ما حدث خلف مرمى الحضري مهزلة

[justtrying]

زاهر: ما حدث خلف مرمى الحضري مهزلة

الأثنين، 2 يونيو 2008 - 00:24

عصام الحضري

قال سمير زاهر رئيس الاتحاد المصري لكرة القدم إن هجوم الجماهير بالهتافات على حارس المنتخب عصام الحضري خلال لقاء الكونجو الديموقراطية يعد مهزلة.

وأضاف زاهر لـFilGoal.com عقب فوز الفراعنة بهدفين لهدف في انطلاقة التصفيات المؤهلة لكأس العالم أنه بصدد البحث عن علاج لمثل تلك التصرفات من الجمهور.

وتابع "المشجع دوره مساندة المنتخب، وليس مقبولا أن يتفرغ لمهاجمة حارس مرمى بلاده .. أستعجب من كونهم أرهقوا أنفسهم واشتروا تذاكر لإهانة الحضري".

وأبدى زاهر استغرابه من كون هؤلاء المشجعين جزء من رابطة جماهير النادي الأهلي، والتي لا تزال تعاقب الحضري منذ انتقاله إلى سيون السويسري.

سمير زاهر

وأيد أحمد سليمان مدرب حراس مرمى المنتخب المصري كلمات زاهر، مشددا على ضرورة عقاب تلك الفئة من الجماهير.

وأشار سليمان إلى أن الجمهور الذي وقف خلف مرمى الحضري لم يكن حاضرا لتشجيع مضر، مضيفا "من لا يرغب في مساندة الفريق فلا يرهق نفسه بالحضور".

وانتقل زاهر للحديث عن المباراة، كاشفا عن رضاه التام فيما يتعلق بالنتيجة بالرغم من البداية المتعثرة للمنتخب والتي كادت تكلفه نقاط المباراة.

وأكمل "افتقدنا نصف قوام منتخب كأس الأمم، ولذا يحتاج الفريق لبعض الوقت للانسجام، كما أننا واجهنا أقوى منافسينا ولذا ظهرنا بشكل أقل نسبيا من المتوقع".

[justtrying]

انا بس نقلت الموضوع ده كل يوم بيتأكد ليه كلامي وهو أن جماهير الاهلي تهتم بالاهلي ثم الاهلي فقط

لأن الحضري لما لعب في الماتش لعب باسم مصر مش باسم الاهلي .. لكن هنقول ايه .. ده مبدأ جماهير وإدارة النادي الاهلي ... "الاهلي فوق الجميع" !!!!!

[الحاج فوزى]

انا بس نقلت الموضوع ده كل يوم بيتأكد ليه كلامي وهو أن جماهير الاهلي تهتم بالاهلي ثم الاهلي فقط

لأن الحضري لما لعب في الماتش لعب باسم مصر مش باسم الاهلي .. لكن هنقول ايه .. ده مبدأ جماهير وإدارة النادي الاهلي ... "الاهلي فوق الجميع" !!!!!

مش كله يا كوتش والله ..

أنا من أبناء القلعة الحمراء .. وأهدى للحضرى وردة وأتمنى له التوفيق ...

وسعيد بمشاركته فى المنتخب وأتمنى أن يصمد أمام كل تلك التراهات ...

تحياتى .

[se_ Elsyed]

سبحان الله

هو سمير زاهر لسه عايش وبيتكلم عن الإخلاق والمهازل ؟!!!!!!!!!

طب كان فين لما اللاعب ساب ناديه وهرب في نص الموسم وفي غير موسم إنتقالات ؟

وكان فين لما مشكلة حُسني بعد ربه حصلت ويطلع يقول إن في فاكس اتبعت لهم من الفيفا وأكتشفوا إنه مزور وعلى طول كلموا الفيفا : أيوه يا فيفي ... إنتوا اللي بعثتوا الفاكس ده ؟ ردوا وقالوا لأ : راح محوله للنيابة للتحقيق

شوفت السرعة ....

