوع الاهل وذلك سيتم تحديده هذا العام ان شاء الله ....انا سمعت ان تقديم البلاد العربيه او من البلاد العربيه اسرع وان ارفاق الاقامه ضروري.......يا تري دا صحيح ولاالتقدم من مصر افضل...واي عنوان يتم ارساله ولا كفايه الايميل ؟؟؟

النقطه التانيه ان الدبلومه انا لسه مش عملتها بسبب عدم تواجدي بصورة متواصله في مصر يعني بسافر شويه وارجع شويه وبالتالي المواظبه صعبه.......بس انا فهمت من الكلام ان حساب النقط بيكون من اول فتح الملف ........يعني هل في فتره من خلالها ممكن اكون عملت اسكور كويس في اللغه لاني بصراحه لسه هبدأ فرنساوي لكن الانجليزي بخير الحمدلله..........لاني برضه سمعت ان فتح الملف مش مرتبط بدور قد ما هو مرتبط بالتخصص ودا ممكن يعجل الوقت ودا سلاح ذو حدين لان ممكن اكون لسه ما خلصتش كورساتي او استعداداتي..يا تري دا صحيح........لاني عايزة افتحه بمجرد رجوعي الامارات وانا دلوقتي بدور في الكورسات؟؟؟

شهاده الخبره بقي هل ممكن اجيب من مصدرين في مصر وفي الامارات وانا ابقي اوضح نظام العمل في الحكومه ان الفتره بتيجي متواصله وكدا ؟؟؟.......زمش عارفه ينفع ولا ايه.انا برضه عموما هسأل عن نظام شهاده الخبره هتكون المده كلها ولا تشمل الاجازات........بس ممكن اعرف هتبقي موجهه لمين بالظبط ؟؟؟؟

بالنسبه لورق المعادله دا بيكون عباره عن ورقه النجاح يعني ورقه فيها اسماء الناجحين مختومه بخاتم وزاره الصحه بالامارات مش اكتر .ززززززعموما هضيفها بس يا تري توثيقها دا بخاتم الوزاره يكفي ولا ايه؟؟؟

اخيرا انا عارفه اني طولت بس بجد الكلام بيكون متضارب والواحد محتار..ايه الورق اللي هرسله اولا بصورة مبدئيه ........لفتح الملف يعني.....تحياتي لمساعدتكم...... :blush2:

[gadolly]

بصي يا galaxy

مفيش لخبطة ولا حاجة, المشكلة انك متلخبطة بين كيبك و الفيدرال الجديد

انت اتجاهك كيبك

اولا مفيش اولوية لاي ملف مقدم عمالة ماهرةskilled worker بدال معكيش عقد عمل في كيبك يبقي كلنا ولاد 9, انا علي فكرة بنتي مش بنت 9 هي بنت 8 متسأليش ازاي, بس كويس عشان تبقي تتعامل معاملة مميزة لما تكبر و متبقاش بنت 9 زينا :blush2:

ثانيا الملف بيدرس بعد تقريبا سنة و نص الي سنتين, يعني ممكن تعملي تحديث للملف كل شوية لحد ما يدرس, يعني ابدأي فرنساوي و خلصي الدبلومة و قدميهم و سنين الخبرة بتزيد و كل ده يتحسب لما يدرسوا الملف بعد سنة و نص

ثالثا لو قدمتي دلوقتي لك 12 نقطة زيادة لو تخصصك كيمياء و يتحسبولك حتي لو الوظائف المفضلة اتغيرت وقت دراسة الملف

رابعا المعادلة : اطبعي الورقة اللي معك و علمي علي اسمك

خامسا بالنسبة لكيبك و مكتب سوريا, اسرع ناس الهند و ابطأ اس باكستان, مصر دلوقتي بتاخد اقل من سنتين لو كلام اخونا نصار صح و مفيش اي اخبار عن الامارات ممكن تسألي اي مكتب هجرة في الامارات او تكلمي السفارة تسأليهم, و مينفعش تقدمي من الامارات الا لو كانت اقامتك لسه لها سنة او اكتر

سادسا بعد كيبك ادامك سنة كمان في الفيدرال

سابعا: شهادة الخبرة زي ما قلت قبل كدة قوللي لهم انك كنت اجازة و اشتغلت في الامارات و هم بيحبوا كل مدة الخبرة حتي لو متفرقة و بيجمعوها

[AL MUHAGER]

يا سكان كيبك الكرام اخوكم مزنوق

انا هاقدم كيبك ان شاء الله لان مراتي بتتكلم فرنساوي حلو

بس احنا مش عاوزين نعيش في كيبك

هل ينفع نقدم كيبك واما نوصل هناك نروح اي حتة تانية وهل لو رحنا اي حته تانية ممكن نخسر اي امتيازات الحكومة بتديهالنا

شكرا

[gadolly]

احنا جاوبنا علي السؤال ده قبل كدة, انظر السابق

ايوة ينفع تروح المكان اللي انت عايزه,

كل ولاية لها مزايا و لها عيوب, يعني لو خسرت مزايا من كيبك حتكسب حاجات تانية من الولاية التانية

[hamoudi]

معلش ياجادوللي دايما تعبينك بس انت المرجع بتاعنا الوقتى

لو انا رحت اى مقاطعه انجليزي هل التعليم مجاني للاطفال ؟

وكذلك هل لنا منح ( انا والمدام ) منح دراسيه فى الجامعه وذلك فى في الجزء الانجليزي لو انا مقدم كيبك؟

دراسة الماجستير بشكل تقريبي بتتكلف كام بعد المنحه لو فى منحه؟

و لو مافيش بتتكلف كام برده؟

وهل الدراسه هنا اسهل من مصر؟

شاكرين اهتمامك

[gadolly]

انا حجاوب عليك بس لما تقوللي انت قدمت و لا لسة و لو كنت قدمت , قدمت امتي (تاريخ الملف لكيبك و رقمه) :angry:

[gadolly]

معلش ياجادوللي دايما تعبينك بس انت المرجع بتاعنا الوقتى

لو انا رحت اى مقاطعه انجليزي هل التعليم مجاني للاطفال ؟

وكذلك هل لنا منح ( انا والمدام ) منح دراسيه فى الجامعه وذلك فى في الجزء الانجليزي لو انا مقدم كيبك؟

دراسة الماجستير بشكل تقريبي بتتكلف كام بعد المنحه لو فى منحه؟

و لو مافيش بتتكلف كام برده؟

وهل الدراسه هنا اسهل من مصر؟

شاكرين اهتمامك

يا عم انت زعلت و لا ايه انا كنت بهزر

علي العموم انت لو هاجرت كيبك بتاخد الاقامة فيدرال يعني كندا كلها حاجة واحدة و ده يديك الحق تروح اي حتة

