عقد مهندس زراعى -- قرب واتفرج

[capitshino]

ايه رائيكم فى العقد ده

1- المرتب 1200 ريال شاملة كل حاجة عدا الاقامة - الاقامة فى المزرعة وهى منطقة جبلية طبعا

2- العقد لمدة سنتين

3- سيتم دفع مبلغ 7000 ريال للفيزا + 1000 للاقامة + 1000 رخصة (بلطجة)

4-مواعيد الدوام من بعد صلاة الفجر حتى الظهر ومن الساعة 2 الى المغرب

5- السفر على حساب المهندس

6-فى حالة غياب الكفيل يقوم المهندس بتوصل الاولاد للمدارس و شراء احتياجات البيت

7-المهندس مسئؤل مسئولية كاملة عن كل ما تحتوية المزرعة

8- النوم مبكر والاستيقاظ الفجر (هو مال ام الكفيل ينام بدرى ولا لا)

9-عدم الجلوس فى السكن الموجود فى المزرعة مع العلم ان مافيش مكتب بديل

10- مسئول مسئوية كاملة عن اى خطا بالمزرعة - يعنى لو اى مشكلة لا قدر الله يضيع المهندس

11- فىمكافاءة 1200 ريال عن كل سنة اذا اتم العقد

12- فى مكافاءة 5% فى حالة زيادة الانتاج (طبعا مش مكتوب 5 % من ايه وايه هى الزيادة اصلا)

13- توصيل الخضار للسوق

14- مسئول عن قيادة الحراثة وتغير زيتها كل 50 ساعة

15- اى مخالفة مرور المهندس هيتحملها مع العلم ان سيخرج كثيرا لتلبية احتباجات العمل

طبعا انا مش باهزر والموضوع ده بجد .. ممكن اخ فاضل او اخت فاضلة يتكرم او تتكرم ويقول لنا احنا ايه اللى حصل لنا .. وليه نرضى بحاجة زى كده

[se_ Elsyed]

ولا حصل لنا حاجه

الموضوع عرض وطلب ...

وكل صاحب عمل بيبقى نفسه ومثنى علينه يشغل الموظفين ببلاش

واللي يقبل بعرض زي ده او ربع شروطه حتى وهو مهندس ... يبقى يستاهل اللي يجرى له واكتر

[HDarwish]

لا حول ولا قوة إلا بالله العلي العظيم

مش ها قول غير حسبي الله وهو نعم الوكيل

أنا في ذهول تام وأنا بقرأ العرض الزفت ده

مهندس زراعي ده ؟؟ ده ما حصلشي بياع برسيم (لامؤاخذة)

أخ كابتشينو ..

مش معقولة يكون فيه بني آدم يقبل بعرض زي كده إلا إذا كان .... هاقول إيه وأوصفه إزاي إذا حد قبل بكده يستاهل الضرب بالرصاص في ميدان عام ..

مع إن والله العظيم يا جماعة اللي يشفنا واحنا بنتبهدل في الدراسة في كلية الزراعة نصعب عليه قوي ولا الوعود اللي كنت بنتوعد بيها أول ما دخلنا الكلية .. مستقبل إيه .. ولا كإنك هتبقى الخبير الذري

شفنا ايام ما يعلم بيها إلا ربنا .. يبقى أنا واقف في معمل الكيمياء ولا معمل الوراثة بالسبع ساعات عمال أشم في ريحة H 2 S وطبعا اللي عارف في الكيميا يعرف الريحة دي كويس قوي ولا ريحة النشادر .. ولا حتى أكون واقف بشرح صراصير وضفادع وفي المقابل ألاقي زمايلي في كلية التجارة شايفهم قدام عيني قاعدين مروقين دماغهم اللي بياكل برجر واللي واقف مع فلانة وعلانة وقشطة يعني .. عجبت لك يا زمن

أنا أول ما سافرت إتعرض عليا عرض زي كده بس طبعا رفضت ..

وللأسف أنا شفت بعيني مهندس زراعي كان زميل ليا في الجامعة وعلى ما اتذكر كان مجتهد جدا وكان دايما تقديراته أقل حاجة جيد جدا وفي مرة من المرات وأنا ماشي في مول من المولات .. تخيلوا لقيته شغال إيه والله ما هتصدقوا .. واقف على الباب وماسك كروت يانصيب جرب حظك يابيه ... جربي حظك يا هانم .. صدقوني هتكسبوا ومش هتندموا ..