طب ما أتحركش بنفس السرعة ليه في المشكلة الرئيسية بتاعت حُسني ؟

سيدي الفاضل ... لا تُعادي أكبر جمهور فيي مصر وتظلمه .. وبعدين ترجع تعيط وتقول مهازل ...

ولا يُمكن للحضري أو غيره أو أي شخص اخطا مهما كان إنتماءه أهلاوي زملكاوي ولا غيره .. لا يُمكن أن يفلات من العقوبة مهما كانت.

واظن لكل مشكلة أسباب ومسببات ...ز

فلا تُناقش المشكلة بدون أن تبحث عن اسبابها

العقل والمنطق بيقولوا كده

[Scorpion]

المرة دي انا مش موافقك يا سي السيد .... الموضوع مش مين اللي بيتكلم عن الأخلاق و عمل ايه و نيل ايه ....

الموضوع ان فريق بيحمل اسم مصر موجود بالفعل علي أرض الملعب ....

كل الخناقات و الشتايم و الأتهامات بالرغم من انها حاجة تأخر مش تقدم .. و لكنا في النهاية مسموح بيها قبل الماتش ...

لكن علي الأرض الملعب فيه 11 واحد مصري لابسين فانلة مكتوب عليها من ورا ايجيبت .... يتحرق بقي الزمالك عالأهلي ساعتها ...

يا راجل دي الناس دول كانوا يتمنوا ان مصر تخسر بس علشان اللي حارس المرمي هو الحضري المغضوب عليه ...

و بصراحة ... انا اتكسفت بجد من ابني .... لما سألني هما ليه بيصفروا ضد حارس المرمي بتاع مصر .. و اضطريت اكذب و أقول له ان اللي بيصفروا دول مشجعي الكونجو ....

جميل انتماء الواحد لناديه .... لكن اللي بيلعب دلوقتي فريق مصر ....

تشرب كركديه ؟؟

[حسام يوسف]

السلام عليكم

الله ينور عليك يا عم سكوب

قول ل س س

مصر فوق الاهلى

وانا لست مع من يقول ان كل جماهير الاهلوية يضعون الاهلى قبل مصر

فية اهلوية بيحبوا بلدهم اكتر :D

[النيل حبيبي]

99.9% من الأهلويه قاطعوا مباريات المنتخب

من ذهب منهم ليس له حق سب الحضري

السؤال اين الزملكاويه

25000من المجندين بيتفرجوا مش بيشجعوا

زاهر فكر ينقل مباريات المنتخب لكنه سيجتمع مع الروابط(غير الاهلي)

حنشوف فكرته ستنجح أم لا

[حسام يوسف]

السلام عليكم

استاذ(النيل حبيبى)

ممكن نشجع مصر

كل الدنيا اهلى

اهلى

اهلى

ممكن نمشيها مصر شوية؟

وبعدين ممكن حضرتك تتكرم علية وتقولى ال 99.9%

دى

مصدرك فيها اية؟

(اصلى بقلق من التسعات )

ممكن نشجع بلدنا

مصر

مش اهلى

مش زمالك

صدقنى دى مباريات تصفيات كأس عالم

والاهلى مالوش علاقة بيها

[se_ Elsyed]

هات العناب يا سكوب ... ونزل مشاريب لكل الموجودين في التوبيك على حسابي

بص يا سكوب ... شوف يا حسام

ليه لما ميدو هب في وش حسن شحاته في مباراة السنغال سنة 2006 أقتص لنفسه ونفخه لأكثر من 6 شهور ويمكن ما شافش المنتخب من ساعتها ...

ولما جمال حمزه أو بركات حاولوا يزعلوا الباشا شحاته أو يدوسوا له على طرف .... ركنهم في التلاجه وما شافوش المنتخب من ساعتها ...

يقوم لما لاعب مهما يكون يرتكب جريمه زي اللي عملها الحضري .. نروح نكافئه ونخليه يحرس مرمى مصر وكأن شيئاً لم يكن ؟

طب لو كان هرب من معسكر المنتخب فجأة ... تفتكروا كنا هانقول مصر هي أمي ونيلها جوه دمي وتعالوا نروح نشجع الحضري عشان خاطر مصر ؟ لازم تجاوبوا على السؤال ده ... ولو قلتوا آه نروح نشجع يبقى أنا غلطان وهابوس على شعر راس كل واحد فيكم

ألم يفعلها الجوهري نكايةً في الأهلي في التسعينات واخد إبراهيم سعيد اللي هرب لإنجلترا في نص الموسم برضوا ... وكان سبب في إن ابراهيم سعيد إتفرعن زيادة وبالتالي لم تقم له قومه من ساعتها .... طالما اللعيب بيلاقي اللي يطبطب عليه ويضمن إنه هايفلت من العقاب

نحن معشر الاهلاوية لا نقل وطنية عن أي مشجع اخر

ولكن الحق حق ...

الحضري غلط ولازم يتعاقب

---------------------------

عاجبكو كده ...

اديكو طيرتوا دماغ الكركدية اللي عملتها

[الحاج فوزى]

وادى العناب بتاعك ... مش عايز ومش شارب ..

يا عم 2 سين ايش جاب واحد فى وسط الملعب بيشوح للمدرب أمام كاميرات العالم وبيغلط لواحد قالهم عايز امشى أول مرة قالوا استنى شوية .. وضحكوا عليه ، تانى مرة قال عايز امشى قالوا برضو استنى شوية فرفض انه يتضحك عليه تانى !

حتى لو اتصرف بطريقة غلط . . ولو ماكانش شاطر إعلامياً زى كل من سن السنون والسيوف لقطع رقبته ..

ايه مشكلة أنه يحقق حلم حياته فى أخر موسمين ولا حتى 3 فى حياته ؟!!!

وبعدين أحنا أهلاوية أه .. لكن ما إحنا عارفين سياسة الأهلى كإدارة مع اللاعيبة .. فا مش هنضحك على بعض ..

ده كله بقى كوووم ... وموضوع المنتخب كوم تانى .... أرفعلك القبعة يا عم سكوب .

الحضرى أو شحاته أو غيرهم .. كلهم أصحاب وظائف فى فريق إسمه المنتخب ..

يعنى بأى حال من الأحوال ماينفعش اللى حصل .. ما ينفعش الجمهور المصرى ينقسم جزئين .. جزء منهم يهتف ضد الحضرى وشحاته .. ويتمنى الهزيمة عقاباً للحضرى وعقاباً لشحاته ..

مش كده ولا ايه ؟!

هات بقى العناب .. أنا خلاص هديت .

[النيل حبيبي]

99.9%

من الاهلويه وليس من جماهير مصر

[ابو محمود]

ما دام فية مشاريب والذى منة خد عنك يا كابتن

مما يشكل المنتخب من لاعبين أجانب ياسادة من اندية يعنى لازم نفصل بين الأندية وما تقدمة للمنتخب

انى لا أريد ان استرسل اكثر لانى مش مرتاح للمناقشات ودائمآ ارى انها بتقلب هههههههههههههههه

وانا تعبان ومش بحب النرفزة ولا الغيظ لكنى انشاد السادة المشجعين ان يفصلو بين ما يفعلة لاعب فى نادية ورد الجمهور علية اليس من الواضح ان هناك حالة من عدم التوازن بين ما يطلقة الأتحاد وادارة المنتخب وما يطلقة الجمهور المصرى .. المنتخب لا يشرفة ان ينتمى الية لاعب ليس لة مبدأ ومن يريد ان يشجع الحضرى هو حر بس ياريت نحاول نفصل بين انتمائنا للفرق وعلاقتها بما يحاك من جهاز المنتخب للاعبى الأهلى

وهل من الطبيعى ان يتم طرد لاعبين من لاعبى المنتخب لمجرد انهم مضو للعب فى الأهلى ؟

اليس بغريب على مدير فنى يصرح بكلام ثم يلحسة بمجرد ان يكون هناك لون مختلف لما يهوى

انا احب الأهلى من حبى لمصر ولكن أفرق بين كلمة رجل وكلمة ما يشبة الرجال فنعلم ان من مبدا الرجال ان لا ينكثو فى ماعاهدو بة من أجل مكاسب نقدية زائلة وتافهة ولنا فى الماضى عبرة

[حسام يوسف]

السلام عليكم

العزيز س س

انت لسة منفعل بسبب هروب الحضرى

وانا للمرة المعرفش كام ومع كتير من الناس مغلطين الحضرى

لكن

دلوقتى دة لاعب فى منتخب مصر

يعنى حصل تصرف معين مع نادية

قررت الفيفا حل معين

حتى لو ميرضيكش الحل

لكن ان نوسع العقوبة للمنتخب

لا

مش صحيح

يكفى خسرحب الاهلوية والناس لية

بعد ماكانت الناس بتهتفلة ارقص يا حضرى

دلوقتى ماحدش هيعبرة

لكن تداخل العقوبات

لا

وانت راجل ادارى وعارف

وياريت نشجع مصر

وننسى الاهلى والزمالك

وللزميل النيل حبيبى

ايوة

حضرتك تكرمت وجبت ال99% منين؟

حتى لو كان الاهلوية؟

معاك اى دليل بكدة؟

والف شكر للاهلاوى الذى يحب مصر قبل الاهلى

HUSS

حقيقى سعيدبحضرتك

[justtrying]

بصراحة يا استاذ حسام مش عارف انت حكمت على ان كل الجماهير مش هتهتفله ازاي

جماهير الزمالك وكل جماهير مصر من اسماعيلي والمصري وبورسعيد هتقف وراه وتقوله ارقص يا حضري واتحزم كمان .. حلوة دي ..

وبعدين هوه الحضري مش مشي بمزاجه الحضري مشي بعد ما اخد حقه تالت متلت بأمارة الاتحاد الدولي لما ادى الاهلي على نفوخه واداله استمارة سته وفسخ العقد مع الحضري

يعني سمير زاهر هيطلع اقوى من الاتحاد الدولي ويعاقب الحضري ؟ !!!!

الاهلاوية دول امرهم غريب عاوزين كل حاجه تمشي على هواهم .. ويقولك في الاخر نادي القرن :Exclam: وايه تاني ... نسيت .. اه افتكرت .. قاهر ريال مدريد

والاخ الاستاذ سي السيد نازل طحن في الحج الحضري !!! ويقولك عقوبة ؟ !! هوه الحضري اصلا مغلطشي في حد .. الراجل فسخ العقد مع الاهلي واتحمل الشرط الجزائي وقال للاهلي اسلامو عليكو .. ايه المشكلة في كدة ؟؟؟ !!!!

ولا بردو لسه هنقول الاهلي فوق الجميع ؟ !!!!

[se_ Elsyed]

بصراحة يا استاذ حسام مش عارف انت حكمت على ان كل الجماهير مش هتهتفله ازاي

جماهير الزمالك وكل جماهير مصر من اسماعيلي والمصري وبورسعيد هتقف وراه وتقوله ارقص يا حضري واتحزم كمان .. حلوة دي ..

وبعدين هوه الحضري مش مشي بمزاجه الحضري مشي بعد ما اخد حقه تالت متلت بأمارة الاتحاد الدولي لما ادى الاهلي على نفوخه واداله استمارة سته وفسخ العقد مع الحضري

يعني سمير زاهر هيطلع اقوى من الاتحاد الدولي ويعاقب الحضري ؟ !!!!

الاهلاوية دول امرهم غريب عاوزين كل حاجه تمشي على هواهم .. ويقولك في الاخر نادي القرن :Exclam: وايه تاني ... نسيت .. اه افتكرت .. قاهر ريال مدريد

والاخ الاستاذ سي السيد نازل طحن في الحج الحضري !!! ويقولك عقوبة ؟ !! هوه الحضري اصلا مغلطشي في حد .. الراجل فسخ العقد مع الاهلي واتحمل الشرط الجزائي وقال للاهلي اسلامو عليكو .. ايه المشكلة في كدة ؟؟؟ !!!!

ولا بردو لسه هنقول الاهلي فوق الجميع ؟ !!!!

يا عم بلاش الكلام الكبير ده

مين اللي ايدا مين على دماغه ؟

الحضري بيلعب ببطاقة مؤقته ولسه القضية شغالة وحسومة بعقوبات مالية وايقاف للحضري بإذن الله

هوه الحضري اصلا مغلطشي في حد .. الراجل فسخ العقد مع الاهلي واتحمل الشرط الجزائي

ده حصل إمتى ؟

مش انت زملكاوي ؟

لو الحضري اتحكم له تحت اي ظرف من الظروف ورسيت المسالة على غرامه اليه فقط وفتح الباب للاعبين الاخرين في مصر

بكره نتفرج على اي لاعب زملكاوي يعمل زيه وبعدين نرى ونسمع رأيك في مثل هذا .

وده اللي كنت عايز اسمعه منك

هو

ه الحضري اصلا مغلطشي في حد

الجُملة دي كفايه

[الحاج فوزى]

السلام عليكم

العزيز س س

انت لسة منفعل بسبب هروب الحضرى

وانا للمرة المعرفش كام ومع كتير من الناس مغلطين الحضرى

لكن

دلوقتى دة لاعب فى منتخب مصر

يعنى حصل تصرف معين مع نادية

قررت الفيفا حل معين

حتى لو ميرضيكش الحل

لكن ان نوسع العقوبة للمنتخب

لا

مش صحيح

يكفى خسرحب الاهلوية والناس لية

بعد ماكانت الناس بتهتفلة ارقص يا حضرى

دلوقتى ماحدش هيعبرة

لكن تداخل العقوبات

لا

وانت راجل ادارى وعارف

وياريت نشجع مصر

وننسى الاهلى والزمالك

وللزميل النيل حبيبى

ايوة

حضرتك تكرمت وجبت ال99% منين؟

حتى لو كان الاهلوية؟

معاك اى دليل بكدة؟

والف شكر للاهلاوى الذى يحب مصر قبل الاهلى

HUSS

حقيقى سعيدبحضرتك

أنا اسعد يا فندم .. أتفضل إشرب عناب على حساب س س :Exclam:

[الطيار المصرى]

ملازما الحياد التام....انا مع كل اللي اتقال من اخواني الاهلاوية سواء كان مؤيد للحضري او معارض و ساخط لم عمله....

بس فيه سؤال صغنن للمشير سين سين....دلوقتي احنا قدام واقع ان الحضري احسن حارس في افريقيا....

و احنا فعلا محتاجينه الفترة دي عشان نفسنا نشم ريحة الدور الاول لكأس العالم ان شالله نقع مع الارجنتين و فرنسا و انجلترا في مجموعة واحدة....

هل ده الوقت المناسب اللي نستغني فيه عن الحصري و احنا بنقول يا هادي في التصفيات و خلاص كنا هناخد غلي دماغنا من الكونغو لولا ستر ربنا...

هل ده الوقت المناسب لتكاتف الجماهير ضده؟؟؟؟

الحضري لما خلع كان عذره انه يشوف مستقبله و حياته و الاحتراف و الكلام الحمصي ده....و خلع بطريقة مستفزة من ادارة الاهلي اسخطت الجماهير....لكن احنا ديلوقتي قدام سمعة مصر الافريقية اللي المفروض نحافظ عليها بعد البطولتين اللي فاتوا....و اللي المفروض ان بطل افريقيا سنتين متتاليتين يجب ان يكون من اوائل الفرق تأهلا لكأس العالم....الحضري مهم حاليا...لكن لو كان هناك حارس اكثر خبرة و مهارة من الحضري حاليا....فمش عايزينه....لكن تلاقيه فين الحارس ده من غير تقليل لكفاءة الحراس البدلاء؟؟؟؟

ده رايي باختصار....و يا ريت لو فيه تمر هندي بدل العناب عشان يفوق الواحد....

تحياتي...

الطيار المصري

[se_ Elsyed]

بنفس المنطق يا طيار

محمد زيدان .. كان فلته في البطولة الأخيرة

واحمد حسام ميدو .. مقطع الدنيا في إنجلترا .. لكن لما يلمسوا شعره من شعور حسن شحاته او سمير زاهر .. ساعتها تطلع شعارات الأخلاق فوق كل شيء والخيانة والهروب وما إلى ذلك ويتم نفخهم والتمثيل بجثثهم ... وهما يستاهلوا بصراحة

لكن الحضري لما يعمل كده في الاهلي .. يبقى لازم نحط شوز في بؤنا ونستحمل عشان مصر ومصر هي امي

صح ؟

[حسام يوسف]

العزيز س س

دلوقتى زى ما انت قلت قضية الحضرى ما انتهتش

طيب لحد ماتنتهى ممكن ننسى الاهلى

وانا بقى هنسى الزمالك وهشجع لاعيبة الاهلى فى المنتخب

يعنى تخيل هشجع تريكة وشادى وباقى الاخوة

بس عشان عيون مصر

أكيد أولوياتك مصر قبل الاهلى

مش كدة ولا اية؟

(مع الاعتذار للراحل العظيم فؤاد المهندس)

[سيزيف]

على الرغم من أننى أهلاوى صميم

الا اننى ارفض تماما و تحت أى ظروف التعدى اللفظى الذى يصدر من جماهير الكرة فى مصر

و هى للاسف عادة سيئة تلازم التشجيع الكروى فى مصر

الحضرى فى رأيى انسان غير محترم

لم يحترم تعاقده مع النادى الأهلى و تركه فى ظروف صعبة

و لم يحترم الجماهير التى أحبته و هتفت باسمه

و لم يحترم عقلياتنا و هو يحاول أن يخدعنا بتمثيلية الرجوع الساذجة

على أى حال

لم تصدر - حتى الآن - بحق الحضرى ثمة عقوبات سواء من الاتحاد الدولى أو الوطنى

و بالتالى من حق شحاتة ان يضمه - طالما أنه يرى ضرورة ضمه - إلى المنخب

و مهما اختلفنا على الحضرى

فلن نختلف على مهارته

و على الجماهير - سواء رفضت القرار أو وافقت عليه - ان تتعامل مع المنتخب ككيان و ليس كأفراد

و هو كيان هام بالنسبة للمصريين

و فوزه يشكل دافعا معنويا يسعد ملايين مشجعى الكرة

و من ثم فان امتناع الجماهير - ان صح انها امتنعت عن الذهاب الى مباراة المنتخب بسبب الحضرى - عن حضور مباراة مصر الاخيرة نكاية فى الحضرى هو امر غير مبرر و غير منطقى

لانهم بذلك يعاقبون منتخب مصر ككل

أى يعاقبون أنفسهم

فهل ستسعد تلك الجماهير اذا خسر المنتخب - على اعتبار ان الحضرى سيخسر ايضا ؟

أنه اشبه بمنطق شمشون - على و على أعدائى !!

أتمنى ان تصدر أصوات عاقلة من داخل النادى الأهلى لتحث الجماهير على مؤازرة منتخب مصر بغض النظر

و على الجماهير أن تلتزم - على الاقل - بعدم اهانة الحضرى

و يمكن لها تجاهله ان ارادت

يبقى ان ابدى استغرابى من عدم حضور جماهير الفرق الاخرى - و على راسها الزمالك - لتشجيع المنتخب

استاد القاهرة كان مليئا لآخره فى مباراة نهائى الكأس بجماهير الزمالك - قبل مباراة المنتخب ببضعة أيام

فلماذا لم تتوجه نفس الجماهير لتشجيع المنتخب ؟

لا أجد مبرر مقنع لذلك

تحياتى