الويك اند المصرى

[crossfield]

كلام الأخ أبو يوسف فى صفحة الفضفضة هوه اللى خلانى أفتح الموضوع ده لأنه بيلخص حالة كل المصريين تقريباً .المشكلة اننا كمصريين مبنعرفش نستمتع باجازاتنا و لا بوقتنا بشكل عام و تبقى النتيجة اكتئاب و ملل و قرف و اللى بيحصل فى بيوتنا أكبر دليل. يعنى تلاقى الهانم من دول تسيب أيام الأسبوع كلها و تصبح يوم الجمعة يوم الاجازة اللى المفروض الناس بتستجم فيه أو تغير جو أو تسافر لأى حتة ان أمكن و هاتك يا تنفيض و يا ترزيع فى البيبان و الشبابيك. طيب متعمل ده فى وسط الأسبوع اشمعنا يوم الاجازة ؟؟؟؟؟ :? أنا أعتقد ان كل مشاكلنا و معاناتنا النفسية هتقل لو اهتمينا بالويك اند و احترمناه زى ما بيحصل فى أوروبا. فى اسبانيا مثلاً تلاقى مدريد دى من يوم الجمعة بالليل الشوارع زحمة و الناس كلها فى الشارع أو برة المدينة اللى همه عايشين فيها و هاجين على أى شاطئ و الملفت للنظر ان الناس كلها فعلاً فى الشارع أطفال و شباب و عواجيز يعنى مفيش حد تقريباً بيقعد فى بيته .ليه احنا كمان منبقاش كده؟ ليه بنحسدهم بس على تقدمهم العلمى ؟؟؟؟ ليه منشوفش همه بيقدروا نفسهم و يكافؤها قد ايه و نعمل زيهم؟؟؟أنا مبرميش اللوم على الست المصرية بس لأن الرجل المصرى برضو عليه ذنب كبير فى الموضوع ده فيه أزواج ميعرفوش يعنى ايه ويك اند أصلاً .طول الأسبوع شغل شغل شغل لحد مايقعوا من التعب و الاجهاد .و فيه أزواج يعرفوا يقضوا الويك اند كويس قوى و يستمتعوا بيه بس بعيد عن المدام و الأولاد (مع الأصدقاء مثلاً) :twisted: .أعرف أزواج كتير بياخدوا يوم أجازتهم نووووووووووووم أو فرجة على التليفزيون او الدش و مش عايزين يخرجوا من البيت و لا بيعرفوا حتى يستمتعوا بقعدتهم فى البيت مع أولادهم(بلاش زوجاتهم) .أنا شخصياً يوم ما حد من اخواتى بيقعد فى البيت بيبقى يوم مالوش ملامح .لية؟ اللى عايز يتفرج على الأخبار و بس و اللى قاعد على كمبيوتر طول النهار(زى حالاتى كده) و اللى خارج مع اصحابه و اللىفى ملك تانى .ليه ميكونش الويك اند فرصة لدول كلهم يتجمعوا فى حتة واحدة مش لازم برة البيت بس أنا بقول لو خرجنا من البيت ممكن نقلل الخسائر فى الأرواح :D .

[Salwa]

عزيزتى كروسفيلد.

تعليقك....على التعليق الخاص بالأخ ابو يوسف...جميل.

والحل؟

بعض التغيير...فى الأجازة....وكل الأيام.

لو قلنا اجازة نهاية الأسبوع......زى ماقلتى فى مدريد وفى كل اسبانيا

بل وفى كل العالم....الأجازة مقدسة.

يعنى ايه اجازة؟....يعنى سماح بعمل شئ يختلف عن الأشياء المعتادة

او تصريح بعمل شئ غير روتينى.

فى مصر...المادة...تتحكم فى طريقة اختيارك للمكان.

حتى الحدائق ...لاينظر لها النظرة المهمة ...كهنا مثلا.

هنا ممكن تقضى نهاية اسبوع رائعة بأقل الأمكانيات.

والأول نتكلم على مصر...مشكلة ألرصيف.....مشكلة الشارع.

ازاى ممكن واحد...حتى يتمشى؟

تانى نقول الحدائق والنوادى......آخر زيارة لى فى مصر قضينا يوم فى

النادى واتغدينا..اسعار ممتازة وطعام وخدمة جيدة.

المشكلة ان الحدائق العامة مفروض يكون فيه العاب للاطفال حتى

يتسنى لجميع الناس قضاء وقت ممتع.

