المدينه الجامعيه عن طريق محو الأميه

[فــيــروز]

قرأت هذا الخبر على موقع "مصراوى"

محو امية 5 افراد شرط للالتحاق بالمدينة الجامعية

مصراوى-خاص- اعلن الدكتور عبد الله بركات رئيس جامعة حلوان ان الجامعة اقرت نظاما جديدا لدخول المدينة الجامعية يشترط فى هذا النظام ان يقوم من يريد الالتحاق بالمدينة بمحو امية 5 افراد على الاقل من اسرته او اقاربه او جيرانه وذلك فى اطار بروتوكول تعاون بين الهيئة القومية لمحو الامية وجامعة حلوان .

واشار بركات ان جامعة حلوان كان لها السبق فى هذه الفكرة لتحفيز الطلاب على القيام بواجبهم نحو مجتمعهم فضلا عن ذلك سوف يمنح الطالب 200 جنيه شهريا نظير مشاركته .

وقد اثار قرار رئيس الجامعة جدلا واسعا بين الطلاب المغتربين الذين رفضوا الفكرة تماما مؤكدين ان فترة الصيف بالنسبة لهم هى فترة عمل يحاولون من خلالها مساعدة اسرهم فى تكاليف المعيشة .

وطالب الطلاب من وزير العليم العالى التدخل العاجل لالغاء هذا القرار حتى يتثنى لهم الالتحاق بالمدينة والتخفيف من الاعباء المادية التى يواجهونها .

[فــيــروز]

بصراحه أنا ضد هذا القرار .. كما جاء فى بعض التعليقات على الخبر لا يفترض أن تكون خدمة المجتمع قاصره على طلاّب جامعه واحده وعلى فئه مخصوصه منهم باحتياج شديد للإقامه فى المدينه الجامعيه وكأن الخدمه الاجتماعيه واجب فقط على سكّان المحافظات النائيه بينما سكّان محافظات القاهره و الجيزه و حلوان لعدم احتياجهم للإقامه بالمدينه الجامعيه يعفوا من هذا الواجب !! وكأن طلاّب المحافظات الأخرى يعاقبون على شئ ليس لهم فيه أى دخل وهو محل سكنهم ..

كذلك هل تكفى فترة ثلاثة أشهر هى فترة الإجازه الصيفيه لمحو أميّة 5 أفراد !! إذا كنّا لم نسمع عن إنجازات بهذا الحجم للجهات المسئوله بالفعل عن محو الأميّه و التى خصّص لها ميزانيات و مبالغ لهذا الغرض و رغم هذا لم تحقق فيه شئ فهل يعقل أن يطلب هذا من الطالب الجامعى خلال شهور الإجازه الصيفيه !! ومن أين يفترض أن ينفق الطالب على تحقيق هذا الهدف !! من جيبه الشخصى أو هيجيب سبّوره من عند الست الوالده زى "مرسى الزناتى" :lol:

طريقة "لوى الدراع" دى طريقه فى منتهى الظلم و الإجحاف خاصة لاقتصارها على فئه معيّنه من الطلاّب .. أفهم أن يكون من قواعد الالتحاق بالمدينه النجاح فى كل سنه دراسيه على اعتبار أن المجتهدين أولى من غيرهم بمكان فى المدينه .. لكن أن يكون الالتحاق بناء على محو الأميّه لخمسة أشخاص كخدمه اجتماعيه يفتح الباب على مصراعيه لكثير من التحايل و المحاباه لا الطلبه ولا أولياء أمورهم بحاجه إليه .. وماذا إذا لم يحقق الطلاّب هذا الرقم هل ستظل المدينه خاويه على عروشها أم سيتم اختيار الطلاّب بالقرعه !! :)

كنت أقرأ زمان ل "أنيس منصور" فكره ينادى بها قامت بها "الصين" حين أغلقت كل جامعاتها لمدّة عام حتى يقوم الطلاّب -كلّهم بدون تمييز- بالمشاركه فى محو الأميّه ولأن الطلاّّب فى "الصين" يحبون جامعاتهم و يفتقدون التعليم نجحت الفكره لكن يا ترى الوضع فى "مصر" مماثل للوضع فى "الصين" أم أنّنا لا ننجح سوى فى اقتباس الأفكار مشوّهه فنزداد تعاسة و فشلا !!

[se_ Elsyed]

في عصر مبارك نستطيع أن نقول أننا في " بلد كل واحد بيعيش فيها بقانون نفسه "

يعني

رئيس جامعة حلوان .. يصحى الصبح مزاجه متعكر والغطا انكشف عنه وهو نايم ... يقوم الصبح يروح فاقع الطلاب قانون يجيبهم الأرض

الاخ عادل لبيب اللي مبهدل إسكندرية وكانت النتيجة إن رجال الاعمال اللي كانوا بيدعموا المحجوب دعماً لا محدود .. رفعوا إيديهم وقالوا للبيب " مع نفسك " راح مقيل له ساعة في العصاري .. وإنتوا عارفين هوا العصاري على سطح جاري وفي إسكندرية بالذات بيسطل .. راح مستخرع قانون ومسيمه " قانون الحضانات " - بتشديد الضاد -

يعني لو سيادتك معاك عربية واخدت مخالفة أي مخالفة .. مثلاً مثلاً يعني عشان سايق العربية وإنت حافي ... فبيسحبوها منك وتتحجز ييجي 3 أو 4 أيام فيما يُسمى بالحضانة .... وتيجي تستلمها يروح رازعك مبلغ لا يقل عن 4000 ج غرامة وأرضية لحجز العربية - آه والله - وكإنك هاتشتري عربية جديدة ... ولما سألوا المحافظ إنت بتعمل كده ليه وعشان إيه وإمتي وفين ومين اللي أقر القانون ده ؟ قال : عشان انمي موارد المحافظة ..

وخد عندك برضوا القانون القراقوشي بتاع ضم 6 أكتوبر لمحافظة المنيا .. وحلوان للسلوم .. ومركز جرجا لمحافظ الشرقية ... والعجن واليخني اللي شوفناه مؤخراً في إعادة تقسيم المحافظات ...

وعندك برضوا قرار الباب العالي في محافظة كفر الشيخ والراجل اللي منع الدقيق عن أهالي البرُلس فخرجوا غاضبين ليقطعوا الطريق العام ..بدون أن يُكلف فخامة نيافته ويستطلع رأي الناس او يستشعر ردود فعلهم الغاضبة ..

وإعجن يا معلم وماحدش هايقولك تلت الأربعة كام ... طالما إنت في عصر مبارك ... يبقى دعه يعمل دعه يعُك ... ولا حد بيحاسب حد وولا حد بيكلم حد ... وولا حد فاهم حد ..

[se_ Elsyed]

على فكرة يا فيروز هو قانون واستخراع ظاهرة الرحمة وباطنة العذاب

يعني السيد اللواء الدكتور رئيس الجامعة عايز يساهم في حل مشكلة الاُمية التي تعجز حكومات مبارك المتعاقبة عن حلها والتي وصلت في مصر إلى أكثر من 30 % .. بالمناسبة هناك دول نتتريق عليها زي كوبا مثلاً بتاعت السيجار وبتاعت أبويا الحاج فيدل كاسترو .. نسبة الأمية فيها صفر % ( أسف إني قلت لك صفر لإني ممكن أفكرك بصفر المونديال ) لا هاقولك اليابان ولا والعياذ بالله كوريا ولا بلاد تركب الكتاكيت ... بذمتك يا فيروز مش حاجه تكسف ؟

لا هما عارفين يحلوا مشكلة الأمية ولا مشكلة التوزيع الجغرافي المتوازن للسُكان وبيسموه دلوقت إنفجار سكاني ... اللي يا عيني صحيوا الصبح من كام يوم لقوا الرئيس فكرهم بالمشكلة السكانية ... فبعون الله وبلا سحر ولا شعوذة تفتق ذهنهم عن عدة أفكار للحد من هذه الظاهرة الخطيرة التي تفتق عنها فكر الزعيم ومن تلك الإستخراعات : - أنا ما باهرجش -

1- التوجه نحو " تعقيم الرجال " آه وكتاب الله ..... يعني يعملوا لنا إحنا يا رجال حاجه كده زي السلخانه ويوقفونا صفوف صفوف مش عشان تحية العلم .. لأ عشان ندخل من الباب داهو رجالة .. ونطلع من الناحية التانية مش رجالة .. وبكده يضمنوا إنا إحنا ما نخلفش ونحيا حياة " كافور الأخشيدي ؟

والله العظيم لو عملوا الموضوع ده مانا نازل مصر خالص ... أصلي بأخاف من الحٌقن ... وهاستنى حبايبي أعضاء المنتدى الكرام في مصر عشان يحكوا لي عالتجربة لو كانوا لسه عايشين ... ( وين هنادي ياماي ؟ )

2- توفير أقراص دواء بسعر روخيوص ومهاود للإجهاض في الصيدليات .. بحيث البت من دول تدور على حل شعرها ولما يحصل حمل ... تروح ضاربه لها قرصين وترجع زي الأول ...

3- محاولة تجريم الأسرة اللي تخلف أكثر من إتنين .... يعني بالعربي أروح أتاوي الواد عبد الرحمن أو أبيعه لعيلة ما بتخلفش ...

