الأكل ومشاكله

[ragab2]

الأكل

خارج البيت عندى مشكلة

أثناء وجودى بالخليج وعملى بالصحة العامة عرفت أسرار المطاعم جعلتنى أفكر ألف مرة قبل الأكل خارج المنزل

والأكل

الذى يقدم للزبائن ومطاعم الهنود اللى كانوا يمسحوا أنوفهم فى ضهر ايدهم ثم يقلبوا ويغرفوا الأكل للزباين

والشاورما اللبنانية التى كانوا يعملوها من اللحوم التى إنتهى تاريخ صلاحيتها وبدأت رائحتها تفوح وتختفى معالمها باضافة بعض التوابل والبهارات والدهون لاخفاء فسادها ورائحتها العفنة وطبعا كانت تفضل لرخص ثمنها بحوالى عشر ثمن اللحوم العادية وكانت تقف على هذه المطاعم طوابير من البشر وكان البعض من مراقبين الصحة يتندر معى ويذكر أن هذه الشارومة تسحب الغذاء من الجسم بدلا من أن تضيف له شيئا

أما

الخرفان المجمدة اللى فى حجم الدجاجة فهى مشكلة تانية وقد ضبطت لدى مستورد قام باستيرادها من الصين وحكايتها أن الصين تذبح النعاج الحامل للحصول على فروة الجنين قبل أن يولد حتى تكون فروته بعد الدباغة من أثمن أنواع الفراء وتقوم بتجميد هذا الجنين وتصديره لدول الخليج على أنه لحوم ضأن طبعا أعدم من عند هذا المستورد مئات الأطنان من هذه الأجنة المجمدة وكان التقرير هو .. لحوم جيلاتينية رخوة ولا تصلح للإستهلاك الآدمى

وفى

إحدى المرات ضبط مطعم لبنانى كبير ومشهور فى الخليج يغسل الطرشى الذى تم تقديمه للعملاء ويعيد تقديمه مرة ثانية طبعا كيف تم التعرف عليه دى حاجة بسيطة عندما زاره مراقب الصحة وجد فى الحوض الإستانلستيل طرشى وأنصاف ليمون وطبعا اللى عاوز يغسل ليمون المفروض يغسله كامل قبل القطع وعلى أسوأ افتراض يتم الغسيل فى ماعون وليس فى الحوض مباشرة

أما

لو زرت مصانع تجهيز اللحمة وفرمها والتى توزع اللحوم المفرومة فى عبوات حوالى نصف كيلوجرام واقتربت من أذانات الفرم الكبيرة لهذه المصانع والتى تتسع لأطنان اللحوم وهى فى حجم حجرة ممكن سماع صراخ الفئران وهى تفرم مع اللحوم بالإضافة للزواحف والكوكوروتشيز

حتى

العجوة التى تباع فى أكياس مغلفة لأكبر الشركات المشهورة ستجد بنات العائلات الفقيرة تجلس على أكوام العجوة برجلها فى معاملها أو مصانعها اليدوية ولكن الشهادة لله يتم خلع المداس قبل الجلوس على العجوة ثم تبدأ التعبئة ويتم غسيل الأرجل واليدين بعد التعبئة وليس قبلها

وعم

ميدو السماك وصيته مرة يحجز لى ثعابين سمك لأنها من أكلاتى المفضلة وليست متوفرة فى كل وقت لأنى حرمت منها فترة أثناء وجودى بالخارج

ولما سألت الحاج ميدو بعد شهر عن طلبى أبلغنى أنه أحضرها بالفعل ومكثت لديه فترة وبدأت فى الفساد فلحقها وباعها بنصف سعرها لمطاعم السمك مع باقى الأسماك التى مكثت لديه مدة أيضا حيث أنه يتعامل مع بعض المطاعم لتوريد هذه النوعية السكند من الأسماك بنصف السعر

يتبع

[omtmam]

