هتعمل اية لما ترجع مصر

[ايهاب سالم]

انا عارف يا ايهاب انك مش بتحبز ابدا الرجوع لمصر ويمكن انت تكون واجهتك صعوبات كتيره جدا هناك وهي الي اثرت على تفكيرك انما انا عارف اني يوم ما اخد قرار الرجوع لمصر هكون مرتاح جدا هناك ان شاء الله

ربنا يوفقك

لكن أنا الحقيقه مش عارف إزاي الواحد يعيش مرتاح جدا في مصر .. حتى لو معاه فلوس كتير

إذا كان كل حاجه حواليك تطلع الروح

لو هو موضوع فلوس .... انا كان ممكن ارجع مصر بعد 10 سنين في قطر و اشتري فيلا و عربيه حلوه و افتح محل

لكن برضه دي مش هي الحياه المستريحه و لا هي دي راحة البال

إنت أصلك مش هتفضل 24 ساعه حابس نفسك في فيلتك في التجمع الخامس

مش هتمشي بعربيتك الأخر موديل في الشوارع المكسره وتتطحن في زحمة المرور

مش هتاكل أغذيه بمبيدات مسرطنه

مش هتشم هوا من أعلى معدلات التلوث في العالم

مش هيجيلك حرقان في عنيك و صدرك من السحابه السوداء

مش ممكن أهيف أمين شرطه يوديك ورا الشمس بقانون الطوارئ لو شكلك معجبوش

مش ...................

كمل إنت كل السلبيات و المشاكل اللي كلنا عارفينها

هتعزل نفسك إنت و أولادك إزاي عن كل المشاكل الي حواليك

لا يوجد أفضل من مشاركة وجدي للتعبير عن الفكره

يعني أنا ركبت احلى عربية فيكي يا مصر...فين بقى الشارع النضيف إلى حمشي فيه؟ طب نظرات الحقد من الناس إلى محشورة في الميكروباسات أعمل فيها إيه؟؟؟ طب الهوا النضيف؟ طب حاقعد أكل في أغلى مطعم فيكي يا مصر والناحية التانية من الشارع فيه ناس بتشتري عضم الفراخ علشان تأكل عيالها؟؟؟... طب حادخل أولادي أحسن مدارس والبسهم أنضف لبس وأجيبلهم سواق بعربية يوديهم ويرجعهم... طب وهما واقفين في الإشارة لما يشوفوا عيال في سنهم حافيين ودايرين بورق كلينكس في الشوراع ويبصوا لأبنك و بنتك وعينهم عجينة حقد على ذل على غضب على حرمان... ويسألك هو بيبصلي كدة ليه يا بابا....تقوله إيه؟؟؟؟

أنا فعلاً عايز أعرف صدقني.

أي حد خارج مصر و عايش مستريح مع زوجته و أولاده يحمد ربنا على النعمه و يفضل عنده حتى لو محوش و لا مليم

يخليه عنده برضه

هوه كسبان العيشه النضيفه و راحة البال

تم تعديل 12 يونيو 2008 بواسطة ايهاب سالم

[EL SHABRAWY]

انا شايف ان موضوع الرجوع او لا لايتم بناحية عاطفية لان اى واحد ساب البلد فكر بعقله اولا قبل قلبه

ثانيا احنا لمل بيجى الوقت و نقرر السفر لاول مرة تجد كل الناس تقرب منك و تودك لانك مسافر و دى بتكون اخر لقطة فى راسك بس للاسف لما ترجع و تستقر تجد انك اتغيرت و للى حواليك اكتر منك وساعتها بتكون الصدمة الكبرى

يعنى من الاخر كده زى ما حكمت عقلك فى الاول حكمه و انت بتقرر رجوعك

لو سالتنى عن راى انا شايف ان بلاش خليك عندك احس

[سكر]

اخى ايهاب جزاك الله خير على مقولتك

[أي حد خارج مصر و عايش مستريح مع زوجته و أولاده يحمد ربنا على النعمه و يفضل عنده حتى لو محوش و لا مليم

يخليه عنده برضه

هوه كسبان العيشه النضيفه و راحة البال

وفعلا عندك حق بعض الشى ولكن ممكن اختلف معاك بعض الشى

ممكن نطبق المبدا دة فى فترة من حياة الانسان وليس كل الحياة بمعنى ان ممكن تطبق هذا لبعض السنوات وليس كل السنوات