أنا من شفته صعقت إيه ده ؟؟؟ الدنيا جرى فيها إيه كنت عايز أجري عليه واضمه وأخد بإيده بس رجعت في كلامي وقلت بلاش علشان ما يزعلش وكنت عارف إن أي كلمة أقولها حلوة أو وحشة مش هتغير حاجة .. واكتفيت بس بكتمان الألم والحسرة

بس أنا لسه على عهدي .. إنشاء الله هاثبت للناس كلها إن المهندس الزراعي له مكانة كبيرة ومحدش يقدر ينظر له غير نظرة تقدير واحترام .. وزي ما المهندس المدني ولا المعماري بيبني للناس بيوت ومباني الناس تسكن فيها كمان المهندس الزراعي بيزرع للناس الزرع والخير اللي الناس ما تقدرشي تستغنى عنه

كل تقديري واحترامي لكل المهندسين الزراعيين

[هانى زكريا احمد]

أيه الجمال ده ياكبيتشينوا والله يامحترم الكلام ده صحيح

وفيه واحد أعرفه فى الجوف شغال على نفس الوتيره بنسبة 70%

علشان كده أنا هتجنن

ياريت صوتنا يوصل للناس كلها علشان ننقذ ما يمكن أنقاذه من كرامتنا

بس أنا بعذر الناس ده لأنه فى مصر مابيلاقيش حاجه خالص

وللزياده محاسب لسه جاى جديد

وعقده على 1300 ريال مع توفير المسكن

لكن الأنتقالات عليه وعايش فى مخزن وهو أمين المخزن ده كعهده

وعقده 3 سنوات وممنوع ينزل أجازه الا فى نهاية العقد

ومصاريف الأقامه عليه والرخصه عليه

المشكله أن تم أختياره من 75 واحد موافقين على العرض ده

تخيل

[shofa2003]

زي ما قال سي السيد المسالة عرض وطلب. ورغم ان الشروط مجحفة جدا جدا يجب ان نلتمس العذر لكل من يقبل بها لان في النهايه كل واحد ادرى بظروفه.

[أسد]

أعتقد أن هناك مثل تلك العروض بالفعل ..

وفيه ناس بتقبل بمثل تلكالعروض ..

هذه حقيقة ..

ولكنها حقيقة مرة ..

بالتأكيد من يقبل بمثل تلك العروض فهو يعيش حياة صعبة في مصر .. وبدون أي دخل ..

وبالتالي .. إذ عاش مثل تكل الحياة الصعبة .. أيضاً .. ولكنها براتب ثابت .. لو ادخر ربعه قد ينقذ أسرته ويرفعهم إلى حدود الفقر .. لأنهم قد يكونو فيما دونه بكثير ..

إذا قلنا أن 61% من سكان أسيوط يعيشون على أقل من دولارين في اليوم .. و22% من سكانها يعيشون على أقل من دولار في اليوم ...

فأي واحد من هؤلاء .. يعتبر مثل هذا العرض باب المغارة فتح له ..

يمكننا النظر في الأمور نظرة بانورامية وليست إنتقائية .. حتى نرى الصورة متكاملة ..

بالفعل هناك أناس في مصر .. فقراء جداً جداً جداً .. أو أنهم يحتاجون بعض الوقت ليتم ترقيتهم لمرتبة الفقراء ..

ومثل تلك العروض .. يتنافس الكثير عليها ... برغم أننا ومن وراء شاشات الكمبيوتر .. قد نراها عروض مجحفة .. وفظيعة ..

هل تدرون ياسادة أن ثمن الكمبيوتر الذي تقرأ من على شاشته هذا الكلام .. قد ينقذ أسرة بالكامل من فقر مدقع .. أو قد يكون حلماً لشاب أو لسيدة فقيرة في مصر ..

ياريت نتعلم نشعر بأوجاع وآلام الآخرين ... حتى نستطيع أن نساهم في حل مشكلاتهم ..

ولا نزيد من شعورهم بالمهانة ..

فمن يقبل عرض مثل هذا .. بل ويتنافس عليه .. بالتأكيد ظروفه صعبة .. ومن قبل أن يعيش في مزرعة أو في قرية بالسعودية . قد يكون ساكن في مقبرة أو عشة في مصر .. وقد تكون الحياة في المزرعة الجنة ونعيمها بالنسبة له ..

