سؤال هام جدا للمقيمين بالسعودية

[Mohamed Khalaf]

السلام عليكم

أنا عضو جديد معاكم وأستفدت جدا من خبراتكم وفرحت جدا لما لقيتكم مش بتبخلوا على إى حد بالمعلومة والمساعد بارك الله فيكم

المهم يا رجالة واحد قريبى شغال فى مصر مهندس ودخلة فى حدود 6000 إلى 7000جنية وساعات بيزيد ليوصل إلى 9000 جنية مع شوية أضافى وحوافز بس مش عالطول ومبسوط فى شغلة وكلة تمام

هو جالة من يومين عرض من شركة فى السعودية فى نفس المجال ومكانها مدينة يبنبع الصناعية وبمبلغ 7000 ريال + مرتب 3 شهور بدل سكن + تذاكر لية وللزوجة مرة واجدة فى السنة + أجازة شهر مدفوعة الأجر + تأمين صحى لية وللأسرة + 600 ريال بدل انتقال + أضافى overtime مفتوح لأن المصنع لسة بيتبنى على الأقل لحد أخر السنة والساعة بساعة ونص

بحسبة بسيطة هنقول بعد ما يدفع 12000 ريال سكن ومع حبة أضافى حلوين ممكن يخوش على 12000 ريال شهريا على اقصى تقدير وهو معهوشى غير مراتة وبنتة صغيرة 2.5 سنة

هو سألنى علشان أفيدة فى العرض دة بس الصراحة مش عايز افتى لية فى إى حاجة - هو كان عايز يعرف هل العرض دة كويس ولا يخلية فى مصر احسن وكمان إية نظام العيشة هناك والأسعار عاملة اية والجو فى ينبع أخبارة أية

هو فرحان بالشغلانة لأن المصنع معظمة مصريين وكان شغال معاهم قبل كدة وكمان علشان هيقدر يج ويحجج والدتة ومراتة وكمان علشان يكسب خبرة زيادة ويرجع بيها على مصر - بس أنا قلتة كل دة فى علم الغيب وموضوع الحج دة فلمن أستطاع إلية سبيلا وكمان موضوع مصريين دة فى المصنع فمينساشى أن الغربة بتغير الناس وموضع الناس حلوة أو وحشة مش مضمونة وأنا رائى الشخصى يلعب على المضمون ويخلية فى البلد أحسن بحلوها ومرها

بس من الأول والأخر الجواب ليكم أنتم لآنكم أصحاب الخبرة

والله المستعان

[انا جعان]

و الله يا اخي العرض مقبول

لكن متوقف علي صديقك لان الموضوع مش فارق كتير عن وضعة الحالي في مصر

اذا كان يملك بيت في مصر و سيارة و الحمدلله كما تقول هو متزوج واذا كان عملة مستقر

فربما يحتاج الامر لمزيد من التفكير او الانتظار لفرصة افضل

ربما اذا كان الاساسي 10 او 12 الف كان يكون عرض جيد جدا وحسب سنين خبرة صديقك

اعتقد براتبة الحالي في مصر لا يقل عن خبرة 4 او 5 سنين اذا كان في مجال متخصص

[midozz]

صاحبك سنه كام سنه وخريج سنه كام؟؟؟

[Mohamed Khalaf]

و الله يا اخي العرض مقبول

لكن متوقف علي صديقك لان الموضوع مش فارق كتير عن وضعة الحالي في مصر

اذا كان يملك بيت في مصر و سيارة و الحمدلله كما تقول هو متزوج واذا كان عملة مستقر

فربما يحتاج الامر لمزيد من التفكير او الانتظار لفرصة افضل

ربما اذا كان الاساسي 10 او 12 الف كان يكون عرض جيد جدا وحسب سنين خبرة صديقك

اعتقد براتبة الحالي في مصر لا يقل عن خبرة 4 او 5 سنين اذا كان في مجال متخصص

شكرا يا باشا على الرد - هو معاة عربية بس قاعد فى شقة ضيقة وقديمة وأيجار كمان وعلشان يجيب شقة دلوقتى فى مصر محترمة مش أقل من ربع أرنب وبالنسبة للمرتب زى ما قولت ممكن بسهولة يعدى 10000 ريال أن شاء الله - غية رايك وكمان تعرف حاجة عن المنطقة إللى فيها المصنع جوها يعنى وناسها أخبارهم أية

[Mohamed Khalaf]

صاحبك سنه كام سنه وخريج سنه كام؟؟؟

31 سنة دفعة 99

يلا بقى دلنا يعمل إية

[محمد لمار]

السلام عليكم يا استاذ khalaf انا اعمل طبيب بينبع الصناعية اولا ايه اسم الشركة اللى صاحبك جاى عليها؟

ثانيا بدل السكن مش هيوفر منه شىء لان المنطقة راقية جدا والسكن فيها غالى ثالثا الراتب كويس ولكن الاول ارسلى اسم الشركة علشان اسألك عليها وانا تحت امرك فى سؤال لأن انا مقيم فى ينبع الصناعية وبالمناسبة اسمها(الهيئة الملكية)[color="#A0522D"]

[midozz]

السلام عليكم

اللي انا اعرفه ان القاعده المشهوره بتقول انك تسافر لما يكون الراتب علي الاقل ضعف دخلك

انت بتقول صاحبد دخله من 7000 ال 9000 مصري

يعني المتوسط 8000

يبقي اقل حاجه يسافر عليها المفروض 16000 مصري

يعني 12000 سعودي

انت بتقول راتبه 7000 سعودي

يعني حوالي 10000 مصري

يتغرب علشان 2000 جنيه

انا شايف المبلغ قليل

انا رايي انه خبره 9 سنين ومرتبه حلو جدا في مصر

يبقي اقل حاجه من 10000 الي 12000 ريال

والله الموفق

[Mohamed Khalaf]

السلام عليكم يا استاذ khalaf انا اعمل طبيب بينبع الصناعية اولا ايه اسم الشركة اللى صاحبك جاى عليها؟

ثانيا بدل السكن مش هيوفر منه شىء لان المنطقة راقية جدا والسكن فيها غالى ثالثا الراتب كويس ولكن الاول ارسلى اسم الشركة علشان اسألك عليها وانا تحت امرك فى سؤال لأن انا مقيم فى ينبع الصناعية وبالمناسبة اسمها(الهيئة الملكية)[color="#A0522D"]

شكرا يا باشا وبعتلك على الخاص

[Mohamed Khalaf]

السلام عليكم

اللي انا اعرفه ان القاعده المشهوره بتقول انك تسافر لما يكون الراتب علي الاقل ضعف دخلك

انت بتقول صاحبد دخله من 7000 ال 9000 مصري

يعني المتوسط 8000

يبقي اقل حاجه يسافر عليها المفروض 16000 مصري

يعني 12000 سعودي

انت بتقول راتبه 7000 سعودي

يعني حوالي 10000 مصري

يتغرب علشان 2000 جنيه

انا شايف المبلغ قليل

انا رايي انه خبره 9 سنين ومرتبه حلو جدا في مصر

يبقي اقل حاجه من 10000 الي 12000 ريال

والله الموفق

تمام أنا مع حضرتك بس زى ما أنا قلت قبل كدة هو ممكن بشوية أضافى على غللى هيقدر يحوشة من بدل السكن ممكن يوصل ل 10000 ريال مستريح

بس فى قاعدة تانية بتقول الواحد يسافر لما هيقدر يوفر 3 أضعاف إللى هيقدر يوفرة فى مصر بس على شرط أنة يعيش نفس العيشة بتاعت مصر فى الدولة الأخرى بدون الأخلال بأى بند وهو دة إللى أنا قالتة لصاحبى - أنت رايك إية

[أبو عمر المصري]

أيه المانع انه يروح يجرب له سنه ويشوف الوضع بنفسه على الطبيعه ( دا إذا كان مش هايخسر عمله في مصر )

لأن كل واحد أدرى بظروفه ويقدر يدرس الموضوع بصوره أكثر واقعيه وعن قرب لأن في السعوديه عموما كل حاجه غليت برضه ، بدل السكن مش هايوفر منه حاجه ومتطلبات الحياه غليت برضه هنا

ومنها كمان يحج ويحجج الوالده وزوجته مثلا وأسمه اكتسب خبرة الأغتراب لأن في السفر سبع فوائد

وربنا يكتب له اللى فيه الخير

[somayasaleh]

المدارس مدفوعة ولا لا؟؟؟؟

لان المدارس هناك غالية جدا جدا وخاصة اذا كان ناوي يدخل اولاده ان شاء الله مدارس محترمة اجنبية طبعا

هو عنده طفل واحد الان لكن بعد شوية ربنا يعطي له..زز حتبقي مشكلة مصاريف المدارس

وبعدين السعوديه من بداية 2008 ولعت يعني الاسعار نار نار نار

وخاصة اللي عنده اسرة وعائلة الصرف بيكون اكتر كتييييييييييييير من العازب

انا اتكلم من وجهة نظر عائلة في مستوي راقي (فوق المتوسط)

هو يعمل استخارة وربنا يوفقه ان شاء الله..... ويعمل حسابه اللي بيطلع بره ..... ما بيرجعش.....

وربنا يوفق الجميع

[مصر]

الهيئة الملكية

انا بدات كلامى بالهيئة الملكية لان معنى ان المنطقة اللى ها يشتغل فيها صاحبك بتحمل الاسم دة يبقى اكيد كل حاجة غالية جدا فوق ما تتخيل

انا مصرى مقيم فى الخبر والشركة اللى بشتغل فيها بتنفذ مشروعات للهيئة الملكية فى الجبيل وعلى الكلام اللى بسمعة من زملائى اللى بيشتغلو فى الموقع دة الاسعار خيالية وبالذات اسعار السكن

وانا رايى على الراتب اللى بياخدة صاحبك دة فى مصر يبقى حرام لما يسيبو ويفكر فى السفر

وفى الاول والاخر القرار راجع لة هو

تحياتى

[midozz]

السلام عليكم ورحمه الله

بدل السكن بتاع صاحبك 21000 ريال

نقول انه حياخد شقه ايجارها السنوي 12000 ريال

يبقي يتبقي 9000 ريال

لاتنسي انه محتاج يشتري غساله وبوتاجاز وتليفزيون وثلاجه وحجره نوم وادوات مطبخ و........

يعني موش اقل من 60000 ريال ويمكن اكتر

يعني اول سنه موش حيستفيد بفرق الايجار لان الفرق حيجيب به عفش

كمان خلي بالك

بدل الانتقال يعتبر قليل لان اقل مشوار دلوقتي بالتاكسي يتكلف 20 ريال زي ما الاخوه قالولي

يعني رايج جاي حوالي 40 ريال يوميا يعني حوالي 1000 ريال شهريا

وهوه متفق علي 600 ريال بدل

بص يا باشا

ان جايلي عرض مشابه للعرض بتاع زميلك ولما اتكلمت مع الاخوه نبهوني لموضوع قله بدل الانتقال وبتفاوض عليه دلوقتي قبل ما اسافر

بحاول اخليه 1000 ريال لان المعروض عليا 500 موش حيكفو

حاول تخليه يتفاوض علي بدل الانتقال وكمان يحط في حسابه انه حيفرش الشقه

وانا اشك في وجود شقه ب 12000 ريال

اعتقد ان السكن الكويس يبتدي من 15000

والله اعلم

[se_ Elsyed]

السلام عليكم ورحمه الله

بدل السكن بتاع صاحبك 21000 ريال

نقول انه حياخد شقه ايجارها السنوي 12000 ريال

12 ألف ... إيجار سنوي !!!!!!!! ده لوا أوضه من غير صالة فوق سطوح بيت واقع

ده لو لقى شقة في تلك المنطقة بـ 21 ألف ... يبقى يبوس إيده شعر ودقن ويطلع يعمل عُمره شكراًً للمولى عز وجل ...

المرتب المعروض عليه .. مقارنة بما يتقاضاه كما ذكرت ... يبقى ده إنسان بيظلم نفسه وبيظلم عائلته معه ...

[Mohamed Khalaf]

شكرا يا جماعة الخير على الردود الهايلة دية

أيه المانع انه يروح يجرب له سنه ويشوف الوضع بنفسه على الطبيعه ( دا إذا كان مش هايخسر عمله في مصر )

لاة طبعا لأن لو كدة هيفقد وظيقتة فى مصر ويا عالم هيرجع يشتغل فين

المدارس مدفوعة ولا لا؟؟؟؟

لاة مفيشى كلام على المدارس خالص

لان المدارس هناك غالية جدا جدا وخاصة اذا كان ناوي يدخل اولاده ان شاء الله مدارس محترمة اجنبية طبعا

طب هوة مفيشى غير الأجنبى - دولت بأذن الله 5 سنين ويرجع يعنى هو هيحتاج مدرسة تسد الغرض لحد ما يرجع على مصر

انا اتكلم من وجهة نظر عائلة في مستوي راقي (فوق المتوسط)

طب كام ريال يكفوة فى عيشة كويسة - هو بيصرف فى مصر فى الشهر حوالى 3000 جنية وعايش مبسوط قووووووى

الهيئة الملكية

طب بلاش الهيئة الملكية (ينبع الصناعية) - ممكن يعيش فى ينبع البحر كلها 10 كيلو فرق وهو سمع أن الأسعار هناك كويسة والسكن رخيص

وانا رايى على الراتب اللى بياخدة صاحبك دة فى مصر يبقى حرام لما يسيبو ويفكر فى السفر

أنا والله حاسس بكدة بس للسفر برضة فوايد

يعني اول سنه موش حيستفيد بفرق الايجار لان الفرق حيجيب به عفش

تمام الله ينور بس أو سنة دية هيكون عايش أكتر من نصها لوحدة من غير الأسرة فسهل يعوضها لأنة هيكون فى عداد العزاب

بدل الانتقال يعتبر قليل لان اقل مشوار دلوقتي بالتاكسي يتكلف 20 ريال زي ما الاخوه قالولي

هو ممكن يجيب سيارة وب 600 ريال هتبقى مصاريف العربية صيانة وبنزين ومفيشى أرخص من العربيات فى السعودية وممكن كمان مع 2 زمايلة يبدلوا مع بعض يعنى كل يوم واحد بعربيتة - دية حلها سهل -

وانا اشك في وجود شقه ب 12000 ريال

على حد علمى فى زمايل لية واخدين فى ينبع البحر عمارة ب 12 إلف للشقة الواحدة - طبعا ينبع الصناعية (الهيئة الملكية) أسعارها مولعة خالص

أسف للأطالة - بس فعلا صاحبى محتار جدا والمصيبة أن ورقة راح السفارة ومستنى التأشيرة يعنى الوقت بيقرب بسرعة علشان يأخد القرار - وجعلى الله فى ميزان حسانتكم يا جماعة الخير

[Mohamed Khalaf]

السلام عليكم ورحمه الله

بدل السكن بتاع صاحبك 21000 ريال

نقول انه حياخد شقه ايجارها السنوي 12000 ريال

12 ألف ... إيجار سنوي !!!!!!!! ده لوا أوضه من غير صالة فوق سطوح بيت واقع

ده لو لقى شقة في تلك المنطقة بـ 21 ألف ... يبقى يبوس إيده شعر ودقن ويطلع يعمل عُمره شكراًً للمولى عز وجل ...

المرتب المعروض عليه .. مقارنة بما يتقاضاه كما ذكرت ... يبقى ده إنسان بيظلم نفسه وبيظلم عائلته معه ...

والله يا أخى الفاضل على حد علمى فى زملاء لية واخدين فى ينبع البحر مش الهيئة الملكية ب 12 إلف وهما كذا واحد وواخدين عمارة بحالها

يعنى أنت رايك أن حوالى 10000 ريال على الأقل شهريا مش كويسسن بالذى بيأخذة فى مصر - أصلة على نار لأن ورقة خلاص طلع على السفارة ومستنى التأشيرة والوقت بيجرى - كان الله فى عونة

[Mohamed Khalaf]

إية يا جماعة مفيش إى رد من يومين - يا ريت الخلاصة من أصحاب الخبرة