وانا مع السفر والاختلاط بالعالم والحضارات المختلفة

لان لو كل واحد فكر بنفس الطريقة يبقى كلنا ننسى البلد ونشوف بلد تانى

مش عايزك تاخد الكلام بصفة شخصية بس واجب على كل واحد الاصلاح فى البلد( بما يقدر)

انا معاك انك مش ممكن تقدر وانت فى مقتبل حياتك لكن بعد كدة انت تقدر يعنى ممكن تفتح بيوت ناس بمشروع صغير

يا جماعة فى ناس ماتت فى حروب عشان بس نعيش فى البلد مش لازم تكون الشوارع مرصوفة بس الناس ماتت عشان تعيش على الاقل فى ارض بسلام وعليك انت ترصف الشارع

طبعا بدون لا ضرر ولا ضرار

طيب بلاش هو يا جماعة لو حصل فى مصر حرب والبلد طلبت الشباب عشان الحرب هل هنقول الحكومة وحشة واحنا مش هنحارب معاة

ولا نبعت شوية فلوس ونقول عملنا الى علينا

اصلح نفسك وابنى نفسك بس متنساش حق البلد عليك فى اصلاحها

تم تعديل 12 يونيو 2008 بواسطة ataamer

[Automatic]

مش عايزك تاخد الكلام بصفة شخصية بس واجب على كل واحد الاصلاح فى البلد( بما يقدر)

انا معاك انك مش ممكن تقدر وانت فى مقتبل حياتك لكن بعد كدة انت تقدر يعنى ممكن تفتح بيوت ناس بمشروع صغير

يا جماعة فى ناس ماتت فى حروب عشان بس نعيش فى البلد مش لازم تكون الشوارع مرصوفة بس الناس ماتت عشان تعيش على الاقل فى ارض بسلام وعليك انت ترصف الشارع

طبعا بدون لا ضرر ولا ضرار

طيب بلاش هو يا جماعة لو حصل فى مصر حرب والبلد طلبت الشباب عشان الحرب هل هنقول الحكومة وحشة واحنا مش هنحارب معاة

ولا نبعت شوية فلوس ونقول عملنا الى علينا

اصلح نفسك وابنى نفسك بس متنساش حق البلد عليك فى اصلاحها

بالظبط كده.

و الكلام لازم يتاخد بصفه شخصيه لأن الهدف في الحياه بيختلف من شخص لأخر.

في ناس عايزه تأخذ و في ناس عايزه تعطي......في ناس عايزه تستفيد وناس عايزه تفيد.........في ناس خايفين علي مستقبلهم وناس خايفين علي مستقبل بلدهم و أهلهم.

في ناس بتساعد البلد من الخارج و ناس يفضلو يرجعو مصر و يساعدو بمجهدهم.

في ناس سواء عايشين في الخارج أو مصر مش ناويين يساعدو حد ألا نفسهم.

كل شخص و تفكيره و هدفه و هيا هيا زي النصيحه للهجره.........مافي أسطمبه تنفع كل واحد.

والي نفع السنه دي مش لازم ينفع السنه الجايه.

أهم حاجه أن كل واحد يفكر ويبحث قبل أتخاذ أي قرار بهذه ألأهميه.

[yasser6666]

موضوع جميل فعلا

انا مع الأخ ايهاب سالم في كل ما قال

فعلا المصري المغترب الأفضل له ولأهله انه يفضل مسافر ومغترب

صحيح انه حيتحمل عناء ومشقة السفر والغربة ولكنه حيساعد نفسه وويساعدهم من الخارج افضل الف مرة من وجوده في مصر

وبالنسبة لبعض الأخوة بيقولوا لازم نرجع نصلح البلد ونعمر فيها وده حق البلد علينا والكلام ده

اعتقد ان ده كلام انشاء بحت

يعني هي مصر خلصت فيها الناس ومنتظرين من المغتربين هما اللي يرجعوا يصلحوا البلد

مافيش اكتر من الناس والتعداد السكاني ماشاء الله في انفجار

يعني العملية مش ناقصة كمان كام مليون يرجعوا من بره

علي الاقل دلوقتي ممكن الواحد يعمل شهرية لبعض الأسر الفقيرة ويبعتها لأهله لتوصيلها وممكن في عيد أضحي يدبح كام خروف (ولامؤخذة) ويطعم الفقراء والأهل والمعارف

لكن لو هذا الشخص رجع مصر لن يستطيع عمل أي شئ من هذا

ولو قدر حيكون جزء بسيط جدا لانه حيكون حريص جدا جدا علي ماله ومال اولاده

فالنصيحة فعلا هي عدم العودة

.

