تعالوا نكتب القصة دي سوا

[se_ Elsyed]

أجابه طفل من المفاعيص الصغار وقال له : خلاص يا عمو أنا ممكن أعمل قرد وأقعد فى القفص لحد ما حضرتك تدور على القرد الحقيقي وتجيبه.

اجابه حلمي : بارك الله فيك يا زقلط ... وإذا حد طلب منك يابنى تعمل عجين الفلاح هاوده وخدوا على قد عقله.

زقلط : عجين فلاح أيه يا عم أنا ماعرفش أعمل غير " باتون ساليه الفلاحه"

حلمي : اهو أعمل اللى تعرفه ... أهي كلها معجنات ، وعن إذنك دلوقت أنا رايح أدور على القرد .

" مشهد أخر .... نهار خارجي " وكانت أخبار الحريق الفظيعة المندلع فى أحدى شوارع الجيزه حيث تسكن نميسه قد أنتشر بين الناس وسرت إشاعات فى المدينة بإن السبب فى ذلك قرد ضال وبالتالى نما إلى علم عم حلمي ذلك .. فأسرع إلى هناك .....

[crossfield]

ثم ينتقل الراوى مرة أخرى إلى منزل نميسة الخبثة:

" القرد لا زال يقفز مذعوراً فوق أكتاف الجميع بينما أخو نميسة يجرى محاولاً الامساك به عبثاً مردداً " لا يسلم الشرف الرفيع من الأذى حتى يراق على جوانبه الدم" و أم نميسة تصرخ من الداخل:اهدا يا زاهر ؛اهدا يا أبو زاهر …حرام عليكو ... الله يخرب بيوتكو مش عارفة أنام و نميسة ترتعد خوفاً من هذا المشهد و حينئذ ورد بخاطرها فكرة خبيثة : لماذا لا تدعى أن جارها كان يغازلها منذ فترة و أنه عرض عليها الزواج العرفى و لكنها رفضت و تمنعت حتى لا تتسبب فى فضيحة للعائلة و بذلك ينجو القرد المسكين من هذه الفضيحة التى لا ذنب له فيها سوى أن الحانوتى وضعه فى ذلك صندوق و بذلك أيضاً تضمن عريس لقطة؛وفجأة صرخت نميسة:

لأااااااااااااااااا؛ لا يا بابا سيب القرد فى حاله ؛ أنا هقولك الحقيقة ؛الأستاذ فاخر هوه اللى …هوه اللى….

الأب:هوه اللى ايه ؟انطقى…..

بصراحة يا بابا فاخر بيعاكسنى من فترة و عرض عليه نتجوز عرفى عشان مراته متعرفش … و عشان يضغط عليه جاب لى القرد ده هدية و قال ايه عشان يفكرنى دايماً بيه …

الأب: نهار اللى جابوك مش فايت ؛عرفى؟؟؟؟؟؟؟؟ و كمان بتهاديها هيه بس؟؟؟؟؟؟؟؟؟؟؟؟ زاهر اندهلى الهانم مراته بسرعةةةةةةةةةةةةةةة…

غاب زاهر لفترة فازداد قلق الأب و ذهب بنفسه إلى شقة فاخر و هناك……..

[mnman]

وبما انني بعد مشركتي ككاتب اخدت الجانب النقدي و اعتزلت الكتابة بدري بدري... ومن غير زعل... انا حفضل وراكم واحد واحد اخد فقرات من الي بتكتبوة و نعلق تعليق ظريف.. واهو كلة ضحك.. ولو حد مش مقتنع بالفكرة يقول وانا اوعدة اني مجيش جنب مداخلاتة الا بكل خير :twisted: :twisted: :twisted: :twisted: :twisted: ...

نبداء تاني....

سي السيد كتب..

معجنات

هنا الكاتب متأثر بالهجة السعودية... . :lol: :lol: :lol: :lol: :lol:

كروسفيلد كتبت:

:اهدا يا زاهر ؛اهدا يا أبو زاهر …

الكاتبة تقتبس من مسلسل.....ليالي الحلمية ...... :lol: :lol:

كروسفيلد كتبت:

عريس لقطة

هو مش متجوز... يبقي لقطة ازاي...الكاتبة من انصار تعدد الزوجات... :D :D :D ...

كروسفيلد كتبت:

؛الأستاذ فاخر

دة اخو الاستاذ فخر..... :D :D :D

كروسفيلد كتبت:

و عشان يضغط عليه جاب لى القرد ده هدية و قال ايه عشان يفكرنى دايماً بيه …

دة مش ضغط بس.. دة سكر و مرارة كمان :D :D ... معلش يا انسة كروس بس عايز افهم حيضغط عليها ازاي بالقرد... حيخلية يطنطط علي كتفها مثلا ......

البنا كتب:

الحريقة شغالة بس احنا بنعمل زي المخرجين الفشلة أو العباقرة ، بنجمد الزمن (تايم فريز) عند حدث معين ونخلصه ونرجع نستأنف تاني وهكذا ولازم تكون عبقري علشان تقدر تتابعنا   

الظاهر ان موضوع التايم فريز دة ربنا مسهلة اووووووووووي... شوف كللللللللل دة والحريقة شغالة... تكنولوجيا...

[Salwa]

عم حلمى فكر.....هو شعر بتعب شديد عندما حاول ان يفكر..ولكنه أصر على التفكير...وسأل نفسه...هو مين اللى شغلنى امبارح عن

حراسة قفص القرود؟

وفجأة....اللمبة نورت....وعم حلمى تذكر.

آه ..آه...الملعون...مرزوق الحانوتى اخو مراتى الأولانيه ذكية...هى

قالتلى ...كدة برضه ياحلمى...ياخائن العيش والملح..بقى لما الفلوس

جريت فى ايدك..رايح تتجوز عليه؟..بكرة تزول من وشك..

أكيد الولية سلطت أخوها عمل نفسه جاى يزورنى ...وسهانى...

وفتح الباب للقرد...ده انا كنت باخد بقشيش والآشية معدن....مع انهم

قالولى أن القرد ده..جنية..والعياذ بالله...والوله عبد الحارس الليلى حلف لى انه فى ليله سمع صوت ناس بتغنى وتضرب على الدف وتقول..يابنت ياللى نايمة فى القمرة قولى لستك نمرة اخوكى عزيز مات ...وقاللى ان القرد اتقلب وبقى جنية طلعت تصوت....وهو....كان

عمال ينتفض ينتفض..واغمى عليه.

والصبح لقى القرد فى القفص.....وقال اللهم اجعله خير.

انه الصح...أنا لازم اقرر الوله مرزوق.

كملوا بقى.......كلاكيت تانى مرة.

سلامى.

[se_ Elsyed]

لأ كده باه يا مدام سلوى حضرتك خرجتي عن الخط الدرامي وودتينا خط الصعيد :D ... بقى أنا كتبت أن الراجل حط الواد زقلط فى قفص القرود وجرى مسرعاً الى مكان الحريق تقومي حضرتك تقولي أنه فضل يفتكر أن أخو مراته مش عرف عمل علشان القرد يهرب وكل ده وهو واقف قدام القفص.... أرجوكي أرجعي إلى خط الجيزة وكملي حصل أيه بعد ما أحمد حلمي راح يتفرج على الحريقة ..... :D

[se_ Elsyed]

حته نقد مزنوق فيها لو سمتحولي ....

موضوع التايم فريز ممكن نستخدمه لتسليط الأضواء على حدثين فى مكانيين مختلفيين .... لكن تبقى الدنيا عماله تولع وتلاقى أبو وأخو البطله عايزين يخلصوا عليها علشان شكين أن فيه علاقة بينها وبين القرد ... وبعدين امها تقوم من النوم تقولهم وطوا صوتكو مش عرفه انام .... بالذمة ده كلام .. دي ولا قصص ميكي ... بجد ياخوانا نركز مع بعض شويه عايزين نوصل فى الأخر لعمل أدبي محترم يقول لملحمة " هيثم وتامر وكوهين " قومي وأنا أقعد مطرحك ونبقى نخمس كلنا فى جايزة نوبل - لو اخدناها - كل واحد ياخد الجايزة يقعدها عنده شويه ويباصيها للتاني ... يالا كملوا يا أدباء ربنا معاكو :shock:

[crossfield]

حته نقد مزنوق فيها لو سمتحولي ....

موضوع التايم فريز ممكن نستخدمه لتسليط الأضواء على حدثين فى مكانيين مختلفيين .... لكن تبقى الدنيا عماله تولع وتلاقى أبو وأخو البطله عايزين يخلصوا عليها علشان شكين أن فيه علاقة بينها وبين القرد ... وبعدين امها تقوم من النوم تقولهم وطوا صوتكو مش عرفه انام .... بالذمة ده كلام .. دي ولا قصص ميكي ... بجد ياخوانا نركز مع بعض شويه عايزين نوصل فى الأخر لعمل أدبي محترم يقول لملحمة " هيثم وتامر وكوهين " قومي وأنا أقعد مطرحك ونبقى نخمس كلنا فى جايزة نوبل - لو اخدناها - كل واحد ياخد الجايزة يقعدها عنده شويه ويباصيها للتاني ...  يالا كملوا يا أدباء ربنا معاكو  :shock:

ما هو القارئ المفروض يفهم ان المطافى خلاص اتصرفت؛هوه الكاتب لازم يوجع قلبه و يقول كل حاجة ؛ و الا انتو ملكوش غير حشبش يستكردكوا و تعدوا له :twisted: :twisted: متقطعوش علينا الله يكرمكوا عايزين نوصل للنوبل من غير شوشرة . ثم الأم نايمة لأن الحريقة خلاص خلصت و أكلة المش و الرنجة لسة كابسة على نفسها ؛تعمل ايه يعنى الست؟؟؟؟؟؟ :mad: :mad: :mad:

[DARWEEN]

موضوع التايم فريز ممكن نستخدمه لتسليط الأضواء على حدثين فى مكانيين مختلفيين .... لكن تبقى الدنيا عماله تولع وتلاقى أبو وأخو البطله عايزين يخلصوا عليها علشان شكين أن فيه علاقة بينها وبين القرد ... وبعدين امها تقوم من النوم تقولهم وطوا صوتكو مش عرفه انام .... بالذمة ده كلام .. دي ولا قصص ميكي ... بجد

أيه يابو السيد هو أحنا حنلاحق عليك ولا على منمان ... وبعدين بذمتك هو فيه أحلى من ميكي ياراجل ده باب الأبتسامات مش باب الأدب ولعلمك حناخد نوبل حناخدها .

[DARWEEN]

كروس فيلد الله ينور عليكي .... أيوه كده أفحمتيه دي ناس مش بتفهم في الأدب التجريدي

على فكرة يامنمان علق زي ماأنت عايز .. ماهو لازم برضه يبقى فيه نقد علشان القصة تاخد سمعه

:D :D :D :D :D :D :D :D

بس بقى الصوت علشان نكمل ... أكشن

:twisted: :twisted: :twisted: :twisted: :twisted:

[DARWEEN]

صباح داخلي .... صالة منزل نميسة .... الكاميرا تدور على الوجوه

والد نميسة جالسا على الكرسي يكاد الحزن أن يعتصره بينما نميسة واقفة على باب غرفتها وأخوها يشتاط غضبا ويكاد الشرر أن ينطلق من عينيه ....

وإذا بباب أحدى الغرف ينفتح وتخرج أم نميسة من غرفة النوم بخطوات متثاقلة تتثاءب ... وتنظر للجميع قائلة ... صباح الخير ياولاد صباح الخير يابو زاهر

يرد عليها أبو نميسة متجهما ... صح النوم ياهانم أنتي من أهل الكهف كل دا يحصل وأنتي لسه نايمه

وهنا تنفجر نميسة في البكاء قلتلك بلاش رنجه ومش ياماما .. قلتلك بلاش ياماما ..... أم نميسة تنظر للجميع في ذهول دون أن تدرك نايجرى من حولها ...

وفجأة (حتة سسبنس ) يدق جرس التليفون فتجري عليه نميسة مسرعة .... ( الصورة تنقسم جزئين نميسة في جانب وحلمي في الجانب الأخر ) ..

نميسة: ألو .... حلمي : أيوه صباح الخير .... نميسة : مين معايا

حلمي : أنا بتاع القرد لو سمحتي عاوزين القرد بتاعنا عشان عهده

:D :D :D :D :D :D

نميسة صارخة : أحمدك يارب ...ظهر الحق ... الحمد لله وتنفجر في البكاء

شفتوا الشغل :wink: :wink: الله ينور يابو الدراوين يافنان

[Salwa]

الفاضل/سى السيد...طيب فين الحبكة القصصية...وبعدين شويةرعب

يعنى علشان الجمهور عاوز كدة...طيب ماهو لازم ندور على سبب...

ايه اللى وصل القرد للحانوتى لنميسة؟..قول قول...وأقوالك كلها متسجلة....والا يعنى نكتب قصة...ومحدش يفهمها..طيب شفت عم حلمى ..خلاص فهم.

كله بالهداوة.

طيب فين الجثة؟

فيه عملية نصب.....الحانوتى نصب على نيسة.

البوليس جه ..واحد من الجيران كلمهم...آهو البوليس عرف أن الجثث

بتتسرق..وكمان بيغشوا فى الجثث؟ ويحطوا بدالها قرود.

واتفتح المحضر.

محضركم خير.

سلامى.

[DARWEEN]

واحده واحده يامدام سلوى أنتم عايزين تخلصوا المسلسل كله في حلقة واحدة ؟؟؟؟

مش لازم يكون فيه شوية تشويق ...

وحياتك كل ده حيظهر مع تسلسل الأحداث وتتابع السياق الدرامي المنبعث عن الخلفية التاريخية للأحداث لتلقي بظلالها المحورية على الرؤية الدراماتيكية للتابع التاريخي الناتج عن أندماج المفهوم المتبلور للأسقاط السياسي المندرج تحت مفهوم الجذر التكعيبي للعمل

على مهلكم بهدوء خلينا نمخمخ ونشتغل

على فكرة أنتم ناس زي العسل أنا مش حاكتب غير هنا بعد كده بلاسياسة بلا وجع قلب :D :D :D :D :D :D

[elbana]

يا جماعة يا بتوع النقد ، عايزين نقد بناء لو سمحتم ، والنقد البناء هو اللي يمدح في القصة ويتكلم عن إيجابياتها ، أما أي نقد غير كد فده نقد هدام يهدف إلى زعزعة الحركة الأدبية في مصر ، والقضاء على طليعة الفنانين الشباب ويقوض أركان المد الأدبي الثقافي المتعفن .

يعني باختصار اللي مش معانا يبقى علينا :twisted: .

سامعني يا سي السيد انت ومنمان :twisted: .

نرجع للقصة ، ولأبنائنا من الأدباء الشرفاء الناجحين ، وأقول لهم سيروا على بركة الله ولا تلتفتوا إلى كيد الكائدين ، وعايز أقول لكم كلمة قبل ما أموت ، خللوا بالكو دايماً فيه أعداء للنجاح .. (صوت تصفيق حاد في القاعة)

[elbana]

يجري والد نميسة مسرعاً ويختطف السماعة من يد الفتاة ويتحدث إلى عم حلمي ، ثم يضع السماعة ، وينظر إلى نميسة : ظلمناكي يا نميسة يا بنتي .

نميسة تجهش بالبكاء .

أم نميسة تجهش بالبكاء هي الأخرى .

أبو نميسة ينظر إلى الأم مستغرباً : إنتي بتعيطي ليه يا أم نميسة .

أم نميسة : والنبي ما انا عارفة يا بوزاهر . ويعلو صوتها بالبكاء .

ثم ينظر أبو نميسة إلى فاخر ، ويقول : يا أستاذ فاخر إحنا آسفين على اللي حصل ، ومتشكرين على شهامتك .

هنا تهب نميسة واقفة : يا نهار اسود فين القرد ..

ينظر إليها الجميع متسائلين : أيوه صحيح القرد فين ..

أم نميسة (تجفف دموعها بسرعة) : قرد مين ؟

نميسة : يانهار اسود .. عم حلمي ح ييجي ياخد القرد دلوقتي ح نقول له إيه .. الراجل بيته ح يتخرب .

أم نميسة : حلمي مين ؟

وهنا ينظر أخو نميسة إلى فاخر ، ويقترب منه في تحفز : طلع القرد يا أفندي انت ..

فاخر : قرد قرد إيه بس .. فتشني ..

أم نميسة : ما تطلع القرد يابني وتخزي الشيطان بقى ..

[mnman]

سي السيد...ايوة كدة ياراجل عايزين نساند بعض في النقد الباء...

قال يقولولك تيم فريز قال.. احنا بتخيل علينا الحجات دي ..انتي بتتعامل مع اقوي جهاز مخابارات في العالم ياجمعة ... الحريقة شغالة و اهل الشقة في وادي النطرون اسف اقصد تاني...

واجابة علي سؤالك....

حصل أيه بعد ما أحمد حلمي راح يتفرج على الحريقة ..... 

اتجوز عايدة وكتب كتابهم الشيخ رمضان حضرتك وعاشوا في تبات ونبات.... :lol: :lol:

داروين كتب:

هو فيه أحلى من ميكي ياراجل

والله يادرون ياخويا عندك حق مليون المية.....

علي فكرة هي القصة دي اسمها اية....

اقترح.....

أمسك قردي من فضلك...

نميسة والقرد.....

او قرد بلا جواد ......

دارون كتب:

حلمي : أنا بتاع القرد

:lol: :) :D :D :D :D

داروين كتب:

عايزين تخلصوا المسلسل كله في حلقة واحدة ؟؟؟؟

والله هو جرت العادة انة يخلص بعد العيد بيوم او اتنين....

البنا كتب:

وأقول لهم سيروا على بركة الله

نورماندي تو تو تو تو....................

البنا كتب:

ثم يضع السماعة ، وينظر إلى نميسة : ظلمناكي يا نميسة يا بنتي ...........................يا أستاذ فاخر إحنا آسفين على اللي حصل ، ومتشكرين على شهامتك . 

معلش بقي ازاي يعني الراجل طنش كلام بنتة كدة مرة واحدة... مش يمكن فاخر سرق القرد و اداة لنميسة علشان يضغط عليها (علشان كروس متزعلش) .... هو دة التحليل ولا بلاش ياواد يا منمان.....

ثم ان عم حلمي اقصي ما حكاة هو ان القرد بتاعة اتسرق وبيشك في قريبة و جايز قريبة اداة لفاخر و هو اداة لنميسة...

ثم عرفوا منين ان فاخر نط من البلكونة علشان ينقذ نميسة مش يمكن هي فتحتلة الباب...مش عريس لقطة...هو اكيد الحل في التيم فريز .... نقد بناء اهوة...

مع تحيات البوليس المصري...

مدام سلوي كتبت:

مرزوق الحانوتى اخو مراتى الأولانيه ذكية

متجوز مرتين :D :D ... واحنا مش عارفين نتجوز مرة واحدة.... خلاص لقيت الحل...نشتغل قراداتية او حراس قرود او حتي القرد نفسة.

بكرة نشوف وظائف خالية: قرداتي باليومية بقشيش محترم...

مطلوب عريس قراداتي.. القرد سنة لايزيد عن 5 سنوات...

عريس لقطة يمتلك قرد من الزمالك.....

[elbana]

طب أنا عندي اقترراح بخصوص النقد ، إيه رأيكم نعمل عملية نقاش جماعي كل يوم أربعاء لمجريات القصة وبنائها الدرامي وحبكة الأحداث فيها ، وكل العجر اللي انتوا عايزينها ، ونسمي اللقاء (حديث الأربعاء) وده معناه إن المداخلات يوم الأربعاء ح تكون فقط للمناقشة حول سير القصة ، وبعدين نبدأ نكمل القصة تاني ؟؟

ماشي .. أصل كده تسلسل الأفكار ح يتبهدل ، وبعدين موضوع الإسم ممكن برضه نتفق عليه ، وبالتالي ح نحضر جدول أعمال للقاء الأول ..

يا نهار اسود ده النهارده الأربعاء :D

[se_ Elsyed]

خدنا جانبك يا مانمان يا ناقد يا متمكن ... خلينا نفتح محل نقد أنا وانت علشان نصحح مسار الحركة الأدبية فى مصر ونغربلها من الدخلاء على هذا المجال .... والله عال كل واحد قرأ له قصتين تانتان على حتة ميكي بقى أديب وعايز يحط راسه برأس رموزنا الأدبية نجيب محمود وتوفيق الحريري وحشيش وأبو أشرف .... ياخي دهدا

أسمحولي بأه بصفتي ناقد كبير - فى السن - أن أقترح أسم للقصة من وحي الأحداث :

1- فى بيتنا جرد

2- جرود الجبل

3- لا تضرب الجرد يا حبيبي

4- العذراء والجرد

5- هذا ما جناه علي جردي

[elbana]

ما قلنا النقد ح يبقى الأربع ، خلونا نمخمخ ونكمل حتتين في القصة ..

والله ميكي كانت من أفضل الأشياء اللي الواحد كان بيقرأها ، المهم خلونا بقى نكمل ونخلي المناقشات كل أربعاء .. رأيكوا إيه في الاقتراح ده ؟

[mnman]

استاذي الناقد العظيم سي السيد.. طبعا حنغربل كل مدعي انة كاتب... وانت عارف حشيش بيدفع كام علشان نخلية هو الكاتب الاوحد وابو اشرف كمان (مين ابو اشرف دة.. ما علينا) .... بالتوفيق ....

يا بنا النهاردة الاربع يعني يوم النقد.. :D :D

اقترح الاسماء التالية للقصة...

- قرد مشاكل

- لعبة القرد.

كفاية كدة النهاردة.....

[DARWEEN]

أولا.. يامنمان أنت وسي السيد

القصة أسمها ..

قرود الدكتورة نميسة

تلهو فوق جبال التبت

طبعا بالنسبة لنقاد مبتدأين مش حيفهموا المعنى المتأصل خلف الجذور التعبوية لهذه التسمية وأن كنت أأمل أن يتضح لكم المعنى بهد متابعة باقي تسلسلات الأحداث حيث ستطوف نميسة مع القرد بلاد الله لخلق الله لحد ماتوصل للتبت .. وكفاية كدة علسان ماأحرقش القصة

ثانيا.. وبما أن النهاردة الأربعاء فمن حقكم تتكلموا زي ماأنتم عايزين عن هذا العمل العبقري الذي يلهث خلفنا جميع منتجي ومخرجي هوليود للحصول على حقوق أنتاجة كفيلم سينمائي ولا تقولي نجيب محمود ولا حشيش

ثالثا.. طبعا ولا يوم من أيام ميكي وبندق وتان تان أيام ما كانت الأيام نفسها حلوة والدماغ رايقهههههههههههه

رابعا ... ياللا أنقدوا وهيصوا النهاردة الأربعاء مفيش تصوير بس حنبدأ شغل بكرة الصبح التاني

أنت عندك فوق طفي النورررر .. أقفل باب الأستوديو يامصطفى