أترك الكويت من أجل السعودية ولا لأ؟

[HDarwish]

السلام عليكم ورحمة الله وبركاته

زملائي وزميلاتي أعضاء ومشرفي المحاورات

بشكل مبسط أنا في حيرة من أمري ومش عارف أعمل إيه وعلشان كده حبيت آخذ رأيكم وتساعدوني في الوصول لقرار سليم

الموضوع إني مهندس زراعي مقيم في الكويت منذ ثلاث سنوات وللأسف لم أعمل بمجالي لكون البلد غير زراعي بالمرة وعلشان كده عملت بمجال تاني خالص بعيد كل البعد عن الزراعة واللي نفس اشتغل بيها دي حاجة .. الحاجة التانية إني متزوج من طبيبة منذ سنتين وللأسف بسبب غلاء المعيشة هنا ما قدرناش نعيش مع بعض غير هما بالضبط خمس شهور .. المهم من فترة المدام جالها عرض في مستشفى الملك فهد العسكري كممارس عام وعلى راتب خمسة آلاف ريال والعرض شامل السكن والمواصلات (طبعا سكن عائلي) العرض مش عارف إذا كان كويس ولا وحش بس الموضوع إنه هيحقق هدف كبير وهوه الاستقرار العائلي .. لكن المشكلة في توفير وظيفة ليا في مجالي وحتى لو مش في مجالي (سكرتارية ودي ليا فيها خبرة كبيرة أو في مجال المبيعات) بس براتب معقول هل ده ممكن ولا الموضوع صعب مع العلم إني أعمل في شركة كويتية تعتبر من أكبر الشركات الموجودة في الكويت وكمان Multi International والحمد لله معي رخصة القيادة والسيارة .. هل أضحي بكل ده وأبدأ من جديد ولا أخليني مكاني أحسن أنا بجد محتار وقلقان قلق كبير ياريت تساعدوني

ولكم جزيل الشكر

في انتظار ردود الجميع حتى ولو بالمشورة وخصوصا رد سي السيد

[Diab]

السلام عليكم ورحمة الله وبركاته

زملائي وزميلاتي أعضاء ومشرفي المحاورات

في انتظار ردود الجميع حتى ولو بالمشورة وخصوصا رد سي السيد

ما ترد يا عم سي السيد

ناس ليها حظ وناس ليها ترتر :wub:

تم تعديل 26 مايو 2008 بواسطة Diab

[النيل حبيبي]

توكل علي الله مرافق مع زوجتك

الفرص كثيرة هنا وخاصه مندوبي المبيعات

[Abo Marwan]

السلام عليكم ورحمة الله وبركاته

زملائي وزميلاتي أعضاء ومشرفي المحاورات

بشكل مبسط أنا في حيرة من أمري ومش عارف أعمل إيه وعلشان كده حبيت آخذ رأيكم وتساعدوني في الوصول لقرار سليم

الموضوع إني مهندس زراعي مقيم في الكويت منذ ثلاث سنوات وللأسف لم أعمل بمجالي لكون البلد غير زراعي بالمرة وعلشان كده عملت بمجال تاني خالص بعيد كل البعد عن الزراعة واللي نفس اشتغل بيها دي حاجة .. الحاجة التانية إني متزوج من طبيبة منذ سنتين وللأسف بسبب غلاء المعيشة هنا ما قدرناش نعيش مع بعض غير هما بالضبط خمس شهور .. المهم من فترة المدام جالها عرض في مستشفى الملك فهد العسكري كممارس عام وعلى راتب خمسة آلاف ريال والعرض شامل السكن والمواصلات (طبعا سكن عائلي) العرض مش عارف إذا كان كويس ولا وحش بس الموضوع إنه هيحقق هدف كبير وهوه الاستقرار العائلي .. لكن المشكلة في توفير وظيفة ليا في مجالي وحتى لو مش في مجالي (سكرتارية ودي ليا فيها خبرة كبيرة أو في مجال المبيعات) بس براتب معقول هل ده ممكن ولا الموضوع صعب مع العلم إني أعمل في شركة كويتية تعتبر من أكبر الشركات الموجودة في الكويت وكمان Multi International والحمد لله معي رخصة القيادة والسيارة .. هل أضحي بكل ده وأبدأ من جديد ولا أخليني مكاني أحسن أنا بجد محتار وقلقان قلق كبير ياريت تساعدوني