انا عن نفسي بفكر انتظر كمان عشرة او خمستاشر سنة لو ربنا اراد لغاية ما الاولاد تكبر وتقدر تعتمد علي نفسها في بلاد الغربة

وبعدين انا ابقي ارجع لوحدي لما اكبر قوي علشان اقضي اخر ايامي في بلدي ووسط اهلي واصحابي

وساعتها مش محتاج قوي اني يكون معايا فلوس كتير ومش محتاج مشاريع ولا غيره

يعني لقمة هنية وكفاية قوي ومش مطلوب اكتر من كده وكان الله بالسر عليم

[سكر]

الاخ ياسر

فعلا المصري المغترب الأفضل له ولأهله انه يفضل مسافر ومغترب

طبعا كلام سليم 100 % ولا يختلف علية اتنين

ولكن انا اختلف فى انه لحد امتى يجب ان يكون هذا الوضع هو الافضل

الحياة متغيرة وسنين العمر متغيرة ومتطلبات الحياه متغيرة

انا مش بكلم كلام انشاء بحت زى ما انت كتبت قبل كدة بس دة حقيقة اسال الى جلس فى الغربة فوق العشرين سنة

فى حق للبلد عليك ولاهل عليك خد وقتك خد راحتك فى السفر والغربة خمس عشر خمستاشر عشرين سنة بس اوى تنسى انك ليك وطن

يجب ان يكون لك فية دور ايجابى من اجل اصلاحة ولو حتى بطوبه ترميها فى المياة لتحريكها

لكن نبيع القضية ونقول دة بلد وحشة وخلاص

وكمان بتقول

يعني هي مصر خلصت فيها الناس ومنتظرين من المغتربين هما اللي يرجعوا يصلحوا البلد

مين قال الكلام دة الفكرة مش فكرة عدد دة احنا عندنا العدد فى الليمون

بس البلد محتاجة ناس ذى حضرتك عندهم خبرة جديدة وثقافة جديدة تنقلها لهم ولو حتى ساعة فى العمر

بس لازم تساهم

تبرعاتك لفقراء مصر شى جميل جدا وجزاءك الله خير علية

بس اسلاميا دة جز من ذكاة المال فين بقى ذكاة العلم والخبرة والصحة

متخدش الكلام على محمل شخصى بس احنا مع بعض بنفكر بصوت عالى مش لازم اكون صح او انت تكون صح بس

كل واحد من القراء يختار الاصح لحاله ولمستقبلة

[aimen]

مش عارف ليه انا متغاظ من صيغة السؤال ؟ اليس من الأفضل تعديله حتعمل ايه وانت بره مصر للناس اللى فى مصر ؟؟ بأحلم بمؤسسة أو جمعية تتولى اسثمار اموال المغتربين وعمل مشروعات فى الداخل بأموال الخارج وبكده يبقى اللى فى الخارج اسثمر تعبه وامواله وكمان افاد الداخل أما موضوع العقارات فأنا حاسس انه بقى حاجه سخيفة جدا...عندنا فى القرية اللى انا منها بتوع ايطاليا خلوا اسعار الأرض نار وعلى صعيد مصر كلها اتوقع ان التفكير فى الإسثمار العقارى والتسقيع والمشروعات الغير منتجة ادت لتلك الهوجة فى اسعار العقارات ...كفاية كده

[بيرو]

ازيكم

يا جماعة كلنا كمغتربين قادريين نفهم ونحس كويس راى الناس اللى بتقول خليك برة مصر احسن وان الحال برة احسن 100 مرة من جواها وكل الكلام دة

لكن

كل الناس المغتربين وخصوصا فى بلاد عربية اكيد حاسين طول الوقت بانهم غرباء حتى ولو مرتاحين حاسين انهم ضيوف حتى ولو عندهم مال الدنيا حاسين انهم ضعفاء حتى ولو كانو فى مراكز عالية

قصدى ان فية تمن كبير بيندفع لغربتنا ممكن ما نكون مش حاسينة اوى لكن بيندفع غصب عنك

ربنا خلق الانسان ووضع ضمن مكوناتة الاساسية الانتماء (لوطنة ولدينة ولنادية ولقريتة)بصرف النظر اية انتمائة لكن هو مكون اساسى لكل انسان فينا زى الخوف والحب والانانية وغيرها من المكونات

