الدراسة في استراليا

[adrianocrespo]

السلام عليكم و رحمة الله وبركاته

انا صيدلي مصري و مقبل باذن الله علي تجربة الدراسة باستراليا بعد حوالي شهرين..(دبلومة تسويق)....لمدة سنتين

و ان شاء الله حاحاول اعمل المعادلة هناك

يا ريت لو اي حد عنده معلومات عن المعادلة او الدراسة باستراليا يتفضل

ولو حد عايز معلومات عن التقديم

انا في الخدمة

[meshoboss]

صديقى العزيز

انا سمعت عن موضوع دبلومه التسويق دى من احد مكاتب الهجره وقالى انها هتكلف 35 الف جنيه

انا ماعنديش مانع ادفع المبلغ بس بصراحه مش واثق ف مكاتب الهجره وخايف تكون لعبه او نصب

لو عندك معلومات اكيه عن الموضوع ده او حد يكون جربه قبلنا ياريت تقلهالنا عشان نستفيد كلنا

شكرا

[adrianocrespo]

السلام عليكم ورحمة الله وبركاته

اهلا بالاخ meshoboss وبالتوفيق ان شاء الله

الاجابة عن اسئلتك:

الحجز عن طريق مكتب في مصر يراسل الجامعة في استراليا(وهذه خطوة سهلة نسبيا)لان اي حد تقريبا بيتقبل وثانيا بيراسل السفارة الاسترالية في مصر (ودي الخطوة المهمة)لان السفارة هي الي بتديك الفيزا(فيزا دراسة )

التكلفة الكلية للدبلومة 10000 دولار استرالي(السنة تساوي 5000)يعني كل 6 شهور بتدفع 2500 دولار استرالي...........كل ترم بتدفعه قبل ما يبدأ

في دبلومات ب 8000 دولار استرالي بس مصاريف الكورس الانجليزي عالية شوية حوالي 3000 دولار استرالي

وفي طبعا كورس انجليزي قبل الدراسة بيختلف من كليه لاخري(1800 دولار في المعهد اللي رايحه ان شاء الله)وممكن يعفوك من الكورس لو معاك امتحان الايلتس ب 5.5 ودي مش صعبة بالنسبة للصيدلي

يعني من مصر بتدفع 2500 +1800

+200 دولار مصاريف التقديم للكلية

+315 دولار تامين صحي اول سنة

والباقي هناك

الضامن المالي......انت او الوالد او الوالدة او الخال او العم او الاخ

رصيد بنكي بقيمة 100 الف جنية مصري في رصيد اي من السابق ذكرهم

يعني لو انت بقالك سنتين في السعودية بتجيب كشف حساب ومعاه عقد العمل والباسبور..ليه؟؟؟؟....عشان تثبت مصدر الفلوس يعني ازاي حضرتك جبت 100 الف في سنتين.ودي اهم حاجة في الضمان...المصدر...

لو الفلوس داخلة بطريقة طبيعية مفيش مشكلة

علي فكرة موضوع الفيزا الدراسية بياخد 3 شهور من اول ماتقدم الورق لحد ما تاخد الفيزا بالسلامة......وانا لسه مقدم اخر شهر ابريل يعني لو حصل قبول ان شاء الله يبقي في شهر 7

اولا..المكتب هو المكتب العالمي للتبادل الطلابي الموجود بالقاهرة(مصر الجديدة)وبياخد اتعاب 3000 جنيه مصري.....وفي ناس فعلا سافروا من خلاله وشفت بعيني ناس اخدوا الفيزا هناك سواء لاستراليا او امريكا......المكتب موثوق فيه وربنا يسهل

الناس بيكلموا معاك بامانة...يعني في ناس قاللهم الضمان لا يصلح وممكن كان يقدملهم ويترفضوا

في مكاتب تانية طبعا وانا رحتلهم...بس ده اكتر واحد ارتحتله لانه بيطلب الاوراق كلها مرة واحدة.......في مكاتب قالتلي الضمان تمام واديتلهم الورق بعد كده اتصلوا قالولي لا ده مش كفايه وعاوزين اثبات للمصدر اكتر