ولكم جزيل الشكر

في انتظار ردود الجميع حتى ولو بالمشورة وخصوصا رد سي السيد

أخي وصديقي العزيز / HDarwish...

السلام عليكم..

كان الله في عونك بأتخاذ القرار الصائب ونور أللهم بصيرتك وأنار دربك أنه نعم المولى والنصير...

بس ياأخي أنا شايف قبل ماتضحي بشغلك في الكويت وتفكر بالأنتقال من جديد للسعودية ، يجب ان تبحث عن/ ماهي فرص الحصول على عمل هناك ؟؟؟ وماهو المتاح حالياً بالنسبة للمهندس الزراعي أو بمؤ هلاتك .. ؟؟؟؟

فهل من الممكن أن زوجتك الدكتورة تذهب في البداية الى السعودية لوحدها لأستطلاع الموقف وسوق العمل في السعودية بما يناسب وضعك ومؤهلاتك وظروف حياتكم وألتزاماتكم المالية حالياً ..حتى يكون القرار أكثر من صائب وعن قرب ..

رغم أنه كل واحد منكم يعيش في جهة ليس بالأمر اليسير ، والظاهر أن هذا قد كتبه الله سبحانه وتعالى على عدد كبير من العوائل المصرية والعربية ...

صلي لله سبحانه وتعالى أستخارة في أمرك هذا يهديك وينور طريقك عسى أن يساعدك لأتخاذ القرار المناسب ..

أمنتياتي ودعائي لك وللعائلة بالتوفيق..

أبو مروان

[HDarwish]

أخي وصديقي العزيز أبو مروان .. النيل حبيبي .. دياب

ما تصوروش سعادتي أد إيه لما لقيت السرعة دي في الرد والله ما كنت متوقع .. شكرا ليكم جميعا وتمنياتي للجميع بالتوفيق في الحياة العملية والعائلية.

أبو مروان .. أنا مش سايب ولا موقع توظيف على الإنترنت إلا وبقدم فيه السيرة الذاتية ليا سواء في مجال الزراعة أو غيرها من المجالات في المملكة العربية السعودية وأديني بعمل اللي عليا .. لإن الموضوع بالنسبة ليا مش وليد اللحظة ولكنه منذ فترة وللأسف بدأ يدخل في مهاطرات وأحداث جانبية كثيرة

أبو مروان للاسف موضوع إن المدام تسافر لواحدها الأول ده انا رافضه رفضا تاما وللأسباب كثير جدا أهمها إن المدام عمرها ما سافرت بره مصر وكانت اطول رحلة لها يادوب إسكندرية ولا مرسى مطروح ومش لواحدها فما تقدرشي إنها تعيش لواحدها في البداية كده حتى هيا كمان موافقاني في النقطة دي

أستاذي العزيز / النيل حبيبي

ده اللي أنا عايزه وإني أكون وياها بس في بدايتي هنا في الكويت قابلت صعوبات كتير جدا ومشاكل كتيرة والحمد لله تجاوزت المرحلة دي مش عايز تاني أعيد نفس الأخطاء اللي كنت فيها .. ده حتى أنا أي حد بيطلب مني النصيحة علشن يجي الكويت بقول له بلاش تيجي على فيزا حرة وياريت يكون أحسن على شغل