لازم الانسان يرضى ويشبع حاجتة لانتمائة لوطنة والا هايحس طول الوقت انة تعبان ومتضايق حتى ولو مش بشدة لكن عندة حاجة ناقصة ودة اللى بيحس بية كل مغترب وانا منهم

انا مرتاح جدا الحمد للة متجوز ومخلف وشغلى مريح جدا ومرتبى معقول جدا وعندى عربية وشقة وكل حاجة لكن فية حاجة نقصانى وهى انى اشبع رغبة رجوعى وانتمائى لوطنى ....زى ما يكون فية واحد عندة احتياج للحب (ان انسان يحبة ويقدرة)

الهدف

الهدف من كلامى ان فية تمن بيندفع بارادتك او بدون ارادتك طالما انت متغرب

وان فية رغبة مش هيتم اشباعها الا برجوعك لبلدك ودى هتفضل تعباك طول حياتك ونفسك تحققها حتى ولو عند موتك

كانا بنعلق دة على شماعة التوقيت

فى ناس بتقول لما البلد اللى انا فيها تمشيبنى هبقى امشى

وفى ناس تانية بتقول هنا احسن من هناك (اعتقد انة محاولة لخداع نفسك) لان ببساطة هنا مش احسن من هناك لكن انت نفسك انك تكون هنا وفى نفس الوقت هناك

يبقى انت مشكلتك الحقيقية هى فى الطمع..... متزعلش من كلمة الطمع ....الطمع دة بردة مكون من ضمن مكوناتنا كبشر

ولازم نعترف بدة

واذا كانت المشكلة انى طماع عايز بلدى وفى نفس الوقت عايز ابهار وامكانيات بلد غيرى يبقى اية الحل ؟

الحل انك لازم تعمل اللى انت عايزة وبتتمناة وشفتة واتعلمتة فى بلدك مصر

ساعتها هتحس بطعم النجاح الحقيقى

انا عارف ان كلامى ممكن تقولو علية خيالى وكلام انشاء وغيرة

لكن هى دى الحقيقة وانت عارف انها الحقيقة

ممكن ما تكونش عارف تحققها

لكن هى الحقيقة

وبنا معانا كلنا ويقدرنا على تحقيق راحتنا

[se_ Elsyed]

نداء للإخوة مكسري المجاديف ..

السؤال بيقول : هاتعمل إيه لما ترجع مصر ؟

فإن ما كنتوش ناويين ترجعوا وعايزين تعيشوا وتموتوا بره ... يبقى حياكم الله ... لكن مافيش داعي تكسروا مجاديف الناس اللي نفسها ترجع تفيد بلدها وتفيد نفسها ... وإعتبرونا مجانين يا أخوانا وإتفرجوا علينا بس من بعيد لبعيد أحسن نعديكم ....

اللي يسمع كلامكم الشخصي بصفتكم تتعدوا على الصوابع يعني .. يفتكر إن البلد لا فيها مشاريع ناجحة ولا ناس عايشه وزي الفُل وكإننا عايشين في جهنم وبنأكل من خشاش الأرض .....

---------

[هشام عباس]

يسلم بقك يا سين سين اخدت الكلام من على لساني الواحد مستني اليوم الي هيرجع فيه لمصر لأهله وجيرانه واصحابه واللمه والعيله والفول بتاع الصبح الي مهما اكلته في اي مكان في الدنيا مش بيكون زي الفول الي في مصر معلش بقول الفول اصلي فقري اعمل ايه؟

[se_ Elsyed]

والله كنت داخل اكتب أفكار كام مشورع في دماغي .. وقرأت كلام سوداوي احبطني وقلت أحتفظ بأفكاري لنفسي طالما الناس شايفه الدنيا في منتهى السواد بهذا الشكل ..

[هشام عباس]

ياعم سين سين انت مش قلت الي مش عاوز يرجع مصر خلاص هو حر ويبعد عنا علشان منعديهوش!!!!!!!!!!!!!! خلاص قلنا بقى على افكارك للمشاريع الي ناوي تعملها لما تنزل مصر حاكم انت كلامك بيكيفني

[مصري أصيل]

أول ما أتغربت كان عندي هدف واحد . و هو أني أعمل قرشين أتجوز بيهم . وقد كان والحمد لله الجواز أخد أول 5 سنوات غربة . و بعدها أصبح الهدف أني أعمل قرشين و أنزل أعمل أي مشروع في مصر.

