كيف أصبح رجل اعمال معى 1000 جنيه و عمرى 20 سنه

[kotb88]

السلام عليكم

اولا انا اسمي محمد عندي 20 سنه

لسه طالب في كلية سياحه وفنادق

دماغى وجعتني من كتر ما بفكر في انى عاوز ابقا رجل اعمال

طبعا مفيش حد بيشتغل بشهادته ولو اشتغل هيدولو ملاليم

المهم انا بشتغل في سيبر ومعايا حوالى 1000 جنيه

بجد نفسي الاقي اول الطريق

لفيت كتير وفكرت في حاجات كتير تعبت اوى وقريت في حاجات كتير ومشاريع كتير اينعم مربحه بس مش اوى بس مشكلتها محتاجه راس مال

المهم من كل القصه دي

انا دلوقت عاوز اسئلكم بصفتكم كلكم ناس دايسه في السوق والكلام ده كله

انا عندي تفكيرين دلوقت وصلتلهم بعد تفكير عميق

الاول انى ابدا اضارب بالفلوس دي في البورصه فهل الرقم ده ينفع وكمان انا سمعت ان البورصه محتاجه واحد عنده 21 سنه

فياريت تقولولى ايه الحد الادني للفلوس اللى المفروض اضارب بيها وثانيا السن وثالثا علشان اتعلم صح ومحدش يشتغلني اعمل ايه واتعلم فين او من مين

التفكير التانى بقا كان انى بالفلوس دي اتاجر بيها في اى حاجه تقابلني يعني ابدا زي تاجر صغير اشتري وابيع من غير مكان ثابت او اتاجر في اي حاجه تقابلني

فهل ده افضل ولا البورصه افضل ولا ايه النظام حد يقولى يا بشمهندسين

وشكرا

[se_ Elsyed]

خلي لك حدث حديث ولكل مقام مقال

يعني خلص تعليمك الأول وبعدين حدد طريق في الحياة العملية ... لإن فرضاً دخلت الجيش لمدة 3 سنوات كظابط إحتياط مثلاً ... يبقى تخطيطك كله راح ...

وبعدين مافيش حاجه في الدنيا إسمها " عايز أبقى رجل اعمال " ... رجل الاعمال ليست وظيفة يسعى الناس إليها ... ولكنها تأتي عندما يتخصص الإنسان في عمل ما تاجر أو صانع أو مزارع ... يقولوا بقى عليه بعد كده رجل اعمال أو رجل مطافي مش هاتفرق ... لكن المهم هو بيعمل إيه ...

أما العمل في البورصة فهو ليس مهنة يمتهنها الإنسان وتُكتب في بطاقته إنه بورصجي أو مُضارب .. لإن البورصة مخاطرها أكتر من فوائدها .. وممكن اللي تعمله في 10 سنين .. يروح في يوم لو حصلت إضطرابات سياسية أو حد ضرب بومبه في كوالالمبور ...

والمضاربة أو الإستثمار في البورصة بيكون نشاط جانبي بفلوس إنت مستغني عنها ...

وبرضوا لو دخلت البورصة من غير دراسة وعشان بس الثراء السريع ... يبقى إضمن الفشل وضياع فلوسك ..

لإن أسواق المال لها علم خاص بها .. وإن ما كنتش متعلم ودارس وقاري ... يبقى هاتضيع وتضيع فلوسك وتمشي تكلم نفسك بعد كده وتقول : القطن إنضرب .. القطن إنضرب ...

الخلاصة ... حدد أهدافك وشوف إنت بتحب انهي مجال .. وأبدأ فيه صغيراً ولا تتعجل الثراء والرقي في يوم وليلة ...

وإذا لم تعمل ما تحب ... فحِب ما تعمل

[kotb88]

طيب حلو اوى الكلام ده

انا بقا عندي شوية توضيحات

اولا على فكره اسلوبك كويس اوى في الكلام يعني بينصح وبطريقه كويسه كمان والله

ثانيا انا معنديش جيش لانى الكبير

ثالثا نعتبر ان الفلوس اللى معايا دي انا مش عاوزها لانى زي مانت بتقول انا مخطط انا هعمل ايه بالظبط بعد ما هتخرج بس المشكله دلوقت في انى لسه قدامى حوالى تلات سنين عقبال ما اتخرج ان شاء الله وانا بصراحه مليت من القاعده كده من غير ما يكون في طريق همشي فيه فعاوز انمي قدراتى في التلات سنين دول وكمان علشان عاوز اتعلم حجات جديدة

رابعا انا بجد بحس ان الوقت اللى عمال كل يوم بيضيع مني ده من غير ما استفيد منه بيموتني

خامسا كلمة رجل اعمال انا لما قولتها مكنش قصدي انها مهنه انا كنت اقصد انى عاوز اوصل للمستوى ده بعد حوالى اربع او خمس سنين بحيث انى اول ما اتخرج مقعدش شبه بقية جيلي لسه هروح اخد كورسات وبعدين اقعد ابعت سيفيهات وستنا سنتين تلاته عقبال ما الاقي شغله نضيفه واول ما الاقيها اكون بأذن الله وصلت سن التلاتين ومن هنا نبدأ ان شاء الله نكون نفسنا واحده واحده انا والبنت اللى عاوز ارتبط بيها وان شاء الله نتكوز على سن الاربعين ونخلف عيل على سن الخمسين وكل سنه اونت طيب واموت

مش دي قصة 90% من شعب مصر

انا بأه مش حابب انى اعيش القصه دي

انا مش مهم اخسر فلوس في التلات سنين دول مش مهم اتمرمط مش مهم اخسر اى حاجه المهم بعد التلات سنين دول ..... اكون رجل اعمال صح ( مستوى ... مش وظيفه)

انا قعدت اقرا كتير في كتب التسويق وازاى تقدر تكون غني وازاى تكون رجل اعمال وكلها كتب اجنبيه بصراحه

