السلام عليكم ياللى فى السعوديه

[Dr.mmfriend]

السلام عليكم ورحمة الله

كان فيه استفسار من الاخوة ارجو الرد عليه

دلوقتى انا تعاقدت مع مكتب العمل السعودي في القاهرة واخدت عقد طبيب مقيم طب اسرة

وطلعت التاشيرة خلاص بس لسه لم اسافر بعد

العقد كالتالى

4400 اساسي

400 انتقالات

راتب 3 شهور بدل سكن

لحد هنا والامور معقوله

لكن العقد غير محدد مكان

يعني من هنا مثلا بيقول انت رايح جزان او عسير او الحوف او اى منطقه

وهنا بقي يرموك في اى وحده صحيه مقطوعه

زمايلي اللى سبقونى اترموا فى وحده في بلد محايل تبع عسير

ويريت في محايل نفسها

دى فى قريه اسمها ختارش تبعد عنها 25 كيلو

وانا بصراحه متررد سافر ولا لا؟

يريت تفيدونى باراءكم السديده

مع العلم انا طبيب لسه متخرج خبرة سنتين ومعايا دورة طب الاسرة الغبيه بتاعه السعوديه دى والجزء الاو ل من ماجستير طب الاسرة

وهل لو لم اسافر سيكون هناك عواقب ؟

هل هتمنع من التعاقد تانى مع اى عقد سعودي؟؟

ولفترة اد ايه؟؟

ولو حبيب اكنسل اعمل ايه؟؟

وهل هحتاج ورق عدم الممانعه اللى بنسمع عليه ده ولا لا؟؟

ارجو الاهتمام والرد

والسلام عليكم ورحمة الله وبركاته

[se_ Elsyed]

والله يا دكتور من الناحية القانونية من حق الشركة أو المستشفى أو الجهة اللي غنت شغال معها تشغلك في أي حته .. ما لم يكن الشغل ده في ضرر لك

يعني على سبيل المثال

واحد عنده 4 أطفال وأولاده في مدارس بتتكلف جامد وفي الرياض مثلاً .. وجت الشركة فجأة في منتصف العام الدراسي وعايزه تنقله عرعر ولا المناطق المحدوفة اللي الواحد بيسمع عنها دي ... فكده الموظف هايتضرر ومن حقه يرفض النقل ..

لكن بما إنك في الأول فأعتقد من حقهم يودوك أي حته ... وغالباً بتكون في مناطق إسمها " هِجره " والهجره دي بتبقى قرى و مناطق في الصحراء مقطوعة وتلاقي القرية كلها 1000 شخص بعيال برجاله بحريم بكله ... والمدرسين أو الأطباء والكل كليله بيرفض يشتغل هناك ...

أما أهل المدن فهما اللي بياخدوا الدلع والحب كله وبتبقى في وسط الونس ....

نيجي لموضوعك الأساسي بتاع التأشيرة اللي اخدتها وعايز تكنسلها ...

الحالة الواقعية اللي شفتها قدامي .. هي لموظف سيرلانكي أرسلنا له تأشيرة زيارة ... ولم ياخذ التأشيرة على جواز سفره ... وعلى ما وصلت تأشيرة الزيارة لبلده قدرنا نتصرف له في تاشيرة عمل .. وبعثنا الأوراق كاملة ... وتم رفضها ... سألنا ليه يا جدعان ؟ قالوا عشان عنده تأشيرة زيارة بإسمه لازم تتلغي الأول بشكل رسمي .. وفعلاً مشينا في الإجراءات وتم إلغاء التأشيرة ..

لكن أعطيني وقت اسأل لك عن الحل الأمثل

ولو إن مبدئياً هايكون في تغيير جواز سفرك نفسه ...

[Dr.mmfriend]

شكرا الف شكر يا باشا

الله يكرمك

دلوقتى انا قدامى شركه سفريات بعرض اخرى

العرض بتاعهم يقبل القبول او الرفض لسه

هيبقي فيه انترفيو واما انجح او لا

بفكر اعمل باسبور تانى بدل فاقد

واسيب واحد في مكتب العمل

واخلى واحد معايا

لقيت عقد مناسب بسرعه

اكنسل الاولانى واشتغل بالتانى

مفيش يبقي خليني في التانى اللى في مكتب العمل

ينفع كده؟؟

وياريت اعرف ايه هيا اجاراءات الغاء التاشيره

السؤال ده مهم جدا

لانى بفكر اروح لشركه السفريات اقولهم انى لغيت التاشيرة بالفعل

علشان اضمن مكان هنا وهناك في نفس الوقت

ولا ايه؟؟

هل فيه ورف معين او اجراءات؟؟

واسف للاطاله

وجزاكم الله خيرا

[Dr.mmfriend]

حد يعبرنا يا اخوانا

الوقت بيمر وعاوز اكلم الراجل اقوله انى كنسلت التاشيرة

بس خايف يسالنى كنسلتها ازاى او ادوك ورقه كذا او كذا معرفش ارد

حد يعبرنا

[se_ Elsyed]

يا عم أصبر على رزقك ..

والله كلمت الناس في مصر وهايردوا عليه ... بس الصبر شويه

[Dr.mmfriend]

الله يكرمك ويخليك

معلهش تاعبكم معايا

بس ده العشم برضه

الواحد مبقاش عنده صبر

نعمل ايه بقي

شكرا يا باشا

[أسد]

شوف ياسيدي

لو لغيت التأشيرة حتتحط في قائمة سوداء في السفارة

ومش حتعرف تاخد تأشيرة تانية ..

حتضطر تغير الجواز .. والقصة المعروفة دي ..

ثانياً ..

إنت إتعاقدت مع مين بالضبط

وزارة الصحة ..

ولا شركة تشغيل

ولو شركة تشغيل ياريت تقولنا اسمها يمكن نعرف عنها حاجة ..

لو زارة الصحة أو شركة تشغيل .. غالباً مش حتكون في مدينة .. وغالباً حتكون في قرية ..

لو انت من القاهرة أو من مدينة كبيرة وتكره أن تعيش في الريف أو في المدن الصغيرة .. حيكون صعب عليك ..

لو حتشتغل في مستشفى . معندكش مشكلة كبيرة لأن المستشفيات عندهم مجمعات سكنية معقولة .. حتكون في وسط زملاء لك من جنسيات مختلفة .. مش حتزهق قوي ..

لو حتشتغل في وحدة صحية .. ساعتها ممكن تلاقي نفسك في قرية .. مفيش فيها حد تكلمه ..

وممكن تشتغل في مكان كويس جداً .. طبعاً ..

[Dr.mmfriend]

شكرا يا استاذ اسد

انا متعاقد مع وزارة الصحه السعوديه مباشرة عن طريق مكتب العمل

مفيش اى وسيط فى النص

و99% رايح مناطق نائيه

دلوقتى انا قدامى فرصه عقد تانى وبفكر اكنسل التاشيرة زى ما قلت

لكن خايف اكنسل التاشيرة معرفش الاقى العقد التانى

فانا عاوز امشي في الاتنين مع بعض

وكنت عاوز اعرف التاشيرة بتتلغى ازاى علشان اكلم الراجل صاحب الشركه اللى فيها العقد الجديد اقوله انى لغيتها خلاص

وهو قالى الغيها وغير الجواز وبعدين تعالى نشوفلك عقد كويس

هو موضوع تغيير الجواز صعب اوى كده؟؟؟

مش هيطلع في يوميها ولا ايه؟؟

مش بروح اعمل بدل فاقد برضه؟؟

قلقتنى

[se_ Elsyed]

جئتك من سبأ بنبأ عظيم

الناس ردوا في كلمتين ...

1- تتقدم للمكتب اللي خلص لك التأشيرة وتطلب منه إلغاء التأشيرة لظروف خاصة تمنعك من السفر .

2- تروح تطلع جواز جديد ...

ومش عارف إنت لسه معاك الجواز القديم اللي شبه شكارة الأسمنت ؟ لإن لو معاك يبقى التغيير سهل

أما لو معاك الجواز الجديد المحندق الزيتي ده ... يبقى صعي يا حلو لإنه مربوط بالرقم القومي وممكن يهرشوا العملية ....

[أسد]

لو انت محتاج للسفر قوي ..

جرب لك سنة أو سنتين استجمام ..

ممكن تكون في مكان لا بأس به .. ومعك زملاء كويسين ..

وحتشوف حالات مش كتير قوي ...

ولو في مستشفى حتتعلم كويس .. خصوصا ً إنه في السعودية فيه تجهيزات كتير كويسة وعالية المستوى ..

ولكن بما أن تخصصك طب أسرة ..

فغالباً حتكون في مركز رعاية أولية ....

وهنا لن تكون سعيداً أو حتى راضياً .. كما ينبغي ...

على كل ..

إستخير .. وقرر ..

وهناك نقطة أخرى ..

تخصص طب الأسرة .. فرص العمل في السعودية .. أغلبها في هذا النطاق ...

يعني .. الفرص التي في مستوصف .. داخل مدينة كبيرة . أو مستشفى خاص .. ستكون أقل بكثير .. وتكونفرص الحصول على وظيفة أقل .. لأن كل فرصة في قطاع خاص يقابلها عشر فرص في القطاع الحكومي ..

أنا أتحدث عن تخصصك بالخصوص .. طب الأسرة ..

عليك أيضاً الأخذ في الإعتبار ملاحظة أخوك سي السيد بخصوص الجواز .. قديم ولا جديد ..

يعني لو قديم .. سهل إنك تطلع جواز جديد .

لو جديد . حيكون صعب جداً إنك تطلع جواز بدلاً منه

أتمنى لك التوفيق من كل قلبي

إستخر ... ثم قرر

[مسالم]

السلام عليكم ..

لا اجد ما اضيفه على رد كل من الاستاذين أسد و س س .. ولكن بالنسبة بالنسبة الى شكارة الاسمنت .. قصدي الباسبور القديم إذا كنت تريد تغييره .. فكل ما اعرفه انه يمكنك تقديمه للجوازات مع ملئ استماره تجديد او بدل تالف على ما اذكر (ولا تدخل في متاهة بدل فاقد مع المخابرات ومباحث امن الدوله) .. ويجب ان تختار اسم عائله جديد من بين الاسم الرباعي .. غير الذي اخترته سابقاً .. هكذا كنت افعل في الماضي عند تغيير الجواز .. (قصدي الباسبور).

وفي كل الاحوال حاول تكون قانوني في ترتيب اوراقك .. وفقك الله

[Dr.mmfriend]

السلام عليكم

شكرا لحضراتكم جميعا بجد بجد افادتونى

الاستاذ الفاضل سي السيد

جزاكم الله خيرا

انا معايا الجواز القديم

وهو حاليا مش معايا ولكنه موجود في مكتب التوظيف

اصروا يتحفظوا عليه لحد ميعاد السفر

وانا معنديش اى فكره ازاى اغيره ؟؟

هل هيطلع برقم جديد؟؟

ولا باسم كمان جديد؟؟

وانا مضطر اغير الاسم الرباعى

؟؟

استاذ اسد شكرا لحضرتك

بس تخصص طب الاسرة موجود فى كل مكان

موجود فى المستشفيات العسكريه ووزارات الدفاع والحاجات النضيفه دى

وموجود برضه في المستشفيات العامه

انما فعلا زى ماحضرتك قلت موجود في مركز الرعايه الاوليه بصوره مكثفه

وانا صاحب المكتب التانى بيكلمنى على اساس فرصه موجوده في مستشفيات الحرس الوطنى

مقيم طب اسرة

استاذ مسالم شكرا جزيلا لرد حضرتك

وياريت تفيدونى ازاى اغير الجواز ؟؟

بدل فاقد ولا بدل تالف ولا اقدم طلب تغيير؟؟

والاسم وضعه ايه فى الحركه دى؟؟

وازاى السعوديين بيقفشوا الحركات دى؟

معلهش استحملونى اصل انا اول مره اسافر وخايف تحصل غلطه فى الموضوع ده

ولا ندم من استشار

اخوكم الصغير برضه استحملونى

والسلام عليكم ورحمه الله

[قائد المدفعيه الهولنديه]

بص يا دكتور انت كلمت الاساتذه الكبار و هما جابو اخر الكلام بس انا ليا وجهه نظر اطلع جرب حظك و شوف الموضوع حلو ولا مقلب و خصوصا لو انت مش متجوز و لو متجوز اطلع لوحدك ظبط حالك الاول و لو العمليه ماشيه معاك اعمل استقدام و لو لا قدر الله مش ماشيه ارجع مصر نهائى و غير على عقد جديد كده كده انت مش خسران و اهو اسمك اكتسبت خبره العمل فى المملكه او فى الخليج عموما و ده هيفيدك بعد كده فى اى مقابله تانى....

يا عينى على حظى و حظ كل المهندسيين غالبا بنترمى فى حتت مقطوعه ..... بس فى الاخر الحمد لله و ماشيه اخر تمام انت كمان قول الحمد لله انك مش مهندس.

و ربنا يصلح لك الحال ان شاء الله

[Dr.mmfriend]

السلام عليكم

استاذ قائد المدفعيه الهولنديه

اسعد الله صباحك

لا انا مش متجوز ولا مرتبط ولا اى حاجه

عندك عروسه ليا ولا حاجه؟؟؟

ههههههههههه

موضوع اسافر اجرب ولا لا ده هفكر فيه لو الراجل اللى جايبلي العقد الافضل لم يتصل خلال اسبوع كمان

يعني الواحد ميسيبش عقد افضل علشان يجرب

محدش برضه قال ازاى اغير الباسبور القديم؟؟؟

وهل هضطر اغير اسم العائله ولا ايه؟؟؟

الموضوع يفرق جدا لان كل شهادات التخرج بتاعتى والحاجات دى فيها اسم العائله

اسف لازعاج حضراتكم

وشكرا ليكم جميعا