مطبخ العُزاب .........عفوا ممنوع دخول الغير عُزاب .!!!

[aimen]

قلت ايه ؟ لو عاوز نتقابل اى يوم وتستلم الجثة ( الحاجات على هارد 800 GB يعنى جهز مساحة محترمة )

ربنا يجعل هارديسكات المؤمنين عمار ...

هارد 800 جيجا ؟!!!! إنت قصدك سيرفر صن وعليه يونكس أوبريتنج سيسم ؟ :unsure:

عامة يا عم أيمن يشرفني معرفتك وبإذن الله ننسق مع بعض واجيب التريلا و4 عمال بنغاليين ونيجي نستلك السيرفر بالراك بتاعه ... بس أنا ما بأعرفش يونكس :sad:

اهلا سى السيد

هو بصراحه الهارد مش 800 دا 1000 جيجا على فكرة الجديد منه سعره 750 ريال فقط فى الحراج

زمان كان عندى هارد 4 جيجا واعتقد انى لو دورت فى البيت سوف اجده ...من 4 جيجا الى 1000 جيجا

انا زيك كمان صعقت لما سمعت الرقم بس ولا يهمك احنا قدها

شوف لنا العمال ومساحة مناسبة عندك و احنا ندفن الجثة ان شاء الله .............. ويجعله عامر ان شاء الله

[aimen]

الاخ العزيز أيمن ........الف الف مبروك الميكرويف ربنا يديك خيره ويكفيك شره :unsure:

ازاى تشغله

شوف هتلاقى معاه 2 كتالوج واحد مختصر والتانى مطول ..خليك فى المختصر .

واقرا طريقة تشغيله ونوع الاكل اللى بينطبخ على انهى درجة .

انا عن نفسي لا احبز طبيخ الميكرويف الا القصير منها يعنى شوى وسلق والحاجات دى

لا انا اخاف من الاشعة الكهرومغناطيسية اللى مسئولة عن التسخين .

مبدئيا

شوف اللوحة الامامية للميكرويف هتلاقى

مكتوب ....زى استارت .. ميكرويف ولا جريل ولا اكسبرس

عند التسخين مثلا اختار ميكرويف واختار التايم من اللوحة انا بتكلم على اللى عندى

بقولك ايه اقرا الكتالوج او هتلى صورة الميكرويف والموديل بتاعه وانا اجيب قراره من ع النت واقولك تتصرف زاى

لان المكيرويفات تختلف عن بعضها .

والف الف مبروك ........ :sad:

الله يبارك فيكى وعقبال ما نفرح لك بالعريس ان شاء الله

ماهو انا قرأيت الmanual الخاص به بس حاجات كثير ومتشعبة دى لخمة ايه دى ياربى ؟

وارجع للبوتجاز العادى ...مافيش تفكير ولا درجة حرارة ولا ولا ....ياعم دى عالم فاضية ..... خلينا وراه لما نشوف لنا صرفة فيه

اه افتكرت زمان كنت بطبخ بس بصراحة طبيخى لى فقط يعنى لا ينفع للإستهلاك الأدمى

طريقة عمل اى خضار فى الدنيا

المكونات :

كيس خضار مشكل ( ماهو انا معنديش مرارة يعنى اجيب حاجه خضراء واقعد اقطعها )

شوية ملح

مياة

صلصة

هات حلة وحط شوية زيت

سخن الزيت شوية

وقشر بصلة وارميها فى الحلة

بعدين

اديها صلصة وخليها تغلى شويه

ارمى الخضار والملح وزود شوية مياة

وروح اتفرج على التليفزيون

وسلم لى على ابله نظيرة

ان شاء الله فى المرحلة القادمة طريقة عمل الرز

[badroora]

معقولة ...العزيز مصري جدا بيستأذن للدخول يا خبر دا انت مكسب لينا يا فندم .. اتفضل

اتفضل اختارلك اجدعها مرتبه وجنب اخوك س س :closedeyes:

دعوة عامة

الاخوة الاعزاء

يشرفنا فى مطبخ العزاب استقبال جميع الاخوة ....زوى الحالات الاتية :

العزاب .........

المتزوجون ........وعزاب بصورة مؤقته .

المتزوجون .......وفى مشاكل مع ......زوجاتهم

الاخوة المطلقون ... لا قدر الله اهلا وسهلا بكم

اللى على وشك طلاق بردوا يا اهلا وسهلا.

الاخوة .......على وشك خلع ممكن نفكر فى امره

محدش يستأذن فى الدخول ........المكان مكانكم .

نجفة الضب

مهدئة النفوس :closedeyes:

تم تعديل 1 يوليو 2008 بواسطة Badria Mekkawy

[المصـــــــرى]

المتزوجون ........وعزاب بصورة مؤقته .

المتزوجون .......وفى مشاكل مع ......زوجاتهم

اللى على وشك طلاق بردوا يا اهلا وسهلا.

دى أكيد مرحلة اليأس.

[iloveegypt]

طيب اللى مراته قرفاه ومطلعة عيناه بس ولاعارف يطلق ولاهى عايزة تخلعه ممكن ينضم ليكم

:closedeyes:

[النيل حبيبي]

المتزوج ---- عازب بصورة مؤقته

بعد إذن الكابتن/بدورررررة

تسجيل النيل حبيبي الاولاد مسافرين الاسبوع القادم بمشيئه الله

ان شاء الله معاكم لغايه قبل رمضان الكريم وححصلهم

اطلعت على قوانين مطبح العزاب وبحب طاجن الباميه باللحمه

[المصـــــــرى]

طيب اللى مراته قرفاه ومطلعة عيناه بس ولاعارف يطلق ولاهى عايزة تخلعه ممكن ينضم ليكم

:closedeyes:

أكيد يا باشا،ده ينضم تحت بند

"محدش يستأذن فى الدخول ........المكان مكانكم "

تم تعديل 2 يوليو 2008 بواسطة المصـــــــرى

[مصري جدا]

الأخ اللي بتحب مصر

طيب اللى مراته قرفاه ومطلعة عيناه بس ولاعارف يطلق ولاهى عايزة تخلعه ممكن ينضم ليكم

:lol:

لا... :closedeyes: ..بكده حنلاقي كل اللي في المحاورات ...واللي في المنتديات اللي جنبنا ..واللي في الشارع اللي ورانا ...وااللي حتي معندهمش نت جايين معانا :blink: ...بس حأقولك ايه ...ده أنت بتحب حبيبتي ومقدرش أردك .....بس خليها في سرك

وماتقولش لحد....أتفضل :closedeyes: .......

[باهى الطائر الحزين]

( الكريم )

مابينساش حد

!&!

[matroh]

اختي بدور.. .....توبيك مغذي والله.. :wub: .......بس انا عندي طبخه كدا بس مش عزابي اوي يعني بس بحبها ولذيذه.......ممكن تاخد وقت بس الطعم يستاهل والله....أدوس ولا امشي.................

موضوعكم فظييييع مش عارفه امسك نفسى من الضحك

باذن الله هافيدكم في موضوع الربع ساعه دى

[باهى الطائر الحزين]

النهارده اتغديت في البيت

طبق بصاره شحاته من الجاره

عارفاني بحبها

المحروس ابني بسلامته

محمر حلة كبده عجالي

مع سلطة رنجه

عترت في حتة لحمه بايته

في التلاجه

و

لسه داخل من المستشفي

اه ياني يابطني

بتكلم جد وربنا

اهئ اهئ ...

:cry:

[باهى الطائر الحزين]

كلت صباع كفته عضمايه صغننه كسرت ضرسي

الواد ابني ابن 30X35 قلتله بلاش هوهو خليك في نونو

خفيف شويه علي المعده وكده مابيسمعش الكلام خالص !

قليل البخت يطلعله العظم في الكفته ...

[باهى الطائر الحزين]

النهارده اشتريت سمكتين اتنين

تلاته كيلو وربع !

طبعا شاكك في ميزانهم لكن هما كبار فعلا

المهم خليت الراجل شواهم سنجاري

عيش وسلاطات وحركات واحلامي مسبقاني

علي البيت .. المهم وصلت واول ما دخلت

قلت للمحروس ابني حط الطبيله وافرد الأكل

علي بال مغسل ايديه ..

رجعت لقيته طابق في السمكه الكبيره

قلتله يا ابني مش عيب تاكل من غير ماتستناني

وكمان تاخد السمكه الكبيره

قالي لو انت مكاني هتعمل ايه

قلت له هاخد الصغيره طبعا

قالي اهي قدامك اهي :cry:

ههههههه

:buba:

حدث بتصرف ...

[باهى الطائر الحزين]

الخميس قبل اللي فات اتحرق الكاتل

وعلشان تعمل كباية شاي علي البوتاجاز

عذاب القبر اهون

المهم نزلت ادور علي واحد ماركه ملقتش !

الصين احتلت البلد ..

طلبت صديقي النكدي جمال مضطرا

نكدي نكدي يعني وبينضرب بيه المثل

يقال انكد من جمال ..

وعلشان هو شغال في هذوها المجال

تاني يوم جاب لي واحد هديه !

متشكرين وماشي الحال ..

المشكله بقي علشان تسنتر تجويف البراد

علي قائم القاعده ابقي قابلني ؟

في جهنم طبعا

من اسبوعين بتعذب لدرجة هبطل الشاي

اهئ اهئ

ماله الوسكي !! :beee:

تم تعديل 10 أبريل 2015 بواسطة باهى الطائر الحزين

[باهى الطائر الحزين]

من سنتين

محمد صاحبي مهندس في شركة المقاولين

كان يوصي عمال عنده من اسوان

يجيبوا فسيخ معاهم مقابل اجازه اسبوع

نتواعد في يوم ونروح عند صديقنا سلامه

الله يرحمه

بصل خل ليمون عيش ولحيتنا نعيش ..

ومن ساعة ما سلامه انتقل لجنان النعيم

بطلنا الحكايه دي او يمكن انشغلنا ؟

المهم التلات ياللي فات اتصلت علي محمد

وكان لي مده مكلمتوش

معنديش دم حقيقه ..

المهم باشا اخبارك وسلامات وطيبون كمقدمات

ايه رأيك نتقابل في شم النسيم

ووصي لنا حد من عمالك علي فسيخ

ضحك ضحكه فهمت انا معناها يعني ( مصلحجي

اتصالك علشان الفسيخ مشعلشاني ..

وقال لي ياباشا انا اتنقلت في الإداره

وسبت المواقع من سنه وشويه

نتقابل الجمعه ونظبط .. ماشي ياباشا تمام

سلام

حقيقي مش عارف هو نسي الجمعه بقفل تليفوناتي

وبعتكف ولا قاصدها ؟! :buba:

لينا رب ...

[باهى الطائر الحزين]

نحو تجديد الخطاب الشم نسيمي

وإمتثالا للصلف الصالح من ابناء ديني

بعد ان حرم العتل الزنيم الفسيخ والرنجه

وعملا بنصيحة وزارة الصحه الموقره

بعد ان دست انفها في صفيحة الملوحه المقعره

وبراميل الفسيخ المدوره وافادت بأن الريحه بها

معطره واصدرت قرارها المعتبر في نشرة اخر خبر

وسدت نفسنا بتصريح كل سنه ..

وبعد ان تخلي الفسخاني الشهير عن الماركه المسجله

عالية الجوده وسابقة التحضير ولأن الأمر جد خطير

ولكوني

مصر اركب الموجه سأتحايل وآكل بكره انشوجه ...

[باهى الطائر الحزين]

البطارخ حرام شرعا

من باب التذكره ونسأله المغفره ...

تم تعديل 13 أبريل 2015 بواسطة باهى الطائر الحزين

[باهى الطائر الحزين]

ومن باب المنظره

انبارح اكلت باميه ...

[أبو محمد]

ومن باب المنظره

انبارح اكلت باميه ...

وانا النهار ده أكلت بامية .. بس من باب مكايدة التجار

البامية دى أم محمد مفرزاهة من أواخر الموسم اللى فات

بتسلقها سلقة بسيطة وبعدين تحطها فى مية ساقعة

وتعبى فى اكياس وعلى الفريزر

وآدى احنا بناكلها بسعر4 جنيه وهى فى السوق بـ 22 جنيه

خللى باميتهم فى حضنهم بقى

[باهى الطائر الحزين]

فوائد العدس الكبيرة تتجاوز سمعته واستعماله الشعبي الشائع، وفي ما يلي بعضها:

يحتوي كمية كبيرة من البروتينات النباتية.

يساعد قشر العدس على مكافحة الإمساك.

يحتوي العدس على الكالسيوم والفوسفور والحديد.

يمد الجسم بالطاقة.

كشفت دراسة علمية حديثة أن تناول شوربة العدس يقي من الأورام السرطانية. وأوضحت الدراسة أن العدس يعدّ مضادا لنمو الأورام في جسم الإنسان. ونصحت الدراسة بتناول شوربة العدس مع الكركم إذ إن تناولهما معا يفيد في زيادة المواد المضادة للسرطان.

وينصح بتناول العدس في الشوربة للاستفادة من فوائده الكثيرة، وأيضا مع الأرز، لاحتواء الأخير على أحماض أمينية يفتقدها العدس، وبذلك فإن تناول الأرز مع العدس يجعل كل واحد منهما يكمل الآخر غذائيا.

(دويتشه فيلله)