أنا وال Corolla ........مأساة حوادث مبتنتهيش !!!!

[tahereyad]

ميرسي يا طاهر ربنا يخليك دا بس من زوقك ......................

حمدالله ع السلامة خير كان بقالك فترة منقطع .........ان شاء الله مش تنقطع تانى

شكرا مرة اخرى ......

أنا اللي ميرسي جدا جدا والله يا أختي بدريه انك لسه فاكره مشاركاتي القديمه لحد دلوقتي,,, أنا الحقيقه انقطعت فقط عن المشاركه,, لكن كنت دايما متابع أخبار المنتدي,,, و بالذات لما اتغير اسمك و اسم الأخ أحمد فرحات,,,, بس أنا كنت حاطط ايدي علي قلبي لتغيري اللوجو,, و هو أحدي العلامات المميزه جدا في المنتدي.

ميرسي مره تانيه علي ردك و علي الموضوع الشيق,, آسف لأنه كله حوادث و قضايا,,, و ربنا يستر طريقك,,, و ربنا يجعلها آخر الحوادث ان شاء الله

علي فكره واضح من كلامك ان السواقه فالبحرين سبهلله أوي و كل واحد بيسوق بمزاجه,,, الوضع هنا فالامارات بيختلف لأن الواحد بيكون عنده رخصه مصريه و بيسوق 90 سنه فمصر,,, ولما ييجي دبي يدخل 20 حصه عالأقل عشان بس يكسرو نفسه و يحسسوه انه عمره ما ساق فحياته,,, بس النتيجه بصراحه ممتازه ان الواحد بيكون حريص جدا و عينيه فوسط راسه و هو سايق,,, اتمني انك تحاولي تغيري اسلوب سواقتك لأني كنت باسوق زيك وما زلت,,, بس فمصر مش هنا,,, هنا ممكن امشي ال 70 كيلو كلهم علي نفس الحاره وأنا في منتهي الهدوء,,,

ربنا يستر طريقك و يباركلك فالكرولا الجديده و يجعلها آخر الحوادث ان شاء الله.

[badroora]

نجفة انا شايف انك تتطورى شوية سيارات ايه يا شيخة ؟ بلا وجع دماغ

فكى الكيس وهاتى لك حته هليكوبتر و اهو الفضاء واسع وان شاء الله مافيش مشاكل فوق ...

لا يا ايمن انت ناسي مطبات الهواء ....... wst:: وممكن على حظى يكون فى ردار يفوق ويوقفنى بردوا ولا اتوه بين السحاب البس فى الطيارة اللى قدامى.

[badroora]

لا يا طاهر مين قال ان الرخصة سهلة فى البحرين . الحوداث دى مش معناها انى مش باعرف اسوق والله كان ارحم على الاقل كنت ركنتها وروحت اتضربت تانى.

المشكلة فى التهور وعدم الالتزام بالقوانين . ودا انا اتعلمت الحمدلله منه درس مش هنساه لانه للاسف كان درس صعب جدا ومكلف للغاية.

انا اخدت الرخصة من تالت مرة ومعقدين جدا وفى ناس ممكن تاخدها من 7 و9 مرات كمان.

وامتحاناتهم كانوا بيتلكوكوا على اى حاجة صغيرة يعنى لو الايشارة داخل المدرسة احمرت وانا ماشية كانوا بيحسبوها غلطة.

حتة انى خدت الرخصة بالتذكية دى تعبير مجازى لكن طبعا انا اللى شجعى هو انى سوقت لوحدى بدون مدرب شهر كامل ودا ادانى ثقة وبقيت اعرف اتصرف لوحدي .

وصدقنى الحوادث ملهاش كبير .!!!

تم تعديل 23 يونيو 2008 بواسطة Badria Mekkawy

[badroora]

اسعد حادثة حصلتلى فى حياتى .........

بعد ما انتهيت من مراسم تخليص الفاضلة كورولا 2005 قبل الاربعين كنت جبت كورولا 2008.

بصراحة كنت اتشائمت من كل الكورولا فكرت فى جيب او 4X4 وبعدين لاقيته غالى اوى.

