بدر مدينة واعدة يغفل عنها الكثيرون

[احمد عز]

مدينة اعتقد ان ما حدش خد باله منها لسه..........المتر سعره معقول ولسه السماسرة ما كلوهاش

طبعا انتوا عارفينها مدينة بدر الجديدة .........هعرفكوا بيها اكتر

المدينة تقع بجوار الشروق وهليوبلس الجديدة وامامها المنطقة الترفيهية لمدينة مدينتى وبعدها بكام كيلو على طريق الاسماعيلية العاشر من رمضان

المدينة على الكيلو 43 على يعد 20 دقيقة من مصر الجديدة

هيمتد المترو اللى هيوصل المطار ليها لانهم هيشيلوا قطر السويس اللى بيمر قريب منها ويعملوه امتداد للمترو.....وحاليا بيعملوا الدائرى الاقليمى اللى هيبتدى منها ويمر بالعاشر والدلتا وينتهى فى السادات.

فيها الجامعة الروسى وبيعملوا فيها جامعة التكنولوجيا دلوقتى اللى هتبتدى الدراسة فيها السنة دى فى مقر مؤقت بالدقى لحين انتهاء المبنى.

اذن المدينة ليها مستقبل جميل جدا وهنعرف ده فى المستقبل القريب باذن الله......ذى ما كنا زمان بنسمع عن اكتوبر ونقول ياه ديه بعيدة قوى وما اشتريناش فيها ايام لما كان المتر ب15 جنيه وبقينا نشترى لما المتر وصل 2500

انا بقولكوا خدوا بالكوا واتعلموا واشتروا لاولادكم اراضى فى اى مدينة جديدة لسه ماحدش خد بالو منها لان المدن الجديدة هى المستقبل دلوقتى.........وانا باستغرب من الناس اللى راحوا اشتروا اراضى امام الشروق وهم دلوقتى فى مشاكل مع الحكومة والحكومة بتقول ديه ارض زراعية طب ما كان قدامهم بدر الجديدة معروف انها اراضى بنا .

حبيت بس اكسب فيكوا ثواب والفت نظركوا للمدينة ذى مافيه واحد ابن حلال خلانى اخد بالى منها وادينى بحاول الاقى قطعة ارض مناسبة مع العلم ان سعر المتر معقول وبدل ماكنت هجيبلى 300 متر بشئ وشويات هجيب 650 وبنفس السعر تقريبا وابنى للاولاد فيلة العمر والمدينة فيها مساحات هائلة للفيلات وكلوا بيبنى دلوقتى وطبعا الشروق كانت زيها وكان سعر المتر حلو وفجأة قفز قفزة عجيبة وبيتهيألى ان ده هو اللى هيحصل مع بدر الجديدة برده حبيت بس انبهكوا .

ارجوا ان اكون افدتكم.....................شكرا

[احمد عز]

على فكرة ياجماعة انا لاقيت جروب للمدينة هيعرفكوا اكتر بالمدينة والرابط اهوه

http://groups.google.com/group/badralqahra?hl=en&lnk=srg

لما يفتح الرابط اضغطوا على join group

وبعدين دخلوا الجى ميل بتاعكوا

تم تعديل 20 مايو 2008 بواسطة احمد عز

[sami ragab]

على فكرة ياجماعة انا لاقيت جروب للمدينة هيعرفكوا اكتر بالمدينة والرابط اهوه

http://groups.google.com/group/badralqahra?hl=en&lnk=srg

لما يفتح الرابط اضغطوا على join group

وبعدين دخلوا الجى ميل بتاعكوا

الأخ العزيز 'احمد عز' مع اني مش بحب الإسم ده بس موضوعك لفت نظري معاك حق المدينة دي مش واخده حقها في اهتمام الناس ويمكن ده علشان فعلا التجار لم يصلوها بكثافة ولكنني أعتقد أنه بعد انشاء المنطقة الترفيهية لمدينة ( مدينتي ) والتي تقع أمام مدينة بدر مباشرة والتي ستجعل من بدر مكانة أعلى من باقي المدن الجديدة والأيام ستثبت ذلك عموما شكرا لك على موضوعك :aslam: :waf:

[vipwithyou]

