مصر فى كأس العالم

[حسام يوسف]

ياعم سكوب

لا حد يفهم دالى دى غلط

أو يكون مش عارفة

أو يكون مش عارف المقصود بالاسم اية

ويفتكر ان دة اسم ال pet

بتاعك

وبالنسبة لكلام سين سين

القرعة هتقسم الدول العشرين لمستويات اربعة

أتمنى نتصنف أول

لأن فية احتمال يا سين سين منتصنفش أول

التصنيف هيعتمد على شوية عوامل

تاريخ مشاركات الدول فى كؤوس العالم السابقة ان وجد(ودى غير كؤوس الطلا)

تاريخ النتايج فى كؤوس أمم افريقيا الخمسة أو التلاتة السابقة مش متأكد

خد بقى اللى جاية دى يا سين سين

+

نقط تصنيف الدولة الدولى تبعا لمنظمة الفيفا

يعنى التصنيف اللى كانت لما تيجى سيرتة

(مايحلوش الكلام مع الاعتذار للطيفة)

تلاقى كل ناقد يتريق

يعنى بشرح أبسط

مبارايات التصفيات

وحتى الوديةالمسجلة والمعتمدة دوليا

ومنها طبعا المباريات اللى انتهت 4-صفر (حسبى اللة ونعم الوكيل فيك ياعبمنصف)

يعنى التصنيف هيبقى معتمد على كل ماتش الدول لعبتة فى أى زمان وأى مكان

ياريت المسؤولين يكونوا عارفين الكلام دة

وميستهتروش بالمباريات الدولية الودية

ومياخدوش عبمنصف

وبناءا علية

فية احتمال ان مصر متبقاش أول مجموعة

ويارب أبقى غلطان

[se_ Elsyed]

والله ما قصدت حاجه وحشه يابا الحاج سكوب ... سماح النوبه دي

يا حسام المسائل اتحسبت ومصر على راس مجموعة كما ذكرت ... دي من مصادر موثوق فيها يا مان ......

نفسي اعيش ياولاد لحد ما اشوف مصر في المونديال عشان امشي في النجع وانا رافع راسي واجول : هذا وقد عاش المدعو س س القابعة موميته في المتحف الحربي في عصر كله ازدهار .. عصرٌ وصلت فيه مصر الى كاس العالم مرتين ... مره سنة 90 ساعة عدالة السماء ما نزلت على ستاد باليرمو ومرة لما ومره اخرى في عشرين عشرة لما نزلت نفس العدالة على ستاد " بافانا بافانا "

والسياح الخواجات ييجوا يتصوروا جمب الموميا وهي ملفوفة بعلم مصر وفي واحد تور جايد ماشي جنبهم وعمال يكلمهم عني وعن العصر اللي عشت فيه

هو احنا ليه بنعيش في العصر بس ؟ يعني ماله المغرب ؟ على الاقل بيبقى طراوه والشمس راحت

[حسام يوسف]

مصادرى انا بقى

واللى يارب تطلع غلط

بتقول الموضوع متحسمش يا س س

وربنايدينا ويديك طولة العمر ونشوف المرة التانية وجايز كمان التالتة يا س س

[حسام يوسف]

ربنايستر

الطبيخ بدأ

طبقا لموقع ياللا كورة

اتفق الاتحاد الافريقى الى الغاء كل الاعتبارات السابق ذكرها

فى ترتيب الفرق العشرين

وأبقوا فقط على تصنيف الفيفا الشهرى

لحد هنا مش مشكلة

كويس

التصنيف الشهرى حتى الان للفيفا

تحتل فية الدول الافريقية الترتيب الاتى على مستوى افريقيا مش العالم

الكاميرون الأول

غانا التانى

مصر التالت

كوت ديفوار الرابع

نيجيريا الخامس

المغرب السادس

قوم الباشوات قرروا حاجة حلوة أوى

المغرب على رأس مجموعة

ياصلاة النبى أحسن

على أساس اية؟

ولم يشر الخبر لباقى الرؤوس

شكل الطبيخ بدأ

[الطيار المصرى]

يا دكتور حسام احنا مش قلنا ان عيسي حياتو عمره ما يهني مصر علي حاجة....

ده المتوقع....و بانت تدخلاته في تصنيف الفيفا لمصر في الشهور السابقة...