نعيب على الحكومة ووزرائها أنهم يتحدثون من أبراجهم العاجية ..

ونحن نسكن في أبراج أحصن منها ..

[capitshino]

اوجعتنا يا اخ اسد بمداخلتك ... ودائما الحقيقة مره

[مصري أصيل]

[quote name='أسد' date='Jun 4 2008, 08:22 AM' post='365368'

بالتأكيد من يقبل بمثل تلك العروض فهو يعيش حياة صعبة في مصر .. وبدون أي دخل ..

وبالتالي .. إذ عاش مثل تكل الحياة الصعبة .. أيضاً .. ولكنها براتب ثابت .. لو ادخر ربعه قد ينقذ أسرته ويرفعهم إلى حدود الفقر .. لأنهم قد يكونو فيما دونه بكثير ..

تحية لصاحب الموضوع و لرأي الأستاذ أسد المحترم .

هذا هو الواقع للأسف هناك من يقبل بأقل من هذا لظروفه القاسية داخل مصر و أعرف بعضهم هنا داخل الكويت و ليس فقط السعودية فقد تقابلت يوماً مع محاسب راتبه 100 دينار أي ما يعادل تقريباً 1300 ريال و كان من فرط سعادته بما يتقاضي من راتب ينظم الشعر في الشركة التي يعمل بها . وعندما سأله أحدنا هل تقول الشعر في الشركة وكل الراتب الذي تتقاضاه 100 دينار ؟؟

قال بالحرف الواحد ... أنتم لا تعلمون ماذا فعل هذا المبلغ بي وبعائلتي .. لقد نقلنا نقله لم نكن لنحلم بها يوماً من الأيام .

و أعرف مهندس زراعي هنا يعمل بمطعم و حاولت مساعدته بأيجاد عمل مناسب له و لكني لم أوفق و مشكلة المهندسين الزراعيين أن فرص العمل بالخليج لهم محدوده جداً مما يضطرهم في بعض الأحيان للعمل في أي شيء .

و أنا مع الفاضل أسد بألتماس العزر لهؤلاء الناس الذين يقبلون بمرتبات متواضعه مع أنه و للأسف الشديد يأثرون تأثير سلبي جداً في صورة المصريين العاملين في الخليج عموماً .

هناك من الناس من يتعامل مع هذا الموضوع بذكاء في حالة حصولة علي فيزا مجانية براتب ضعيف و هو أن يقوم بتوفير بعض المال و هذا المال بالتأكيد لم يكن ليستطيع الحصول عليه في مصر ثم بعد ذلك يبدأ بالبحث عن فيزا حرة يأتي بها ليبحث عن عمل أفضل مما كان فيه

[محمد عبدالعزيز]

طيب ليه يا جماعة يا مغتربين ماتعملوش زى الجاليات التانية وتعملوا تجمعات -ياريت تكون رسمية طبعاً- يكون هدفها ضمان حد أدنى لمستوى العاملين المصريين فى الدول اللى بتشتغلوا فيها؟

أنا عارف إنه طلب قد يكون حلم, بس مش مشكلة نحلم ونحاول يمكن نقدر ننفذ.

[أسد]

طيب ليه يا جماعة يا مغتربين ماتعملوش زى الجاليات التانية وتعملوا تجمعات -ياريت تكون رسمية طبعاً- يكون هدفها ضمان حد أدنى لمستوى العاملين المصريين فى الدول اللى بتشتغلوا فيها؟

أنا عارف إنه طلب قد يكون حلم, بس مش مشكلة نحلم ونحاول يمكن نقدر ننفذ.

هذا طبعاً غير ممكن ..

حتى لو تم تكوين جماعات .. فليس ممكنناً لهم أن يضمنوا حد أدنى من الرواتب ..

أو يضغطوا على أي أحد لضمان حد أدنى من الرواتب ..

ولكن يمكن للدولة أن تضع رواتب وحد أدنى للرواتب ...

ولكن لا تنسوا .. أن هناك شعوباً أقل منا مستوى .. وقد يكون منهم أكثر منا علماً .. كالهند

وإذا كنت خارج مصر .. فالمنافسة تأتيك من كل حدب وصوب ..