( تعليق خارج عن الموضوع )

واضح فعلا ان مش انا بس اللى جالى نفس الانطباع عن الاسم فشكلك يا ريس هتغير اسمك

تم تعديل 22 مايو 2008 بواسطة vipwithyou

[احمد عز]

هههههههههههههه للدرجادى الاسم تاعبكوا تقريبا المصريين كلهم دلوقتى لوسمعوا كلمة عز يقولوا انت بتقول عز يبقى انت اللى قتلت بابايا ..........ربنا يعينا على عز وافعاله......لكن ما قولتليش رأيكوا فى ان الواحد يبدأيفكر يشترى فى المدن اللى لسه بخيرها والسماسرة ماكلوهاش علشان الواحد يعلى معاها لما السعر يقفز .........انا بس لما لاقيت الموضوع محمسنى قلت اقول لاخواتى وافيد الناس كلها وكمان اللى بره مصر اللى يمكن ما يكونوش سمعوا حاجة عن المدينة.

[vipwithyou]

ياعم توكل على الله واذا عرفت تشترى بطريقة قانونيه يبقى كويس

لكن ازاى ياريس

[sami ragab]

ياعم توكل على الله واذا عرفت تشترى بطريقة قانونيه يبقى كويس

لكن ازاى ياريس

أنا مع أخي ( vipwithyou ) في ضرورة الحذر الشديد في موضوع شراء الأراضي بصفة عامة سواء في مدينة بدر أو غيرها خاصة بعد الإجراءات التي اتخذتها الحكومة في هذا النطاق وندعوا الله أن تكون هناك قرعة جديدة في المدن الجديدة لتخلص الناس من الخوف من الشراء بهذه الطريقة

[احمد عز]

لا طبعا عموما اى تداول فى العقارات لابد من اكتمال الاوراق الرسمية الصحيحة .

[عادل أبوزيد]

الإنطباع السائد هو أن مدينة بدر هى مدينة عمالية .... إلى أى مدى صحة هذا الإنطباع ؟

يمكن التحقق من هذا الإنطباع بمحاولة التعرف على حجم الكتلة العمالية هناك و شكل الإسكان السائد هناك ، و أذكر فى هذا السياق أن ضاحية حلوان حتى أوائل الخمسينيات من القرن الماضى كانت مشتى جميل و ضاحية راقية بكل المقاييس.

و نتيجة لغرس كتلة عمالية بها و إنشاء مجموعة من المصانع بها تحولت إلى شئ ربما أقل من المناطق العشوائية.

[vipwithyou]

انا شفت المدينة حديثا ًَ يا أستاذ عادل وهى فى طريقة للتقدم بجد ومنطقة واعدة

[هشام عباس]

انا كمان رحت المدينه من فتره مش كبيره وفيها منطقه كبيره جدا جدا اكاد اقول انها منطقه شاسعه اسمها الحي واسمها الحي المميز وديه كلها منطقة فيلات وقصور لأن اقل مساحه فيها 600م ولغاية 1800م واظن انها هتنهض بالمدينه وهتخليها ذات طابع راقي جدا

[ابو حودة]

ويا ترى الاسعار اخبارها ايه

[realhossam]

أنا كمان عايز أعرف الأسعار كام , بس المشكلة ان المبلغ اللى معايا صغير -30,000 بس - فيا ترى يا هل ترى ده ممكن أجيب بيه أى حاجة و لا أنا كده فى الضياع :blush2:

[احمد عز]

يا استاذ عادل مدينة حلوان كانت غير مخططة بالمرة وغير مقسمة كالمدن الحديثة الان وتقسيم المدن الجديدة الان به اسكان شباب واسكان البنك واستثمارى واسكان متميز وفيلات ...........لابد فى كل مدينة جديدة وجود هذه الاحياء بتنوعها واختلاف اسعارها اما حلوان فخضعت لنظام العشوائيات وكل واحد يشترى حتة ارض يبنيها على مزاجه اللى يبنى اربع ادوار واللى يبنى 12 وطبعا ما فيش نظام خمسين فى المية بنا والباقى مساحات خضراء علشان كده المدينة بقت تميل للعشوائية.....

