البنوك فائدة قليلة مش بس كده وحرام مع ان الحل سهل وبسيط ومربح

[kemek]

السلام عليكم ورحمة الله وبركاته

فكرت كثيرا في موضوع البنوك الربوية واني مش عايز اربي عيالي على مال حرام وبعد تفكير عميق وصلت الى عدة حلول انفذ الان بعضها

بالنسبة لتعاملي مع البنوك العادية فقليل جدا يقتصر على ايداع مبلغ صغير احتياطي لو نسيت فلوس او مبلغ بسيط عشان اشتري حاجة من الانترنت

اما التعامللات المالية الحقيقة او بمعنى اصح الادخار فالاسلم التالي :

1- الذهب : هو ما لا يختلف عليه ااثان انه محتفظ بقيمته موضوع الدهب اعمق من كده حفهمهالك بمثال صغير جدي جدك كان بيقول دي شقة في كليوباترا في اسكندرية كان ايجارها زمان 3 جنيه شوف بقى اجارها دلوقتي كام ..... تعال نشوف ساعتها الذهب كان بكام لو رجعنا حتلاقي انه كان الجنيه دهب بجنيه مصري يعني ايجار الشقة كان 3 جنيه دهب يعني ما يساوي الان 3600 جنيه يعني هو هو ايجارها الان لو حسبت كل حاجة كده حتلاقيها صح زمان كان الواحد ممكن يجيب شقة محترمة في اسكندرية ب 100 الف جنيه ايام ما كان الجنيه الدهب ب 350 جنيه يعني الشقة المحترمة زمان كانت تقريبا ب 285 جنيه دهب يعني ما يعادل 400000 جنيه على اساس ان الجنيه النهاردة ب 1200 جنيه لو حسبت كل حاجة حتلاحظ ان قيمة الجنيه المصري هي اللي بتنزل او بمعني اصح هناك تضخم اقتصادي طيب يجي واحد يقولك طب افرض الدهب رخص حرد عليه لو كنت شاري جنيه دهب ب 100 جنيه وبعدين رخص الدهب بقه الجنيه الدهب ب 50 جنيه حتلاقي انك ممكن تشتري حاجات ب 50 جنيه دلوقتي كنت بتشتريها زمان ب 100 جنيه يعتي من الآخر ده عنصر ثابت ومن الاخر عمرنا ما سمعنا ان الدهب رخص الا مرة في السبعينات فاعتقد ان من احسن طرق الادخار هو الادخار في جنيهات الدهب ولكن لاحظ اني اقول جنيهات الدهب عشان مافيهاش مصنعية بتتضاف مش شراء دهب دهب وماتنسوش زكاة الدهب يرد واحد يقول مانا لما كنت مجمد فلوس في البنك ماكنش ليها زكاة حرد اقول مش معني انك مش بتدفع زكاة يبقى ماعليكش زكاة اي فلوس او دهب عدت النصاب عدى عليها سنه وجب فيها الزكاة .. في الادخار في الدهب نصيحتي للي مالهوش دماغ تجارية او مش فاضي حاجة تحفظ قيمة فلوسك واي وقت تقدر تبيعها لدرجة من اقتناع الناس بنظرية ان قيمة الدهب ثابتة واحد زميلي استلف مبلغ كبير من واحد ثاني غير معروف وقت السداد سنة او عشرة سنوات قام التاني مسلفة الفلوس على هيئة جنيهات دهب مش فلوس وطالبه بردها جنيهات دهب مش فلوس عشان لا ده يظلم ده ولا ده يظلم ده وااللي يتكلم حقوله لو جدك سلفني 50 جنيه من 40 سنه ترضى ارجعهملك 50 جنيه دلوقتي

التعامل على الدهب جميلوبيحفظ الحقوق ولكن لاحظ قولي على الدهب ماحدش يقول لواحد انا سالفتك ايام ماكان الجنيه الدهب بقد كده لما تيجي تسلف انزل اشتري جنيهات ده بالفلوس واديهاله ولما يرجعهالك يرجعهالك جنيهات دهب مش فلوس (( الذهب بالذهب مثلا بمثل ))

2- شراء العقارات ودي عايزة حبة خبرة عشان مايضحكش عليك بس عمرها مابتخسر مثلا كشراء في مدن سكنية جديدة ان شاء الله شقة صغيرة بس عيب الموضوع ده صعوبة تحويل الشقة الى سيولة ماليه في وقت سريع