الكامرى 2008 تحفة بس بردة كانت غالية.

كتير اقترحوا على هوندا ومتسويشي ( على فكرة اسواء عربية فى الدنيا هى

متسوبيشي دى ) ودى بقي نفسي افتح موضوع مخصوص عشان انتقم منها.

مرتين التامين ادانى متسويشي لمدة 8 ايام لحد ما عربيتى تتصلح وكانت ايام ما يعلم بها الا ربنا.

العربية غريبة واصواتها فظيعة والتكيف كأنه غسالة , والبطارية كل ماروح مكان

واسيبها اورجع اشغلها متشتغلش .

وكمان الدركسيون بتاعها فى 8 ايام كنت عملت عضلات فى دراعى وجالى الام فى

الصدر بسبب تقل الدريكسيون من الاخر عربية مش حلوة خالص .

نرجع بقي لو موضوعنا.

الحمدلله استلمت العربية بسرعة قبل الاربعين بتاع اللى قبلها ومكنتش فرحانة خالص طبعا زى الفرحة الاولى .

وقالولى لازم اسوق على حد اقصي 80 كم\س لحد اول 1000 كم عشان العربية تلين واحدة واحدة.

وانا كنت كدا كدا لسه مستأثرة من الحادث الشنيع فكنت ملتزمة وفعلا من كتر ما

بسوق على 80 خلاص كرهت السرعة وبقيت ملتزمة وبقيت احط حزام الامان

العربية الجديدة الحزام بتاعها كويس مش بيكتم ع المراوح زى 2005 .

تميت ال 1000 كم وقبل ما وديها للصيانة الاول الف كيلو كانت واحدة بنت حلال واقفة قدامى

راحت راجعة للخلف خبطت العربية من الجنب انا بقي انهارت قولت حرام اللى بيحصلي دا.

بس اللى صبرنى انها اول حادث فى حياتى لم يقيد ضدى.وكنت بريئة .!!

وكنت سعيدة وانا معايا تقرير المرور مكتوب فيه المتهمة عربية رقم 2 اللى هى

خبطتنى. وكان هاين على اصورة واغلفه واحطة مع السيرة الذاتية بتاعتى .

Reference letterوالحمدلله العربية اتصلحت واستلمتها امبارح الصبح .

ادعولى بقي انى معملش حوادث تانى ...........

ويا رب مرجعش للتوبك دا تانى ومسجلش اى حوادث فيه.

وتكون دى اخر حادث يا رب .

شكرا لحسن متابعتكم ومعلش الحكاية كلها غم ونكد بس انا كان لازم افضفض

وخصوصا بعد اخر حادث للسيارة الجديدة لانى حسيت كأن فى حاجة غلط.

يا رب اجعلها النهاية .!!!

مع تحيات .. بدرورة حوادث.!!

[النيل حبيبي]

الفاضله/بدوره حوادث

نتمني لكِ السلامه

خليك فى الحارة الوسطانيه وخللي بالك من البحرين

[madzoro]

ربنا يحفظك يا اخت بدرية و ماتحتاجيش لاي تقرير مرور ابدا

بس كده تهون عليكي الكورولا 2005 و تخليهوم يكنسلوها wst:: wst::

اصل انا عندي واحدة سماوي و بحبها جدا حتى لما جبت عربية تانية ما هانتش عليا و مرضتش ابيعها قولت اخليها لما المدام تاخد الرخصة و هي اللي تخلص عليها wst::

و حاليا بدفع في قسطين الكورولا و التشارجر :blink: .... ادعيلي ربنا يديني خيرها و يكفيني شرها .... اصلها بتغري جامد في الطريق و خصوصا السرعة

يا رب يحفظنا

تحياتي

[HDarwish]

يارب تكون آخر الحوادث

إمال لو كان معاكي 128 مش كورولا كنتي عملتي إيه .. ربنا يسترها على الناس اللي في طريقك

وبعد إذنك يا فندم .. مش معنى إني قلتلك أنا كنت بعشق الكورولا قبل ما تفتحي التوبيك ده تقومي تقولي :-

كتير اقترحوا على هوندا ومتسويشي ( على فكرة اسواء عربية فى الدنيا هى

متسوبيشي دى ) ودى بقي نفسي افتح موضوع مخصوص عشان انتقم منها.

