حلاق .. رغم أنفي

[se_ Elsyed]

الأخ موديست عارف إن أنا شريك في صالونين حلاقة في مصر ... كمشروع جانبي يعني .. بالرغم إني ما باخدش منهم ولا مليم لإني سيبتهم لأخويا .. ما علينا ..

ومع ذلك بيُحرك ويفرك ويفتكس عشان يحاربني في اكل عيشي ... وكإنها ناقصاه هو راخر .. ومش كفاية علينا نظيف وطويل وغالي واخواتهم ..

فمن كام يوم وفي عز ما أنا متبنج وعند دكتور السنان اللي شغال في إسناني فحت وردم وحشو وخلع ... ويادوب خلصت وروحت ألقح جتتي في البيت إلا والاقي إتصالين متتاليين ..

واحد من موديست بيقولي فيه إنه اخترع سوفتوير للحلاقة هايكسر الدنيا ... فكان هاين عليه أشد سلك التليفون عشان أخنقه وأجرجره من جده لحد الرياض ... وده موضوع أخر هاحكيه لاحقاً ..

قلت اريح شويه من فوران الدم اللي سببه لي موديست وأدخل أدور لي على علبة زيادي أو حُق أيس كريم أبل بيهم ريقي .. إلا والألقي مكالمة تاني من إيطاليا .. قلت : اصيل يا برلسكوني .... عرف إني بعافيه فحب يطمئن عليه .. إلا والاقي واحد بيكلمني وداخل في الموضوع على طول من غير لا سلام ولا كلام وبيقولي بصوت خشن من اللي بيستخدموة تجارة الخردة في السبتية ( سكوربيون ) : أيوع ياباع – يعني أيوه يابا لازم العين اللي في الأخر دي لتفخيم الكلام والإستدلال على إنه صادر من معلم يعني - الناس اللي عايمه في بحيرات البط وعماله تاكل عمام معشي - حمام محشي - بالفريك وإيشي فسيخ على زبده بلدي وسايبين اللي جابنونا هنا للتوست والباتون ساليه ... إحنا مش جايين ننق يا عم س س ، مطرح ما يسري ..... مشيها يمري المرة دي يا معلم ....

وهو أساساً مش شايف بؤي متربط بالشاش ومتجبس ومتعاص مكركروم ومش قادر حتى اكل علبة زيادي منزوع الدسم ..

فقلت له : ما هو نقكوا الدكر ده هو اللي جاب البلد كلها ورا ... بتبصوا لي حتى في لقمة البط والحمام اللي ما بأشوفهمش إلا من السنة للسنة ؟ ... روح يا شيخ ... وتعالى بسرعة ... إخص عليك ... مش هاقولك اكتر من كده وهاسيب دموع عينيه هي اللي تتكلم .

أما الأخ موديست فبالرغم من إنه حبيبي من ايام الجيزة .. إلا إنه لا يتوانى في إستخدام مواهبة البرامجية في أذيتي ومحاربتي في أكل عيشه ..

وشوفوا الحديث اللي دار بيننا وأحكموا إنتوا ...

موديست : ألووووو ... سونسون .. حبيب قلبي .. صباحو عسل يا معلم ..

س س : آه آه آه يا ضروسي ... صباح النور يا موديش ..

موديست وهو يتقمص شخصية كاظم : موديش ؟!!!!! إزاي ؟ هش وصلت لحد كده ؟ .... سلامتك من الآه .... وسلامه ضروسك اللي بتقرقش الزلط والحمام والبط ...

س س : حتى أنت كمان ؟ دي مؤامرة على حياتي بقى ..... حرام عليكو كده والله ..

موديست : إسمع بقى المفيد عشان أنا جايب لك خبر هاينطرك فوق ...

س س : إيه مرتضى منصور رجع تاني ؟

موديست : يا عم سيبك من التهجيص ده ... مرتضى إيه ومنصور إيه .... أنا اخترعت لك يا شقيق برنامج كمبيوتر كتبته بالجافا على الإتش تي إم إل وختمتها بأوراكل عملت لك كوكتيل لغات يعني ... وممكن تستخدمه في حلاقة الدقن بمنتهى السهولة ومن غير ما يكلفك ولا ملين وكمان فرحت أهل المحاورات بيه ونزلته في موضوع في باب الكمبيوتر وإكسسوارات الكمبيوتر

س س : يا فتاح يا عليم يار رزاق يا كريم ... فرحني وإشجيني يا عندليب .