يا دكتور رجب حرام عليك بطنى وجعتنى طيب حاكل ازاى بره تانى :twisted: :mad: ولونى حاكل برضه اصل حضرتك متعرفش وقفه المطبخ بالذات فى الويك اند متعبة اد ايه :? :? :? فتلاقى الواحدة منا بتستنى يوم السبت من الاسبوع لاسبوع علشان تاكل بره البيت :lol: :lol: :lol: وعموما انا دخلت هنا مطاعم عرب وكانت نظيفة جدا وكذلك مطاعم الصينين الاوبن بوفيه (ذا النظام لا يمكن يطبق فى مصر المطعم يقفل من تانى يوم)

[crossfield]

بس و الله احنا شعب ما شاء الله علينا ناكل الزلط . يعنى كل المحاولات لابادتنا مش نافعة مبيدات حشرية و كيماويات ؛ فيران مهروسة مع الصراصير ؛ مياه ملوثه بروث الحيوانات ؛لحوم فاسدة بالأطنان بتتهرب للبلد؛ سلع غذائية منتهية الصلاحية ؛خلاص مش فاضل غير انهم بحاولوا يموتوا الفيران دى فيحطولها السم فى اللحمة اللى بتتفرم معاها :lol: بس برضو أنا عندى أمل اننا هننجو من كل محاولات الأغتيال الفاشلة دى . و الدليل على كده معجزة حصلت معايا : فى مرة كنا معزومين عند جماعة قرايبناو كان فيه شوربة لسان عصفور؛المهم باشرب شوربة و مع أول معلقة لقيت فى الطبق حتة ازاز كبيرة جات منيييييييييييييييين ؟؟؟؟؟ أكيد طبعاً كانت متعبية مع لسان العصفور و الهانم اللى كانت بتطبخ مخدتش بالها منها :inlove: .

و فعلاً لما راحت بصت فى الكيس لقت فيه حتة تانية أصغر . الحمد لله ان حظى جه فى الكبيرة.

لكن يا دكتور رجب لو كل واحد بطل ياكل بره عشان الأسباب دى يبقى الناس كلها هتقعد فى بيتها لاننا تقريباً مبنخرجش الا و ندور على حتة ناكل فيها .يا سيدى خللى الناس و تنبسط و أهو كله بفايدة للدكاترة :lol: :lol: :lol:

و يرجعوا يقولوا أمراض الكبد و التلوث الغذائى!!!!! :devil: :devil: :twisted: :twisted:

[بنت شعنونة]

زمان كنت مدمنة اكل برا

يعني ع الأقل 3 مرات في الاسبوع

وبالتدريج وصلنا لمرة في لأسبوع اللي هوا يوم الخميس

كنوع من الترفيه

ومؤخرا

بعد الحرب

والحالة المادية بتاعتنا كلنا اللي بقت في الأرض

بقيييييييييت اعمل اي اكل بنفسي

بيني وبينكم

ارتحححححححححتتت

مع اني ببهدل الدنيا وبياااااخد وقت

بس كدا اضمن.. :lol:

ولو ان لك برا دايما طعم مميز :?

ولاد الذين فنااااانين :(

[إبن مصر]

استاذى العزيز الغالى ..

لقد ذكرنى حديثك ورد كروس عليك ( محاولات اغتيال الشعب المصرى ) بموقف حقيقى حدث معى فى نهايه الثمانينات اثناء الصاعقه ..

كان هناك مجموعه من الليفتنت الامريكان اتوا الى دوره تدريبيه هنا فى مصر على فرقه الصاعقه الراقيه ( هذا هو اسمها الحقيقى ) ولمعلوماتكم هى فى الترتيب رقم 3 على مستوى العالم .

المهم بعد 15 يوم تدريب دون الخوض فى تفاصيل ومقارنه المصرى بالمستورد ( ربنا يحفظ رجالنا يارب ) حبيت ان وزمايلى نتبادل التعارف مع الامريكان وخصوصا اننا من المفروض هنروح لهم هناك قلنا ناكلهم ...... فسيخ......

( لاحظوا ان الجماعه دى صاعقه امريكانى كوماندوز وجرين باريه )

المهم اكلنا وعملنالهم طبق معتبر بالطحينه والزيت و الشطه والليمون والبصل الاخضر والعيش السخن وشافونا بنشرب ميه الطبق سألوا عليها قلنالهم ميه فسيخ !!! طلبوا يجربوها ... الصراحه هما جربوها ..

بعد 3 ساعات كان 5 من اصل 7 فى المستشفى وغسيل معوى وسين وجيم وهما كلوا ايه .. مين الى شافهم ....الخ المهم وريناهم هما كلوا ايه ( وطبعا الجانب المصرى فطس على روحه من الضحك ) تصدقوا حللوا مايه الفسيخ .

والى جانب تقريرهم الى قالوا فيه ان فرقه الصاعقه الراقيه هى فرقه غير ادميه قالوا اننا اخر شعب ممكن يتأثر بالحروب الجرثوميه .. نظرا لاننا نتعاطى بصوره اعتياديه الكثير والكثير من الميكروبات والبكتريا التى لم ينجحوا حتى وقت قريب فى تخليقها فى المعامل بل ونتغذى عليها .

اه والله ....

صحيح احنا ربنا بيحبنا ...

ابن مصر

[achnaton]

الأكل

خارج البيت عندى مشكلة

أثناء وجودى بالخليج وعملى بالصحة العامة عرفت أسرار المطاعم جعلتنى أفكر ألف مرة قبل الأكل خارج المنزل 

والأكل 

يتبع

العزيز الأخ رجب ..

فهمت أنا الوقت إصرارك على الزواج من منياوية .. !!!

ولكن .. العن مما قلته .. ياأخى هى اللحوم المصنعة .. مثل اللآنشون والسجق بأنواعه .. وشرائح الهمبورجا .. وكذلك الشاورما .. كل هذه الأصناف تحوى على ثلثها دهون .. المساعد الأول والمستشار الفنى لعزرائيل حيت يتقمص شخصية السفاح الصامت .. " ارتفاع ضغط الدم " وهى تسبب أكثر من 40% من الوفيات على مستوى العالم دى من ناحية .. من ناحية تانية .. حكاية المطاعم وخاصة عندنا فى مصر .. أفضل حاجة تطلبها فى مطعم هى المشويات من اللحوم الحمراء أو البيضاء .. وقد علمنى الألمان طريقة ..أختبر بها المطبخ فى الفقدق دون أن أدخله .. وهى أن اراجع حمام الحجرة .. إذا كان على سنجة عشرة ونظيف يبقى المطبخ بتاع الفندق أو المطعم نظيف ويمكن الأكل به ..

وعلى فكرة .. فيه حد لسة بياكل طرشى ؟؟؟

تحياتى

اخناتون

[Lancelot]

أنا رأيي برضه زي كروس ... إحنا بنأكل الزلط .. أنا فاكر نكتة ... بيقولك مرة واحد لاقي رجل فار في رغيف عيش .. راح للمخبز .. الراجل قال له .. لأ يا فندم ديه مسابقة .. جمع الفار تأخد ألف جنيه ....

ابن مصر .... مش ممكن .... إنت بتتكلم جد ... والله أنا مش قادر أمسك من الضحك ... و علي فكرة كلامك بيثبت إن التعود أحسن من أي تعليم أو تدريب ... لكن معلهش سؤال ....

ولمعلوماتكم هى فى الترتيب رقم 3 على مستوى العالم .

ديه يعني الفرقة المصرية ... و لا إيه ...

[ragab2]

أما

مطاعم تقديم الدجاج المشوى والكفتة والكباب

فحدث ولا حرج

طبعا تترك اللحوم والدجاج النيئة خارج الثلاجة طول اليوم ثم يعاد تجميد الذى لم يستعمل لليوم التالى ويكرر نفس الشيئ كل يوم تسييح ثم تجميد

مع العلم بأن اللحوم والدجاج الذى يتم تسييحه تنشط به الميكروبات التى كانت كامنة أثناء التجميد والمفترض من الناحية الصحية أن لا يعاد تجميده مرة ثانية .. هذا اذا كان مازال يحتفظ بفترة صلاحيته

وفى

احدى المرات اخترت مطعم لشراء كباب وكفتة للعيال وكان المنظر من الخارج مشجع على أكل الكباب الموجود صوره بالخارج باليفط المضيئة

ولكن بعد دخولى واتفاقى على الكباب والكفتة وبدأ الشاوى فى شيهم هالنى مارأيت

أخذ الرجل الذى يشوى الكباب يتناول الحساب من الزبائن ويعد الفلوس الورقية التى عليها أكوام الجراثيم ويتداولها الجمهور ويخرج من جيبه باقى الحساب للزبائن بعد أن يكتفى بمسح يده فى الفوطة اللى على صدره حتى لا يلوث جيبه بدهون الكباب والكفتة ثم يكبس بيده الكفتة على السيخ ويدخل قطع الكباب فيه ومن حظى العثر أن كاشير المطعم غاب فى هذا اليوم فتولى هو لم الحساب من الزبائن وعد الباقى لهم

وأصابنى

القرف وأبلغته أن يستعجل لى طلبى ولا مانع ان كان نصف سوى حتى أخلع على أن أرمى الكباب لأى قطة فى الطريق أو اعطائه للبواب على أسوأ حال ولم يعجبه الكلام ولامنى لأنى أستعجله وقال يا أستاذ مش لازم ياخد وقته

المهم طبعا انتظرت وأخذت الكباب وأعطيته بحاله للبواب وأكلنا جبنة وبيض بعد أن كنت أبلغتهم فى البيت أن لا يجهزوا شيئا للغدا ووعدتهم أن ينتظروا مفاجأة الكباب الجميل

يتبع

[الطفشان]

من يعيش في الخارج مدة طويلة يعلم ان المصريين عندهم مناعة طبيعية ضد بعض الامراض

و السبب ان وجود العدوى في الاكل و الماء و كل شئ يجعل المصري العادي له مناعة ضد أشياء كثيرة

عندما اذهب الى مصر، في اغلب الاحيان اصاب باسهال في الاسبوع الاول من وصولي

و السبب هو ان جسمي قد فقد هذه المناعة لاني بعيد عن مصر

[crossfield]

طيب معلش بقى سؤال بمناسبة شم الفسيخ اللى هيهل علينا ده: ازاى أعرف ان الفسيخ أو الرنجة سليمة و مش ملوثة(قوى) :D و محدش يقوللى انهم مش صحيين أنا صحتى مبتجيش غير على أكل الحاجات دى :) :) و يا ترى الرنجة المعلبة دى (الفيليه) أضمن و الا برضو ملوثة ؟؟؟؟؟

[Faro]

طيب معلش بقى سؤال بمناسبة شم الفسيخ اللى هيهل علينا ده: ازاى أعرف ان الفسيخ أو الرنجة سليمة و مش ملوثة(قوى) :D و محدش يقوللى انهم مش صحيين أنا صحتى مبتجيش غير على أكل الحاجات دى  :)  :) و يا ترى الرنجة المعلبة دى (الفيليه) أضمن و الا برضو ملوثة ؟؟؟؟؟

لضمان عدم ثلوث الفسيخ فيجب أن يكون صناعة / تمليح منزلى. أما الرنجة فلا أستطيع الجزم ولكن إذا تم شرائها من سوبر ماركت مثل مترو فسيكون هناك جانبا من الإطمئنان .

سبب ثلوث الفسيخ ... قد يكون نوع الملح ومادة الحفظ وقد يكون الفسيخ مر على وفاته عدة أيام من تاريخ الصيد. عامة أنا لاأثق فى صناعة المأكولات المصرية فالعديد من هذه المأكولات تم تجهيزها تحت السلم .

[BenNeal]

...... هالنى مارأيت......وأصابنى القرف.......... على أن أرمى الكباب لأى قطة فى الطريق أو اعطائه للبواب على أسوأ حال .......... وأخذت الكباب وأعطيته بحاله للبواب.....

و يا ترى حصل حاجه للبواب او عياله؟

[crossfield]

سبب ثلوث الفسيخ ... قد يكون نوع الملح ومادة الحفظ وقد يكون الفسيخ مر على وفاته عدة أيام من تاريخ الصيد. عامة أنا لاأثق فى صناعة المأكولات المصرية فالعديد من هذه المأكولات تم تجهيزها تحت السلم .

ولوووووووووو مهما يحاولوا يطفوا الشمس :)