شكرا ليك .. وتقبل تحياتي ودعواتي

الأخ /دياب المحترم

ياعم إنت هتبصلنا في لقمة العيش كمان سيبنا نسترزق .. خلينا نعرف نضرب صُحبية مع الراجل اللي بجد بتمنى إني أكون واحد من معارفه مش من أصدقائه

شكر كبير ليك .. وتقبل تحياتي ودعواتي

[حشيش]

الأخ الفاضل حسن درويش

رأيى من رأى الأخ الفاضل أبو مروان ... صلى أولاً صلاة الإستخارة واسأل الله تعالى أن يهديك إلى ما فيه الخير لك ولأسرتك ... أعتقد أنه من الأفضل لك أن تبقى حالياً فى عملك بالكويت وتتوكل زوجتك على الله إلى المملكة لأن إجراءات ترتيب الإستقدام لك والبحث عن فرصة عمل مناسبة لك فى السعودية سوف يستغرق بعض الوقت ولنقل من ثلاثة إلى ستة أشهر فى خلالها تبحث أنت من جانبك أيضاً على فرصة عمل لك فى نفس المدينة التى تعمل بها زوجتك فى المملكة عن طريق مراسلة شركات التوظيف عن طريق النت أو البريد أو تراسل نفس الشركة التى أحضرت عقد العمل لزوجتك بدون أن تخسر راتبك من وظيفتك فى الكويت أثناء فترة البحث التى أشرت إليها ... طالما معك مؤهل عالى وسيارة ورخصة قيادة ستجد العشرات من الوظائف كمندوب مبيعات لشركات كبرى بالمملكة ومنها شركات أجهزة ومنتجات زراعية أو طبية ... بالطبع سى السيد يستطيع الإفادة أكثر منى فى هذه المسائل لكن كما فهمت من الجنرال مودست الهارد درايف بتاع الكمبيوتر بتاعه ضرب وبيعمل حالياً جمعية حيقبضها الأول علشان يشترى جهاز جديد :sad: ... موفق إن شاء الله :blush2:

[حشيش]

يبدو أننى قد كتبت مداخلتى السابقة فى نفس وقت كتابة أخونا حسن درويش لرده فأرجو المعذرة :blush2:

[النيل حبيبي]

ان شاء الله تعال مرافق والشغل كتير

ياريت ترسلي السيرة الذاتيه وربنا يفرجها

[HDarwish]

النيل حبيبي

متشكر جدا جدا .. ويكفيني شعورك الطيب .. جازاك الله خيرا على ما تقدمه للمسلمين جميعا وكما قال نبينا محمد صلوات الله عليه وتسليمه

‏

(‏ ‏من ‏ ‏نفس ‏ ‏عن أخيه ‏ ‏كربة ‏ ‏من ‏ ‏كرب ‏ ‏الدنيا ‏ ‏نفس ‏ ‏الله عنه ‏ ‏كربة ‏ ‏من ‏ ‏كرب ‏ ‏يوم القيامة ومن ستر مسلما ستره الله في الدنيا والآخرة ومن يسر على معسر يسر الله عليه في الدنيا والآخرة والله في عون العبد ما كان العبد في عون أخيه ومن سلك طريقا ‏ ‏يلتمس ‏ ‏فيه علما سهل الله له طريقا إلى الجنة وما قعد قوم في مسجد يتلون كتاب الله ويتدارسونه بينهم إلا نزلت عليهم السكينة وغشيتهم الرحمة وحفتهم الملائكة ومن أبطأ به عمله لم يسرع به نسبه)

صدق رسول الله صلى الله عليه وسلم.