3- شراء اسهم لشركات كبيرة ده انا بعتبره استثمار طويل المدى انك تشتري مجموعة اسهم في شركات كبيرة كشركة اوراسكوم وتنساها وماتفتكرهاش اللا بعد فترة كبيره انا بعتبر ده كانك شايل فلوسك سايبها تشتغل لانك في الواقع بقيت احد ملاك الشركة طبعا لو فيك دماغ شغل دماغك حبة وممكن تستثمر فلوسك

اي طريقة من الطر ق السابقة بتحافظ على فلوسك وعلى قيمتها بل وبتكبرها ومش حرام ولو حسبتها حتلاقي انها اكتر من ارباح البنوك التي بلغت على ما اعتقد 7% سنوية

ارجو ان اكون افدتكم

[MZohairy]

كلامك سليم اقتصاديا لو كان الهدف هو الإستثمار

ايه الحل في حالة صغر حجم المبلغ المتاح و عدم وجود مصادر دخل أخرى؟

يعني راجل على المعاش مثلا و معاه 50000 جنيه و ملوش في التجاره

ايه الحلول المنعدمة المخاطر اللي قدامه لوجود دخل شهري غير ايداعهم في البنك؟

شكرا

[kemek]

كلامك سليم اقتصاديا لو كان الهدف هو الإستثمار

ايه الحل في حالة صغر حجم المبلغ المتاح و عدم وجود مصادر دخل أخرى؟

يعني راجل على المعاش مثلا و معاه 50000 جنيه و ملوش في التجاره

ايه الحلول المنعدمة المخاطر اللي قدامه لوجود دخل شهري غير ايداعهم في البنك؟

شكرا

الاخ العزيز الهدف هو الادخار قبل الاستثمار

اما بالنسبة رجل على المعاش

لو حط المبلغ في البنك حيجيب دخل شهري 291 جنيه تقريبا وهو بالاضافة الى كونه قليلا ففيه حرمانية الربا على ما اعتقد

بس خلينا نفكر مع بعض

1- ممكن ندور على عقار بالمبلغ ده وتفرشها فرش بسيط ويتأجر ويكون مصدر الدخل هو الايجار وفلوسك زي ماهي بل بتزيد عشان كل يوم العقارات في تزايد لا اعلم بالمنسبة للقاهرة ولكن من فترة اتعرض علي شقة في الشيخ زايد في الحي الأول تابعة للجهاز كان مطلوب اني ادفع 54 الف وكان الاجارات وقتها 300 جنيه في الشيخ زايد و تبدا من 500 للمفروش دي ممكن تكون فكرة وميزتها انك لو لقيت احسن منها تبيع الشقة ربما يكون الحل غير منطقي بس ادينا بنفكر سوى عشن نبعد عن الربا (( من ترك شيئا لله عوضه الله خيرا منه )) بس خليك حريص في الشراء

2-ممكن تشوف منطقة شعبية وتشوف دكان فيها وتاخده ايجار و تفكر في اي نشاط مش محتاج راس مال كبير

3- ممكن تتفق مع مكتب ايجار عربيات وتشتري عربية قسط حتدفع 10000 مقدم ودخل العربية تقريبا 2000 جنيه شهريا كحد ادنى حتسدد اقساطها والباقي يصبح مصدر دخل ولا تحاول دفع مبلغ اكثر من 10000 عشان لازم يبقى معاك سيولة عشان لو قدر الله عملت حادثة تصلحها عبال ماالتأمين يصرف لك ولو ليك حد ممكن يدخل معاك شريك يكون احسن

استاذي الغالي انا بحاول اقترح واساعد ربما يصبح الحل غير عملي ولكن ادينا بنطرح افكار ممكن تنورك وتخليك تاخد بالك من طريقة لتحسين الدخل انت مش واخد بالك منها

واعتذر فانا لست على دراية بجميع حيثيات الموضوع

[midotheboss]

شكرا بجد أنت أفكارك جامده وبتفكر في نفس تفكيري تقريبا وأنا نفسي أكلم مع حضرتك

تم تعديل 1 يونيو 2008 بواسطة Folana

[wafarag]

شكرا على الأراء الممتازة. أريد أن أؤيدك فى موضوع الآدخار فى الذهب. واريد ان ازيد أن الذهب سيرتفع الى أرقام فلكية لدرجة قد لا يتصورها عقل فى 10 الى 20 عاما القادمين أمام جميع أنواع العملات العالمية نتيجة انهيار هذه العملات "يمحق الله الربا". كل هذا لأسباب علمية مدروسة و محسوبة و ليس مجرد تخمين. أنا دكتور مهندس و لكنى أعشق الأقتصاد و أقرأ فيه كثيرا. الشيئ الأفضل من الذهب هو الفضة و بعد ذلك الأراضى الزراعية المنتجة و ليس العقارات التى سوف تتوقف أسعارها و يمكن أن تقل. ما ترونه من زيادة الأسعار فى العالم هو بداية انهيار حتمى للعملات الورقية (فقط البداية و الأسوأ قادم).

