أنا وال Corolla ........مأساة حوادث مبتنتهيش !!!!

[badroora]

كملى يا أخت بدرية انا متابع معاكم من الآن باذن الله

تامر حمدالله على سلامتك .........انا زعلانه اوى عشان انت مش لاقيت شغل ان شاء الله ربنا يسهلك وتلاقي شغل بسرعة وتستقر بقي

معلش هتفرج بعد ماتضيق ان شاءالله

سعيدة بعودتك ...............

[badroora]

أنا كنت من عشاق الكورولا

!!!!!وخير ايه اللى حصل ...............اوعى تكون كرهتها بسببي

[badroora]

العزيز محمد التوهامى .........الف الف سلامة المحروسة عربيتك انا لما شوفتها مقدرتش ابص ع الصورة اصلها

فكرتى بضنايا ولكن لما تشجعت لاقيتها بسيطة الحمدلله

يعنى كانوا بيهشكوها بس ......... ربنا يسترها ويبعد عننا دق الطبول مش ناقصة صداع .... :wub:

العقيد الواء قائد المدفعية الهولندية ........نفسي اسالك سبب اختيارك لهذا الاسم بس مش عرفه اسالك فين ؟

الف الف حمدالله على سلامتك .........والحمدلله انا توبت الى الله وعودت الى الحق .!!

م. عصام ابو الفتح .......شكرا على مرورك وكلماتك الطيبة ........وبخصوص الخليج هو دا الحلم النفطى سهل التحقيق ومكلف

انا بقي للاسف مفكرتش كتير قلقت من المستعمل ومشاكله وكمان خوفت تتعطل منى فى اى مكان واحتاس اما كرجل هتقدر

تتصرف وبعدين المستعمل مشاكلة كتير عندى اصحابي جايبين مستعمل يعنى 2003

والعربية مشاكلها كلها فى الحاجات المهمة يا امنا تكيف ومعقد يتكلف كتير وخصوصا لو اوبل

التانية جايبة فورد والجير عاوز يتغير والفرامل بردوا فيها مشكلة يعنى كلها مشاكل وعطلة .

اما بخصوص انى انزلها مصر مش مربحه اوى لان الجمارك والضرايب وبهدلة النقل ممكن تجيب عربية جديدة من مصر احسن .

والله يسترها معانا جميعا يا رب

شكرا لك .............. :wub:

تم تعديل 20 يونيو 2008 بواسطة Badria Mekkawy

[قائد المدفعيه الهولنديه]

أخت بدريه ..... يعنى اسمى انا اللى غريب و باقى اسامى المنتدى كويسه ده فى اسامى انا لحد دلوقت مش عارف اقراها بس طبعا الموضوع بالنسبه ليكى مش أزمه لانكم مع بعض من زمان و عارفين بعض .....

بالمناسبه .. بصفتك من اكثر الاعضاء نشاطا و خصوصا فى مجال الاجتماعيات هل فى طريقه اقدر اعرف بيها باقى الناس هنا فى المنتدى ممكن يطلع منهم واحد جارى او شغال معايا او معايا فى نفس البلد ..... يعنى ممكن نقرب المسافات شويه و يبقى فى ربط بينا و بين بعض نساعد بعد و كده يعنى......

و تفضلو بقبول وافر الاحترام

[badroora]

السيد اللواء العقيد قائد المدفعية الهولندية ............

هاقولك على صنعه هتأكلك الشهد وهتدعيلي .

عشان تتعرف على اعضاء كتير وممكن تقابل منهم حد جارك .........خد منى النصيحة

دى اللى مش بتطلع الا للعسكريين فقط .........

ركز كويس اوى فى باب الاجتماعيات .........من اول موضوع يخص مريض ادخل وادعي

فرح ادخل ...........بارك

مولود ..........ادخل نقط

مأتم .......ادخل قدم واجب العزاء

ولو عيد ميلاد يسلام لو لحقت الزبون قبل ما حد يخده .........وخصوصا لو انا مش موجودة

وعشان تضمن الموضوع دا تعمل ايه بقي

كل يوم بالليل قبل الساعة 12 تعمل لفة كعب داير على بروفايل الاعضاء وتشوف مين

عيد ميلاده اليوم الجديد وبكدا تضمن انك تكون اول واحد

هتعمل العيد ميلاد لاننا غالبا مش بنعمل الحفله غير لما المنتدي بيعلنا بذلك .

الموضوع يبان متعب لكن فى سبيل المكسب كله يهون , وخليك على هذا الحال بتاع عشر

خماشر سنه والله هتدعيلي هتلاقي نفسك ليك شعبية كبيرة

وتركت بصمة كويسة فى نفس كل عضو وكمان لو فتحت موضوع مش هيقدروا يعضوا فيك

لانك مجاملهم كلهم :wub:

خدها منى ونفذها وهتدعيلي

الكار بتاعنا دا عاوز المصحصح اللى يجيب الزبون من بروفايله مش من المنتدي جاهز

ولو احتجت اى استشارة

ابعتلى فاكس وانا افيدك .

بالتوفيق ان شاء الله

تم تعديل 20 يونيو 2008 بواسطة Badria Mekkawy

[badroora]

حادثة تانى يوم الاضحي

اتصلحت العربية واستلمتها الحمدلله قبل العيد الصغير ب 3 أيام , والحمدلله الامور سارت على

خير بدون حوادث وبعدين نوفمبر نزلت مصر ورجعت تانى يوم العيد الكبير ,وصلت الى

البحرين تقريبا الساعة 3 عصرا وكان يوم باين من اوله ايضا ماعلينا المهم طبعا صحابي

مستنيني عشان نعيد مع بعض ومأجلين الفتة وكل شيء عشان طبعا اجيب اللحمة من مصر

وعيش بلدى للفتة , انا يا دوب دخلت البيت والاتصالات يلا مستنينك العيد هيخلص يا جماعة

تعبانة مش قادرة سبونى النهاردة قالوا لاء حرام عليكي انتى عيدتى مع اهلك اول يوم وسيبانا

لوحدنا ربكم والحق العيال كلامهم وجع قلبي قمت بسرعة غيرت هدومى وطلعت اللحمة

والعيش وقولت اروحلهم وانا ماشية فى الشارع قولت مش معقول عيد والعيال ملهومش حد

وادخل عليهم بايدي فاضية واللحمة والعيش مش حاجة الواحد يدخل بها عليهم .

وانا ماشية وبافكر بصوت عالى وسايقة لمحت بعينى لاقيت محل حلويات على اليمين

وكان فى داخلة ليه بس انا ملحقتش الداخلة من اولها تقريبا من نصها فلما جيت ادخل مقدرتش

المسافة صح الرصيف صد فى العربية وقفت وكان ورايا هامر فراحت خبطانى لزقتنى فى

الدريكسيون طبعا عشان مافيش حزام امان wst:: .

وعلى حسب دستور المرور ان اى خبطة من الخلف مش مسئوليتى بس انا عرفه انى انا

السبب المهم عشان الشارع ميتزحمش وقفنا على جنب وانا عربيتى البمبر بتاعتها راح راس

فى راس والهامر ولا الهوا wst:: الراجل كان محترم قالى تحبي نكلم المرور ولا تبينى اصلحها

لك انا بصراحة كنت فكراه هيقولى انت اللى غلطانة ووقفتى فجأءة لاقيته محترم وكمان ان

ا اللى غلطانة قولت يا نجفة انا بالحلال ومش نافع لو قبلت انه يصلحها وانا عارفه انى غلطانة

مش عارفه ممكن يحصل ايه تانى قولتله لا انا اللى غلطانة وهاصلحها لوحدى توكل

انت على الله وقولت دا كفاية ان الهامر حلم حياتى انها بس تكرمت وخبطت عربيتي :wub:

المهم دخلت على العيال ومحبتش انكد عليهم وكتمت الحزن جوايا :wub: وبعد ماكلنا وانبسطنا

قولتلهم على الخبر المفزع وطبعا مش جديد عليهم العيال هما كمان بدؤا يملوا منى ومن حوادثي الى مش بتنتهى

عدى العيد اتصلت بالاسطي الهندي شيبوا ومتكلمتش كتيركل اللى سألهولى لو محتاجة اى قطع

غيار ولا حاجة بس ابقي جبيها عشان نركبها ومتتعطليش قولتله لا دى خبطة زى اللى فاتت

وفى نفس المكان قالى طيب جبيبها ويومين وتكون جاهز. طبعا هو الدكتور والخبير بالعربية

بتاعتى وعارف كل حاجة فيها

اتصلحت العربية واستلمتها ويا دوب ركنتها وطلعت وكنا بالليل الصبح صحيت لاقيت رسالة

ملزوقة على باب شقتى انا حاولت اتصل بكي بالليل لاقيت تليفونك مقفول كلمينى قبل ما تنزلى

تحت ضرورى ....امضاء ........

دى كانت زميلة من جنوب افريقيا المهم قولت تلاقيها عملت مصيبة اتصلت طلعتلى ووشها فى

الارض قولتلها يا بنتى قلقتينى خير قالتلى انا وانا بدون ماقصد كسرت فانوس عربيتك من

وراى :wub: انا بقي اتغظت منها لانها كانت عملت حادثة وقررت تبيع عربيتها ومش تسوق ابدا

وانا اللى اقنعتها تسوق ومش معنى انها عملت حادثة تفقد الثقة فى نفسها وكنت انا طبعا خير

مثل تقدي به اه بس مش لدرجة انها تخبط عربيتى . :sad:

وانا بقي كان لى ركنه غريبة لى مكان مخصوص الكل عارف انه بتاعى والهنود الدكاترة

المحترمين استحالة يركن عربيته فيه حتى ولو عربيتى مش موجودة ممكن يركنها برا

فى الشارع ولا انه ياخد مكانى فى اليوم دا بقي لاقيت حد اخد مكانى فروحت راكنه

عربيتى على الرصيف جوا البيت يعنى نصها على الارض والنص التانى فوق الرصيف

قولت غتتاتة بقي عشان محدش يتجرأ وياخد مكانى تانى وطبعا جت على دماغى انا . et:( .

هى بقي بنصاحتها حبت تطلع معرفتش راحت كسرالى الفانوس المهم قولتها يعنى اصوت انا

مش بلحق ارتاح وانا بقي مش هاصلحها انتى اللى هتصلحيها قالتلى ماشي قولتلها طب

يلا قدامى روحنا واشترينا الفانوس ومكنش غالى اتكلف حوالى 40 دينار بتركيبه خارج

الوكالة طبعا عند صاديش الهندي الكهربائي واحنا هناك قالتلى انتى عربيتك قوية

اوى انا الايكوا دى مزهقانى

وتعبانى وكل شوية اصلحها خبطة بسيطة تبوظ الدنيا ربكم والحق ومخدتش بالى انها بتحسدنى

لان الحسد عندى مرتبط بالعرب اما الاجانب فكرتى الخاطئة عنهم انهم مش بيحسدوا .

المهم خلاص غيرت الفانوس ومشينا ........

يُتبع

تم تعديل 21 يونيو 2008 بواسطة Badria Mekkawy

[النيل حبيبي]

ربنا يسترها معاكي

بس مشفناكيش لما شالوا الكورولا

جنب السواق ولا برضه جوه الكرولا

[aimen]

عاوز اقولك الحمد لله على الصحة ؟ وما تتنازلى عن العربية وكلنا وراكى يا زعيمة بس بصراحة انتى محظوظة جدا جدا ربنا يحميكى

[قائد المدفعيه الهولنديه]

البج بوس / بدريه

شكرا كثيرا على اهتمامك بسؤالى و برجاء تقبلى ان اقوم بفتره تدريب فى باب الاجتماعيات تحت ايد حضرتك و يكون ليا الشرف طبعا...... اما بالنسبه للكرولا اعتقد انها بقت 127 بعد اللى انتى بتحكيه ده ربنا يستر طريقك يا بنتى

[Ahmad Farahat]

ما شاء الله يا بدرية

كل يوم في حياتك ينفع يبقى قصة جميلة

تفتكري ده راجع لثراء شخصيتك

ولا لثراء نفسك

ولا لثراء ظروفك

أعتقد التلاته سوا لأن شخصيتك غنية فعلا

ونفسك في منتهى الجمال

وظروفك فيها كتير قوي

عموما..............

كل شخص فينا يصلح أن يكون بطلا والاخرون من حوله كومبارس

بجد أنا استمتعت

وأكيد هاكمل معاكي

أحمد فرحات

[badroora]

عاوز اقولك الحمد لله على الصحة ؟ وما تتنازلى عن العربية وكلنا وراكى يا زعيمة بس بصراحة انتى محظوظة جدا جدا ربنا يحميكى

الله يسلمك يا ايمن ......بس تفتكر دا حظ بجد .!!!

ومتحرمش منكم ومن واقفتكم ورايا .........الله يخليكم يا رب

المحظوظة جدا جدا .......نجفة :closedeyes:

[badroora]

البج بوس / بدريه

شكرا كثيرا على اهتمامك بسؤالى و برجاء تقبلى ان اقوم بفتره تدريب فى باب الاجتماعيات تحت ايد حضرتك و يكون ليا الشرف طبعا...... اما بالنسبه للكرولا اعتقد انها بقت 127 بعد اللى انتى بتحكيه ده ربنا يستر طريقك يا بنتى

قررنا نحن نجفة الضب انضمام قائد قوات المدفعية الهولاندية الى مكتب التهانى للافراح واعياد الميلاد ........

شوف يا حلاوة انت بقي اى عيد ميلاد تلاقينى بارد فيه لازم تنزل الرد وانا موجودة عشان لو في اى تعديلات نقدر نلحقها فى بدايتها.

لاقيت عيد ميلاد مفتوح وانا لسه مهنتش ادخل هنى باسمك واسم المكتب كدا هتتشهر بسرعة من اصلتك وجدعنتك .

ومش هوصيك دايما 12 الاربع تكون فى المنتدى عشان تلحق اول طلعة عيد ميلاد .

مدة التدريب 3 اسابيع وعلى حسب مجهودك هاشوف اذا كنا هنوثق العقد ولا هتتفنش .!!!

ربنا يوفقك ........ويصلح طريقك ...... :closedeyes:

تم تعديل 22 يونيو 2008 بواسطة Badria Mekkawy

[badroora]

أحمد فرحات انا فى حلم ولا علم ...........!!!

نورت بيتك يا احمد ومش هارحب بك الا لما اعرف جاي عابر سبيل ولا مبلط .!!!

محتاسة من غيرك فى الاخطاء الاملائية والنحوية واللغوية .!!

لو استمريت هاعمل ترحيب ........فكر ورد على العرض سارى ......لبكرة الضهر ......... :closedeyes:

[Ahmad Farahat]

أحمد فرحات انا فى حلم ولا علم ...........!!!

نورت بيتك يا احمد ومش هارحب بك الا لما اعرف جاي عابر سبيل ولا مبلط .!!!

محتاسة من غيرك فى الاخطاء الاملائية والنحوية واللغوية .!!

لو استمريت هاعمل ترحيب ........فكر ورد على العرض سارى ......لبكرة الضهر ......... :closedeyes:

أكثر ما يؤثر في النفس هو شعور صادق كشعورك يا أختي الغالية جدا جدا جدا جدا جدا ......إلى أن ينقطع النفس كما قال يوما حسن نصر الله

صحيح أخطاءك اللغوية متغيرتش وزي ما هيا بس مش مهم المهم احنا عارفين انتي عايزة تقولي ايه والمهم انك كمان عارفة تقوليه

أما سواء مبلط أو عابر سبيل فانا مش عارف ليه دخلت النهاردة

ومش عارف ليه اتشديت اني أقرا موضوعك

كمان قررت اني أرد على إهداء السيدة الفاضلة والعظيمة سلوى هانم

ودلوقتي مش بكرة.......

فصدقيني مش عارف إذا كنت هابلط ولا إذا كنت عابر سبيل

عموما ترحيبك وصل من الإحساس اللي أنا شايفه ف كلامك

لأن إيه قيمة ترحيب مكتوب جنب شعور صادق وجميل زي شعورك يا أختي الغالية

مش هاقلك غير حاجة واحدة يا بدرية

ربنا يديم بينا المعروق

أخوكي الأصغر في الله

أحمد

[badroora]

السفارة المصرية

يوم 4 أبريل 2008 لن أنسي هذا اليوم !!!!

كان عندى مشكلة فى اسمى فى ورق الهجرة وطلبوا منى خطاب من السفارة المصرية يفيد بأن

اسمى ممكن يتكب بكذا طريقة وطبعا اتصلت بالسفارة وسالتهم عن الخطاب دا بيطلع

من عندهم ولا لاء . قالولى على لفة طويلة عريضة المهم قعدت شهرين مش عارفه اعمل ايه .

لحد ما فى يوم جالنا سفير من احدى الدول الشقيقة كان مريض وقمنا معاه بالواجب وقالى لازم

يخدمنى فى اى حاجة قولتله شكرا هاحتاج ايه من سفارتكم يعنى قالى لا ممكن لو من السفارة

المصرية اقدر اساعدك يعنى المهم افتكرت الخطاب بتاع اسمى قولتله بما ان حضرتك سفير لو

جالك مواطن وعنده مشكلة زى دى هتعمل ايه قالى دى سهلة جدا قولتله اصلي انا بقالى

شهرين ومدوخنى لاقيته فى وقتها اتصل بالسفير وحددلى موعد معاه عشان اروحله ويعملولى الجواب

المهم مقدرتش اروح فى الموعد اللى حددهولى روحت بعدها باسبوع وانا بقي اكتر شيء باكره

فى الدنيا وتقيل على قلبي ومراوحي هو الواسطة دا عمرى فى حياتى ملجأت لواسطة ابدا

عشان حاجة تخصني دايما بعتمد على الله ونصيبي ,المهم دخلت السفارة وكنت مبسوطة جدا

لان العلم اللى فوق السفارة كان من سنتين دايب ومرقعينه من النص لكن الحمدلله ربنا كرمهم

وغيروا الكسوة بتاعته وبيضوا السفارة وعدلوها اينعم شكلها بيفكرنى بمستشفي حميات امبابة

بس مش مشكلة هما يعنى اللى هيخدوا مننا هيصرفوا على منظرة السفارة . دخلت

الريسيبشن وقابلنى موقف المراكب السايرة قصدى الريسيبشنست وقالى نعم يا فندم .

قولتله والله عندى مشكلة كذا كذا وقالولى اجى السفارة وانتم تعملولى الجواب دا قولت خلينى

اجل موضوع الواسطة دا واشوف واسطتى انا مفعولها ايه .

طبعا اللى مالوش واسطة لا ليه عوزة ولا حطة (من اقوالى المأثورة ) قالى لا القنصلية غير

والسفارة غير وعقدلى الدنيا وحسسنى كأنى رايحة اخد جنسية ولا رايحه اغير اسمى مش

حروف زيادة فى اسم جدى وابويا رايحة استئصلها.!!.

المهم قولت مبدهاش طلعت الكارت وانا زعلانه لان دا مش اسلوبي ولا مبدئي ولكن للاسف

هما اضطرونى لكدا ,هو بص فى الكارت تقريبا نسي انى ملامحى ولغتى وشكلى مصرية

لدرجة التشبع ونبرة صوته اتغيرت وفرد وشة وابتسم وبدل ماكان مذنبني ع الباب ودانى

اوضه المسافرين وقعدنى لحد مايروح يودى الكارت لمعاليه ويسمح لى بالدخول.

مافيش ثوانى لاقيت سكرتيرة زى موظفين الشئون الاجتماعية اللى بيجيبوا الخضار معاهم

الشغل يقمعوه . اتفضلي يا مدام وانا بغل آنسه من فضلك .!!

دخلت على السفير وقام واستقبلنى وسلم على بحرارة كنت عاوزة اقوله انا مواطنه مصرية

بلاش الشكليات دي قلقت ليكون فاكرنى تبع الماعونة الامريكية ولا حاجة وجاية اقدم له شيك

تبرعات , المهم قالى عاوزة ايه بالظبط قولتله على المطلوب وطبعا الى شغالين فى السفارة

بصمجية مش بيعرفوا انجليزي فالسيد السفير كتب الخطاب بنفسه وكان زوق جدا جدا

وبصراحة عشان مظلمهوش هل هو زوق عشان الكارت اللى جبته ولا هو كدا حونين مع

المواطنين وعامة الشعب الله اعلم بقي باللى فى القلوب والنوايا .

.

بعدين نادى على السكرتيرة وقالها اكتبيه على الكمبيوتر واطبعيه واختميه وحطيه فى ظرف

كان ناقص يقولها اديهولها فى ايديها كمان يعنى سكرتيرة ومش عارفه تعمل دا من نفسها .

المهم هى طبعا نقلت الكلام بالشبه يعنى حتى بلاش تستخدم مخها على الاقل تسمع كلام الوورد

لما يحطلها خط الاحمر تحت الكلمة يعنى مش هتخسرى حاجة لما تصلحيها هى طبعا نقلت

الورقة زى ماهى مكتوبة بدون تشغيل مخها وختمتها واديتهالى انا بقي من كتر اللى شوفته فى

حياتى مبقتش اثق غير فى قدراتى.!!

راجعت الكلام لاقيته انجليزي بتاع عيل فى 9 ابتدائي فى مدرسة النجع عندنا قولتلها معلش

الكلام مكتوب غلط ورينى كدا الجواب اللى كاتبه السفير عامل ازاى هو كان كتبه بخط اليد

قولت مصيبة لو السفير مش بيعرف انجليزي والله كنا لميناله من بعض وبعتناه البريتش كونسل

يتعلم امال دا يعتبر وجهتنا كلنا , المهم طلع ان هى اللى نقشت غلط.

بعد 3 محاولات الحمدلله خلصت الورقة ومشيت وانا ماشية 4 واقفين على البوابة بيسلموا على

ومع الف سلامة ولو احتاجتى حاجة ابقي شرفى فى اى وقت . قولتله يا سبحان الله مانا اللى

كنت من شويه وكنت هتمشورنى .عموما كتر خيركم يا جماعة وشكرا لكم .

خرجت من السفارة اعانى من مشاعر مختلطة

مشاعر حزينه انى كمصرية عشان اخلص ورقة من السفارة المصرية لازم واسطة غير

مصرية يعنى باسبورى وجنسيتى وملامحى المصرية وماية النيل اللى بتجرى فى عروقى

لم تشفع لى عند السفارة المصرية .!!!

الفرحة بقي انى اخيرا خلصت الجواب اللى كان مغلبنى وخلاص افتكيت منهم .

وطبعا الفرحة لم تتدوم كثيرا .. بعدها بحوالى 10 دقائق اثناء العودة الى المنزل عملت حادث

سيارة جثيم ادى الى وفاة عربيتى شهيدة .!!

يُتبع

تم تعديل 22 يونيو 2008 بواسطة Badria Mekkawy

[النيل حبيبي]

لاحول ولاقوه إلا بالله العلي العظيم

مفيش فايدة

حمد الله على السلامه يابو أجمل ابتسامه

تم تعديل 22 يونيو 2008 بواسطة النيل حبيبي

[badroora]

لاحول ولاقوه إلا بالله العلي العظيم

مفيش فايدة

حمد الله على السلامه يابو أجمل ابتسامه

هو انا موضوعى مشائم للدرجادى ........ :sad: بليز متخبيش على وقولى

الله يسلمك ويسلم طريقك ............

[badroora]

بعد ما خرجت من السفارة بحوالى 10 دقائق كان فى منحنى بيطلع على كوبرى وانا ماشية كانت تريلا قدامى طويلة اوى

وكمان انا بقي عندى فوبيا من التريلا من بعد حادثى رقم مش فاكرة كام وعشرين المهم وانا باطلع من ورى التريلا كانت

قدام عربية بيك آب وكنت سايقة على 70كم\س وفجأة البيك آب لبس فى العربية اللى قدامه وانا شرحه دوست فرامل على

قد ماقدرت ولكن بردوا معرفتش اتفاديها تقريبا نص البيك اب كان عجن عربيتى من الامام ووصل للزجاج الامامى وعمل

فيه شروخ انا مش فاكرة ايه اللى حصل بعد كدا غير فى عربة الاسعاف والحمدلله خبطاتى كانت بسيطة فى الرأس والعظام

الصدر وكالعادة مافيش حزام امان بس ربنا ستر والاير باج مطلعش .

روحت المستشفي وعملت الفحوصات واشعات وقالوا مافيش حاجة بس لازم اتحجز تحت الملاحظة 24 ساعة للتأكد من

عدم حدوث ارتجاج فى المخ .

انا طبعا قولتلهم لاء انا كويسة وهاراقب نفسي لو حسيت بحاجة هارجع على طول مضيت خروج على مسئوليتى وخرجت

رجعت البيت اغير هدومى والمرور بيتصل بي تعالى عشان التحقيق .

انا بقي رايحة وكلى امل ان اللى قدامى المفروض يتجازى لانه وقف فجاءة روحت وقالولى طبعا سيارتى مينفعش تمشي

حتى الباب قفش ومعرفش طلعونى ازاى منه ماعلينا المهم .

قالى انت غلطانة وهتصلحى ل 4 عربيات قدامك انا بقي هنا جالى ارتجاج فى المخ من كلامه مش من الخبطة قولتله اازاى ان شاء الله

رسملى خريطة وقالى الحادث كالاتى

9 عربيات انتى كنتى اخرهم لو كان حد خبطك من ورى كنت هتصلحى للى قدامك بس .!! والنبي شايفين الكلام لما اكون

انا لوحدى وعربيتى انتهت مابلك بقي لو حد دعمنى من الخلف اكيد كنت هاروح فيها انا.

المهم كلامه معجبنيش لانه شيلنى انا 4 عربيات و واحد تانى شال اتنين ومعرفش مين ايه المهم ان اول واحد خالص

عمل الحادثة مخسرش حاجة هو طبعا مش انا اللى هاصلح كله على حساب التأمين بس انا مكنتش مقتنعه.

غلط غلطة عمره وقارن بين نظام السياقة فى مصر والبحرين واننا فى مصر همجيبن سبت كل شيء ومسكت فيه انه باي

حق يقارن ويهين بلدى طبعا عشان يلم الدور قالى خلاص هتتحلمى عربيتك وعربيتة اللى قدامك فقط.

راحت العربية التوكيل وقالوا ان التكلفة هتعدى ال2500 دينار وبعدين رجعوا قالوا 3000 دينار

والعربية تمنها فى السوق 4000 دينار !!!

فالتأمين خيرنى ما بين انهم يكنسلوها ويدونى تمنها المذكور فى وثيقة التأمين 3900 دينار ومابين انهم يصلحوها برا الوكالة

وهتكون التكلفة ااقل .

انا بصراحة كنت اتشائمت منها خالص وقولت حتى لو لم تتكنسل كنت هاصلحها وابيعها لاننا شكلنا ملناش عيش مع بعض

ويا تجيب اجلى يا اجيب اجلها والحمدلله انا اللى جبت اجلها .

واتكنسلت عربيتى كورولا 2005 ......مكنتش حاسة اوى بالموضوع وماشية فى الاجراءات عادي

لحد يوم التنازل روحت المرور عشان اتنازل عن ملكية العربية لشركة التأمين وهنا بقي وهما بيسبحوا منى المفتاح

والملكية قلبي انسحب وصعبت على العربية قوى ودموعى نزلت وكانت نفسيتى تعبانة اوى مش بسهولة

افرت فى اول عربية امتلكها واول بختى وفرحتى .......ويوم ما روحت استلم القطط والكلاب اللى حطاهم فيها

بقيت ابص لكن ركن فيها كأنى ام وهتسيب عيالها بعد طلاقها وفى حاجات مستحملتش المها بسبب المى وبعدي عن كورولا

حبي الاول وبختى الاول .

وهنا ماتت كورولا 2005 وسابتنى لوحدى ولحد دلوقتى على الرغم انى غيرت لكورولا 2008 الى ان علاقتى

بالاولى لسه منتهتش ولى زميلة فى السكن معاها نفس الموديل واللون بالظبط كتير كنت بدون شعور اروح واحاول فتحها

اعتقادا انها عربيتى .

ومش متخيلة لو لاقيت عربيتى دى ماشية فى الشارع مع حد تانى انا ممكن يجرالى ايه .!!!

مكنش يومك يا كورولتى يا ضنايا ......يا غالية يا اول بختى

شكر خاص للفنان ليدو على الصورة المقتبسة من رائعة الاديب الكبير حشيش فى العمر فُرشة

معلش يا استاذ حشيش الناس لبعضها .!!

الى اللقاء مع اول حادث لكورولا 2008 فى الحلقة القادمة

باااااااااي

تم تعديل 22 يونيو 2008 بواسطة Badria Mekkawy

[aimen]

نجفة انا شايف انك تتطورى شوية سيارات ايه يا شيخة ؟ بلا وجع دماغ

فكى الكيس وهاتى لك حته هليكوبتر و اهو الفضاء واسع وان شاء الله مافيش مشاكل فوق ...

[ELSHAMY]

أييييييييييييييييييييييييييييه

أدى حال الدنيا...

تعيشى و تفتكرى و ان شا الله أخر الأحزان..... و ربنا يبدلك خير منها فى الجنة و نعيمها بأذن الله