انت ممكن ترجع مصر تانى؟

[حلواني]

الاخ العزيز كابتشينو

انا فعلا في الكويت بس مش معاك في الشركه لكن دا حال كتير من المصريين هنا

الاخ كمبورا 6

انا اسف اذا كان ردي شايه الكثير من ظروف المغتربين معظمنا صور قريبه الشبه من بعضها

باقي الاخوه المغتربين

لو عايز غربتك تبقي قصير خليك عازب اعمل القرشين اللي يعينوك علي بداية حياتك وانزل اتجوز وعيش في مصر

لو عايز تعيش مستور وبالحلال اتجوز وهات مراتك واولادك وعيش ومتشتكيش

مصر زي ما قال الاخ ابو عمر مريضه اليومين دول

انا لسه متفرج دلوقتي علي فيلم (( حين ميسره )) وحاله الكآبه جايبه اخرها

تحياتي للجميع

تم تعديل 11 يونيو 2008 بواسطة حلواني

[justtrying]

بصراحة وبدون أية عواطف يعني كلام صريح

الحياه هنا في الكويت لذيذة مووت وخصوصا ان الواحد صافي الزهن ... ولله الحمد الواحد وصل لمرحلة أنه هوه الي بيهيأ لنفسه ظروفه بفضل الله انه يكون صافي الزهن صافي القلب بدون التفكير في أي مشاكل أو وجع دماغ .. وخصوصا الزواج ومصائبه :D

يعني الحياه كدة مية فل واربعتاشر .. عندك بئه لغايه خمس سنين عشرة .. مش فارقة معايا المهم والأهم بإذن الله أهلي يكونوا مستريحين والدي ووالدتي مش عاوز اكتر من كدة

من ناحية ارجع مصر .. فأنساني وخد عنواني والله لو مين منش راجع

بصراحة انا قرفان من مصر طحن ومش طايق اشوف حاجه فيها .. بس اهلي ووالدي وولدتي واخويا واصحابي .. لكن الناس والحياه .. نيفر إيفر فوريفر

تم تعديل 11 يونيو 2008 بواسطة justtrying

[ايهاب سالم]

بصراحة انا قرفان من مصر طحن ومش طايق اشوف حاجه فيها .. بس اهلي ووالدي وولدتي واخويا واصحابي .. لكن الناس والحياه .. نيفر إيفر فوريفر

كلام جميل

كلام معقول

مقدرش اقول حاجه عنه

انا عشت عشر سنين في قطر كنت بانزل مصر اقول يا غربتي

[قائد المدفعيه الهولنديه]

شىء مؤسف جدا انى اشوف ردود بالمنظر ده انا اترفع عن الرد على اى شىء منها .... أريد ان اقول مصر كبلد ربنا كرمنا بحاجات كتير مش عند اى حد فى الدنيا لا فى الكويت ولا قطر و السعوديه و لا اى مكان فى الدنيا موقع جميل على الخريطه بحرين اجمل من بعض نهر النيل العظيم التربه الخصبه هى دى بلدنا لكن احنا بقى عملنا ايه للارض دى( شوهناها و سرقناها و بهدلناها )اذن العيب فينا مش فى مصر .... احنا شعب نصفنا سلبى و الباقى حراميه .... اللى ملوش خير فى اصله يبقى معندوش اصل.... قوم اقف قدام المرايه و حاسب نفسك و شوف انت نفعت البلد دى بأيه؟

[galaxy]

اول مرة جيت فيها هنا..مع اني مع اهلي ....كنت شايله هم الغربه اوي اوي ......الحياه البارده واني ابعد عن كل حاجه اتعودت عليها...وكل لما اجي اجازة او زياره للامارت ابقي شايله هم السفر جدا جدا واني هسيب مصر واكتأب جدا جدا.

لكن اخر مرة بقي جيت هناقلت لازم استفيد من غربتي طالما الغربه بقي ليها ضريبه يبقي استفيد الشويه دول......ولما اتأخر الشغل اتضايقت بس لما اشتغلت.رغم اني بشتغل من تلات شهور بس......حسيت اني بعمل حاجه مفيده واني ليا هدف.