أنا أرسلت السيرة الذاتية على الإيميل الخاص وإنشاء الله انا شايف بادرة أمل بعد ما كان الأمل معدوم نهائي

شكرا جزيلا

الأستاذ حشيش .. الكاتب الكبير

لا داعي للمعذرة .. يكفيني فخرا مشاركتك .. بس إوعى تنسى سلامي لحزين وزغلول وبالمرة كمان غازي وعز .. أه كنت هنسى بلوظة هانم .. تحياتي ليك وتمنياتي بالمزيد من الإزدهار

[justtrying]

بصراحة قرار صعب

لكن نصيحتي ليك بس من غير حساسيات خليك معتمد على شغلك انتا .. ثانياً من وجهه نظري انا صراحة الكويت فيها فرص كثيرة جدا جدا اكثر من السعودية مليون مرة البلد صغيرة جدا الافراد مهما كان عدد المغتربين فيها ولكن يعتبر عددهم قليل جدا والكويت محققه فوائض في ميزانيتها رهيب رهيب وبتالي حجم الاستثمارات الكويتية هيكون اكبر واكبر وهتلاقي شركات اكتر من كدة بكتير في غضون السنوات القادمة ومش كدة وبس المرتبات هتعلى اكتر من كدة بكتير بإذن الله لأن اعداد العمالة قليلين والكفاءات قليلة جدا في الكويت وهذا ما لاحظته جدا في الفترة القصيرة الي قضيتها وبالتالي هيكون هناك تنافس بين الشركات لاجتذاب هذه الكفاءات

اما بالنسبة لغلاء المعيشة فاعتقد والله اعلم في السعودية هناك ايضا غلاء معيشي وكافة دول الخليج لأنه يوج هناك تضخم رهيب بس مهما كان مقارنة بمصر لا يعتبر أي شيء لأن هنا في الكويت التضخم حقيقي يعني النسبة المعلنة حقيقية وتعبر عن التضخم الحقيقي من ارتفاع سعر المنتجات والخدمات يقابله انخفاض نسبي في قيمة العملة الكويتية ويجب الملاحظة انه نسبي لأن العملة الكويتية هي اغلى عملة في العالم ومازالت ولازالت ستحتفظ بقيمتها في الامد البعيد أيضاً أما بالنسبة لمصر التضخم فعلا غير حقيقي ووهمي لأن سعر العملة أصلا ليس حقيقيا والسلع مدعمة وامور كثيرة

آسف للإطالة والسلام عليكم

[محمد ابوعوف]

تعالى الى السعودية وسوف تجد فرص عمل لك بادن اللة

[رمضان]

الاخ والصديق حسن

نصيحة اخوية لا تترك الكويت وتذهب للسعودية

بغض النظر عن اشياء كثيرة مادية فلن تستطيع التكيف مع العيشة في السعودية

وصدقني مهما كانت الرواتب في السعودية لن تكون مثل الكويت

[se_ Elsyed]

وإنت الصادق يا حشيش ده أنا كل حاجه عندي ضاربه ... الهارد ديسك ضارب .. وسناني ضاربه وبقى لي إسبوعين عند الميكانيكي بيعمل لي عَمره شاملة في سناني .. حتى أستاذ عادل أبو زيد بيقولي بضحك إمبارح " إيه اللي جاب سنانك لإيدك اللي بتكتب بها عالكيبورد ؟ " فقلت له مش كله موصل على كله وبينفد على بعضه ..

------------

الأخ العزيز HDarwish

شرف لي يا فندم أن تطلب مشورة العبد الفقير إلى الله في أمر ما وأرجو من الله أن اكون عند حسن ظن الزملاء بي ..

بص يا ريس

مدينة الملك فهد الطبية .. نار على علم هنا وتسير على قدم المساواة مع مستشفى الملك فيصل التخصصي والتى لها باع طبي طويل بالرياض .. بالإضافة إلى المستشفى العسكري ... والثلاثة تقريباً يقعوا في محيط واحد - فركة كعب مني -

ومرتب الزوجة إلى حد ما معقول لو كان الخمسة آلاف دول راتب أساسي بس ... بس لو حضرتك والاولاد جيتو تعيشوا مع بعض وكان في مدارس وحركات وكان الراتب ده راتب إجمالي ولوكشه واحده شامله السكن والمواصلات ... يبقى على الدنيا السلامه ...

