تابع ... موضوع القطط والأولويات

[se_ Elsyed]

أختنا نورا أثارت موضوع مهم جداً وهي بتتكلم عن تربية وتدليل القطط بأسلوبها ودمها الخفيف لأنها بصراحة أصبحت فاكهة لذيذة من فواكه المنتدى .

بس خلونا نتكلم فى نقطة مهمه جداً .

إذا كنت من الناس ميسوري الحال وربنا موسعها عليك ، أيهما تفضل :

1- تربية قطط وكلاب وعصافير .... إلخ وتعملك ميزانية 400 أو 500 جنية فى الشهر للصرف عل أكلهم وشربهم وعلاجهم كمان ؟

2-أو تكفل يتيم و تساعد محتاج أو شخص مريض مش لاقى ثمن الدواء ؟

أنا مابقولش أن الواحد مايشبعش هوايه عنده زي تربية الحيوانات الأليفة والحاجات دي ، لكن ده يبقى بحساب ولا يكون مبالغاً فيه زى مابنشوف من بعض الناس فى مجتمعنا ... لكن هناك أولويات فنحن يا جماعة شعب لسه بيحبي وماوصلناش زى سويسرا والدول الأسكندنافية .

كان ساكن فى العمارة اللى جنبنا واحد عنده محل ورد فى أحدى الفنادق الكبرى وربنا موسعها عليه قوي ، والبيه مربيلي كلب قد العجل فى البلكونة ، وبيعامله أحسن من اولاده ... وفى مره زوجته جرحت أحساس الكلب ( شكلها قالتله الحقيقة وهو انه كلب لو طلع أو نزل ) راح حابسها فى البلكونة طول الليل ودخل الكلب قى شقة حيث الدفء والنعيم ....

[KWA]

وفى مره زوجته جرحت أحساس الكلب ( شكلها قالتله الحقيقة وهو انه كلب لو طلع أو نزل ) راح حابسها فى البلكونة طول الليل ودخل الكلب قى شقة حيث الدفء والنعيم .... 

 

 

طبعا ده غلطه كبيره منها في جرح احساس الكلب اليتيم ...كانت لازم تخبي عليه الحقيقه المره...بس اللي انا عايز اعرفه...الكلب اشتكي للزوج ازاي ...عيط و شاور علي الزوجه و هوهوا....و لا نام في الأرض و تعصب و قال ...لا انا لا هي ...اختار بينا...و كمان سؤال بسيط يا تري الزوجه القاسيه لسه علي زمه الزوج و عامله ايه مع الكلب.....الله يكون في عونه ....الكلب ولا الزوج ...

[nora]

:shock: :shock: :shock: :shock:

مين الفاكها بتاعت المنتدي انا ولا قططتي :twisted: :?: :twisted: :twisted:

عموما انا قلت اني مش بربيهم كده وسلام انا ببعهم وفي نفس الوقت بحبهم وعلشان كده انا بخلي بالي من صحتهم :wink: :wink: :wink:

[بنت شعنونة]

تربية قطط وكلاب وعصافير .... إلخ وتعملك ميزانية 400 أو 500 جنية فى الشهر للصرف عل أكلهم وشربهم وعلاجهم كمان ؟ 

2-أو تكفل يتيم و تساعد محتاج أو شخص مريض مش لاقى ثمن الدواء ؟ 

والله يا سي السيد انت انبتلي ضميري

:roll: :roll:

بس اوقات الواحد يعمل حاجات غريب من جواه

يعني مثلا

ممكن اشوف واحد غلبان اديييييييله كل اللي معايااااا

واشوف واحد تاني غلبااااااان برضه وكل حاجا

بس تحس انك مش عاوز تديله حاجا خالص وماتديلوش فعلا :? :?

ما تفهمش ليه بجد :lol: :lol:

اعتقد انها نفس نظري القطة و الانسان!! :?: :?:

[1_Nadim]

يا تري الزوجه القاسيه لسه علي زمه الزوج و عامله ايه مع الكلب......

اهو ده موقف درامي يحتاج المؤلف حشيش يكتب ثلاثيه جديده عن عباس وزكيه والكلب ويجيب لمصر نوبل تانيه والاستاذ صفوت الشريف يطلع في التليفزيون ويقولنا ده بفضل السياسه الحكيمه للسيد الرئيس

[وسام]

مكرر :shock:

[وسام]

معاك يا سى السيد ....... لكن انا عن نفسى ماكنتش عامل اى ميزانية لاكلها.......الحاجة اللى باكلها بأكلها منها وهكذا( فراخ سبايسى مفيش مشاكل و فول و طعمية متقولش لا :lol: ) صحيح كللوهم قالو حرام كدة تموت و بتاع و لازم تاكل مسلوق بس.......لكن ازاىو انا ساعات كنت بتزنق و ببقى مش لاقى أكل

فى ناس بقى اللى هيا بيقولوا عليهم فرافير اللى معيشة حيواناتها الاليفة على الاكل المخصوص المستورد..........دول فعلا لا حرج عليهم

زمان فى برنامج رئيس تحرير ذكر احد الضيوف ان مصر بتستورد ب 150 مليون جنيه اكل قطط و كلاب  :shock:  :shock:  :shock:

[nora]

كل ده بسبب قطتطي

طب اقولكم حاجة ومتضحكوش عليا بمناسبت ان وسام كان بيقول ان بتمر علية ايام مبيلقيش ياكل و الحاله دي انا مريت بيها كتير وكنت ايامها مغتربه في مصر وممعيش اي حد من العائلة فكانوا سعات بيتأخروا عليا في الحواله اقسم بالله انا كنت استلف علشان اجيب علبت سردين للقطط وانا مكلش المهم هما يكلوا :D :D :D

الفكرة مش والله في تدليل القطط بس بحس انه حيوان ضعيف ممكن ميستحملش لكن انا ممكن استحمل :roll: :roll: :roll:

والله انا بحسها كده انا مكنش شرط ااكلهم اكل قطط ولا حاجة انا منكرش اني بروح هنا مخصوص لمركز سلطان و سيتي سنتر علشان بس اجيب اكلهم و كورن فلكس و رمل ليهم بس هما اتعودوا على كده وانا لازم اخلي بالي من صحتهم علشان اعرف ابيعهم مش يكون القط عيان ومحدش يرضى ياخده :? :?

اه كل لما اروح سيتي سنتر علشان اشتري ليهم الاكل ولا الرم الناس كلها بتعد تتفرج عليا من الكميات المهوله الي بشتريها ( متنسوش انا عندي وحوش في البيت 7 ) وكأني جيه من كوكب آخر :roll:

[elbana]

كان لينا واحد صاحبنا فاتح محل عصافير وورد وقطط والذي منه يعني ، وأنا من أعداء حبس العصافير في أقفاص ، وشايف إن الموضوع ده حرام شرعاً كمان ، المهم صاحبنا كان بيعلق بعض أقفاص العصافير على جذع شجرة كافور قدام الكشك بتاعه ، فكنا نعدي عليه ، واحد يخش يلهيه ، وأنا أفتح في أقفاص العصافير وناخد بعضنا ونجري وهو ورانا .... يا فكيييييييييك ، إحنا والعصافير وصاحب المحل ، كلنا بنجري ف نفس واحد ...

سو سو سو سو

[شيكو المصري]

حكاية الحيوانات الاليفة دية ابتدت معايا و انا صغير كأحلام بدئا من البطريق حتى الفيل ابوزلومة و اقعد اقولهم عايز و بتاع ...و همة يضحكوا عليا ...........حتى وصلت للمرحلة الاعدادية كان نفسي في كلب نربية طبعا لم يتحقق الحلم.حتى ....

حتى ......

حتى.... جاء اليوم الموعود شفتها من اول نظرة على باب البيت و ان طالع على السلم كيوبيد غرس سهام الحب في قلبي تجاهها :inlove: وعلى طول شعلقتها :lol: بأكلة سمك اسكندراني من اللي قلبكم يحبها و من يومها و هي لازم تيجيلنا كل يوم و تستنى و تقف على باب الشقة بأحترام تام و تنادي عليا او على اي حد عشان يغديها و ساعات كانت بتتعشى كمان..... اللي انا بكلم عليها دي قطة اوعوا دماغكوا تروح بعيد :lol: ..... لغاية في يوم ما جت و كان شكلها تعبان وولدت بتاع اربعة فوق السطوح طبعا جيبنالها اكلة سمك متينة علشان ترم عضمها و كانت تجربة ممتعة جدا تربية القطط و الحق يا جدع و حوش القطة ونصحى بالليل :xmas: على صوت حد بينونو تحت السرير و نطلع قطة من الحلة .....لغاية ما اتخلصنا من اولادها بعد ما بقوا شحطة و عفاريت :devil: ......و ما زالت القطة على عهدها كل 6 شهور تقريبا تقوم والدة بتاع 3 او 4 و يكبروا و نتخلص منهم ...... على فكرة هية عجزت شوية بس انا كلمتها على الماسنجر قريب و كانت صوتها كويس .

طبعا الاكل كان اللي احنا بناكلة ما فيش حاجة مخصوص غير لما تولد بس .

الاخ البنا كتب :

إحنا والعصافير وصاحب المحل ، كلنا بنجري ف نفس واحد ... 

سو سو سو سو

:lol: :lol: :D :D