هل كل بنت بتحب خطيبها؟

[masry]

هل كل بنت بتحب خطيبها؟ ولا المجتمع و طريقة التفكير بتخليها ما تهتمش و تقول اهو واحد و خلاص :؟: :roll:

طبعا انا عارف ان الموضع بيختلف حسب الظروف. لكن ايه هو الغالب عندنا فى مصر ؟

[بنت شعنونة]

مافيش حاجا اسمها الغالب في مصر :oops: :oops:

ومافيش حاجا اسمها اهو واحد والسلام..!!؟

اعتقد انه اي واحدا ها تتخطب لأنسان لا بد انه يكون بيوافق جزء ان لم يكن اغلب متطلباتها

او احلامها بمعنى تاني

سواء بقى كانت متطلبات في الشكل او الناحية الأنسانية والمشاعر او المادة او المستقبل او الوجاهة الأجتماعية

او او او

ان لم يكن كل اللي فوق

المهم انه في حاجات من دول بتكون هيا عاوزاها اكيد

وحاجات تانية برضه اكيد مش عاوزاها

وهنا ينصب ميزان عقل الفتاة وهيا اللي بتختار ترجح انه كفة بالنسبةلها

ينفع او ما ينفعش...

اما بتحب خطيبها او لا..

فدا يختلف من شخصية لأخرى واوقات من وقت لأخر كمان..

بس ايه السؤال الغريب دا يا استاذ مصري؟ :shock: :shock: :roll: :roll:

[masry]

لانى شفت حالات بيكون ده مش موجود.الطبيعى ان اى اتنين مخطوبين حيتجوزوا و بالتالى بيكون في ارتباط ما بينهم. بس في حالات ده مش حاصل. والسؤال اللى بيحيرنى لو واحده او واحد مش بيحبوا الطرف التانى طب ليه بيكمل او بتكمل اصلا مع ان ده ممكن يتسبب فى فشل الزواج؟و لا ده طبيعى و مش لازم الاتنين يوصلوا لدرجة انهم يرتبطوا قبل الزواج؟

[بنت شعنونة]

واحد مش بيحبوا الطرف التانى طب ليه بيكمل او بتكمل اصلا مع ان ده ممكن يتسبب فى فشل الزواج؟و لا ده طبيعى و مش لازم الاتنين يوصلوا لدرجة انهم يرتبطوا قبل الزواج

مش بيحبوا بعض

وارد

انما متنااااقضين؟ والا متفاهمين؟

والا مافيش وجه شبه او وجهات تقابل بينهم يعني؟

[mohamedfox1981]

هل كل بنت بتحب خطيبها؟ ولا المجتمع و طريقة التفكير بتخليها ما تهتمش و تقول اهو واحد و خلاص :؟

في راي الشخصي ان البنات دلوقتي 80% منهم ما بيصش للحب او بيعتبروه المرحله الاخيرة بلغه الافلام

سيطرت الماده علي عقولهم فأهملوا قلوبهم

البنت دلوقتي لما بتقدم لها عريس اول حاجه بتسال عليها هي

بيشتغل ايه و رمتبه كام

عنده عربيه و لا لا؟

عنده شقة و لا لا؟

طويل و لا قصير

تخيين ولا رفيع

و قليل جدا جدا جدا

لما تسال بنت و تقول

هو متدين و لا لا؟

بيصللي و لا لا؟

بيتقي الله و لا لا؟

للاسف دي حقيقه

مع الاعتزار للفتيات اللاتي سوف يشاركن في الحوار

لاداعي لإخفاء الحقيقة

يا زمان ضاعت فيه اسمى معاني الحب

و بعد العربيه و الشقه و المرتب تبدأ البنت في تهيئه قلبها كي يحب هذا الشخص

يا ريت تيجي بنت جريئه و تقول كلامك صح يا فوكس :oops: :oops:

طبعا مش عايز اعمم كلامي فيه بنات كتيير بتفكر صح

مع اطيب تمنياتي :oops: :oops:

[masry]

انما متنااااقضين؟ والا متفاهمين؟

والا مافيش وجه شبه او وجهات تقابل بينهم يعني؟

ده بيكون من طرف واحد. لو الاتنين متناقضين و كملوا يبقى يستاهلوا اللى يحصلهم. لكن بيكون فيه طرف متعايش ويمكن مش مقتنع بس برضه بيكمل....طب ليه؟؟؟؟ :? :? :shock:

[بنت شعنونة]

تبدأ البنت في تهيئه قلبها كي يحب هذا الشخص 

الكلمة دي بسسسسسسسسس عندك فيها حق جداااااااااا :oops: :oops:

اوقات البنت يكون قلبها ما دقش

فتبدى تحسبها بالعقل

الحياة الكريمة و وظيفته ايه وكدا

زي تماااااااام ما انت لو متقدم جوازة صالونات ها تسال هيا خريجة ايه وبنت مين وبتشتغل ايه

وفي الأخر بتشوف هيا عاملة ازاي وتفكيرها ازاي وكدا

يعني دا حق مكفول للجميع

والا اييييييييييه :twisted: :twisted:

لكن بيكون فيه طرف متعايش ويمكن مش مقتنع بس برضه بيكمل....طب ليه؟؟؟؟

في حاجا اسمها احتمال احبه او احتمال يبقى كويسسسسس

او احتمال انه مافيش خيار اخر...

او.

همممممممم

بس انت ايه تفسير حضرتك للموقف دا صحيح؟؟ :roll: :roll:

[crossfield]

انما متنااااقضين؟ والا متفاهمين؟

والا مافيش وجه شبه او وجهات تقابل بينهم يعني؟

ده بيكون من طرف واحد. لو الاتنين متناقضين و كملوا يبقى يستاهلوا اللى يحصلهم. لكن بيكون فيه طرف متعايش ويمكن مش مقتنع بس برضه بيكمل....طب ليه؟؟؟؟ :? :? :shock:

أحياناً بيبقى حب بالايحاء ؛ بمعنى مجرد تعود أو إدمان ؛ يعنى حد من الطرفين أخد على وجود الطرف التانى فى حياته و بالوقت يبتدى يتهيأله انه بيحب مع انه لا حب و لا حاجة و بالتالى ده ممكن يخليه يبقى مش مقتنع بس متلذذ بوجود طرف آخر فى حياته حتى لو مش متوافقين؛ فيه ناس بتخاف من فسخ الارتباط أو انه يتحسب عليها ارتباط و تقرر انها تكمل و خلاص و فى الاخر أهى جوازة و السلام؛ و فى ناس بتيص للمكاسب المادية و بس .

[masry]

بس انت ايه تفسير حضرتك للموقف دا صحيح؟؟ :roll:  :roll:

حاقول لحضرتِك :oops:

انا كل اللى شايفه ان لو حد حس انه مش متقبل الطرف التانى يبقى لازم يفكر فورا فى انهاء الموضوع..... ده شئ بديهى. لكن ليه بقا بتكمل. ده شئ مش عارف افسره. يمكن اسباب ماديه...يمكن ضغط اهل ....يمكن ده الطبيعى عند بعض البنات بس انا مش عارف :(

علشان كده بسأل :roll:

[بنت شعنونة]

أحياناً بيبقى حب بالايحاء ؛ بمعنى مجرد تعود أو إدمان ؛ يعنى حد من الطرفين أخد على وجود الطرف التانى فى حياته و بالوقت يبتدى يتهيأله انه بيحب مع انه لا حب و لا حاجة و بالتالى ده ممكن يخليه يبقى مش مقتنع بس متلذذ بوجود طرف آخر فى حياته حتى لو مش متوافقين؛ فيه ناس بتخاف من فسخ الارتباط أو انه يتحسب عليها ارتباط و تقرر انها تكمل و خلاص و فى الاخر أهى جوازة و السلام؛ و فى ناس بتيص للمكاسب المادية و بس .

كلام مي المية صح يا كروساية :oops:

كل اللى شايفه ان لو حد حس انه مش متقبل الطرف التانى يبقى لازم يفكر فورا فى انهاء الموضوع..... ده شئ بديهى. لكن ليه بقا بتكمل. ده شئ مش عارف افسره. يمكن اسباب ماديه...يمكن ضغط اهل ....يمكن ده الطبيعى عند بعض البنات بس انا مش عارف

علشان كده بسأل

شايف حضرتك كلام كروساية اللي فوق دا

لو كان الموضوع شارب

يعني حلو حلو بس و الوحش وحش بس

كان الكلام يبقى زي ما حضرتك بتقول تسيبه وتمشي

انما للأسف في المواضيع دي دايما بتكون في اللون الرمادي

لحد بعد كتب الكتاب الألوان بتتحدد

انما اييييييي شيء قبل كدا

كله رمادي

الا اذا كان في حاجا واضحا اوي

زي هوا مدمن او ايده طويلة

او هيا سليطة اللسان

كدا يعني :roll: :oops: :oops:

[الطفشان]

بس انت ايه تفسير حضرتك للموقف دا صحيح؟؟ :roll:  :roll:

حاقول لحضرتِك :oops:

انا كل اللى شايفه ان لو حد حس انه مش متقبل الطرف التانى يبقى لازم يفكر فورا فى انهاء الموضوع

أظن شعنونة قالت المفيد

الموضوع مش ابيض و اسود

البنت مثلا تقول

- هو صحيح بيشرب سجاير لكن شكله طيب

- هو صحيح شكله مش حلو بس مستقر في شغله

الولد يقول:

- هي صحيح حمقية بس قلبها ابيض

- هي صحيح مش حلوة بس روحها كويسة

الحياة بطبعها متعددة الجوانب

و ما فيش حد بيتجوز (او يشتغل او او او) و هي مقتنع ان كل اللي بيعمله غلط

لازم يبقى في و في

بعد الجواز ممكن الامور تمشي

و ممكن تتعقد

ماحدش يعرف

[amir]

بس انت ايه تفسير حضرتك للموقف دا صحيح؟؟ :roll:  :roll:

حاقول لحضرتِك :D

انا كل اللى شايفه ان لو حد حس انه مش متقبل الطرف التانى يبقى لازم يفكر فورا فى انهاء الموضوع..... ده شئ بديهى. لكن ليه بقا بتكمل. ده شئ مش عارف افسره. يمكن اسباب ماديه...يمكن ضغط اهل ....يمكن ده الطبيعى عند بعض البنات بس انا مش عارف :(

علشان كده بسأل :roll:

ماهو الموضوع جواز صالونات زى ما شعنونه بتسميه ، يبقى فى 90 % من الحالات الأختيار مش بيكون فى يـد البنت و بالتالى بتكون الاسباب الماديه و ضغوط الأهل هى اللى بتخلى البنت توافق على الجوازه دى ،و فى حالة أنها اكتشفت انها مش قادره تحبه بيتدخل الأهل و يقنعوها بصحة أختيارهم و طبعا بيفهموها أن الحب بييجى بعد الجواز ... فبتكمل المشوار رغم عدم أقتناعها بعريس الغفله ... و بعديــن و بعد الجواز بتعلمه الأدب و تخليه يمشى على العجين ما يلخبطوش ! .. أو تتلككله على أى غلطه علشان تخلص منه .

:twisted: :twisted: :twisted:

يعنى بأختصار ضغوط الأهل عادة تؤدى الى زواج مش ناجح و بلاش نقول زواج فاشل .

[crossfield]

أمير كتب:

ماهو الموضوع جواز صالونات زى ما شعنونه بتسميه ، يبقى فى 90 % من الحالات الأختيار مش بيكون فى يـد البنت و بالتالى بتكون الاسباب الماديه و ضغوط الأهل هى اللى بتخلى البنت توافق على الجوازه دى ،و فى حالة أنها اكتشفت انها مش قادره تحبه بيتدخل الأهل و يقنعوها بصحة أختيارهم و طبعا بيفهموها أن الحب بييجى بعد الجواز ... فبتكمل المشوار رغم عدم أقتناعها بعريس الغفله ... و بعديــن و بعد الجواز بتعلمه الأدب و تخليه يمشى على العجين ما يلخبطوش ! .. أو تتلككله على أى غلطه علشان تخلص منه .

كلام الأخ أمير فكرنى بسمير غانم:

العريس متين و العروسة متينة

يا اللى غويت المتين سيك من المتينة

لا المتين بينفع و لا المتينة

عالأصل دور :lol: :lol: :lol:

[Lancelot]

أولا فيه بنات كتير بتتهاون في حقها إنها تحب الشخص اللي هتتجوزه أو تتجوز الشخص اللي بتحبه .. و فيه فرق بين الإتنين .. لأن الأول جواز صالونات .. يعني يتقدم يتعرف تحبه و بعدين يتجوزوا .. و التاني هو إنها تتجوز زميلها في الكلية مثلا أو أي حاجة كده يعني ...