فأعمل حساب حضرتك إن الطفل الواحد بيتكلف ما لا يقل عن 1000 ريال شهرياً مدارس وباص وكراريس صفحة وصفحة وبرايات ومساطر وحركات .

وطبعاً الدكتورة إذا كان شغلها في وسط البلد وهو موقع المستشفى يبقى كده هاتدور على سكن في محيط المناطق التالية فقط ( السليمانية - حيث تقع المستشفى - ، الملز ، العُليا ، الورود ) عشان تبقى قريبه من المستشفى وما تاخدش اليوم في المواصلات رايح جاي لو سكنت بعيد ... وبكده تضمن سكن بما لا يقل عن 2000 ريال شهرياً ...

أضف إلى ذلك وبعد القرطمه وجدولة الديون وما إلى ذلك من أمور الميزانية ... 2000 ريال مصروف بيت شهري لحمه وخضار وفراخ بانيه وتليفونات وموبيلات ات ات ات ات

يبقى كده الدكتورة بتشتغل في عمل تطوعي لا تبغي من وراءه إلا مرضات الله وممكن تستلف على أخر الشهر كمان من زميلاتها الطبيبات واهو الناس لبعضيها

انما هما لو موفرين سكن مواصلات .. يبقى يا مزاجو يا مزاجو .. وبكده ممكن تشتروا الهامر بعد اول سنة .

نيجي لحضرتك ... إبعد عن تفكيرك يا راجل شغلانة السكرتارية والكلام ده ... الحاجات دي الواحد بيعملها في بداية الشقاوة وفي مقتبل العمر ... لكن تعريف مفهوم السكرتارية في الدول العربية هنا بيرتبط بإنه شاب صغير وممكن يعمل كل حاجة وأي حاجة ...

لكن تقدر تقول مثلاً عمل إداري .. أهي مبلوعة مش سكرتير يودي ورقة ويجيب ورقة ويبعت فاكس ويرد على تليفونات ..

إنت بتقول أنا باحب مجال الزراعة ... جميل جداص ... لكن لو جيت هنا السعودية هاتتبعت بعته مش ظريفة ... في الشمال مثلاً حيث مناطق الزراعة في القصيم وحائل وتبوك وسكاكا والجوف وعلى السادة المقيمين خارجها مراعاة فروق التوقيت ومش هاكلمك عن الجنوب لإنك كده هاتكون بتنتحر .. وهي بالنسبة لاهل الرياض على الأقل .. كإنك بتروح توشكى أو حلايب وشلاتين ... وبالتالي مش معقول تكون أم العيال في الرياض وإنت مهاجر لبلد تاني بعيدة على الأقل 500 ك من الرياض ..

لكن كمندوب مبيعات له خبرة في شركة زراعية أو غذائية .. فهي كثير جداً خصوصاً لو معاك رخصة قيادة .. ويا مزاجو كمان لو عندك عربية إن شالله ماركة توك توك في البداية لإن ما حدش بيستحمل حد ....

كده بقى نقول هاتجيب الهامر وشقة في مدينة نصر بتطل عالنيل بعد أول سنة ...

وبالتوفيق إن شاء الله

[somayasaleh]

الاخ الفاضل

انا عيشت في السعودية مدة طويلة

وشايفة ان وظيفة زوجتك مطلوبة جدا جدا وكمان المستشفي العسكري محترم جدا

ومن افضل الاماكن اللي ممكن تستمر فيها باذن الله

رأي الشخصي اولا زوجة حضرتك لا تضيع هذه الفرصة لاي سبب كان

ثانيا حضرتك ممكن تلاقي عمل هناك باذن الله تعالي ( بس بتعب شوية)

وثالثا وده الاهم وجودكم مع بعض اهم من اي شئ اخر وخاصة انكم لسه عرسان جداد

صدقني ده اهم من اي اعتبار اخر (وجودكم سويا)

