انت ممكن ترجع مصر تانى؟

[قائد المدفعيه الهولنديه]

انت ممكن ترجع مصر تانى؟ ..... حد فكر يسأل نفسه السؤال ده قبل كده..... :waving:

الموضوع ببساطه انى كنت جاى السعوديه علشان احقق هدف معين و بعد كده ارجع تانى مصر لعمرى لحياتى للضحكه اللى بتطلع من القلب للشوارع للناس اللى حبيتهم لنص ساعه تمشيها على النيل وقت المغرب ...... بس يا خساره كل يوم الحلم ده بيبعد عن اليوم اللى قبله اتضح لى ان هدف بيجيب هدف و سنه فى الغربه بتجيب سنه و المشكله الاكبر ان بلدنا اساسا مش مديانا فرصه نعيش فيها....

تحوش قرشين علشان تتجوز تلاقى الجواز غلى .......طب نشترى شقه تلاقى الاسعار بقت جنان ...... طب اعمل مشروع تتصدم بالناس اللى كانت عايشه تمام و بعد كده فلست لما غلت الاسعار بالشكل الرهيب ده....بعد ما كنت جاى كام سنه و راجع لقيت ان الواحد عايز على الاقل 15 او 20 سنه غربه علشان تقدر تعيش فى مصر

شكلنا كده هننزل مصر كل سنه نتفسح زى الاجانب و نتصور جنب الهرم و نرجع تانى.....

انا ليا هنا سنتين بس ..... فعلا حاسس انهم 20 سنه ...... نفسى ارجع اعيش فى مصر لحد اما اموت.....منهم لله الى كانو السبب

خايف يجى عليا يوم اجد كل ما يربطنى بمصر اغنيتين لمحمد منير بصوت الالات الشرقيه و طعم النيل و لون الارض الخضرا

أسأل نفسك السؤال ده بس فكر كويس قبل ما تجاوب

[capitshino]

حرام عليك .. انا عامل زى النعامة وكل ما يجى الموضوع ده على بالى احط دماغى فى الرمل - قصدى ادخل انام

[حلواني]

انت بتفتح الموضوع دا ليه

كل واحد لما خرج من مصر كان زيك كدا ناوي علي سنتين تلاته وبالكتير اربعه

وبعدين يتجوز وتاخده الايام ويبقي يقول سنتين كمان

يخلف وربنا يرزقه بالاولاد تكتر المصاريف يقول سنتين تلاته كمان نحوش قرشين للعيال

يدخلو العيال المدارس والدنيا تولع ما يعرفش يعمل القرشين اللي في دماغه والقرشين اللي معاه مابقوش يجبيو كسوة الشتا

يمدد الغربه شويتن

يلاقي فات عليه عشرة او اتناشر سنه ولما بينزل الاجازه ما بيعرفش يتعامل مع الناس ومعافه قلت ومبقالوش حد

يستني شويه لما العيال تاخد الثانويه العامه وتبقي الحياه عنده مصاريف ما يقدرش يوفرها لو نزل مصر

العيال خلصت الجامعه طيب اجوزهم وانزل

تنزل فين ياعم عيالك اصلا مش عايزينك تنزل علشان لو نزلت مش هاتقدر توفرلهم مطالبهم

حلاص لما تتطلع معاش تنزل غصب عنك دا اذا ادك ربنا العمر ومنزلتش في صندوق

اسف للنهايه الدراميه لكن هي دي احوال مجموعه كبيره من المغتربيين

تم تعديل 10 يونيو 2008 بواسطة حلواني

[مونتى]

الله يسامحك

انا عمال اصبر نفسى على الغربه وانت تفتح الموضوع ده تانى

ليه منشطش رابطه عشاق مصر تانى والكل يحكى عن اماله وماذا يحلم بس مش باسلوب الشات

بمعنى كل يحكى من جهته دون تعليق الا اذا كان بسيط ويدخل فى الموضوع

عـــــــــــــ :waving: ــــــاشق بلدى

[قائد المدفعيه الهولنديه]