فيه بنات بتتهاون في الحق ده .. تحت ضغوط كتيرة ... زي إنه عريس لقطة أو متريش أو إنها قربت تعنس أو أهلها بيزنوا عليها .. أو من غير ضغوط خالص .. فالتهاون ممكن يبقي من طبعها .. "ما هو كلهم زي بعض" .. "أي حد و خلاص" ... "ضل راجل و لا ضل حيطة" ... و التهاون ده حاجة أصبحت عادية اليومين دول :? .. و أصبحت مبررة :? :? ... و "أهو هنعمل إيه" و "معلهش" و حاجات كده لزوم تطييب الخاطر بكلمتين .... و البنت بتكون مظلومة فهي مثلا مش عايزة تزعل أمها أو أبوها لأن ده تالت عريس ترفضه .. و حاجات كده .. مش مشكلة هي زعلانة و لا مش مستريحة و لا لأ .. المهم إن أمها و لا أبوها مايزعلوش ... و تبدأ المواساة ... "ما هو راجل كسيب و طيب و حنين" .. "طب و الحب" ... "يا ستي الحب يجيي بعد الجواز" ...

و الأخيرة ديه بتموتني من الغيظ .. :mad: :mad: .. لأن الحب مستحيل يجيي بعد الجواز ... بالعكس ده أي إتنين كانوا بيحبوا بعض قبل الجواز .. حبهم بيهدي و يموت بعد الجواز .. و يظهر بدلا منه حاجات تانية .. زي العشرة و التوحد فيما بينهم (أصبحوا شخص واحد تقريبا) ... أو يبدأ يموت و يظهر بدلا منه حاجات تانية ربنا ما يوريكوا ... المهم إن الحب بمعناه الرومانسي مش ممكن يظهر بعد الجواز ... لأنه ببساطة ليس إجبارا .. مش ممكن أحب واحدة حب حقيقي بالإجبار .. و الحب اللي المفروض "يظهر" بعد الجواز ده لا وصف أخر له إلا أنه حب بالإجبار ... ما هو أحبها أو تتحول حياتي إلي جحيم حي أو جحيم ميت ... و الجحيم الحي هو سلسلة متصلة من الخناقات الزوجية المتصلة و وصلات من مصارعة المحترفين و الردح المتصل الذي يظهر مواهب دفينة في أعماق بعض الزوجات ... و الجحيم الميت هو حياة مملة طحن عبارة عن "صباح الخير" "صباح النور" "هتتأخر النهارده" "اه" "طيب" "باي" "سلام" ... و وصلة مماثلة في المساء ... و دمتم ... :?

من حق كل بنت إنها تحب خطيبها .. و من حقها إنها تتهاون في الحق ده ... لكن لازم تفهم إنها لو تهاونت مش بتدفع التمن لوحدها ... أولادها – في حالة الإنجاب – بيدفعوا التمن مرة في حالة الطلاق .. و مرتين في حالة إستمرار الزواج الممل ...

إسمحوا لي أن أنتقل لنقطة تانية ... و هي التي أثارها أمير .... تدخل الأهل في إختيار العريس .... هم مالهم ... هو مين اللي بيتجوز .. البنت و لا الأهل ... مين اللي هيروح يعيش في بيت جديد .. مع شخص جديد .. مشن هيبدأ حياة جديدة ... بقواعد و عادات جديدة ... البنت و لا الأهل ...

طيب لما هي البنت اللي هتعمل كده .. يبقي ليه الأهل يفرضوا عليها عريس معين ... اللي هيدفع التمن هو اللي يختار ... و لا هم يختاروا و هي اللي تدفع تمن الإختيار ... أنا مش بألوم عليهم أد ما بألوم علي البنت اللي بترضي بكده ... أي أب أو أم عايز يوجه بنته للطريق اللي شايفه صح ... لكن هي ممكن تشوف حاجة تانية .. و رأيها هو الأهم .. لكن ساعات البنت تقول "بابا يعرف أكتر" "مش عايزة أزعله" ... يا ستي زعليه دلوقتي شوية أحسن ما يبكي علي اللي هيحصلك قدام ...

كفاية كده .. لأني تعبت ... من الكتابة و من الموضوع نفسه ....

[Lancelot]

يا اللى غويت المتين سيك من المتينة

حاجة من اللي إتنين ... يا تروحي موضوع أغاني سمعناها غلط .. أو موضوع الأخطاء اللغوية ..

يا اللي هويت المتين سيبك من المتينة...

صبااااااااااااااااااااااح الفل .... :lol: :lol: :lol: :lol: :lol:

[بنت شعنونة]

إسمحوا لي أن أنتقل لنقطة تانية ... و هي التي أثارها أمير .... تدخل الأهل في إختيار العريس .... هم مالهم ... هو مين اللي بيتجوز .. البنت و لا الأهل ... مين اللي هيروح يعيش في بيت جديد .. مع شخص جديد .. مشن هيبدأ حياة جديدة ... بقواعد و عادات جديدة ... البنت و لا الأهل ... 

اسمع الي بيتقال..

انتوا لسا صغيرين ما تفهموش حاجا في الدنيا

احنا الدنيا عجنتنا ونفهم عنكم

احنا اكبر منكم وبنحبكم وعاوزين مصلحتكم

انتوا الحب عامي عنيكم

الجواز مش حب وبس

الجواز مسؤولية انتوا لسا ما تعرفوهاش

بيني وبينكم

انا مقتنعه انهم اكبر مننا واكييييييييد بيقهموا عننا

طب تدقوا وتؤمنوا بالله

انا ببوووووووووس ايد ابويا انه يتدخل في اختياري هوا او اخواااااتي

انما ابدااااااااااااااااا

وكل ما اسالهم رايكوا ايه

يقولولي انتي اللي ها تتجوزي مش احنا

يبقى انتي اللي تختاري وانتي اللي تقرري ما تسأليناش

والنتيجة اختيارات غلللللللللللللللططططططططط بكككككل المقاييس :twisted: :twisted: :twisted: :twisted: :twisted: :twisted: :twisted:

لدرجة اني اخر مر جيت اعيط لبابا واقوله

بص بقى لو عاوزني اتجوز يبقى بشرررررررررط

انت اللي تختار الزوج وانت اللي توافق عليه

انا ماليييييييييش دعووووووووة

:twisted: :twisted: :twisted:

[الطفشان]

الاخ لانسلوت

معلش

كلامك فيه ايحاء ان اي جوازة من غير حب من الاول حتبقى محكوم عليها بالفشل المحتم

و ان الغلط على البنت في انها يجب ان تنتظر الحب

انا اقول

من الصعب في جوازة صالونات ان يكون هناك حب

لان الاثنين مايعرفوش بعض اصلا

و من المستحيل في كام شهر يحبوا بعض

لو وجد الحب، فاهلا و سهلا، و يجب احترامه

حتى الرسول صلى الله عليه و سلم عندما جاءه ناس يستشيرونه في بنت خطبها اثنين : معسر و ميسر، و هي تهوى المعسر، فقال "لم ير للمتحابين مثل الزواج"

لكن ان لم يوجد يبقى الموضوع غلط في غلط؟

ماكانش حد اتجوز في مصر او في مجتمعاتنا الشرقية

هناك مشاعر اخرى: القبول و الراحة النفسية

و بعدين موضوع الحب و الرومانسية

كم من زواج بدأ بحب ثم انتهى بفشل؟

الحب ليس العامل الوحيد يا جماعة

و هناك عوامل اخرى كثيرة يجب النظر اليها

الخلق

الدين

التوافق

الخ

[الطفشان]

انتوا لسا صغيرين ما تفهموش حاجا في الدنيا 

احنا الدنيا عجنتنا ونفهم عنكم

احنا اكبر منكم وبنحبكم وعاوزين مصلحتكم

انتوا الحب عامي عنيكم

الجواز مش حب وبس

الجواز مسؤولية انتوا لسا ما تعرفوهاش

كلام بابا سليم جدا

و اؤيده بشدة

و لكن بشرط رضا الابنة

و لا بديل عن هذا الرضا

و الاجبار او الضغط غير وارد و خطأ كبير

انا ببوووووووووس ايد ابويا انه يتدخل في اختياري هوا او اخواااااتي

انما ابدااااااااااااااااا

وكل ما اسالهم رايكوا ايه

يقولولي انتي اللي ها تتجوزي مش احنا

يبقى انتي اللي تختاري وانتي اللي تقرري ما تسأليناش

اظن انه عايزك تكوني راضية و مقتنعة

و انتي عايزة رأي استشاري

هو خايف يكون بيطفشه او بيجبرك

عشان كدة رده دة

[masry]

 

احنا الدنيا عجنتنا ونفهم عنكم

احنا اكبر منكم وبنحبكم وعاوزين مصلحتكم

انتوا الحب عامي عنيكم

الجواز مش حب وبس

الجواز مسؤولية انتوا لسا ما تعرفوهاش

:twisted:  :twisted:  :twisted:

اخت شعنونة...انا معاكى ان مش لازم يكون فيه حب قبل الارتباط بس متهيألى إن أى بنت طبيعية لو وافقت على الارتباط بواحد و مر وقت قولى شهرين مثلا ...طبيعى جدا إن البنت تحس بميل ناحية الشخص ده و هو برضه. لو ده محصلش يبقى اكيد فى حاجة غلط...شخصياتهم مختلفة مثلا...طريقة تفكيرهم مش واحدة...لكن ميكونش فيه اى مشاعر؟ متهيألى لوقلنا ان ده ممكن يبقى ده تعقل مصطنع.

و طبعا انا مش بتكلم على الحب قبل الارتباط اساسا لانه فى اغلب الحالات هو صورة مرفوضة لاستعمال العاطفة بدون عقل

[بنت شعنونة]

بواحد و مر وقت قولى شهرين مثلا ...طبيعى جدا إن البنت تحس بميل ناحية الشخص ده و هو برضه. لو ده محصلش يبقى اكيد فى حاجة غلط...شخصياتهم مختلفة مثلا...طريقة تفكيرهم مش واحدة...لكن ميكونش فيه اى مشاعر؟ متهيألى لوقلنا ان ده ممكن يبقى ده تعقل مصطنع. 

يعني ايييه ميل؟؟؟

هيا دي المصيببة يا اخ مصري

قولك مثلا...

انت بتحب تاكل رز ومش بتحب المكرونة انما ما بتكرهاش

وفرض واتحطيت في مكان ما فيهوش الا مكرونة بس

ها تاكل؟ والا تموت من الجوع؟؟

طيب

عشت هناك شهرين

اتعودت عليها والا لسا؟؟

ماهيا مطبوخة حلو وما عليهاش سم

لكنها مش اكلتك المفضلة؟

حضرتك فاهمني؟؟

بلاش

ها اتكلم بشوية صراحا

اتقدملي مرة جوازة صالونا شخص مافش ايييييييي وجه شبه بيني وبينه

واول انطباع عندي لما شفته كان انه معللللللللللم سوق وطريقة كلامه مقززة

لـــــــكـــــــن

واخد بالك من لكن دي

دي اللي خلت بابا يقولي يا بنتي ما تحكميش من اول مرة واديله فرصة

الحاجا لما بتكون وحششششة اوي يعني اسود صعب انك تقول لكن وكمان لو كانت حلوة اوي يعني ابيض

انما لما بتكون رمادي بنقول لكن ودي هيا سؤال حضرتك

اكمل

لكن عجبني فيه حاجا واحدا

انه راجل....... مش هلفوت.. مش شاب تافه

لالا

راجل ابن سوق يعني شبه الرجالة اللي عاوزا تتجوز بجد يعني :roll: :roll:

قلت ماعلينا اتغاضى واشوفه

شفته 4 مرات بالعدد

اول مرة قعدنا نسال بعض بالعبيط اسالة كتييييييير جدا وختمها بالكلام عن ماما مما ادي الى ان عيني تدمع وهوا اعتذر لكنه حس اني نكدية.. ادي واحد

تاني مرة ابتديت اقنع نفسي فيها ايه لم ابقى ست بيت وهمي الطبخ ولاكنس وجوزي خصوصا انه بيتغدى متاخر اوي مكان العشا ومش بيفطر وطول اليوم برا ودا كان في نظري بونص عظيييييييم عشان انا بكررررره الصحيان بدري

ثالت مرة... لقيته مافيهوش ريحة الرومانسية انما عاوز يصلي وابتدى يكلمني قولي انا صليت العصر وكدا وانا افرح

رابع مرة كنت مخنوووووقة جدا فقالي طب قومي اعمليليك اكلة دسمة كدا وكلي وانتي تروقي

وخليكي فرش عشان نطلع في الدش

:lol: :lol: :lol:

ساعتها قلت بسسسسسسسسسسس

لحد هنااااااااااا وستووووووووووووب :twisted: :twisted: :twisted:

ملاحظة " كل مرة كان بيقعد تكلم عن الأكل"

شفت بقى الرمادي بخليك تقنع نفسك ازاي؟

مش البنت بس

الولد اكتر صدقققققني

ولو الغلط على البنت واحد

يبقى الراجل 3

لآنه هوا اللي مفروض بيحكم عقله :? :?