خليني معاكم صريح بس عايز النصيحه

[حسن سليم]

الاسم حسن سليم

العمر 29 عام

العمل صيانه واصلاح الاجهزه الالكترونيه

من حوالي 15 سنه وانا عندي 14 سنه وعيت لاقيت نفسي بحب الشغل

بالرغم اني كنت زي اي واحد ممكن ابوه يصرف عليه ويبقا عايش حياته تمام

انا لاقيت جوايه حاجه شداني عايز اشتغل بأي طريقه

اول المشوار اشتغلت في محل جمله بقاله لمده اسبوعين كان الشغل مرهق قوي بالنسبه ليا

وبعد كده اشتغلت لمده 8 ساعات في مصنع مركزات اعلاف وهذا شغل فعلا لا يطيقه مخلوق تربي في بقه معلقه فضه مش دهب لان ابويا مش غني قوي بس ابويا كان بيشتغل في بنك طبعا كلكم كدا عرفتم المقصود

حسيت اني بدأت افشل وكلام صحابي وكده يعني طبعا مش يأست فكرت اشتغل في اصعب شغلانه في ذلك الوقت

وهي فحر الطرق لانشاء عمليات الصرف الصحي والحمد لله نجحت وقعدت اشتغلت 12 يوم بس زهقت من المكان اللي بنام فيه مش من الشغل لان مكان معفن كله صراصير وفيرا ن طبعا دا كله كان بيحصل من ورا والدي لو كان عرف كان دبحني دا اول طفل له بعد 7 سنين زواج

بس كده قدام نفسي نجحت وبدأت بقا اشتغل الشغل اللي انا هاويه وهو الالكترونيات

واشتريت العده والحمد لله اشتغلت واتعلمت التجاره كنت بشتري مستعمل واصلحه وابيعه

كان المشوار مش سهل وبرده مش صعب

دلوقتي بقا انا عايز ابقا راجل بيزنس معايا حوالي 50 الف جنيه ثمره تعبي وشغلي

وعايز اعمل حاجه اتاجر فيها وكل ما افكر اعمل حاجه الاقيها عايزه كتير اوي

فكرت اشتري عربيه طيب الفلوس هتروح في العربيه واشتري البضاعه منيين

المهم انا عايز بقا اريح جسمي من الشغلانه دي انا عندي 29 سنه لو حد شافني فيكم هيديني 39 سنه

نظري ضعف وعنت بزهق بسرعه

وعايز النصيحه وانا اسف طولت عليكم

وعلي فكره تانيه انا الحمد لله عندي شقه واتجوزت وعندي طفلين

وياريت تنصحوني لاني محتار

[badroora]

الاخ العزيز حسن سليم انا طبعا مش هنا عشان انصحك لانى للاسف مش بافهم فى المشاريع والحاجات دى

وهنا الاخوة ماشاء الله عليهم افكارهم حلوة وممكن فعلا يفيدوك اكثر منى

انا هنا بس عشان احييك على مجهودك وكفاحك وصدقنى هتوصل وهتكون رجل اعمال كبير فى المستقبل ان شاء الله .

دايما لما اشوف انسان ناجح عمرى ما انظر له من الحال اللى هوعليه دايما كنت ابحث عن سيرته الذاتية ومن اكثر

الناس نجاحا هما اللى كافحوا وعافروا مع الحياة .

صدقنى الحياة السهلة على قد ماهى رافاهية بس بتكون حياة ملهاش معنى لانك لا حستها ولا عملتها ولا ساهمت فيها

لاقيتها جاهزة وخلاص 29 سنه .

لسه صغير ومش كبير ولا حاجة بخصوص النظر ممكن تعمل Lasik or laser ( تصحيح النظر بالليزر ) ب 3000 جنية من اللى معاك دول وهترجع

شباب 10 سنين

وابدا المشروع ب 47000 جنيه .

برافوا عليك فعلا وربنا يوفقك يا رب وتحقق كل اللى بتتمناه

بدرية

تم تعديل 20 يونيو 2008 بواسطة Badria Mekkawy

[حسن سليم]

اشكرك علي رسم الامل لي

اشكرك علي الردود الجميله والممتعه

حسن سليم

[kotb88]

السلام عليكم

اولا استاذ حسن على فكرة انت راجل بجد

وربنا يكرمك

انا عندي ليك فكرة كويسة على قد خبرتي ....... انا معنديش خبرة عملية كبيرة

بوص يا سيدي

انت بتقول انك كنت بتحب الالكترونيات والكلام ده واشتغلت فيه طول التسع سنين اللى فاتوا

طب ليه متشتغلش فيه هو هو بس على توسع يعني ازاى ..... اقولك انا ..... انا هقولك على البدائيات وانت هتعمل للموضوع دراسة جدوى على كبير

فيها ايه لو اجرت شقه في مكان نضيف وجبت اتنين فنيين خرجيين صنايع قسم الكترونيات عملتلهم دورة تدريبية بسيطه كده لمدة اسبوع فى التخصص ده حته يعني انت اللى تديهالهم من خبرتك

مع شوية دعايا واعلانات مثلا في جورنال الوسيط او اى حاجه مع التعاقد مع توكيل من توكيلات الالكترونيات او قطع الغيار يدولك قطع بسعر ارخص من السوق وطبعا مش هقولك تعمل ايه انت ادرى بشغلك يعني

بس برضو الموضوع محتاج دراسة جدوى يعني شوف حدد متخصص في التخطيط

والسلام عليكم

[حسن سليم]

اشكرك علي تلك النصيحه

طيب ايه الجديد يا استاذ قطب

انا عندي شقه دور ارضي في احسن مكان في البلد اللي انا عايش فيها

وبنزل باب اللوق علشان اشتري قطع الغيار

وعندي فني كمان معايا

بس المشكله ان الشغل مش زي زمان ليه بقا يا سيدي

زمان كان اقل جهاز ب 1000 جنيه دلوقتي ب 100 جنيه

طيب انا لو استمريت في نفس المجال المكسب قل قوي قوي

وانا تعبت مهما كان الفني عمره ما هيخلص الشغل كله

لا زم يسيب الصعبه للي عنده خبره طويله

ويا سلام بقا لو جهاز رخيص وفيه عيب يطلع روحك والاخر تصلحه بعد تعب كتير وتيجي تطلب اتعابك يقولك ليه

هو انا هشتريه

طبعا انت مشكوررر اقوي اقوي

واتمني لك مستقبل جميل يا رب

وربنا يكرمك

اخوك حسن سليم