موديست : وديتها شهرين وأطوره واخليه يحلق الشعر كمان ... وبرضوا من غير ولا ملين

س س : إلا قولي يا موديست ..... في حد قتلك قبل كده ؟

موديست : آه .. حوالي 3 مرات بس ... ليه ؟

س س : عشان هاتبقى المرة الرابعة على إيدي ... يابني إنت جاي تأذيني وتسمم بدني ؟ إنت مش عارف يا بني ادم إني حلاق .. أو بالتحديد بأكسب اكل عيشي من الحلاقة ؟

موديست : أيوه يا بني عارف وعشان كده جاي أفرحك واخليك مزقطط ..

س س : زقططني يا موديست وخلي جناحات الفرحة تطلع لي .. وريش السعادة ينبت عندي ..

يُتبع

[Folana]

السلام عليكم ورحمة الله....

لأ..لأ..لأ ..ألف لا بأس الشر عليك يا أبو الاسيان,,,,

طيب على اى حال اللى مش حتقدر تأكله من هنا لحد ما ضروسك تشفى...ابقى هاتوا معاك بكره فى حجرة المشرفين...احنا حنتصرف.

من غير قطع حواراتك يعنى....عايزة اقول حاجة بمناسبة برنامج الحلاقة اللى أنعم به علينا مولانا موديست افندى... :wub:

تصور سيادتك انى أول ما قرأت الموضوع..ارسلت فى شراء ماكينة حلاقة سوبر لوكس...

لأ....مش علشانى

ده أنا كل شوية أتصل بالاستاذ زوجى واقوله تعال علشان تحلق.....قوم ايه....عندما حضر..فضلت اوصف واتواصف بقى...وكلى ثقة فى خبير الحلاقة اسطى موديست...

أقول لزوجى تصور يا سى الفندى...ماعليك الا انك تقعد امام شاشة الحاسب الالى...وتقوله احلق ...يحلق

وطبعا كل ما اشوف نظرة الاندهاش فى عيون زوجى...ازود الجرعة شوية باعتبارى خبيرة برامج...(انا فهَمته كده wst:: )

يقولى بجد؟...اقوله...أيووووووووووووون....امال ايه....دى ثورة تكنولوجية ياحضرة....الواحد من دول عايز يحلق دقنه......تتحلق

عايز يعملها كيرلى....تتعمل

عايزها لييس....تتعمل

عايزها فتلة وفتلة...تتعمل

عايز يعملها موزمبليه..برضه تتعمل....

وبعد ماجرب البرنامح...بص لى حتة دين بصة..و.,,,و..قال..انى...انى...فيما معناه يعنى ...انى فهمت فكرة البرنامج غلط.... :sad:

وانتهز الفرصة من هذا البرنامج واقول للاسطى موديست "معلش الله يسامحك"......انا بعد العمر ده كله مع زوجى ومخبية عليه ذكاوتى وألمعيتى...قوم يكتشفها كده بمنتهى البساطة....

لنا رب..

اتفضل يا ابو اسيان كمل....

صباحك جميل..... :rolleyes:

[النجم الثاقب]

الف سلامه عليك يا زعيم ... شافاك الله و عافاك ... طهور إن شاء الله

خف شويه يا حاج موديست على الراجل لحد مايفك الشاش و الجبس و يقدر ياكل الزبادى كامل الدسم :rolleyes:

[النيل حبيبي]

الف سلامه ياسي السيد الاسنان حاجه صعبه

سمعت بالموضوع لكنه حسيت انه فيلم هندي

ربنا يقويك علي اختراعات اخونا/موديس

[se_ Elsyed]

مُشكر لكم جميعاً على شعوركم الجميل الخالي من أي مطبات ولا تدريجات .. فعلاً ريحتو قلبي .. وما قصرتوش رقبتي ...

لكم من ألف تلامه ... قصدي سلامه

نكمل ...

