يا عم يا اللى بتقول كارهها!!!

[crossfield]

يا عم ياللى بتقول كارهها

سيبها و روح جرب غيرها

الأرض دى جابتك و جابتنى

و زى ما ادتك أكيد ادتنى

ادتنى أب و أم ليهم أصل و دين

ادتنى خالة وعم مش عند ناس تانيين

ادتنى حارة و شارع و شمس و ضلاية

ادتنى اصحاب و أحباب و شجرة و قمراية

اديتنى ورقة و مسكتنى قلم و علمتنى الكتابة

و قبل ما اجر خط عالصفحة قالتلى سمى

كتبت باسم الله قالتلى شاطرة

يالا اشبكى اسمك فى اسمى

من غير ما أفكر رحت كاتبة:

أنا بنت مصر و باين عليه

من سمرتى لمشيتى للكحلة اللى فى عنيه

و طيبة قلبى و عصبيتى يشهدوا عليه

باحبها كده زى ما هيه

بحلوها بمرها بحنانها وقسوتها عليه

ما أحنا لازم نبلع زلطها شوية

و ان كان حالها مايل حبتين

ان كان شتاها طول شويتين

ربيعها جاى و لو بعد حين

ايه يا مصرى فين صبر جدودك فين؟

[Salwa]

انا قلت قبل كدة ...وحاقولها تانى واعيدها...معرفش اذوق الكلام ولا

ارتبه جنب بعضه....انابقول اللى بحس بيه وخلاص.

اجمل الكلام هو اللى بيعبر عن احساس صاحبه...

كلامك جميل ياكروس ....انا بقى عندى مشكله؟

بحبها....بحبها بكل ذرة فى كيانى....بحبها وهى قاسية....وهى ظالمة

وهى قوية وعفية...

وبحبها فى ضعفها...وحنيتها...حتى يوم...،انكسارها،....حبيتها.

بحبها فى شقاوتها...وضحكة ولادها...فى شمسها....فى سماها..

فى ايام شتاءها....بحبها....وبحس انها امى واهلى وناسى...وارضى

ميلادى...طفولتى....صباي..

مجنونة؟

يمكن....

ابص لولادى....حتى لو اتولدوا بعيد عن مصر...بس هم مصر.

التكوين ده...ميكونش لغير المصرى...الذكاء والقوة والمروءة والايمان

وخفة الدم وسرعة البديهة....وحاجات كتير.

اتكونت عبر آلاف السنين.

المرة الوحيدة اللى ذهبنا فيها لمرسى مطروح.....كان تعليق ابنتى

على ضخرة عجيبة....يختلف عن تعليق أى طفل آخر فى سنها.

كانت تنظر للصخرة وتتحسسها وتتسائل بدهشة..هذه ،التجاعيد،تقول

ان هذه الصخرة لها عشرات الآلاف من السنين....انا كل يوم بكتشف

ان مصر مش الهرم والأقصر وبس.

احساس...اللى بيحب مصر....ياه.

الكاتب تيرنسى مويش مات من حوالى اسبوع....كان عاشق لمصر.

هو كتلان من برسلونة...له كتب كثيرة عن مصر.

طلبه كان انهم يدفنوه فى مصر...

حرقوا جثته ونثروا الرماد فوق النيل وعند وادى الملوك.

هو قضى شبابه فى الاسكندرية...كان بيقول العالم كله مفيهوش

اجمل من اسكندرية وبرشلونة.

اقوللكم ايه؟

كل الكلام اتقال...

كل الحروف اتكتبت...

لو مرض؟

انا مش عاوزة أخف....مش عاوزة أتعالج.

مصر....اجمل وردة على صدر الكون.

ولولا اولادى وزوجى..........مفكرش مرتين...ولازم اعيش فى مصر.

سلامى.

[بنت مصر]

يا عم ياللى بتقول كارهها 

سيبها و روح جرب غيرها

الأرض دى جابتك و جابتنى

و زى ما ادتك أكيد ادتنى

ادتنى أب و أم ليهم أصل و دين

ادتنى خالة وعم مش عند ناس تانيين

ادتنى حارة و شارع و شمس و ضلاية

ادتنى  اصحاب و أحباب و شجرة و قمراية

اديتنى ورقة و مسكتنى قلم و علمتنى الكتابة

و قبل ما اجر خط عالصفحة قالتلى سمى

كتبت باسم الله قالتلى شاطرة

يالا  اشبكى اسمك فى اسمى

من غير ما أفكر رحت كاتبة: 

أنا بنت مصر و باين عليه

من سمرتى لمشيتى للكحلة اللى فى عنيه

و طيبة قلبى و عصبيتى  يشهدوا عليه 

باحبها كده زى ما هيه

بحلوها بمرها بحنانها وقسوتها عليه 

ما أحنا لازم نبلع زلطها شوية 

و ان كان حالها مايل حبتين

ان كان شتاها طول شويتين

ربيعها جاى و لو بعد حين

ايه يا مصرى  فين صبر جدودك فين؟

كلامك من القلب يا كروس وحسيته قوى واجمل ما فيه انك استعملتى اسمى علسان كده باكتب لأختى الى حاسه انها انا وكل بنات مصر وابنائها واحد.

عنك حق يا اختى فى كلامك

كل الى عاش فيها بيرد سلامك

ايوه بنت مصر زيك وزينا

بنحبها ونرعاها ونفديها كلنا

وان مال حالها مره اهو برضه مننا

والجاى بمشيئه المولى احلى من الى فات

بس احنا نخلص فى وندى ونبطل سكات

[crossfield]

ماما سلوى :

عارفة و الله أنتى قد ايه بتحبيها و بحس ده فى كل كلامك مش مهم انك بعيد عنها المهم انها دايماً فى بالك .د

بنت مصر:

أهلاً بيكى فى المنتدى و فعلاً أحلى حاجة فى اللى كتبته اسمك :)