مرتين التامين ادانى متسويشي لمدة 8 ايام لحد ما عربيتى تتصلح وكانت ايام ما يعلم بها الا ربنا.

العربية غريبة واصواتها فظيعة والتكيف كأنه غسالة , والبطارية كل ماروح مكان

واسيبها اورجع اشغلها متشتغلش .

وكمان الدركسيون بتاعها فى 8 ايام كنت عملت عضلات فى دراعى وجالى الام فى

الصدر بسبب تقل الدريكسيون من الاخر عربية مش حلوة خالص .

شفتي شعورك لما بعتي الكورولا ده نفس اللي حصلي برضه لما بعت اللانسر

إوعي تكوني صدقتي إني إتضايقت من وصفك للانسر بالطريقة دي كل ما هنالك إن اللانسر وقفت معايا كثير وليها ذكريات حلوة معايا بس في الآخر برضه اتضحلي إن هيا أفشل عربية بعد ما جربت غيرها زي الألماني (مرسيدس، بي إم، أودي.....)

تمنياتي ليكي بعدم تكرار الحوادث مرة أخرى

[فالحة هانم]

السلام عليكم لكل اعضاء المنتدى الرائع وسلامي الخااااص للأخت بدرية صاحبة العربية اللي حوادثها جهنمية md2:

أحب أقولك أني لما قريت التوبيك بتاعك بتاع الحوادث أد ايه كانت دافع كبيييير اوي اني اشترك معاكم في المنتدى علشان اواسيكي مع اني متابعة المنتدى من فترة طوييييلة ولكن موضوعك شحنّي وخلاني عايزة ادخل اطبطب عليك واصبرك والله ...

عيزاكي تكوني متفائلة كده زي عادتك ومتتوقعيش حاجة وحشة وربنا يبعد عنك الحوادث والضمادات والذي منه

وعايزة أقولك معلش الحمد لله انها جت على أد كده ، الله اعلم كان ايه اللي ممكن يحصل ؟؟ والحمد لله على كل حاجة ..

بس انا عايزة اسألك سؤال . . . هو لما ربنا كرمك وقومتي بالسلامة من حادث كورولا 2005 وكرمك واشتريتي الكورولا 2008 يا ترى عملت ( فدوى ) قصدي يعني تكوني دبحت خروف ولا حاجة ؟!! اصلها ممكن تكون عين والله أعلم وحكاية الدبح دي بتشيل بلاوي عن الواحد والله ...

أنا بس حبيت أنوّرك وأقولك ... بس انتي عليكي فاتورة الكهرباء :waf:

تم تعديل 23 يونيو 2008 بواسطة فالحة هانم

[امانى]

على قد ما ضحكنى موضوعك على قد ما زعلنى عليكى وع العربية وعلى كل الحوادث اللى صادفتك . شكلك محسودة اوى

ابقى اعملى فدو للعربية وارقيها من كل عين لامة ومن كل شيطان والحسد ذكر فى القران

ربنا يكفيكى شر الطريق ويبعدك عن الحوادث ويخليلك العربية امين يارب العالمين

[حلواني]

الاخت بدريه

انا استنيتك للاخر مستمتعا ياسلوبك

شوفي طالما فيه سواقه وانت علي الطريق وفيه ناس غيرك علي الطريق يبقي

فيه حوادث . المهم ربنا يسلم واللي يجي في الريش بقشيش

وميت خبطه في الحديد ولا خبطه واحده في العضم

ربنا يستر طريقنا جميعا

اللهم إنا لا نسألك رد القضاء ولكن نسألك اللطف فيه

[فتافيت]

السلام عليكم ازيك يا بدرية والله وحشتيني بس انا نزلت مصر وما ادراكي ما مصر هذة الايام صدقيني مش عارفة انام حتي المهم موضوعك جميل جدا جدا وانا كمان والله نفسي اشتري عربية قوي لسبب واحد عسان اخلص من قولة لحد تعالي وصلني مكان ادعياي اجيب واحدة خلال الايام الجاية ويعوض صبري خير :wub:

اما بق طريقة سواقتك خافي علي نفسك يا بدارة مش كدة

المهم الانواع دي احسنهم الكورلا وربنا يكفيكي شر الطريق وبراحة :happy:

اما الاخ اللي مش عاجباة الانسر اقولك انها كانت مع جوزي وتحفة ويارب اقدر اجيب زيها بس امكانياتي ضعيفة

اتمني السلامة للجميع علي الطريق ويارب اجيب عربية ادعوللللللللللللللللللللللللللللللللللللي

[Modest]

للاسف يقولون دهبي مع انى عمرى ماشوفت اى حاجة فيها تدل على اللون انا اقولهم طحينى ولا كاكى وهما ابدا دهبي

قولت خلاص هما ادرى دهبي دهبي

بَصْرة يا بدرية .. نفس لون عربيتي (تويوتا برضه لكن مش كورولا )

اللون ده أصلاً اسمه Champaign يعني شمبانيا

و خلّوه ذهبي بالعافية علشان لو كتبوا لك اللون "شمبانيا" في الرخصة ، العربية هاتِسكَر و تخبط في أي حاجة :happy: .. و عربيتك أصلاً عدم المؤاخذة بتخبط عادي من غير ما تسكر :wub:

[HDarwish]

اما الاخ اللي مش عاجباة الانسر اقولك انها كانت مع جوزي وتحفة ويارب اقدر اجيب زيها بس امكانياتي ضعيفة

اتمني السلامة للجميع علي الطريق ويارب اجيب عربية ادعوللللللللللللللللللللللللللللللللللللي

أختي فتافيت

للتوضيح والتنويه فقط .. أنا ما قلتش على اللانسر إنها مش عاجباني بالعكس أنا زعلت من بدرية علشان وصفت اللانسر بالوصف ده لإن اللانسر ياما شافت معايا أيام .. ومع ذلك يا ستي اللانسر عربية زي الفل وربنا يخليها لجوزك ويكفيه شرها .. ودعواتي ليكي تجيبي عربية أحسن منها كمان

بس لو إنتم في الكويت ورحتي تسألي على سعر الجير في شركة الملا الوكيل للسيارات المتسوبيشي ولقيتي إن سعر الجير 1100 دينار في حين إن السيارة لو اتباعت يادوب تجيب ألف ومتين دينار يبقى ما تزعليش ساعتها

تحياتي

[badroora]

الاخوة الاعزاء .

النيل حبيبي ......شكرا لك وربنا يكفيك ويكفينا شر الحوادث امين يا رب .

العزيز مدزورو ... هو الزور بيتمد ازاى . شوف انا من طبعي مش باحب افرط فى حاجتى ابدا يعنى لو هاجيب حاجة جديدة القديمة احتفظ بها ومفرطتش بها لانى بارتبط بحاجتى جدا لكن فى حالة السيارة طبعا مكنش قدامى غير انى اوافق على انهم يكنسلوها لانهم خيرونى انهم يصلحوا خارج الوكالة عشان تكون ارخص .

وانا زى ماقولت جبت 2008 وقلبي وعواطفى مع 2005 :afr:

شكرا والا يكفينا ويكفيك شر الحوادث آ مين يا رب .

استاذ حسن درويش ...مش هتكلم عن الانسر بقي عشان الناس متزعلش وكمان جت فيك انت وانت اعترفت على :happy: ربنا يكرمك ويبعد عنك الحوادث يا رب ويصلح طريقك .

فالحة هانم .......اسم اوريجينال خالص :wub: اولا نورتى المنتدى وان شاء الله تنبسطى معانا

وتستمرى ان شاء الله , انا عملت فدوة بس فى اول حادثة لكن بصراحة الاخيرة ولما جبت الجديدة معملتش حاجة .!! بس ان شاء الله ربنا يسهل واعمل حاجة كويسة لله

شكرا لك على اشتراكك لمواساتى وان انشاء الله منجلكيش فى حاجة وحشه خالص واهلالا وسهلا بك وسط اخواتك ...... :wub:

أمونه الغالية ......اوعى تزعلى يا قومر انا عن نفسي مش زعلانه الحمدلله يمكن على راى حد من الاخوة محظوظة . الحمدلله على كل شيء .

شكرا لك يا قومر واوعى تزعلى ابدا :cry1:

استاذ حلوانى ... شكرا على كلماتك الطيبة وفعلا زى ماقولت اللى يجي فى الريش بقشيش

والله يسترها معانا جميعا ويكفينا شر الحوادث

شكرا لك ......

فتفوته .....حمدالله ع السلامة يا قومر انتى كمان والله وحشتينيى وينك اختفيتى كدا بدون اذن كدا هنخصم من مشاركاتك بعد كدا يا قومر لما تحبي تاخدى اجازة يبقي لازم تقدمى طلب فى الشئون او باب الاجتماعيات واحنا بقي نبقي نفكر هنسمح لك ولا لاء .

عاوزة اعترفلك بسر خطير بس اوعى تزعلى ... انا اللى زعلانة من الانسر مش استاذ حسن لانها ورتنى الويل .. بس عموما جايز يكون انا اللى حظى وقع فى عربية موش قد كدا .

حقك على انتى والفاضلة لانسر احنا بردوا عندنا عربيات ويهمنا سمعتها ومنقدرش ابدا نجيب فى سيرة عربيات الناس .

حمدالله على سلامتك ونوتى المكان ..... gsp_)

مع تمنياتى للجميع بسياقة مريحة بلا حوادث او مخلفات

شكرا بدرية

تم تعديل 24 يونيو 2008 بواسطة Badria Mekkawy

[badroora]

بَصْرة يا بدرية .. نفس لون عربيتي (تويوتا برضه لكن مش كورولا :happy: )

غريبة مع ان اللون دا متكررش فى تويوتا غير مرتين

مرة ع الكورولا

والتانية على الترسل , وبما ان عربيتك مش كورولا تبقي ترسل :P

اللون ده أصلاً اسمه Champaign يعني شمبانيا

و خلّوه ذهبي بالعافية علشان لو كتبوا لك اللون "شمبانيا" في الرخصة ، العربية هاتِسكَر و تخبط في أي حاجة :closedeyes: .. و عربيتك أصلاً عدم المؤاخذة بتخبط عادي من غير ما تسكر :D

اعوذ بالله شمبانيا كله الا كدا تصور انا دلوقتى عرفت قد ايه كنت مظلومة واصحابي جابولى

يافطة فى السيارة الجديدة مكتوب عليها Master of desaster . :rolleyes: وانا مظلومة واتارى كله بسبب اللون المنكر .

عموما الحمدلله انى توبت عن هذا اللون وجبت لو ن جديد وعندى نفس المشكلة

هما يقولون رصاصي ومتكوب فى الرخصة رصاصي وانا شيفاها كحولى :)

معرفش دا عيب الوان عندى ولا عندهم .

[فالحة هانم]

اعوذ بالله شمبانيا

هما يقولون رصاصي ومتكوب فى الرخصة رصاصي وانا شيفاها كحولى :rolleyes:

معرفش دا عيب الوان عندى ولا عندهم .

والله يا أخت بدارة أعتقد أن العيب مش عيب الوان لكن بعيد عنك عيب كترة منكرات ( شمبانيا ، كحولي ) بقت العربية قصدي العملية سكرانة وريحتها فايحة أوي :closedeyes:

بس انا شفت لونها هي رصاصي غامق يعني ساعات بيقولوا عليه لون فيراني :happy: .. ربنا يكفينا شرهم

بس ما شاء الله لا قوة إلا بالله لونها حلو ربنا يبارك لك فيها ويرزقك خيرها ويكفيكي شرها

[ELSHAMY]

هما يقولون رصاصي ومتكوب فى الرخصة رصاصي وانا شيفاها كحولى :closedeyes:

معرفش دا عيب الوان عندى ولا عندهم .

مش حتفرق يا بدرية...شمبانيا ولا كحولى...... كلها مشروبات روحية....

أعتقد قصدك كحلى..... صلحى الكيبورد على رأى أخينا أيهاب سالم...

[Salwa]

الابنة المشاكسة / بدرية .

لعلها المرة الاولى التى اكتب لك ردا .. فى اى موضوع ..

لعل مواضيعك شبابية اكثر من اللازم .. او ...مهنية اكثر منها اى شئ آخر ..

او...لعلها من المواضيع التى اقرأها ...ولا اجد لنفسى مكانا بين روادها ..

او ...لعلنى كنت ارى انك تكتبين موضوعا ...وتقصدين قول ....اى موضوع آخر ...بمعنى مستتر مثلا ..

او ...لعلى اصابنى شئ من (( قلة الصبر )) فأصبحت لااتذوق الا ما يروق لى ...فى وقتى القصير ..

ولعلى كنت ارى ....مشاحنات ...على الطريق ...وكنت افضل الابتعاد دائما ...

لعل ولعل ولعل ....وهذه ليست مبررات ....لكنى فقط احببت ان اوضح لك لماذا لم اكن ارد ولماذا ارد الآن ...

معذرة لكل صراحتى ...

و....لعلها هذه المرة تكون آخر ....لعل.....ولهذا...(( ربما....و...لعل... كان ابتعادى وكل هحرتى بعيدااا كان ...لعودة الاقتراب من هذه النفس التى تحاشيتها دائمااا ))..

انت جميلة يابدرية ..

حقاااا اقولها وبكل الصدق ..

صدق لايأتى لينافقك...او يطلب منك ودا...

انت جميلة جدا ...جدااا يابدرية ...

واعرف الآن ان حذرى منك ربما كان لانك ...عفوية اكثر من اللازم ..

انت ...(( ارجل ....من الف رجل يحمل فقط صفة الرجال ولا يتسم بسيمائهم )) ..

وعندما اقول لك ....ذلك...لااقصد انك تتصفين بأى خشونة ..(( حاشا لله )) ..

بل اقصد كل صفات الرجولة والفروسية الجميلة والايثار ..

لاتهمنى حوادث ...معشوقتك...حقاااا...ضحكت كثيرا ...لكن ؟؟

جوهر صراحتك وجوهر نفسك هو ما اسرنى ..وما شدنى لك ..

قرأت موضوعك كاملا ....اليوم فقط .

اقولها لك بدون اى زيف او تملق ...او خداع ..

ادركت الآن اشياء كثيرة كانت غائبة عنى ...

ربما قرأ البعض ..(( الحدوتة )) ..ومر مرور الكرام على تفاضيل صغيرة بين ثنايا كلماتك ..ولكنى رأيتها ...رأيتها اليوم فقط ...رأيتها كل الاضواء التى تشع من نفسك الجميلة ...

و...

فقط ...

اطلب منك شئ ..شئ واحد.

كونى كما انت .....حتى ...وانت تعلمين ان الديون ..(( لاترد )) ...وكالبضاعة المضمونة ...لاتستبدل ..

من كل اعماق قلبى ...

بارك الله فيك يابدرية ..

يابدر البدور ..

نعم الابنة ونعم الاخت ..

[مصري جدا]

الأخت نجفة نوارة المحاورات

يعني أغيب شويه أرجع الأقبكي مكسره الدنيا ...مذكرات وعربيات ....ربنا يحفظك من كل سوء...

المهم ..أسلوبك جميل ومشوق وأتحسن عن السهل الممتنع....خلي بالك من نفسك وعلي رأي شاديه ...سوق علي مهلك سوق....بالمناسبه ..أنت عامله العنوان علي نغمة أمل حياتي يا حب غالي مايتنسيش.....يلا ماتاخديش في بالك... حمد الله علي سلامتك ...

[HDarwish]

الأخت / بدرية

توضيح صغير

Master of Desaster

اللوحة دي غلط

والصح هو

Master of Disaster

علشان ما حدش يضحك على المصريين ويقولوا مش عارفين إنجليزي

تحياتي