" جايلك يا مونتريااااال ، يا مدينة الخيااااال !!! "

[Einstein]

مش عارف اقول ايه ؟؟!

مكسوف منكم :blush2: للتاخير

بس والله و حشتوني وحشتوني وحشتوني

ونفسي ارجع انتظم في الدخول و المشاركة

خاصة وانا عندي كتير اوي عاوز احكيلكوا عليه

وصور كتير ( لحد دلوقتي 700 صورة ) عاوز افرجكوا علي روعة و جمال مونريال

يكفي تعرفوا اني لحد دلوقتي ( هقفل شهر هنا قريب :rolleyes: ) لسه منبهر بالمدينة التي فاقت كل ما تخيلته :wub:

ببساطة يا جماعة انا مش هاين عليه اقعد في البيت و اسيب الجمال اللي حولية في كل مكان

معلق قدامي خريطة لمونريال وكل يوم في مكان

و الخريطة موضحة خطوط المترو و الاتوبيس فبسهولة تقدر توصل لاي مكان

( علي فكرة الخريطة دي بيوزعوها في المطار في قسم الهجرة و بعدين لقيت انها برضة موجودة في محطات المترو وبتتوزع مجاني مع خريطة المترو كمان )

وهبقي ارجع لموضوع الاتوبيس و المترو ده واكلمكم عنه بالتفصيل وعن موقعهم الرائع و نظامهم العبقري

لانه برغم اني لسه معنديش عربية الا ان المترو باس مخليني استكشف جزيرة مونريال من شرقها لغربها و من شمالها لجنوبها بكل سهولة

واحب اشكر كل اللي دخل الموضوع و شارك

وأخص بالشكر كل اللي سأل عليه و ودعالي :wub:

ومش عارف ابدا احكي ولا ارد علي اللي فات ؟؟؟

بس عاوز استأذن و اقول علي خبر مهم لسه عارفه النهاردة ابشر بيه الرابطة بتاعتنا

[Einstein]

بشري سارة :wub: لاعضاء رابطة الصيادلة المصريين الكنديين - ان شاء الله -

روحت للاوردر بتاعنا علشان اتابع الملف بتاعي و اعرف هيطلبوا مني دراسة كام كريديت

عرفت انهم في المتوسط بالنسبة للصيادلة من مصر بيطلبوا عدد من 50 الي 80 كريديت دراسة في كلية الصيدلة بجامعة مونتريال او جامعة لافال ( موجودة في كيبك سيتي و ليست في لافال ) ودول جامعتين فرانكوفون يعني الدراسة هتكون بالفرنساوي

قولت مش مشكلة ، طيب الكرديت دول يتعملوا في اد ايه ؟؟ قالك بسيطة من سنتين لتلت سنين فل تايم

يعني تقريبا هناخد الكلية من اول و جديد و بالفرنساوي .

طب قلت مش مشكلة اقدر ابتدي امتي ؟؟ قالك مش ممكن تلحق الاكادمك يير السنة دي ، لان اخر معاد للتقديم كان في ابريل ، وقدامي انتظر بقي لسبتمبر 2009 .

قلت مش مشكلة ، خلاص يعني لما اقدم السنة الجاية ادخل علطووول ، قاللك نووووو ، حسب فرصتك !!!

لان ببساطة كلية الصيدلة في مونتريال لا تقبل الا 6 طلبة من الهاجرين كل سنة و كلية الصيدلة في جامعة لافال لا تقبل الا 2 طلبة كل سنة ، فكل الصيالدة اللي بيجوا يقدموا و بياخدوا احسن 6 منهم علشان يدرسوا سنتين او تلاتة علشان تعادي بكالوريوس الصيدلة .

:blush2:

اللي فات ده عرفته هنا من اول اسبوع ، وده خلاني اصرف نظر عن مستقبل الصيدلة في كيبك .

