الويك اند المصرى

[crossfield]

احنا مش شعب كسول و لا حاجة لكن الملل و الاحباط همه اللى خلونا كده . أنا مثلاً لما كنت طالبة فى الجامعة و أول ما أتخرجت برضو كنت شعلة نشاط كنت حاسة انى ممكن أهد الدنيا و أبنيها تانى لكن سنة ورا سنة ابتديت أحس انى ترس فى ماكنة حاجة كدة عاملة زى الانسان الالى روتين وملل؛ نسخة من ميت ألف نسخة . لقيت فى شغلى اللى بيشتغل زى اللى مبيشتغلش و الكل فى الاخر بيقبض نفس المرتب وانتو عارفين مرتبات الحكومة أصلاً شكلها ايه :lol: ... و رغم كده كنت ملتزمة جداً فى شغلى لكن بالوقت أبتديت أمل و أحس بعدم جدوى التزامى أخدت أجازة طويلة بدون مرتب و عشت فترة بعيد عن شغلى و بعدين رجعت تانى لنفس الملل و الرتابة ؛للأسف اتعديت من الجو اللى حواليه و ابتديت أحس ان فعلاً مفيش فايدة ؛ و رغم كده أدينى باقاوح . جو العمل فعلاً فاسد الناس مبتحبش بعضها ؛ كل واحد حاسس انه هوه أولى من غيره بأى حاجة كويسة ؛ طيب و الله ان من فترة كان فيه دكاترة الواحد كان متصور انهم أحسن ناس الواحد عرفهم فى الجامعة فوجئت بيهم فى اجتماع من اجتماعات القسم بيتخانقوا على 20 أو 30جنيه .تخيلوا و يا ريته خلاف بشكل مهذب و يا ريت الناس دى محتاجة فلوس أصلاً كنت لقيتلهم مبرر ؛ ده طبعاً غير جو الهمز و اللمز اللى انتو أكيد عارفينه "فلانة دى مش باينلها جواز؛ فلانة اتطلقت ؛ فلانة دى مش هتبطل تدى دروس بقى ؛ فلانة بترسم على فلان بس فلان بقى فى دماغه فلانة التانية...."لما ورمممممت . مكنتش أتخيل ان أساتذة جامعة ينزلوا للمستوى ده و يقطعوا بعض بالشكل ده و يبقىجواهم كم الحقد و الكراهية ده لبعضهم ؛فعلاً الناس مش بالشهادات .؛ و أكيد اللى بأقوله ده بيحصل فى أغلب المؤسسات الحكومية .

ده فى الشغل بسسسسسسس ؛ نيجى بقى للعلاقات الاجتماعية او الانسانية عموماً : مين فينا معندوش مشكلة منغصة عليه حياته ؛ مين فينا مبيحسش بالقلق أو الخوف من شئ معين؟؟ كام مرة تبقى قاعد وسط 50 واحد و مع ذلك حاسس بالوحدة ؛ كام واحد فينا مش حاسس انه زى الأخ أبو يوسف هوه فى وادى و اللى حواليه فى وادى(و أنا مش بأقومه عالمدام و لا حاجة ) ...الخ لكن نرجع و نقول التغييييييييييييير

كسسسسسسسر الروتين

تناسى المشاكل أو الاستعباط بمعنى أصح . جربوا كده الوصفة السحرية دى : كل واحد مننا لما يلاقى نفسه هيبتدى يكتئب يقول"أنا مش زعلان و لا مكتئب أنا مبسوووووووووووووووط و متفائئئئئئئئئئئئئئئئئئئئئل أنا أحسن من غيرى " و ارسم على وشك أى ضحكة حتى لو صفرا بالوقت هتتعود و يبقى شكلك كده على طول------------> :lol:

ليه ما نحاولش حتى نقضى الويك اند ده بشكل مختلف يعنى بدل ما احنا اللى عايزين اللى قدامنا يتغيروا شوية منتغير احنا شوية و لو مرة واحدة فى الاسبوع ؛ مثلاً الأخ أبو يوسف بدل ما حضرتك متضايق ان المدام على طول بتتكلم فى الأكل و بس ماتجرب حضرتك مثلاً فى يوم تدخل المطبخ بدلها و و الله هتلاقى نفسك كل كلامك حلل و اطباق و تقلية و ده فى حد ذاته هيبقى تغيير ليك و ليها؛ ليه متحاولش تنزل فى مستوى حواراتك معاها شوية ؟ ليه هيه اللى لازم تطلعلك؟؟؟

جرب و لو على سبيل التغييييييييييييييير :lol: .

مش دايماً هيبقى سهل أو متاح الخروج كل أسبوع لكن على الأقل نغير طريقتنا فى الحياة أو التفكير .

[ابو يوسف]

من منا في مصر يعمل من 9 إلى 5 يوميا... ويومين اجازة في الاسبوع؟؟...ستجديهم قليلين...شغل القطاع الخاص في مصر عبارة عن مص دم وانتحار وساعات عمل ممتدة ...بتخرجي الصبح مش عارفة ها ترجعي امتى باليل..ولوفكرتي تمشي في ميعادك يبقى يا ويلك يا سواد ليلك...

