هتعمل اية لما ترجع مصر

[ايهاب سالم]

الى الاخ ايهاب سالم

انت تعليقاتك كلها ضد مصر والعيشة فى مصر

لكن انا عارف انك من جواك نفسك تعمل العكس

بدليل انك دلوقت بتقرا وتعلق وتهتم جدا باخبار المصريين فى محاورات المصريين

هنصحك نصيحة لو كان اى الحق فى النصيحة

حاول تكون صريح مع نفسك وقول لنفسك انا فعلا بحب مصر

اسف على كلامى وتدخلى فى اراءك لكن انا بحبك علشان انت مصرى

هو أنا قلت فين إني مش بأحب مصر

أنا طبعا نفسي أرجع أعيش هناك

لكن للأسف ده مستحيل حاليا و في المستقبل المنظور في تقديري الشخصي المتواضع

أنا طبعا بأحب مصر .. هي دي محتاجه كلام .. امال أنا هنا بأعمل أيه

إزاي مش هأحب بلدي اللي إتولدت و عشت فيها طول عمري و كنت لسه فيها أجازه من 3 أشهر فقط

الفكره كلها إني واقعي و مش بأضحك على نفسي

أنا بحب مصر بعقلي مش بقلبي ..

مش بأحبها على نفسي حب ساذج

بأحبها بمقدار و بأحب قطر اللي عشت فيها عشر سنين بمقدار اخر و بأحب كندا الي عايش فيها حاليا بمقدار أيضا

و عارف بأحب في كل بلد أيه و مش بأحب أيه

مش بأحب كلام الشعارات و الخطب و مصر الرياده و الحضاره و أحسن شعب و أذكى شعب و أخف دم و إحنا اللي علمنا الدنيا و العرب و كل الكلام اللي بنضحك به على نفسنا و مش بيأكل عيش

إحنا كلنا سلبيات كمصريين و ليس كحكومه و انا أول واحد فيكم ..

صحيح كل بلاد العالم فيها سلبيات ...

لكن سلبيات مصر أصبحت كتير جدا و تخنق العايش جواها و حتى الزائر ليها

أنا بأحب مصر لكن من بعيد لبعيد ... لان اللي بيحب مصر من قريب بيتعور

[madzoro]

إحنا كلنا سلبيات كمصريين و ليس كحكومه و انا أول واحد فيكم ..

صحيح كل بلاد العالم فيها سلبيات ...

لكن سلبيات مصر أصبحت كتير جدا و تخنق العايش جواها و حتى الزائر ليها

أنا بأحب مصر لكن من بعيد لبعيد ... لان اللي بيحب مصر من قريب بيتعور

كلامك انا مقتنع بيه تماما

اللي بيحصل في مصر دة من الشعب لان اللي بيحكمنا مننا و فينا

نص الشعب بيحكم النص التاني ... مين في مصر مالوش حد قريبه ضابط شرطة او جيش او في وزارة او او او ....................

اغلبنا كده .... و الدليل كلمة ( انت مش عارف انت بتكلم مين ) اللي على كل لسان :lol:

المشكلة فينا احنا ......... عموما ده رأي شخصي

يا رب يصلح حالنا و حال بلدنا الغالية مصر و يقدرنا نعملها حاجة ترفع من شأنها

[رمضان]

بصراحة مش عارف هعمل ايه في مصر

المشكلة ليست مشكلة مادية المشكلة هي اني اتعودت على نظام معين اتعودت على حياة نوعا ما سهلة

بجد نفسي ارجع استقر في مصر بس كل ما انزل اجازة اشيل الفكرة من دماغي فورا

[م.سامح المصرى]

انا عاجبنى جدا كلام الاخ سامح المصرى

عاجبنى اصرارة على النجاح

عاجبنى عدم تضخيمة للمعوقات اللى هاتقابلة

عاجبنى روحة الابتكارية وتركيزة على الفكرة قبل اى حاجة

يا ريت كلنا نكون زيية

شكرا يا اخ سامح على روحك الجميلة العالية اللى ممكن تساعد ناس كتير على تخطى حاجز الرعب من مواجهه الواقع فى مصر والاحباط المسبق قبل خوض التجربة و مستنقع السلبية الرهيب اللى وقعنا فية

:lol: :) :D

ربنا يخليك يا استاذى بيرو

حضرتك اديتنى اكتر من حقى

[بيرو]

الى الاخ سامح

انا معاك فى كلام كتير جدا

وخصوصا لما اتكلمت عن سلبياتنا احنا كمصريين وان الحكومة مش دايما هى السبب

فى فيلسوف كبير قال مرة (كل شعب يستاهل حكومتة)

لكن

مش معنى كدة ان احنا نسكت ونستسلم ونبعد ونبيع ..... لكن احنا علينا مسؤلية .....لان احنا (المغتربين)سافرنا وشوفنا واتعلمنا حاجات عمر اللى قعد فى مصر ما هيعرفها

احنا علينا مسؤلية التغيير والتحديث ونقل الحاجات الحلوة وتحذير الناس من الحاجات اللى مش كويسة

انا كلامى شكلة كلام نظرى واكاديمى وكلام انشاء بالبلدى كدة

لكن هديك مثال كويس

ايام محمد على لما حب يرتقى بالمجتمع بعت بعثات برة تتعلم (لانجلترا وفرنسا )والناس دى هى اللى نقلت مصر كلها

طبعا دة ما يقللش ابدا من اهمية التحديث من الداخل

بس اقصد ان دة محور مهم جدا للتنمية فى مصر

انت مثلا فهمت من تعليقك انك سافرت قطر وقعدت فترة طويلة وبعدين رحت كندا يعنى انت خبرة كبيرة ممكن انت نفسك ما تكونش عارف قيمتها

لان كل واحد فينا فى البلد اللى هو متغرب فيها داق طعم النجاح الحقيقى انك تبقى رايح متعرفش حاجة وظروفك صعبة وكدة وبعد فترة تثبت وجودك وظروفك تتعدل وتبقى مرتاح جدا . طبعا الطريق للراحة مش سهل ومفروش بالورود

بالعكس

فى تعب وقلق وشغل ومعارف وايام صعبة وايام حلوة .....هى دى التجربة اللى لازم ننقلها معانا

انك تقدر تنجح

فى ظروف صعبة وناس مش كويسين احيانا ومفيش فلوس احيانا ومفيش شغل احيانا واصدقاء باعوك احيانا وحاجات كتير اوى

لكن لازم تنجح وتستمر

هى دى الروح

هو دة اللى محتاجة الشباب اخواتنا فى مصر

الشباب اخواتنا فى مصر مهزومين من قبل ما يحاربو

معدومين الثقة بالنفس

ضايعين وغارقين فى بحور السطحية

انا اسف طولت اوى لكن الموضوع دة مهم شوية

وسامحنى

[بيرو]

التعليق اللى فات موجهه الى الاخ ايهاب سالم

اما الاخ سامح

فانت تستاهل اكتر من كدة بكتير

وربنا معاك ويفقك فى كل مشاريعك

ويا رب بارك كل شعب مصر

لانهم يستاهلو حياة احسن من كدة

لما شوف وش واحد مصرى والتجاعيد والشمس مش مبينين ملامح وشة .... وبيزق عربية كبيرة اد حجمة اربع خمس مرات وعرقان وهدومة متواضعة .... ومع كل دة على وشة اللى اترسم بتجاعيدة كل تاريخ مصر على وشة ابتسامة رضا

احس اد اية انا طماع

اد اية انا مرتاح وغيرى تعبان

اد اية لازم نبذل مجهود اكتر عشان الناس دى

انا عارف ان كتير من اللى هيقرو هيقولو انى عاطفى وبفكر بقلبى بس

لكن بالرغم من العاطفية مش عيب الا انى مقاتل واحب كل واحد فينا يكون مقاتل من اجل هدفة

انتو عارفين مرة بسال واحد اعرفة ممتاز اوى بقولة اية حلمك

قاللى ان يبقى عندى البزنس بتاعى ويبقى معايا فلوس كتير

قلتلة بس انت مش مادى ولا بتحب الفلوس اوى ودة اللى اعرفة عنك

قالى نفسى اقدر ااكل مليون واحد كل يوم

يا ريت دة يكون حلمنا

يا ريت نسعى من اجل الفلوس لكن علشان اهلنا اللى مش معاهم تمن الدواء ولا الاكل وبياكلو من الزبالة

[المر]

[وسط][/وسط]السلام عليكم

قرار الرجوع الى مصر هو قرار مصيرى لاى مغترب خاصة من هم فى دول الخليج . قرار النزول نهائيا الى مصر هو قرار خاص وفقا لظروف كل مغترب و تتحكم فيه ظروف كثيرة. انا مغترب بالسعودية و لى صاحبى كان معى و قد أخذ قرار النزول النهائى الى مصر منذ ما يقرب من ثلاث سنوات و هو الحمد لله احسن حالا مما كان عليه فى السعودية و هو الان يشجنى على النزول و العمل معاه فى مجاله.و كذلك معظم اصدقائى فى مصر حالهم اتحسن كثير جدا. مصر بها فلوس كثيرة جدا و لكن كيف نستثمر فلوس غربتنا و ما هو المشروع الذى نبدأ به ؟ هذا هو السؤال الاهم . اننا جميعا مصيرنا الى مصر مهما طالت غربتنا.

[بيرو]

اللة ينور عليك يا اخ مر

انا فى مصر الان بعد غربة طويل

بس راجع تانى غربتى بعد 20 يوم ان شاء اللة

واللة العظيم يا جماعة البلد فيها فلوس بالهبل

واصحابى حالهم 100% وكانهم هما اللى مسافرين

شغالين مية يمة والفلوس كتير

صحيح الاسعار غليت وصحيح ان فى ناس تعبانة

بس اللى بيشتغل بيلاقى فلوس كتير

مصر ام الدنيا

انا مبسوط اوى فى مصر وحاسس انها اجازة سعيدة ونفسى اعمل مشروع ولا حاجة واستقر بقى