حرام عليك .. انا عامل زى النعامة وكل ما يجى الموضوع ده على بالى احط دماغى فى الرمل - قصدى ادخل انام

الأخ الفاضل كابتشينو ..... تفتكر هنفضل نايمين لحد امتى.... انا بهرب بردو بس مش زيك الفرق انى بدفن راسى فى الشغل مش فى السرير و تعبت من الحال ده حاسس انى عامل زى الماكينه لما يجى فى بالى احط كل همومى فى الشغل و مش عارف اذا كنت ماشى صح ولا غلط

:waving:

[Automatic]

انت ممكن ترجع مصر تانى؟ ..... حد فكر يسأل نفسه السؤال ده

أسأل نفسك السؤال ده بس فكر كويس قبل ما تجاوب

هاجر كندا :waving:

تم تعديل 10 يونيو 2008 بواسطة Automatic

[قائد المدفعيه الهولنديه]

الله يسامحك

انا عمال اصبر نفسى على الغربه وانت تفتح الموضوع ده تانى

ليه منشطش رابطه عشاق مصر تانى والكل يحكى عن اماله وماذا يحلم بس مش باسلوب الشات

بمعنى كل يحكى من جهته دون تعليق الا اذا كان بسيط ويدخل فى الموضوع

عـــــــــــــ :waving: ــــــاشق بلدى

ايدى على كتفك يا ريس... اتوكل على الله و انا معاك

[قائد المدفعيه الهولنديه]

هاجر كندا :waving:

هاجر و عيشلك يومين و انت مبسوط بس صدقنى هيجى عليك يوم هتحس انك عايش فى بلد من غير روح ... الله يعينك

[النجم الثاقب]

أخى العزيز قائد المدفعيه الهولنديه

كلنا مجاريح :waving: .. قصدى كلنا فى الهوا سوا .. أعتقد مفيش حد مفكرش فى السؤال ده .. الأستاذ حلوانى جابلك من الآخر و وضحلك مراحل تطور الغربه زى الكتاب ما بيقول .

انا عن نفسى نفسى ارجع مصر دلوقتى بس مش عايز اعمل تصرف اندم عليه بقية عمرى ، لكن احتمال مع أول اجازه لمصر مرجعش تانى .. قرارى هيكون أسهل كتير من قرار ناس تانيه يمكن عشان لسه خفيف و معنديش التزامات غير انى عايز اكون نفسى و دى بسيطه .. بلاها جواز .. مع إنى فى أشد الحاجه الى السُكنى و الاستقرار النفسى .. الدور و الباقى على اللى متجوز و عنده عيال .. ربنا يكون فى عونه .

شكراً لك

[ziad]

كلنا هذا الرجل

[ايهاب سالم]

لو أعزب و عايش في السعوديه يبقى عندك حق لأنك بمثابة من يعيش في سجن

لكن لو عايش في بلد أخر و متزوج و معاك زوجتك و اولادك و دخلك عالي ستحمد ربنا كل يوم على نعمة العيشه بعيد عن مصر

تم تعديل 11 يونيو 2008 بواسطة ايهاب سالم

[ايهاب سالم]

هاجر كندا

هاجر و عيشلك يومين و انت مبسوط بس صدقنى هيجى عليك يوم هتحس انك عايش فى بلد من غير روح ... الله يعينك

هنتكلم بصراحه و الا هنضحك على نفسنا و نقضيها شعارات

... يا راجل ده أنا لم أعرف طعم الحياه الحقيقيه التي يستحق أن يعيشها البشر إلا خارج مصر

و هو ما أفتقده عند كل زياره لمصر

تم تعديل 11 يونيو 2008 بواسطة ايهاب سالم

[capitshino]