.المشكله ان الواحد بيسمع ان الوضع في مصر بقي صعب جدا جدا...وكل اصحابي بيقولولي ازاي تبقي عندك وتفكري تنزلي او ترجعي شغلك هنا.......بس بجد اللي اعرفه ان اللي عايز يعيش صح او يربي ويدخل ولاده مدارس صح يبقي مش هيقدر في مصر.....كلنا بنتمنهاها احسن بلد ...ومحدش طبعا غاوي غربه ولا بهدله وكفايه لمه الاهل والحبايب........بس هنعمل ايه.

.عن نفسي مثلا وجودي مرتبط بوجود اهلي اللي خلاص هينزلوا عن قريب وانا معاهم طبعا.لكن الناس اصحاب المسئوليات...وخصوصا المتزوجين ....لان عندهم مسئوليات كبيرة وعايزين يربوا ولادهم احسن تربيه ويعملوا لهم اللي هما ما شافهوش.ويوفروا لهم حياه كريمه...بصورة ادميه .يعني اكل نظيف ومعامله محترمه وتعليم صح وتقدير للعمل واللي بيعمله واللي بيحصل بره بس للاسف....حتي كمان قل كتير في الخليج للاسف.

انا عن نفسي شايله هم الاجازة في مصر وبتمني ما اتصدمش اوي ......ربنا يصلح الحال للكل ويصلح حال البلد........بس برضه بره علي الاقل لحد دلوقتي ارحم واكثر ادميه.

[سكر]

يا جماعة انا نازل اجازة مصرالاسبوع الجاى وبشتغل فى السعودية من 5 سنوات انا ليا اولاد وزوجه واهل لهم ظروف خاصة فى مصر

ومن سنتين قررت اشتغل فى السعودية شهرين وانزل مصر اسبوعين او شهر عشان اعود نفسى على مصر لما انزل

عشان المشاكل الى فيها وكل الاجازات من المرتب على حسابى

لانى بسبب الظروف العائلية لازم انهى السفر بالكتير اخر السنة دى

بس انتم كدة بتصعبوا الامور عليا وتحطونى بين نارين

فالله يكرمكم نحاول ولو يكون فى نظرة اجابية لمصر ولو قليل

[aimen]

ما حك جلدك مثل ظفرك

فتولى انت جميع امرك

تم تعديل 11 يونيو 2008 بواسطة aimen

[ahamedgad]

مصرى متخرج بتقدير عام جيد جدا مع مرتبة الشرف وكمان الدبلومة اللى بيقولوا عليها برده بجيد جدا والشهادة اللة بنسميها الرخصه الدولية لقيادة الكمبيوتر والشهادات كلها بتقديرات مرتفعة

لكن لولا ذكر مصر فى القرأن كنت لعنتها الف مرة و مرة

انا واحد نفسى اسيبم مصر النهارده ابل بكره ومتهيألى انه من حقى عشان ابدأ مستقبلى حتى

[capitshino]

.. احنا شعب نصفنا سلبى و الباقى حراميه ....

الاخ قائد المدفعية الهولندية

عيب لما تقول ان نصف الشعب المصرى سلبى والنصف الاخر حرامى.. لان بالنسبة لى لم اكن فى يوم سلبى

واعتقد برده اننى لم اكن حرامى ذات مرة

عالعموم هنا ليس مجال لاحكى لك ما فعلت خلال وجودى فى مصر لتغير وضعى ووضع اصحابى

وللاسف كل او معظم المحاولات كانت فاشلة.

شكل لمداخلتك و لكلامك الذى لم يثلج صدورنا.

[Automatic]

عالعموم هنا ليس مجال لاحكى لك ما فعلت خلال وجودى فى مصر لتغير وضعى ووضع اصحابى

وللاسف كل او معظم المحاولات كانت فاشلة.

شكل لمداخلتك و لكلامك الذى لم يثلج صدورنا.

يا ريت تحكي و أكيد حنستفيد.

