هتعمل اية لما ترجع مصر

[بيرو]

ازيكم كلكم فى كل انحاء العالم

اخواتى الشباب المصريين التعبانين فى كل انحاء العالم اللى نفسهم يرجعو مصر يعملو مشروع كويس ويعيشوا مرتاحين وفى مستوى كويس

انا حبيت انى افتح موضوع (لما ترجع مصر هتعمل اية) لان عارف ان السؤال دة بيدور فى رأس كل واحد فينا

انا هطرح سؤال وهاقترح اقتراح ...... ؟

السؤال

لو انت رجعت مصر ومعاك مبلغ مش ضخم ومش قليل يعنى فى حدود من 300 الف الى 500 الف بالكتير اية هى المشاريع المعقولة اللى ممكن تعملها؟

وهل هتكون مضطر لزيادة رأس مالك دة او تشارك حد تانى ؟ ولا تقدر تبتدى بداية معقولة ؟

الاقتراح

انا شايف ان كتير من اخواتى المغتربين ميالين اكتر للمشاريع الزراعية والانتاج الحيوانى

ممكن لان اللى سافر وتعب بيبقى عايز حاجة مفيهاش مشاكل ومنافسة كبيرة مع غيرة ودة متوفر الى حد كبير فى المشاريع الزراعية

بعكس المشاريع التانية اللى هى التجارية والصناعية اللى بتحتاج خبرة كبيرة و المنافسة فى مصر طحن والمشاكل بالهبل

انا بكلمكو بالبلدى كدة

المهم

انا ميال انا كمان الى المشاريع الزراعية

لكن

بالمبلغ اللى انا حددتة نقدر نعمل مشروع زراعى معقول ؟

انا شايف انة ممكن وياريت نتناقش فى التفاصيل اللى جاية ولو حد عندة اضافات يقولها

انا سالت على اسعار الاراضى فى منطقة وادى النطرون

لقيت ان سعر الفدان بيبتدى من اقل من 10 الاف جنية لكن اللى ينفع للزراعة وسهل ومايتعبش اوى وورقة سليم بيبتدى من 20 الف جنية

يعنى لو اخدت 10 افدنة (كبداية) ممكن توسع بعد كدة هيكون تمن الارض 200 الى 250 الف جنية

وهتحتاج بعد كدة فى حدود 100 الف تانية بالكتير وتكون ظبط الارض 100% وجاهزة للانتاج

طبعا هتبتدى بزراعة المحاصيل اللى مبطولش فى الارض زى الطماطم والبطاطس وكدة

علشان تبيع بسرعة وتجمع بعض الفلوس اللى تقدر تطور بيها مشروعك

انا بتكلم على ارض سبق زراعتها او مجهزة للزراعة مش على الارض اللى لسة بكر

يا ريت لو حد عندة افكار تانية يقولنا عليها

[mohamedta]

انا راى ان مفيش حاجة بتنفع فى مصر الايام ديه الا العقارات

[capitshino]

هاشتغل نصاب --- ده احسن مشروع فى مصر دلوقتى

كله بينصب على كله -

[somayasaleh]

انا عن نفسي لو معي المبلغ ده احطه في البنك

ولا وجع الدماغ

بصراحة في مصر الحبيبة مفيش مشروع ممكن يمشي من غير رشاوي

ولا بلطجة .... وطبعا سوف يجيلك الضغط ووالسكر واللومباجو

وكل مجال حتي الزراعي والحيواني له مافيا خاصة بهم

(فان لم تكون ذئبا أكلتك الذئاب)

والذئاب ما شاء الله في مصر كتتتتتتتتتتتتتتتتتتتتييييييييييييييييييييير

ربنا يجعل كلامنا خفيف عليهم wst::

[capitshino]

المشكلة ان الفلوس فى البنك بتقل قيمتها بدرجة لا تتخيليها .. اعتقد فعلا ان افضل شئ هو شراء عقار او شقة فى مكان محترم (مضمونة يعنى) وتاجيرها لناس محترمة لفترتات محددة

[mariammo]

أعتقد أنه من الأفضل أن يعمل كل فى مجاله

ولكن هناك نقاط أخرى فى الموضوع فبعد الإستقرار على المجال

فيجب الا تشارك بكل مالك فى هذا المشروع فيجب أن يكون هناك مبلغ للطوارئ لا قدر الله

وكذلك يجب أن يكون هناك مبلغ أخر للمصروفات سواء الشخصية (الأسرية والمنزلية) أو على المشروع حتى تستطيع أن تحقق دخل من المشروع يكفى لذلك

[Mohamed Khalaf]

المشكلة ان الفلوس فى البنك بتقل قيمتها بدرجة لا تتخيليها .. اعتقد فعلا ان افضل شئ هو شراء عقار او شقة فى مكان محترم (مضمونة يعنى) وتاجيرها لناس محترمة لفترتات محددة

الله ينور عليك أنت كدة جيبت من الأخر وكمان دية حركة مفيهاشى خسارة أبدا ووجع قلب وروتين وعلك أشترى أجر خزن بيع أكسب

[HDarwish]

السلام عليكم إخواني وإخواتي

برغم إني مهندس زراعي إلا اني لا أنصح بالاستثمار في مشروع زراعي وذلك من واقع خبرة ثماني سنوات في قطعة أرض أستصلاح بالقرب من مركز بدر، ذلك لأن المشاريع الزراعية تكلف كثيرا والعائد منها على المدى البعيد وليست على المدى القريب بالإضافة إلى التكلفة العالية خاصة في البداية وعلى الأخص كمان أراضي الاستصلاح سواء من تكلفة الاستصلاح نفسها أو إعداد شبكة المياه واللي بتكلف تكلفة كبيرة جدا والزرع والأسمدة وغيره

يعني بالمختصر كده المبلغ اللي بتقول عليه لو أخدت بيه أرض استصلاح يبقى يادوب يكفي زي ما بيقولوا إنك تخلي المزرعة بتاعتك تقف على رجليها (ملاحظة المبلغ ده غير شامل سعر الأرض في البداية)

بالنسبة لمشاريع الإنتاج الحيواني لو ما لكشي خبرة فيها يبقى هيقابلك صعوبات كثيرة في البداية بالإضافة إلى أني سألت زميل لي عن هذا النوع من المشاريع وقعد شرح لي المشروع كله بس في الآخر لاحظت حاجة وهي إن مثلا لو انت جايب المواشي في البداية ب مثلا 10 وصرفت عليهم أكل (علف) ورعايه صحية وخلافه ب مثلا 10 كمان لما تيجي هتبيع هتبيع ب 20 ويبقى كانك يا ابوزيد ما غزيت أو يمكن يكون هتبيع بزيادة شوية بس زيادة مش كثيرة واللي تستاهل كل التعب والعناء ده

أنا في رأيي اللي يعمل مشروع زراعي يبقى يعمله علشان هدف أول وهوه الاكتفاء الذاتي وده في حد ذاته هدف كبير لو حققته في ظل الغلاء المعيشي اللي احنا فيه اليومين ده يبقى ممتاز بالإضافة إلى ربح ضعيف على المدى القريب وربح كبير على المدى البعيد (أنا حاسس إني بكتب لوغاريتمات) بس هوضح شويه يعني لو عندك مزرعة مثلا هتحس إن اللي بتصرفه واللي بتربح منه مش كثير قوي لكن تعالى مثلا بعد كام سنة هتلاقي إن سعر الأرض إختلف كثير جدا يعني لو انت شاري الأرض مثلا من سبع او ثمن سنين ب مثلا 250 ألف هتلافي ان سعرها الوقتي يجيب 2 مليون ونصف

رأيي من الآخر يا إما تشتري أرض بسعر رخيص وتزرعها وتبقى بتعملك الاكتفاء الذاتي اللي اتكلمت عليه سابقا يا إما تسيبها كده (تسقعها يعني) وأهوه سعرها بيزيد والأرض زي ما أنتم عارفين بتزيد وعمرها بترخص

أو إنك تستثمر في العقارات يعني لو تعرف تشتري أرض بالمبلغ ده ووحده واحده تبنيها عمارة وتبقى في الأخر كل شغلتك إنك تروح كل شهر تلم الإيجار يعني أحسبوها معايا لو عمارة خمس أدوار على شقتين والشقة بتأجرها ب 500 جنيه إذا ما كنشي اكثر من كده يبقى العمارة دي بتجيبلك كل شهر خمس ألاف جنيه في الشهر .. صدقوني مش هتلافي مشروع زي كده يدخل المبلغ ده شهريا وفي أمان كده وإنت مطمن

معليشي طولت عليكم قوي قوي قوي

تمنياتي للجميع بالتوفيق

[هشام عباس]

السلام عليكم

انا شايف ان المشروعات الزراعيه الي هيفكر فيها هيكون هدفه تنمية المجتمع اكتر منه استثمار شخصي اما الأستثمار الشخصي فأحسن حاجه في العقارات وانا ان شاء الله لما انزل مصر هستثمر في العقارات

[muslim4ever]

الاستاذ درويش

يؤسفنى انى اقراء هذا الكلام منك وانت الدارس والخبير بمهنة الزراعة فما بالك بنا الطامعين فى الاستثمار الزراعى او الانتاجى

اختلف معك قليلاً استاذ درويش فتوجد نماذج ناجحة بشكل مشجع ومبشر وقد لاحظت بعد استقراء للوضع ان كثير من نماذج الفشل فى الاستثمار الزراعى هو الفهلوة

المصرية وتقمص دور سنبل وكل واحد يشمر ويضرب دماغة فى الارض بدون علم ولا خبرة ولا دراية ولا استعانة باهل الخبرة فى المجال الزراعى فيحدث الفشل بكل تاكيد

توجد الاف المشاريع الزراعية والحيوانية ناجحة بشكل جيد ومربح ولاكنها اتبعت سبيل العلم والخبرة واستشارة من لدية الخبرة الكافية للنجاح.

[رورة]

بالنسبالي عيزة اول حاجة اعملها اول ما يبأة معايا مبلغ كويس، سواء نزلت مصر ولا لأ .. اني اعمل حاجتين

1- استغنى عن مبلغ ميكونش كبير اوي وارميه في البورصة واسيبه بأة يكبر ولا ينقص هو حر.

2- اشتري دهب كتير، مش عشان انا بحب الدهب.. ولا عشان البسه واغيظ الناس لأ.. عشان الدهب كل يوم قيمته بتكبر عن الأول.. يعني لو السنادي جبت خاتم بألف.. السنة الجية هيبأة بألفين

واهو من غير وجع الدماغ في البنوك والفوايد وحلال وحرام وارف

[HDarwish]

الأستاذ مسلم فور إيفر

أنا معاك وكنت بكتب الكلام ده وانا مستاء طبعا إني أقول الكلام ده على المشاريع الزراعية بس للأسف هوه ده الواقع

وإنت عندك حق في نقطة مهمة جدا وكويس إنك ذكرتها وهي دور الفهلوة المصرية واللي يقولك ده أنا فلاح إبن فلاح والزراعة دي لعبتي الكلام ده غلط وممكن يكون صح في الأراضي الطينية بس نظرا للآتي:-

1- الأرض الطينية تتحمل قلة المياه بدرجة كبيرة عن الأرض الرملية نظرا لقدرة تمسك الأولى بالمياه عن الثانية

2- الأرض الطينية غنية بالعناصر الغذائية اللازمة بعكس الأراضي الرملية (فقيرة في عناصرها الغذائية) وده طبعا بيأثر على تكاليف الزراعة بشكل كبير جدا

3- الظروف المناخية واختلاف طرق الري

وغيرها من الأسباب اللي تخلي أي واحد عنده أرض استصلاح ما يستغناش عن مهندس زراعي ذو خبرة في هذا النوع من الأراضي

وما ياخدهاش بالدراع .. يعني المهندس بيقدر يحلل التربة والمياه ويشوف فين العيوب علشان يقدر يعالجها من البداية وبعد كده يمشي صح .. ودي الغلطة اللي بيقع فيها كثير من اللي بيدخلوا المجال الزراعي دون وعي أو خبرة وبعدين يندموا يوم لا ينفع الندم

كمان اللي عايز يكسب كويس من الزراعة بجد في وجهة نظري هوه الاتجاه الى التصدير واعرف نماذج كويسه جدا في المجال ده وماشاء الله عليهم بيكسبوا كويس جدا جدا .. بس طبعا مش أي حد يقدر يدخل في مجال التصدير

بس أنا لسه على رأيي المشاريع العقارية ربحها مضمون وسهل وأكثر من المشاريع الزراعية

[geeemooo]

بصفتى يا جماعة لسة راجع من السعودية ........

عاوز اقول حاجة بسيطة خالص ان الوضع الحالى فى مصر لا يسمح بإقامة اى مشروع ولا حتى محل فول وطعمية عشان مافيش مشروع بينجح فى مصر

طبعا هاتقولوا انى متشائم بس والله انا بتكلم بجد

احسن حاجة انكم تحاولوا تستثمروا فلوسكم فى الأراضى ... دى الحاجة الوحيدة الى مش بتخسر بالعكس بتزيد

وإحزروا البنك عشان البنك الفلوس فيها قيمتها بتقل

وربنا يوفق الجميع ويجعله عامر :waving:

[قائد المدفعيه الهولنديه]

انا عن نفسى هجيب بيهم شويه حديد كام طن كده على قد الحال و شويه اسمنت بورتلاندى .... و اقعد ابيع فيهم و جبرت على كده ....... بس ده لو رجعت مصر اساسا :waving:

[سكر]

فى مشروعين ناجحين جدا فى مصر حسب علمى

ولا يحتاجوا اى مجهود و خبرة

دة غير المشاريع الاخرى الناجحة ولكن تحتاج مجهود جبار وراس مال كبير وخبرة عميقة

نرجع للمشروعين الناجحين

المشروع الاول هو العقارات بكل ما فيها من (اراضى -شقق- محلات)

المشروع الثانى فتش عن الصين

ليا اصحاب كتير تركوا اعمالهم ومحدش سافر ولااتبهدل زى حلنا وفكر ان يستور اى شى وكل شى من الصين من اول الفانوس حتى السيارة

انا شايفهم ناجحين ماديا جدا وعملوا فلوس انا معملتهاش فى الغربة

بس للاسف حاسس انه تخريب للبلد

وربنا يعوض على البلد الى المستثمر فيها لازم يكون معاة 500 مليون عشان يبدا يفكروا ازاى يساعدوه

[أبو عمر المصري]

الأراضي والعقارات الاستثمار الأمثل هذه الأيام

وهاديك مثال واقعي انا عايشه

انا ونسيبي هو أخد أرض زراعيه وانا أخدت أرض سكنيه من حوالي 5 سنوات

هو طلع منها شوية خيار وطماطم ماغطتش مصاريف زراعتها وتشغيلها مع ان فيه مهندس زراعي معاه وانا والحمد لله الأرض زاد سعرها

راح باع الأرض وحط فلوسها في عقار

العقار ثم العقار ثم العقار

[بيرو]

طبعا العقارات مفيش اختلاف على ربحها خصوصا فى الوقت الحالى

لكن

هتبقى شغلتك بس انك سمسار او صاحب عمارة؟

جربت تقعد فى مزرعة جميلة وخصوصا لو انت اللى عاملها وملكك؟

مش عايز ولادك يتربو فى بيئة نظيفة بعيد عن المشاكل؟

انا لسة شايف ان الواحد لو ربنا قدرو واشترى قطعة الارض مش ضرورى كبيرة اوى ماتزيدش عن 10 فدادين فى مكان جديد ومش بعيد زى وادى النطرون وواحدة واحدة ابتدى يزرع ويعمر فيها ويبنى حتة بيت صغير جميل

ومش ضرورى تكسب كتير يا اخى فى الاول

ما احنا متغربين وعمالين نشتغل ونتعب وعمرنا بيضيع من غير ما بنحس بية

لسة هنرجع مصر نضيع الشوية اللى باقيين

على فكرة انا مش كبير انا عندى 30 سنة لكن حاسس الاحساس دة (انى مش عايز اعيش طول عمرى اشتغل واجمع فلوس وبعدين فجأة اموت)

كلنا هنموت لكن قصدى لازم نحصد نتيجة تعبنا لازم نستمتع حتى لو صرفنا كل اللى حوشناة لان الهدف من التحويش وجمع الفلوس انها تتصرف بردة على استمتعنا وراحتنا

احنا خرجنا عن موضوعنا الاساسى

روح الصحرا مكان مش بعيد واعمل لنفسك بيئتك اللى على مزاجك وعيش واستمتع بالحياة

[هشام عباس]

بصراحه يا بيرو حلمك جميل جدا بس مش عارف ليه انا حاسس انه صعب التحقيق وخصوصا لو عندك اولاد في المدارس زيي طيب هتوديهم مدارس فين؟ وانت في الصحرا وهتقدر تحرمهم من العيشه في المدينه؟ وسط اهلهم؟ عموما انا كمان شايف ان العقار احسن استثمار في مصر وهو ده الي انا عامله دلوقتي وبتمنى اني استلم حتة الأرض بتاعتي وابنيها وانزل اعد فيها انا وولادي مع مشروع صغير كده للمصاريف

[ايهاب سالم]

منصحكش ترجع مصر

[هشام عباس]

انا عارف يا ايهاب انك مش بتحبز ابدا الرجوع لمصر ويمكن انت تكون واجهتك صعوبات كتيره جدا هناك وهي الي اثرت على تفكيرك انما انا عارف اني يوم ما اخد قرار الرجوع لمصر هكون مرتاح جدا هناك ان شاء الله