و اهه عملها و هيخلي المغرب اللي بعدينا بتلات مراكز علي رأس مجموعة....عادي جدا

و لسة ياما هنشوف

[حسام يوسف]

طبقا لياللا كورة

24-10-2008

ميعاد القرعة للمرحلة النهائية لتصفيات افريقيا لكأس العالم

والخبر خلص من غير ما يقولوا مين أوائل المجموعات

[se_ Elsyed]

لما سونسون الشهير بسين سين يقولك معلومة رياضية .. تبقى تقول تمام أفنظم ... ماشي يا حسام ؟

خد الحته دي من جريدة المسا والسهرة

شحاته قلقان من القرعة

المدير الفني للمنتخب يتمني الابتعاد عن المواجهات العربية

أعرب الجهاز الفني للمنتخب الو طني بقيادة حسن شحاته عن ارتياحه لكون المنتخب الوطني علي رأس أحدي المجموعات الخمس في المرحلة الثانية من التصفيات المؤهلة لكأس العالم حيث تفادي بذلك مواجهة المنتخبات الكبار امثال الكاميرون وكوت ديفوار ونيجيريا وغانا رءوس المجموعات الأربعة المتبقية.

أكد شوقي غريب المدرب العام ان الجهاز الفني استطاع ان يحقق هدفه من المرحلة الأولي بوصوله لرأس احدي المجموعات والتي تمنحه ميزة عدم الاصطدام المبكر بكبار القارة الأفريقية إلا انه في نفس الوقت شدد علي صعوبة لقاءات المرحلة الثانية والتي لابد ان تؤخذ بكل جدية.

في نفس الإطار تشغل قرعة المرحلة الثانية من التصفيات ذهن الكابتن حسن شحاتة المدير الفني بشكل كبير ويترقب موعدها يوم 24 أكتوبر القادم بلوزان السويسرية حيث لا يتمني حسن شحاتة وقوع أي منتخب عربي معه في مجموعته لأن المواجهات العربية تكون صعبة للغاية وتتسم بالشحن الجماهيري الكبير وتمني شحاتة ان تواصل المنتخبات العربية مسيرتها دون أن تصطدم بالمنتخب الوطني.

الجدير بالذكر انه سيتأهل 20 فريقاً الي المرحلة الأخيرة من التصفيات الافريقية يتم توزيعهم الي 5 مجموعات تضم كل مجموعة 4 فرق يتأهل منها اصحاب المراكز الأولي الي نهائيات مونديال العالم بجنوب أفريقيا في حين يتأهل الأول والثاني والثالث لنهائيات كأس الأمم الأفريقية بأنجولا وسوف تجري القرعة يوم 24 أكتوبر القادم لتحديد فرق كل مجموعة.

[حسام يوسف]

ياسين سين بالراحة بس

انا هدفى المصلحة

ويارب اطلع غلطان

احنا لينا مصر تقدر توصل كأس العالم

طيب اية المصدر دة؟

مقصود بيها جريدة المساء؟

واية مصدرهم؟

ادخل موقع الفيفا أو الكاف مفيش حاجة زى دى

ادخل ياللا كورة وغيرة هتلاقى وعد للمغرب بان تكون على رأس مجموعة

انا بستفسر بس يا أفنظم

منين المصدر؟

[حسام يوسف]

كلامك مذكور بالفعل يا س س فى ياللا كورة

الا انة ما اتذكرش فى الكاف أو الفيفا

ويارب يبقى الكلام صح

ونبقى رأس مجموعة

وتكمل على خير وما يبقاش فية المغرب معاناأو تونس

أما الجزاير أو ليبيا مش مشكلة

[se_ Elsyed]

سيبك من ده كله ....

تقدر تقولي حظرتكم .. هو حسن شحاته عايز إيه او البنات عايزه إيه ؟

يعني عتاولة القارة السمراء وبعدوا عننا أهم .. ييجي يقولك خايف من الدول العربية !!!!!!!!!!!!

طب أقطع نفسي يعني ؟

يعني سيادته نجيب له دول مغلوبة جاهز عشان يتأهل ؟

[حسام يوسف]

يعنى انت مش عارف يا س س العرب بيعملوا معنا اية؟

الماتش الوحيد اللى اتغلبناة فى بوركينافاسو 98كان المغرب بالصاروخ اللى اتشاط على نادر

وحتى فى القاهرة 2006

معرفناش نغلب المغرب

ولا تونس لينا معاها خير

باستثناء مرة ماتش ودى علبناهم 4-صفر ايام الجوهرى

دول شمال افريقيا: الأفارقة حتى لو دول تعبانة بيعلموا عليهم

واحنا شمال افريقيا بتعلم علينا

واحنا بنعلم على دول افريقيا ان شاءالله تكون كوت ديفوار ولا الكاميرون

كل حوت لة صيادة

مرة يا سين سين كنت مسافر واانضطريت اتفرج على ماتش للمنتخب فى قهوة

اتنين اصحاب قدامى بيتكلموا سوا

كان واحد بيقول للتانى

هية اصلة شمال افريقيا كلهم كدة

دايميا يغلبونا يا يضربونا لما نكون عندهم

رد علية التانى بسرعة وببديهة غير عادية

قالة

لأ

تونس والمغرب بيضربونا برة

الجزاير بيضربونا برة وجوة

ووقعت م الضحك

ربنايوفق الأهلى يا س س

[الطيار المصرى]

المنجد حسن شحاتة بيدور علي واسطة عشان ياخد اول اربع ماتشات انسحاب...