بس الجديد بقي واللي هو بشري سارة و لسه عارفه طازة من الاوردر نفسه

انهم اخيرا لاحظوا هروب الصيادلة من الولاية لاونتاريو و الولايات الاخري لان كل المطلوب هناك هو امتحان البيبك ( 3 امتحانات زي ما احنا عارفين )

فقرروا اخيرا بتاريخ 26 يوليو 2008 اعتماد نتيجة امتحانات البيبك

يعني اللي عدي من امتحانت البيبك يقدر يشتغل هنا في كيبك

بس مطلوب منه كورس في قانون الصيدلة في ولاية كيبك ( ده مطلوب في كل ولاية )

ومكلوب 600 ساعة عمل تحت اشراف صيدلي مرخص ( برضة مطلوب في كل ولاية )

واخيرا مطلوب النجاح 60 % في امتحان اللغة الفرنسية

وبكده يبقي الحمد لله اللي عملته من زمان نفعني ( انا كنت مسجل في البيبك )

والمطلوب دلوقتي اعدي من امتحانات البيبك وبعدها اقرر اشتغل فين ( حسب موضوع اللغة )

اه قبل ما انسي

كمان الخبر السار التاني

ان الاوردر من اول يوم قالي اني ممكن اعمل مساعد صيدلي فورا بدون اي اوراق اضافية

وده هينفع جدا في امتحان الكواليفاينج بارت تو

وكمان ينفع في الخبرة المطلوبة للعمل

ما تنسونيش بدعواتكم مع تمنياتي بالتوفيق للجميع :wub:

فاصل و اواصل :rolleyes:

[Einstein]

وقفنا قبل كده عند مطار القاهردة الدولي gra:-

وطبعا رحلتي كانت علي خطوط مصر للطيران ، كانت افضل سعر للرحلة ون واي 2800 جنيه

دفعت تقريبا نصهم غرامة في الشنط الزيادة و رجعت شنط

المهم هحاول اختصر علشان ندخل في المفيد

رحلة الطائرة عدت علي خير ( عشر ساعات و نصف ) طيران مباشر متصل

بعد الاقلاع بدقائق وزعوا علينا باكيت صغير فيه غمامة ممكن تتلبس زي النظارة علشان لو الواحد عاوز ينام و فيه نور

وفيه سماعات علشان تسمع الفيلم المعروض او تختار قناة صويتية اخري

وفيه " زوج جوارب " "شراب يعني" علشان لو تحب ممكن تخلع الحذاء و الشراب بتاعك و تلبس الجورب ده و تتمشي فيه طوال فترة الرحلة

وفيه فرشة اسنان صغيرة مع انبوبة معجون اسنان محندقة تكفي مرتين تلاتة بالعدد

الحاجات دي مشفتهاش قبل كده في رحلات الطيران علي الخليج لان المده كانت قصيرة طبعا

وزعوا كمان و جبتين ( سمك او لحم ) و وبينهم و بعدهم مشروب و بسكويت .

طبعا في اي وقت ممكن تروح لاخر الطيارة تتمشي وترجع تاني او تاخد مشروب اضافي ( علي حسابك )

الطيارة كانت فاضية فالناس الخبرة بعد اقلاع الطيارة كانو بيدورا علي صف الكراسي اللي في النص ( اربعة كراسي ) ولما يلاقوا صف فاضي يرفعوا المساند و يعملوه سرير ( وضع يد :wub: ) علي ما اكتشفت الموضوع ده كانت كل الصفوف اتاخدت ( يلا بقي المرة الجاية :wub: )

خلال الرحلة و بعدها هتحس ان ده اطول يوم مر بيك ( فعلا مش مبالغة لان اليوم ده هيكون 31 ساعة ) يعني هتطلع من مصر ونور الشمس موجود و طوال الرحلة هتلاقي نور الشمس و لما تخرج من المطار برضة هتلاقي الدنيا لسه منورة :blush2:

و اثناء الطيران هتلاقي السحاب موجود تحت الطيارة و فوق الطيارة و احيانا الطيارة تخترق السحاب ده لو قاعد علي مدرجات الدرجة الاولي :rolleyes: قصدي لو قاعد جنب الشباك

اول ما الطيارة بقت فوق جزيرة مونريال و قربت من الارض هتشوف روعة المدينة و تنظيمها ، مفيش شارع مفيش فيه شجر و تجمعات البيوت كمان منظمة بطريقة فنية يتخللها الحدائق و الاشجار .

وبعدين نوصل لمطار مونريال الدولي

تطلع من الطيارة علي تيوب تمشي فيه مع الناس اللي ماشية ( بصراحة مشيت كتير ) لو فيه واحد حامل او حد كبير في السن بتيجي عربية صغيرة فورا و تحمله و تنزله في اسناسير مخصوص لحد شباك الدخول .

