الامثال الشعبيه

[النيل حبيبي]

مش عارف هل تم تثبيت موضوع الامثال الشعبيه

لو اااااه يبقي خلاص لو لالالالالا برضه يبقي خلاص

الامثال الشعبيه جزء من حياتنا اليوميه

ياريت كل واحد مننا عنده امثال شعبيه بس تكون مصريه

يثبتها هنا

ياما جاب الغراب لامه

اسمع كلامك اصدقك اشوف امورك استعجب

لبس البوصه تبقي عروسه

[مشمش]

من أفضل ما كتب عن الامثال العامية كتاب المغفور له أحمد تيمور باشا (الأمثال العامية)

هذا رابط للكتاب علي موقع المصطفي:

الأمثال العامية - أحمد تيمور

[النيل حبيبي]

مشمش افندي

شكراً على مرورك

ياعم من 1956يعني اكتر من خمسين سنه

اطبخي ياستي كلف ياسيدي

[النجم الثاقب]

شكرا على الموضوع اخى الفاضل النيل حبيبى انا بيتهيألى الامثال دى مبتخلصش

بكره نقعد على الحيطه و نسمع الزيطه

يا خبر النهارده بفلوس بكره يبقى ببلاش

القفه ام ودنين يشيلوها اتنين

اللى بياكل على ضرسه بينفع نفسه

[badroora]

جبنا الاقرع يونسنا كشف راسه وخوفنا

اللى متعرفش ترقص تقول الارض عوجه

يادى الشيلة يادى الحطة رحت على جمل وجيت على قطة

ثلاثة ملهومش أمان البحر الدنيا السلطان .

وجع البطن ولا دلق الطبيخ

ان خرب بيت ابوك الحقلك منه قالب

الشايب لما يدلع بيبقي زى الباب المخلع

شنب مافيش تحته فلوس يستحقله موس

الحظ لما يواتى يخلى الاعمي سعاتى

اللى معاه قرش محيرة يجيب حمام ويحمرة :wub:

موضوع جميل وباحب الامثال قوى ......النيل حبيبي تحياتى ولى عودة مرة اخرى :rolleyes:

تم تعديل 1 يونيو 2008 بواسطة Badria Mekkawy

[قديم]

جميله الامثال الشعبيـه واحلي منها لماتكون باللهجـه البلدي

اللي نحبه نبلع له الزلط واللي نكرهه نحاسبه على الغلط

اللي ينسى آسية أصحابه يا مكثر أحبابه

[النيل حبيبي]

شكراً عزيزى/قديم،

قديم

اللي ينسى آسية أصحابه يا مكثر أحبابه

ياريت كلنا ننســـــــــــــــــــــــــــــــــــــــي

شكراً للامبراطوره/المكاويه

Badria Mekkawy

الحظ لما يواتى يخلى الاعمي سعاتى

والمكسح عجلاتي

القُفه ام اتنين يشلوها اتنين

[النيل حبيبي]

عشان نشجع نكمل واللي بعده يجيب جديد

القرد في عين امه -------

----- القدرة علي فُمها تطلع البنت ------

[~Heba~]

لا تعايرنى و لا اعايرك الهم طايلنى و طايلك :rolleyes:

متهيألى لو الناس طبقت المثل ده حتفرق كتير

[النيل حبيبي]

شكراً علي مرورك بلدياتي

ليه مكمليش الأول

الهم طايلنى وطايلك

نعم

[المنصوراوى]

فكرة جملية فعلا نبدا

&اللى اختشوا ماتوا

&عامل ذى القطة تاكل و تنسى

&قالوا الطببا تعبنا و بقينا نداوى بلاشى من خوف كلمة تعبنا و ضرب القفة مر قاسى

[طه بدر]

امثال شعبية وانا موجود ؟؟؟؟؟؟؟؟

وسعوا يااساتذة

اولا نصحح للاخت بدرية

اللى معاه قرش محيرة يجيب حمام ويحمرة

لو حمرتى الحمام يبقى بالهنا والشفا بس كده باظ المثل :D

المثل بيقول اللى معاه قرش محيره يجيب حمام ويطيره

تحياتى

تم تعديل 4 يونيو 2008 بواسطة طه بدر

[طه بدر]