في بداية زواجي سألتني زوجتي أنت ناوي تتتغرب أد أيه تاني ؟؟؟ فقلتلهل يعني سنتين كده.

فقالت سنتييييييييييييييين طبعا بلهجة أستغراب مخلوطه بأعتراض مخلوطه بحاجات تانيه كتير جداً .لأنها في الوقت ده كانت بتكره الغربة جداً

و دلوقتي أحنا بقالنا 9 سنين مع بعض في الغربه و لما تيجي فكرة مجرد فكرة أننا نعمل حاجه في مصر الدنيا تقوم وما تقعدش . طبعاً لأنها مش عايزه ترجع تاني.

و بصراحة الوضع في مصر ما يشجعش أي حد علي الرجوع أبداً و لذلك بدأت التفكير بجدية في عمل مشروع خاص هنا أأمن بيه مستقبلي ومستقبل أولادي لأن الراتب مهما كان مش هيحقق أي شيئ سواء هنا أو في مصر و ذلك بعد زيادة الأسعار بهذا الشكل الجنوني .

و أنوي من عائد هذا المشروع البدء في أستثمار هذا العائد في العقار بمصر .

بس أصبح بيني و بين زوجتي خلاف في الرأي حول هذه النقطه .

هيه رأيها أن لو أصبح معانا مال الدنيا مش المفروض نرجع مصر تاني .

و أنا رأيي أن لما نأمن عيشتنا في مصر كويس جداً و نأمن مستقبل ولادنا نرجع تاني لأن فعلاً اللي معاه فلوس في مصر عايش كويس جداً و علي رأي واحد كويتي كنت أستمع له بالصدفه . كان بيقول أن أحسن شيء في مصر أن لو معاك فلوس بتعرف تصرفها في أيه أنما هنا بتكون مخباتك ( يعني محفظتك) مليانه فلوس و مش عارف تصرفها في أيه.

بس مافيش أي نيه ولا وقت محدد أبداً للعوده كله علي حسب توفيق ربنا. والله الموفق لنا جميعاً

تم تعديل 14 يونيو 2008 بواسطة مصري أصيل

[iloveegypt]

اول ماراجع مصر هعمل جمعية واقبضها الاول :huh: بس بجد زى ما سى السيد قال يا ريت الناس اللى شايفة مصر سودة مينكدوش علينا وبالمناسبة هحكى قصة حقيقية حصلت لاحد اقاربى وهو مهندس قعد فى السعودية اكتر من 11 سنة بدون اجازة واحدة ولما رجع مصر وجد كل زملائه اللى ما سافروش اللى عنده شكرة كبيرة واللى عند ه 2-3 عمارت وشقق على النيل وهو زى معظم المصريين اللى فى الغربة عايش مبسوط وبعيد عن جحيم مصر ولكن طبعا لما شاف كدة قال انا حاسس انى ما سافرتش وزملائى اللى فى مصر هم اللى سافروا يعنى من الاخر موضوع الفلوس بالذات ده رزق وليس له علاقة انت برة مصر ولا جوة بموت فى عيشة مصر

[م.سامح المصرى]

انا ان شاء الله

مشروعى هايكون من الاكتفاء الذاتى ان شاء الله

ولو جت فرصة برة يبقي مش اكتر من سنة بأمر الله وارجع هوا

لان ان شاء الله المشروع رأس مالة مش كبيرة

وهوا انشاء مكتب دعاية واعلان صغنطت متخصص فى اصدار كتيب

انا مقتنع جدا جدا بكلمة كان قايلها الى اتعلمت عندة الجرافيك لما كان بيطبع الاجندة بتاعت كل سنة

كان بيقول اية بقى

انت لا تحتاج للمال لتبدأ مشروع اكثر من احتياجك لفكرة وخبرة المشروع

وحبت كلام كدة مش فاكرة

انا لقيت الفكرة

وان شاء الله جارى التنفيذ

والحمد لله مش بتأثر بالناس الى بتحبطنى لان واحد صحبى حاول يحبطنى من المشروع دا

بس ما اثرش فيا بالعكس انا الى اثرت فية واقنعته

يا ريت كل الى عندة مشروع ما يتأثرش بأقوال الاخرين

[ziad]