[حسام يوسف]

السلام عليكم

انامعاك 100% يا عم كيمك

بس المشكلة فى واحدعايز يعمل مشروع

محترم

ومضمون

لكن راس المال اللى معاة مش كفاية

غصب عنى هضطر اروح للبنوك

[nash]

دكتور حسام...

قرض البنك ...ليس شيء سهل...

عند دفع الدين للبنك ستدفع معه الفوائد..هذا غير الضمان الذي ياخذه البنك عليك...

العمليه في ظاهرها الرحمه ..وصدقني العذاب في الباطن...

قبل أخذ أي قرض من البنك فكر مليون مرة في كيفيه سداده مع الفوائد المستحقه..لإن أحيانا يتوقف الكثيرين عن السداد نتيجه الفائده الكبيرة...

[MZohairy]

الشيخ علي جمعه مفتي الجمهوريه يا ناش احل القروض البنكيه

و ياريت محدش يشتمه ولا يهينه عشان ده عالم و أعلم من كل اللي بيكتبوا في النت

[nash]

يا زوهري لا يمكن أبدا ان اشتم إنسان عادي مابالك بشيخ وله احترامه...

عزيزي أنا فقط استفتي قلبي...لا أستطيع ان اقبل بفلوس البنوك طالما فيها شبهه ربا..وطبعا لا ألزم أحد برأيي ..الإستثمارات متوفرة لمن معه راس المال والخيارات موجوده...نحن شخصيا نستثمر في العقارات ..أراها أفضل حل الأن..

وصدقني لم اعرف إنسان أخذ قرض من البنك واستطاع أن يوفيه...علي الأقل عاني الويل إلي أن أنتهي من اخر قسط..هذا من واقع المحيطين بي..

طبعا من يناسبه القرض ولا يجد فيه غضاضه فليتوكل علي الله...طالما أطمأن للفتوي..ولكن ليضع في حسابه ان البنوك لا تعرف الهزار..

[حسام يوسف]

السلام عليكم

الف شكرلاهتمامك يا مدام ناش

والله انالابحب البنوك ولاحاجة

حتى لو كانوا حلال

دة اختراع يهودى

بس اعمل اية مضطر md2:

[hyoussif]

اوافق على كل ماجاء من معلومات بواسطة أنامل الاخ kemek جزاه الله خير الجزاء واود اضافة تجربتى الشخصية مع الاقتراض من البنوك والله من وراء القصد فكنت امتلك شهادات دولارية ومع انخفاض ارباحها كان يعوضه ارتفاع سعر الدولار ولكن بانخفاض سعره اصبح الادخار بالدولار عديم الفائدة بل خسارة لاصل المبلغ واذا فكرت فى كسر الشهادات فستكون الخسارة اكبر ورغم ذلك ذهبت لاسترداد الشهادات فأشار على موظف البنك بأخذ قرض بقيمة 90% من الشهادات فاقتنعت واخدت القرض وحولته لجنيه مصرى وقولت استفيد من فرق الارباح بين المصرى والدولار ولكن مع بدء سداد فوائد القرض اكتشفت انهم يضيفوا عليها رسوم غير معلنة يعنى يجيبوا رجلك الاول بالحسنى وبعدين يشكلوا عليك بعد كدة بمزاجهم ( فكر يهودى صهيونى صرف ) المهم قولت اسحب الفلوس المصرى دى من البنك واشتغل بيها فى السوق ليكون العائد اكبر وفعلا وجدت ضالتى فى سلعة بسعر مغر فاشتريتها بنية البيع وبعد شرائها الدنيا ادربكت معايا ولقيت البائع بينصب علية رغم انها ليست اول مرة لى فى هذا الموضوع ولكن اختلفت هذه المرة تماما عن المرات السابقة لاختلاف مصدر الفلوس المهم بتوفيق من الله سبحانه وتعالى ثم بقليل من الحكمة وضبط النفس استطعت اعادة بيع السلعة بقيمة تكلفتها تماما بعد ان لاحت لى فرصة مكسب محترم فيها عند شرائها وبعد استرجاعى للفترة من اول ماحصلت على القرض الى اعادة بيع هذه السلعة وجدت ان حياتى حدثت بها هزة كبيرة وعاتية أثرت بشدة على مجراها الطبيعى على غير العادة ليس فى هذه السلعة فقط ولكن اضطراب فى كل شيئ تقريبا ولما دققت فى اسباب ماحدث اقتنعت تماما بأنه الاقتراض بالفائدة لابد انه السبب الرئيسى وكان الموضوع هذا كله خلال حوالى اربعة شهور فقط وفى لحظة صدق مع الله ثم نفسى قررت الغاء هذا الاقتراض فورا مهما كانت الخسائر وفعلا ذهبت للبنك ولغيت القرض والشهادات واستعدت راحة نفسى والقرب من الله وكانت عطيته الكبرى لى بالتعاقد للعمل بالخارج وكانت هذه اول وآخر تجربة لى فى الاقتراض من بنك وان شاء الله ربنا يتوب علينا من تعاملات الربا واتقاء شبهاتها

[هشام عباس]

بعد اذنكم هشارك بتجربتي الشخصيه مع قروض البنوك من سنتين اشتريت قطعة ارض في القاهره الجديده وكانت وقتها سعرها معقول جدا وقد توسمت انا وزوجتي ان هذه الأرض سيتضاعف تمنها عدة مرات في خلال فتره بسيطه وقررنا بيع كامل واكرر كااااااامل ذهب زوجتي وكان وقتها اكتر من 300ج وهذا الذهب الأصفر لأن الذهب الأبيض بما فيه من فصوص ومصنعيه غاليه جدا جدا لن يأتي بشئ المهم بعد بيع الذهب قمنا بعمل قرض من البنك لأكمال تمن الأرض وفي خلال الوقت للحصول على القرض من البنك وهو حوالي 10 ايام او اسبوع صرف ثمن الذهب بالكامل والله اعلم صرف في ايه؟!!! والله والله انا الى الأن انا وزوجتي لا نعلم كيف صرفنا هذا المبلغ في هذه الأيام القليله والأدهى من ذلك كان عندها اسوره لازوردي حوالي 60 جرام ولم تستطع التفريط فيها ووقعت من ايديها تاني يوم بدأنا في اجراأت القرض المهم طبعا لما جت فلوس القرض لم تكمل ثمن الأرض ووقتها مرض احد ابنائي وتم صرف مبلغ القرض بالكااااااااااامل ومن ساعتها وانا اعتقد فعلا في حرمانية قروض البنوك وهذا بالطبع اعتقاد شخصي مني

ولكم تحياتي

[kind man]

السلام عليكم و رحمة الله و بركاته

حد يعرف منين الواحد ممكن يشتري عملات ذهبية او سبائك دهب من مصر او الامارات؟

[أحمد سيف]

يا إخوان أنا هاتكلم من وجهة نظر إقتصادية لإن معلوماتي في الفقه لا تزيد عن معلومات أي واحد منكم، إنما الاقتصاد والتمويل ده تخصصي

البنوك تقوم بوظيفة أساسية في الإقتصاد وهي تجميع رؤوس الأموال على شكل ودائع من الأشخاص العاديين الذين لا يملكون دراية كافية بالاستثمار ووضعها في أيدي متخصصين في المشروعات الاستثمارية عن طريق منحها كقروض. الأمر الذي يؤدي الى استخدامها بشكل أكثر كفاءة وربحية للاقتصاد.

هاتقولي طيب ما البورصة أداة أخرى لتجميع الاموال من أيدي الناس ووضعها في استثمارات كبيرة، أنا معاك لكن البورصة والبنوك مكملة لبعضها وليست بديلا عن الآخر. بمعنى إن لو العوائد على الأسهم انخفضت نتيجة ارتفاع أسعارها فإن الناس سوف توجه أموالها الى البنوك (السندات) وبالتالي يقل الطلب على الأسهم وتنخفض أسعارها ويزيد العائد عليها حتى يصل الى المستوى الذي يتناسب مع مخاطرها (طبقا لنظرية سوق لمال) والعكس صحيح

الفائدة ليست فقط ثمن للنقود يعوض صاحبها عن تأجيل صرفها ومنحها للغير، بل هي كذلك لتعويض مقرضها عن الانخفاض في قيمتها (التضخم) والمخاطرة التي يتحملها في حالة عدم قدرة المدين عن السداد، وكذلك كتعويض عن نقص السيولة الذي قد يواجهه نتيجة تجميد نقوده في استثمارات.

سعر الفائدة هو أيضا أحد أهم الأدوات التي تستخدمها البنوك المركزية للتحكم في معدلات نمو النقد وبالتالي التضخم والنمو الاقتصادي.