المهم انا شايف المكتب كويس وربك يستر.........عموما في حالة الرفض بيتردلك اتعاب المكتب ماعدا 750 جنيه+مصاريف السفارة 2280 جنيه مصري

عاوز نصيحتي......... ذاكر لامتحان الايلتس عشان توفر تمن الكورس الانجليزي.....لو عاوز تدرس اللغه هناك براحتك

الشغل....الطالب يجب الايعمل اكثر من 20 ساعة اسبوعيا حسب قانون العمل الاسترالي

بس مفيش حد بيلتزم بكده......المشكلة لو سيبت الكلية واشتغلت اليوم كله يعني اهم حاجه الحضور في الكلية(نسبة حضورك لاتقل عن 80 %) لان انت داخل تدرس

القصد مفيش حد حيقعد علي راسك في الشغل يقولك انت اشتغلت اد ايه

انت وجودك في البلد قانوني..........وشغلك قانوني(بتطلع ترخيص عمل)

كل المكاتب قالولي ان كل الطلبة بيجيبوا مصاريف الكلية من خلال شغلهم هناك

المصاريف لا تتعدي الف دولار شهريا للسكن و الاكل والمواصلات والاتصالات

مع تمنياتي لك بالتوفيق

[adrianocrespo]

www.gossee.com

عنوان المكتب علي النت

www.asbt.nsw.edu.au

موقع الكلية في استراليا

www.teg.com.au

مجموعة التعليم الاسترالية(مجموعة معاهد لدراسة اللغة و التسويق وادارة الاعمال)

[adrianocrespo]

ايه يا جدعان ماحدش بيفكر في استراليا خالص

[masri]

ممكن حضراتكم تقولولى ايه و ضعى و انا خاطب علشان اكملالاقامة و الهجرة هناك اثناء الدراسة ؟

[adrianocrespo]

والله ده يعتمد علي مؤهلك وهل هو مطلوب في استراليا وانت حتدرس ايه

[meshoboss]

عزيزى adrianocrespo

اولا شكرا على اهتمامك وردك. . . . .بصراحه كلامك مقنع ومريح خلانى اخد الموضوع اكتر جديه

بس الموضوع لسه برضه فيه شويه حاجات غامضه

يعنى مثلا فى مؤهلات معينه مسموح لها تقدم ف التبادل الطلابى ده ولا اى بكالوريوس ؟؟

الضمان المادى اللى هو 100 الف جنيه مصرى هلى ممكن يكون مجرد فلوس موروثه او موجوده يعنى ف البنك بقى لها فتره على مدار سنين كتيره؟

لو انا متجوز مراتى برضه هتاخد فيزا ولا لازم تقدم لوحدها وتاخد فيزا دراسه؟؟؟

بعيد عن موضوع فيزا الدراسه, تعرف حاجه عن ازاى خريجى كليه علوم ممكن يشتغلوا ف استراليا لان اللى عارفه ان مالهمش معادله مجرد تقديم ورق وايلتس وياخدوا تصريح العمل والهجره؟؟؟

انا اسف على كتر اسالتى

شكرا

[adrianocrespo]

السلام عليكم و رحمة الله و بركاته

لو معاك فلوس ادرس اي حاجة.........زي مانت عايز

الضمان المالي ممكن ورث بس لازم تجيب ورق تثبت مصدره

انا مش عارف حكاية الزوجة..........ممكن تسال المكتب افضل

انا كل معلوماتي عن فيزا الدراسة..............ومعادلة الصيدلة

شكرررررررررررررا.........و اي خدمة

[meshoboss]

معلش يا adrianocrespo

انا فعلا فتحت الموقع بتاع المكتب اللى ف مصر وقريت فيه شويه

بس فى كام نقطه كده انا نفسى اسالك عليهم لو ماكانش فيها تعب

دلوقتى انت بتقول انك ف مصر هتدفع بس تمن اول ترم والتامين الصحى وكده , وبعد كده انت ناوى تسافر تعمل المعادله من هناك......صح كده؟؟؟