انت بتفتح الموضوع دا ليه

كل واحد لما خرج من مصر كان زيك كدا ناوي علي سنتين تلاته وبالكتير اربعه

وبعدين يتجوز وتاخده الايام ويبقي يقول سنتين كمان

يخلف وربنا يرزقه بالاولاد تكتر المصاريف يقول سنتين تلاته كمان نحوش قرشين للعيال

يدخلو العيال المدارس والدنيا تولع ما يعرفش يعمل القرشين اللي في دماغه والقرشين اللي معاه مابقوش يجبيو كسوة الشتا

يمدد الغربه شويتن

يلاقي فات عليه عشرة او اتناشر سنه ولما بينزل الاجازه ما بيعرفش يتعامل مع الناس ومعافه قلت ومبقالوش حد

يستني شويه لما العيال تاخد الثانويه العامه وتبقي الحياه عنده مصاريف ما يقدرش يوفرها لو نزل مصر

العيال خلصت الجامعه طيب اجوزهم وانزل

تنزل فين ياعم عيالك اصلا مش عايزينك تنزل علشان لو نزلت مش هاتقدر توفرلهم مطالبهم

حلاص لما تتطلع معاش تنزل غصب عنك دا اذا ادك ربنا العمر ومنزلتش في صندوق

اسف للنهايه الدراميه لكن هي دي احوال مجموعه كبيره من المغتربيين

الاخ حلوانى

وكانك تصف حال بعض الزملاء هنا .. انت متاكد انك فى الكويت ولا شغال معى فى الشركة هنا

[مصر]

على فكرة انت فتحت موضوع كل الناس اللى مسافرة بعيد عن مصر بتهرب منة لما بيجى فى تفكيرهم

وعلى فكرة كمان المشكلة مش فى انك بتحقق هدف وهدف بيجيب هدف

لا المشكلة ان بلدنا هى اللى عملت فينا كدة اهدافك ممكن تحققها فى اى مكان لو فى وسيلة وطريق تقدر تمشى فية لتحقيقها

الموضوع دا متعب جدا والواحد كتيييير بيهرب من التفكير فية

وكل الناس على كل المستويات فى الغربة بيفكرو فى الموضوع دة وفى الاخر بيهرب منة كالمعتاد

تحياتى للجميع

[somayasaleh]

آه ه ه ه ه ه ه ه ه ه ه قلبت علينا المواجع

طبعا اللي خرج بره مصر لاي مكان مش ممكن يرجع تاني لها....

اتكلم عن نفسي وتجربتي الشخصية.......

سافرت مع زوجي في بداية حياتنا الزوجية... هو لسه طبيب متخرج جديد

واتفقنا علي سنتين بس بتوع العقد كان في مكان في السعودية (الباحة)

بعدين رزقنا ربنا بولد وبنت قلنا .. سنتين كمان نوفر لهم مبلغ كويس......ز

وبعدين قلنا لما يوصلوا لسن المدارس ننزل مع بعض كلنا.......وبعدين.....قلنا المدارس الاجنبية هنا مستواها راقي ندخلهم فيها لحد الاعدادي

الاعدادي جر الثانوي ...... ولانها مدارس تدرس نظام IGCSE

كان لازم ننزل نكمل الجامعة في مصر و...........هلم جرا..........

والحمد لله الدكتور مستواه ومركزه اصبح بفضل الله تعالي جيد فلم يستطيع ان يعمل في المستشفيات المصرية

ولذلك .....انا والاولاد هنا..... وهو يعمل هناك...... ولذلك قررنا ان نلم الشمل تاني ولكن ....مش في مصر..... علي كندا ان شاء الله تعالي

أعتقد ده مصير كل من يخرج من مصر و خاصة في ظل الظروف الحالية

وربنا يوفق الجميع

[أبو عمر المصري]

شوف يا سيدي

كل شئ وله مزايا وله عيوب تختلف من شخص لآخر

لو انت أعزب هاتكون مشكلة الغربه صعبه عليك وخصوصا لو بالسعوديه فاروح اتجوز وهات زوجتك معاك وعيش حياتك هاتخف حدة الحنين لمصر شويه وهاتشوف مستقبلك وتحدد أهدافك بشكل أفضل ، إنما مصر مانصحش بيها في الوقت الراهن لأن مصر مريضه اليومين دول

[Mohamed Khalaf]

أنا من رائى فعلا متحولشى فعلا بشتى الطرق تقعد برة أكتر من سنة لوحدك ولازم يبقى معاك الأسرة أو تتزوج

[قائد المدفعيه الهولنديه]

اختنا الفاضله مدام سميه..... اعتذر بشده لم اقصد تـقليب المواجع فقط وجدت السؤال يدور فى ذهنى و لا اجد له إجابه فحاولت ان اشرك الجميع و نفكر سويا بصوت عالى حتى يستفيد الحديث فينا من القديم فى موضوع الغربه..... أعدعو الله لكى و لعائلتك الكريمه بالتوفيق و ان شاء الله ربنا يجمع شملكم على طول

[كمبورا 6]

الزميل حلوانى

مين سمح لك تحكى حكايتى مع الغربة ؟

كأنك عايش معايا يوم بيوم

لازم نشوف طريقة ننبه بيها غيرنا وبلاش يغلطو نفس الغلطة مع اعتبار كل واحد وظروفه

مع الاحترام

[aimen]

راجع ولا مش راجع ؟ كلنا لازم نرجع فلا لحظة ما حتى لو حاولنا تأخيرها لأخر لحظة أو هربنا منها

عن نفسى دايما باهرب من الموضوع ده بالشغل أو عدم التفكير فيه ...انا مش مرتبط عازب وبالتالى لا توجد ورائى اية مسئوليات أو غيره الراتب من الصراف للبنك الغربة مش هدف فى حد ذاتها و انما اسلوب الحياة اى نعم هنا فية شغل وقرف وتعب لكن على تعبك بتلاقى احيانا اللى بيقدر انما فى مصر مش عارف الأمور اكثر ضبابية ومش واضحة من عامين نزلت مصر لمدة اسبوع واحد فقط ( كنت بأنهى ارتباطى ) صراحة لم اتمكن من الجلوس فى مصر لأكثر من اسبوع نفسيا ما قدرت الواحد اتعود على نمط الشغل دايما مش عارف الراحة بقت صعبة كل اللى يسأل عن ميعاد نزولى اقول على كأس العالم الجاى ؟ أو لما جواز السفر يحتاج تجديد ؟؟؟؟ اكره اسلوب ان الناس تشتغل جزء من اليوم وتكمل باقى اليوم كلام على الناس ودا اللى بيحصل فى مصر بأحب فى الغربة راحتى وبأكره الوحدة يمكن علشان السن برضه لسه صغير ومش حاسس بالعمر لكن انا فعلا حاسس انى لاقى نفسى هنا اى نعم غريب ووحيد بس يمكن مستريح نفسيا عمل معقول وراتب معقول والحمد لله

بتسألونى امتى انزل مصر ؟ مصر فى اهلى مصر مش مكان مصر فى تعامل ناس لو لقيتها فى اى مكان يبقى انا فى مصر مصر فى اصحابى اللى بيسألوا على مصر هى والدى ووالدتى مهما كانوا .....احنا مشكلتنا اننا عاملين زى اللى بيرقصوا على السلم لا احنا زى الفلسطينين بدون وطن ومرتبين حالنا على كده ولا احنا زى باقى الجنسيات عاوزين نقضى فترة لتحقيق هدف ما ونرجع ؟

كل حاجه ولها ثمن و الغربة ثمنها مر شوية ؟ بس فيه ميزات برضه ...مفيش حاجه وحشة 100 فى المائة