هذا بيت القصيد ...

انت اكيد شغال فى نفس شركتى !!! :lol: :lol:

[ابو يوسف]

أخ ابو يوسف حضرتك كاتب انك ساكن فى الجيزا

هل جربت و انت ماشى فى شارع الهرم  و فيصل و نازل على وسط البلد هل جربت تعد  كام واحد  ماشى مبتسم او تحس انه مبسوط حتى ؟؟

جربت يا وسام ..... :? :? :?

الفئة الوحيدة اللى بتضحك و سعيدة هى الشباب من سن 20 حتى 30 .... اما بعد ذلك ... فصعب تلاقى حد بيضحك ... و كله مستعجل ...

حتى اللى بيتفرج على المحلات ... تحس انه مستعجل ؟؟؟

اما منظر الازواج ... فحاجة بؤس جداً جداً ... كأن كل المتجوزين متخانقين ؟!!

[White heart]

Masrawy Abroad

(لأن الترفيه والتنزه الذي تريه في الخليج وفي الغرب يعتبر رفاهية كبيرة وتكلفة مادية لا يقدر عليها موظف راتبة بضعة عشرات من الجنيهات ومتعلق في رقبته اولاده وامهم ويمكن يعول اخته او والديه).(معظم المصريين في مصر يعملون اكثر من شغلانة لتوفير قوت يومهم)من منا في مصر يعمل من 9 إلى 5 يوميا... ويومين اجازة في الاسبوع؟؟...ستجديهم قليلين...

Masrawy Abroad

أعطني سبباً عشان تكون الناس مبسوطة

- هواء يتنفسوه.......أعلى نسب التلوث في العالم

- ماء يشربوه.........فشل كلوي وامراض كبد (اسأل أي دكتور على الموضوع ده....او افتح الفلتر بتاع الميه في مصر واتفرج على عجائب الطبيعة)

- مصاريف حياة.....نعادل المستوى العالمي في الغلاء ونضارع دول اوربية وامريكية في تساو الاسعار...مع فارق (متوسط دخل الفرد اللي يشبه بنجلاديش)

- التلفزيون والاعلام ......مش محتاج توضيح

- السكن والزواج.........معجزة المعجزات

- وسائل النقل العام (اتوبيسات ومترو وقطارات)........اقفاص حديدية وعلب سردين

- فرص عمل....بطالة متزايدة ومئات الألاف من الجامعيين يخرجون لسوق العمل وتنتهي بالجلوس على القهوة لعدم جدوى البحث

وغيره كتير..

crossfield

نسخة من ميت ألف نسخة

انا ما زلت احصر المشكلة فى تعداد السكان المتزايد و عدم تناسبة بالمرة مع المساحة الأرضية "الصالحة" لهذا المعدل :? :(

و اذا أردتم معرفة كيف أتخيل الناس فى بلدنا سوف يقضون الويك اند، حتى و لو كان مستوى المعيشة افضل قليلا!؟!

فما عليكم الا الضغط على "الشلال"!!!! :?

و شكرا..

تم تعديل 13 ديسمبر 2003 بواسطة White heart

[أبو حميد]

للرفع

موضوع قديم حديث ومشكلة لا تزال قائمة للعاملين داخل مصر والسؤال هل حدث جديد بعد زيادة الأجازة الأسبوعية ليويمن في بعض الأماكن؟

قد أكون متفائلا ولكن حتى الفقير يستطيع أن يتنزه بالقاهرة طالما لديه الرغبة.

فمراكب النيل تأخذك في رحلة نيلية جماعية لمدة نصف ساعة مقابل 2 جنيه للفرد والسير بنص البلد والفرجة على المحلات مع أكل أيس كريم بالنسبة لي فسحة هايلة. وهناك بعض الحدائق المجانية وغالبا رايقة طالما مش هتروح يوم شم النسيم. حتى الكورنيش مع كوز درة وكوباية حلابسة يعد متعة في حد ذاته. المهم أنك تكون مؤمن بأهمية التغيير والتنفيس والترويح عن النفس.

[jojammal]

مصر بلد يستمتع فيها السائح والمقيم المقتدر فقط

[عبير يونس]

بالنسبة لنا هنا في السعودية

نهاية الأسبوع هنا الخميس و الجمعة

فيوم الأربعاء طبعا يوم مميز

و بتكون مشاعري خاصة جدا فيه

يعني بابقى حاسة بحرية

انام أو أسهر براحتي

و الاحساس ده هو المتعة الحقيقية

حتى لو ما عملتش حاجة في الاجازة دي

كفاية الاحساس ده

يا ترى حضراتكم بتقضوا الويك ايند ازاي و ايه مشاعركم فيه؟

انتظركم

♥

[se_ Elsyed]

سيم سيم صديج

بإختصار وبمنتهى السوداوية المغلفة بالأنغلاق " نحن قوم لا نعرف كيف نستمتع بويك إنداتنا " والويك إند عندنا بيبقى مرتبط أول حاجه بالنوم والأسترخاء حتى لو الواحد ننايم طول الأسبوع ...