وربنا يوفقكم لما يحب ويرضي

وطبعا ده بعد عمل استخارة باذن الله تعالي

[النيل حبيبي]

اخي الحبيب/حسن

قدمت لك في مكتب توظيف

المسئول سوف يكلمك ويستفسر عن ميعاد وصولك

وطبيعه عملك ياريت الانجليزي يكون برفكت

[HDarwish]

الأخوة الأعزاء Just trying) .. محمد ابوعوف .. رمضان .. سي السيد) .. (النيل حبيبي .. حشيش .. أبو مروان).. الأخت somayasaleh

شكرا جدا جدا على تعاونكم ونصائحكم القيمة

الأخت سمية

فعلا عندك حق .. وهدف الاستقرار العائلي عندي في المقام الأول بس هنعمل إيه ما باليد حيلة .. وعلى فكرة مش بس مستشفى الملك فهد العسكري اللي عرضت علينا .. إحنا تقريبا إسبوعيا بيجيلنا عروض من مستشفيات كتيرة وفي مناطق مختلفة وكلها أحسن من بعضها وده يمكن لإن المدام تقديرها كويس يعني واخده ترتيب على الكلية غير خبرتها

ربنا يقدم اللي فيه الخير إنشاء الله

مع خالص تحياتي واحترامي

الأخ الغالي / سي السيد

سلامات ياريس ويارب ما تشوف وحش أنا مجرب قبلك حكاية العمرة الميكانيكية للأسنان دي ... كان الله في عونك

انا كنت مستني ردك بفارغ الصبر وأهوه الحمد لله لقيتك منور ومشرفني بكلامك اللي زي العسل واسلوبك اللي ما لوش حل

وطالما كلها فركة كعب من حضرتك إنشاء الله يكون لنا الشرف نقابلك عن قريب بإذن الله

في العرض اللي جاي من المستشفى بيقولوه إن السكن والمواصلات عليهم وتقريبا في مدينة الملك فهد نفسها يعني الراتب غير شامل السكن والمواصلات

كمان أنا مش عارف ليه عندي إحساس إن ربنا هيفتحها عليا في السعودية عن الكويت يعني من منظوري الشخصي السعودية فيها المجالات أكثر شوية من الكويت حتى في المشاريع الخاصة وأتكى شوية على حكاية المشاريع الخاصة لإن سبق وعملتها هنا في الكويت بس بسبب نقص السيولة المادية لم يستمر المشروع طويلا بالإضافة إلى أن لي أصدقاء في السعودية لهم شركة خاصة لإستيراد قطع الكمبيوتر وما شاء الله ربنا فاتحها عليهم من وسع .. والأصدقاء دول بينصحوني حتى لو ما لقيتشي شغل في البداية مناسب ممكن يساعدوني بعمل مشروع صغير في البداية لحد ما يقف على رجليه وبعدين مع نفسك بئا يا حاج .. ده حتى في آخر مرة نزلت فيها مصر بري بسيارتي إتعرفت على ناس كتير في السعودية وما شاء الله معظمهم له نشاطات خاصة ومشاريع كلها أحسن من بعضها

بالنسبة لموضوع الأطفال لسه شوية وسبق وذكرت في مداخلة ليا إن كان فيه توأم بس للأسف ربنا ما أرادشي وإنشاء الله جاي في القريب جدا جدا جدا مولود ربنا يكرمنا بيه إنشاء الله

بالنسبة لموضوع الهامر فده هافكر فيه بعدين .. أصل مش غاوي هامر قوي .. خلينا في التوك توك أحسن

آخر حاجة إنت ذكرتها جيت فيها على الجرح ودوست قوي .. ياراجل براحة شوية .. ده إنت خليتني كنت عايز أسيب المكتب وأقوم أروح