ندخل بقى على الامثال ونبدا بامثال الزواج

اخذ ابن عمى واتغطى بكمى

خذ الاصيلة ولو على حصيرة

بفلوسك بنت السلطان عروسك

يا واخد القرد على ماله يغور المال ويبقى القرد على حاله

طول عمرك يا رضا وانت كده

شاور مراتك وخالف شورتها

شورة المرة لو خابت بخراب سنة ، ولو صحت بخراب العمر

ده اللى انا فاكر دلوقت شويه ونرجع

واسيبكم تفكروا فى كل مثل منهم

لان الامثال لم تعيش الا لانها خلاصة خبرة الشعوب وتجاربها فى الحياة

تحياتى

[طه بدر]

عدنا

البقرة بتولد طب الطور بيصرخ ليه ؟؟ قالك كله تحميل جمايل

ما يقعد على المداود الا شر البقر

والمداود لابناء المدن هى مكان وضع الاكل فى الزريبة ( لامواخذة)

سكتنا له دخل بحماره

الفعل لطوبة والاسم لامشير

اهو جالنا زى زعبيب امشير

البيت بيت ابونا ويجى الغرب يطردونا

امك بصل وابوك توم مين يجيك الطيب يا ابن الشوم

(والطيب هنا هو العطر الطيب يعنى افهمها سعادتك)

ايش تعمل الماشطة فى الوش العكر

وشه يقطع الخميرة من البيت

عدى على الناس معرش ولا تعدى عليهم مكرش

ومعرش يعنى منفوش باللباس الجيد مثل عريشة العنب التى تمتلى بالورق حتى بدون ثمر

قالوا يا جحا مرات ابوك بتحبك ......... قال يمكن اتجننت

قالوا بلدك فين يا جحا .......... قال اللى فيها مراتى

قالوا يا جحا عد موج البحر ........قال الجايات اكثر من الريحات

لو كنت فى بلد بتعبد العجل ......... حش واكله

لف سنة ولا تخطى قنا

قالوا الجمل طلع النخلة ......... ادى الجمل وادى النخلة

اشترينا بخمسة وبعنا بخمسة وكسبنا صلاة النبى

عليه افصل صلاة وسلم

تحياتى

[النيل حبيبي]

شكراً اخينا طه علي مرورك الكريم

ما شاء الله عليك

قالوا للحرامي احلف قال جالك الفرج

[النيل حبيبي]

دادي اللي يداديك

وخللي ولادك ولادة

[النيل حبيبي]

العروسه للعريس والجرى للمتاعيس

ان كان حبيبك عسل متلحسوش كله

[طه بدر]

دادي اللي يداديك

وخللي ولادك ولادة

من رادك ريده واجعل عيالك عبيده

ومن طلب بعادك زيده ولو كت روحك فى ايده

والمعنى ان من يريد ان يكون بقربك فيجب ان تعطيه المحبة وان تجعل اولادك قرة عينك واغلى ما لديك عبيد له

ومن طلب الابتعاد عنك فيجب ان تعطيه المزيد من البعد ولو كانت روحك وحياتك فى يده

تحياتى

[طه بدر]

من أفضل ما كتب عن الامثال العامية كتاب المغفور له أحمد تيمور باشا (الأمثال العامية)

هذا رابط للكتاب علي موقع المصطفي:

الأمثال العامية - أحمد تيمور

بعد محاولات عديدة فاشلة نجحت فى تحميل الكتاب ومع انى قرات العديد من الكتب فى هذا الموضوع يبقى هذا الكتاب هو الاصل ومنبع لكل ما بعده

شكرا على هديتك الجميلة وحقيقى متعة لمن يحب الامثال الشعبية

تحياتى

[قائد المدفعيه الهولنديه]

اعتقد ان الموضوع ده مش هيخلص مع اننا مش بنكرر الامثال بس ما شاء الله الامثال مالها حصر...... قولت اشارك حته على السريع كده و انا معدى

:rolleyes: اللى معاه فلوس يحنى رجلين جحشه ( يعنى يعمله حنه).

:wub: قيراط حظ ولا فدان شطاره.

هبله و مسكوها طبله.

و نلتقى بعد الفاصل