لكن المدن الجديدة كلها تخضع لقوانين ونظام معين للبنا ومساحات خضرا كتير وحدائق وده نظام سائد فى كل المدن الجديدة.اذن فى كل مدينة لابد من وجود سكن للشباب وسكن للمقتدرين وفلل وقصور للاثرياء

ومدينة بدر من احدث المدن ولذلك ترى مساحات اراضى شاسعة وفعلا حى الفيلات مساحته كبيرة جدا فى اول المدينة على اليمين والشمال وانت داخل ومعظمها متباع .

واكتوبر مليانة مصانع ولا لأ والعاشر والعبور اللى دلوقتى بقت من ارقى المدن مليانة تجار فاكهة ومدينة العبور اصلا تبع القليوبية يعنى لو بمنطقك يبقى المدينة مليانة فلاحين ولكن كل برغوت على اد دمه الشباب ياخدوا الشقق الصغيرة واللى معاه ياخد الفلل.

انا بشتغل فى شركة مصر للطيران واللى عرفنى وقالى على المدينة مضيفين وطيارين شاريين هناك لان المدينة قريبة من المطار.

تم تعديل 23 مايو 2008 بواسطة احمد عز

[احمد عز]

بالنسبة للاسعار فالاسعار متفاوتة جدا حسب الكان والموقع ولو عايزين تعرفو اكتر عن الاسعار

http://www.masrawy.com/Classfied/result.as...&Category=0

ولو عايزين تعرفوا اكتر عن المدينة هتلاقوا صور للمدينة وفيديوهات على جروب بدر الجديدة على الجوجل وزى ما قلت بعد ما تضغط على الرابط اضغط على join group ودخل الجى ميل بتاعك وبكده تبقى اشتركت ودور فى الفايلس وPAGES شوية هتلاقى صور للمدينة وتقسيمها.

<a href="http://groups.google.com/group/badralqahra?hl=en&lnk=srg" target="_blank">http://groups.google.com/group/badralqahra?hl=en&lnk=srg</a>

وادى هشام طلعت مصطفى بيقول ان المدينة امام المنطقة الترفيهية من الاهرام

http://www.sms4000.com/madenaty.htm

وادى صورة لمدينة باحيائها المختلفة....اظن مافيش احسن من كده واجب.

تم تعديل 24 مايو 2008 بواسطة احمد عز

[hyoussif]

بس ياترى بينطبق عليها قوانين البناء المطبقة فى التجمع الخامس يعنى بيدوا مهلة للبنا برضه

[mariammo]

أستأذنك ياأستاذ عز أسألك لأنه من الواضح أنك تعرف كتير عن المدينه والجروب بتعها وموقع فيه الأسعار والصور ومعرفش ليه علقت فى أحد تعليقاتك أنك لسه بتفكر ومستنى حد يشجعك - أسم المدينه دى من أطلقه عليها - وهى تبع أى محافظه - وتبع أى جهاز تعمير

وخرايط تقسيمها مين الى قسمها - وعقدها هاكتبه مع مين - وتصريح المبانى هايطلع منين

مصرى فى الغربه خايف على فلوسه ومابيحبش المشاكل

[احمد عز]

استاذ mariemmoانا ما قولتش ان انا عايز حد يشجعنى ما اعرفش انت جبت الكلمة ديه منين

انا قلت ان فى ناس عندى فى الشركة شجعونى اشترى هناك لانهم فعلا واخدين اراضى فى الحى التميز فيلات لان المدينة قريبة من المطار ويريدون الاستقرار هناك فتشجعت انا ايضا للمدينة واردت فقط افادة باقى الاعضاء .

لانى لم اكن اعرف شئ عن المدينة الا بعد ان عرفنى عليها مضيف زميلى.

انا روحت اتفرجت على المدينة وعلى كذا قطعة ارض وان شاء الله قريبا هكون اشتريت.

تم تعديل 25 مايو 2008 بواسطة احمد عز

[احمد عز]

المدينة بعد التقسيم الجديد للمحافظات بقت تبع محافظة حلوان وتبع جهاز مدينة بدر الجديدة

[احمد عز]

استاذhyousif اى قطعة ارض فى اى مدينة دلوقتى لازم بيكون ليها مهلة للبنا وده فعلا نظام جميل جدا