بس اتعلمت منهم ان الناس دي بيمتازو بحجتين جبارين جدا

الاهتمام الشديد بالوقت ................ والمغامرة ......... يعني الناس دي مش كل همها تعمل فلوس وتحوشها لا الناس دي كل فلوس بتجيلهم بيزودو بيها استثماراتهم واتعلمت منهم انى لو حته الفلوس ضاعت انا مدخلتش السوق علشان الم فلوس انا داخل علشان اتعلم ازاى اجيب فلوس

ارجو ان تكون فكرتي وشخصيتي وصلولك ...... يا زعيم

بس بجد والله اسلوبك كويس في النصيحه وانا فاهم كل اللى انت قولته

ولو عندك نصيحه تانية بعد الكلام ده يا ريت تقولهولى وانتو يا جماعه اللى عنده حاجه هتفيدني ياريت ميبخلش لان مين يعلم ممكن بنصيحة حد منكم تتغير حياتى وساعتها كل الحسنات اللى هاخدها من ورا التغير ده هتحط في كفته لانه هو اللى دلني على الخير

فأرجوكو اتكلمو ........ ياريت كل الشعب يبدأ يفكر انه يفيد غيره ..... علشان اان ملاحظ ان البلد اليومين دول كله بقا بيقول يلا نفسي ومصلحتي مع انه لو فاد غيره دي اكبر مصلحه ...... لو انتو تجار صح يبقا هتفكرولها كده ..... ايوة دي اكبر مصلحه بس مش هتاخد فلوس الدنيا لا هتاخد فلوس الاخره ....... انا ببوصلها كده انا لما بفيد حد باخد عليه فلوس في الاخرة اللى هى حسنات ..... فبتتضاعف فبكون ثروة في الاخرة برضو ....... ايوة يا جماعه ثروة يعني بتغني في الاخره بستثمر في الدنيا نفسي علشان في الاخره اكون غني والاقي مرتبه كويسه في الجنه ان شاء الله .... مش ده هدفنا كلنا في الدنيا اننا نحاول نعمل كل حاجه علشان نعيش في مستوي كويس ونكون ثروة تعيشنا كويس في الدنيا .... بس المشكله اننا بقينا بنبوص للمكسب المادى ....... بس انا بيتهيئلي ان التاجر الشاطر هو اللى بيطلع اي مكسب من اى حد ........ ولا انا غلطان

معلش طولت ....... بس بجد حسيت انى عاوز اتكلم واوضح حجات كتير لان الكبار ديما بيشوفو ان الصغيرين سطحيين بس احنا مش كده .... لو دققتو النظر فينا هتلاقونا كبار اوى بس انتو اللى مش عاوزيين تبوصو

واللى عنده نصيحه ياريت يقولها ....... يلا اي خدمه بجيبلكم فلوس اهه بس فلوس الاخره

ربنا يكرمنا كلنا والله

مستني ردودكم

تم تعديل 18 يونيو 2008 بواسطة kotb

[se_ Elsyed]

يا محمد المبلغ اللي إنت كاتبه ده .. صح ولا ناقص ولا إيه حكايته ؟

يعني هما ألف جنيه يعني باكو ولا إيه ؟

أصلهم لو ألف جنيه هاقولك جيب لك بيهم بنطلونين جينز وتي شيرتين وكل لك ساندوتشين شاورما وإنت راجع ..

انا مش باسخر منك والله .. لكن 1000 ج ما ينفعوش حتى تفتح بهم مشروع فجل وجرجير ..

---------

كنت هاتكلم معاك بقلب جامد لو كان عندك على الأقل 25 ألف ج ... وكنت هاقولك تعمل إيه وتروح فين .... وممكن بإذن الله الملبغ ده على ما تخلص جامعة يبقى ربع مليون لو إشتغلت صح .... أنا اعني ما قلته على فكرة بدون هزار أو تهريج او تهويل .. ....

روح بقى كمل عليهم 24 ألف وتعالى أقول لك تعمل إيه عشان تبقى راجل اعمال .... وهاتلي ساندوتش شاورما معاك من غير مايونيز ...

[kotb88]

طب المهم دلوقت الحافظة بتاعت البورصه بتبدأ من كام يعني اقل رقم ممكن اضارب بيه كام ....... وملكش دعوه ..... :h!!!h:

يا عم السيد مهو كل اللى بدأ بدأ بجنيه واحد وهو يعني ال25 اللى انت بتتكلم عنهم دول حيجو ازاى هلاقيهم مثلا منعقلها شوية طيب

المهم انا عاوز اعرف معلومات عن البورصه ممكن تفيدني ولا ايه النظام

وبعدين انت منين من انهى محافظه صحيح علشان قدام شوية كده لو بقيت مليونير ممكن اجى نتشارك انا وانت في بعض الاعمال :angrycop:

[red sea]

انت ممكن تشتري في البورصة باي مبلغ

بس خلي بالك في عموله على كل عمليه بيع أو شراء حوالي 0.5% (0.005) بحد ادني تقريبا 7 جنيه

كمان لما تشتري اسهم في شىء اسمه فترة تسويه لازم تعدي قبل ما تبعهم تاني ، بتكون في حدود يوم او يومين

ده موقع البورصة المصرية

www.egyptse.com

وفي موقع تاني عليه اخبار الشركات

www.mistnews.com

بس ده يحتاج اشتراك أو تدخل عليه من رقم انترنت مجاني معين

بس ده طبعا غير عشرات المواقع عن البورصة اللي تلاقيها لو عملت بحث في جوجل

على فكره هدفك مش مستحيل، لما تراجع اسعار الاسهم خلال الخمس سنوات اللي فاتت تلاقى ان ده كان ممكن يحصل

بس هو محتاج حاجه من اتنين يا حظ من السما

يا تكون بتعرف المستقبل

امانه عليك بعد 5 سنين تقول هنا في المنتدى انت عملت ايه ، واتمنى لك كل توفيق

تحياتي..

[Diab]

الاول: قل لي كيف اصبحت مليونيرا فجأة الثاني: ببساطة كان معي 5 دراهم فقط, اشتريت بهم 1 كيلو تفاح الاول: ثم ماذا الثاني: غسلتهم و مسحتهم و عرضتهم بشكل جيد فبعتهم ب 10 الاول: اوكى ثم ماذا؟ الثاني: اشتريت بال10 دراهم 2 كيلو تفاح الاول : جيد ثم ماذا؟ الثاني:غسلتهم و مسحتهم و عرضتهم بشكل جيد فبعتهم ب 20 الاول: عظيم , ثم كيف ؟؟ تاثاني: اشتريت بهم 4 كيلو تفاح الاول: رائع, ولكن ثم ماذا؟؟؟ الثاني: لقد توفي جدي وانا وريثه االوحيد

[kotb88]

ان شاء الله ربنا يكرمنا كلنا يا جماعه وان شاء الله لو بعد خمس سنين من دلوقت عرفت اعمل حاجه هتكلم هنا .... وبعدين انا عاجابني المنتدى وان شاء الله هكون موجود على طول

يا جماعه والله الموضوع مش صعب بس المشكله ارادتنا اللى عنده اراده هو اللى هيعدي

بس هو صحيح علشان اضارب في البورصه لازم يكون سني 21 سنه ...... اصل انا 20

ولو كده مش هتفرق اكيد في السنه دي هنعمل اي حاجه عقبال ما تعدى

بجد يا جماعه خدوها كلمها من عيل لسه صغير الوقت اهم شئ في الدنيا دى

انا مره سمعت قصه عن احد التابعيين كان بيقول لو الوقت بيشترا بالمال كنت اشتريته من العاطليين واللى قاعدين من غير هدف

ربنا يكرمنا كلنا ونحاول نغير حاجه في البلد دي كل واحد وله رساله معينه في الدنيا يارب نوصل رسالتنا على اكمل وجه

[kotb88]

الاول: قل لي كيف اصبحت مليونيرا فجأة الثاني: ببساطة كان معي 5 دراهم فقط, اشتريت بهم 1 كيلو تفاح الاول: ثم ماذا الثاني: غسلتهم و مسحتهم و عرضتهم بشكل جيد فبعتهم ب 10 الاول: اوكى ثم ماذا؟ الثاني: اشتريت بال10 دراهم 2 كيلو تفاح الاول : جيد ثم ماذا؟ الثاني:غسلتهم و مسحتهم و عرضتهم بشكل جيد فبعتهم ب 20 الاول: عظيم , ثم كيف ؟؟ تاثاني: اشتريت بهم 4 كيلو تفاح الاول: رائع, ولكن ثم ماذا؟؟؟ الثاني: لقد توفي جدي وانا وريثه االوحيد

حلوة اوى القصه دي بتثبت كلامى اللى بقوله عن الوقت بس المشكله انى ملاحظ ان في اخرها احباط شوية بس بجد قصه مضحكه حلوة والله

بس اخيناه لو فضل لمدة كام شهر يعمل اللى هو بيعمله ده هيعمل شوية فلوس حلوة وبعد كده هيبدأ يدور على التاجر الكبير بتاع التفاح وابو تلاته هيشتريه باتنين وكام شهر كمان او كام سنه وهيبدأ يدور على اراضي زراعية بتزرع التفاح نفسه وابو اتنين هيشتريه بواحد وكمان كام سنه او اقل هيجيب ارض زراعيه وابو واحد هيجيبه بشوية ماية وبذر

وبكده في ظرف ست سبع تمن عشر سنين اصبح اكبر تاجر تفاح في محافظته او في البلد

ولا انا غلطان يا معلمين

بجد لو لاقيتو اولادكم عندهم طموح متحبطوهمش حاولو تنموهم البلادى مش هتقوم غير على تعاقب الاجيال

تم تعديل 18 يونيو 2008 بواسطة kotb

[عادل أبوزيد]

العمل الحر هو بداية الإنطلاق فى مجال الأعمال ، و من الناحية التقليدية سينصحك الجميع بإكمال الدراسة و الإنتظار و أكيد أسهل قرار هو ألا تتخذ قرار و هناك مثل أجنبى معناه إذا أردت تعلم السباحة ... إسبح.

ما سبق كان إستهلالا لابد منه

بداية أهنئك و أطريك على تفكيرك و أتسائل فعلا ماذا يفعل طلاب العديد من الكليات و المعاهد طوال سنوات الدراسة الجامعية ؟ و هل هى صفقة عادلة أن تحصل على شهادة ورقية - دون محتوى تعليمى - نظير أربع أو خمس سنوات من عمرهم ؟

الطريق ليس مفروشا بالورود و لكن الطريق موجود

البداية أتصورها - و لست رجل أعمال - هى أن تتحسس السوق فى السبتية .. الحمزاوى .. المحلة الكبرى ... الموسكى إجلس على المقاهى و تعرف على الناس و أطلب مساعدتهم و إبحث عن الأفكار أطلب لقمة عيش و لا تعرض بداية أنك تملك ألف جنيه ..

يمكنك أن تشترى سلعة ما بمبلغ صغير و تبيعها إبدأ صغيرا و مع المثابرة و الإستمرارية و بذل الجهد و بذل الجهد و بذل الجهد و لا تتعجل البدلة المستوردة و السيارة و المحمول.

نموذج عبد الغفور البرعى يتكرر كل يوم.

و لك أن تحمد الله أنك تبدأ الطريق و هناك أب يقدم لك سقفا يأويك و يقدم لك مأكلك و مشربك و ملبسك .... الأشياء التى تكلفك الكثير لو لم تكن متوفرة لك.

أما موضوع البورصة فكما أفادك الفاضل س س هى للأموال الفائضة التى يسهل المغامرة بها.

[Alshiekh]

السلام عليكم

اولا انا اسمي محمد عندي 20 سنه

لسه طالب في كلية سياحه وفنادق

دماغى وجعتني من كتر ما بفكر في انى عاوز ابقا رجل اعمال

طبعا مفيش حد بيشتغل بشهادته ولو اشتغل هيدولو ملاليم

المهم انا بشتغل في سيبر ومعايا حوالى 1000 جنيه

الاول انى ابدا اضارب بالفلوس دي في البورصه فهل الرقم ده ينفع وكمان انا سمعت ان البورصه محتاجه واحد عنده 21 سنه

فياريت تقولولى ايه الحد الادني للفلوس اللى المفروض اضارب بيها وثانيا السن وثالثا علشان اتعلم صح ومحدش يشتغلني اعمل ايه واتعلم فين او من مين

التفكير التانى بقا كان انى بالفلوس دي اتاجر بيها في اى حاجه تقابلني يعني ابدا زي تاجر صغير اشتري وابيع من غير مكان ثابت او اتاجر في اي حاجه تقابلني

فهل ده افضل ولا البورصه افضل ولا ايه النظام حد يقولى يا بشمهندسين

وشكرا

محمد

لازم نتفق اولا على شوية حاجات

انت بتقول انك لسه طالب ، وامامك 3 سنوات دراسية ، وتعترف بأنك لن تعمل بشهادتك ، واسمح لى أن أسألك ، بتروح الكلية تعمل ايه؟ وايه اللى انت عايزه من الكلية؟ وليه مابتدرسش حاجة تتناسب مع العمل اللى انت بتحبه؟ حاتقول لى التنسيق هو اللى وداك سياحة وفنادق ، وانا حاقول لك طز فى التنسيق اللى حايضيع اربع سنين من عمرك لو كان الهدف انك تقول انا معاية شهادة بس مابتأكلش عيش ومش ناوى اشتغل بيها.

الدراسة المنتظمة والنجاح فى العمل فى آن واحد شيئ صعب جدا إن لم يكن مستحيل.

المطلوب إما أن تركز فى الدراسة وتتفرغ لها ، ويكون العمل شيئ ثانوى تمارسه متى اتيحت لك الفرصة ، أو تفرغ للعمل وكسب المال ، وعندما تشعر انك قد حققت ذاتك فى العمل ، يمكنك ان تنمى عملك بدراسات تخدم عملك وتجعلك قادرا على تطويره ، ومش لازم الدراسة تكون علشان الشهادة ، بل لازم تكون الدراسة استثمار يخدمك.

انت مثلا تقول انك تعمل فى سيبر.

ايه اللى انت اتعلمته من عملك فى السيبر؟ وهل لو بدأت فى مشروع ستترك العمل فى السيبر والذى اعتقد انه مصدر دخلك الوحيد؟

الألف جنيه اللى معاك ماينفعوش تبدأ بيهم فى البورصة ، لانك لو بدأت بيهم لازم تحط فى اعتبارك مصاريف السمسرة ، وقيمة وقتك الذى سيضيع مابين البنك ومكتب السمسرة والتليفون والمتابعة ، يمكن لو بتلعب فى مبلغ كبير ، ممكن يغطى تعبك ، لكن المبلغ الصغير صعب جدا ان يغطى مصاريفك اذا كان حظك حلو وحاتكسب كل يوم.

يمكن بالالف جنيه تنفع تشتغل بيهم تاجر سريح ، يعنى تشترى لك شوية بضاعة وتلف بيهم وتبيعهم وتشترى غيرهم ، وهكذا لغاية ماتلاقى انك ممكن يبقى لك مركز تستقر فيه وتدير منه تجارتك.

اذا ... حدد اولا انت عايز تكمل دراسة ، أم تريد ان تكون رجل أعمال.

[Tafshan]

العزيز محمد ..

استثمار وقتك في شئ مفيد مع الدراسه اتجاه احييك عليه .... بص يا سيدى ..

انت معك 1000 جنيه ... و المطلوب انك تعمل بيزنس .. و الاهم انك تنجع فيع .. التاجر الشاطر مش اللى يخاطر و يضيع فلوسه .. التاجر الشاطر هو اللى يكبر فلوسه و ما يضيعهاش .. دى اول قاعده ..

ثانى قاعده .. التاجر الشاطر لازم يبقى اكبر واحد في النشاط اللى اختاره في السوق بتاعه .. يعنى مثلاً لو بيبع تفاح .. يبقى اكبر تاجر تفاح في الشارع بتاعه او بمعنى اصح يستحوذ على اكبر حصه سوقيه للمنتج بتاعه ..

ثالث قاعده .. التاجر الشاطر لا يضيع فرصه تيجي قدامه

رابع قاعده .. التاجر الشاطر لازم يكون عنده شبكة علاقات كبيره و متنوعه ..

طيب ..

ازاى ممكن نطبق القواعد دى بالمعطيات اللى معانا .. لاحظ ان دائماً المصادر بتبقى نادره و دى قاعده اقتصاديه كلاسيكيه .. و بالتالى انت وضعك طبيعي بالنسبه لاى رجل اعمال ..

اولاً : انت بتشتغل في سيبر كافيه .. و طالب بالجامعه .. اذاً انت عندك شبكة علاقات كبيره جداً في مرحله عمريه من 16 ل 23 سنه ... هو ده سوقك المستهدف ..

ثانياً : بحكم شغلك في السيبر .. ايه حجم خبرتك في الكمبيوتر ؟؟ لو بتعرف في التجميع و التركيبات كويس ابدأ البيزنس بتاعك في بيع اجهزة الكمبيوتر .. ابدأ باللف على شركات الكمبيوتر و اتعرف على السوق عن طريق التليفون .. جمع المعلومات من معارض الكمبيوتر .. اجمع كل ما تطوله يدك من بروشورات و كروت .. و اجمعهم على ملف اكسيل و ابدأ العمل .. اسـأل بصوره دوريه على اسعار الاجزاء المختلفه في عدد من الشركات .. و فاصل .. و قول عندى سعر احسن لغاية ما تفلتر الشركات ل Dealer و Super Dealer ... من هنا ممكن تبدأ بيزنس صغير تنمى بيه علاقاتك مع الشركات و توصلك للمرحله التاليه و هى التعارف المباشر .. باختصار اشترى من الsuper dealer و بيع لل dealer .. طبعاً المكسب ح يكون قليل جداً في الاول .. لأنك ح تضطر تكسب 5 جنيه او عشره جنيه في القطعه .. لكن النتيجه هى اكتساب ثقة الشركات ..

المرحله الثالثه هى التسويق لنفسك بانك تقدر تجيب اجهزه او تصلح اجهزه .. و بالنسبه لك ح يكون التسويق اسهل لأنك اقرب للشباب و اقرب لطريقة تفكيرهم و اسهل في اكتساب ثقتهم .. اشتغل على علاقاتك و اتصل باصدقائك و عرفهم بالبيزنس بتاعك .. و مافيش مانع انك تطرح فكرة الكوميشن على اصحابك المقربين .. و لا تهتم كثيراً بهامش الربح .. فكر دائماً في الكميه .. ماتحاولش انك تحتفظ ببضاعه .. خليك دائماً بتشتغل بفلوس غيرك .. بمجرد انك تأخذ اوردر .. اطلب عربون و كمل من ال 1000 جنيه اللى معك و جمع الجهاز .. و دائماً افتكر ان ال 1000 جنيه دول رأسمالك .. يعنى ما ينفعش تصرف منهم الا على الشغل .. و انت تصرف من الارباح فقط .. مع تحديد نسبه مناسبه لزيادة رأسالمال .. على فكره .. انا عملت كده في فتره من حياتى و هى السبب في شغلى الحالى .. و على فكره .. ما كنتش بعرف اجمع كمبيوتر و لا اصلح .. كنت باخلى اصدقاء يعملوا الموضوع ده و كنت باديهم جزء من الربح لغاية ما اتعلمت منهم و بقيت باشتغل لواحدى ..

جرب .. و ربنا يوفقك .. و في نفس الوقت .. ماتنساش دراستك .. لأنها ح تزود مداركك و تنمى قدراتك ...

تحياتى

[ريمون]

البورصه كويسه لو معاك مدخرات طويله الامد (فلوس شايلها للمعاش مثلا و مش محتاجها دلوقتى) و بتجيب بيها اسهم محترمه فى شركات مختلفه بانشطه مختلفه (they call it diversify ) علشان لو واحده وقعت الباقى يشيلك. لكن المضاربه خطره طبعا. رياضيا انت الخسران فى الاغلب لان المبلغ اللى معاك محدود و لكن السوق غير محدود يعنى انت ممكن تفلس بس السوق مش هيفلس.

نصيحتى عموما بلاش المضاربه. اخرتها وحشه.

اللى فهمته انك بتشتغل فى سيبر. طب ليه ما تستثمرش وقتك فى تعلم كيفيه اداره السيبر و النتورك و كدا؟ ممكن تلاقى حد يشاركك فى سيبر هو بالفلوس و انت بالخبره! بس السؤال هل انت عندك الخبره علشان حد يئتمنك على فلوسه؟

[~Heba~]

ياربيييييييييي على الاحباط

ليه كدا يا سى السيد انت و الاستاذ محمد

احبطوا الشاب حرام عليكم

شوف يا محمد يا اخويا انت شاب كويس عندك رأس مال

سيبك من الالف جنيه مش هى رأس مالك

رأس مالك هو طموحك

انت عايز تبقى رجل اعمال و حتبقى كده فى يوم الايام طبعا بمشيئة الله

خلى هدفك قدامك متحدش عنه

و انت سنك صغير و قدامك الشباب كله بإذن الله

بالنسبة لدراستك هى هتنفعك متقولش مش هتنفعك

مش ممكن فى يوم من الايام تبقى رجل اعمال فى مجال الفنادق

يعنى انت حتستثمر فى حاجات كتير و ممكن من ضمنها مجالك الاساسى

بما ان فلوسك قليلة حاليا لكن مسيرها تكتر ان شاء الله فمينفعش تبدأ العمل الحر دلوقتى

اصبر شوية لغاية ما يبقى معاك مبلغ محترم و تكون اخدت خبرة فى مجالات مختلفة

انت دلوقتى تستغل فترة الصيف فى الشغل فى اى حاجة و فى كل حاجة بلاش تستنكف العمل مهما صغر

انت بتقول انك بتشتغل فى سيبر دلوقتى

مش فاهمه بتشتغل فيه بتركب شبكات يعنى و الا بتدير السيبر

اظن ادارة السيبر دى شغلة بسيطة مش بتدى الخبرة المطلوبة

انا دلوقتى عايزة اسألك سؤال هل مهارتك فى التعامل مع الناس كويسة

هل شايف فى نفسك المقدرة على العمل فى مجال خدمة العملاء

ده مجال ممتاز لبدء مستثمر لانك حتتعامل مع الناس و حتتعلم ازاى تكسب العملاء فلما تبدأ عملك الخاص لكن يكون هناك مشكله فى الترويج له و كسب ثقة الناس فيه

حاجة كمان لو فيه وقت فاضى استغله فى القراءة و الاطلاع فى مجالات الادارة و الاستثمار و ده هيساعد على تحديد المجال اللى حتبدأ فيه

[Alshiekh]

ياربيييييييييي على الاحباط

ليه كدا يا سى السيد انت و الاستاذ محمد

احبطوا الشاب حرام عليكم

ليه بس كده ياهبة ، إحباط ايه بس

لازم الامور تبقى واضحة ياهبة ، واكيد انتى عارفة يعنى ايه الف جنيه.

علشان اشتغل بألف جنيه لازم احط فى اعتبارى عدة نقاط ،

لو كان عندك وظيفة وحاتسيبيها ، يبقى لازم ربحك من التجارة اللى حاتبتديها تعوض لك المرتب اللى حاتفقديه من الوظيفة اللى سبتيها ، دى نمرة واحد

لازم التجارة دى تغطى مصاريفها ، لان اى تجارة لها مصارف خدمية ، يعنى لو حاتعملى اعلانات ، حاتركبى لها مواصلات ، حاتستخدمى لها تليفونات ، حاتجيبى حد يساعدك ، حاتحتاجى تأجرى مكان للتخزين ، كل الحاجات دى لازم تتحط فى الاعتبار ،

من الآخر لازم يكون فيه رأسمال معقول ، علشان البداية تبقى معقولة وماتخليش الواحد يزهق ويرجع تانى يبدأ من جديد.

وبعدين فى حاجة انتى مش واخدة بالك منها ، العناصر الثلاثة المطلوبة كبداية ليست متوافرة وليست هناك واحدة تغطى الأخرى

1- رأس المال غير متوافر

2- الخبرة ليست متوافرة بحكم السن ( عشرون عاما )

3- المركز الذى يدار منه البيزنيس ، لان ادارة البيزنيس من منزل الاسرة يكون بطيئا فى الغالب.

يعنى لو كان هناك عنصرا غائبا ، كان ممكن انه يعوضه ، لكن الثلاثة عناصر غائبة.

علشان كده لازم الكلام يكون صريح وواضح ، عايز تبدأ بالامكانيات اللى معاك يبقى لازم تعرف ان الطريق شاق وطويل ، والبورصة ليست واحدة من تلك الطرق.

[kotb88]

على فكرة بجد ردودكم كلكم كويسه اوى اوى اوى وفادتني جدا وخصوصا الاستاذ طفشان وهبه

كلامكم حلو اوى ومبني على دراسه

وانا على فكرة بشتغل في سيبر فعلا بقالى 3 سنين وعندي خبره كويسه عن الاجهزه سواء سوفت وير او هرد وير وبجمع وبركب اجهزه والالف جنيه دي من المهنه دي

ثانيا انا فعلا لما بكون فاضي بقعد اقرا في البيزنس والتسويق والكلام ده كله وكله تمام الحمد لله

ثالثا انا الحمد لله بعرف اعمل علاقات مع قطاعات وسعه جدا من الناس ومختلفه كمان وبعرف ازاى اكسب احترام اللى قدامى ليا من مصداقيتي معاه واسلوبى وده مش كلامى علشان محدش يفتكر انى مغرور ده من كلام الناس اللى حوليا واللى بتعرف عليهم كل يوم

رابعا انا عندي هدف يا جماعه وقريت كتير في حورات التخطيط وهدفك والكلام ده وعارف انتو بتتكلمو في ايه كويس اوى ولو عاوزني ارصلكم وارتبلكم التنمية البشرية كلها انا على استعداد

بالنسبه لموضوع الكليه متعتقدوش انى مش عاوزها او بقول انى زهقان بالعكس خالص يا جماعه انا عجبانى الدراسه فيها جدا وكمان بجيب تقديرات الحمد لله

بس انا مبقعدش اذاكر غير اخر شهر وبقية السنه مبعملش حاجه ....... وده بسبب الدراسه في بلدنا الكويسه فانا قولت حرام الوقت اللى بيضيع على الفاضي ده يعني ممكن استفيد بيه وكمان يا جماعه منا زي ما قولتلكم علشان ابدا اكون نفسي في سن التلاتين حرام يعني وبعدين كمان مواضيع الجواز والاهالى بقا عندها مستوى معين بنتهم لازم تعيش فيه والحورات دي كلها وطبعا كلكم عارفينها وبتمرو بيها كل يوم

المهم علشان مطولش بجد انا استفدت اوى من الكلام بتاعكم وخصوصا كلام طفشان باشا لانه كلام علمى جدا وانا بحب لما حد يتكلم معايا يتكلم معايا كده

على العموم كله تمام ولو عندكم حاجه تانية يا ريت تقولوها برضو

وبالنسبه لكل الناس اللى كانت بتقول مينفعش تعمل والكلام ده والله انا مقدر تفكيره اوى بس انا عاوز اقولكم ان بيل جيتس كان بيشتغل في بدروم بيتهم وبعد حوالى 10 سنين اصبح اغني رجل في العالم وكل اللى عمله انه كان عنده تفكير معين ومع السعي وصل للى هو عاوز ه واحسن كمان واللى عاوز يعرف هو عمل ايه انا ممكن اقولكم في المشاركه اللى جايه

يلا السلام عليكم ومستني مناقشتكم

ولا اقولكم هقولكم قصة بيل جيتس دلوقت علشان فلو في شاب عاوز يستفيد من الموضوع

بيل جيتس ده كان ولد عنده حوالى 20او 21 سنه اتفق هو وواحد صاحبه انهم يعملو سوفتوير معين للكمبيوتر وايمها الكمبيوترز اللى نازله السوق كلها كانت شغاله بنظام الدوس فالمهم قعدو لمده حوالى سنتين او مش عارف كام بالظبط بيظبطو النظام ده وكل ده كان في المرأب بتاع بيت بيل جيتس ابوه ادلهم الجراج بتاع البيت يعني يشتغلو فيه وبعد شوية شركة كمبيوتر كبرى او بيتهيئلي كانت هى الشركه الام نزلت عطاء قالت فيه عاوزه شركه من شركات السوفت وير تصمم نظام جديد للكمبيوتر يسهل استخدامه ونقل وحفظ البيانات فالمهم دخل كام شركه كده ومن ضمنهم بيل جيتس وصحبه فالشركه الام فكرت تفكير كويس لما لاقيت بيل جيتس وصاحبه داخلين العطا قالت نرسي عليهم العطا لان دول ولدين بس يعني الفلوس اللى هتدفعهلهم الشركه اقل بكتير من الفلوس اللى هتدفعها لاى شركه من الشركات اللى هتمسك الحوار ده وطبعا كان تفكيرهم صح ليهم وكان صح لجيتس هو كمان ... المهم بدأ بيل جيتس يتعامل في المشروع وشوية وصاحبه ده عمل مفتح لاقا نفسه لام قرشين قال كفايه كده وفك الشركه مع بيل جيتس وبعد حوالى عشر سنين اصبح بيل جيتس اغني رجل في العالم وانا بيتهيئلي انه نمى استثماراته عن طريق شراء اي سوفت وير جديد يخترع من قبل اى حد زي الهوت ميل والكلام ده كله لغاية لما بدأ في عمل مجموعة شركات كويسه يعني

بس ادى كل القصه فلكل الناس اللى بتحاول تقول مش عارف مينفعش تبدأ ومينفعش تعمل والكلام ده كله اقولهم مفيش حاجه اسمها مينفعش او مستحيل فيه حاجه اسمها انا ممكن اموت نفسي علشان اوصل وحاجه تانية اسمها معلش مش هينفع اكمل علشان كسلت او خوفت

ولو في اى كلام تانى انا مستني اضافاتكم

[~Heba~]

انا معنديش شك انك بتمتلك قدرات كويسة يا محمد و واضح ثقتك فى نفسك

ده موقع كنانة اونلاين شوف المشروعات الصغيرة فيها

حتلاقى مشاريع بعيده خالص عن شغل السيبرات نقى اللى يناسبك

بس زى ما قلنا ده بعدما تكون زودت رأس مالك شوية لان الف جنيه مش كفاية

و ممكن تفكر فى اخذ قرض انما دى مجازفة

او تشارك مع اصدقاءك

[م.سامح المصرى]

السلام عليكم ورحمة الله وبركاتة

احييييييييييييييييييييييييييييييييييييييييييييييييييييييييييييييييييييييييييييييييييك يا محمد

وبجد ربنا يكتر من امثالك ..... بص يا سيدي احنا يعتبر فى سن بعض تقريباً

بص يا سيدي سيبك من البورصة لانك لو دخلت فيها وفى متاهتها هاتخرج اول ما تدخل على ما اعتقد

وغير كدة عيزالها رأس مال كبير .... احسنلك تبقى تاجر شاطر

انا ليا واحد صاحب اخويا بدأ بأنة يلف على الورش الى بتعمل الحزمة الجلد

ويعمل اشكال وكدة وبيلف بيها على المحلات دا كان من اربع سنين باين

دلوقتى عندة حوالى 4 محلات ملابس جاهزة بسم الله ما شاء الله علشان كان شاطر ومركز فى شغلة

انتا ركز فى مجال انتا عايز تكون فية حاجة حبك للمجال دا هايخليك فى مكانة كبيرة جدا وفى الوقت الى انتا عايزة

وانا عندى ليك مشروع جميل جدا وفى مجالك السياحة والفنادق

لو انتا قسم مطبخ فى حاجة انا شوفت شباب كان بيعملوها

كانوا بيعملو اية بيستنضوا قهوة بلدى تكون فى مكان كويس وفى ناس كتيرة وكدة

اوكى ويجيبو البتاعة الى بتعمل الكبدة والسجق والهمبرجر والحاجات دى كلها وبتعمل شغل

احنا كان جنب الشركة الى كنت بشتغل فيها كانت كدة وكان فى ناس بتجيلة علشان تاكل عندة

بس بيتفق مع صاحب القهوة على مكان صغير يحط فى حاجتة وعلى فكرة مشروع جميل جدا وبرأس مال صغير

اى مشروع يا محمد تأكد ان فية تلف يعنى بعض من الخسارة اكبر شركات العالم كانت بتخسر مش فشل منها بس تعتبر طبيعة العمل

شركة والت ديزنى بجلالة ادرها وقعت ست مرات فأنت علشان تبقى تاجر شاطر تعرف اية الى جاب التلف دا لمشروعك وتحاول تتجنبة

لو انتا عندك خبرة فى الصيانة والكمبيوتر بيع وصيانة وكدة انا ممكن ادلك على كام شركة تجيب منهم الاجهزة بمواصفات خيالية وبسعر خيالى

ولو هاتبيع الجهاز هاتكسب فية مكسب كويس بس شوف انتا هاتنجح فى اى مجال وتوكل فية انا ممكن اعرفك على صاحب اخويا دا وتعرف منه كل

حاجة عن المشروع الى هوا بدأ بيه لو تحب

وخلى قلبك جامد وخش فى الشغل وما تخافش

يعنى لو الفلوس صغيرة حطها فى الشغل وتيقن انها هاتكبر بأمر الله

محمد

لازم نتفق اولا على شوية حاجات

انت بتقول انك لسه طالب ، وامامك 3 سنوات دراسية ، وتعترف بأنك لن تعمل بشهادتك ، واسمح لى أن أسألك ، بتروح الكلية تعمل ايه؟ وايه اللى انت عايزه من الكلية؟ وليه مابتدرسش حاجة تتناسب مع العمل اللى انت بتحبه؟ حاتقول لى التنسيق هو اللى وداك سياحة وفنادق ، وانا حاقول لك طز فى التنسيق اللى حايضيع اربع سنين من عمرك لو كان الهدف انك تقول انا معاية شهادة بس مابتأكلش عيش ومش ناوى اشتغل بيها.

الدراسة المنتظمة والنجاح فى العمل فى آن واحد شيئ صعب جدا إن لم يكن مستحيل.

المطلوب إما أن تركز فى الدراسة وتتفرغ لها ، ويكون العمل شيئ ثانوى تمارسه متى اتيحت لك الفرصة ، أو تفرغ للعمل وكسب المال ، وعندما تشعر انك قد حققت ذاتك فى العمل ، يمكنك ان تنمى عملك بدراسات تخدم عملك وتجعلك قادرا على تطويره ، ومش لازم الدراسة تكون علشان الشهادة ، بل لازم تكون الدراسة استثمار يخدمك.

انت مثلا تقول انك تعمل فى سيبر.

ايه اللى انت اتعلمته من عملك فى السيبر؟ وهل لو بدأت فى مشروع ستترك العمل فى السيبر والذى اعتقد انه مصدر دخلك الوحيد؟

الألف جنيه اللى معاك ماينفعوش تبدأ بيهم فى البورصة ، لانك لو بدأت بيهم لازم تحط فى اعتبارك مصاريف السمسرة ، وقيمة وقتك الذى سيضيع مابين البنك ومكتب السمسرة والتليفون والمتابعة ، يمكن لو بتلعب فى مبلغ كبير ، ممكن يغطى تعبك ، لكن المبلغ الصغير صعب جدا ان يغطى مصاريفك اذا كان حظك حلو وحاتكسب كل يوم.

يمكن بالالف جنيه تنفع تشتغل بيهم تاجر سريح ، يعنى تشترى لك شوية بضاعة وتلف بيهم وتبيعهم وتشترى غيرهم ، وهكذا لغاية ماتلاقى انك ممكن يبقى لك مركز تستقر فيه وتدير منه تجارتك.

اذا ... حدد اولا انت عايز تكمل دراسة ، أم تريد ان تكون رجل أعمال.

استاذى الجميل محمد

حضرتك اغلب الشباب ما بيشتغلوش بالشهادة الى هما بياخدوها لانهم اساسا ما بيعرفوش الى بيدرسوة

ودا خصوصا فى المعاهد الخاصة الشباب رايحين يقضوا وقت ظريف

والى بيشتغل بيشتغل فى مجال تانى خالص

هانروح بعيد لية انا بدرس علوم حاسب الى برمجة

وبشتغل فى مجال تانى خاااااااااااااااااااااااااااااااااااالص خالص

بعيد كل البعد

اغلب الى معايا فى المعهد ال بيشتغلو بيشتغلو حاجات تانية خالص غير الى احنا بندرسة

لاننا مش فاهمين الحاجات دى

احنا عارفينها نظرى والنظرى مش كل شئ

لازم علشان انزل اشتغل فى السوق وادوس فية اكون ادربت على الحاجات دى عملى فى شركة تكون شغالة فى المجال

علشان لما انزل السوق واشتغل فى شكرة محترمة اقولهم اه انا كنت شغال فى المكان الفولانى واخدت خبرة من هناك

وعلى فكرة فى واحد بكالوريس تجارة كان جى الشركة يعمل تست مصمم جرافيك

وكنت شغال مع واحد فنون تطبيقية مصمم جرافيك

وكنت شغال مع واحد معاه بكالوريوس حقوق مصمم جرافيك ودلوقتى هوا فى الامارات

الشباب دلوقتى بيدخلو المعاهد علشان يتجنبوا شر الجيش والافترا الى بيحصل فية

او مدتة ...... وعلشان يبقي معاهم شهادة

يعنى انا داخل المعهد علشان الشهادة

مش جهل منى ...... لا لانى عارف ومتيقن انى مش هاعرف اول ما اتخرج اشتغل بالى درستة

ودا الى ربنا كرمنى بية شغلانة كويسة وانا بدرس

وهوا لما يشتغل شغلانة كويسة وهوا بيدرس يبقي كويس جدا

لانه لما يتخرج هايكون معاه خبرة فى مجال معين ويبدأ مشروعة

مش يستنى لغاية ما يتخرج وبعد كدة ياخد فترة تدريب

وبعد التدريب اختبار وبعد كدة يشتغل .......... فدا موال طويل شوية ما بقاش ينفع فى جيلنا دا

وسلامى لك يا محمد وما تنساش صلاة الاستخارة وتوكل على الله :) :roseop: :wub:

تم تعديل 18 يونيو 2008 بواسطة م.سامح المصرى

[ziad]

هحكيلك قصه حصلت قدام عينى,شاب عنده 30 سنه,كان بيشتغل على كاشير فى سوبر ماركت فى الزقازيق عند واحد قريبى,شاب محترم متعلم وكان مرتبه مبيعديش 500 جندى فى الشهر لما يتمعظم,طلب منى ألف معاه عشان بيفكر يعمل ماركت صغير,شوفنا كذا مكان وحسيت أن ربنا هيكرمه,نزلت المره الى بعديها,لقيته أجر سوبر ماركت لنفسه فى مكان من الى شفناهم,وأخد قرض من الصندوق الأجتماعى وبقاله شهرين بيسدد ضعف المبلغ المطلوب عشان يخلص من القرض فى أسرع وقت,أنت صغير وسنك يسمحلك بحاجه مماثله,لو فى السنتين الجايين عرفت تبقى صبى فى شغله بعينها,زى مثلا كاشير الماركت كقياس مش أكتر,هتعرف الموزعين وطرقهم,طرق حساب الأسعار وأزاى تجيب مكسبك,أفضل مكان تبدأ فيه,كده وبعدين كبر محلك,ونصيحه أتقى الله وإبعد عن شبهة الحرام فى أى حاجه,وأتأكد من أن تعبك هو رأس مالك

[om marawan]

طبعا انا باحيى حماسك جدااااااااا ربنا يوفقك يارب عندك اصرار وعزيمة انا واثقة انها ثروة لوحدها زى ما قالت هبة

لازم كمان تكمل دراستك لأن هبة قالت ملاحظة هايلة انك ممكن تكون رجل اعمال فى مجال دراستك وانا من أنصار دمج الدراسة بالخبرة ... معلش يمكن يكون فى ناس كتير مش بتشتغل فى دراستها بس فى يوم من الايام هتفيدك

كمان طبعا شد حيلك وحوش فى الفترة دى مبلغ اكبر اكيد هيريحك جدا

وكل الزملاء الافاضل اللى نصحوك بالتأنى مش بيقللوا من حماسك خاااااالص ولا يقولوك مش هينفع بالعكس هم بس بيحطوك على أرض الواقع لأن مهم جدا نحلم حلم كبييييير لكن واحنا بنسعى لتحقيقه نبقا شايفين الواقع بعين مدققة جدا ودى من مقومات النجاح

لأن اهم حاجة نقدر نحلل كويس نجاحاتنا وعثراتنا وخبراتنا وقدراتنا وهو ده اللى بيخلينا نطلع لقدام ومهم اى حاجة تدخل فيها تسأل كويس جدا وتعمل دراسة جدوى وتدرس السوق اللى هتدخل فيه من كل نواحيه

حاجة كمان ماتهملش موضوع الدراسة والكورسات لو لقيت لها فرصة لأن فلوس الكورسات دى فلوس بتجيب فلوس أكبر منها يعنى استثمار مهم جدا فى نفسك

يعنى لو مش هتشتغل فى مجال دراستك يبقا تدرس كويس فى المجال اللى هتشتغل فيه الدراسة هتخلى نجاحك بدون سقف

يعنى مش هتقف عند انك بقيت تاجر شاطر وخلاص لأ تقدر تبقا أكبر وصاحب شركات ........ بجد ربنا يوفقك

انت طبعا أكيد عاوز تبقا بيل جيتس مش عبد الغفور البرعى مع احترامى الكااااااامل للنموذج ده لكن انت عندك مقومات مبدئية تخليك أحسن كمان من كده

فكرتنى باخر جملة قالها محمود عبد العزيز فى مسلسل محمود المصرى

" كل واحد على قد حلمه لو حلمك تلبس بدلة جديدة هتلبس ....... انا بقا حلمى كان انى ألمس النجوم بايديا :) "