موديست : بص يا ريس .. أنا عايز أنقلك نقلة جامده .. وتسيبك بقى من قرفصتك تحت كوبري الملك الصالح والبهدلة اللي إنت متبهدلها دي .. وكل شويه واحد من أصدقائي باعت لي صورة لك في أوضاع مخجلة وحاجه تعر .. وبصراحة ساعات بانكر معرفتي بك من اساسه ..

س س : إحترم شعوري يا موديست .. اللي يسمع كلمة اوضاع دي ... مونكن يظن في ظن بطال ... وخلي بالك ... العمل شرف .. العمل عبادة ... العمل واجب ..

موديست : ما تتحمقش قوي كده .. انا قصدي وضعك يعني تحت الكوبري واللي جاي واللي رايح يلطش فيك .. والبلدية كل شويه شايله لك الفرشة بتاعتك وتعمل لك محضر تسول ومشحططني وراك وكل يوم أطلعك من تخشيبة شكل بضمان بطاقتي ... لدرجة إني ماشي دلوقت ومعايا شنطه مليانه صور بطاقة عشان سيادتك ..

س س : وماله .. على الأقل بأكل لقمتي بشعر جبيني .. قصدي بعرق جبيني .. وبأمدش إيدي للي يسوى واللي ما يسواش ..

موديست : حتى تشبيهاتك مقرفه ... عرق إيه وشعر إيه ؟ يا بني ادم انا عايز انقلك نقله تانية ... إحلم كده وإتخيل معايا .. شيراتون .. سمير أميس ... جراند حياة ... الفايف سيزون ...

س س : آه وكتاب الله .. ده أنا لو فرشت قدامهم مونكن احلق للسياح والبليه تلعب معايا وأفتح صالون في الدويقة في خلال 4 أو 5 سنين بس ربنا يبعد عنا عيون الحسودية

موديست : تفرش ... دويقة ؟ قوم يا س س من قدام التليفون بدل ما أخبطك بالسماعة أجيب لك إرتجاج في الجُنجُنه !!! يا بني أدم بأقولك هافتح لك صالون ثقافي قصدي صالون حلاقة في احد تلك الفنادق .. وممكن لو فتحت نافوخك معايا يبقى لك سلسلة صالونات كمان ونسميها " مجموعة صالونات سين سين للحلاقة والتزيين "

س س : موسي على كتفك .. قصدي إيدي على كتفك ... أنا من إيدك دي لإيدك دي يا كبير

يُتبع

[Scorpion]

يا اسطي سين و لا يهمك من إفتكاسات الخواجات دي ..... انا أول ما شفت المشروع قعدت أضحك .... ده مشروع فاشل يا ابني ... عارف ليه مش حينفع ... شوف ...

بصوا قدامكم كلكم ... فيه ايه ...

شاشة .... كيبورد و ماوس

محطوطين علي مكتب .. ترابيزة ... لوح خشب ...

تحتيه فيه الهارد يسك .. و ميت الف سلك متلولين علي بعض ... و كام حاجة كده متنطورة يمين و شمال .. برينتر .. سكانر ... اباجورة ... الخ...

دورلي بقي سيادتك علي مكان تحط عليه حوض بحنفية لزوم الحلاقة.... أو حتي قروانة مليانة ميه و مكان للصابونة و كريم الحلاقة ...

و لو لقيت يا فالح ..... حتتصرف ازاي مع اللي حتصوت في ودانك و هي بتقوللك :

"طبعآ .. ما هي الخدامة اللي اشتراهالك المرحوم اللي حتنشف المية المطرطشة في كل حتة دي ... "

فحط في بطنك بطيخة صيفي يا اسطي ... و اسبقني عالمحل علشان عايز آخد دقني بالودان النهارده ....

صباحه عسل ....

[Modest]

يعني عاجبك كده ياسطى .. نينة الحاجة فولانة و عم النجم و النيل حبيبي و كمان سنيور سكلوب :blink:

داخلين يتمألسوا عليا و يطلعوا العيب في الاختراع بتاعي و أنا اللي مقطع نفسي تفكير من ساعة ما كنت تحت ايدك من جمعتين و انت بتاخد لي دقني :cry:

ياسطى الاختراع بتاعي ده ثمرة تفكير عميك ... لكن هي كده الشجرة المثمرة دايماً تهاجموها :beee:

لعلمك بقى .. أنا اتعرض عليا ملايين من شركة جيليت و غيرها من كبرى الشركات العاملة في هذا المجال مثل زبادي جهينة و شركة كورونا و شركة بابمبرز و غيرهم من الشركات المتصيّتة علشان ياخدوا الاختراع بتاعي لكن انا رفضت.

