ليه الفكهاني بيغش الفاكهة؟

[العظمة لله]

كل مرة اشترى فيها فاكهة اعمل امتحان للفكهاني واديلله الفلوس واقولله نقيللي حاجة نقاوة كده

مع العلم انى مش بافاصل ..

و80% من المرات بالاقي الفاكهة مضروبة !!

وطبعاً مش باشتري منه تاني ..

يعني هو كسب مثلاً 2 أو 3 جنيه من الغش

وخسر قدهم 100 مرة لأنه خسر زبون كويس مش بيفاصل ولا بينقي وواضح إنه فييس !!

وعجبي!!!

[se_ Elsyed]

يعني حظك كل مره ما بيقعش إلا مع فكهاني غشاش ؟

دي حادثة بقى

الغش مش في الفاكهة بس يا زميلنا العزيز

ولكنه موجود في كل جوانب الحياة طالما في إنسان وشيطان ونفس وهوا وقلة إيمان

لكن دائماً الخير هو الغالب والخير هو الاعم

[Folana]

السلام عليكم ورحمة الله.....

هو السؤال ..ليه حضرتك بتعملى له كل مرة امتحان؟؟؟

ممكن تجربى تشترى من غير امتحانات ....

الحقيقة أنا جربت يمكن مرة او اتنين اعمل كده.....لكن مش بنية انى امتحنه....لكنى فعلا مش باعرف اشترى حاجة عدلة ( وده رأى الافاضل فى البيت عندى) :protest:

الكلام ده كان فى بداية حياتى المهنية او الزوجية يعنى.....دلوقت ما اعرفش حتى الفكهانى ده فين.....

أصبحت مستهلكة فقط.....:D

غيرى الخطة واستبدليها بالخطة (B)

[العظمة لله]

يا فلانه مش قصدي !

مش قصدي كل مرة ، ده على سبيل المجاز

شكلك دقيقة

قصدي إنه لما باشتري من غير ما ادقق ، فى كل مرة أسيبله الاختيار بتكون النتيجة إنه بيختار الغش ، ساعات كتير طبعاً بانقى من كارفور عشان أريح دماغي ! يعنى 90% من الوقت

لكن ساعات 10% من الوقت باروح اشترى من فكهاني واجرب يمكن يطلع فيه لسه ناس كويسه زى ما كنت باشوف فى افلام عبد الفتاح القصري زمان ووشه اللى معجون خير وطيبة ، يا سلام يظهر ده فى الأفلام بس.....

[Folana]

السلام عليكم ورحمة الله.....

هو من ناحية انى دقيقة...فالشهادة لله أنا دقيقة بالثانية... :protest:

أكيد طبعا حضرتك بتتكلمى مجازا.....دى كانت دعابة لكنى لم أضف سمايلى.... :D

كنت باسمع والعلم عند الله...ان بعض الفكهانية بيكونوا مجهزين اكياس بها الفاكهة المضروبة دى بجانب الميزان وفى حركة سريعة بيبدل الفاكهة حتى لو كنت نقيتها...لكن انا ماشفتش ..الكدب خيبة

اظن فى الحالة دى مش كفاية انك تقاطعى الفكهانى بس...ده لازم ترجعى له الفاكهة وتاخدى فلوسك...يمكن تساعدى فى اصلاح حاله ....ويمتنع عن الغش

لكن فى النهاية الصورة مش بالقتامة دى...اكيد فيه ناس بتراعى ضمائرها....لكن اللى اكيد اننا مش بنشوف الوجوه المعجونة بالطيبة دى كتير .....

[Scorpion]

انا بقي عندي طريقة ما تخرش الميه في الرجوع دائمآ الي المنزل بالفاكهة أو الخضار صاغ سليم 100 %

بس أعتقد انا ما تنفعش غير للرجالة ... و دي طريقة أكتشفتها من ايام العزوبية ...

بعد السلام و طلب المطلوب ... ابصل له جوا نني عينيه و أقول له .. و النبي يا ريس تنقيلي حاجة حلوة و ما تخليش مراتي تاكل وشي لما أرجع البيت .... و بالصراحة التعاطف الرجالي في هذا الأمر بيكون واضح جدآ .. بس طبعآ كلمة السر مافيش فصال و مافيش مانع من دفع مبلغ صغير زيادة من فترة للتانية لو كان هو نفس البائع ...