فيه كافيتريات بأسعار معقولة....مش سياحية.

ثم فيه فى مصر....أماكن محدودة للفسحة...للأسف.

بالنسبه لأهلها...مش السياح.

وبعدين؟

اكثر العائلات تتزاور وتتجمع فى نهاية الاسبوع.

يتغدوا فى أى مكان....يتمشوا او يتجمعوا يتسامروا.

هنا....اللى ميقضيش نهاية الاسبوع//مساء الجمعة،السبت والاحد كل اليوم//برة البلد.

على الأقل يتعشى برة يوم الجمعة...ويتغدى برة السبت...والأحد راحة

وكل واحد ومزاجه.

يعنى مثلا انهاردة السبت....اتمشينا الصبح فى الشمس...ثم ذهبنا

لكافيتريا مشهورة بتورتة الجبنة الخاصة بهم..تناولنا الافطار.

واتغدينا فى البيت.

ممكن بكرة الصبح نتجمع مع اصدقاءنا....ناخد القهوة...ونتحدث.

واهو تغيير.

لما الجو يتحسن...ممكن نخرج برة البلد.

لو عاوزة متشعريش بالملل...تعملى ايه؟

الصبح عند ذهابك لعملك...غيرى الطريق....صعب.؟

غيرى الرصيف.

لو متعودة كل يوم تفطرى مع القهوة....غيرى وجربى الشاى.

لو...زى ماقال الأخ ابو يوسف...نفس المشاكل ونفس الوجوه...

وانت رايح الشغل...خد معاك وردة....ضعها على مكتبك...وشوف معنوياتك.....قول لكل اللى تقابله....صباح الخير.

عند التحدث تليفونيا...تحدث بصوت ضاحك...هذا سينعكس على الطرف الآخر...وحاتتحل المشاكل بطريقه سلسة.

زوجتك؟

جرب تقوللها.........مش فاكر؟هو انا قلت لك قبل كدة انك غاليه عندى

قوى؟...ان كنت قلت..بكررها تانى...وان كنت مقلتش اهو انتى عرفتى..

وشوف النتيجة..

كلمة حلوة.......وردة......ضحكة......

وداعا للملل.

سلامى.

[Cleo]

كلام جميل جدا يا كروس... بس تعالى نسأل نفسنا.... رب أسرة مكونة من 3 أطفال و أمهم و هو شخصيا... مرتبه نقول 500 جنيه فى الشهر... ده ممكن يروح يتفسح فين كل يوم جمعة؟؟ (بلاش نقول جمعة و سبت.. أو خميس و جمعة)

فى كل بلاد العالم الشواطئ مجانية.... تروح بعربيتك لأى شاطئ و مطرح ما يجيلك مزاجك تزرع الشمسية و تقعد سلطان زمانك...

فى مصر بأة لازم يقعدوك إجبارى على ترابيزة و الكرسى ب 3 جنيه و الشمسية ب 5 جنيه (ده لو هانروح شواطئ)

بلاش الشواطئ... نتكلم عن الحدائق العامة.... فين فى مصر حدائق عامة (غير حديقة المطار فى صلاح سالم) ؟؟؟ حديقة الأندلس مغلقة أمام الجمهور و أظن كذلك حدائق الأورمان.... الحديقة الدولية فى مجاهل مدينة نصر (تخيلى لو اللى جاى يقضى فيها اليوم جاى مثلا من حوارى الجيزة أو إمبابة أو الكيتكات) التذكرة بكام ....

سينما؟؟؟؟ التذكرة الواحدة بكام؟؟؟ ده غير الحاجة الساقعة و سندوتشات الفول عشان العيال...!!!!

طب و الواحد عشان يتفسح فسحة زى كدة.... يصرف كام فلوس و أد إيه وقت و أعصاب و حرقة دم فى المواصلات؟؟

يا عزيزتى الترفيه فى مصر مكلف جدا ولا يقدر على البسيط منه إلا الموسرين.... أما الغلابة فكفاية عليهم قعدة حلوة جنب الشباك اللى يمكن (مش أكيد) يدخل نسمة هوا لعلبة السردين اللى قاعدين فيها...

[بنت شعنونة]

وانتوا بتتكلموا كدا

مش عارفا ليه افتكرت عادل امام وسعيد صالح في مدرسة المشاغبين وهما عمالين يصوتو

يختيييييييييييييي

يخراااااااااابييييي

يختييييييييييي

يخرابببببببيييييييييييي

يخختتتتتيييييي يخخختييييييي يختي

:D

اولا الكلام كله صح

واسألوني انا "اكبر مفلسة حاليا: :? :?