[HDarwish]

الإخوة الأعزاء

مع احترامي وتقديري لجميع هذه المشاركات والتأييد لرأي هو أن مثل هذه الفرصة يعتبرها البعض إنقاذ لعائلة أو أسرة كانت في صدد الضياع من شدة الفقر

إلا أن هناك وجه آخر للعملة وهو أن البعض يرى المجهول كما يتمناه وعلى حسب هواه فقط ولا ينظر له بصورة واقعية أو من خلال تجارب من سبقوه والذين مهما حاولوا إقناعه بشتى الطرق إلا أنه في النهاية يريد التجربة

أعرف بعض زملائي مهندسين زراعيين حديثي التخرج عملوا في شركات زراعية محترمة جدا في مصر وبمرتبات معقولة .. يعنى على سبيل المثال صديق لي يريد السفر والمجيء إلى الكويت على وظيفة مهندس زراعي حتى لو ب 100 أو 120 دينار وبسؤالي له راتبك كام في مصر يقول لي أنه ألف جنيه ومع بعض الحوافز يصل إلى ألف ومائتان وخمسين جنيه طبعا وبرغم محاولاتي لإقناعه أنه في هذا الوضع أفضل مني ومن غيري إلا أنه مصمم على رأيه لأنه بحسباته هو يقول يعني هاصرف كام خمسين دينار سبعين دينار وأحوش الباقي يعني أحوش ألف جنيه أو أكثر

أنا مش ضد السفر أو التجربة لكن من غير مغامرة وزي ما نصحني ناس كثير برضه قبل كده وقالوا إن الغربة ليها ثمن وثمنها غالي قوي .. ساعتها أنا ما كنتش فاهم النصيحة دي لكن لما اتغربت فهمتها كويس .. ثمن الغربة دي هوه بعدك عن أهلك عن مرمطك في بلاد الله .. عن إنك ما تقدرشي تقول لأ وتطالب بحقوقك لإن ساعتها هيقولك مع السلامة في غيرك ألف فتضطر تطاطي وتمشي حالك يا جماعة الثمن ده لو ما تحققش يبقى إنت كده بتخسر وغربتك خسرانة

إيه المشكلة إنك تصبر لما يجيلك عرض كويس .. يعني في شركتنا مثلا شفت بعيني لما كنت شغال في ال Human Resource إن الناس بتيجي على راتب ممتاز مع تذاكر طيران مع توفير سكن وتأمين صحي وبدالات غيرها كثير جدا ..

الناس دايما بتشوف المجهول أحسن من الواقع وعمرهم ما بيشوفوا العكس

[محمد عبدالعزيز]

متفق معاك يا أستاذ أسد إن الحكومة هى اللى تقدر تحدد الرواتب

بس أنا ملاحظ إنكم متضايقين من الصورة والسمعة السيئة اللى بيتسبب فيها الناس الفقرا من مصر لما بيقبلوا بأوضاع مهينة فى دول الخليج.

فكل اللى بقوله يعنى المتضرر يعمل حاجة تزيل الضرر ده.

يساعد مثلاً فى التفاوض مع جهة العمل بإعطاء معلومات وتوجيهات بخصوص التعاقد والمرتب والسكن وماشابه, بس ده يكون لكل واحد طالب المساعدة مش تكون بصورة عامة.

يضغط مثلاً على السفارة والدولة إنها تقوم بدورها فى هذا الشأن.

تحويلات المغتربين بتساهم بشكل كبير فى ميزانية الدولة.

[capitshino]

السلام عليكم

طبعا موضوع الجاليات او التجمعات ده صعب شوية هنا. مش عارف انه توصل لدرجة المستحيل ولا لا

يا ريت الاخوة هنا يقولو رائيهم - لان ممكن ينفخو التجمع .

بالنسبة للعقود انا مش عارف ان كان الرضى بيرجعنا اكتر للخلف ولا ان يكون حد محتاج يرضى بالعرض

انا فى حيرة حقيقى

[مصري أصيل]

هنا في الكويت من ضمن إجراءات أنهاء الفيزا توثيق عقد العمل من السفارة المصرية .

و من ضمن إجراءات السفارة المصرية أن يقوم المستشار العمالي بالتوقيع علي العقد .

و طبعاً سيادة المستشار العمالي لما بيروحله شخص لتوثيق العقد لأي سبب من الأسباب لما يشوف عقد فيه إجحاف كل اللي بيعمله يبص للشخص ده و يقوله أيه اللي يخليك تقبل بعقد زي ده ... و بعدها بيوقع زي الشاطر ولا كأن فيه حاجه.

طيب ليه ما يكونش من صلاحيات المستشار العمالي رفض التوقيع علي أي عقد عمل فيه إجحاف لصاحبة و رفض التوقيع حتي يتم تعديل الراتب أو بنود العقد ؟. يا ريت لو حد عنده أجابة علي السؤال ده يتفضل بها .

[capitshino]

لان تلاقى عقد المستشار العمالي هتلاقية ازبل من - فالحال من بعضه-

مش برده ضربو دبلوماسى مصرى فى الكويت بالجزمة (لا مؤغزة) ولا انا غلطان

يا اخى احنا بقينا عالة عالمجتمع والبركة فى ال ......

[se_ Elsyed]

ما نرميش الناس في النار ونجوعهم ونقول لهم بتقبلوا بالمرار والذل ليه ؟

أيوه في فقراء وفي ناس كتير في مصر تحت خط الفقر ومنهم مؤهلات عُليا وقد تكون مشكلتهم إنهم ما بيطوروش نفسهم او بيحاولوا ويسعوا ويدوروا على فرص عمل جيده .. لكن مش هي دي القضية الأن

قضيتنا هنا هو عدم وجود دولة قوية تحميهم

الدولة اللي سايبانا نواجه المجهول من كل حدب وصوب لوحدنا ...

وإن شا الله لو إتعرض على الشخص دولار واحد كأجر شهري .. ولا بتحرك ساكناً

في حين إن جلدهم بقى أتخن من جلد الخرتيت اللي ما بيحسش .. وبيقرأوا وبيشوفوا واحده ست وزنها 40 ك ج .. على الميزان بتاع اللحمه .... لكن في رجولتها ومبادءها تزن 100 منهم

فحينما وجدت إن الشغالات - الخادمات بالعربي وعلى بلاطة كده - في السعودية بالذات بيتطحنوا وبيشتغلوا 24 ساعة في اليوم وفي اخر الشهر بياخدوا 400 ريال او 600 ريال .. أصدرت قرار رجولي وتحدت فيه الحكومة السعودية حتى الان وحددت الراتب الادنى للشغالة الفلبينية 1200 ريال قبل ما تخرج من بيتها في الفلبين .. ولابد ان يذهب الشخص السعودي بنفسه إلى السفارة الفلبينية وياخدوا عليه كمية تعهدات تخليه يشيل الشغالة دي فوق راسه

وأقسم بالله .. إن الشغالة دي اول ما بترفع السماعة وتكلم السفارة .. في خلال دقائق بتلاقي كمية عربيات وموظفين فلبينين دوبلوماسيين يحلوا مشاكلها ...

اما دولتنا ... فخليها على الله .. عايزين اللي يحموهم

[Mohamed Khalaf]

والله يا باشا قلبت علينا المواجع

[زعلان]

العرض اكثر من رائع بس هما محددوش في العقد اذا الجارا اتعطل هو الي حيجر المحراث ولا حيدفعوه فلوس علشان يشتري محراث جديد

[somayasaleh]

طبعا كلام الاخوة الافاضل كله سليم.....

اولا العرض لا يمكن قبوله تحت اي ظرف من الظروف....

ببساطة كده لانه فيه مهانة شديدة للمهندس الزراعي.....

لو كان علي المرتب الضعيف فقط ... كانت هانت.... بس الباقي اذلال بمعني الكلمة....

واللي يقبل بكده تحت اي مسمي او حاجة او عذر ... ملهوش اي حق في الشكوي والتذمر

وطبعا... البركة في سفارتنا الحبيبة اللي مرخصانا امام الدول الاخري.....

مهما كانت الاعذار والحجج والحاجة التي تدفع الشباب لقبول مثل هذا العرض الغير لائق انسانيا......

لا يجب علي شبابنا الانسياق وراء هذه العروض

واقول ايه .... حسبي الله ونعم الوكيل ...... علي اصحاب هذه الاعمال التي يذلوا بها البشر لمجرد ان الله اغناهم من فضله :unsure:

[capitshino]

حد عنده اضافات او امثلة ؟