[أبو عمر المصري]

في لحظة تجلي كده مع كوب من الشاي الأخضر وانا جالس مع المودام وبنألب المواجع بتاعت المصريين الحلوين المتغربين

توصلنا للأتي

الناس على 3 أنواع في موضوع الحنين للوطن والغربه

ناس ماعندهاش مشكله ممكن تتغرب ،تعرف تتأقلم ممكن تسيطر على حنينها وعواطفها نجحت في عملها ولاقت تقدير ولاقت ما افتقدته في مصر

كمان ممكن واحد يكون طالع من مصر بمشاكل كتير مكرهاه مصر سواء مشاكل مع الحكومه أو مشاكل في عمله أو مشاكل مع أهله فبالنسبه له مسالة الأكلان بتاع الحنين ده مش هايتعبه كتير يمكن في لحظات بسيطه لما يكون فاضي في الويك إند في الغربه ويجيله حالة الهوم سيك ( home sick ) ودي حاله بيعرفها كل من تغرب قد تطول وتقصر حسب كل شخص

ويمثل النوع ده من حبايبنا الأعضاء حسب الأنطباع اللى جالى..مين ؟؟

مين ياترى ؟؟

انا بارشح أخونا أيهاب سالم

والنوع التاني من الناس اللى هما عاطفيين أوي مايقدروش يبعدوا كتير عن بلدهم وأهلهم بغض النظر عن ذكرياته مع البلد سواء كانت أليمه او جميله بيكون عامل زي الزرع اللى لو أقتلعته من مكان وحاولت تزرعه في مكان آخر بيمرض ويموت .. النوع ده مابيطولش في الغربه وبتلاقيه قاعد متململ ودايما يداعب تفكيره فكرة النزول النهائي وبينفذها فعلا وبيحاول يقنع نفسه بأسباب نزول منطقيه بالنسبه له عشان مايندمش يقول لك ياراجل دي قعدتى ف بلكونتى ساعة العصر كده مع كباية الشاي بالدنيا وما فيها

مين بأه من الأعضاء الحلوين اللى بيمثل النوع ده ؟؟

طبعا فيه كتير

بس انا بارشح اخونا صاحب الموضوع قائد المدفعيه بدليل انه فتح الموضوع ده

واحب اقولك حاجه يا قائد المدفعيه بتتقال دايما لحديثي الأغتراب .. هي أول سنتين بس هاتحس بالأستبحس ده بتاع الغربه وبعدين هاتتعود والأمور هاتكون أهون وخصوصا لو معاك شريكة حياتك

أما النوع التالت وهو خليط من الأتنين معتدل العواطف معتدل التفكير منطقي بيحسبها حسب أهدافه ومستقبله و المصلحه العامه بتاعته وبتاعت أسرته هاتلاقيه عايش برضه في سلام وأمان وممشي حاله على كل الأوضاع عشان يحقق التارجت بتاعه سواء إذا كان عازب أو متزوج

عازب .. عنده تارجت الشقه الزواج السياره قرشين يعمل بيهم مشروع لما ينزل.. دا لو نزل

متزوج .. زي ماتفضل اخونا حلواني اللى غطى لنا الموضوع كله في مداخلته السابقه وفي الغالب بتتغير الأوضاع بعد دخول الأبن أو الأبنه الكبرى الجامعه ، وده حال الكثير من المصريين المتمسحين في الغربه ( متمسحين من تمساح ) ( ودي عاوزالها موضوع لوحده )

بيتهيألى كده ان دى نوعيات المصريين في الغربه ( حسب رؤيه شخصيه ) وياريت لو حد عنده نوعيات تانيه نحب نعرفها

في النهايه وببساطه كل واحد بينام على الجنب اللى يريحه

وبتمنى التوفيق لكل الأخوه والأخوات المصريين المغتربين

[قائد المدفعيه الهولنديه]

الاخ الفاضل كابتشينو..... انا قصدت انا البلد فيها حراميه كتير و الناس ساكته مش قادرين يغيرو ده يبقى احنا مش بنشارك يعنى سلبيين ... امال فين الناس بتاعت زمان اللى عملت المظاهرات و حرقت الترماى لما السادات رفع الدعم عن بعض السلع فى السبعينات انا لا اقصد الاهانه اطلاقا......

