هات الـ 398 دولار اللي عليك يا أكلتي !!!!!

[se_ Elsyed]

من سُكات كده ... هاعمل الموضوع دده كإنه حصالة أو صندوق ... وكل واحد يدخل يدفع اللي عليه من غير شوشرة ومحاضر وأقسام ...

ويا الدفع يا الحجز

وقد اعذر من أنذر

ولا حول ولا قوة إلا بالله العلي العظيم .. وحسبنا الله ونعم الوكيل

تقرير رسمي: كل مواطن مصري مديون للخارج بـ٣٩٨.٥ دولار

كتب محمود محمد ومحمد عبدالقادر ١/٦/٢٠٠٨

يوسف بطرس غالي

كشف تقرير لجنة الخطة والموازنة في مجلس الشعب، عن مشروع الموازنة العامة للدولة للسنة المالية ٢٠٠٨/٢٠٠٩، عن ارتفاع حجم الدين الحكومي في ٣٠ يونيو ٢٠٠٧، إلي ٥٤٩.٨ مليار جنيه، مقابل ٤٥٤.٩ مليار جنيه في ٣٠ يونيو ٢٠٠٦ بزيادة قدرها ٢٠.٩%.

ورصدت الموازنة العامة للسنة المالية ٢٠٠٨/٢٠٠٩ نحو ٧٤.٢ مليار جنيه لسداد مدفوعات وأقساط الدين العام الحكومي، الذي بلغت نسبته للناتج المحلي الإجمالي ٦٥.٤% في ٣٠ يونيو ٢٠٠٧، وبلغ الدين الخارجي في نهاية يونيو ٢٠٠٧ نحو ٢٩.٩ مليار دولار، بارتفاع قدره ٣٠٠ مليون دولار، ويتركز نحو ٥٣.٦% من إجمالي الدين الخارجي في أربع دول هي: فرنسا والولايات المتحدة الأمريكية واليابان وألمانيا.

وكشف التقرير وجود حساب مجمد محتجز لدي البنك المركزي - أقر به صندوق النقد الدولي - ومخصص لسداد الدين الخارجي في مواعيده المجدولة، وبلغ رصيد هذا الحساب نحو ٦٣.١ مليار جنيه في نهاية أبريل ٢٠٠٨، ويصل نصيب المواطن المصري من الدين الخارجي إلي ٣٩٨.٥ دولار حتي ٣٠ يونيو ٢٠٠٧، ويقدر المخصص للدعم في الموازنة بمبلغ ٩.٩٥ مليار جنيه، مقابل ٨٣.٧ مليار في موازنة ٢٠٠٧/٢٠٠٨ بنسبة زيادة ١٤.٦%، ويقدر دعم السلع التموينية بـ٢١.٥ مليار جنيه، بزيادة ٦.٢ مليار بنسبة ٤٠.٤% عن ٢٠٠٧/٢٠٠٨.

ويستحوذ دعم رغيف الخبز علي ١٦.٢ مليار جنيه، بنسبة ٧٥.٤% من إجمالي دعم السلع التموينية.

ويقدر دعم المنتجات البترولية بـ٦٢.٧ مليار جنيه توجه إلي السولار «٣٤.١ مليار جنيه»، والبوتاجاز ١٣.٥ مليار جنيه، والبنزين ٩.٦ مليار جنيه، والغاز الطبيعي ٢.٧ مليار جنيه، والمازوت ٢.٥ مليار جنيه، والكيروسين ٣٠٠ مليون جنيه.

ويقدر دعم الأدوية وألبان الأطفال والتأمين الصحي بمبلغ ٤٠٥ ملايين جنيه، بزيادة قدرها ٢٥ مليون جنيه، ويصل دعم اشتراكات الطلبة في السكة الحديد إلي نحو ٥٠٠ مليون.

وتقدر الإيرادات المستهدفة من الضرائب بحوالي ١٦٦.٦ مليار جنيه، تمثل ٦٠.٤% من إجمالي الإيرادات، بزيادة ٣١.٢ مليار عن موازنة ٢٠٠٧/٢٠٠٨ بنسبة ٢٣.١%.

المصري اليوم

يا سنه سوخه يا ولاد ..

ده احنا بقينا ولا الدول الإسكندنافية

60 % من الإيراد العام للدولة ... ضرايب .. 166 مليار يا ظلمه ... ولسه كمان الضرايب العقارية

ودعم التأمين الصحي والادوية ولبن أطفال وبامبرز بـ 405 مليون بس .... ليه ؟ دول ولا يكفونا بنادول

في حين دعم أشتراكات الطلبة في القطر والمترو 500 مليون ؟

طب إزاي يا عالم يا هو

طب هما والشعب عندهم متدلع وناقص يجيبوا لكل واحد مربية اطفال تهشتكو وتدلعه ..

إنما أحنا ؟!!!

الفلوس دي بتروح فين ؟

أيوه .. إفتكرتو .. إفتكرتو .... ما هو مبارك جايب لكل واحد في الشعب مخبر يدلعه برضوا

[somayasaleh]

صباحك سكر يا سي السيد.... :rolleyes:

بالذمة ده اخبار الواحد يفتح عنيه عليها علي الصبح... :blink:

يعني لازم تحسسنا ان احنا صحيح صحيح في مصر.....

ما احنا عارفين؟؟؟؟؟

......

صباحك فل ان شاء الله :wub:

ملحوظة ... بصفتي مواطنة مصرية صميمة

فقد قمت بسد ما علي من ديون (كما تكرم اللاخ سي السيد ووضح)

ونلك بشيك مسحوب علي بنك المصريين اهمه

يلا يا اخوانا كل واحد يدفع اللي عليه :phar:

تم تعديل 1 يونيو 2008 بواسطة se_ Elsyed

[se_ Elsyed]

خلي بالك يا مدام سُميه

ده كل واحد هايسدد في صندوق الزماله ده .. هايكون على أساس عنده كام راس في البيت ..

يعني أنا عندي 3 روس دلوقت .. وفي راس جايه في الطريق بالديون اللي عليها .. بالإضافة إلى الراس الكبيرة اللي هو أنا

يعني بنتكلم في 3 روس عيال وأمهم وأبوهم مضروباً * 398 = يعني أنا عليه 1990 دولار ... نقول 2000 وإبقى إنتي راضي الرجالة .

تفتكري يا سُميه هانم لو إحنا طلعنا رجالة ووقفنا وقفة رجاله اللي هي زي دي كده

وكل واحد عرق الرجولة نطر في قفاة وراح مطلع دفتر البفره قصدي الشيكات بتاعه وراح كاتب شيك للحكومة بالي عليه هو وعياله ... تفتكري هايبقى علينا ديون لسه ؟

ولا الديون هاتخلص ونقب على وش الدنيا ونبقى مش مديونين للي يسوى واللي ما يسواش وكل مواطن بقى يركب الحته الكابورليه ويقلب خط بدل الكرت ونفطر ونتغدا حواوشي ونتعشا مربى بالزبدة مع شوب حليب وتبقى العملية قشطه ؟

[moheltohamy]

والله يا سي السيد ياخويا ، أنا على ما أذكر إني قريت في أهرام الجمعة مرة مقالة لصلاح منتصر كان بيتكلم فيها على الدين الخارجي العام ، (بما فيه الديون العسكرية) ، وكان 700 وحاجة مليار جنيه! وكان متتبعه من أيام الخديوي اسماعيل!

والملاحظ إنو ما بيرجعش لورا خالص! زي ما نكون مش في دماغنا إننا نسدد المبلغ ده! أو إن الدول المانحة للقروض بتعتبر نفسها عاملاها وديعة عندنا ، واحنا اللي بنقبضها الفوايد ، بدل ما تشغل نفسها ، وتضارب بيها ف البورصة وتخسرها!