المدارس الانجليزي في المقاطعات الانجليزي مجانا و المدارس الفرنساوي في كيبك مجانا و الانجليزي في كيبك ب 3000 في السنة و الفرنساوي في المقاطعات الانجليزي معرفش بس غالبا بفلوس

المنح الدراسية اللي اعرفه بتبقي 700 في الشهر من الحكومة بحد اقصي 43 شهر في البرنامج الدراسي الواحد, يعني لك منحة ماستر واحدة و منحة دكتوراة واحدة, يعني مش كل ما تتزنق تروح تاخد منحة ماستر هي مرة واحدة بس

المصاريف الجامعية: في لافال تقريبا 1000 في الترم و هم 3 ترمات , كنكورديا 2000 في السنة, في المقاطعات الانجليزي بتختلف من جامعة للتانية بس معرفش كام , اللي اعرفه لي واحد صاحبي في نيو برونزويك و تقريبا اقل من لافال للمهاجرين

طبعا الدراسة بتختلف من تخصص للتاني و من مشرف للتاني , انا عن نفسي نسيت اسمي بس عارف ناس مهيصة و مقضياها, يعني كل واحد بياخد نصيبه, العامل المشترك انهم بيحترموا مخك و مفيش حفظ و لا صم و اضمنلك ان كل حاجة حتاخدها لها فايدة و حتنفعك, الدراسة مربوطة بسوق العمل رابطة مباشرة

[gadolly]

هل يكفي المدام تكو ن واخده 2 مستوى قى الفرنساوي ؟ ؟؟؟وانا وانا يكون معايا 5 مستوى فى اللغه الفرنسيه؟

بالنسبه لكيبك هل يمكن اضافة الاولاد للملف بعد المقابله او اثناء المقابله لانى سمعت ان بعض الناس بياجلوا لهم مقابلتهم لانهم لم يخطروا بالتعديل قبل المقابله وشكرا؟؟؟؟

هو طبعا كل ما المستوي يزيد يبقي افضل, بس انت احسن حاجة وقت الانترفيو تكون مسجل في القرصات و تقولهم انا بكمل تعلم اللغة و ان شاء الله ابقي احسن كتير عقبال لما تيجي الاقامة

بسرعة جدا ضيف ولادك قبل الانترفيو, دول بيدوك نقط اكتر و كمان صح المقابلة حتتاجل لحد ما تضيفهم, الاضافة سهلة جدا, الطفل بتدفعله 150 دولار كندي و تبعت شهادة الميلاد المترجمة عند اي مكتب و بال دي اتش ال بسرعة عشان حسب ما فهمت انك الانترفيو ممكن تكون 11 اللي جاي

[Dr Ayman Kamel]

هل يكفي المدام تكو ن واخده 2 مستوى قى الفرنساوي ؟ ؟؟؟وانا وانا يكون معايا 5 مستوى فى اللغه الفرنسيه؟

بالنسبه لكيبك هل يمكن اضافة الاولاد للملف بعد المقابله او اثناء المقابله لانى سمعت ان بعض الناس بياجلوا لهم مقابلتهم لانهم لم يخطروا بالتعديل قبل المقابله وشكرا؟؟؟؟

هو طبعا كل ما المستوي يزيد يبقي افضل, بس انت احسن حاجة وقت الانترفيو تكون مسجل في القرصات و تقولهم انا بكمل تعلم اللغة و ان شاء الله ابقي احسن كتير عقبال لما تيجي الاقامة

بسرعة جدا ضيف ولادك قبل الانترفيو, دول بيدوك نقط اكتر و كمان صح المقابلة حتتاجل لحد ما تضيفهم, الاضافة سهلة جدا, الطفل بتدفعله 150 دولار كندي و تبعت شهادة الميلاد المترجمة عند اي مكتب و بال دي اتش ال بسرعة عشان حسب ما فهمت انك الانترفيو ممكن تكون 11 اللي جاي

$this_var =الاخ العزيز جادولى 
ان اول مرة مرة ادخل على موقعك الكريم ده وفعلا وجدت قد ايه مبزان حسناتك بيزيد يوم عن يوم وانت فعلا من قيل فيهم ان هناك اناس خصصهم الله بقضاء حوائج الناس حببهم فى الخير وحبب الخير فيهم )
انا لن اسأل اى سؤال ولن اقول اى شىء الا شىء واحد 
تاكد يااخى العزيز ان ماتفعله هذا قد يكون اهم من الجهاد  لانك بمعلوماتك القيمة انك تساع مابقرل من الملاببن من المهاجربن

[gadolly]

بجد احلي رد سمعته من احلي انسان

[AL MUHAGER]

عم جادولي ... عمي و شيخ حارة المصريين في كيبك

انا بطلب من سيادتك وقت مستقطع وترد على السؤال الفني :)

انل فهمت من كلامك ان في كيبك منح بحوالي 700 دولار في الشهر للماستر

سؤالي هو

هل لازم يكون الماستر في جامعة فرنسية

او

باللغة الفرنسية

ولا

ممكن ندرس في جامعة انجليزي وبعد ما نخلص الماستر نفك على مقاطعة تانية :)

[hamoudi]

بالنسبه للمنح هل ترد بفائده ام ترد بنفس القيمه ام انها منحه لاترد؟؟؟

[hamoudi]

ايه يا جادوللي انت نسيت مانا سبت ليك انت بالذات تاريخ بتاع ملفي في المنتدى بتاع منى عبدون

[gadolly]

طيب ممكن يا نصار اول 3 ارقام عشان نشوف احنا فين بالضبط

المنح بتكون الف و بترجع 300 و 700 لا ترد

اعتقد ان المنح دي فيدرال يعني علي كل الجامعات, و طبعا ممكن تخلص من اي جامعة و تكت علي اي جهة

[ناجى المصرى]

انا يا جماعة حاخد مقطع مهم لوجدي (مش بتاعي )و احطه هنا عشان هو خاص اكتر بكيبك ممكن ينفع

أنا حاحاول أرد عليكي... طبعاً على أساس إنك حتيجي مونتريال... أما تورونتو فممكن العزيز هادي أو اي من الأخوة الأفاضل هناك يفيدوكي...

معلش أنا ممل شوية وباحب التفاصيل...يمكن لأني مؤمن إن التفاصيل الصغيرة دي هيا دايماً إلى بتعمل فرق في كل حاجة...إستحمليني...