طيب تصدق إن حديد عز كمان عرض عليا أطلع في الإعلان و انا باحلق دقني و أقول "أنا باحلق دقني بحديد عز rs:" ... كلهم هددوني بالقتل ياسطى لكن برضه رفضت .. و قلت أنفّع بيه معنّمي لكن مفيش فايدة .. مفيش فايدة .. مفيش فايدة :cry:

كمّل ياسطى لما نشوف أخرتها معاك .. كمّل بس "بالتدريج" لو سمحت rs:

[se_ Elsyed]

صحيح .. ما يحسش بيك إلا إبن كارك

حبيبي والله يا سكوب من ايام شبرا

فاكر يا سكابيكو لما كنت بتشتغل عندي صبي قبل ربنا ما يفتحها عليك وتفرش في روما ؟

بالمناسبة يا جماعة ...

الجدع اللي واقف في الصورة داه وراكب فوق كتاف الزبون عشان ما يفلفصش وماسك البزبوز بيطري به راس الزبون عشان يفوقه من حالات الإغماء اللي بتجي ليه نتيجة ضربات الموس المتوالية على قفاه .... هو سكوب

حبيبي حبيبي .. حبيبي يا سكوب

اما بخصوص التساؤل اللي عمله المصوراتي : أين ذهب الثلاثة رجال ؟ فده سر أذيعه لأول مره

1- الراجل أبو جبه وقفطان زي ما قلت اللي ماسك البزبوز ده .. سكوب .... ومن البقشيش اللي كان بيطلع له من ورايا .... مع الخنصرة والشغل بعد الضهر وحلاقة البيوت والذي منه .... عملهم ولم حق تذكرة وهج على إيطاليا ... واللهم صلي عالنبي . الراس الواحده ما بياخدش فيها دلوقت أقل من 5 يورو ... او لما بيشتغل في المواسم المضروبة وبيضطر يشتغل بنظام المقايضة عشان يأكل العيال .. فالراس بياخد فيها واحد بيتزا سوبر سوبريم ... والدقن ممكن يمشيها طبق مكرونة سباجيتي من غير صلصة .. وأهي بترزق .

2- الأسطى اللي كان بيخلص عالزبون .. طبعاً ده العبد لله وكان زمان عليه مسكت موس .. ولا كإني سليم سحاب وماسك العصايا اللي بأقود بها اوركسترا الحُجرة .... ودلوقت هو معدي برضوا وفارش تحت كوبري البطحا بنفس العده وبنفس البنص الإسود اللي حطه جنب العدة وساعات على الغوميضي كده لما كان بيحب يتناول تولز من بتوعه كان ممكن فردة تطلع في إيده ... ولإنه شاطر ومتمكن .. برضوا كان بيشطب بها دقن الزبون .

3- الضحية اللي قاعد ومخبي وشه بإيده عشان الكاميرا .. ده موديست .. واللهم صلي عالنبي من بعد التدريجة دي وأبواب الرزق انفتحت في وشه ... لإن شكل شعره الكنيش اللي شيلتهوله أيامها كان كابس على مراوحه ومش عارف يفكر .. دلوقتي مخه تحرر وبقى حاجه تانية خالص .. وبيدعي لي في كل صلاة من ساعتها .

[~Heba~]

موديست عايز ياكل رزق العرايس rs:

[se_ Elsyed]

نكمل

موديست : بص يا س س ... انا عايز نخلي هناك تكامل او حاله من الكومبنيشن ما بين العلم والتكنولوجي من ناحية .. وما بين الصناعات المهنية الحرفية اليدوية من ناحية أخرى .... فاهم حاجه ؟

س س وهو فاغراً فاهه : هه .. آه ... فاهم فاهم بس أحتاج إلى مزيداً من الشرح المُسهب بدون إطناب أو توريه .

موديست : يعني بالبلدي .. مخي وإستخراعاتي اخليهم تحت امرك واطور لك شغلك ونعدي إحنا الإتنين

س س : وإيه المطلوب مني ؟

موديست : صلي عالنبي يا سيدي ... بقى خير في سلامه وسلامه فين ؟

س س : سلامه في إنبي دلوقت ومعاه هاني رمزي .

مودست : واللي يتكسف من بنت عمته ؟

س س : ما يجيبش منها خضار ..

موديست : حلو قوي ... بقى أنا أستخرعت لاب توب ظريف ومحندق ومتعدد الإستخدامات ... وممكن تستخدمه في حلاقة دقنك مبدئياً لحد ما اعمل تعديلات عليه وتقدر ساعتها تحلق به شعرك كمان .. عشان يبقى شعر ودقن .... ونعيماً مقدماً

س س : سليم .

موديست : اللاب توب فيه جيب صغير كده من ورا تحط فيه الأمواس كل فترة ... وفي كمان خرطوم من الجنب عشان رش الكولنيا بعد الحلاقة عشان دقن ما تحببش وتكلكع ...

س س : حلو .. وده بيعمل كام يا معلم ؟

موديست : انا بأتكلم دلوقت في 3750 دولار .... ده عشان ابو اشرف حبيبي والله

س س : طب انا إش دخلني في الموضوع ده يا ريس ؟

موديست : يابني إفهم ... مانت هاتبقى الوكيل الحصري للفيلم ده ... وكمان هاعمل لك ويب سايت هاسميه " موس دوت كوم " وهايبقى بإشتراك رمزي . وكل زبون يبقى له يوزر نيم وباسوورد ... بحيث الزبون من دول وهو قاعد مآنتخ في بيتهم يدخل عالسايت ياخد دقنه سريع سريع ولا بهدلة الصالونات ولا تلامة الحلاقين

س س : طب إفرض الزبون الخسع من دول بقى له يوزر نيم وباسوورد يا فالح ... وعمل سياحه ونشر الموضوع ده لأمة لا إله إلا الله ؟ يبقى واحد يشترك ومليون يحلقوا بلوشي ؟

موديست : إنت هاتقولي على سقالة الزباين .. عامل حسابي والله ومحدد إقامة كل زبون وهاسمح له بحلقه واحده كل يومين .

س س : وده إيه عيوبه أو مخاطرة يا أسطى موديست ؟

موديست : أبداً لا مخاطر ولا دياولو ... إذا كان على تهنيج الجهاز .. فأؤكد لسيادتك إني مش هاسلمك أول دفعة من اللاب توبات دي إلا أما أجربها وأحلق لنفسي لمدة لا تقل عن إسبوعين متواصلين .. ... بس في مشكلة مواجهاني لحد دلوقت ؟

س س : قول الله يكرمك وقعت دقني .. قصدي قلبي ...

موديست : المشكلة في الباور صابلاي ... يعني لو الكهربا قطعت فجأة عن الزبون من دول وهو بياخد دقنه ... ممكن الموس يرشق في صدغه ويجيبه حتتين ..

س س : يرشق في صدغه .. يا نهار إسود ... وبعدين ؟

موديست : إطمئن ... أنا بأفكر دلوقت في أستخراع باور جينيريتور بحيث الباور لما تقطع ... الجينيريتور يشتغل على طول والزيون ما يحسش بحاجه ...

س س : وده بيعمل كام يا معلم ؟

موديست : عيب يا سونسون وحياة سامية بنتي ما هانختلف ... ده انت حبيبي من أيام الجيزة

س س : الله يكرمك بلاش سيرة الجيزة أحسن جسمي بيقشعر من سيريتها .

موديست : عشان خاطرك ده بيعمل 1320 دولار ..

س س : وده إيه مخاطره هو راخر يا معلمه ؟

موديست : أبداً ... لا مخاطر ولا حاجه ... كل ما في الأمر إنه بيشتغل بالجاز وشكراً ... ونعمل لك إتفاقية صغيرة مع منظمة آوبك بحيث نضمن موضوع تزويدنا بالوقود الحيوي اللازم لتشغيل هذا البتاع ... يعني مطلوب م نسيادتك دلوقت أبوت 10 ألاف دولار تحت الحساب عشان أبتدي اورد لك .... أهرش بقى .

س س : أهرش لك فين بالظبط ؟ طب بأقولك إيه يا موديست .. انا عندي ديل

موديست : وده طلع لك إمتى ؟

س س : أقصد deal يعني صفقة ... إفهم بقى .

موديست : ربنا يكفينا شر صفقاتك ... قول .

س س : إيه رأيك العشر تلاف زرار دول ندخل بيهم شركة .. أنا بالمجهود وإنت بمخك المستخرع ده ؟

موديست : مش فاهم وضح ؟

س س : يعني نبدأ على بركة الله ونفتح المحل في سمير أميس وممكن نسميه " صالون أشرف و ساميه " ... واحلق لك أنا بالفلوس دي على مدار عُمرك المديد ورأيك السديد .. قلت إيه ؟ وحياة سامية عندك ما تكسفني

موديست : أنا حياة ساميه عندي ما تساويش تلاتته جيني وربع أساساً .... قلت حلال الله وأكبر .. وهاخليك تجرب الجهاز دلوقت .. وفي نص الحلقه هاروح شادد الكُبس عشان الموس يقطش لك رقبتك .

تمت

[semsema]

والألقي

بقالي سااااااعة احاول اقرا الكلمة دي........ مش راضية تيجي معايا rs:

تم تعديل 3 يونيو 2008 بواسطة semsema

[Modest]

والألقي

بقالي سااااااعة احاول اقرا الكلمة دي........ مش راضية تيجي معايا

ماهو لو بتذاكري كتاب القراءة و بتسمعي أبلة فضيلة كنتي عرفتي الكلمة دي و غيرها .... ياللا قومي ذاكري

[قديم]

خدماتنا تصلكم اينما كنتم .اتصل واحلق

خدمات متنوعــه وانشطه لا حدود لها

[badroora]

الاخوة الاشقاء س س .......والجنرال موديست .......استمتعت جدا باختراعكتم وحبيت اشارككم بخبرتى

فى عالم الحلاقة ............. :rolleyes:

عندنا من ضمن تحضير المريض للعمليات سواء للرأس او فى اى مكان مشعر لازم نحلق الشعر وطبعا مافيش

حلاق متخصص فى المستشفى كله اجتهاد ذاتى ...........

احيانا فى الطواريء تضطر انك تحلق ع السريع وعشان مافيش وقت والمريض لازم يدخل العمليات بسرعه .

اقووم انا بقي ايه لسه هاستنى حد يحلق للزبون والكل فوق دماغى يلا يلا يلا يلا .

اروح جايبة بتاع 10 ماكيانات حلاقة واحلق للمريض .

طبعا مش بافهم فى اصول الحلاقة اقصد الاتجاهات يعنى .....انا بقي اكتشفت انى باحلق الشعر

مع اول طبقة من الجلد .

ومرة تانية ......مريض كان مطول عندنا وكان فاقد الوعى فيوم ما فاق وفصلاناه من على جهاز التنفس

الصناعى ......طقت ف دماغه يشوف نفسه فى المراية طبعا رأفة به قولنا نحلقله الاول عشان ميتفزعش

من شكلة وممكن يفصل تانى وتظل اخر وش شافة هو ذاكرته .

كان معانا ولد بيساعدنا فى احضار الحاجات اللى بنحتاجها سواء من الصيدلة او المعمل او بنك الدم .

قولتله والنبي انت راجل وتعرف تحلق الدقن لانى اخاف اشيله اول طبقة من الجلد

ممكن تحلقله قالى ماشي انت تئمرى يا ميس .

تركت غرفه المريض 10 دقايق والله العظيم رجعت لاقيت وش العيان كله مليان دم كانك بالظبط جايب جردل

دم ومحميه به ومكنتش عارفه اضحك ولا اصوت ولا اعمل ايه الراجل وشه اتشلفط بجد كأنه طالع من خناقة .

المهم دا بقي من ذكائه راح جايب كحول عشان يعنى زى ما بتعملوا بعد الحلاقة بدل الكولونيا يعنى

ووابص الاقي المريض صوت

لم علينا امة لا اله الا الله والناس اتلمت ومين اللى دبح العيان .

والواد اختفي واختكم بقي اللى اتبهدلت .......وقالولى ممنوعة من ممارسة الحلاقة وارسلونى لاخذ كورس

فى فن الحلاقة .

فيا ريت بقي يا عم موديست انت وس س تنورونى وتعلمونى اصول الصنعة .....عشان متسقبل اختكم المهنى

مينهرش بسبب شعر ولا دقن ...... wst::

[~Heba~]

طبعا مش بافهم فى اصول الحلاقة اقصد الاتجاهات يعنى .....انا بقي اكتشفت انى باحلق الشعر

مع اول طبقة من الجلد :rolleyes: .

قولتله والنبي انت راجل وتعرف تحلق الدقن لانى اخاف اشيله اول طبقة من الجلد

wst:: :wub: :cry:

يخرب عقلك يا بدرية....و الله ضحكت من قلبى....

ازاى مع اول طبقة من الجلد ....

[Alshiekh]

مع اول طبقة من الجلد :rolleyes: .

قولتله والنبي انت راجل وتعرف تحلق الدقن لانى اخاف اشيله اول طبقة من الجلد

:lol: :wub:

يخرب عقلك يا بدرية....و الله ضحكت من قلبى....

ازاى مع اول طبقة من الجلد ....

دى تبقى عملية سلخ مش حلاقة :wub:

[الباشمهندس ياسر]

العيد داخل علينا

قلت ارفع كام موضوع من بتوع الضحكة الصافية

يمكن اخد فيناااااا ثواب

بدل المواضيع بتاعة السياسة و وجع القلب

[ام بلال]

الاخوة الاشقاء س س .......والجنرال موديست .......استمتعت جدا باختراعكتم وحبيت اشارككم بخبرتى

فى عالم الحلاقة ............. :)

عندنا من ضمن تحضير المريض للعمليات سواء للرأس او فى اى مكان مشعر لازم نحلق الشعر وطبعا مافيش

حلاق متخصص فى المستشفى كله اجتهاد ذاتى ...........

احيانا فى الطواريء تضطر انك تحلق ع السريع وعشان مافيش وقت والمريض لازم يدخل العمليات بسرعه .

اقووم انا بقي ايه لسه هاستنى حد يحلق للزبون والكل فوق دماغى يلا يلا يلا يلا .

اروح جايبة بتاع 10 ماكيانات حلاقة واحلق للمريض .

طبعا مش بافهم فى اصول الحلاقة اقصد الاتجاهات يعنى .....انا بقي اكتشفت انى باحلق الشعر

مع اول طبقة من الجلد .

ومرة تانية ......مريض كان مطول عندنا وكان فاقد الوعى فيوم ما فاق وفصلاناه من على جهاز التنفس

الصناعى ......طقت ف دماغه يشوف نفسه فى المراية طبعا رأفة به قولنا نحلقله الاول عشان ميتفزعش

من شكلة وممكن يفصل تانى وتظل اخر وش شافة هو ذاكرته .

كان معانا ولد بيساعدنا فى احضار الحاجات اللى بنحتاجها سواء من الصيدلة او المعمل او بنك الدم .

قولتله والنبي انت راجل وتعرف تحلق الدقن لانى اخاف اشيله اول طبقة من الجلد

ممكن تحلقله قالى ماشي انت تئمرى يا ميس .

تركت غرفه المريض 10 دقايق والله العظيم رجعت لاقيت وش العيان كله مليان دم كانك بالظبط جايب جردل

دم ومحميه به ومكنتش عارفه اضحك ولا اصوت ولا اعمل ايه الراجل وشه اتشلفط بجد كأنه طالع من خناقة .

المهم دا بقي من ذكائه راح جايب كحول عشان يعنى زى ما بتعملوا بعد الحلاقة بدل الكولونيا يعنى

ووابص الاقي المريض صوت

لم علينا امة لا اله الا الله والناس اتلمت ومين اللى دبح العيان .

والواد اختفي واختكم بقي اللى اتبهدلت .......وقالولى ممنوعة من ممارسة الحلاقة وارسلونى لاخذ كورس

فى فن الحلاقة .

فيا ريت بقي يا عم موديست انت وس س تنورونى وتعلمونى اصول الصنعة .....عشان متسقبل اختكم المهنى

مينهرش بسبب شعر ولا دقن ......

أضحك الله دنيا و آخرة ، لقد مت من الضحك من قصتك