أخيراً : البرلمان يوافق على تعديل قانون المرور في مصر

[se_ Elsyed]

إحنا كده ..

أو العالم الثالث اللي وراء العالم المتقدم بـ 100 سنة ضوئية كده .... ننام ننام ولما نقوم عايزين نهد الدنيا في يوم وليلة .. بس نهدها بوئيئ ... بالبؤ بس يعني

يعني من لا قانون وهرجلة وبزرميط وشمبرلاح مرور لا يوجد إلا لدينا ... وإنت اكيد أكيد في مصر ..

إلى قوانين قراقوشية هلاميه .. وأدي دقني أهي لو إتطبقت ..

شيء مقرف ومثير للتعجب

مجلس الشعب برئاسة د.أحمد فتحي سرور في جلسته الليلة الماضية بصفة نهائية علي التعديلات الجديدة لقانون المرور.

أكدت التعديلات الجديدة عدم جواز الاستمرار في منح تراخيص لسيارات الأجرة بين المحافظات التي مر علي تاريخ صنعها 20 عاماً وإعطاء أصحابها مهلة 3 سنوات لتوفيق أوضاع هذه السيارات ( قشطة .. 100 % ومنعا ً للتلوث والحوادث اللي بتقع نتيجة تقادم السيارات ... ولفته إنسانسة حكاية الثلاث سنوات دي )

..وقضت التعديلات الجديدة بالحبس سنة لكل من يقيم مطباً صناعياً بدون ترخيص . ( مين البني أدم الغير واقعي اللي عمل الفقرة الهبلة دي .... ده ممدوح إسماعيل قتل 1030 نفس وما أخدش يوم سجن ..... يبقى اللي عمل مطب ينطس سنة ؟!!!!!!!!!!! طب خليها غرامة كبيرة ونشيل المطب على حساب اللي عمله ونقطم وسطه مثلاً !!! وبعدين والله والله والله أعرف ناس كتيرة وشفتهم بعيني عاملين كمية مطبات قدام بيوتهم بيأذوا بها الخلق ... لكن الموضوع ده دمه بيتفرق بين القبائل والحكومة مش هاتقدر تمسك حد معين وتقول له إنت اللي عملت المنط ده يا لئيم - اللي في مصر دي بأسميها منطات مش مطبات .. لإن العربية بتقفز من فوقيها زي الحصان أما بيقفز الحواجز كده .. وبالتالي بتنزل على جدور رقبتها وما يقومش لها قومه والعفشجية في مصر بيشتغلوا زي الحلاوة وأهي أرزاق - )

و6 شهور مع الغرامة لكل من يسير عكس الاتجاه أو يقف في الممنوع ( الرحمه يارب من القوانين الخزعبلية الغير واقعية )

أو ينقل أي مواد محظورة ( يعني إيه ؟ جاز وبنزين ولا مواد متفجرة ولا إيه بالظبط ؟ )

أو يقوم بفك كلابشات المرور. ( أوافق على المادة دي وزيها زي اللي بيسرق حاجه من المال العام .. أو بيسرق قضيب من قضبان السكك الحديد وده مجرم أراري فعلاً )

نصت التعديلات أيضاً علي ضرورة تركيب جهاز يسجل رحلة المركبة أشبه بالصندوق الأسود للطائرة ( يا عم إرحمنا ... ده نص عربياتك يا مصر ماشية بالقدرة ومش قادرين يركبوا حزام أمان ... تقوم تقول له ركب صندوق إسود ؟ هايروح جايب كارتونة شيبسي فاضية ويدهنا بلك إسود ويقولك أهو الصنودق .. أي خدمة يا باشا .. زي ما أتصرفوا وعملوا حزام الشنطة حزام أمان )

وكذلك وضع جهاز محدد السرعات للمركبات السياحية والنقل والنقل بمقطورة ( اوافق على دي جداً ويا ريت لا تتعدى السرعة 80 .. وياريت كانوا اضافوا نقطة أخرى إن اللي يلعب في العداد ده ويفكه عشان ينطلق بالمركبة دي ينطس سنة سجن .. لإن المصايب كله منها )

ومعاقبة كل من سمح بقيادة مركبة لمن دون الثامنة عشرة أو لأي شخص غير مرخص له بالقيادة إذا نجم عن ذلك حدوث إصابة أو وفاة للغير بالحبس مدة لا تقل عن 6 شهور وغرامة ما بين 20 و50 ألف جنيه ( 100 % .. لإن أرواح الناس مش لعبه وكل واحد بيدي العربية لتوتو او سوسو إبنه ويدوس في خلق الله ويطلعوا يعملوا سباقات الخنافس في مساكن الشيراتون .. يبقى يستاهل يتحبس ... ونودي سوسو الاحداث او نحلق له زلبطه ) .

بس يا ريت كمان نرصد ميزانية قد 5 أو 10 مليار لإقامة سجون فخمة وجديدة عشان الناس اللي هاتتحشر في السجوون بتاعت مخالفات المرور ...

وبرضوا مش هاصدق إلا أما أشوف القانون إتطبق على التخين فيكي يا مصر ..

وانا عن نفسي اعاهدكم إني أول حاجه هاعملها لما انزل مصر إني أطلع الرخصة ... عيب قوي وكفاية سواقة بوصل النور ....

أنا بأعترف إني مُخالف وأقود السيارة بدون رخصة قيادة حتى الأن .... لإني كنت أقاوم الرشوة وكل ما أروح أمتحن الظابط الغلس يهبدني ميعاد بعد شهر ولا اتنين وانا أجازتي كلها أيام معدودة ... بالرغم من إن عندي ناس بيطلعوا الرخصة وأنا قاعد في البيت وكل شويه أسد يقول لي : ما تدفعش رشوة يا س س .. هاتروح النار يا س س ....

طب اعمل إيه يا عم اسد ... يرضيك أتحبس 6 شهور ؟

بالمناسبة ناس أصحابي في المنتدى هنا طلعت لهم الرخصة .. وهما قاعدين في البيت .. وما طلعتهاش لنفسي ... تخيلوا ؟

[midotheboss]

أي الجمدان ده والله ينور