شوفي يا ست الكل...

قبل ما تسافري تعملي ليستة موفتكسة بكل إلى عندك ولو تقدري إلي عند الجيران بالمقتنيات الشخصية بتاعتكم... طبعاً أهم حاجة المجوهرات وما خف حمله وغلا ثمنه... وبعدين تلفي البيت كدة أوضة أوضة... وتكتبي... عدد 3 سجادة عدد 2 لوحة عدد 1 شمعدان فضي.. وهكذا...

وتعملي نسختين من الليستة دي...وحاقولك فايدتها بعدين...

ثانياً... الفلوس إلى حاتخديها معاكي... حاولي تاخدي معاكي كاش بس مش كتير... يعني عشر ألاف أخضر أو كندي على الأكثر... (وياريت أقل...)...أما باقي الفلوس –خاصة لو مبلغ كبير- فتروحي البنك تخليهم يعملولك شيك بنكي بأسمك...وتاخديه معاكي...(أوعي تنسيه)

وبعدين... تبتدي تدوري على النت على أوتيل في الdowntown....

أنا عن نفسي كنت حاجز قبل ما أجي في chateau royal ... ده في شارع crescent في قلب قلب نص البلد...

هو مش قد كدة... بس ميزته إن أوضه واسعة وسعره معقول وأهم حاجة (بالنسة لي وأعتقد بالنسبة لأي حد عنده أولاد صغيرين) إن فيه في الأوض kitchenette... أيام ما جيت كان ب 170 دولار في الليلة.... إعملي حسابك في حوالي عشر أيام... فترة معقولة تكوني خلصتي فيها أوراقكم وتكوني شوفتي سكن وفرشتيه بالأساسيات...

هو الموقع بتاعه www.chateauroyal.com.... بس مش عارف ليه مش شغال...عامة تقدري تعملي بحث عليه وحتقدري تاخدي فكرة... وعامة قبل وصولك إن شاء الله ممكن نبقى نقولك على معلومات طازة....

لما حتوصلي المطار إن شاء الله المواضيع حتلاقيها أبسط ما تتصوري.... خاصة إن معاكي أطفال... والأطفال هنا ميزة كبيرة حتعرفي فايدتهم ...بيفتحوا كل الأبواب المتقفلة... يعني لو فيه طابور حتلاقى واحد جاي وفاتحلك سكة علشان تعدي...وتخشي على الemigration... هناك حتقعدي مع شخص ظريف تبع الحكومة الكندية حيقولكوا بقين حلوين من عينة bienvenu وكدة....وبعدين حايملا معاكم إستمارة الدخول لكل شخص فيكم وحايسألك معاكي فلوس كاش قد إيه وحيسجلها... وحيدردش معاكم شوية يقولكوا إلى لكوا وإلى عليكوا...الإستمارة غلى حايدهالكوا (IMM 5292) تحافظوا عليهم زي عنيكوا...لانكم حتستخدموها كتير في الشهور التالية...

هنا حيسألكوا سؤال حيوي... عنوانكوا إيه... وده العنوان إلى حيبعتوا عليه الPR بتاعكم... أنا فهمت إن مالكيش قرايب هنا... لو ليكي إديهم عنوانهم والجواب حيبقى يروحلهم... لو مالكيش... قوليله إحنا لسة معندناش عنوان... حيديكي نمرة تليفون تتكلمي فيها علشان تبلغيهم بعنوانك في أقرب وقت...

وبعدين حايخدكم يصوركم (خلي المشط معاكي في الشنطة) علشان كارت الPR... (ملحوظة...لو معاكي طفل صغير أوي حاولي على قد ما تقدري إنه يبقى ثابت في الصورة وتتأكدي من الراجل إن الصورة إلى طلعت مطابقة للمواصفات لأن هما ساعات بيستسهلوا خاصة في تصوير الأطفال وبعدين بكام شهر يجيلك جواب يقولك الصورة ماتنفعش تعالي صوري الأولاد تاني...حصلت معايا)....وحايديكوا شوية فلايرز وكتيبات شبيهة بإلى السفارة بعتتهالك قبل السفر...

وبعدين يا ستي حاتخشوا على بتوع quebec... هنا حيشوفوا ال csq (certificat de sélection du Québec ( بتاع كل فرد... الست حتبقى بتتكلم بالفرنساوي... تردوا عليها بالفرنساوي...وحتديكوا برضه كبشة فلايرز وكتيبات...

وبعدين...تخشوا على بتوع الجمارك... هما عادة اغلس من الغلاسة بس مع المهاجرين الجدد ألطف من اللطف...وخاصة لو معاكوا أطفال...حتسألك معاكي إيه...قوليلها (ولو معاكي أي اكل للأطفال قولي...مهم أوي)...وقوليلها بس إحنا لسة في حاجات جاية ورانا... وإديها الليستة (فاكراها؟؟ حاتقولك قيمتهم أد إيه...قوليلها خمسين ألف ميت ألف...زي ما أنت عايزة... زبعدين حايختم على الورقة دي... برضه ؛ايسالك على الفلوس إلى معاكي... تقوليله على الكاش (إلى مكتوب في الورقة إلى الراجل صاحبنا لسة ماليها) وتقوليلها على أي شيك بنكي معاكي وقيمته...وعادة حاتتطلب تشوفه... وحتثبت المبلغ ده.... الكلام ده مهم أوي... ممكن ما ينفعكيش بس ممكن ينفعك أوي أوي بعد كدة في تظبيط الضرايب... وعامة شئ مابيخسرش...

أنا شايفك دلوقتي أتفجعتي وحسيتي إن الموضوع مكلكع... أحب أقولك كل إلى أنا قلته ده من أول وصولك المطار لحاد ركوبك التاكسي برة المطار مش حياخد أكتر من نص ساعة... وغالباً أقل...

حتركبوا التاكسي..الأوتيل يا باشا لو سمحت... (معظمهم لبنانيين ومغاربة على فكرة)... تروحوا الأوتيل تعملوا check in ... تطلعوا الأوضة....قبل ما تفتحوا الشنط وقبل ما تكلموا الأهل تطمنوهم في حاجة مهمممممممممة أوييييييييي..... تفتحوا الbooklets إلى إيدوهالكوا في المطار حتلاقوا عناوين لكذا شركة تأمين صحي خاص... نقي اي واحدة فيهم... تكلموهم وتعملوا insurance لكم كلكم لمدة 3 شهور على الأقل... إعملوه بميت ألف أو ربع مليون...مهم اويييي....ولو ينفع تعملوه قبل ما تسافروا إعملوه.... (أنا بنتي سخنت أول يوم جينا... رحنا مستشفى أطفال جنب الأوتيل... دفعت 500 دولار علشان بس دكتور يشوفها... وبعدين طلع مافيش أي حاجة...نظام كمادات ساقعة وتمبرا...

تاني يوم الصبح جوزك ممكن يخلص موضوع الsocial insurance لوحده... بس الmedicare لازم تكوني معاه... وتفتحوا حساب في البنك...وتحطوا الشيك في حسابكم...(على فكرة...هو حيخش في حسابك بس حيفضل متجمد شهر...يعني ماتقدريش تصرفي منه...لذلك خلي معاكي كاش كفاية والأهم كريدت كارد من مصر إن أمكن تصرفي بيه الشهر الأول وحد يبقى يسدد لك في مصر...نظام بابا بعت فلوس...

بالنسبة للسكن...وده مهم إنك تحدديه بدري بدري علشان تقدري تبعتي العنوان لبتوع الهجرة علشان يبعتولك كارت الPR عليه....

حاولي في البداية إنك تتعاملي مع شركة مش أفراد...يعني شركة بتبقى مسئولة عن عدد المباني...أولاً حيبقى عندك إختيارات كتير... ثانياً بيبقوا مسئولين لو حاجة حصلت في الشقة...يعني مثلاً لو التدفئة حصل فيها حاجة بتكلميهم بيبعتولك واحد بتاع صيانة على طول...كدة...

عادة حتضطري تدفعي شهرين مقدم لأنك معندكيش اي تاريخ في كندا...ولو العقد سنوي (ومعظم البيوت كدة) وحبيتي تخلعي من الشقة قبل السنة حيروح عليكي الشهرين (وده برضه نظام في كل حتة)...

في حاجات كتير لازم تشوفيها في البيت إلى حتسكني فيه بس ده موضوع لوحده ممكن نبقى نتكلم فيه لما يجي وقته...خلينا في المناطق...

انا عن نفسي سكنت في Ile des soeurs ... وكنت متكلم مع إحدى الشركات إلى بتدير عدة مباني وبيوت في الجزيرة... بالإيميل طبعاً... وكنت محدد ميعاد معاهم تاني يوم وصلت...رحت فرجوني على كذا شقة... نقيت واحدة ومضيت العقد يوميها وكلمت علطول الهجرة أديهم العنوان... هو العيب إن العقد سنوي... ودي كانت مخاطرة مني... بس الصراحة المكان جميل جداً... ويعتبر من أرقى وأمن المناطق في مونتريال... وله مميزات كتيرة...منها إنه 10 دقايق بالعربية من الdowntown... وأنا على حسب ما فهم إنك عايزة تشتغلي في التصدير... ومعظم شركات النصدير والملاحة بتبقى في الdowntown...ده غير الجامعات...ده غير إن واصل إتنين هاي وايز (10 ، 20) ودول بيعتبروا شرايين مونتريال ومنهم تقدري توصلي أي حتة... ده غير إن المنطقة هنا أمن حتة للأطفال... في طريق للعربيات...وطريق للعجل...وطريق للبني أدمين...وبيفكروا يعملوا طريق للكلاب والقطط... فيه باركات كتير ...حضانات كتير... معظمهم حلوين...(لاحظي إن علية القوم ساكنين هنا)...غير إن المكان له طابع خاص في البني أدمين إلي ساكنين فيه... يعني لا هو west وتلزيق...ولا هو east وغباوة ولا هو downtown وزحمة...جزيرة...جوة جزيرة....فيه غابة صغنونة لو بتحبوا المشي... فيه ملاعب تنس وحمامات سباحة مترمية في كل حتة... وموقع المنطقة إستراتيجي بين Ile de montreal والsouth shore....

طبعاً مافيش حاجة من غير عيب... والعيوب هيا...

مافيش مترو بيعدي هنا... أوتوبيس بس... وإن كان فيه خطين اوتوبيس...ومثلاً انا لو عايز أروح ال downtown

ومش عايز أوجع دماغي بالركنة باخد أوتوبيس بأكون هناك في تلت ساعة...بس لازم عربية... (وإن كان في جميع الأحوال العربية أمر ضروري)

تاني حاجة المنطقة غالية حبتين في الإيجارات... بس لو حتحطي في إعتبارك كل الخدمات إلى بتخديها حتلاقيها مربوحة...يعني مثلاً شقة أوضة واحدة تخشلها في حوالي 800-900، وشقة أوضتين فوق ال1100...بيت تلات أربع أوض..فوق ال2000.... طبعاً ال900 دولار إلى بتدفعيهم هنا في أوضة ممكن تاخدي بيهم أوضتين في ختو نص نص...أو حتى بيت كامل في الأدغال...بس مانصحكيش.... لأن بيتك والمنطقة إلى إنت حتعيشي فيها حتأثر جامد على تكيفك وتقبلك للوضع الجديد...يعني يا حتحبي البلد وغلى فيها...يا حاتكرهي كندا وإلى فيها....

شوفي مثلاً الأخ العزيز إيهاب سالم لما راح عمل لاندينج وأصدقاءه إلى قعد معاهم كانوا عايشين في حتت حلوة...الراجل نفسه إتفتحت وأخد صور وتفكيره للقرار الهجرة بقى إيجابي... أما مثلاً لو كان راح لأصدقاءه لقاهم عايشين في منطقة مش قد كدة...كان نفسه إتصدت وبدأ عقله يودي ويجيب....

تالت عيب...وإن كنت لا أعتقد إنه عيب أوي بالنسبة للي عندهم اطفال هو إن المنطقة هاااادييييية.... يعني لو واحد جاي بطوله وعايز كل يوم يخرج يروح حتة مش حتاكل معاه خالص... وبالعكس إلى عنده أطفال ممكن دي تبقى ميزة....

أنا عامة شفت مناطق كتير...وبالمقارنة لقيت هنا أحسن حاجة... خاصة في السنين الأولى... وبعدين لما يستقر بكم الأمر إن شاء الله...وتفكروا تشتروا بيت مثلاً ففي الحالة دي ممكن يبقى فيه كلام تاني....

عامة...ده موقع الجزيرة...

www.ile-des-soeurs.ca

وده موقع شركة هنا تدير العديد من المباني والبيوت

www.structuresmetropolitaines.com

ممكن تخشي وتتفرجي وتاخدي فكرة....

ده موقع المدرسة

www2.csmb.qc.ca/iledessoeurs

الحضانات فيه كتير... وزي ما قلتلك...إلى مسجلين مع الحكومة ب 7 دولار في اليوم...وإلى مش مسجلين مع الحكومة فأسعارهم بتتراوح من 18 إلى 35 دولار في اليوم... وبعدين إنت بتبعتي تاخدي الفرق من الحكومة...

ومتسأليش أي حضانة أحسن من التانية لأن ده موضوع نسبي بحت... والمهم تبقي إنتي مستريحة للمكان والناس إلى فيه...لأنك لو مستريحة فبنتك برضه حيستريح والعكس صحيح...

فيه هنا عرب مسلمين كتير يسكنون المنطقة (معظمهم سعوديين أو مصريين وأغلبهم أطباء ومهندسين يدرسون في mcgill و Concordia )....

في أماكن برضه حلوة للسكن .westmount و rockland و Plateau Mont Royal ....بس اغلى شوية...ومحتاجة خبرة شوية في التنقية...

طبعاً الأخوة الأفاضل هنا ممكن يفيدونا أكثر كل حسب المنطقة التي يعيش فيها....

بالنوسبة للتطعيمات فدي ما تشغليش بالك بها...إنت إمشي مع التطعيمات بتاعة مصر عادي لحاد ما توصلي... وقبل ما تسافري تروحي للدكتور بتاعك خليه يكتبلك شهادة أو على الروشتة بتاعته التطعيمات إلى بنتك خدتها كلها بالإنجليزي...لما تيجي هنا إن شاء الله... وبعد ما الmedicare يجيلك...تاخدي البنت وتروحي على أقرب عيادة جنب البيت... كل طفل هنا لازم يبقى فيه له دكتور... فالدكتور حيملى ورقة وتمضي عليها وتديله قائمة التطعيمات إلى البنت أخدتها...هو حيعملها carnet de vaccination وحايكتب التطعيمات إلى هيا خدتها في مصر وبعدين حايشوف إيه إلى ناقصها من التطعيمات حسب النظام هنا ويحدد معاكي ميعاد تودي البنت تطعم وبعد كدة عادي بقى...كل تطعيم في ميعاده زي بقية الشعب (نظام كمل شهرين يطعم ضد الدرن...السل يعني لو ناسي).... كدة...

لو فيه اي مشكلة لا قدر الله ممكن تروحي لأي دكتور على فكرة...إنت حرة... بس التطعيمات والمتابعة الدورية فيفضل يبقى في أقرب عيادة جنب البيت...أما لو أي حاجة تانية فأنا بودي بنتي في عيادة إسمها tiny tots....هيا بعيدة شوية...بس فيها أحسن دكاترة أطفال في البلد... وده الموقع بتاعهم

www.tinytots.ca

خد فكرة وأشتري بكرة...

معلش طولت عليكي يا ست نانسي...

ربنا يوفقك ويكرمك إن شاء الله...ونصيحة أخيرة...

ماتعمليش حاجة في البلد دي قبل ما تسألي وتستشيري حد عايش هنا.... لأن الواحد أتخم في حاجات كتيرة أوي لو كان لقى حد ينصحه كان ممكن يوفر عليه كتير أوي.... لا خاب من إستشار حتى لو إستشار حمار....

وعامة لسة بدري وقبل السفر إن شاء الله حيبقى فيه كلام تاني ونمدك بما هو طازج وحديث من المعلومات....

أخوكم وجدي.... دكتوراه في الهجرة تخصص كيبك لجميع إكسسوارات المحمول...

[ناجى المصرى]

اخونا /gadolly

اولا نشكرك على اهتمامك الدائم بابلاغنا عن ماهو جديد بالنسبه لموضوع الهجره لكندا وعى فكره انا متابع المشاركات عبر هذا المنتدى المحترم . ولى بعض الاستفسارات ارجو ان لااكون باْثقل عليك .

اولا : ارجو الافاده باهميه القوائم التى زكرتها وكيفيه عمل هذه القوائم وهل هى عباره عن قوائم جاهزه موجوده على النت او قوائم تكتب عن طريقنا . وما نوعيه الاصناف المدرجه فى هذه القوائم هل حسب ما زكرته انت من قبل كل شىء موجود لدينا مهما كان خفيف اوثقيل ( اثاث مثلا) . هذا الموضوع حيوى بالنسبه لنا لكوننا على وشك الانتهاء من اجراءات الهجره ومنتظرين خطاب الميديكال وربنا يسهل لنا جميعا وعلى فكره احنا قدمنا بعد المقابله لكيبيك والموافقه علينا فى شهر مارس 2008 ملف الفيدرال فى شهر ابريل 2008 ومنتظرين المديكال كما قلت لك سابقا . ارجو لك دوام التوفيق فى حياتك .

[gadolly]

و الله يا ناجي انا اول مرة كنت اسمع عن القوائم دي زيك, انا اخذت المعلومات دي منه كوبي و باست

ممكن بارده تقول لنا تاريخ فتح ملفك و اول 3 ارقام كانو فيه, عشان الاحصائيات اللي بنعملها في قائمة انتظار هجرة كيبك, بتبقي مفيدة لنا و للي حيقدم بعدنا

[Bustami]

مساء الخير يا جماعة ,,, انا اول مرة اكتب في المنتدى , وطبعا لاحظت تعليقات الاخ الشامي وغيره من الناس الحلوين الي استفدنا منهم جدا

المهم انا شفت كل المواضيع في باب الهجرة الى كندا وتقريبا قرأت كل الصفحات

لاحظت شيئ ضروري , انه فترة الانتظار مختلفة من شخص لاخر واكيد هذا يعتمد على دراسته , عمره , خبرته و شهادته

لو كل واحد عرّف عن نفسه في بداية كل تعليق بالطريقة القديمة بتاعت (فلان الفلاني ,,, بكالوريس هندسة ,,, عين شمس ) يعني كالتالي :

بكالوريوس تجارة , 4 سنوات خبر ,هجرة من القاهرة , استلمت رقم الملف في 7 2007 , المقابلة كانت في 7 2008 مثلا يعني او

ماجستير كمبيوتر , 10 سنوات خبرة , هجرة من الكويت , استلمت رقم الملف في 8 2002 المقابلة في 5 2004 لاندينج 9 2006 وهكذا

لان السؤال متكرر دائما ومن الصعب التكهن بالمدة الحقيقية علما انها مذكورة في الويبسايت بتاع كندا

[gadolly]

هام جدا

دة شات علي الياهو كان بيني و بين حمودي و كان فيه معلومات مهمة اوي و اخطاء بيقع فيها المحاميين بتاخر الانترفيو

MOHAMED e appears to be offline and will receive your messages after signing in. You can also send a message to MOHAMED e's mobile device.

Send an SMS Message (Ctrl+T)

MOHAMED e: هلا

ahmed gad: اهلا

MOHAMED e: كيف الاخوال

MOHAMED e: الاحوال

ahmed gad: الحمد لله

MOHAMED e: درجة الحرارة كام فى كيبك النهارده

ahmed gad: طيب اعرف انت مين الاول

MOHAMED e: محمد مصري 36 سنه مراجع حسابات

MOHAMED e: من المنصورة

ahmed gad: الجو النهاردة سقعة

MOHAMED e: كام درجة الحرارة

ahmed gad: هي ماها المنصورة الشعب كله منصورة

ahmed gad: 17

MOHAMED e: انت منين

ahmed gad: الاسكندرية

MOHAMED e: انا المدام بتاعتى من اسكندرية

ahmed gad: بلديات يعني

MOHAMED e: لا خلاص اخدت الجنسيه المنصورية من 9 سنين

MOHAMED e: عرفنى بنفسك

MOHAMED e: انا اعرف بس ان جادوللي

MOHAMED e: انك

ahmed gad: احمد

ahmed gad: و انت

MOHAMED e: محمد 36 سنه من المنصورة محاسب

ahmed gad: هو انت مقدم امتي

MOHAMED e: انت كام سنه ومنين من اسكندرية

ahmed gad: انت اسمك ايه علي المنتدي

MOHAMED e: انا مقدم كيبك 15/10/2006

ahmed gad: انا 31

MOHAMED e: hamoudi

MOHAMED e: انا لسه باعت ليك النهارده اخر حاجه اعرفها

ahmed gad: قبل الجواز كنت زيزينيا و بعد الجواز عصافرة

ahmed gad: اهلاااااااا

MOHAMED e: اهلا بيك

ahmed gad: هو انت حمودي بقي

MOHAMED e: ايوه ياسيدي

ahmed gad: طيب انا عايز اعرف التاريخ بتاع فتح الملف

ahmed gad: اللي موجود في الوصل الاحمر

MOHAMED e: انا قلت لك

MOHAMED e: 15/10/2006

ahmed gad: مش اللي موجود في اول الجواب اللي جالك

MOHAMED e: وفى فى المكتب الى انا مقدم عن طريقه

MOHAMED e: ايوه

MOHAMED e: ده فى المكان الى انت قلت عليه

MOHAMED e: فى ناس 6/2006

MOHAMED e: مقابلتها فى 11

ahmed gad: يعني 15 10 2006 دة مكتوب في الوصل الاحمر

MOHAMED e: المكتب الى انا مقدم تبعه فى 4 افراد مقدمين 6/2006

MOHAMED e: ايوه

ahmed gad: يبقي يا باشا دة تاريخ فتح الملف

MOHAMED e: واحد منهم جه له الخمقابله فى 11

MOHAMED e: الباقى لسه بس ممكن يجي الجواب

ahmed gad: انسي بقي 2 2007 دي

MOHAMED e: فى نفس المكان الى انت قلت عليه

MOHAMED e: الى عو بتاع الشيك

MOHAMED e: هو

ahmed gad: خليك بس واحدة واحدة معايا

MOHAMED e: فعلا ده الى حصل

MOHAMED e: بس انا متهييئلى هادخل فى مقابلات فبراير

MOHAMED e: 2009

MOHAMED e: قول

ahmed gad: انت الرقم اللي مكتوب في الوصل الاحمر كام

ahmed gad: هم صحاب نصار 197

ahmed gad: اول 3 ارقام

MOHAMED e: 000 018

ahmed gad: يبقي انت قبلهم

MOHAMED e: ايوه

MOHAMED e: بس مافيش حاجه جت

ahmed gad: طيب الرقم التالت كام

MOHAMED e: 8

ahmed gad: 188xx

ahmed gad: hmm

ahmed gad: يعني انت قبلهم بالف رقم

MOHAMED e: ايوه

MOHAMED e: بص بالظبط كده

ahmed gad: الشهر بيقدم 250

ahmed gad: يعني هم مضبوط في 2 2007

MOHAMED e: da 000 018 8

ahmed gad: عشان انت 10 2006

ahmed gad: ايوة انا فاهم

ahmed gad: هو صح كدة الترتيب نمطقي

MOHAMED e: 'df h.hd il rfgd

MOHAMED e: طيب ازي مقابلتهم قبلي

ahmed gad: انا قلت احتمال اللي حصل النهاردة علي المنتدي

ahmed gad: هم بيفتحوا شهور كتير مع بعضها و كل موظف بياخد حبة و اللي بيخلص بيبعت الجوابات

MOHAMED e: ممكن

MOHAMED e: بس انا كنت فاهم ان الموظف الى بيبقى باعت الجواب هوالى بتقابله

MOHAMED e: زي رنيم الى باغته ليا

MOHAMED e: الى ردت عليا فى الجواب

MOHAMED e: طيب بالطريقه دي ممكن اكون انا من ضمن الناس الى هايكونوا فى مقابلات 2/2009

MOHAMED e: لانى متهيئلي هم خلصوا تحديد الى هايقابلوهمم فى 11/2008

ahmed gad: لا

ahmed gad: هم لسة شغالين

MOHAMED e: طيب ربنا يطلف

MOHAMED e: انت فى 12/2006

ahmed gad: ايوة

MOHAMED e: يعني انت ممكن 2/2009

MOHAMED e: ده بفرض ان ربنا كرمني وجت المقابله

ahmed gad: بص معلومات اكيدة الملفات اللي شغالين فيها دلوقتي 9 2006

MOHAMED e: ليا فى الفتره القادمه

MOHAMED e: طيب انا فى لسه 3 افراد من المكتب الى انا فيه مقدمين 6/2006

MOHAMED e: لم ياتي لهم شيء

ahmed gad: حتلاقي الجوابات في السكة

ahmed gad: دة اكيد و خدها ثقة مني

ahmed gad: ان شاء الله

ahmed gad: انت الدور عليك الشهر دة او اللي جاي بالكتير

MOHAMED e: طيب ربنا يسهل واكون معاهم

ahmed gad: ان شاء الله

MOHAMED e: نفسي اخلص من القصه دي

ahmed gad: انت اخبار الفرنساوي ايه

ahmed gad: لا يا باشا دة لسة الفيدرال

MOHAMED e: مع انى فى الفرنساوي سيء جدا بس ان شاء الله ناو اول ماييجي الخطاب اقفل مكتبي