فعلا إنت عندك حق موضوع السكرتارية دي تاعبني جدا جدا .. وده لو إتكلمت فيه حاسس إنه مش ياخد موضوع واحد ده ياخد عشر مواضيع في بعض .. يكفي إني بشتغل أنا ومهندس يعتبر زميل مهنة في مكان واحد بس هوه مهندس وأنا سكرتير .. كفاية كده أصل نفسي بتصعب عليا بسرعة وممكن ما أقدرش أكمل كتابة

أخيرا وليس آخرا .. شكرا شكرا شكرا سي السيد .. جعله الله في ميزان حسناتك

صديقي الغالي / رمضان

في بداية كلامي أنا حسيت أول ما شفتك في الموضوع قلت لنفسي ألحق أجري قبل ما تطلع الخرزانة

أعذرني لعدم حضوري المرة اللي فاتت في تجمع المحاورات .. والله غصب عني والظروف معايا مأندلة (السيارة ومش راضية تتبيم قال إيه عندك دخانة ورحتلهم لحد الوقتي يجي ست مرات آخر مرة قال إيه ما عندكشي دخانة عندك ريحة دخانة وقالك إيه قالك آه لازم واسطة يا عم والنبي شفلنا واسطة .. ده غير موسم الأجازات وكل واحد صاحبك يجيلك والنبي سلفنا مية قال يعني الميات من كثرها قوي ده غير مشاكل الشغل وغيره وغيره وغيره ....لما أجي احكيلك )

صدقني قرار إني أترك الكويت ده فعلا مش وليد اللحظة بقالي فترة كبيرة كل يوم مافيش في دماغي غير الموضوع ده ليل ونهار وفي الأول كنت بقول أسيب الكويت وأرجع مصر أحسن ووووو أصون كرامتي

الحياة في الكويت بئت صعبة فعلا والبلد بتتخنق كل يوم زيادة عن الأول .. قولي بالله عليك راتبك مثلا متين دينار لو إنت لوحدك ما تقنعنيش إن مصاريفك الشهرية هتقل عن مية دينار تخيل بئا لو جبيت مراتك كمان .. ياراجل ده أنا جبتهم 3 شهور بقيت صارف 1500 دينار .. ياعم والله أنا مش عايز أحوش بس ما ابئاش مديون ... ولا إيه؟؟

وإذا كنت بتتكلم عن العيشة في السعودية معليشي إسمحلي هي الكويت فيها إيه علشان الواحد يروح يروق شوية فيه ولا هوه اصلا فيه وقت لإن الواحد يروح يروق فيه .. تعرف المدام جيت هنا يا دوب هم ثلاث شهور ما عدشي فيه مكان اسمه ما رحناهوش وكلها شبه بعضها يا المدينة الترفيهية يا المدينة المائية يا المولات والجمعيات ده غير إن الشقة اللي كنا ساكنين فيها يادوب غرفة وصالة ب 180 دينار يعني 3600 جنية يعني 2700 ريال بصراحة بالنسبة للنقطة دي أنا شايف إن الفرق مش كبير ... أنا رحت السعودية مرة وحقيقي بحس فيها بامان وبطيبة ناس ما بلقيهاش هنا في الكويت .... وأدي واحد صاحبي على الصبح إتخالف بدون سبب قال إيه إستعمال تليفون أثناء القيادة وهوه لا استعمل تليفون ولا يحزنون يهديك يرضيك يا عم إعمل برنت من شركة الاتصالات وهتشوف إني النهاردة ما عملتش ولا مكالمة تليفون يكون الرد أنا عايز أظلمك كيفي كده

كمان يكفي حاجة جميلة قوي غير الاستقرار هي إنك هتعمل عمرة وحج ليك ولعائلتك هوه فيه أحسن من كده وبعدها ياسيدي نبقى ناكلها بعيش ودقه في مصر

أخر حاجة بالنسبة لموضوع الرواتب فمن وجهة نظري راتب ألفين ريال يعادل في الكويت 250 دينار مقارنة بظروف المعيشة وده من واقع ناس كانت في الكويت وراحت السعودية بالفعل .. كمان لما تنزل أجازة لمصر ياعيني بص لواحد نازل من الكويت وواحد تاني نازل من السعودية والله بتلاقي فرق كبير بلاش أوضح أكثر من كده .. ولما نتقابل لنا قعده حلوه مع بعض

الأخ العزيز / Just trying

مافيش حساسيات ولا حاجة موضوع إعتمد على شغلك إنت دي أنا واخد بالي منها كويس ومش ناسيها والله بس ساعات لما الظروف بتبقى أصعب من إنك تتحملها لوحدك يبقى مافيش مشكلة لو حصل تعاون من الطرفين للوصول لاستقرار عائلي أو إن نروح لبديل تاني خالص وهوه إني أستقر بمصر أحسن وساعتها هاقولك إن برغم المدام دكتورة إلا إني هاقنعها إنها تقعد في البيت ولا دكتورة ولا يحزنون تاخد بالها من بيتها أحسن ...... واسمحلي مش هينفع أخوض في جوانب تانية كتيرة علشان ما نخرجشي من موضوعنا الأساسي وكمان منعا للخوض في خصوصيات أعمق

وبالنسبة لموضوع زيادة المرتبات فده كلام مش أكيد بل بالعكس الوقتي مصريين بييجوا من مصر على مرتبات اقل ما يقال عنها إنها سخرية شاب مؤهل جامعي جاي يشتغل على أربعين وخمس وثلاثون دينار وبيشتغل 12 ساعة طب إزاي واللي مش مصدق يجي وأنا أوريه عينات بنفسي

شكلها كده لا هاروح السعودية ولا هافضل زي ما أنا في الكويت ... يا عم أنا أخدها من قاصرها وخلاص وأخد ديلي في اسناني وجري على مصر

شكرا ليكم جميعا

[رمضان]

يبدو انك اخذت قراراك بالفعل

لا يسعني الا ان اتمنى لك التوفيق

وياريت لو نقدر نشوفك الخميس ان شاء الله احنا عاملين سهرة هتعجبك قوي علشان تعرف اننا بنغير جو بس

احتمال نسهر في حسني او جاد او نروح الافنيوز

[HDarwish]

النيل حبيبي

شكرا جزيلا على مجهودا .. وأسف إذا كنت تعبتك معايا .. جعله الله لك في ميزان حسناتك

وإنشاء الله لما المسئول يتصل بيا هكون مستعد ومن ناحية موضوع اللغة ده فما فيش فيها قلق .. الحمد لله أخوك لبلب في الإنجليزي يمكن علشان الشركة اللي أنا شغال فيها اللغة الأولى فيها هي اللغة الانجليزية ده حتى إحنا يا مصريين لما بنتكلم مع بعض بنتكلم بالانجليزي علشان لو فيه حد ثالث ما بيعرفشي عربي يكون معانا في الصورة وفاهم الكلام وكما علشان لا يسئ الظن لو اسمه جيه في الموضوع

اللي فيه الخير ربنا يقدمه إنشاء الله

تحياتي واحترامي

شكرا جدا جدا

[HDarwish]

رمضان باشا

القرار لسه ما أخذتوش بالفعل ولكن بدرس الموضوع وبناقشه وكله معتمد إنشاء الله إن ألاقي فرصة كويسة في السعودية إنشاء الله

ورأيك على راسي وعيني .. ما تزعلشي مني جايز يكون كان ردي ناشف شوية بس من الضغط اللي أنا فيه بس

وبإذن الله هكون موجود معاكم يوم الخميس .. شرف ليا يا زعيم

إيه رأيك لو تخليها الأفينيوز أحسن؟؟

[رمضان]

استاذ حسن

الشرف لينا

وان شاء الله لما تقعد مع الشباب هتلاقي حل لكل مشاكلك هنا واللي انا شايف انها بسيطة وعادية جدا