و يبقاله ماتشين علي ارضه يتعادل فيهم و يصعد....

هو البيه اول افريقيا و حامي حمي الوطن العربي و حكمدار بوليس العاصمة و شهبندر التجار خايف من ايه...

أكيد من نامبيا و جامبيا و الدول الافريقية المتقدمة اللي زي دي....

[se_ Elsyed]

طب ما هو الاسماعيلي بدأ المشوار من حوالي 5 سنين وكان بيروق فرق تونس في ارضها كمان تلات واربعات وبعدها الاهلي طاح فيهم وبقى ياخدهم غسيل ومكواه واكتر من 90 % من البطولات القارية اللي كسبها الاهلي في الاربع سنوات الماضية كانت على جثث فرق شمال افريقيا خصوصاً تونس

يبقى الكلام ده بقى ممل يا حسام وعيب لما يصدر من ابطال افريقيا ومن فريق المفروض انه اكتر فريق متكامل وعنده بدائل محترمة ولعيبته بقوا حافظين افريقيا جحر جحر

بص يا حسام ... لك عندي عزومة مندي عالفحم مع ربع كبسة سِفري .. ان ماكانش تصريح حسن شحاته جاهز من دلوقت اللي هو لو وقع في مجموعة تضم " ماكرونيزيا _ الراس الاخضر - جزر المالديف وجزر القُمر وجزر بدران " هايطلع تاني يوم يقول لك ( وقعنا في مجموعة نارية ولكننا قادورن على اجتيازها )

طب هاتلي اي تصريح للاهلي بيتكلم عن المجموعة النارية او الظروف الطين اللي قابلته في اي رحلة للاحراش ؟

لإن اللي عايز يكسب ما بيهموش ان شالله يلاعب عمالقة قوم عاد

[حسام يوسف]

بلاش تقلبوا على حسن شحاتة كدة

ومايصحش نقولوا علية منجد يا عم طيار

وربنا يوفق ونوصل كأس العالم

[الطيار المصرى]

مايصحش ليه بس يا دكتور حسام....

هو المنجد وحش؟؟؟علي الأقل راجل كسيب...

غير اني غير مقتنع تماما بتيتا بالأخ حسن شحاتة....

بس احنا مضطرين نقف وراه عالله تضرب معاه و ربنا يوفقنا و نطلع كاس العالم

[ابو محمود]

انا بصراحة بحب حسن شحاتة رغم انة دلوقتى حاسس بنفسة ومديها شوية وش خشب وكأنة مدرب البرازيل !! مع انة كان زمان بيقعد فى الدراسة على قهوة تعبانة مع الخواجة وحمدى نوح وكنا لما نسلم علية يقوم يقف رغم انة كان من احسن لاعبى مصر بس نقول اية الزمن اتغير والملايين لما بترخ على دماغ المصريين سعات بيبقى ليها وقع صاقع على نفوخهم المهم دة بالنسبة للكابتن شحاتة .

اما بالنسبة للقرعة ياريت يعملو زى قرعة كاس مصر ونلاعب فرق درجة تانية وناخد الكاس ويخرج كل المنتخبات الجامدة حتى لوكانت لونها احمر علشان بصراحة مش هنشوف تانى كاس عالم فى ظل الفساد اللى جاى وانتو شايفين فرق الشباب بتتبهدل أزاى وتخرج متعادلة فى ارضها يارب يوم القرعة بضم القاف يفتح ربنا علينا ونتجنب الفرق اللى بيخاف منها المنتخب بتاع عمو حسن المشكلة ان كل الفرق بقت تخاف مننا مش عارف لية يمكن لاننا ابطال القارة ولا علشان بيدربنا عمو حسن اللى يعرف السؤال ليةخمسة وسبعين قرش

[se_ Elsyed]

إتضحت الرؤيا يا معلم ورؤوس المجموعات هاتبقى

التصنيف الاول :_ مصر _ الكاميرون _ غانا _ نيجيريا _ كوت ديفوار

الغريب والعجيب والكئيب إن جنوب أفريقيا صاحبة فرح 2010 ... لم تتأهل إلى نهائيات بطولة أفريقيا القادمة ... وبالتالي لو ما كانتش هي اللي منظمة البطولة كانت إتكحرتت وما دخلتش التصفيات ....

وأنجولا اللي صالت وجالت في كأس العالم الماضي .. لم تتأهل ... فلافيو وجيلبرتو إتشقلطوا يا رجالة

وليبيا اللي كان منتخبها قادم بقوة ... صيفت برضوا

القنبلة بقى هو منتخب السنغال اللي كان إسم على علم وأستطاع أن يؤدي مباريات أكثر من رائعة في كأس العالم بكوريا واليابان ويفوز في مباراة الإفتتاح على فرنسا حاملة اللقب واللي فيه أسامي لعيبة مرعبة .. لم يتأهل هو الأخر وركب الحلزونة ...

[مسافر]

وركب الحلزونة ...

المعنى مفهوم و ضحكت

لكني أطلب الترجمة

[الطيار المصرى]

يا سلاااااااااام....

أظن كده مالناش حجة و منافسة غير من الدول العربيةالشقيقة زي المغرب و تونس و الجزائر و السودان...

غير كده مفيش منتخبات قوية لدرجة المنافسةغير رؤوس المجموعات....

اليه يا رب اللاعبن تبقي رجالة و حسن شحانة ما يشغلش دماغه جامد عشان نقدر نشم ريحة الدور الاول بتاع كأس العالم

[Scorpion]

مصر تكتسح جيبوتي .. وتتأهل للمرحلة النهائية للتصفيات في الصدارة

اكتسح المنتخب المصري ضيفه منتخب جيبوتي بنتيجة 4-0 في مباراة الجولة الاخيرة للمجموعة الثانية عشر لتصفيات افريقيا المؤهلة لكأس العالم وكأس الامم الافريقية.

كتب: كريم سعيد- اكتسح المنتخب المصري ضيفه منتخب جيبوتي بنتيجة 4-0 في مباراة الجولة الاخيرة للمجموعة الثانية عشر لتصفيات افريقيا المؤهلة لكأس العالم وكأس الامم الافريقية.

وضمن المنتخب المصري تأهله الي المرحلة النهائية للتصفيات كمتصدر للمجموعة بعدما رفع رصيده الي 15 نقطة بفارق 3 نقاط عن مالاوي التي تأهلت ايضا من ضمن افضل 8 منتخبات احتلت المركز الثاني.

احرز اهداف الفراعنة كل من عماد متعب في الدقيقة 18 واحمد حسن في الدقيقة 50 ومحمد ابوتريكة في الدقيقة 65 ورياض سعيد مدافع جيبوتي بالخطأ في مرماه في الدقيقة 91.

بداية الشوط الاول جاءت مصرية تماما وسط تراجع كامل للضيوف، وكان بامكان احمد عيد عبدالملك وضع الفراعنة في المقدمة في مناسبتين خلال الـ13 دقيقة الأولي ولكنه سدد الكرة في مرتين بالرأس خارج المرمي.

ولكن متعب تمكن من استغلال احدي الكرات العرضية وارتقي في الدقيقة 18 ليضع الكرة برأسه في المرمي محرزا الهدف الاول.

واصل أصحاب الارض بحثهم علي الهدف الثاني وكاد حسني عبدربه ان يضيفه في الدقيقة 27 من ضربة حرة مباشرة علي مشارف منطقة الجزاء ولكن تسديدته ذهبت بجوار القائم الايسر بقليل.

ثم عاد حسني في الدقيقة 33 ليطلق تسديدة بعيدة من خارج منطقة الجزاء ولكنها مرت ايضا بجوار القائم لتمر الدقائق الباقية من الشوط بدون جديد.

مع بداية الشوط الثاني، تمكن حسن من اضافة الهدف الثاني بعدما انفرد من الجهة اليسري وسدد الكرة في "سقف" المرمي.

ثم سدد البديل احمد عبد الغني كرة راسية قوية في الدقيقة 61 ولكن حارس جيبوتي تمكن من اخراج الكرة باستبسال.

وجاء ابوتريكة في الدقيقة 65 ليضيف الهدف الثالث بلمسة رائعة عندما انفرد من الجانب الايمن ووضع الكرة من فوق الحارس لتتهادي الكرة الي الشباك.

ووقف حارس الضيوف مرة أخري أمام راسية عبدالغني في الدقيقة 77 ليمنع الهدف الرابع.

ثم عاند الحظ عبدالغني "المنحوس تماما" في كرة كان من الممكن أن تكون هدفا رائعا عندما سدد مهاجم حرس الحدود الكرة " علي الطائر" ولكن لسوء حظه مرت الكرة بجوار القائم الأيمن بقليل.

وفي الوقت الذي كانت تلفظ فيه المباراة انفاسها الاخيرة سجل سعيد الهدف الرابع لمصر بالخطأ في مرماه بعدما فشل في تشيتت كرة احمد حسن العرضية لينتهي اللقاء برباعية نظيفة.

المصدر و لمشاهدة أهداف المباراة : إضغط هنا

مبروك لمصر

:wub:

:wub:

:egyflag:

:wub: :wub: