أنا وال Corolla ........مأساة حوادث مبتنتهيش !!!!

[badroora]

البداية .......كانت فى حلم صعب تحقيقه حينها .

كنت وانا صغيرة البنات تحلم بعروسة تحلم بلعبة وانا احلم بعربية بتاعتى واقوم من النوم

واقول لابويا انا عاوزة عربية , ابويا يقولى انتى كبرتى على اللعب اقوله لا يا ابويا عاوزة

عربية اسوقها بحق وحقيقي مش مجرد لعبة .

ابويا كان حنين قوى جدا يقولى يا شيخة مش لما الاقي اكلكم واشربكم ابقي اجبلك عربية

.........ابويا صدمنى وقتل حلمى .

ولكن طول ماحنا بنام عمر الاحلام ما تضيع وظل يكبر معايا الحلم ويتكرر اقول لامي

امى تسأل المفسرين يقولولها بنتك هتتجوز ودا تفسيره انها هتقود حياتها .

امى بقي تقولى مبروك هتتجوزى اقولها يا امة جواز ايه بقولك هاموت واجيب عربية تكلمنى فى الجواز .

المهم فقدت الامل ان اهلى ممكن يحققولى حلمى ,قولت لابويا عاوزة ميراثي فى الارض

وانا اتصرف فيه .

وابويا من حنيته شخط في شخطة لزقنى فى الحيطة وقالى معنديناش بنات تورث ارض

وكمان هتورثينى بالحيا .

ابويا وقف فى طريق حلمى .........ولكن هل حلمى وقف ؟ هل بطلت احلم .؟ طبعا لاء

ازاى ابطل احلم وانا بنام اكتر من 12 ساعة فى اليوم .

لما كبرت واشتغلت اثناء الدراسة بقيت احوش ووقعت فى حب السيات وكان اقصي حلمى

انى اجيب سيات بس مش زى بتاعة جارنا اللى بتمشي بماية بسكر ولو زود عن الواحد توقف .

كبر الحلم جوايا وجمعت مبلغ 6000 جنية مصرى وكان هيغمى على انى عندى المبلغ دا ..

من فرحتى وخبتى قولت لابويا عن عندي 6000 جنية وهاجيب عربية ابويا من حنيته

وطيبة قلبه عربية ايه اللى هتسوقيها معنديناش بنات تسوق .!!!

قولت ابويا دا هيجننى وبما انى كنت كدا كدا عايشه لوحدى ومش بيشوفنى غير كل خميس

وجمعة انا اجيب العربية ومش هاقوله وبعدين يوم لما اروحله ابقي اروح بموصلات عادية .

فكرت ودورت ووقعت فى حب سيات اصفر فاقع قولت اهى تزغلل العين ومحدش هيركز

وقبل ما اروح اتفق.

اتصل ابويا مبروك اختك جالها عريس قولت انت بتتصل بي عشان انا الكبيرة يعنى

وبتستأذنى انى اختى تتجوز قبلي ....عادي ربنا يسلها انا لسه بدرى على خلينى استمتع

بالحياة شوية

قالى لا انا محتاج المبلغ اللى معاكي استر به اختك ........وانا من حنية قلبي ضحيت

بحلم السنين فى سبيل استقرار اختى وتحقيق اجمل حلم فى حياة اى فتاة غير الكترونية .

وابويا من حنية قلبه اجهضلي حلمى الاول قبل الولادة بيومين .!!!

يُتبع

تم تعديل 19 يونيو 2008 بواسطة Badria Mekkawy

[badroora]

خلاص الفقر وداعته ............ :wub: ..

اتجوزت أختى وابويا قالى والله يا بنتى فلوسك دى مش هانساها قولتله يا ابا عادي

ابقي ردهم بعدين برقلى بعنيه وقالى انتى هتقبلي العوض.

قولتله ليه هما ضاعوا دانت سترت بنتك بيهم قالى هابقي اتوصي بيكي فى الميراث

بعد عمر طويل ان شاء الله .

أحبطنى واستعوضت ربنا فى فلوسي !!!

اتخرجت وحسيت ان المستشفي اللى كنت شغاله فيها مبقتش تناسبني روحت اشتغلت

فى تانية فى 6 اكتوبر يقولون اكبر مستشفي فى الشرق الاوسط.

المرتب صدمنى اول مرة فى حياتى اقبض 1500 جنية كان هيغمى على لحد اول كام

شهر وبعدين حسيت انهم زيهم زي ال400 جنية اللى كنت بتقضاهم فى العمل السابق.

لان سبحان الله ربنا بيفتح ابواب على قدر الرزق اللى بيدهولك .

وطبعا هنا الحلم تطور مش معقول يعنى حلمى ايام 400 جنية هيبقي نفسه وانا باخذ 1500جنية . :wub:

افتريت من الغنى الفاحش والنقلة اللى اتنقلتها بسرعة وكبر الحلم وقررت اجيب فيات

127 موديل السبعينات :wub:

وطبعا انا اتقرصت من ابويا وبقيت اساعده بمبلغ معين ومقولتلوش انا باخد كام ولا

بحوش ولا لاء معلش يعنى انا دا ابويا وانا عرفاه .

وكمان مكنتش عايشة معاه ويوم الاجازة كنت بنامه من اول اليوم لاخره ومكنتش

باحكي معاه وكنت بادعى الفقر قدام امي عشان عارفه انه كان مجندها تعرف اخباري

شوفت عربية فيات موديل 78 يعنى انا اكبر منها بسنه وكانت استعمال طبيب بن

طبيب وربنا فتحها عليه وكان هايغير ل فيات 132 . :)

وقالى تمنها 12000 جنية عشان حالتها كويسة ومن هنا لهنا وصلناها ل 10000.

وقولت هانزل اجازة عند اهلى عشان محتاجة ورق يخصنى عشان التسجيل والترخيص والذي منه.

اليوم دا اتقدم عريس لاختى رقم 3 .عشان رقم 2 اتجوزت وابويا بقي رفضه ليه

رفضته اصله مستعجل وعاوز يتجوز خلال شهرين واختك لسه ناقصها حاجات كتير.

قولتله طيب ما تبيع ارض ابويا بقي ممكن يفرط فى عيل من عيالة ولا يفرط فى شبر ارض .قالى لاء الارض عرض :sad:

المهم لاقيت اختى زعلانه عشان هى كانت بتحبه واتفقوا انه يتقدم واتقدم وابويا اللى واقف هو الصراحة الظروف اللى كانت واقفة مش ابويا .

قعدت تانى وفكرت العربية ولا اختى تاخد اللى بتحبه ... ......طبعا قولت اختى تاخد

اللى بتحبه . :wub:

واديت لابويا ال8000 جنية يكمل جهاز اختى وضربت على ال2000 قولت احوش

عليهم تانى عشان اجيب العربية اللى باحلم بها

يُتيع

تم تعديل 18 يونيو 2008 بواسطة Badria Mekkawy

[ابو جيداء]

انحنى امامك لصراحتك الشديدة يابدرية

متابع اكملى

[kokomen]

شوقتيني يا بدرية .... لسه مجبتيش العربية ........؟؟؟؟؟؟

يتهيأ لي أن العنوان ده ينفع اسم فيلم أو مسرحية ....!!!!!؟؟؟؟؟

بس والله أصيلة وحنينة على أخواتك ... ربنا يكرمك ويوفقك

في عريس أبن حلال يسعدك لأنك تستاهلي كل خير

في إنتظار بقية القصة الجميلة

تم تعديل 19 يونيو 2008 بواسطة kokomen

[م.سامح المصرى]

يا قلبك يا بدرية

انتى صبورة جدا جدا

مش صبورة بتاعت الكاتبة

لا صبورة يعنى صابرة اوى كام سنة وكل دا علشان عربية

كنتى اجريها وريحي نفسك لغاية ما ربنا يكرمك بس بجد انتى صريحة ودا جميل اوى

انا مستنى الباقى وربنا يا رب يسعدك كدة وتتهنى بعربية بنت حلال

[badroora]

الاعزاء ابوجيداء ..........الجنرال منجار ابو احمد ..........اخى الصغنون سامح

شكرا على متابعتكم وتعليقاتكم الجميلة ................ :happy:

[badroora]

والتانية اتجوزت ... :winner:

ومازال حلمى قائم برغم الظلام المحيط به ولكنى كنت متفائلة انى هاحققه ان شاء الله .

الحمدلله الاختين اللى بعديى على طول اتجوزوا والولدين صغيرين وهوبا فلذة كبدي رقم 3 بالمناسبة

هتتجوز اول الشهر القادم . بس وقتها كانت صغيرة .

طبعا اصحابي فى الشغل كانوا معايا فى كل الاحداث وكان معانا دكتور كان هيغير عربيته فعرض على اشتري عربيته.

قولتله كل اللى حيلتى000 3 جنية ومعرفش ابويا ناويلى على ايه تانى ,قالى لا استنى هنعمل جمعية وهتخديها

الاول وتسددى تمن العربية .

العربية كانت فيات 128 بس كانت كئيبة اوى مرة خدنى فى طريقه لميدان لبنان وصلنا فى ساعة وكأننا كنا راكبين جمل .

بس انا مش مشكلة عاوزة عربية والسلام قالى ب 13000 جنية مصري قولتله لا افتح الله معنديش

فلوس طبعا لكل دا من هنا لهنا وصلناها ل 9000 .

المهم راح ذاع فى المكان ان زويل مزنوقة فى مبلغ ضرورى ولازم نعمل جمعية عشان نساعدها ,

زويل دا طبعا كان اسم الداكترة بينادونى به .

فى الاول كنت فاكرة عشان عبقريتى يعنى بس هما مخلصهمش انى اكون مخدوعه قالولى اصلي اشبه احمد زويل .

هو اتنقل من طنطا لاميريكا وانا انتقلت من النجع للمستشفي دى يعنى اعجاز .!!!

المهم البنات وحنية قلبهم بدري معقولة مزنوقة .........معظم الناس كانوا بينادولى بدر او بدري .

المهم لمولى الجمعية ودخلت باسمين يعنى 8000 وانا كان معايا 3000 قولت كدا تمام .

يوم ماقبضت الجمعية كان الدكتور دا شغال معايا وكنا خلاص متفقين انى هاخد عربيته وهاديله المبلغ حته واحدة .

طلعلنا بتاع الامن اللى كان شغال فى المستشفي وقاله سمعت ان حضرتك هتبيع عربيتك قاله اه

قاله عاوز فيها كام قاله 16.000 جنية مصري فى الوقت دا كانت العربيات فى مصر سعرها ارتفع مرة واحدة .

قاله من هنا لهنا هاخدها ب 13000 جنية وفلوسي جاهزة طبعا باقي الزملاء نادونى يا زويل يا زويل خيانه الحقي بسرعة .

روحت قالى انت طبعا ترضالى الخير صح قولتله على حسب قالى انا جالى زيون للعربية وهيدفع فرق

عنك 4000 الف اقوله لاء .

قولتله طبعا تقوله لاء لان عربيتك متستهلش اكتر من 600 جنية ودا حرام وكمان انت عشمتنى .

واحتد الحوار بينا وسابنى ومشي وراح روح ........وانا بقي بغل من جوايا يعنى هو انا كل خرابة يطلعى فيها عفريت .

خواتى اتجوزوا وابويا ناسينى المرادى يجي هو بقي اللى يوقف البيعة . :happy:

مافيش نص ساعة تليفون بسرعة حد ينزل الطواريء الدكتور بتاعكم عمل حادث على المحور والاسعاف جابته.

انا بقي يا لهوى ليفكر انى دعيت عليه ......طبعا الكل جرى يشوفه وانا مقدرتش حسيت انه ممكن يقولى انا السبب.

هو بقي قولوا لزويل يسمحنى ربنا جزانى والكل قالى انتى دعيتى عليه .

وعربيته للاسف منفعتش وانباعت اسكرب تقريبا ب 600 جنية بردوا .

ومن بعدها قررت انى مش هاشترى عربية فى مصر لان ربنا مش رايد قولت خلينى استنفع بالفلوس اللى معايا

وخلاص ..........بعدها بسنه تقريبا سافرت الى البحرين .............ومازال الحلم قائم وكنت باحلمه شبه يوميى.

ونكمل بقيت الحلم فى البحرين ..............تابعونا .........فاصل ونواصل .......

[badroora]

الحلوة خوخة جت بعد دوخة ................ :happy:

سافرت الى بلد النفط حيث تحقيق الاحلام .......وطبعا كالعادة الحلم ايام 1500 جنية غير الحلم بالدينار .!!!

انا يا دوب دبت رجلى فى البلد وبدأت اسأل هنا وهنا على العربيات والنظام وكدا يعنى ..

قبل ولاد الحرام ما يعرفونى طرق البنك والقرض والحاجات دى قولت هاحوش واجيب سيارة مستخدمة لحد ما تفرج.

وكانت هوايتى تجميع اى مجلة خاصة بالسيارات وغير النت مكنتش باسيب ويب سايت من غير ما اتصفحه.

خرجت بكم لا بأس به من المعلومات وعرفت ان فى حاجات تانى غير السيات والفيات وادركت ان الرب

مكنش عاوزنى اجيب عربية اى كلام عشان كدا موفقنيش فى اللى قبل كدا.

هنا بقي ماشاء الله عرفت ارقى انواع السيارات من إيكوا لترسل ل كراون لمسميات كدا ماشاء الله

والعربية كان يبقي طولها مترين وبحوالى 300 او 400 دينار .......فرحت جدا وقولت ياه انا ممكن اشترى 3 عربيات وابدل بينهم.

العربية كانت بالنسبة لى ماهى الا كاسيت بسمعات كويسة وايكليزر وشكلها حلو ونظيفه وفى الخليج نضيف عليها تكيف قوى.

كنت كل ماشوف عربية شكلها حلو وبكاسيت حلو اقع فى غرامها لحد ماسأل واعرف سمعتها البطالة

فى المرور وانها اعوذ بالله كانت ايجار مش تمليك .

وظل الحال على كدا كل عربية اقع فى حبها يطلع مشيها بطال ولها سجل فى بوليس المرور من حوادث لمخلفات .

وانا قولت لا هى العربية ايه غير سمعة . رفعت ايدي خالص عن المستخدم وقولت لاء اجيب عربية جديدة .

وادفع اللى معايا مقدم والباقي تقسيط تقسيط وعلى الاقل هاكون انا اول مالك وعارفه عنها كل كبيرة وصغيرة .

ربنا سهل الامور ودى كانت اول مرة مشروع عربية يمشي بدون عرقلات يعنى الاجراءات كلها خدت وقت

قياسي .وجبت كورولا 2005 ع الزيرو

ولكن .!!!!!!!! هل نجفة من المحظوظين اللى الامور بتمشي بسلاسة معاها .......طبعا لاء لست انا.!!

المرور بقي عقدونى فى عشتى كأن مرعى بتاع الكِلما كان موصيهم يئرفونى من بداية مدرب السياقة

لحد للى بيمتحنى ......سقطونى مرتين فى الامتحان :winner:

وكنت طبعا استلمت السيارة وركناها لحد ما تفرج ..وطبعا انا يبقي عندي عربية مركونة واروح الشغل

بالباص اللى بيلف البحرين كلها ويلم الهنود من مناطق غريبة.

والله كنت باروح الشغل مريضة من الباص بسبب اللف والقاعدة مع الهنود فى مكان مغلق ساعة ولا اكتر

وانا مش واخدة ع البهدلة فكنت بامرض بسرعة.

قولت صحتى ولا المرور ........طبعا حنية قلبي اخترت صحتى . وسوقت السيارة شهر كامل بدون رخصة .

الكل بقي دى فيها غرامة وانا اطنش دى فيها حبس وانا ولا انا هنا وبالعكس الشهر الوحيد اللى سوقت فيه سيارة بدون حوادث.

يوم الامتحان الاخير روحت المدرسة بعربيتى وركنتها خارج المدرسة خوفت ادخل بها مطلعش .

المهم الحمدلله نجحت وامتحانى كان قصير جدا تقريبا نجحونى تزكية عشان عشرتى معاهم.

الناس بتستلم الرخصة فى نفس اليوم ..........هل انا زى الناس والامور تمشي

طبيعى .....طبعا لاء عيب

دانا والنحس بينا عشرة سنين. قالى اليوم الخميس نص يوم خدى ورقة النجاح اهى

ويوم السبت ابقي روحى طلعى الرخصة .

طبعا انا ملتزمة جدا وبطبق القانون ......قولتله هل يصير اسوق بالاستمارة دي قالى لاااااااااااااااا

اصبري يا الشيخة لما تعملى الرخصة لو اتمسكتى بدون رخصة هتتوقفى سنه بدون رخصة.!!!

طبعا ولا همنى من كلامه انا اساسا باسوق بدون استمارة نجاح ولا همنى فهل

من المعقول كلامه هيأثر في بالطبع لاء.

قضيت الخميس والجمعة فى اغانى عبدالحليم والناجح يرفع ايده وقولت خلاص هاودع القلق

والخوق وكلها يوم وابقي معايا اقوى سلاح يحمينى من غدر المرور.

يوم السبت .......المكان مركز المرور والتراخيص وطبعا وصلت بعد لف ودوران وشغلانة كنت

وقتها ساكنة فى المنامة ومكنتش اعرف غير طريق المستشفي والبيت .

محافظة من البيت للمستشفي ومن المستشفي للبيت .!!

طبعا الناس بتدخل تقدم الاستمارة وصورة وتقريبا مش فاكرة كام و30 دينار

وتاخد الرخصة .....ولكن هل انا زيهم .

طبعا لاء هما حاجة وانا حاجة تانية خالص!!!

وانا بادخل من بوابة المرور دخلت فى تريلا كانت واقفة قدامى ..........ودا كان اول

سابقة لى فى عالم الحوادث .

وفين فى عقر دار المرور وكمان عربية من عربيات المرور......وهنا بقي التتار هجموا على ومعرفش

طلعولى مين حسيت كأنه كمين معملولى ولا حد مبلغ عنى وكلهم فى بوء واحد ايه

يال الشيخة ....دا مش تركزى .....

فاصل ونواصل ......

تم تعديل 19 يونيو 2008 بواسطة Badria Mekkawy

[النيل حبيبي]

ماشاء الله عليكي ياريت لون العربيه يكون أحمر

إن حظي كدقيق فوق شوك نثروة

قالوا لحفاة يوم ريح اجمعوه

ان من اشقاة ربه كيف انتم تسعدوه

على العموم اهم حاجه انك بخير

تم تعديل 19 يونيو 2008 بواسطة النيل حبيبي

[badroora]

للاسف يقولون دهبي مع انى عمرى ماشوفت اى حاجة فيها تدل على اللون انا اقولهم طحينى ولا كاكى وهما ابدا دهبي

قولت خلاص هما ادرى دهبي دهبي

حلو المثل بتاعك دا اللى يوجع القلب

إن حظي كدقيق فوق شوك نثروة

قالوا لحفاة يوم ريح اجمعوه

ان من اشقاة ربه كيف انتم تسعدوه

آآآآآآه آآآآآآآه :happy:

تم تعديل 19 يونيو 2008 بواسطة Badria Mekkawy

[مصري أصيل]

بجد و الله هلكتيني من الضحك ...

أسلوب ساخر و جميل و صراحة متناهية ...

لا الصراحة المنتدي فيه مواهب كتير مش حاسه بنفسها لو كتبت في أي جريده أو مجله و الله هتكسر الدنيا.

عايزين نعرف باقي يومياتك عن السيارات...

بس و انبي بلاش الحوادث اللي كل أتنين و خميس دي ...

ربنا يسترها معاكي و علي كل واحد صادفه جظه و مشي معاكي في شارع واحد... يا رب

تم تعديل 19 يونيو 2008 بواسطة مصري أصيل

[tahereyad]

بسم الله ما شاء الله عليكي يا نجفة المحاورات,,, ليكي اسلوب رائع في كتابة المذكرات و الصدق و الصراحه أهم ميزه في الحدوته,,,

ربنا يباركلك فالحته الكرولا بتاعتك و يكفيكي شرها لحد ما ربنا يكرمك و تبيعيها لان ماينفعش ترجعي بيها مصر عشان 1800 سي سي,,, بعدها ان شاء الله تجيبي حته من المصرح بيها فمصر من اللي ماتعديش ال 1600 سي سي

بس من الواضح كده والله أعلم ان اشتياقك لركوب السياره الفتره الطويييييله اللي حكيتي عليها بيخليكي تسوقي بسرعه و باين عليكي بتحبي تشدّي بالعربيه و تاخدي غرز,,, بس عايز أقوللك ان العربيات دي الكرولا و اللانسر و الصني و التيدا و الحاجات أقل من 3000 سي سي آخرها الواحد يمشي بيها جنب الحيط في الخليج...

ربنا يستر طريقنا و طريقك يا رب..

[badroora]

كما تدين تُدان ............. :happy:

وبعد ذلك ايها السيدات والسادة فى البداية مكدبش عليكم قلبي وقع فى رجلى وكنت

مخضوضة ونزلت من العربية رجلى مش شيلانى .

وتسألت ها يا جماعة عربيتى جرالها حاجة :winner: وهما بقي فى بوء واحد انتى غلطانة

ومش شايفة قدامك .

وانا بدون تفكير وبكل اندفاع براحة فى ايه التريلا مجرلهاش حاجة انا اللى مراية عربيتى اتخدشت

وعربيتى جديدة ومش عاوزة منكم حاجة .

هما طبعا قالوا دى شكلها مش فاهمة حاجة فى اى حاجة قمت عملت نفسي مش واخده بالى

وركبت عربيتى وعديت من التريلا ودخلت .

قولت امسك بس الرخصة فى ايدي وبعدين اعرفهم شغلهم اهم شيء محدش يسحب

منى استمارة النجاح.!!!

والحمدلله واخيرا اخدت الرخصة وهنا بقي افتريت وحالى اتشقلب وبقيت مسجل خطر

فى جميع ايشارات المرور والركن فى الشارع والسرعة .

حفظت اماكن الايشارات ام كاميرا فقط ودى كنت باحترمها جدا غير كدا اكسر وامشي على طول

طالما مافيش عربيات واقفة استنى ليه .السرعة كانت الطبيعي بتاعى معرفش امشي

فى الحارة اليمين كما اوصانى مُعلم السياقة .

معرفش امشي بالراحة وفى الزحمة كنت كأنى باعلب اتارى افضل امشي بين العربيات المهم منتظرش .

وطبعا السكة البطالة اخرتها وحشه وخصوصا انى تناسيت انى جبت فى سيرة عربيات

البلد كلها واليوم جاء الدور على عربيتى.

طبعا لا حزام امان ولا ايشارات لما احب اغير المسارات ولا اى حاجة خالص .!!!

والنتيجة كانت كل شهر حادثة وانا اللى غلطانة طبعا .بس انا كنت ناصحة كنت دايما

امشي بسيولة عشان اخبط وادفع تمن الخبطة فى وقتها .

ومتتسجلش ضدى فى المرور كله يهون فى سبيل الحفاظ على سمعة عربيتى .

خلال اول سنتين كانت حوادثي كلها ذاتية يعنى البس فى عمود , احضن رصيف .اكحت فى العربيات وانا

داخلة او انا خارجة المهم معتقتش اى عربية .!!!

بس كل دا كان بالنسبة لى عادى كله فى الحديد طالما مش حوادث كبيرة .!!!

وطبعا خلال 6 شهور كنت مشهورة جدا فى عالم الجراجات وعرفت كل السمكرية ايشى كهربائي لما

صحبتى بحرينية منها لله جبتلى مبخرة هدية للعربية واول ما حطيتها عملت قفلة وفصلت الكهرباء .

الراجل اللى بينضف العربية ساب النور والع وانا كنت اجازة يوم كامل مخرجتش البطارية

كانت فينيتو .!!!

واشيى دهان على سمكرة المهم يعنى الحمدلله كونت صحبة كويسة مع نخبة من افضل

سمكرية الهند.

وبعد كدا الحال دام حوالى 6 شهور بدون حوادث خالص وجيت فى رمضان اللى فات

اول يوم جاتلى فكرة ملحة .

لازم اروح اشترى سيدال للصلاة مع انى عندى 2 بس معرفش كأنى كنت رايحة لقضايا.

روحت وكنت عند الدوار وبعدين جت تريلا وانا كنت واقفة بس كنت معدية الخط الابيض

اللى المفروض اقف خلفه مش امامه.

طبعا التريلا مبتشوريش قامت سحبت السيارة معرفش ازاى ومش هاقدر اوصف خلى الصور تتكلم .

بعد ما لملموا كل الحتت المتنتور .....!!

:wub:

اصعب لحظة فى حياة اى ام ان اول ضنى ليها تلاقيه متشال كدا مربعه وهى عاجزة مش عارفه تعمل ايه

:Laie:

الموقف صعب صعب ..........الله مايحط حد فى هذا الموقف ابدا ابدا ..... :P ....

وراحت الجراج واتصلحت واستلمتها قبل العيد ب حوالى 3 ايام ........... :cry: ..

الى القاء فى الحادثة القادمة ....... bv:- .

يُتبع

تم تعديل 19 يونيو 2008 بواسطة Badria Mekkawy

[vipwithyou]

كملى يا أخت بدرية انا متابع معاكم من الآن باذن الله

[HDarwish]

أنا كنت من عشاق الكورولا

[moheltohamy]

اصعب لحظة فى حياة اى ام ان اول ضنى ليها تلاقيه متشال كدا مربعه وهى عاجزة مش عارفه تعمل ايه

:blush2:

الموقف صعب صعب ..........الله مايحط حد فى هذا الموقف ابدا ابدا ..... wst:: ....

هاهاهاهاهاها .....

وأصعب لحظة في حياة أي أب لما ينزل من مديرية الشئون الصحية ، يلاقي ضناه ما بينطقش ،دي يا دوب ربع ساعة طلعت نزلت ؛ ألاقيه جاب وحدة إنجكشن!!!

وانا باشوف عمو سواق الإسعاف بيربطه ع الشيزلونج!

ياما دقت ع الراس طبول يا بدارة :happy:

[badroora]

.

بس و انبي بلاش الحوادث اللي كل أتنين و خميس دي ...

الحوادث دى اساسي ثم يعنى مين اللى هيصرف على المرور ويقبض عمال الجراج ......... :blush2:

تصور المرور بقي يعملى تخفيض .......حتى فكرت اعمل ابونيه عشان مش كله مرة اطلع بياناتى wst::

الله يسترها معانا ومعاك ومع كل الناس ............. :happy:

[قائد المدفعيه الهولنديه]

على فكره انتى انسانه صبوره :blush2: جدا بس عايز اقولك حاجه كأخ ربنا يرزقك و تركبى احسن سياره فى الدنيا بس الله يكرمك يا شيخه بلاش سرعه..... انا كنت هموت امبارح بس مرتين بسبب السرعه و اخدت قرار امشى زى السلاحف على اقل اقل من مهلى.... امشى على مهلك علشان انتى اتعزبتى كتير لحد ما حلمك بدأء يكون ليه ملامح ....حافظى عليه و ربنا يستر طريقك. wst::

بالمناسبه انا معجب بأسلوبك فى الكتابه جدا :happy:][/font

[badroora]

بسم الله ما شاء الله عليكي يا نجفة المحاورات,,, ليكي اسلوب رائع في كتابة المذكرات و الصدق و الصراحه أهم ميزه في الحدوته,,,

..

ميرسي يا طاهر ربنا يخليك دا بس من زوقك ...................... :blush2:

حمدالله ع السلامة خير كان بقالك فترة منقطع .........ان شاء الله مش تنقطع تانى

شكرا مرة اخرى ...... :happy:

[عصام أبوالفتح]

الله يهيديكى يابدرية .. من الفيات مستعمل لكرولا جديدة مرة واحدة .. اكبر ميزة فى الخليج هنا ان اليوزد (( اخو اليود )) سعره رخيص جدا مثلا اول عربية سوقتها هنا كرسيدا جبتها ب 5800 ريال ونفس العربية ثمنها فى مصر بيعدى 40000 ج :happy:

ودرست موضوع السيارة الجديدة لمدة سنتين وانا متردد بسبب الجمارك اللى مش باين انها هاتنزل !!!!

فى النهاية لقيت ان السيارة الجديدة (فى الخليج ) استثمار خاسر على حد تعبير احد الاخوة السعوديين اللى نصحونى

ال drop السنوى فى قيمة السيارة الجديدة يساوى قيمة سيارة مستعملة ولما تتعجن مش هايحصل حاجة طالما مأمن عليها

وربنا يستر طريق وطريقنا ..

تحياتى وشكرى على الموضوع والاسلوب الرائعين :blush2: