تابع مسلسل الهجرة غير الشرعية وغرق المصريين

[se_ Elsyed]

مآساة بكل معنى الكلمة .. والدولة ولا هي هنا ... وولا بتعمل برامج توعية لهؤلاء المساكين المنتحرين .... ناهيك عن الإصلاحات الإقتصادية وتوفير فرص عمل الحقيقية ... حيث إم مبارك الله يكون في عونه هو ووزراءة متبرمجين على بيع ممتلكات الدولة فقط ... أما العمل الحقيقي ... فالعمل عمل ربنا ...

50 شخص يلقُى حتفهم في غمضة عين

50 شخص فيما بينهم أطفال أو شباب لسه ما كملش تعليمه اعمارهم تتراوح ما بين 15 إلى 18 عام ..... طب بالله عليكم ... كانوا رايحين إطياليا يعملوا إيه ؟

50 شخص ... مش عايز أغلط بس لإنهم الأن بين يدي الرحمن ... كل واحد فيهم دفع 2000 دولار عشان يركب قطعة خشبية إسمها مركب .. تسع لحد أقصى 40 شخص ... فينحشر فيها 150 والمفروض إنها تروح من ليبيا إلى غيطاليا .... وتغرق بعد عدة امتار في البحر كما غرق قبلها العشرات .

50 روح وكل إسبوع المسئولين يقرأوا تلك الأرقام المفزعة ولا يحركون ساكناً ويعملوا زي الولايه ويمصمصوا شفايفهم .. وكأن ليبيا دي دولة في المريخ وبعيدة وبالتالي لا يُمكن عمل أي تعاون أمني معها للحد من هذه الظاهرة وحماية أرواح أبناء مصر ...

50 بني أدم ... أول حاجة بيعلمها إنه قبل ما يركب المركب بيروح مقطع جواز سفره عشان ما حدش يعرف جنسيته وبالتالي عنده أمل إن لو وصل الجنة الإيطالية المزعومة يطلب حق اللجوء أو يذوب وسط المجتمع الطلياني ...

50 بني أدم ما عرفش فين أهاليهم وإزاي يسمحوا لهم ينتحروا بهذا المنظر البشع ...

مأساة مسلسل غرق المصريين

غرق‏50‏ مصريا أمام شواطئ ليبيا

حاولوا الهجرة غير الشرعية لإيطاليا

صعوبة التعرف علي جثث الضحايا لتحللها‏..‏

والناجي الوحيد يروي تفاصيل الحادث

طرابلس ـ من سعيد الغريب ـ القاهرة ـ من محمود النوبي‏:‏

في إطار مسلسل حوادث الغرق الجماعية خلال محاولات الهجرة غير الشرعية إلي الخارج‏,‏ لقي‏50‏ مصريا حتفهم من بين‏150‏ شخصا من جنسيات مختلفة‏,‏ بعد انقلاب قارب خشبي كان يقلهم أمام السواحل الليبية في طريقهم إلي إحدي الجزر الإيطالية‏,‏ ولم ينج من الحادث سوي شخصين‏,‏ أحدهما مصري‏,‏ والآخر من بنجلاديش‏.‏

صرح بذلك أيمن مشرفة نائب السفير المصري بليبيا‏,‏ موضحا أن الحادث وقع يوم الجمعة أمام شواطئ منطقة زوارة خلف حقل البوري النفطي بمياه المتوسط القريب من الحدود التونسية‏.‏

وأوضح مصدر دبلوماسي بوزارة الخارجية أن السفارة المصرية في طرابلس أرسلت مندوبا إلي منطقة زوارة لمتابعة عمليات الإنقاذ‏,‏ والتعرف علي جثث الضحايا‏,‏ بالإضافة إلي التنسيق مع السلطات الليبية للتوصل إلي أي معلومات تفيد في التعرف علي هوية الضحايا‏.‏

وأشار إلي أن المصري الناجي من الحادث يدعي وائل ناجي عبدالمتجلي من محافظة الشرقية‏,‏ ومهنته عامل بلاط‏,‏ وأنه من الصعب الآن التوصل إلي حصر نهائي لأعداد الضحايا‏.‏

بينما أوضح المستشار أدهم هلال‏,‏ قنصل مصر في ليبيا‏,‏ أن تحقيقات النيابة العامة الليبية أكدت العثور علي‏21‏ جثة متحللة يصعب التعرف عليها‏,‏ وتم التصريح بدفنها‏,‏ بالإضافة إلي‏19‏ جثة أخري‏,‏ جار فحصها تمهيدا لدفنها‏,‏ مشيرا إلي أن مندوبين عن السفير المصري محمد رفاعة الطهطاوي موجودون في منطقة الحادث لمتابعة كل الإجراءات‏.‏

وروي ناجي عبدالمتجلي ـ المصري الوحيد الناجي من الحادث ـ تفاصيل ما وقع‏,‏ موضحا أنه تعرف علي شخص في سوق الجمعة في طرابلس عرض عليه السفر إلي إيطاليا مقابل ألفي دولار‏,‏ وتم تحديد موعد السفر يوم‏5‏ يونيو‏,‏ حيث تجمع الشباب المشارك في الرحلة في سوق الجمعة‏,‏ وتوجهوا مع هذا الشخص إلي منطقة غير معلومة لهم غرب طرابلس مكثوا فيها ليلتين‏,‏

ثم ركبوا قاربا صغيرا لا يسع إلا‏40‏ شخصا فقط‏,‏ وبعد ساعة من تحركه تعطل القارب‏,‏ وباءت بالفشل كل محاولات إصلاح المحرك‏,‏ وبدأت المياه تتسرب إليه‏,‏ ونتيجة للهلع الذي أصاب الركاب الذين لا يعرفون السباحة انقلب القارب بهم وغرقوا‏.‏

من ناحية أخري‏,‏ تقوم السلطات اليونانية غدا بترحيل‏93‏ مصريا من المهاجرين غير الشرعيين‏,‏ علي متن طائرة خاصة من مطار جزيرة كريت مباشرة إلي القاهرة‏.‏

[جويرية]

لما لم تصلح لها الطريق يا عمر ؟

رضي الله عن عمر ، كان يقول : لو عثرت بغلة بالعراق ( على أطراف الدولة الإسلامية يومئذ ) لسألني الله عنها يوم القيامة : لِمَ لَمْ تصلح لها الطريق يوم القيامة يا عمر !!

[adrianocrespo]

الله يرحمهم جميعا

ومش حتكون الاخيرة

[ayman elsherif]

اقترح على الحكومة المصرية عمل مناقصة لشراء مراكب متهالكة وذلك من حصيلة بيع القطاع العام وتوزعيها باسعار مناسبة على الشعب المصري حتى يتمكنوا من مغادرة مصر الى الجهة الاخرى من البحر أو الي الاخرة ايهما اقرب.

و بذلك سوف تتمكن الحكومة الرشيدة من حل جميع مشكلات هذا الشعب من بطالة و تعليم و إسكان ورعاية صحية و الخ...

ياعم سي السيد انت عاوز الحكومة تتعاون امنيا مع ليبيا علشان تنقذ اعداد محدودة من المصريين الذين استطاعو تدبير مبلغ 2000 دولار للهروب من مصر و البحث عن السراب. دة تلاقيهم سعداء اوي علشان خططهم نجحت في تحديد النسل و خفض معدل النمو السكاني اللي تاعبهم اوي.

ادعو الاول الحكومة المصرية ان تتعاون مع نفسها لانقاذ المصريين الذين يموتون يوميا في حوادث الطرق و الذي يفوق اعدادهم اعداد هولاء الضحايا. بسبب سوء تصميم الطرق و الفساد المنتشر.

و الله يرحم الجميع

تم تعديل 17 يونيو 2008 بواسطة ayman elsherif

[aimen]

مآساة بكل معنى الكلمة .. والدولة ولا هي هنا ... وولا بتعمل برامج توعية لهؤلاء المساكين المنتحرين .... ناهيك عن الإصلاحات الإقتصادية وتوفير فرص عمل الحقيقية ... حيث إم مبارك الله يكون في عونه هو ووزراءة متبرمجين على بيع ممتلكات الدولة فقط ... أما العمل الحقيقي ... فالعمل عمل ربنا ...

الناس دول مش منتحرين ولا طماعين يا سى السيد ...انا وانت ربنا يسرها لنا وقدرنا نخرج من مصر ناس كثير مخنوقة من البلد واللى فيها بتحاول بكل طريقة تعيش ومش معنى انه دفع 2000 دولار يبقى ملك الملوك

50 شخص يلقُى حتفهم في غمضة عين

50 بني أدم ما عرفش فين أهاليهم وإزاي يسمحوا لهم ينتحروا بهذا المنظر البشع ...

معلش انا مش معاك فى النقطة دى ابدا وفر لهم شغل وحياة ادمية فى مصر وبعدين ابقى ناقش نقطة منتحر او شهيد انما لا تلقى بى فى اليم وتقول لى لا تغرق زى ما بيقولوا

[se_ Elsyed]

أيمن

أرجوك سيبك من موضوع إنهم غلابة وبيدوروا على شغل ومش لاقيين داخل مصر ...

إنزل كده الأرياف وشوف أصحاب الأراضي بيدوروا على العمال الزراعيين إزاي وما بيلاقوش

إنزل مدينة بُرج العرب وشوف كمية الإعلانات اللي ماليه الشوارع وبيعيطوا عشان مش لاقيين عُمال ...

يا أيمن بك ما أكثر المطاعم في مصر ... ده مثل بأضربه لك ... وبيدورا على عُمال مخلصين بالملقاط ومش لاقيين ... وأقل صنايعي بياخد في الت 8 ساعات 35 ج .....

يا أيمن بيه ... الـ 2000 دولار دول لو دفعهم مقدمة سيارة نقل صغيرة .. هايطلع له صافي 100 ج يومياً .. وأنا اعرف تماماً ما أقوله .. عارف إن تجار الخضار وخصوصاً البصل والثوم والبطيخ والحاجات دي بيأجروا السواق بعربيته لمدة 8 او 10 ساعات وبيعطوه أقل شيء 100 ج يومياً ؟

يا أيمن بيه لو الـ 2000 دولا دول أشترى بهم 10 رؤس اغنام صغيرة وأكلهم وشربهم من خشاش الأرض في الأرياف عنده وباعهم بعد 6 شهور هايكسب قدهم مرتين ...

يا أيمن بك .. العبد لله كان عنده حارس عقار بيتقاضى 500 ج شهرياً وبيعمل إلى جانب شغله لإن البيت بيحتاج حراسة مساءً فقط وكان بيعمل صباحاً ويطلع له ما لا يقل عن 50 ج يومياً ما شاء الله .

أيوه في بطالة في البلد ... لكن الكسل موجود بوفرة وبنصدره كمان

كل الجثث اللي إنت شايفها دي دول لا يملكون أي شيء من مقومات الحياة تجعل الواحد منهم يعمل او يجد عمل في إيطاليا أو في جهنم حتى ..

انا لا أطالبه إنه يبقى معاه دكتوراه ... لكن اطالبه إنه يتعلم أي مهنة ويتعب شوية في التعليم .. ويشوف ربنا هايجازيه مقابل تعبه ده وزيادة ولا لأ

يا عزيزي أيمن لما تسمع الناجين منهم تلاقي كلامه غريب وشاذ ... فدافع الهجرة على لسانهم كان إنه بيغير من الإتنين ولا التلاتة اللي نجحوا يسافروا من بلدهم زمان وكل واحد رجع بنى بيت فخم وأشترى كام فدان ارض

فالبيه فاكر إنه لما يسافر لمدة شهر أو شهرين هناك هايرجع معبي شوال فلوس ويعمل زيه ...

مرة أخرى أركز على الفشل والكسل وحلم الثراء السريع .....

وأبو 2000 دولار ده .. كده طالع ببلاش ... ده في ناس بيدفعوا لحد 70 ألف ... أو الله يا أيمن 70 ألف ج عشان يسافر أوروبا ويعبي فلوس ...

طب تخيل يا أيمن لم أصادف أو أسمع واحد من دول بعد ما رجع مجبور الخاطر قال هو كان شغال إيه هناك

[أسد]

طول عمر مصر شعبها فقير ...

لم يكن يوماً الشعب المصري أثرياء ..

طول عمرنا فقراء ..

إحنا ناسيين ولا إيه ..؟؟؟

من إمتى كان المصريين مش محتاجين .. من إمتى لم نكن فقراء ..

ولكن لم نكن أبداً بمثل تلك السلبية والكسل والطمع ..

ياريت لما نكتب .. نشعر أكثر بالمسئولية تجاه كلماتنا ...

طول عمر المصريين محتاجين للعمل .. وللسفر .. وللمال ..

ولكن لم نكن هكذا ..

صبي عمره 16 سنة .. جرب يعمل إيه في مصر ده علشان يقول أنا تعبت من البلد وفشلت فيها ..

لحق يعمل الكلام ده امتى ..

العيب مش عليه ..

العيب على أبوه .. وأمه .. وعمه .. وخاله .. وجاره .. وشيخ الجامع .. والمدرس في المدرسة .. وكل اللي حواليه .

العيب علينا احنا ..

كل ما حد يعمل مصيبة .. نقعد نعيط عليه .. ونتفنن ونتفلسف لنجد له المبرر والدافع .. ليصبح فعله وجرمه مبرر . . ومنطقي ..

اللي يبيع كليته .. نقول أصله مسكين .. مبيض محاره .. ودخله 200 جنيه في الشهر ..

من إمتى الكلام ده ..

دي ناس مستهترة بحياتهم .. ومش ممكن الكلام ده يرضي حد أبداً .. ولا يرضي ربنا ...

شوية حكمة شوية في قراءة الأمور ..

[adrianocrespo]

السلام عليكم

اتفق مع سي السيد و اسد

و ده علي فكرة نفس كلام المفتي علي جمعه اللي بيتفسر دايما غلط

الله اعلم دول شهداء و لا لأ

الله يرحمهم

بس بلاش نسطح الامور

يعني لو عديت من البحر ابقي غني و لو غرقت ابقي شهيد...........يعني ضامن دنيا واخرة

[om marawan]

لم أقرأ رد ابلغ على من ردود الزملاء الأفاضل سين سين والفاضل أسد عن التعلل طول الوقت بحال البلد فى الهجرة غير الشرعية الى ايطاليا أو غيرها

ولا أستطيع ان أضيف كلمة أو اجابة على سؤال الفاضل أسد انه الشاب اللى عنده 16 سنة جرب ايه فى بلده

ومش عاوزة كمان أذكر مهازل الخروج من مصر بعدة طرق ابشعها اللى ادعوا على انفسهم الشذوذ ودفعوا ألاااااااااف للهجرة الى أستراليا

أبسط شىء فى هذا الموضوع ان اللى بيفكر فى السفر بالطريقة دى لم يلتزم بقوانين واعراف البلاد اللى رايح لها

وانه ممكن يكون بكده بيتعدى على حق الناس اللى سافروا بطريق مشروع ودفعوا مبلغ الفيزا بشكل رسمى ....

ده غير انه بيغامر بحياته فى رحلة غير مأمونة ولا يعلم نهايتها الا الله سبحانه وتعالى

ده مش هجوم على اللى سافروا او غيرهم ... لكن فعلا عاوزين ننتبه انه ايجاد المبررات يدفع بغيرهم لسلوك نفس الطريق بدون عظة ووعى

لا حول ولا قوة الا بالله رحمهم الله ورحم موتانا وموتى المسلمين .... اللهم ااااااااامين

تم تعديل 17 يونيو 2008 بواسطة om marawan

[aimen]

ياجماعه فهمتونى غلط

تعالوا نتفق ان الأمور فى مصر بقت صعبة جدا لكن فى الوقت نفسه معظم الشباب لإ من رحم ربى بتمنى تنزل عليه ثروة من السما ويبقى معاه احدث سيارة واحدث موبايل ويعمل فرح ويجيب مش عارف مين فيه ؟ كل ده وبينسى الطرف الثانى من المعادلة اتعب تلاقى ...الكل عاوز على الجاهز والسريع ... انا لااعرف مؤهلات هؤلاء الشباب ولا ظروفهم ايه ؟ بس انا اعرف الظروف الحالية بتخنق الناس وبتعصرهم عصر فمش عيب ابدا انهم يدورا على الأفضل زى ما كلنا عملنا لكن نيجى للأفضل ؟ ازاى اسافر وانا بدون اية مؤهلات او مهنة ازاى اسافر كده طرزان يعنى اشتغل فى مطعم اوكى معمار اوكى مش عارف ايه اوكى انا بصراحة مش متخيل الحكاية دى بس هى موجودة ...

مختصر الكلام 1- منتحرين ام شهداء دى علمها عند ربى

2- اغبياء لأنهم فاكرين ان الإمور بالساهل وانها علشان ظبطت مع واحد ممكن تضبط مع التانى

3- البلد بقت طاردة للناس اكثر من اللازم ولا تلوم احدا الإ لما تعرف ظروفه

4- الفكرة ازاى نفهم الشباب دول ان كده غلط ؟ ساعدوهم ووفروا لهم شغل فى مصر وحياة كريمة وبعدين اللى يسافر منهم بالطريقة دى اسجنوه انما لأسعار مولعه والحياة نار ومافيش شغل ولا جواز والرواتب لا تكفى ونتكلم بفوقية لأ انا مش معاكم ابدا

5- نفسى اشوف حد من ولاد ال..... الوزراء أو المسئولين قلبه محروق زى ما قلبنا محروق على الناس دى

6- عدم الرضا والتفكير الغبى هو اساس كل المصائب الكل عاوز يبدأ كبير ( والله اتذكر من عامين عرضت على واحد زميلى اعمل انا وهو مشروع محطة تحلية مياة وهو يكون مديرها وانا فقط برأس المال ....البيه ما رضى ...و اقتنع بال300 جنيه اللى بيأخدهم من الشغل الخاص ايضا ) ....

7 - سى السيد انا معاك ان الناس بتدفع وحتى 100 الف مش 70 ...

=========================================

سى السيد انا معاك الفيلم دا كله فى نقطتين هو

مرة أخرى أركز على الفشل والكسل وحلم الثراء السريع .....زى ما انت قلت

===============================================

الناس فى بلدى فاكرين اى حد بره بيلم فى فلوس كده بالساهل ...مش قادرين يفهموا ان تعب + عمل = مقابل مادى انما هم عاوزين مقابل مادى فقط وبدون تعب ....

فى النهاية اقول " اللهم ارحم امواتنا واموات المسلمين " ويسر للناس امورهم واهدينا واجعلنا سبب فى الخير للناس يارب

[se_ Elsyed]

قمت بحذف الرابط الذي أدرجة الأخ ريد سي لما يحتويه من ألفاظ نابية ... والأفضل أن لا نحصل على معلومة .. ولا إننا نرى مثل تلك البذاءات .