طيب افرض خلصت المعادله وانت لسه ف اول ترم , يبقى خلاص كده مفيش داعى انك تكمل فى الكليه والدراسه بتاعتك ولا عليك التزامات انك لازم تكمل دفع مصاريف الكورس للنهايه؟؟؟

كمان لو لا قدر الله وماقدرتش تخلص المعادله بتاعت الصيدله ف خلال السنتين بتوع الدراسه, انت وضعك هيبقى ايه بعد السنتين دول المفروض انك ترجع مصر ولا الدراسه دى بتديك شهاده ممكن تشتغل بيها ف استراليا؟؟؟

انا بسالك الاسئله دى لان وضعى بيه ب وضعك جدا الفرق انى بكالوريوس علوم وكل المطلوب منى انى اعمل ايلتس وبعد كده تقييم لشهاده الكليه بس للاسف مش عارف اعملها وانا ف مصر ف فكرتى انى اسافر دراسه وف خلال اول ترم اكون خلصت الاجراءات بتاعت التقييم واشتغل ب الشهاده بتاعتى

معلش هتعبك

شكرا

[kpc]

تحذير هام

السلام عليكم :انها اول مشاركة لي بالمنتدي -وارجو من اللة ان يجعلها مفيدة-انا مهندس حاولت السفر عن طريق نفس المكتب(المكتب العالمي للتبادل الطلابي)gossee وسأحكي لكم عنة .

المكتب الذي ذهبت الية gossee .

لقد ذهبت الي مكتب gossee بتاريخ 10 يناير 2008 وهو التاريخ بداية تقديمي الاوراق وقد ذهبت قبلها بشهريين

الي نفس المكتب وليتني ما ذهبت لاستفسر عن الاوراق المطلوبة

واستغرق الامر مني شهريين لاعدادها ولكن حينما ذهبت للمكتب في 10 يناير -كانت كل اوراقي سليمة

والضامن الامادي (والدي)جاهز والفلوس جاهزة (للاسف) واختيار الجامعة كمان

وقعد يقنعني اني اعمل ماستر وانة رخيص وان الفرق بين الماستر والدبلومة الفين-تلاتة الاف دولار بس

واتفقت مع محمد وعبير علي اختيار جامعة سيدني-فقال انة هيقدم ل 3 جامعات (احطياتي)(بالمناسبة لهذا المكتب قصة كيف بدأ -سأحكيها لاحقا )(وبالمناسبة ايضا

سوف اضع الوثائق التي تثبت كلامي وانني اريد تحذير الناس فقط)ودفعت لة نص اتعابة وفلوس السفارة كاملة ورفض اعطائي وصل بالمبلغ لان الوصل هيطلع من السفارة لما يدفع الفلوس واكد انا رد الجامعة بيجي في شهر الي شهر ونصف -المهم قدم علي سيدني ونيوساوث ويلز و rmit ودة كلة طلع كدب عرفتة بعديين

وبعد مرور شهريين كاملين اتصلت بية فقال لي انة كان هيتصل بيا بس موبايللي مشغول!!!!!

المهم رحت فقاللي ان جامعة سيدني مردتش وانها بتاخد وقت وانة هيقدم في جامعة نيو ساوث ويلز

قلت لة المفروض انك مقدم علي 3 جامعات !!!يعني لازم واحدة كانت ردت -طبعا قعد يضيع كالعادة

وطلب مني اعمل امتحان انجليزي عنة فعملت -واكد لي انة في خلال 3 اسابيع يجي لي الاوفر

وطبعا محصلش -بعدها بشهر رحت لة فقال لي انة مسافر استراليا (علشان يتفاوض معاهم علشاني انا وطالب تاني

هههههههه)وانة هيرجع بعد اسبوعين ويتصل بيا-وطبعا محصلش

وبعدها بشهر رحتلة بعد و قعد يقنعني ان المفاوضات كانت صعبة جدا واني عملي جميل جامد علشان اتقبل(واللة بالنص كدة)

وبعدين اداني الصدمة التمام

الباشا لسة مقدم ورقي للجامعة بعد مرور اربع شهور ونص (معملش فيهم اي حاجة)يعني لما سافر استراليا قدم الورق

طبعا في نهاية القصة هحكيلكوا تفسير كل حاجة

لما سألتة انت لية مقدمتش من 4 شهور ونص -قاللي انة كان بيراسل 3 جامعات ومستني الرد

وان التاخير مش بأيدة وطبعا علشان يضيع قعد يكلمني عن جمال الجامعة وحلاوت مبانيها

بس المشكلة يا اخوان ان الانسان يفتكر انة هو بس اللي فاهم والاخرين اغبية وهو دي كانت مشكلة محمد وعلشان كدة

انكشف في الاخر...

المهم قاللي اسبوع والاوفر يجي !!!!!!

اسبوع في اتنين في تلاتة -لا حس ولا خبر ولما تتصل بية يرفض انة يرد عليك وتعامل معاملة شحات بيشحت حسنة

وتتلطع علي التليفون وتسمع كلام (مهين)تخيلوا

المهم عدي شهر ونص يعني دخلنا في اكتر من 6 شهور!!!!

ولسة مجاش اوفر -ورحت لة مكتب المحلة -تخيلوا قاللي اية :

انت عاوز مني اية دلوقت؟؟؟

تمالكت نفسي وقلت لة عاوز اعرف اخرتها اية

قاللي انت مقدم علي جامعة عالية وبتتأخر كدة !!!!!!!

تخيلوا جامعة بترد في 6 شهور

والاهم انها لسة مردتش اساسا

المهم مشيت وقررت اني اتصل بالجامعة في استراليا لاني شكيت انة قدم اساسا

وفعلا كلمتهم وألوني عن الاسم وتاريخ الميلاد وفوجأت بالرد :

انت مقدم فعلا بس مدفعتش حق الابليكيشن ولا بعت شهاداتك !!!!ومش هيجيلك اوفر غير لما تبعت حق الابليكيشن

طبعا الدنيا اسودت في عيني -بعد كل دة ولسة -واذاي انت مكتب محترف ومش عارف المطلوب منك

تاني يوم بعت لمحمد ميل وقلتلة اللي حصل -وتكرم عليا بالرد بعد الحاح مني وقاللي ان الكلام دة غير صحيح

واكد لي ان الموضوع هينتهي قريب.

بعد مرور نصف شهر ولا حس ولا خبر لتصل المدة الي ستة اشهر ونصف اتصلت بمحمد مرة اخري وكالعادة

بعد محاولات ومداولات وايميلات ردت علي السكرتيرة لتخبرني انهم ارسلوا اوراقي بال dhl

كاد عقلي ان يجن -كيف تسجل في جامعة ولم ترسل لهم الاوراق التي جهزتها لة كاملة ..!!!!!!!!!!!!

ولماذا لم ترسلها مباشرة بعد ان اخبرتك اني كلمت الجامعة واخبرني مكتب القبول ان ورقي لم يرسل!!!!

العملية كلها طمع ونصب واحتيال ودة اللي هشرحة في الاخر.

المهم كنت بصبر نفسي واقول فات ستة شهور ونصف وباقي اسبوع ولا حاجة ..

وطبعا ولا اسبوع ولا اتنين لحد ما وصلت لمرحلة اني الغي موضوع السفر دة نهائي ...

جبت كارت منزلي واتصلت بمحمد علي الموبايل علشان مسجل رقمي وبيرفض يرد علية -وفعلا رد عليا

ولقيت نفسي بنفجر فية من كتر الضيق وفعلا كنت بكلمة علشان انهي الموضوع

واتفقنا انة بعد اسبوع لو مجاش الاوفر -هاروح اخد ورقي وفلوسي وامشي

وبعداسبوع ياجماعة يعني بعد سبع شهور ونص (((((جة الاوفر )))))بس المفجأة انة جة بحاجة تانية خالص غير

اللي انا مقدم عليها :31:

وطبعا دخلت النت اشوف الحكاية اية -لقيت ان البرنامج اللي جاي تكلفتة خيالية وانة يفرق 60 الف جنية ذيادة

وان الحساب كدة انجليزي و حساب الجامعة =270 الف جنية +مصاريف التذكرة والسفارة والاتعاب يعني بنتكلم

في 300 الف جنية -طبعا شفت الرقم كان هيغمي عليا -وبدأت مرحلة جديدة مع (المكتب العالمي)ومحمد وعبير

رحت لمحمد اسألة اية اللي غير البرنامج واية التكلفة دي : لقيتة بيقوللي

عادي -انت مقدم في جامعة عالية

سألتة طيب انت لية جايب لي 20 اسبوع انجليزي

بالمناسبة 20 اسبوع = 40 الف جنية

قاللي عادي انا (جبتلك اقل عدد اسابيع علشان اوفر عليك)ههههههههههه :2:

المهم يا جماعة واللي عاوزكم تخلوا بالكم منة

ان الانجليزي دة المكتب بيقدم علية من نفسة -يعني اية ؟؟

يعني بيقدم لك علي 10 اسابيع بس ولما تروح هناك وتخلصهم لو حبيت تكمل (حسب مستواك)بتكمل ودة اوفر ليك طبعا

وخلي بالك ان المكاتب كلها بتاخد نسبة من الانجليزي -عادي- بس اللي مش عادي ان مكتب يلبسك في 20 الف جنية

زيادة علشان نسبتة تزيد...

الاهم من دة كلة ان الاوفر مكتوب فية (خدوا بالكم) ان من حقك تغير الرغبات في خلال اسبوعين وتبلغهم ويبعتوا لك

اوفر تاني(دة كلام الجامعات )لانك وانت بتقدم بتختار 3 رغبات -انا كنت مختار

1-ماستر 2-دبلومة 3- شهادة

قلت لمحمد خلاص تغير لدبلومة واوفر نص الفلوس-العجيب انة اصر اصرار شديد وملفت للنظر ومريب علشان

مغيرش ورفض التغيير بحجة انة مينفعش -فقررت اتصل بالجامعة تاني اتأكد وطبعا طلع كلام المكتب كدب ومن حقك

تغير-عارفين كان مصر لية ؟؟ لانة كان هياخد نسبة من الفلوس وتخيلوا لما يبقي 270 الف -شوفوا يطلع بكام

الكلام دة مش تخمين دة عرفتة بعد كدة انة ليهم نسبة (كل المكاتب كدة)عادي -بس الغير عادي ان المكتب يلبسك في رقم فلكي علشان

نسبة لية

تتطور الموضوع لدرجة انة كلم والدي وحاول يقنعة بكل الصور-وقالة ان الموضوع هيتكلف 70 الف جنية كلة

وليس 270 الف-ولما بعت الاوفر لوالدي تأكد ان المكتب دة كداب –ولما طلبت من محمد فلوسي

اكتر من 4 الاف جنية –قاللي ملكش حاجة عندي –وفعلا غلطتي اني وثقت فية-ورفض يعطيني

اصول الشهادات –غير بعد ما مضيت علي ايصال اني استلمت كل اوراقي و فلوسي!!!!!

اتمني ان يكون الجميع علي حذر من التعامل مع مكاتب السفر والدراسة

واي استفسار –انا في الخدمة

[بحار الغربة]

يا ترى الاخ adrianocrespo

سافر فعلا استراليا ؟؟

و درس الدبلومة و عمل معادلة ؟؟

اتمنى لو ينقل لنا خلاصة تجربته هنا لان فيه ناس عاوزين يخوضوا نفس التجربة و شكرا