تعرف... أنا بجد نفسي يلغو الدعم! ما يلغود يا عم الحاج ، ويوزعه بالكامل يا سيدي ع الناس اللي محتاجه بجد. ولا هنتكلم ساعتها في طوابير العيش ، ولا هنشتكي من المهازل اللي بتحصل أدامها!

وع الأقل هابقى عارف إن مفيش دعم ف أي حاجة وإننا سوق حر ، وهتلاقي فيه رغيف العيش الفينو أبو 10 ساغ ، والرغيف الفينو الإيطالي بتاع مترو أبو 2 جنيه. وكل برغوت على أد دمه!

ماهي الدنيا بتغلى ف العالم كله ، ما سمعناش ولا شفنا الأسعار اتهبلت بالمنظر ده غير في مصر ؛ في كندا مثلاً الأسعار بتزيد آه بس مش كده ، والسعودية فيه ارتفاع ف الأسعار ، كالمتوقع مع غلاء المعيشة ، واللي برضه بتجيلك زياده على مرتبك بمناسبة انخفاض سعر الدولار وارتفاع أسعار تكاليف المعيشة.

لكن إن سعر طن الحديد مثلاً اللي يزيد في خلال سنة واحدة من ألفين جنيه السنة اللي فاتت لعشر تلاف على آخر السنة دي (ويمكن ع الشهر الجاي)... ما اعتقدش إن ده بيحصل في أي حتة ف العالم!

دانتا حتى ما جبتش سيرة دعم التعليم! اللي أساساً 90% ويمكن أكتر من أولياء الأمور شايفين إنه مالوش لزوم! طب ما يسيبو المدارس للي له مزاج ؛ بمعنى ، الطلبة - يمكن كلهم - بياخدو دروس ، وبالذات في الثانوية العامة ، ومحدش بيعتمد على شرح المدرسة ، وبعد كده بيخرج م المدرسة ، يبدأ رحلة الدروس من درس لدرس! طب ما ترحمهم من الوقت اللي ضايع ف المدرسة ده (خدت بالك من كلمة ضايع دي)! ويتبقى لهم وقت أكتر ف البيت يذاكرو فيه اللي خدوه ف الدرس. أو ع الأقل ، يلغي دفتر الغياب ، واللي عاوز يحضر ييجي ، واللي مش عاوز براحته!

وبدل ما العذاب بقى سنتين ثانوية عامة ، طب ما كفاية سنة! ما هو كده كده ، كليات الطب مثلاً هتاخد لها بتاع 5 تلاف مثلاً (كانو 2000 و شوية على دفعتي) ، والهندسة هتاخد نقول 10 تلاف مثلاً... هيه هياها ، التقييم واحد. وحتى يا ريت يخلو الامتحانات ليها معنى وأصعب شوية ؛ مش قادر أفهم إيه ميزة إنك تخلى مثلاً 30 ولا 40 ألف واحد جايبين فوق الـ 90% (يعني امتياز) وأكتر من تلات تربعهم مش طايلين يدخلو الكلية اللي نفسهم فيها! حتى الأرقام يا راجل فقدت معناها وبقت مايعة ، زي كل حاجة في حياتنا!

لو فتحنا ف الكلام على حال البلد ، هنتكلم في مليون حاجة ، وكل حاجة منهم محتاجة فورَم لوحدها نناقشها فيه! وبعد ما نتعب ويجيلنا التهاب في مفاصل صوابعنا وأوتار الإكستينسور ديجيتورام ، كأنك يابو زيد ما غزيت ، وسلو بلدنا كده ، ومفيش حاجة هتتغير!

والبلد دي أحسن من غيرها !!!!!!!!!!!!!!!!!!!!!!!!!!!!!!!!!!! :rolleyes: