المملكة العربية السعودية بنين

[انا جعان]

تركت مصر بعد سنوات وسنوات من التمسك بها رافضا مبدأ السفر و خصوصا لدول الخليج

اقتناعا مني مبدأ مادمت حققت احلامك في وطنك فلما الرحيل

ربما من حين لاخر اسافر لاجل عمل لكنها فترات قصيرة و ارجع بعد كدة علي بيتنا و اتنقع في البانيو لاغسل اثار اسفر

لكن المرة دي شكلة الدش هايستني فترة طويلة

شديت الرحال لبلاد تركب الجمس و الجمال ويلبسو التوب و العقال

ربما من يعرفوني جيدا استعجبو لقراري لكن حسابات كل فرد تختلف في كل مرحلة زمنية و عمرية

لكن قناعاتي مازلت محتفظا بها

المهم وما يحلي الكلام الا بذكر النبي علية الصلاة و السلام

صلو علي النبي

لا انسي اول مرة ركبت تاكس هنا فالصديق اللي سايق طبعا هندي و كل من هو من شرق اسيا يطلق علية صديق

ومحمد مثل لفظ كابتن عندنا في مصر

المهم الصديق سواق التاكس قالي تحب تدفع تبع البونديرة و لا نتفق

طبعا اخوكو عمل فيها ناصح وقلتلة لا صديق بنديرة انا ادفع

ركبت ومشوار مكملش 10 دقايق لهف مني 40 ريال حرق و نار في جتتة امة و كل الاصدقاء اللي زية

smk: كان العداد يرمح كمن لدغتة حية طريشة

مع ان روحت نفس المشوار و دفعت 15 بعد كدة

من الحاجات اللي كل ما افتكرها اضحك اشوف يافطة علي محل مكتوب عليها محل للتقبيل

اقول في عقل بالي اية يا اخواتي دة اباحة عيني عينك كدة بوس و لية محلات كمان

فين و فين لما فهمت انة للتقبيل يعني للايجار

انا مش عارف الاسم دة اخترع علي اساس اية ربما اللي اخترعة كان واحد فلاتي

وكلة كوم والاكل في دول الخليج كوم تاني

فالناس هنا تاكل لكي تعيش واذا عاشت تاكل لكي تستطيع ان تستمر بالاكل

مثلوثة و مندي و مظبي و مدفون و مخنوق و محروق و مسلوخ

و اجاركم الله من المثلوثة عبارة عن 3 راقات عيش و 3 كيلو رز وفرخة مصلوبة بوسط الحلة

و اطفح يا مؤمن وصلي علي اللي هايشفع فيك

والاكل الهندي هنا موجود والصنعة بحرفنة وخلطة معلم

بهارات و شطة اذا تذوقت معلقة واحدة تشلح وترقص عشرة بلدي وتأربع جالون مية لاطفاء النار الموقدة

wst:: انا و صديق لي اكلنا في احد المطاعم الهندية اياها انا طلبت اكل الشطة بة بسيطة و هو من محبي الشطة ادالة 5 ريال و قالة اتوصي بي

اقسم كنت باكل و العرق عامل ينزل من راسي علي عيني من كتر حرارة الشطة

B) ورقدت يومين في السرير اتلوي كابن اوي مصاب بمغص عنيف

وصديقي عمل عملية البواسير من اسبوعين ويجلس علي مخدة كما الولية الحامل

وطبعا المولات هنا لا تعد و لاتحصي لو غبت عن منطقة شهر واحد ترجع تلاقي مولين علي الاقل اتبنو فيها

و العدد في الليمون البنزهير

والشيء الظريف في الامر اذا كنت هنا مع زوجتك فلا مشاكل ففي كل مكان اماكن مخصصة للعائلات بمفردها

سواء مطاعم او مولات او متنزهات

اما اذا كنت عازب فمعاملة كما الحمير البلدي الجربانة

فربما حارس الامن في المول يمنعك من الدخول بحجة انك عازب وداخل تبصبص علي الحريمات يا خلبوص

لكن في غالب الامر الحياة سهلة و بسيطة و مريحة للاعصاب جدا جدا

ودة احد الاسباب الرئيسية لاتخاذي قرار السفر

حقيقي تعبت من شدة الاعصاب و الضغط العصبي

ومشاكل بلدنا و الزحمة و الدوشة و السياس

جمع سايس يعني

وكل واحد عايز يحط ايدة في جيبك و يقلبك زي فردة الشراب وياخد اللي يقدر علية منك

واكل بالسرطان و مياة بالفشل الكلوي اذا وجدت اساسا

وهواء بالرصاص و عيش بالحديد وادوية بفوسفات المنجنيز

ولبن بالسيراميك

يعني المصري ممكن بعد سنة من التغذية الجيدة يبني عمارة

بس برضة بلدنا حلوة بقرفها وزبالتها وشعبها اللي تغير كتير وبقي عايز ضرب الصرم

:closedeyes: حلوة بشوارعها و الحياة و الاهل والقهاوي و الشيشة

حلوة بالعسكري الغلبان اللي ممكن يخليك تاخد صلاح سالم كلة بالعكس مقابل جوز جنيهات

ولا الواد بتاع البوفية اللي يخلصلك ورقك كلة في مجمع التحرير ب 100 جنية بس

حلوة بامي واصحابي حلوة بام محمد الدادة اللي استحملت قرفي و قرف اللي خلفوني ربما ربع قرن

ربما ما يهون بعض الامر في الغربة الزوجة الصالحة واطفالك و اذا وجدت الصحبة الطيبة فهي كالماء البارد في ليلة حارة

صديق عرفتة عن طريق النت اسمة اسامة مر علية 5 سنين او اكتر ربما متغرب

اول ما تشوفة تشوف ابن البلد الاصيل بلكنتة الدمنهورية وشهامتة المصرية

مبتسم علي الدوام اذا فضفض معك وجدتة يحمل هموم تكفي من المحيط للخليج يشعل سيجارة خلف اخري

لا يكل ولا يمل اذا قصدتة في شيء.افتقدت مصر , مش عارف لكن, متاكد هافتقد اصدقائي وامي وابي واخوتي

خوفي الوحيد اذا مرت علي السنين وحاولت العودة اجد نفسي غريب غير متأقلم

فمن سافر خارج مصر يستطيع ان يفهم ما اقصد

علي اي حال كلها اراضي ربنا

B) اذا سمح طيب اصلكم ربما ادوشكم برحلات ابن مفجوعة في اصقاع المعمورة

تم تعديل 8 يونيو 2008 بواسطة انا جعان

[se_ Elsyed]

فين و فين لما فهمت انة للتقبيل يعني للايجار

خد المعلومة دي

الإيجار يختلف عن التقبيل

فالإيجار .. بتاخد المحل فاضي على الحيط وإنت بتوضبه

التقبيل بتأجرة بعدته بالرفوف اللي فيه بحاله بماله ... وبالتالي بتدفع الإيجار مضافاً إليه تقدير لقيمة الأصول اللي فيه واهم شيء ممكن كمان صاحب المحل يحاسبك على إسم شهرة المحل ...

أي خدمة ...

[النجم الثاقب]

انت عارف يا حج انا جعان ( أو إسلام ) انا حاسس انك بتتكلم بلسان حالى و حال كتير من المغتربين و خصوصا فى الجزء اللى بتتكلم فيه عن مصر و قد ايه هيه جميله برغم مشاكلها و بلاويها .

اسمحلى اسجل اعجابى الشديد باسلوبك و مدونتك الجميله :closedeyes:

[somayasaleh]

الاخ الفاضل اسلام

اسجل اعجابي الشديد باسلوبك الطريف wst::

و في انتظار باقي الرحلات اللذيذة :sad: :lol:

[مونتى]

الله عليك الله

عرفت تعبر عن كل المصريين فى هذة البلاد

عظيمه يامصر

عــــ wst:: ـاشق بلدى

[مسافر زاده الخيال]

اضحكتني يا سيد (انا جعان) فعلا

اسلوب كتابتك كوميدي فعلا........خصوصا بما يخص المولات التي اصبحت هم حقيقي

[انا جعان]

فين و فين لما فهمت انة للتقبيل يعني للايجار

خد المعلومة دي

الإيجار يختلف عن التقبيل

فالإيجار .. بتاخد المحل فاضي على الحيط وإنت بتوضبه

التقبيل بتأجرة بعدته بالرفوف اللي فيه بحاله بماله ... وبالتالي بتدفع الإيجار مضافاً إليه تقدير لقيمة الأصول اللي فيه واهم شيء ممكن كمان صاحب المحل يحاسبك على إسم شهرة المحل ...

أي خدمة ...

hpc:!: شكلك كنت راجل مقبلاتي قديم

[انا جعان]

انت عارف يا حج انا جعان ( أو إسلام ) انا حاسس انك بتتكلم بلسان حالى و حال كتير من المغتربين و خصوصا فى الجزء اللى بتتكلم فيه عن مصر و قد ايه هيه جميله برغم مشاكلها و بلاويها .

اسمحلى اسجل اعجابى الشديد باسلوبك و مدونتك الجميله hpc:!:

يا استاذنا بلدنا جميلة فعلا برغم كل السلبيات هي جميلة

ربنا يهون عليك و علي كل مصري سنين الغربة

[انا جعان]

الاخ الفاضل اسلام

اسجل اعجابي الشديد باسلوبك الطريف hpc:!:

و في انتظار باقي الرحلات اللذيذة :lol: wst::

عزيزتي

اعجابك اتسجل وواقف علي امضة اتنين موظفين

ونسأل الله اكون فاضل لاطول فترة ممكنة

شكرا مرورك حقيقي

[انا جعان]

الله عليك الله

عرفت تعبر عن كل المصريين فى هذة البلاد

عظيمه يامصر

عــــ :lol: ـاشق بلدى

المفروض بقي يكون في شوية حساسة

والمصريين يلمو بعض كدة ويعزموني علي الغد hpc:!: ا

[انا جعان]

اضحكتني يا سيد (انا جعان) فعلا

اسلوب كتابتك كوميدي فعلا........خصوصا بما يخص المولات التي اصبحت هم حقيقي

اية سيد انا جعان دي

يا راجل بلاش رسميات

قولي يا جعان باش hpc:!: ا

شوف موضوع المولات دة رحمة لان مفيش اختيار اخرللترفية

غير الشراء

والواحد جاي البلد دي ينعش الاقتصاد الوطني

[capitshino]

تحياتى لك يا جعان hpc:!: ولكل اخواتنا واخواننا بالخليج وربنا يهون علينا الايام

[Modest]

بصراحة لم أكتفي بقراءة الموضوع مرة واحدة ... أسلوب رائع و مميز في الوصف يا "أنا جعان" :lol:

اذا سمح طيب اصلكم ربما ادوشكم برحلات ابن مفجوعة في اصقاع المعمورة

أنا قاعد مربع إيدي أهو و مستني الدوشة بفارغ الصبر hpc:!:

[Mohamed Khalaf]

الله على الأسلوب الله على الجمال 10/10 - اسلوب رائع

محل للتقفبيل = للبيع بالجدك

بس ليا سؤال هيا الغربة وحشة قووووووووووى للدرجة دية

[النجم الثاقب]

الله على الأسلوب الله على الجمال 10/10 - اسلوب رائع

محل للتقفبيل = للبيع بالجدك

بس ليا سؤال هيا الغربة وحشة قووووووووووى للدرجة دية

اسمحلى ارد على سؤالك يا استاذ محمد من خلال تجربتى و تجربة من حولى .. احساس الغربه بيختلف من شخص للتانى حسب درجه تحمله و درجة ارتباطه بأهله و وطنه و حسب المعامله اللى بيتعامل بيها فى البلد اللى هو متغرب فيه .

للأسف كتير منا كان طالع من مصر بيسب و يلعن فى البلد و يقول مش راجع تانى و انا اولهم ، و كنت فاكر هتأقلم بسرعه و إن الموضوع مفيهوش مشكله ، لكن بعد خوض التجربه لقيت إنى كنت غلطان ، واحد يقولك طب ما ترجع .. اقوله قرار الرجوع مش بالسهوله دى و الناس المغتربه كلها عارفين الموضوع ده . الخلاصه الغربه فى رأيى وحشه قوووووووووووووووووووى .

صدق من قال بلدى و إن جارت على عزيزه و أهلى إن ضنوا عليا كرام .

[ahmedarab]

اسلوب جميل وكلام أجمل.

فى انتظار باقى مغامرت الجوع فى المعمورة ...ولو ممكن فى المنتزة كمان ..اكون شاكر جدا

تحياتى وفى انتظار المزيد

[سكر]

جامد جدا فى مصطلحاتك وتعبيراتك

واضخ انك شربت من النيل لحد الاخر

على العموم مرحبا بيك فى بلاد الحرمين واسمحلى نيابة عن كل اعضاء المنتدى اتشرف بالعزومة على الغداء

خصوصا وانا عازب فى الفترة دى وكمان عشان تاخد شوية خبرة من ارباب السوابق فى البلد

[capitshino]

الله على الأسلوب الله على الجمال 10/10 - اسلوب رائع

محل للتقفبيل = للبيع بالجدك

بس ليا سؤال هيا الغربة وحشة قووووووووووى للدرجة دية

اسمحلى ارد على سؤالك يا استاذ محمد من خلال تجربتى و تجربة من حولى .. احساس الغربه بيختلف من شخص للتانى حسب درجه تحمله و درجة ارتباطه بأهله و وطنه و حسب المعامله اللى بيتعامل بيها فى البلد اللى هو متغرب فيه .

للأسف كتير منا كان طالع من مصر بيسب و يلعن فى البلد و يقول مش راجع تانى و انا اولهم ، و كنت فاكر هتأقلم بسرعه و إن الموضوع مفيهوش مشكله ، لكن بعد خوض التجربه لقيت إنى كنت غلطان ، واحد يقولك طب ما ترجع .. اقوله قرار الرجوع مش بالسهوله دى و الناس المغتربه كلها عارفين الموضوع ده . الخلاصه الغربه فى رأيى وحشه قوووووووووووووووووووى .

صدق من قال بلدى و إن جارت على عزيزه و أهلى إن ضنوا عليا كرام .

الاخ الفاضل

الغربة كالشجرة . تكبر بداخلنا بمرور الزمن

[انا جعان]

تحياتى لك يا جعان :unsure: ولكل اخواتنا واخواننا بالخليج وربنا يهون علينا الايام

يا سيدي ربنا يهون علي اللي في مصر الايام

[انا جعان]

بصراحة لم أكتفي بقراءة الموضوع مرة واحدة ... أسلوب رائع و مميز في الوصف يا "أنا جعان" :blink:

اذا سمح طيب اصلكم ربما ادوشكم برحلات ابن مفجوعة في اصقاع المعمورة

أنا قاعد مربع إيدي أهو و مستني الدوشة بفارغ الصبر :unsure:

مربع مدور مليش دعوة

الفلكة يا جااااااااااااااااابر