وبعد ما وصلت لاول شباك اللي فيه موظف بياخد الجواز و يبص علي التاشيرة وبعدين يشطب عليها ( لانها تستخدم مرة و احدة فقط ) و يختم الجواز ختم الدخول ( برضة لاول و اخر مرة ) لان بعد كده هتدخل بكارت البي ار و بدون ختم الجواز

بعد الشباك ده الناس اللي اصلا معاها البي ار او الجنسية او الفيزيتور بيروحوا مباشرة للشنط

اما بقي المهاجرين الجداد اللي بيعملو لاندينج بيروحوا مكتب تاني ورا الموظف ده ، هناك بيشوف الجواز و ياخد منك الورقة الكبيرة بتاعة الكونفيرماشن او بيرميننت ريزيدنت ، يقطه الجزي اللي فوق و يملا البيانات و يسالك معاك فلوس كام واللي بتقوله بيكتبه من غير ما يشوف حاجة ، و تتفضل تمضي علي الورقة ، وبعدين تاخد نسخة منها

( علي فكرة النسخة دي مهمة جدا ، حتي اهم من كارت البي ار اللي هيوصلك ، ليه ؟؟؟

لان الورقة دي ملهاش تايخ صلاحية زي الكارت يعني صالحة مدي الحياة ، وبعد ما تقدم علي الجنسية بسحبوا منك كارت البي ار و بتفضل تحتفظ بالورقة دي لان لسه هتحتاجها !!! هتحتاجها لما ان شاء الله تقدم علي التقاعد " المعاش " )

هوه ده الموظف اللي بيعملك كارت البي ار و بييسالك عن عنوانك في مونريال علشان يبعتلك الكارت عليه ، ولو مش معاك عنوان ممكن تتصل بيه بعدين و تقوله عليه ، والكارت بيوصل تقريبا بع شهر

بالمناسبة انا كنت مرتب سكن هنا قبل ما اجي ، عن طريق موقع ممتاز اكيد كتير منك يعرفه

http://montreal.en.craigslist.ca

وبعد الموظف ده ، بتكون خلاص بقيت permanent resident

وبيشاور لك علي مكتب تاني بعد علشان المقيمين في كيبك

هناك بقي هيشوفوا ال CSQ بتاعتك و يدلولك كتيب عن كيبك و ورقة فيها عنوان المكتب اللي تقدم فيه علي SIN واقرب مكتب لمكان سكنك يعلم عليه ، وورقة تانية فيها المكان اللي تقدم فيه علي التأمين الصحي وكمان عناوين الشركات اللي ممكن تقدم لك تامين صحي خاص في اول تلات شهور

وكمان ورقة فيها عناوين المنظمات الاجتماعية اللي تقدملك خدمات مجانية

وكمان يحدد لك معاد مع منظمة تاخد فيها محاضرة عن طريقة الانضمام للاوردر و كيفية معادلة اي مهنة

وهناك تقدر تاخد طلب تقديم علي دراسة فرنسي مجاني فل تايم و كمان لو عاوز بتاخد بدل تفرغ طوال مدرة الدراسة

بعد الفيلم الحلو ده ، وعلي فكرة كل ده بالانجليزي ( بالنسبة للناس اللي خايفة من الفرنساوي انا لحد دلوقتي ما اتكلمتش مع حد فرنسي ) تروح علي سير الشنط و تاخد شنطلك و تروح للجمارك

انا محضرتش قائمة باللي موجود في الشنط ( مكنش فيه وقت ) بس كتبت في الطيارة اللي افتكرته بصفة عامة ، وقولته علي المحتويات اللي كتبتها ، كتب منهم باختصار شديد ومفتحش حاجة و سالني دي كل حاجة ولا لسه هتجيب تاني قلت له لسه فيه حاجات تانية فكتب تو بي فولو وقاللي تقدر الحاجات اللي معاك بكام دولار و بعدين يختم الورقه ومع السلامة بين فيني mfb:

تطلع من المطار تلاقي الدنيا لسه نهار ( لحد الساعة 9 هنا الدنيا بتكون منورة ) تركب تاكسي ، بيقفوا بالترتيب ( النظام في كل مكان ) ومجرد تقولة علي رقم البيت و اسم الشارع يروح علي العنوان دووووغري ( تكلفة التاكسي من 30-40 دولار حسب بعد المكان

بكده نكون وصلنا مونرياااال مدينة الخياااال

هحاول دلوقتي ارفع بعض الصور

والي حلقات قادمة

[النجم الثاقب]

