سألونى بتحب مصر .. قلت معقوله؟

[daktara]

سألونى بتحب مصر .. قلت معقوله؟

لو كنت مصرى وعينك عنها مشغوله

طاغى فى قلبك حبها

داللى يزورها يحبها

وان كان يهودى جرودى نظرته حوله

***********

إيش حال يا غاليه بقى اللى اتربى فى عزّك

ولما ضنّت عليه أمّه ..... رضّعه بزّك

الله يسامحه يا ست الكل لو ناكر

واللى طباعه كده .. تفّيه ولا يهزّك

*********

اتعلّموا فيكى القرايه والكتابه

دلوقت ليه بيفرّغوا فيكى الكآبه

علشان كبيره والكبير دايما كده

بتطبطبى ع القاسى وتبوسى الغلابه

*********

الله عليكى وسطهم يا منوّره

يا فاتحه بابك للى باع واللى اشترى

مش مشكله لو حدّ عنده مشكله

المشكله انك ما بتبصّيش ورا

********

سألونى بتحب مصر .. قلت باعشقها

نيلها وغيطانها وحواريها وملاجئها

واللى يقول غير كده نظرته سوده

وميّتك يا جميله عمره ما داقها

[ali]

ولما ضنّت عليه أمّه ..... رضّعه :? :? :? :? :? :?

اعتقد ان هذا اللفظ خارج و يخدش الحياء يجب حذفه حالا

[mohamedfox1981]

سألونى بتحب مصر .. قلت معقوله؟

جميله القصيده لكن شكلها كده منقوله

لو كنت زعلت منى خدلك برشامه و لا كبسوله

و لو سالتني عن القصيده هاقول دي عسوله

:) :) :D :D :lol: :lol: :D

القصيده معبرة جدا و جميله

مش مهم وزن و لا قافيه و مش مهم سرد المهم انك عبرت عن اللي جواك

مع اطيب تمنياتي :)

[daktara]

اعتقد ان هذا اللفظ خارج و يخدش الحياء يجب حذفه حالا

شكرا على مرورك الكريم وعلى ملاحظتك واعتقد ان هذا اللفظ لا يخدش الحياء فليس فيه استثاره للغرائز فى موقعه بالقصيده وكثيرا ما نرى فى الشوارع ووسائل المواصلات خصوصا فى المناطق الشعبيه من ترضع طفلها بثديها ولا نشعر به مثيرا

هذا رأيى

تحياتى

[daktara]

جميله القصيده لكن شكلها كده منقوله

مش مهم وزن و لا قافيه و مش مهم سرد المهم انك عبرت عن اللي جواك

الاخ محمد فوكس

شكرا لانك شفتها جميله بس هى مش منقوله ولا حاجه ولا يعنى مش مالى عينك؟ :D

انا كتبتها عشان ارد على قصيده عنوانها قالوا لى بتحب مصر فقلت مش عارف لو دورت شويه هتلاقيها تحت

اما بخصوص الوزن والقافيه فهى موزونه ميه فى الميه ومظبوطه ميتين فى الميه بس ياريت تقراها واحده واحده بصوت عالى عشان تطلع معاك زى ما كتبتها لان الزجل يجب ان يقرء بصوت عالى

تحياتى