اخونا الكبير ابو عمر ..... معاك حق يا ريس ممكن علشان انا تقريبا ليا سنتين و نص فقط لا غير يتوسطهم اجازه .... لازم الواحد الاجازه اللى جايه يسعى فى مشوار الزواج ان شاء الله يمكن نقدر نخفف على نفسنا شويه

[iloveegypt]

اكيد لازم ارجع مصر تانى لان بصراحة العيشة فى مصر احلى بكتير من الغربة واسئلو المصريين المقيمين فى المنفوحة بالرياض او السدة ببريدة وهم الغالبية العظمى من المغتربين مصر عيشتها ارخص وتعليمها افضل بكتير من التخلف العقلى اللى هنا كفاية منظر النيل وخفة دم الناس وعدم العنصرية مصرى سودانى هندى كله زى بعضه مش السعودية مثلا اللبنانى ثم الاردنى ثم المصرى ثم البجالى طبقية وعنصرية الحياة هنا كيئبة جدا ولولا مكة والمدينة لكانت جحيم

اولادى رغم انى بفسحهم كل اسبوع مرتين امرة مخنوقين وازاى مرجعش لاهلى واخواتى بصراحة انا شفت الناس اللى قعدين اكتر من عشرين سنة معظمهم تحس قلبه جمد ولا اجتماعيات ولا خلافه بصراحة انت بصين لمصر من نظارة سوداء فالاسعار لوغلت فى السعوية اكتر من ضعفين وده عادى ولو الزيت غلى من 7 جنيه الى 10 جنيه تبقى مصيبة العيب الوحيد فى مصر الحكومة فقط وانا راجع لبدى راجع علشان خاطر اولادى ميطلعوش معقدين نفسيا وعلميا وانا بالمناسبة شغال فى مكان كويس ومرتب محترم بس مصر احلى بكتيير وبلاش عقدة الناس اللى بتسافر بتشوف كل حاجة سودة فى مصر

[سكر]

طيب ممكن نلقى نظرة على الفكرة كلها من زاوية تانية وهى

مصر بلد وحشه ......بس بلدنا

مصر بلد فيها فساد......بس بلدنا

مصر بلد فيها سرقه ......بس بلدنا

مصر بلد اتزل فيها اهلها ......بس بلدنا

مصر فيها كل العبر ......بس بلدنا

السوال الى ممكن يحل كل المشاكل لو الواحد جاوب علية بصدق بس بصدق حقيقى

انت سافرت لية

90% من المغترببين مغتربين عشان المادة وليس كل المغتربين عشان محدش بس يزعل

طيب يبقى حل مشكله السفر هو المادة

بالعربى تاخد كام عشان تعيش فى مصر

ومنساش ان مصر فيها

الجامعة الامريكية للتعليم- والمدارس الانترناشيونال - وشرم الشيخ ومارينا والساحل الشمالى وفنادق الخمس نجوم-والازهر - والمساجد- وفيلا- ومنتجعات عالمية

يعنى مصر فيها كل حاجة حلوة بس طبعا الوحش اكتر والحلو مقصور على فئه معينة من الشعب

يبقى نرجع تانى للسوال هو تاخد كام عشان تعيش فى مصر او تبطل غربة وتعيش عيشة محترمة داخل بلدك الوحشه

الى يجاوب ويقول انا مش عايز الفلوس يبقى يبطل يقرا الموضوع دة ويريح دماغة خالص ويبتدى يتعامل مع مصر على انه سائح يجى فيها اجازة يبسط شوية ويقرف شويه ويزل المصريين ويقولهم فى الصومال والدول والنتقدمة بيعملوا كذا وكذا

انا عن نفسى لو اخد تلت(1/3) مرتبى فى الغربة هنزل مصر فورا بلا غربة بلا ارف

انا مش ضد السفر بل عل العكس انا مع السفر جدا وبنصح كتير بالسفر لان فيه فعلا فوائد كتير للشخص بالذات فى مقتبل العمر وقبل الزواج