[قديم]

عزيزي العظمــه للـه

كل شي يقاس بحسب عرف الصنعــه .

لا يوجد في عرف الفكهاني او الجزار ... فاكـهه مضروبــه ..او لحمــه مغشوشـه. . ومهما حاولت تقنعــه مش هيقتنع

لان حبه الطماطم او الكمثري او المانجـو زي اولاده بيحبهم كثيــر . وكلهم غاليـن عنده ...

[Alshiekh]

ليه الفكهاني بيغش الفاكهة؟

علشان بنسيب الفكهانى ينقى لنا على ذوقه ، يمكن يكون الفكهانى بيحب الفاكهة المعطوبة او المفعصة

الحل وهو الحل الذى اتبعته هو اننى اتفق مع الفكهانى انى انقى الفاكهة بنفسى ، ولو وافق ... اشترى منه بصفة دائمة

[ابو محمود]

الفكهانى بيغش ؟ ياة دة مش الفكهانى بس كل من يبيع فى الأسواق غشاش مثال

فكهانى جزار سماك حتى بتوع الفحم والبقالة يعنى كل من يقوم بعمل يرتبط بالأمانة والأختيار بيضحك علية الشيطان ويروح !!!!!!!! انتو عارفين الباقى المشكلة لها حلول حل الفكهانى بسيط حضرتك تنظرى الى الفاكهة وتحاولى قبل الشراء ان تعاينى النوع يعنى ان كانت الفاكهة تفاح حاولى ان تأخذى تفاحة من الصندوق وتفحصيها جيدآ لأن معظم الفكهانية يضع الفاكهة امام الزبائن من الجهة السليمة ويمسكها عند وضعها بالكيس على ان يرى الزبون الجهة السليمة اما الجهة المعطوبة فتكون فى راحة ية دة ان كان لا يفعل الغيار والغيار هو طريقة قديمة وأصبحت لا ترقى عند الفكهانية ولاكنها عن بائعى الفاكهة المتجولين ناهيكى عن الميزان ام ما يوجد لديهم محال فيفعلون كما ذكرت أنفآ فيجب على حضرتك ان تتأكدى بأن الفاكهة المرصوصة سليمة من اسفلها كمثال التفاح والكمثرى والكيوى والمانجو وكل ما هو ذو قشرة جامدة اما التين فيجب ان ننظر الى لون الفاكهة فأن كانت بها بقع بيضاءفلايتم الشراء لأنها بيكتريا ظهرت لأن التين أشرف على الفساد اما المشمش فيجب ان تتأكدى بأن لونة يميل الى البرتقالى الناصع ولا يوجد بة بقع سوداء وكل هذا يكون بأن حضرتك لا تجعلى الفكهانى يستميلك بأن تتذوقى بعض الثمرات لأنة ان فعل ذلك فليس من باب الكرم ولاكن من باب شغل عيون وأنتباة حضرتك لما تقوم يدة بوضعة فى داخل الكيس أتمنى ان اكون قد ساهمت فى أرشاد حضرتك الى كيفية التعامل مع الفكهانى والباقى ان أحببتى ان أشرحة أنا تحت أمرك

[shahd]

السلام عليكم ورحمة الله.....

لكن فى النهاية الصورة مش بالقتامة دى...اكيد فيه ناس بتراعى ضمائرها....لكن اللى اكيد اننا مش بنشوف الوجوه المعجونة بالطيبة دى كتير .....

فعلا الصورة مش بالقتامة دي .. في مرة رحت انا واختي نشتري فاكهه .. فبتقول للفكهاني حاسب لا تكون بايظة.. ابتسم ابتسامة فيها نوع من الاستغراب زي اللي يقلك ده كلام تقوليه!! .. وقالها انا ما ابيعش حاجة بايظة .. ده اسمه غش!!

ساعتها افتكرناه مجرد كلام وقالت له حنشوف .. وفعلا كلامه طلع صح .. يعني لسه في ضمير والحمدلله حتى لو كان نادر :angry:

[العظمة لله]

عجبني قوى رد الأخ scorpion وفعلاً ده ممكن ينفع مع الرجالة ..

بس ممكن أروح أشتري من واحدة واقولها نفس الكلام :angry: يعنى أقولها جوزي حياكل وشي وكده أو حيرنني علقة عشان تتعاطف أكثر loooooooool