كل ما ذكر هي قنوات استثمار جيدة ولكنها قد لا تلائم ظروف واحتياجات بعض الناس الذين يبحثون عن مستتوى مخاطرة منخفض وربح قليل.

حتى الدول التي بها بنوك إسلامية لم تستطع الاستغناء عن موضوع البنوك والقروض والفائدة وإن كانت تنظمها بطرق أخرى (مرابحة، أجاره، مضاربة ...)

[hyoussif]

أرجو الافادة عن سعر الجنيه الدهب الآن فى الرياض وفى القاهرة من الاخوة المتابعين اسعاره وتحياتى لجميع الاخوة الكرام

[ذهبية]

طبعا اراء جديرة بالاهتمام احب ان اضيف اجابة عن اسئلة جاءت من الاخوة خارج مصر عن السؤال عن اسعار الذهب داخل مصر هناك موقع انا دائما متابعة فية الاسعار اول باول اسمة تجارة نت

وهذا هو رابط الموقع

http://www.tegaranet.com/arabic/prices/stockgold.asp

هذا الموقع يكتب اسعار الذهب داخل مصر اول باول و مكتوب فية التاريخ و الميعاد وقت التدوين

وفية مؤشر بالون الاخضر والاحمر و هى نسبة التغير لو اللون اخضر والسهم فوق معناة ان اسعار الذهب فى زيادة

لو اللون احمر والسهم الى اسفل يصبح سعر الذهب نازل

ارجو ان اكون افدتكم

اختكم ذهبية

[فركيكو]

يقول الله تعالى : " وَمَا كَانَ لِمُؤْمِنٍ وَلَا مُؤْمِنَةٍ إِذَا قَضَى اللَّهُ وَرَسُولُهُ أَمْرًا أَن يَكُونَ لَهُمُ الْخِيَرَةُ مِنْ أَمْرِهِمْ وَمَن يَعْصِ اللَّهَ وَرَسُولَهُ فَقَدْ ضَلَّ ضَلَالًا مُّبِينًا (36)" سورة الأحزاب

خالص تحياتى لكل الاخوة و الاخوات الاعزاء فى المنتدى . ولقد أعجبت جدا بارائكم ولكن هناك امر غائب عن كثير منا و غيابة هو السبب وراء الدخول فى حيرة البنوك حلال ولا حرام .

و هذا الامر هو ما الهدف اساسا من انشاء البنك ؟

هل الهدف هو خدمة الاقتصاد ؟

هل التنمية هى السبب ؟

طبعاً لأة الهدف هو الربح من تحقيق فرق الفوائد ! فقط لا غير و الفائدة يا سادة باللغة العربية الفصحى تسمى ربا و ربا الشئ يعنى نما و زاد عن حجمة . فتعريف عمل البنك هو( الاقتراض للإقراض ) فقط !

و كل دارس او متعامل فى الاقتصاد يعلم تماما ان البنك هو صورة من صور المرابى اليهودى القديم ولكن تم وضع الكثير من الكاتشب و المايونيز على وجهة لتغطية الطعم مع الاسف و انخدع الكثير مننا فى هذا الشكل و اللون البراق .

أما فتوى الدكتور على جمعة فهو المسئول عنها لان الله سبحانة حرم الربا بنص صريح فى القرآن و بعد هذا التحريم لا كلام لبشر!

[dongol]

اخواني اعذروني في هذه السؤال

هل يمكن شراء الجنيهات الذهبيه من الامارات و بيعها في مصر ولا دي حاجة زي العمله الوطنيه كده لازم تستخدم داخل البلد التي اصدرتها

[adrianocrespo]

طب و دفتر التوفير اللي في البوسطه (البريد يعني) برده يمشي عليه الكلام ده

[hyoussif]

طبعا اراء جديرة بالاهتمام احب ان اضيف اجابة عن اسئلة جاءت من الاخوة خارج مصر عن السؤال عن اسعار الذهب داخل مصر هناك موقع انا دائما متابعة فية الاسعار اول باول اسمة تجارة نت

وهذا هو رابط الموقع

http://www.tegaranet.com/arabic/prices/stockgold.asp

هذا الموقع يكتب اسعار الذهب داخل مصر اول باول و مكتوب فية التاريخ و الميعاد وقت التدوين

وفية مؤشر بالون الاخضر والاحمر و هى نسبة التغير لو اللون اخضر والسهم فوق معناة ان اسعار الذهب فى زيادة

لو اللون احمر والسهم الى اسفل يصبح سعر الذهب نازل

ارجو ان اكون افدتكم

اختكم ذهبية

أشكرك ياأخت ذهبية على هذا الموقع الجميل الشيق