لكن السفر فيه عنق زجاجة وهو مدة الخمس سنوات من ان شايف ان الى يكسر حاجز الخمس سنوات سهل اوى يشد للعشرة

وللى يكسر العشرة بسهوله يكسر العشرين لان ميخفاش عل الكل ان هدف الغربه هدف متحرك دائما

انا قابلت كذا شخص كسر حاجز 20 سنه بالغربة والله كلهم ندم وحسرة ومش عارفين يرجعوا يتمنى لو يرجع بيهم الزمن ويقتصروا على خمس او سبع سنين

بالرغم من النجاح المادى الباهر جدا الى عايش فية

يقول الرسول علية الصلاة والسلام

لو كان لابن آدم وادياً من ذهب لتمنى أن يكون له واديان ولن يملأ فم ابن آدم إلا التراب

[النسر المصري]

هاجر كندا

هاجر و عيشلك يومين و انت مبسوط بس صدقنى هيجى عليك يوم هتحس انك عايش فى بلد من غير روح ... الله يعينك

هنتكلم بصراحه و الا هنضحك على نفسنا و نقضيها شعارات

... يا راجل ده أنا لم أعرف طعم الحياه الحقيقيه التي يستحق أن يعيشها البشر إلا خارج مصر

و هو ما أفتقده عند كل زياره لمصر

كنت لسه هابدأ أعقب لحد لما لقيت مداخله العزيز ايهاب سالم والتي تحدثت عن المضمون بكل صراحه

فعلا مش هنضحك على بعض....وفعلا لم نذق طعم الحياه الحقيقيه الا بالخارج...وهذا للأسف الشديد....

لا...لن أعود....حتى أشعر ان حكومتنا الجليله ستفي بحق المواطن كما نريد

وإلا.....فعيني عليكي دامعه يامصر....إلى حين!!!

[metwallly]

بصراحة ومن الآخر كله لازم هيرجع إن عاجلا أو أجلا

يعنى محدش يضحك على نفسه

والناس اللى بتكلم على أنهم عايشين بحرية وكرامة وكلام من ده يعنى

يقولولى فين الحرية والكرامة دى أنته لو حبت تدخل الحمام لازم موافقة الكفيل

لو حصلك أى حادث ورحت مستشفى حكومى وملكش تأمين

((الاقامة لو سمحت.....وأنته تاعبن بتموت.......أجنبى ملكش علاج عندنا))

وده اللى حصل وأن كنت مع عامل بنغالى بالع شوكه ورحت معاه مستشفى الشميسى والراجل من الإلم مش عارف يتكلم بص فى الأقامه وقله أجنبى أتعالج على حسابك

تخيل لو أنته فى مصر وواحد يهودى راح قسم الطوارى فى أى مستشفى هيعلجوه ولا هيسألوه عن الإقامه

بالنسبة للناس اللى بيقولوا أولادنا وهنا المدارس أحسن والتربية أحسن فين الكلام ده

((من يومين ماشى فى الشارع شوفت طفل مصرى واقف أمام بوابة البيت بيخبط علشان حد يفتح له

وثلاث أربعه سعوديين بازوره زى ما بيقولوا.....بالرمل فى وش الطفل المسكين وفى عينيه وده قدام ما يسمى بيته والولد ولا حول له ولا قوة....يعنى لولا أنقذته من أيديهم ما كانوش سابوه....تخيل))

لو ده فى مصر الطفل ده هيستسلم بالشكل ده...........ردوا

وأنته أبوه لو فى مصر وحكالك على الموقف ده هتسكت...........وتسيب البازوره دول......ما أعتقدش

طفل بتحصله المواقف دى هتكون شخصيته أيه لما يكبر...........متربى على الحرية

الحريه مش محرد ماديات وفلوس أنته وأنته طفل صغير فى مصر كنت بتعمل أيه فى موقف زى ده......................................................

أن عاوز الناس ترد على الحاجات دى بصراحة وما تنافقش نفسها

وأنا عندى مواقف تانيه كتيييييييييييييييييييييييييير لوتحبوا..............بس كفايه مراره

وفى إنتظار ردودكم..............................................