وفعلاً ما بيدفعش ثمن إفتكاسات السادة المسئولين الغير مسئولين غير الفقراء والغلابة ... يعني معظم اللي بيسكنوا في المُدن الجامعية بيبقوا طلبة من الأرياف وعلى قد حالهم .... نقوم نسيبهم ؟ لأ إزاي ومين هايمسح ويُكنس ويمحو أمية الناس ؟ ومين نقعد نجرب فيه الأكل الحمضان وكل سنة تتكرر تلك الحوادث المميتة بدون رادع ولا محاسب وتلاقي حالات تسمم عديدة بتحصل داخل جميع المُدن لإنهم بيعتبروا الطلبة الغلابة دول ناس درجة ثالثة - ترسو يعني - وبالتالي لما أرمي لهم لقمه حمضانه يبقى هايبوسوا إيدهم شعر ودقن ... بس دول ممكن يتسمموا يا كابتن ؟ يا عم لا بيتسمموا ولا حاجه إنت بس مكبر الموضوع ودي عيال فلاحين معدتها بتطحن بندورة الرصيف ...

ويا ويله يا سواد ليله اللي تظهر عليه بودار الإيمان او قول لا إله إلا الله ويتعاطف أو يفكر في التعاطف مع جماعة زي الإخوان المسلمين ... فبتلاقي مصيره إنه بيترمي في الشارع زي ما حصل في جامعة القاهرة هذا العام وراحوا طاردين الطلبة الإخوانجية اللي لم يرتكبوا أي ذنب سوا إنهم قالوا رُبنا الله .. رموهم في الشارع من أبعدية أبوهم المُسماه بالمدينة الجامعية ... ولما العيل من دول يعقل ويرتد عن كفره ويرجع يعبد آلهتنا العوالي ويقدم لها قربان ويقول " نحن غرابه عنك عنك " .. يبقى نصرف له سرير وملايه بشراشيب وندخله المدينة الجامعية تاني ...

[ابو محمود]

العزيزة فيروز

بحساب بسيط كم عمر المجند اللى سعاتة عايز يمحى اميتة مابين ال19 والعشرين عام

طيب كم عمر حكم السيد الرئيس المفدى 27 سنة يعنى العسكور دةكان فى علم الغيب

عرفتى بقى لية العسكرى طلع جاهل

[se_ Elsyed]

العزيزة فيروز

بحساب بسيط كم عمر المجند اللى سعاتة عايز يمحى اميتة مابين ال19 والعشرين عام

طيب كم عمر حكم السيد الرئيس المفدى 27 سنة يعنى العسكور دةكان فى علم الغيب

عرفتى بقى لية العسكرى طلع جاهل

بالمناسبة يا محمود

الناس دي ذنبهم في رقابنا

يعني ملايين الجنود اللي بنسميهم - عادة - يعني بيترزع 3 سنوات لإنه جاهل لا يقرأو ولا يكتب ... وبيقعد 36 شهر في الجيش او الامن المركزي التمام والكمال .. يعني لا مؤخذه لو بنعلم حمار كان زمانه إتخرج ومعاه الدكتوراة .. ومش هايكلفنا اي شيء سوا إننا ممكن نحفذ باقي المجندين المتعلمين إن مثلاً فترة تجنيدهم هاتنخفض بمقدار 3 شهور مثلاً للمؤهلات العُليا - يعني بدل سنة تبقى 9 شهور - و6 أشهر للمؤهلات المتوسطة - يعني بدل سنتين تبقى سنة ونصف - لو علم 10 من الناس الغلابة دي اللي هما زمايله في الكتيبة و اللي إتحرموا من نعمة التعليم واهو لا مرتبات بتندفع ولا مصاريف ولا يحزنون ولا هانكلف الدولة حاجه ... والعسكري اللي هايكمل محو اميته في خلال الثلاث سنوات ممكن برضوا فترة تجنيده تنخفض سنة مثلاً .. واللي هايرفض يتعلم نزود عليه سنة ...

والعديد من الافكار الأخرى اللي ممكن بها نستفيد من الذخيرة الحية اللي عندنا بكثرة وتتمثل في الشباب اللي بيقعدوا على القهوة في الصيف .... فتخيل لو تكاتف رجال الاعمال الشرفاء مع منظمات المجتمع المدني مع الدولة - المحترمة ... وأسف إني باتطاول واقول المحترمة - وجيبنا شباب الجامعات ورصدنا لها مكافآت مجزية للعمل في فترة الصيف في مشاريع محو الأمية ... بالله عليك هل خلال عام واحد هاتلاقي حد عند ما بيعرفش يقرأ ويكتب ؟

ولكن زي مانت شايف ... كل الوشوش الموجودة على الساحة هي وشوش حماضن .. أكل عليها الزمان وشرب ... وكل همهم بقى التهليب ... ضرايب عقارية ... زيادة أسعار ..... إحتكارات ... قوانين لولبية ... بيع ممتلكات الدولة .... إلخ

أما أصحاب الفكر المستنير والمبتكِر فينزوون وهم صامتون ويتركون الساحة للي له ضهر وللجهلاء وأنصاف المتعلمين ...