ده حتى ستات البيوت اللي قاعدين في البيت طول الأسبوع ما بيحلالهمش التنفيض والرزع والخبط إلا في يوم أجازة سي الأفندي .... وتضربي بعينك بعيد عنك كده يا عبير يا أختي تلاقي البلكونات مرشقة سجاجيد وبطاطين متنشرة يوم الجمعة بالذات في مصر .... طب لييييييييييييييييه لييييييييييييييييه ؟ يعني السجادة لو أتنفضت في وسط الأسبوع هاتقول لأ ؟ وبعدين تتنفض ليه أساساً كل شويه ما كده غلط وبيتنحل وبرها ... وبعدين إنتو عندكم خيول بتجري على السجاجيد طول الأسبوع عشان تنفضوها كل شويه ...وأساساً بتجيبوا صحة منين لده كله ؟

على فكرة الأستمتاع بالويك إند لا يتطلب رصد ميزانية خاصة أو تكلفة زيادة .... فالإستمتاع بالأوقات ممكن يكون بممارسة هواية المشي مثلاً في حديقة أو مكان مخصص ... ولو إتكلمنا على مصر فديتها جنية ثمن تذكرة مترو أنفاق .... والواحد يطلع لحد كورنيش النيل .. ويعيشششششششششش .... بس ماليش دعوة لو حد إتمسك في قضية تحرش ... لأ قصدي حتى لو الزوج والزوجة والأولاد خدوا بعضهم وراحوا يتمشوا على النيل ويضربوا ترمس أو درة مشوي ... والله لو مرة في الشهر .. فده شيء جيد .... وكمان ممكن ياخدوا لهم غطس في النيل .. قصدي فُسحة في مركب وهي حاجه مش مكلفة قوي يعني .... فكل ده بيبقى تجديد مفيد .

[محمد عبدالعزيز]

بقى لى فترة بأقضى الويك إيند تمشية من القائد إبراهيم للمنطقة الشمالية, والويك إيند اللى أجازة من المظاهرات بأقضيه عند والدى ووالدتى.

[عبير يونس]

تم دمج موضوع " ازاي بتقضوا الويك ايند ؟؟؟"

إلى هذا الموضوع لتشابه الفكرة

الادارة

[hanzalah]

عندي فكره نميسه

يوم الخميس مساء نجتمع كلنا بعد العمل في بيت ابويا وامي باعتباره بيت العيلة وكل الناس موجودة

اشوف اخواتي وعيالهم وعيالي تلعب مع ولاد عمامها وعماتها ونقضي وقت جميل ونتعشى ونتكلم ونجيب م الشرق والغرب

الجمعه تاخد العيال وتروح النادي او حتى جنينه من ام التذكرة بجنيه

او حديقة الازهر اكثر من رائعة ومعاك سندوتشات وزجاجة ميه وعصير

على فكره بكره الصبح فيه محاضرة جميلة لا تفوتكم في حديقة الازهر

يوم السبت استرخاء او تشوي فوق السح مع نفسك او جيرانك

والعيال تذاكر شويه وتكوي المريلة وتستعد ليوم دراسي جديد

انت جددت نشاطك والمدام غيرت مناظر وغسلنا تعب الاسبوع وبارك الله فيما رزق

مواعيد حديقة الازهر

[rewsha]

عن نفسي التغيير عندي مش مرتبط باخر الاسبوع

الوقت اللي بالاقي نفسي زهقانه فيه

لازم اغير

اغير مكان السفره

اغير مكان ترابيزه

اغير تسريحة شعري

المهم اغير وخلاص :happy:

_________________________________

بالاضافه لاني لما باكون زهقانه باخترع اي مشوار علشان انزل من البيت واتمشى

ونزولي مش مرتبط بحد

يعني سواء ننزل كلنا ....ماشي

انا بس ...برضو ماشي

لاني لو قعدت في البيت من غير تغيير ...يبق يوم مايعلم بيه الا ربنا

لازم نجدد ....باي طريقه ...لازم التجديد

يعني لو مش عاوزيين نخرج

_________________________

خصوصا في ظروف البلد حاليا

ممكن انزل اشتري ب3 جنيه ذره فيشار واعمله في البيت ونقعد كلنا بالليل ناكله سوى قدام التلفزيون

____________________

ممكن كمان اعمل حلبسه (حمص الشام)

وفي الصيف غالبا باجيب ايس كريم ونقعد كلنا ناكل مع بعض بالليل بعد العشاء

_________________________________

لو عاوزه اخرج

بيكون غالبا للتمشيه في وسط البلد او روكسي

وبناكل برضو ايس كريم :happy:

وياسلام لو قبلها 2 شاويرما في عيش صاج من عند ابو حيدر (روكسي) ....واااااو

_________________________________

ممكن نخرج نزور حد من الاقارب او الاخوات

وبيكون ده حتى بعد الغداء

(ده باعتبار ان الواحد مش عاوز يكلف على حد)

____________________________