تم تعديل 12 يونيو 2008 بواسطة metwallly

[النجم الثاقب]

بصراحة ومن الآخر كله لازم هيرجع إن عاجلا أو أجلا

يعنى محدش يضحك على نفسه

والناس اللى بتكلم على أنهم عايشين بحرية وكرامة وكلام من ده يعنى

يقولولى فين الحرية والكرامة دى أنته لو حبت تدخل الحمام لازم موافقة الكفيل

لو حصلك أى حادث ورحت مستشفى حكومى وملكش تأمين

((الاقامة لو سمحت.....وأنته تاعبن بتموت.......أجنبى ملكش علاج عندنا))

وده اللى حصل وأن كنت مع عامل بنغالى بالع شوكه ورحت معاه مستشفى الشميسى والراجل من الإلم مش عارف يتكلم بص فى الأقامه وقله أجنبى أتعالج على حسابك

تخيل لو أنته فى مصر وواحد يهودى راح قسم الطوارى فى أى مستشفى هيعلجوه ولا هيسألوه عن الإقامه

بالنسبة للناس اللى بيقولوا أولادنا وهنا المدارس أحسن والتربية أحسن فين الكلام ده

((من يومين ماشى فى الشارع شوفت طفل مصرى واقف أمام بوابة البيت بيخبط علشان حد يفتح له

وثلاث أربعه سعوديين بازوره زى ما بيقولوا.....بالرمل فى وش الطفل المسكين وفى عينيه وده قدام ما يسمى بيته والولد ولا حول له ولا قوة....يعنى لولا أنقذته من أيديهم ما كانوش سابوه....تخيل))

لو ده فى مصر الطفل ده هيستسلم بالشكل ده...........ردوا

وأنته أبوه لو فى مصر وحكالك على الموقف ده هتسكت...........وتسيب البازوره دول......ما أعتقدش

طفل بتحصله المواقف دى هتكون شخصيته أيه لما يكبر...........متربى على الحرية

الحريه مش محرد ماديات وفلوس أنته وأنته طفل صغير فى مصر كنت بتعمل أيه فى موقف زى ده......................................................

أن عاوز الناس ترد على الحاجات دى بصراحة وما تنافقش نفسها

وأنا عندى مواقف تانيه كتيييييييييييييييييييييييييير لوتحبوا..............بس كفايه مراره

وفى إنتظار ردودكم..............................................

تسلم

:happy::ok::lol:

[حلواني]

الاستاذ الفاضل متولي

المواقف اللي حضرتك بتحكيها فعلا ممكن تتسبب في المراره لاي انسان .

لكن لو نفس الموقف حصل معاك في مصر وضرب ابنك ابن ظابط شرطه

او ابن واحد مجرم بايع نفسة ومن بتوع البلطجه وانت راجل محترم

ها تعمل ايه يا بطل هاتعرف تاخد حقق من غير واسطه او ظهر يحميك ؟؟؟؟؟؟؟؟؟؟؟؟؟

موضوع العلاج في كل الاحوال لازم تتعالج بفلوسك حتي لو في مستشفي حكومي في مصر

المشكله في ان المصري بقي للاسف رخيص في مصر وخارج مصر

ومش عارف ليه الموضوع اتحول للهجوم علي مصر هو حب مصر ها نختلف عليه كمان

ظروف مصر هي اللي صعبه في الوقت الحالي اصعب من اي فتره سابقه ودا لاسباب كثيره

وللاسف الناس البسيطه اللي انامنهم صبحت حياتهم صعبه وبيعملو اي حاجه علشان يعيشو

وللاسف مع وجود الفضائيات وهامش الحريه الاعلاميه بدء المجتمع يتعري وتظهر سلبياته علي السطح

مع انها قديمه وفي النهايه كلنا بنتمني نرجع مصر لما نقدر نعيش فيها مستوريين وبكرامتنا

تحياتي للجميع

[osmel33]

الأخوة الأفاضل وعلى رأسهم قائد المدفعية سامحكم الله قلبتوا المواجع أنا عشت كتير بره مصر من صغرى تقريباً ولما كبرت كملت مسيرة الغربة بس الحمد لله ولادى معايا وقاعدين فى قطر وطبعاً احب أمسى على الأخ ايهاب سالم اللى كان فى قطر وللأسف ارتباطي بمصر هو انى مصري وشربت من نيلها بس عمرى ما فكرت اغنيلها لأني اشتغلت فيها فترة مش ولا بد وكان فى أماكن اكثر من محترمة حتى الناس فى مصر كانوا بيلومونى عايز تمشى وتسيب مصر ليه ما انت عايش كويس وفى وظيفة محترمة كمان فى مصر (محلل نظم ومدير مشروعات فى المعونة الأمريكية فى مصر) وراتب كويس بس للأسف الشديد الهدف ماكنش الفلوس أنا طبعاً عارف ان فيه أغلبية سافرت علشان العمل والدخل المادي بس أقولكم المفاجأة اللى يمكن يتصدم بيها الجماعة اللى مقيمين فى السعودية الناس تحديداً فى الإمارات وقطر عايشين بس وخدينلى بالكوم من بس دى يعنى هنا هاتعيش حياة كريمة وتدخل ولادك مدارس محترمة أشى بريطاني على أمريكاني وادفع يا معلم وطبعاً شغل كروت الإئتمان والقروض شغالة على ودنه هاتيجى تقول ايه اللى جابرك اسأل نفس السؤؤال لكل اللى فى قطر وكل اللى الإمارات هايقولولك احنا هنا عايشين عيشة مشم ممكن نعيشها فى مصر يعنى أنا رأى الشخصى أنا هنا عايش عيشة حلوة وباكل كويس ولادى بيتعلموا كويس (ومسألة بيتعلموا كويس هبقى اقولكم على قصتها بعدين) وبنتعامل بأدمية ومش بنحوش فلوس وفى مصر مش هانعيش عيشة حلوة ممكن ناكل كويس وممكن ولادى يتعلموا كويس لكن الأكيد المعاملة مش هاتكون أدمية وبرضه مش هانحوش فلوس يبقى عرفتوا ليه احنا مش قادرين نرجع مصر على فكرة انا ولادى لسه نازلين من يوم الثلاث اللى فات وتصدقوا فى مصر حاسين بزهق وعاوزين يرجعوا وانا لسه قدامى لغاية 20-7 على ما انزلهم، حلوة مصر wst::

[سكر]

الاخ اسامة

انا ايضا محلل نظم وكنت شغال فى مصر فى مكان كويس الحمد الله

والان شغال فى السعودية

وفى حوار اخر كان ليا رد على الاخ ايهاب سالم

http://www.egyptiantalks.org/invb/index.ph...mp;#entry367562

اعتقد انه ايضا ممكن يكون رد عليك فى موضوع الهجرة

============================================

ممكن نطبق المبدا دة فى فترة من حياة الانسان وليس كل الحياة بمعنى ان ممكن تطبق هذا لبعض السنوات وليس كل السنوات

وانا مع السفر والاختلاط بالعالم والحضارات المختلفة

لان لو كل واحد فكر بنفس الطريقة يبقى كلنا ننسى البلد ونشوف بلد تانى

مش عايزك تاخد الكلام بصفة شخصية بس واجب على كل واحد الاصلاح فى البلد( بما يقدر)

انا معاك انك مش ممكن تقدر وانت فى مقتبل حياتك لكن بعد كدة انت تقدر يعنى ممكن تفتح بيوت ناس بمشروع صغير

يا جماعة فى ناس ماتت فى حروب عشان بس نعيش فى البلد مش لازم تكون الشوارع مرصوفة بس الناس ماتت عشان تعيش على الاقل فى ارض بسلام وعليك انت ترصف الشارع

طبعا بدون لا ضرر ولا ضرار

طيب بلاش هو يا جماعة لو حصل فى مصر حرب والبلد طلبت الشباب عشان الحرب هل هنقول الحكومة وحشة واحنا مش هنحارب معاة

ولا نبعت شوية فلوس ونقول عملنا الى علينا

اصلح نفسك وابنى نفسك بس متنساش حق البلد عليك فى اصلاحها