لو معاك فلوس أو بلكنتى جنود تقدر تعيش ملك فى مصر وملك ديه كلمه بسيطه,فى بلد فى الدنيا أعلى ضريبة دخل فيها 20%,فى بلد فى الدنيا تكلفه إيجار شقه 200 متر لمده خمس سنين أقل من 250 دولار فى الشهر,فى بلد فى الدنيا تكلفة رغيف العيش الغير مدعم أقل من 20 سنت, فى بلد فى الدنيا تعليمها الجامعى فى كلية طب أرخص من تمن موبيلين نوكيا,فى بلد فى الدنيا غير منتجه للبترول تمن تنك بنزين فيه حوالين 20 دولار,الناس هنا عندى ممكن يتحركو بجماعيه ضد الحكومه الفيدراليه لو عرفو الكلام ده

فى المقابل فى تخبط وعشوائيه,إستغلال وفساد,سرقه ورشوه,كل السلبيات الى كلنا عارفينها ديه بس الحقيقه أن سببها أنا وأنت لما شفنا السيئات الكتير الى فى بلدنا فضلنا الهروب وأنا مالى يابا,أنا أشوفلى عقد كويس ولا بلد هجره مريحه أظبط نفسى فيها وأنا ومن بعدى الطوفان.

بالنسبه لموضوع التوبيك أنا إن شاء الله ناوى على كذا حاجه

1) كل محوش شلن بستثمره حالا فى حاجتين ,بشترى دهب مستعمل من أى قريب,جار مزنوق وعايز يبيع,التانيه بشترى فى صندوق أستثمار فى البورصه,والحمد لله مكسبى من بناير الى فات فى البورصه على الرغم من كلام الجرايد عن الأسبوع الأسود والأتنين البمبى والخساير والكلام ده لكن مكسبى حوالين 10-20 %

2) العقار وده بعون الله على رمضان,نازل عشان بقالى 4 سنين بصلى التروايح بصعوبه,العقار إبن بار كلمه من دهب قالها عضو هنا وقيمتها دهب,مش لازم تشترى حاجه كبيره,قانون الضرايب العقاريه عامل إعفاء لحد 400 ألف باين,خليك هناك,شقه فى السلام أو قباء أو صقر قريش ب 100 ألف تأجرها وتركنا لما تجيبلك رقم محترم,شقه صغيره فى كفر الشيخ ولا الزقازيق هتعلى أكيد لأنهم بلاد مساحات التوسع فيها شبه منعدمه وقانون العرض والطلب ساعتها يجى فى صفك

3) الحاجه الأخيره والمهمه,حاول تقبض بالعمله الصعبه وتعيش وتصرف بالجنيه,يعنى إيه؟؟

هقولك,يعنى أعمل أستثمار مريح فى بلدك الى أنت شغال فيها ,عشان لما تقرر ترجع يفضل الأستثمار ده بيقيضك سواء بالدرهم,بالدينار بالدولار,كمثل بسيط,شقه أوضه وصاله فى دبى بتجيبها بالتقسيط من بنك إسلامى تأجرها 60 أاف دينار فى السنه,لو خلصت تمنها كده عائد إيجارها يريحك لو رجعت مصر,ويا سلام لو شقتين بقى,بعون الله ناوى على كده

[ايهاب سالم]

بس أصبح بيني و بين زوجتي خلاف في الرأي حول هذه النقطه .

هيه رأيها أن لو أصبح معانا مال الدنيا مش المفروض نرجع مصر تاني .

عداها العيب

[بيرو]

الى الاخ ايهاب سالم

انت تعليقاتك كلها ضد مصر والعيشة فى مصر

لكن انا عارف انك من جواك نفسك تعمل العكس

بدليل انك دلوقت بتقرا وتعلق وتهتم جدا باخبار المصريين فى محاورات المصريين

هنصحك نصيحة لو كان اى الحق فى النصيحة

حاول تكون صريح مع نفسك وقول لنفسك انا فعلا بحب مصر

اسف على كلامى وتدخلى فى اراءك لكن انا بحبك علشان انت مصرى

[بيرو]

انا عاجبنى جدا كلام الاخ سامح المصرى

عاجبنى اصرارة على النجاح

عاجبنى عدم تضخيمة للمعوقات اللى هاتقابلة

عاجبنى روحة الابتكارية وتركيزة على الفكرة قبل اى حاجة

يا ريت كلنا نكون زيية

شكرا يا اخ سامح على روحك الجميلة العالية اللى ممكن تساعد ناس كتير على تخطى حاجز الرعب من مواجهه الواقع فى مصر والاحباط المسبق قبل خوض التجربة و مستنقع السلبية الرهيب اللى وقعنا فية

[بيرو]

مصر اسم كبير جدا ...... يا ريت نحافظ علية