المشكلة كمان الأهواء

يعني مثلا مرة عملنا العملة السوووووودا دي

وخرجنا العيلة ما عدا اخويا

قااااااااال ايه ودونا قرية جديدة كدا

بيصطادوا فيها سمك!!!!!!!!!!! :shock: :shock:

اصطاد سمك؟؟؟؟

وانا مالي؟؟؟؟؟

انا مش بحبه اصلا؟؟؟؟؟

اقوم اصطاده؟؟؟؟؟؟؟؟

كنا في مطروح ايامها

المهم كل واحد فينا مسك صنارة

و"اتزرع" في حتة شكل

لحد ما انا اتحممممممممممصصصصصصصصصصصتتتتتتتت

وابقى شايفا السمكة بنتت اللذين طالعا تجري من قدامي

وانا مش عارفا اصطااااادهاااااااا :twisted: :twisted: :twisted:

لحد ما اتجنيت

رحت مصرخة وجايبا كيس وقعدت اجري ورا السمك في المية زي العبيطة كدا :D :D :roll: :roll:

وهما مستمتعييييييييييين جداااااااااااااااااااااا

كان يوم ممل ليا جدااااااااااااا :? :?

وهكذا بقى

[وسام]

هاتولى مكان عدل قريب من اى تجمع سكانى فى مصر و ينفع لشم الهوا و الاستجمام ..........احنا فى صحراااااااا يا ناس

والناس متكدسة فوق بعض فى المدن و التلوث و القرف بيخللى كل واحد يفضل انه ميخرجش من بيته فى يوم الاجازة عشان ما يشوفش الجو الرمادى اللى مصر عايشة فيه.......... فين الاماكن الطبيعية اللى فى مصر و يمكن الوصول ليها بسهولة ؟؟؟؟؟

تفريغ الضغط المتواصل طول ايام العمل بيحصل فى حاجة اسمها اجازة الصيف و اجازة نص السنة :(

[ragab2]

كتبت كليو

كلام جميل جدا يا كروس... بس تعالى نسأل نفسنا.... رب أسرة مكونة من 3 أطفال و أمهم و هو شخصيا... مرتبه نقول 500 جنيه فى الشهر... ده ممكن يروح يتفسح فين كل يوم جمعة؟؟ (بلاش نقول جمعة و سبت.. أو خميس و جمعة) 

فى كل بلاد العالم الشواطئ مجانية.... تروح بعربيتك لأى شاطئ و مطرح ما يجيلك مزاجك تزرع الشمسية و تقعد سلطان زمانك... 

فى مصر بأة لازم يقعدوك إجبارى على ترابيزة و الكرسى ب 3 جنيه و الشمسية ب 5 جنيه (ده لو هانروح شواطئ) 

بلاش الشواطئ... نتكلم عن الحدائق العامة.... فين فى مصر حدائق عامة (غير حديقة المطار فى صلاح سالم) ؟؟؟ حديقة الأندلس مغلقة أمام الجمهور و أظن كذلك حدائق الأورمان.... الحديقة الدولية فى مجاهل مدينة نصر (تخيلى لو اللى جاى يقضى فيها اليوم جاى مثلا من حوارى الجيزة أو إمبابة أو الكيتكات) التذكرة بكام .... 

سينما؟؟؟؟ التذكرة الواحدة بكام؟؟؟ ده غير الحاجة الساقعة و سندوتشات الفول عشان العيال...!!!! 

طب و الواحد عشان يتفسح فسحة زى كدة.... يصرف كام فلوس و أد إيه وقت و أعصاب و حرقة دم فى المواصلات؟؟ 

يا عزيزتى الترفيه فى مصر مكلف جدا ولا يقدر على البسيط منه إلا الموسرين.... أما الغلابة فكفاية عليهم قعدة حلوة جنب الشباك اللى يمكن (مش أكيد) يدخل نسمة هوا لعلبة السردين اللى قاعدين فيها...