MOHAMED e: واشتغل

MOHAMED e: فرنساوي

ahmed gad: اشتغل من دلوقتي

MOHAMED e: انا مستوى 5

ahmed gad: حلو اوي

MOHAMED e: ومعايا شهادةالدلف a2

ahmed gad: انت في المركز الفرنسي

MOHAMED e: زوجتي لسه مستوى اول

MOHAMED e: ايوه

ahmed gad: اشطة منت كويس جدا

MOHAMED e: بس فىالمنصورة

MOHAMED e: 5 كفاية

ahmed gad: مش مهم الزوجة

MOHAMED e: اصل المحامي بتاعى عايز شهادة الدلف b2

ahmed gad: بدال تعرف تتهته خلاص

ahmed gad: ملهاش لازمة الدلف

MOHAMED e: هى لسع بادئة من شهر

ahmed gad: مين قالك انها مهمة

MOHAMED e: خلاص لو انا عرفت اخد كور كمان المستوى السادس هاحاول

ahmed gad: مش بعت شهادة المستوي الخامس

MOHAMED e: لا لسه

MOHAMED e: بص ياسيدي

MOHAMED e: المحامي بتعي

MOHAMED e: قال ليا

ahmed gad: الحق ابعتها بسرعة اوي

MOHAMED e: فائدة الدلف

MOHAMED e: ان بتوع المقابله لو اتلككم ليك على اللغه

MOHAMED e: بيقدم تظلم بالدلف

MOHAMED e: المستوى الخامس

MOHAMED e: على فكره انا عندي 4 اولاد

MOHAMED e: ضايف 2 واتنين لسه برده

ahmed gad: يعني يا باشا 8 نقط

MOHAMED e: بس حد قال ليا ان الحد الاقصى للاولاد 4 نقاط

MOHAMED e: والمحامي بتاعي

ahmed gad: لازم تضيف ال2 بسرعة

MOHAMED e: كان قايل ليا فى القانون الى انا باعت عليه كل طفل بدرجتين

MOHAMED e: مش عارف اى حاجه اصدق

ahmed gad: ايوة كل واحد ب 2

ahmed gad: يعني 4 في 2 ب 8

MOHAMED e: ده القانون الى كان شغال 10/2006

ahmed gad: يا عم سيبك من المحامي

MOHAMED e: لكن الوقتى حد اقصى 4 صح

MOHAMED e: حاضر ياسيدي

ahmed gad: بص يا محمد الكلام ده مهم والله

MOHAMED e: بس الوقتى حد اقصى اربع درجات واايه

MOHAMED e: قول انا معاك

ahmed gad: لازم النهاردة تترجم شهادة ميلاد الاتنين التانيين

ahmed gad: و تروح البنك و تدفع 300 دولار و تبعتهم علي السفارة

MOHAMED e: ان شاء الله يوم الاحد هاروح

MOHAMED e: بنك نوفاسكوتشيا

ahmed gad: و في نفس الجواب تحط اخر شهادة فرنساوي لك و للمدام و اي تطور في الخبرة

ahmed gad: مش عارف انه بنك

MOHAMED e: لا لسه المدام

MOHAMED e: ماخلصتش الاول

ahmed gad: اللي انت دفعت في اول مرة و الشيك موجه لنفس الجهة

MOHAMED e: قدامها لسعشهر وتهلص

MOHAMED e: وتخلص

ahmed gad: يا محمد

MOHAMED e: اتفضل

ahmed gad: غلط كدة عشان اريحك انا كلمت السفارة امبارح في التليفون

ahmed gad: هم دلوقتي شغالين في ملفات شهر 9

ahmed gad: و قلتلها علي صحاب نصار قالتلي هي المفات كتيرة اوي مفتوحة

ahmed gad: يعني احتمال ندخل كلنا في الانترفيو دي

ahmed gad: يعني ممكن يجيلك الجواب الشهر دة

MOHAMED e: ياريت يفتحوها كلها علشان فى الحاله دي هايخلصوا نفسهم

MOHAMED e: ويعملوا مقابلات اى كلام وسريعه

ahmed gad: هو التقييم بيكون علي الملف المفتوح اللي قدامهم

ahmed gad: اسمعني بس

MOHAMED e: معاك

ahmed gad: انت ملفك كدة ناقص 2 ولاد

ahmed gad: و ناقص شهادات اللغة و دي تقلل درجاتك

MOHAMED e: والبنك اقدمه فىالمقابله

ahmed gad: عشان كدة لازم الحاجات دي توصل قبل ما يفتحوا ملفك

MOHAMED e: وا لازم الوقتى

ahmed gad: ايوة

MOHAMED e: طيب حاضر

ahmed gad: لو الملف اتفتح و الحاجات دي ناقصة تبقي عطلة جامدة

ahmed gad: حتضيع عليك الانترفيو لحد ما تكمل الاولاد

MOHAMED e: ان شاء الله على اخر الاسبوع الجاي هايكونوا خلصانين

MOHAMED e: بس البنك الحد الادنى قد ايه

ahmed gad: و لو جت انترفيو و اخذت الاقامة مش حتقدم فيدرال الا لما تضيف الاولاد و اضافتهم عطلة اكتر

MOHAMED e: المحامي بتاعى بيقول 10000 كندي كويسين

ahmed gad: يعني ايه

MOHAMED e: اكتر من كده بيسالوك عن المصدر

ahmed gad: تقريبا 6000

ahmed gad: بص هو في جدول

MOHAMED e: احنا 6 افراد

ahmed gad: هو موجود علي السيت

MOHAMED e: انا شفته بس لقيت المبلغ يوصل ل18000 دولاز لعدد 6 افراد

ahmed gad: لا

ahmed gad: دة الفيدرال

MOHAMED e: وده مبلغ كبير حوالي 108000

ahmed gad: كيبك اقل كتير

MOHAMED e: طيب هابقى اشوفه ان شاء الله بليل

ahmed gad: استي اشوفه لك

MOHAMED e: ماشي

ahmed gad: انت عايز تقفل

MOHAMED e: لا معاك

MOHAMED e: الالو انت وراك حاجه

ahmed gad: ثواني

MOHAMED e: اتفضل

ahmed gad: http://www.immigration-quebec.gouv.qc.ca/e...tml#sufficiency

ahmed gad: زي ما قلت لك اقل من 6000

MOHAMED e: هو حاطط لحد 3 اطفال

MOHAMED e: لو اخدناها نسبة وتناسب فعلا 6000

ahmed gad: ايوة كل طفل زيادة 340

ahmed gad: دة من الورقة التانية اللي انت ملتها اكيد

MOHAMED e: طيب ربنا يسهل

ahmed gad: http://www.immigration-quebec.gouv.qc.ca/p...n/dcs/D21-A.pdf

MOHAMED e: طيب ممكن ورقة البنك اقدمها فى المقابله

ahmed gad: يا عم مش حيبعتوا المقابلة الا لما يكون كل حاجة كاملة

MOHAMED e: ماشي

ahmed gad: املي الورقة دي و امضي عليها و ابعتها مع شهادات الميلاد و الفرنساوي

MOHAMED e: هو كان المحامي فىالنص قال لي تعال وقع على ورق المقدره الماليه ووقعت على ورق انى املك المبلغ ده

ahmed gad: دة مش لازم حساب بنك دة تعهد بس و يوم المقابلة بيشوفوا حساب البنك

MOHAMED e: طيب يبقى كده فعلا الى خصل

MOHAMED e: يبقى لسه ناقص الفرنساوي والاولاد

ahmed gad: و علي فكرة هم مش بيدقوا اوي هو المهم انك تكتب العهد عشان متطلبش منهم اي معونات في اول 3 شهور

ahmed gad: الكلام دة مش كلامي

ahmed gad: بتوع الهجرة بيجوا كل سنة الكلية و يقولولنا الكلام دة

MOHAMED e: ماشي

MOHAMED e: طيب ماقالوش حاجه على الفرنساوي

MOHAMED e: لان سمعت ان ظابط الهحره

MOHAMED e: دايما بيهزء الناس الى مستواهم ضعيف م

MOHAMED e: مع ان الى موجود على الست

MOHAMED e: السيت

ahmed gad: انت كاتب مستوي كام في الابليكيشن

MOHAMED e: بيقول تكون لغتك كافيه للعبور من ظابط الجوازات

MOHAMED e: مش عارف هو كاتب ليا كام

MOHAMED e: وهو الوقتى فى كندا

ahmed gad: ازاي مش عارف

MOHAMED e: بس هو دايما كان بيزقنى علشان اوصل للدلف b2

ahmed gad: دة مهم جدا

ahmed gad: هو انت مضيت علي الابليكيشن

MOHAMED e: هابعت له ميل

MOHAMED e: لا هو الى مضى عليه

ahmed gad: لازم ميكونش حط مستوي اكتر من 3 ليفل من مستواك الا اعتبروك كذاب

MOHAMED e: يعنى لو هو حط 8

MOHAMED e: وانا اخدت معياي شعاددة ال5

MOHAMED e: كده ماشي

ahmed gad: تعدي كدة

MOHAMED e: شهادة

ahmed gad: مش كذاب يعني

MOHAMED e: ماعتقدش انع يكون زود عن 8 لو كان حاطط

ahmed gad: و انا كمان

ahmed gad: استحالة يحط اكتر

ahmed gad: 8 دة اخر المتوسط

MOHAMED e: خلاص يبقى حتىلو هو كان متفائل مش هايضر

MOHAMED e: تانى باكد عليك لو هو وضع 8

ahmed gad: تعدي

MOHAMED e: وانا معايا شهادة المستوى الخامس فى المقابله تمشي مش عايقولوا ليه انت ليه حاطط ال8

ahmed gad: بقولك ينفع تحط المناقشة دي علي المصريين عشان الناس تستفاد

ahmed gad: تعدي كدة

ahmed gad: ممكن تقول انا لسة بكمل الدراسة

MOHAMED e: توكلنا على الله

MOHAMED e: فكره كويسه

ahmed gad: طيب نكمل الكلام

ahmed gad: لما تبعت شهادات ميلاد الاولاد لازم تبعت لهم صورة شخصية

ahmed gad: استني اشوفلك الشيك يطلع باسم مين

MOHAMED e: اه دي عارفها

MOHAMED e: وزير خارجية كيبك

MOHAMED e: بس نكتب عليه عدد الافؤاد

ahmed gad: اه صح

MOHAMED e: مالية اسف

ahmed gad: Cheques and money orders must be made out to the Ministre des Finances du Québec.

ahmed gad: Ministre des Finances du Québec

MOHAMED e: صح

ahmed gad: id ]d hg[im fhgqf'

ahmed gad: هي دي الجهة بالضبط

MOHAMED e: ان شاء الله

ahmed gad: ان شاء الله

MOHAMED e: انا ان شاء الله فى خلال اسبوه ابقى مخلص الحاجات دي

MOHAMED e: باقي لسه موضوع شهادات الخبره

MOHAMED e: ده موضوع ضروري جدا

ahmed gad: حاول بارده تبعت اخر شهادات خبرة

MOHAMED e: بس انا دخل عندي عميل المكتب الوقتى ولازم اقعد معاه شوية

MOHAMED e: لا مافيش تطور

MOHAMED e: انت موجود امتى اون لاين

MOHAMED e: دايما

ahmed gad: انا عاجبني اوي المحامية بتاعة مني عبدون اول ما حست ان ميعاد جوابات الانترفيو قربت عملت ابتديت لهم

ahmed gad: 12 بليل بتوقيت مصر

MOHAMED e: انشاء الله لنا لقاء غدا

ahmed gad: ان شاء الله

MOHAMED e: انت اطبع بقى الموضوع ده وضيفه لانى لازم امشي الوقتى

ahmed gad: ماشي

ahmed gad: سلام

[ناجى المصرى]

و الله يا ناجي انا اول مرة كنت اسمع عن القوائم دي زيك, انا اخذت المعلومات دي منه كوبي و باست

ممكن بارده تقول لنا تاريخ فتح ملفك و اول 3 ارقام كانو فيه, عشان الاحصائيات اللي بنعملها في قائمة انتظار هجرة كيبك, بتبقي مفيدة لنا و للي حيقدم بعدنا

اخونا العزيز / gadolly

اشكرك على محاوله المساعده وارجو عند علمك باْى جديد بالنسبه لموضوع القوائم تبلغنا بها على وجه السرعه .

احنا فتحنا الملف الخاص بكيبيك فى شهر اغسطس 2005 ورقم الملف فى حينه هو AD156وتم عمل المقابله كما اخبرتك من قبل وياريت لو عندك معلومات عن الفتره المتبقيه لحين عمل الفحص الطبى يبقى شىْ جميل .

سوْال تانى ومعلش انا عارف انى معطلك لو المدام تحب تعمل ماستر فى كيبيك ما المطلوب من الاوراق وكذلك من الشروط الواجب توافرها وهل يوجد سن معين للمتقدم وباقى المعلومات حول هذا الموضوع . ولك جزيل الشكر .