ربنا يوفقك يا أينشتين و ييسرلك كل عسير :rolleyes:

[Einstein]

مكنتش هسامح نفسي لو نسيت ارد علي المشاركات اللي فاتت

فيا ريت تسامحوني علي الاختصار : :blush2:

وعموماً يا باشا حمداً لله على السلامة ، ومنتظرين باقي أخبار الرحلة ، وأيامك الأولي في العالم الأول laugh.gif

الله يسلمك يا رب و الف شكر علي معلوماتك المفيدة عن تجهيزات الشنط والطيران ، وتو بي كونسيدرد في الرحلات الجاية :rolleyes:

بمناسبة العالم الاول ، فعلا فعلا بدون زعل الفرق بين هنا و مصر كبيييييييير اوي ، مش بس في المباني و التكنولوجيا و الصناعة ولكن في النظام و الاحترام قبل اي شيء

انا وصلت امبارح تورونتو ودي تعليمات الشنط في AIR CANADA

كناني حبيبي mfb: حمد لله علي سلامة الوصول

اخبار تورنتو معاك ايه ؟؟!

كنت ناوي اجي زي ما قلت لك ، بس جمال مونريال مش مديلي فرصة اقعد يوم واحد

الشنطه 980 جنيه يعني دفعوك فالشنط اكتر بكتير من تمن التذكره طيب حاااضر انا وانا جاي مش اخد ولا شنطه يبقو يوروني هيدفعوني على ايه ياخوفي النافيجاتور الي فجيبي يبان

مع خالص تحياتي ليك يا اينشتين

حبيبي دكتور فارما ، فعلا كنت هدفع اكتر من تمن التذكرة ، بس اكتفيت بشنطة واحدة زيادة مهمة و رجعت الباقي للاهل ، وبيني وبينك ، انا لاقيت هنا الحاجات احسن بمراحل من اللي كنت عاوز اجيبها و اقل من تمن الوزن الزيادة.

اخي اينشتين وجدة لك مطعم كل حتي تشبع وخذ يوم راحه من العيش و كل البفتاك هذا العنوانQuebec :

4250 1e Avenue, Suite 126

Galeries Charlesbourg

Québec, Québec

G1H 2S5

418-621-9999(tel)

418-621-9994(fax)

الزميلة ام ريهام العنوان ده في كيبك سيتي ، يعني سفر من مونريال

علي العموم محلات العرب هنا مالية الدون تون ، ومكتوب عليها من بره بالعربي كمان ، وعلي تلاجة اللحوم مكتوب حلال

سلام عليكم

حمدا لله على توفيقه وعقبال كل الزملاء

مونتريال نورت

فيه فرن عيش بلدى اسمه ( بلدى) لا اعرف الطريق اليه ممكن تسال اضحاب المحال العربى

وهذا المخبز بيعمل بالطلب وعنده بسبوسة مصرية وفطير ساحاول اسال على عنوانه وبنزوحه ازاى

الله يكرمك و يبارك لك يا رب :wub:

ميرسي كتير علي المعلومة و في انتظار مشاركاتك معانا

عنوان الفرن البلدي

Baladi Boulangerie & Patisserie Egyptienne

Contact : (514) 333-1111

Address : 12230 boul Laurentien

Montréal, QC , H4K1M9

في جزار ممتاز وبيعمل سندوتشات كفته وشيش طاووق وسعره رخيص جدا اسمه ابو الياس وده عنوانه

Boucherie Abu Elias

733 boulevard de la cote-Vertu

Saint-Laurent, QC H4L 1Y3

باشمهندس megy po:: :wub:

تسلم ايدك و الف شكر علي هديتك الجميلة gra:-

[Einstein]

لحسن الحكايه كده شكلها خياااااااااااااال بجد.

ربنا معاك يسهللك أمورك و يهون عليك غربتك برضوا الغربه صعبه مهما كان .

أختك في الرابطه ان شاء الله ( بنت مصر ) rolleyes.gif

الزميلة بنت مصر

بعد اخبار الاوردر يلا بقي شدي حيلك و جهزي نفسك لامتحان البيبك وبعده تقدري تشتغلي في اي مكان في كندا

والف شكر علي الدعاء و الامنيات الطيبة

ولسه الصور الجاية كتيييير ، التقيل ورا

مش عارف فى مونتريال تكلفة الكارت بتتخصم من الضرائب وللا لأه، بس هنا فى ألبرتا بتخلى الفاتورة اللى إشترتيت بيها الكارت لآخر السنه علشان لما تبعت للضرائب بتتخصم.

يعنى فى السنة ممكن تخصم حوالى 600 دولار من الإيراد الخاضع للضرائب. خير وبركه.

عزيزي المصري

هوه فيه ولاية مدلعة سكانها زي البرتا برضة

يا باشا ده كفاية ان معندكوش ضرايب للولاية ( انا هنا بدفع 5% لكندا و 7,5% لكيبك يعني ضرايب تقريبا 13% )

وطبعا هنا مش بيرجعوا قيمة تذاكر المترو باس ( يا بختك يا اللي في بالي )

وهو معنوياتة مرتفعة والحمدلله

وبجدبيسلم على كل الاخوة بالمنتدى

ادعوا لة

وعقبالنا يارب

حبيب البي دكتور حسام

الف شكر علي ابلاغك الرسالة و الدعاء الطيب

وان شاء الله استقبلك بنفسي في المطار ان شاء الله

والحمد لله فعلا انا هنا مبسوط جدا جدا ،

حتي اني احيانا مع نفسي اقول يا خسارة ما مضي من الزمان ، لو الواحد كان هنا من بدري وهوه لسه صوغنطوط gra:-

وارجع اقول اهو ده اغلي حاجة ممكن اقدمها لاولادي في المستقبل ان شاء الله po::

اروح انا بقى اكمل حلم ب كندا laugh.gif

يا عم ماجد حلمك هيتحقق قريب ان شاء الله ركز في المذاكرة احسن

انت عارف ان مش لاقي وقت و هعتمد عليك وممكن اجي امتحن جنبك مخصوص mfb:

السنوات الأولى لم تكن سهلة و لكنها لم تكن مستحيلة.

الناس اللى نجحوا هنا هم اللى إشتغلوا بجدية و ضمير و فهموا الثقافة الكندية و إختلطوا مع المجتمع الكندى. و أفضل مكان للبداية هو الجامعات و حياة الطلبة. و لو عندك أولاد خدهم يتعلموا skating و يلعبوا هوكى (للأولاد) و ringette للبنات و اختلط مع أهالى الأطفال التانببن.

مونتريال (فى رأيى) تانى أجمل مدينة فى كندا - فما تنساش تستمتع بأيامك فبها (لأن ما حدش عارف حتلاقى شغل و تستقر فين) و ما تنساش تاكل عند مطعم "باشا" !

تمنياتى لك و لكل المهاجرين الجدد بالتوفيق.

اخي الحبيب مكسوف :blush2:

الف شكر و تحية لنصيحتك الغالية

انا مقتنع بكل حرف كتبته في نصيحتك

واحاول تنفيذ ما قلته فعلا

وفعلا نقطة هامة جدا جدا جدا " أفضل مكان للبداية هو الجامعات و حياة الطلبة "

وتم تحديد الهدف والتوجه اليه في اقرب فرصة :rolleyes:

Pasha Restaurant

225 avenue du Président-Kennedy, Montréal, QC H2X 3Y8 - (514) 842-8493‏

اللي عايز عيشة هنية مستقرة...... لازم يتعب الاول شويه وبعدين يجني ثمار تعبه

لكن اللي فاكر كندا ده بلد الكسل والراحة......غلطان.....

بالظبط يا باشمهندسة

لازم نتعب في الاول و نكون مستعدين لكده

انا لسه ما اشتغلتش وعندي استعداد اقعد كمان تلت او اربع شهور

لاني مجتش هنا و متخيل اني هلاقي الشغل مستنيني

ده بالنسبة للشغل المؤقت

اما معادلة شهادتي و العمل في مجالي فبرضة مديله فرصة اكبر من سنة لسنتين

علشان كده عارف استمتع بحياتي هنا

و انا كمان بسأل على الدكتور انش

ربنا يوفقه و يوفق كل المهاجرين roseopen.gif

اختي الكريمة هبة

الف شكر لاهتمامك و سؤالك

انا اللي نفسي اعرف اخبارك ايه هنا و هناك ؟؟!

اتمني ليكي التوفيق دايما و ابدا

ألف مليون مبروك يا أخ اينشتين انا صيدلي لسة مكتشف المنتدى ده من أسبوع واحد بس whistling.gif ودخلت وشفت البشرى الحلوة دي رابنا يوفقك و يحققلك كل اللي بتحلم به وخاليك فاكر دايما "ومن يتق الله يجعل له مخرجا"

الله يبارلك اخي سامدي

واهلا بيك في رابطة الصيادلة

ومع تمنياتي بالتوفيق في مشوار الهجرة

وفي النهاية تحياتي للجميع :wub: :wub:

واسف لو نسيت او اتاخرت او مقدرتش ارد علي حد

وللاسف مفيش وقت انزل صور النهاردة

نخليها بقي المرة الجاية

مع السلامة

[samady]

بجد ياأينشتين إنت تستاهل كل خير على روحك الجميلة دي وربنا يوفقك في مكانك الجديد يديك خيره ويكفيك شره

[samehelassad]

الف شكر يا انشتين على ردودك وذوقك. ربنا يكرمك ويوفقك والمرة الجاية تكون اشتغلت كمان.

[حسام يوسف]

وحشتنا يا انش

الحقيقة اخبارك الحلوة مش اتنين بس

الاحلى اننا اطمنا عليك

متنساش شقة الكورنيش بتاعة الرابطة

ربنا معاك

[liberty]

dear dr. Einstein

i am very happy 2 know that u r ok

and finally living ur dream

although i met u only once

but i have great respct for u

i wish u all the luck of the world

and all the best of canada

god be with u

khaled _of_mansoura

[om reham]

حمدلله انك بخير , بصراحه نحن مثل الاسكندرانيين نحب اكل السمك وهذا موجود عند المطاعم المفتوحه اكثر شئ هنا بامريكا لا اعرف عندكم ولكن اجدد حمد لله ان مرتاح ومتفائل بالحياة والبلاد

[medopharm]

رفيقى اينشتاين

يارب تكون فى احسن حال

وشد حيلك بقى عشان تكون جنبى ان شاء الله فى الامتحان

عشان انت عارف اخوك واقع

ياترى انت عندك فى كيبك مقر لأمتحان المعادله ولا هتمتحن فين

اعملها وتعالى معايا فانكوفر

وربنا يوفقنا جميعا

وطمنا دايما عليك

medopharm

[Einstein]

ربنا يوفقك يا أينشتين و ييسرلك كل عسير roseopen.gif

النجم الغالي ، معلشي بقي المرة اللي فاتت مخدتش بالي

تسلم يا نجم و يا رب تتفوق لكل ما فيه الخير

بجد ياأينشتين إنت تستاهل كل خير على روحك الجميلة دي وربنا يوفقك في مكانك الجديد يديك خيره ويكفيك شره

الله يكرمك يا صمدي و يا رب يفوقك و نتجمع هنا ان شاء الله

الف شكر يا انشتين على ردودك وذوقك. ربنا يكرمك ويوفقك والمرة الجاية تكون اشتغلت كمان.

الف شكر يا سامح علي كلامك الرقيق و الدعاء الطيب وربنا يوفقنا جميعا لما فيه الخير

وحشتنا يا انش

الحقيقة اخبارك الحلوة مش اتنين بس

الاحلى اننا اطمنا عليك

متنساش شقة الكورنيش بتاعة الرابطة

ربنا معاك

حبيبي حسام

انا النهاردة سهرت مخصوص علشان انزل الصور

يلا بقي نقي و اختار

dear dr. Einstein

i am very happy 2 know that u r ok

and finally living ur dream

although i met u only once

but i have great respct for u

i wish u all the luck of the world

and all the best of canada

god be with u

khaled _of_mansoura

حبيبي الغالي دكتور خالد :sad:

ان فرحان جدا اني اشوفك هنا في المنتدي

ويا رب تتفوق الي كل ما فيه الخير

ومستني رسالة علي الخاص تطمني عليك

و مي ميرسي جدا بور فوتر كومبليمون brth)

ويا رب يوفقك و يسعدك و يرضيك و يكرمك اللهم امين

حمدلله انك بخير , بصراحه نحن مثل الاسكندرانيين نحب اكل السمك وهذا موجود عند المطاعم المفتوحه اكثر شئ هنا بامريكا لا اعرف عندكم ولكن اجدد حمد لله ان مرتاح ومتفائل بالحياة والبلاد

وانا كمان والله بحب السي فوود جدا

بس اشكاله هنا غريبة اوي مش متعود عليها ، عاوز حد يشرحلي ده ايه و يتعمل ازاي ، والسمك متقطع و جاهز و شكله يتاكل ني ، بس يا خسارة لو معاه كتالوج :happy:

رفيقى اينشتاين

يارب تكون فى احسن حال

وشد حيلك بقى عشان تكون جنبى ان شاء الله فى الامتحان

عشان انت عارف اخوك واقع

ياترى انت عندك فى كيبك مقر لأمتحان المعادله ولا هتمتحن فين

اعملها وتعالى معايا فانكوفر

وربنا يوفقنا جميعا

وطمنا دايما عليك

medopharm

ميدوفارم رفيق الكفاح

ايه بقي اللي ان سامعه ده :D ؟!!

مش احنا اتفقنا انك هذاكر ليه وليك ، انا مش لاقي وقت هنا نوهائي

علي رأي واحد حبيبي : الواحد محتاج اجازة من الاجازة brth)

طبعا في مقر للامتحان هنا في مونريال ، وده اللي مخليني مقرر من زمان اني هستقر هنا.

اعملها انت بقي و فوت علي مونريال ، وابقي قابلني لو سبتها و مشيت brth)

[Einstein]

ودلوقتي بقي شوية صور علي الماشي

عاوز بس اقول اني بحب التصوير

بس مش تصوير احترافي يعني اظبط الخلفية و الاضائة والزوم و الحاجات دي

انا بحب اصور الاماكن اللي بزورها ولو لمرة واحدة

يعني من قبيل المذكرات الفوتوغرافية ( كنت هنا في يوم من الايام :happy: )

الكلام ده علشان محدش يقول الصور مش مظبطة

انا بقول اهه انا غالبا القطها وانا ماشي او راكب علي الطاير كده

و هنا في مونريال لو صورت اي مكان هتلاقيه جميل جمال و ملوش مثال ولا في الخيال :sad: brth)

بجد فعلا المناظر الجميلة هنا اكثر من ان تحصي

نبدأ بقي

دي صورة شوية حمام

الغريبة هنا ان الحمام مش بيخاف خالص

يعني تمشي جنبه عادي جدا

يعني حاسس بالامان و السلام

انما بقي عندنا ( مش هقول انه يخاف يمشي جنبك ، ده بيخاف يطير علي ارتافع منخفض ، القناصة في كل مكان :D )

ودي صورة بارك مونت رويال من بعيد ( اعلي بارك هنا ، واللي من جوه عمالة زي الغابة )

ده بقي مدخل الفيو بور

[Einstein]

ده الفيو بور من جوه و شاطئ سانت لوران

كوبري يوصل لجزيرة سان ايلين

الي فيها البيو سفير ( هيجي بعدين )

ده المنارة او البرج اللي في الصور اللي فاتت من جوه

وده الساعة ام كاتينة

[حسام يوسف]

الحمدلله انك بخير ياانش

وطمنا عن المعادلة والشغل واحوالك

وايةالل مسهرك لحد دلوقتى؟

[Einstein]

صورة للمينا من فوق ( من اعلي البرج اللي فيه الساعة )

صورة اكثر شمولا

و باين فيها الدون تاون و بارك مون رويال

واخدين بالكوا من الجزا من الاسفلت المخصص للمشاة

بط بيعوم في ام و سلام

اللهم اخزيك يا شوشو ( هنتعشي ايه النهردة ؟ )

[Einstein]

هنا بقي مدخل لمتحف البيو سفير ( بعد ما تخرج من محطة المترو )

قربنا من البيو سفير

صورة لاتنين دببة بيهزروا مع بعض

مش عارف هشوف المنظر ده في الشتا فين ؟!

[Einstein]

بجوار البيو سفير

الصورة دي بتبين جزا من الكوبري اللي فات بس من جزيرة سان ايلين

[Einstein]

الحمدلله انك بخير ياانش

وطمنا عن المعادلة والشغل واحوالك

وايةالل مسهرك لحد دلوقتى؟

ازيك يا حس اخبارك ايه ؟

اللي مسهرني يا سيدي كان فيه كرنفال جميل اوي في الدون تاون لحد نص الليل

وبعد ما رجعت قولت اراجع شوية فرنساوي لاني عندي امتحان تحديد مستوي بعد تلات ايام

وطبعا انا مفتحتش كتاب من يوم ما جيت ، ومش عاوز ادخل مستوي من اول ابتث جوحون

بالنسبة للشغل مستني لما اشد شوية في الفرنسي

وربنا سهل