 

كلام

واقعى ومعقول

وهذا ماكنت سأقوله

[crossfield]

معلش أنا يمكن قصرت كلامى على الطبقة العادية أو المتوسطة اللى بإمكانها انها تعمل التغيير ده . معاكوا طبعاً ان الواحد لما بيخرج عشان يغير جو بيكتشف انه غير دمه مش حاجة تانية لكن برضو حتى تغيير الدم ده مطلوب .يعنى بدل ما الواحد طول الأسبوع من البيت للشغل و من الشغل للبيت و نفس الوشوش و نفس الكلام و نفس المشاكل لدرجة ان الواحد أحياناً بيبقى خلاص هيسمع الكلام اللى لسة ما اتقالش يبقى أحسن انه يخرج يشمله شوية تراب بعيد عن الناس دى كلها ؛ده فى حد ذاته تغيير و أكيد بيفرق. طيب لو قلنا ان الغالبية العظمى متقدرش تعمل ده كل أسبوع عشان الظروف و الحالة الأقتصادية المهببة على الكل أو لأى أسباب تانية يبقى ايه الحل؟مفيش غير قعدة البيت و هنا بقى لازم يبقى لينا وقفة احنا بنعمل اية لما بنقعد فى البيت ؟؟؟ ازاى نستمتع بأجازة و احنا فى البيت؟ أراهن ان أغلب البيوت المصرية بيحصل فيها اللى قلته فى أول مداخلة : المدام بتنضف ؛البيه نايم أو هاجج من البيت مع أصحابه أو مبلم قدام التليفزيون و الأولاد كل واحد منهم فى الدنيا بتاعته .ليه مبنتلمش كعيلة واحدة ؟ ليه منستمتعش بوقتنا ده جوة البيت بعمل حاجة مشتركة مثلاً البيت كله بشترك فى عمل الغداء أو البيت كله يتلم و يناقش موضوع ما و مش لازم يكون موضوع الساعة لكن يبقى فيه حوار بين الناس .أنا كنت فاكرة ان أسرتى بس هيه اللى كده لكن لقيت كل اللى باعرفهم بيشتكوا من نفس الموضوع ده . طيب أنتوا بتعملوا ايه فى أجازاتكم لو قعدتوا فى البيت؟

[الطفشان]

أشكرك اولا يا كروسفيلد على افراد موضوع مستقل بدل تشعب الحوار

و أشكرك ثانية على فتح هذا الموضوع الهام

اتفق مع الاخت سلوى اننا هنا في الغرب بنعرف نغير جو

بسبب ان دة شئ اساسي في المجتمع، للتنفيس عن ضغط باقي الاسبوع، و لتواجد الامكانيات

ذهبت اليوم الى شاطئ

المشوار ساعة و نص

الدخول مجاني

الرمال جميلة

مجهز بحمامات

و اماكن للجلوس

و أخذنا شواية و كانت قعدة كويسة

الجو فيه لسعة برد فلا يسمح لباقي الناس ان تتعرى

التكلفة بنزين المشوار و لزوم الشوي فقط

للاسف

هذا غير متوافر في مصر

و يجب ان يكون الاسرة عندها عضوية نادي او فيلا في مصيف

[se_ Elsyed]

بصوا يا جماعة هي مش مسالة تكاليف فقط ، لكنها مسألة ثقافة والتربية من الصغر التى لا تزرع فى الأنسان قيمة الأجازة ، فإذا كانت مسألة تكاليف فممكن العائلة تتغدى أو تتعشى فى البيت وياخدوا بعضهم بمترو الأنفاق اللى التذكرة فيه بـ 75 قرش ويروحوا الكورنيش أو جنينة الميرلاند أعتقد الدخول بـ 50 قرش ..... يعني اللى عايز يتصرف هايتصرف ويضغط تكاليفه لأدنى حد ... لكن للاسف أحنا بنكسل وبنستسهل وأنا منهم لما كنت فى مصر ... ده أنا بأنام نوم يوم الأجازة وساعات بأعمل أرقام قياسية 12 ساعة وانت طالع نوم :lol:

[ابو يوسف]

اولا شكرا يا كروس فيلد

بس مش كان حد يقول لى ؟؟؟ :)

بس الحمد لله انها مش مشكلتى لوحدى .... و انها مشكلة عامة ...

اما بخصوص الويك اند .... انا متفق على انه حل جميل و اكيد انا جربته و كلنا جربناه بس فعلياً ... تحقيقه صعب ....

اولا : - كما ذكر الزملاء - صعب تلاقى فى مصر مكان تتوافر فيه صفات الهدوء و الجمال و رخص الثمن ...(لو حد يعرف مكان يا ريت يقول لى )

ثانياً : معظمنا ما بيصدق ييجى يوم الاجازة علشان يقعد فى البيت و يعمل الـ لا شىء !!! يصحى براحته و ينام فى اى وقت بالنهار .. و يشوف اى فيلم عربى ممل :)

و لكنى ارى ان الويك اند مش هو الحل الوحيد ... لأن اسبوع من الروتين القاتل ... لن يتغلب عليه يوم واحد ..

احيانا الواحد بيحس انه عاوز يعمل حاجة جديدة ... يعرف ناس جديدة .. يشوف مكان جديد ...يسمع افكار جديدة ... يتعلم حاجة جديدة ...

يعنى يبقى فيه روح و حياة و هدف .... فيه تحدى مختلف ... يحرك سكون الحياة ...

أعذرونى لو كنت ممل ...... :( :( :(

[mnman]

كليو... بصراحة اوجزتي فأنجزتي...

حيروح فين الموظف ابو 3 عيال و امهم و 500 جنية... ممكن تشيلز ..لا لا رخيص مش من مستواة... جراند كافية رخيص و كلة عيال و شباب.... فرايديز مش كل مرة .... دييلز فية خمور حرام ... يبقي يقعد في البيت يتفرج علي البرامج الجميلة و المعلومات الشيقة الي بيقدمها مسبيرو العظيم.... :? :? :?

[Khiber]

ويك إند إيه ياعم الحاج هو إحنا لاقين ناكل :) :) :D

ثم مين الموظف دى يا أخى منمان اللى بياخد 500 جنيه ده أكيد مدير مش موظف ب 120 جنيه. طب إيه رأيكم أنا بعرف ناس مرتبها 60 جنيه. :shock: :( :( :( :( :( :(

طيب لو حتى واحد متريش شيه هيتفسح ولا هيزاكر لإبنه الثانويه العامه اللى بقت ثلاث سنوات طحن. :twisted: :twisted: :twisted:

[White heart]

بما ان الموضوع عن الويك-اند، فأعتقد انة بجانب ما طرحتموة يمكننى نقل ايضا ما يجرى هنا من طرق مختلفة لتقضية الويك-اند...

هنا بجانب اى تجمع سكانى يوجد ما يشبة حديقة تختلف حجمها بأختلاف حجم هذا التجمع، على ان بهم جميعا "ترابيزة بينج-بونج"، مراجيح ملونة مختلفة، و مربع بة رمل للاطفال الاصغر سنا!!! بالطبع ليس لها بوابة و لا رسم دخول، فهى ابسط ما يمكن تقديمة من "بلدية" لدافعى الضرائب، و اعترف بأن مثل هذة الحدائق و انتشارها يساهم الى قدر كبير على تغيير الجو خلال الأسبوع و قبل حلول عطلة نهاية الاسبوع ..... اما لدينا ؟؟!!

يمتلك "معظم" قاطنى هذا البلد هنا "لمنازل" خاصة بها حديقة خاصة، تساعد فى معظم الأحيان على قضاء الويك اند على "المشاوى" و مع الأصدقاء، و لعب الكثير من الألعاب الخفيفة الممتعة، اما لدينا ؟؟!!

لا يمكن انكار وجود "حدائق عامة" و انتشارها بكثرة بل و تعيين العديدين للعمل على تنسيق مزروعاتها و جمالها، و بالطبع ليس لحراستها أو لتحصيل "رسم دخول" تحت اى مسمى، اما لدينا؟؟!!

تخصيص "شوارع" تجارية كاملة "للمشاة فقط" مع وجود الكثير من الأستراحات او ما يسمى عندنا "اكشاك موسيقى" يعزف بها فرق متنوعة يأتون من مختلف مدن البلد و يتنوع فى كل مرة، و كثير من الأحيان يقوم ابناء مختلف المدارس بتقديم بعض العروض الممتعة المختلفة....يا لها من وسيلة لقضاء "شوبينج ويك-اند" و فى مثل هذا المناخ العام، اما لدينا؟؟!!

لا يمكن تجاهل ميادين بعينها و ما يتم تنظيمة بها مثلا فى أخر سبت من كل شهر، من "اسواق" بسيطة "للأنتيكة" يا لها من متعة التنزة و التطلع على مثل هذا الكم الوفير بكل ما يذكرنا "بالزمن الجميل"، أما لدينا؟؟!!

اما عن حمامات السباحة (المفتوحة منها او المغلقة) و انتشارها، و بالطبع "رمزية" رسم دخولها، بجانب الكثير من "البحيرات" و الغابات" سواء الطبيعية منها او الصناعية، بل الطرق المخصصة لراكبى الدراجات، بل و وجود خرائط مفصلة فقط لهم، ووجود بجانب كل ذلك "مراكز رياضية" بكل مدينة بها ايضا حمامات السباحة، العاب اليكترونية، و صالات للتمارين الرياضية المختلفة كالتنس و خلافة...

اما لدينا؟؟!!

من الاماكن الممتعة لقضاء الويك-اند، هى المكتبات العامة و ما تحوية من وسائل تثقيفية مختلفة (صوتية و مرئية) بجانب المكتوبة، ايضا المتاحف، و ما اعجب بعض انواعها، لقد قمت اخيرا بزيارة متحف بة تصاميم فعلية "لغرف" شباب الجيل الحالى، "نوعية البوسترات المعلقة"، الالوان، الكتب، الأجهزة، الموبيليات و المفروشات....الخ..الخ ، منذ حوالى شهرين فقد قمت بزيارة متحف عبارة عن مدينة كاملة مصغرة، تم تجميع جميع المنازل بها من مختلف انحاء البلد، و هى منازل حقيقية و اصلية عمرها يزيد عن ال500 عام، و تستطيع دخولها و مشاهدة تماثيل و ادوات معيشية مختلفة توضح لك كيف كانوا يعيشون فى هذة الحقبة، و داخل شوارع هذة المدينة فرق موسيقية ترتدى و تعزف بألات نفس هذا الزمن، بل بعض المطاعم التى تقدم المأكولات و المشروبات المميزة لهذا الزمن!! أما لدينا؟؟!!

هذا غير الكرنفلات و المناسبات الاحتفالية المختلفة المبهجة الالوان...

اما لدينا؟؟!!

أسف لتعمدى طرح نفس التساؤل فى نهاية كل مثل، و لكن ربما لأعتقادى بانة هناك علاقة قوية بين اجابة مثل تلك الأسئلة، و "تعدادنا السكانى" فهل اذا كان عددنا أقل، الم يكن ساعتها اقتصادنا افضل يساعد على انشاء "توائم" لمثل تلك المدن، بحيث ننتشر و نتوزع عليها، بدلا من "التكدس السكانى" الذى يمنعنا بالتمتع بال"ويك-اند" فى مساحات خضراء "كثيرة"، بدلا من عناء الحكومة و اولايتها فى ايجاد "سوق بديل" لمثل هؤلاء ممن عانوا سنين لوجود "سوق سمك" فى وسط حيهم!!! أحلم باليوم الذى يختفى من قاموسنا كلمات مثل

"احياء او مدن عشوائية"، او "سكان المقابر"!!! حتى يتسنى لنا بعدها الاجابة على سؤال: اين يستطيع كل منا قضاء "ويك-اند" بهيج فى بلدنا....

و شكرا..

[ابو يوسف]

اعذرونى ... اعتقد ان الحل لا يكمن فقط فى الويك اند ...

مجرد قعدة حلوة على قهوة بلدى مع ناس حلوين ... نتكلم و نتناقش و نتخانق و نضحك و نلعب طاولة و دومينو ممكن تغير جو الملل ...

لكن منين تلاقى القعدة الحلوة و فين تلاقى الناس الحلوين !!!! :? :? :?

[crossfield]

ردودكم جميعاً بصراحة أصابتنى بإحباط شديد .أنا حاسة زى ما أكون بأقول خلاص ما دام الناس مش لاقية تاكل عيش ما تاكل جاتوه! مش هاختلف معاكم فى ان بلدنا مفيهاش اماكن كتيرة للترفيه فى حدود الأسرة المصرية العادية بس المكان فى حد ذاته مش هوه المشكلة الوحيدة لأن زى الأخ أبو يوسف مبيقول فعلاً المشكلة ان كمان مفيش ناس تقدر تستمتع بصحبتها :? .حتى لما بنقعد فى بيوتنا كل واحد مع نفسه فى دنيته . لأ الحكاية مش حكاية أماكن و بس ؛ الانسان المصرى نفسه فقد القدرة على الاستمتاع بأى حاجة كويسة حتى لو كانت صحبة أهل أو أصدقاء .اكتئاااااااااااااااااب.

[ابو يوسف]

هل الاكتئاب معدى ؟؟؟

هل الملل مرض ينتقل بمجرد الحديث عنه ؟؟

هل كلنا بداخلنا هذا الملل و الاحباط و يخنقنا الروتين القاتل و والرتابة المميتة !!

أم أن هذا الشعور يربط شريحة خاصة جدا جدا من الناس - و هى اللى بتتشارك الاراء فى المنتديات ... زينا كدة ؟؟؟

لانه ليس من المعقول اننا كلنا موظفين .. (او ونشعر كالموظفين)

و ليس من المعقول اننا كلنا ليس لدينا جديد نفعله ..

و لسنا جميعا - بالتأكيد - من نفس الطبقة الاجتماعية المطحونة التى تحمل هم هذا الويك اند قبله باسبوع و بعده باسبوع ؟؟؟

اذن ....

لماذا نحن مصابون بالملل ؟؟؟؟

[بنت شعنونة]

لآننا شعب كسول جدا ابو يوسف...

بس :? :?

[وسام]

أخ ابو يوسف حضرتك كاتب انك ساكن فى الجيزا

هل جربت و انت ماشى فى شارع الهرم و فيصل و نازل على وسط البلد هل جربت تعد كام واحد ماشى مبتسم او تحس انه مبسوط حتى ؟؟

[Masrawy Abroad]

الشعب المصري مش كسول نهائي يا شعنونة...الشعب محبط جداُ ...مكتئب جداً ...مقهور جداً....لا يعرف معنى أن يعيش عيشة حلوة (لأن الترفيه والتنزه الذي تريه في الخليج وفي الغرب يعتبر رفاهية كبيرة وتكلفة مادية لا يقدر عليها موظف راتبة بضعة عشرات من الجنيهات ومتعلق في رقبته اولاده وامهم ويمكن يعول اخته او والديه).

المواطن المصري أكثر الناس نشاطاً (معظم المصريين في مصر يعملون اكثر من شغلانة لتوفير قوت يومهم) ..ابسط مثال اننا حين نهاجر للخارج نتفوق على اصحاب البلد نشاطاً وهمة للعمل ونجاحاً وتجدي المصريين يعملون بشكل يثير دهشة الأمريكان نفسهم ..اعرف صديق لي مدرس بمصر يعمل ثلاث وظائف الى جانب وظيفته (ليست دروس خصوصية) حتى يقدر على مصاريف الحياة...

من منا في مصر يعمل من 9 إلى 5 يوميا... ويومين اجازة في الاسبوع؟؟...ستجديهم قليلين...شغل القطاع الخاص في مصر عبارة عن مص دم وانتحار وساعات عمل ممتدة ...بتخرجي الصبح مش عارفة ها ترجعي امتى باليل..ولوفكرتي تمشي في ميعادك يبقى يا ويلك يا سواد ليلك...

- الناس بتقضي الاجازة في بيتها نوم او مشاهدة تلفزيون لسببين (التعب الجسماني طوال الاسبوع وشغل من 10 ل 12 ساعة يوميا+ توفيرا لنفقات الخروج والتنزه) حتى العزومات بين الاسر قلت بشكل غريب لضيق ذات اليد...والوضع الاقتصادي الصعب.

الناس مش كسلانة...الناس تعبانة ومرهقة ومكتئبة ..فاعطوهم العذر

[Masrawy Abroad]

يا اخ وسام

أعطني سبباً عشان تكون الناس مبسوطة

- هواء يتنفسوه.......أعلى نسب التلوث في العالم

- ماء يشربوه.........فشل كلوي وامراض كبد (اسأل أي دكتور على الموضوع ده....او افتح الفلتر بتاع الميه في مصر واتفرج على عجائب الطبيعة)

- مصاريف حياة.....نعادل المستوى العالمي في الغلاء ونضارع دول اوربية وامريكية في تساو الاسعار...مع فارق (متوسط دخل الفرد اللي يشبه بنجلاديش)

- التلفزيون والاعلام ......مش محتاج توضيح

- السكن والزواج.........معجزة المعجزات

- وسائل النقل العام (اتوبيسات ومترو وقطارات)........اقفاص حديدية وعلب سردين

- فرص عمل....بطالة متزايدة ومئات الألاف من الجامعيين يخرجون لسوق العمل وتنتهي بالجلوس على القهوة لعدم جدوى البحث

وغيره كتير..

اظن شيء طبيعي ما نراه في عيون الناس