مطبخ العُزاب .........عفوا ممنوع دخول الغير عُزاب .!!!

[badroora]

اضافه بس صغيرة.....معلش يا بدور...........ساعات بعمل جنبها صوص زي الباشاميل بس اخف شويه وعلي الوش بجد بيكون حكايه.......امشي بقي بدل ما انضرب :wub:

الغالية شيكولا ............... تسلم ايدك الوصفه جميله جدا عاوزة الواحد يكون اجازة 4

ايام على الاقل عشان

لزوم الطبخ وغسيل الاطباق ......... والراحة بينهم ..بس حلوة تستاهل المغامرة

تعالى هنا .........لماذا لم تذكرى كام من الوقت تستهلك ؟

وكم طبق ومعلقة يتم غسليهم ؟

مش عارفه ان الموضوع دا مهم جدا بالنسبة لى

شكرا يا قومر وفى انتظار اكلات جديدة بس بليز ابقي راعى الوقت وعامل الغسيل مهم جدا .......

[galaxy]

هتاكليها وتدعيلي يا بدور :sad:

الموضوع مش هيتعدي غسيل حله سلق المكرونه....وطبعا دي مش مشكله لانها اصلا نظيفه ........الا بقي لو كنتي هتسيبي المكرونه لحد ما تلزق et:( ....وكزروله الصلصه .......ويا ستي ابقي اقلبي فيها المكرونه ولو عايزة كلي فيها كمان..........بس انا بحب اقدمها في طبق وجنبها الصوص......حني لو باكلها لوحدي عشان بجد بحس ان التقديم نص الاكله وبيفتح النفس عشان اكل بمزاج :wub:

.وبعدين مش فاهمه زعلانه ليه من غسيل الاطباق wst:: ........دا هوايه عندي :wub: ..........بس انتي اغسليهم اول ما تخلصي وهتلاقي الموضوع سهل بجد............وابقي البسي جوانتي يا ستي عشان ايديكي وبشرتك

والي طبخات وحركات اخري............................ :wub:

تم تعديل 21 يونيو 2008 بواسطة galaxy

[moheltohamy]

أولاً ، شكراً لجالاكسي ع المكرونة ... وبلاش أقول أي تعليق تاني ... شكراً وبس

ماشي يا بدارة ... بعد الترحيب اللي ما اقدرش أقاومه ده ، مضطر أدي حصة الطبيخ بتاعتي

ونتكلم في كمية لفرد واحد أو فردين...

المكونات:

ربع كجم صدر رومي (بيتباع كده)

4 بصلات متوسطة الحجم

كوب زبادي

ملعقتين كاتشب

ملعقتين خل

نثرة قرفة بودرة (لإعطاء النكهة فقط)

ملح - فلفل اسود

ربع فنجان زيت

الطريقة:

- نقطع صدر الرومي شرائح رقيقة بقدر الإمكان

تحضير المارينيه

- نبشر البصل (نلبس جوانتي طبعاً - البصل ريحته ما بتطلعش م الإيدين لمدة يومين) بالناحية الناعمة من المبشرة ، ونصفيه بمصفاة شاي ، أو بقطعة شاش ، لنحصل ف النهاية على عصير بصل (مياه بصل) ، ونضعها في طبق عميق.

- نضيف الكاتشب وكوب الزبادي والخل والملح والفلفل والقرفة ، ونقلب في الطبق العميق. ونضع شرائح الصدور. ونتركها على الأقل 8 ساعات (أنا كنت باسيبها لتاني يوم) ، مع التقليب كل ما نمر ع المطبخ.

التسوية

- طاسة كبيرة ع البوتاجاز على نار هادئة ، ونضع فيها كمية الزيت ، ونرص شرائح الصدر ، وكمية كافية من المارينيه. ونقلبها من وقت للتاني. سيتكفل المارينيه بتسوية الصدر (ولحم الصدر أساساً بيستوى بسرعة) ، وعندما يتبخر ستكون خلاصة البصل قد تشربها الصدر (تركيز الطعم) ، وبعدها سيتكفل الزيت بتحمير الصدر. (لن يحمر الصدر إلا بعد تمام تبخر المارينيه)

- نطلع الكمية اللي خلصت على طبق ، ونكرر العملية مع باقي شرائح الصدر المتبقية ف المارينيه.

وبعد الانتهاء قد نحتاج ندخل الكمية الأولى الميكرو ويف تسخن ، ده لو كانت ما إتاكلتش لغاية الكمية التالية تستوي! wst::

يستحسن تقديم صدور الرومي بالمارينيه مع الأرز بالمكسرات وشوربة الطماطم. لكن كل واحد وذوقه.

جربوها ، وبعدين ابقوا قولولي رأيكوا!

بي. إس. :

الطريقة دي من شيفات التغذية اللي كنت باشرف على شغلهم أيام ما كنت في مصر. طبعاً أنا غاوي تذوّق ، ودايماً باسأل ، وبالتالي كنت تلميذ مجتهد عند الشيفات دول :wub:

[ELSHAMY]

بدورة....

تعليقا على الوصفة السريعة للبيض المقلى .....انا فى المرة الوحيدة اللى دخلت فيها المطبخ عملت كده بس بدل السمن حطيت عسل نحل..... أصله شبه السمن.... wst::

مش عارف ليه طعم البيض كان متغير... :lol:

ودى كانت أول و أخر مرة أدخل المطبخ...

[se_ Elsyed]

دكتور شامي ... مرحباً بك في نادي العُزاب ..

--------------

انا مش هاتكلم كتير ... ندخل في المفيد على طول ..

أول أكله سميتها " إقرو الفاتحة لأبو العباس " وماحدش يسألني إشمعنى الإسم ده بالذات ... هي بتيجي كده ..

ودي كنت باكلها في العشا وأنا بأتفرج على التليفزيون وتحديداً برنامج " الإتجاه المعاكس "

مقادير إقرو الفاتحة لأبو العباس ..

- نص كيلو لحمه بتلو متقطعة شرايح متوسطة الحجم عاملة زي الشرايح بتاعت الأستيك كده ..

- نتبل اللحمة في بصلة مفرومة وشوية خل وملح وبهارات وحركات ..

- طماطميتتين ( هما إتنين توميتو بالإنجليزي يعني )

- بصلاية متوسطة

نترك اللحمة في التتبيلة نص ساعة أو ساعة قبل البرنامج ما يبدأ

نقطع الطماطم شرايح شرايح - كاملة ومستديرة - وكذلك البصلاية ..

نطلع اللحمة من اللتبيلة ... ونبتدي نرصها في ورق ألمونيوم .. راق لحمه وراق طماطم وبعدين راح لحمه وراق بصل ... وهكذا لحد ما نوصل قول خمس أدوار ... ونروح لفين المسائل دي مع بعض .. وهكذا إلى أن ينتهي النص كيلو .. وقول ممكن يعملنا 3 حركات من دول ...

ونروح مولعين فرن البوتاجاز على درجة حرارة 200 مئوية ... ودافسين الحاجات دي فيه .. وسايبينه بتاع نص ساعة ....

وبجد بجد .. هاتكل حاجه رائعة وطعمها بيجمع بين الشاورما وبين الإستيك ...

وتكون مجهز جنبها شوية مخلل أو خساية غاسلها كويس ... الخس بيحب اللحمه قوي ...

ويا سلام بقى لو صاحب مزاج مثلي وتكون محضر قفص " كرز " اللي هو ده ...

أو مشمش .... وتهضم بيهم الاكلة الخزعبلية دي ....

------------------------------------

ثاني أكله عشان البيه ...

ياما كلوا ياما ماتو

دي صينية بطاطس بس very simple

للناس اللي ما بيحبوش الصلصة والتسبيك بتاع الأكل

- كيلو بطاطس مش مفعصة ونقطعهم شرايح ..

- طمطاطيتيين ( إتنين توميتو برضوا زي اللي فوق بتوع ابو العباس ) ونقطعهم شرايح

- قرنين فلفل رومي ونقطعهم شرايح

- بصليتين ... شرايح

( ده بقى درس تشريح مش طبيخ ده !!!! )

- عدد واحد فرخايه من عيلة محترمة وما يكونش حد في عيلتها عنده المرض البطال .. ونقطعها ( شرايح برضوا يا معلم ؟ ) لأ يا لمض ... دي تتقطع أربع تربع كده ..

- ملح وفلفل وحرمات

- معلقتين سمن أو زيت ذرة حسب المزاج العالي

ندلق الخليط العجيب ده كله في الصينية ... وندفسه في نفس الفرن اللي درجة حرارته 200 لمدة نص ساعة ...

والاكلة دي بتتاكل جنب الرز اللي سعادتك بتشترية جاهز ( الطلب بتلاتة ريال يكفي 4 أنفار .. بخاري أو برياني ) لإن حضرتك كل مرة بتعجن الرز ويبقى ملتوت ...

وبالهنا والشفا ...

------------------

الأكلة التالتة دي لها معزة خاصة عندي ... ودي من المطبخ السوداني ... وتؤكل يوم الجمعة بعد الصلاة ... لا قبل ولا بعد ... عشان الأثار الجانبية ...

" شوفوتو "

إسمها كده ... وما حدش يتتريق

- تُمن كيلو جبنه حادقة ( مِش .. من غير دود أو بدود حسب الطلب )

- معلقتين طحينة ...

- إتنين توميتو عشان ما اعرفش اكتب الكلمة الصعية دي ونقطعها صغنن صغنن

- خيارايه منزوعة القشر وتقطع مكعبات صغنونه ...

- معلقتين زيت زيتون قطفة أولى ...

- نص بطيخة حمرا ومرمله ومحطوطه في التلاجة لمدة ساعة على الأقل ودرجة حرارتها 15 تحت الصفر ويُستحسن تكون مخلية من القشر عشان الكسل .. مش لسه هانقشر ونتبهدل .

- عدد 5 أرغفة سخنة ملهلبة لكل فرد ...

- نص علبة زبادي لنطفأ بها نار الحُب .. قصدي المش ..

نخلط الخليط ده كله - واحد زكي هايروح خالط ده كله مع البطيخ ويودي نفسه في طوكر - ونلم بعضينا 5 أو 6 أنفار ونضرب الأكلة دي بالهنا والشف .... ونتلقح لحد ما بعد صلاة العصر لإنها أكله بتحب نوم القيلولة ...

------------------

الأكلة دي لمحبي دول حوض البحر الأحمر المتوسط

" مكرونيدس توناتيدز "

وأختنا " جالاكسي " سبقتنا ووضعت اكله شبهها بس مالهاش إسم

وهي بمنتهى البساطة عبارة عن مكرونة سيباكنتي ... ونحضر الصلصة بتاعتها على جنب .. ويا إما نبشر عليها جنبه رومي أو مودزريلا ... أو عشان تعيش أجواء حوض البحر الأحمر المتوسط ... ممكن تفتح علبه تونة وتحطها على الصلصة وتخلطها بالمكرونة مع بضعة قطرات من الشطة الحراقة .... وكُل وإدعي لي يابو أشرف ...

وإلى اللقاء في عمليات أخرى

[هشام عباس]

ههههههههه بصراحه عجبتني اوي اكلاتك يا س س وواضح انك اكيل قديم وحلوه اوي اقرو الفاتحه لابو العباس وهجربها النهارده ان شاء الله واقلك على النتيجه اما الأخت بدريه بجد شكرا ليكي جدا على الموضوع ده وانا همخمخ وابقى اقلكم على وصفه عزابي انما ايه حكايه هي بالنسبالي كانت كده ويلرب تبقى تعجبكم بس كمان شويه

[galaxy]

أولاً ، شكراً لجالاكسي ع المكرونة ... وبلاش أقول أي تعليق تاني ... شكراً وبس

شكرا :blink:

انا كدا فهمت............... wst:: ..........امشي؟؟؟؟؟؟ :sad:

انا قلت اقولك حاجه سهله ......للمحافظه علي تراثيه التوبيك بكونه اكل للعزاب فقط.............يعني حاجه في السريع كدا...لزوم العزوبيه والشغل والوقت الضيق.....لقيتك ماشاء الله فاهم مش حافظ. wst:: ..........بس عموما لو كدا بقي وغاوي وكدهوت يبقي ندخل في التقيل..........بس ارجع بس من الشغل ان شاء الله ولما ارجع بقي يحلها الحلال...... :lol:

بدور....... علي ما ارجع الاقي بتاع عشرين وصفه كدا بدل ما ادخل بتقلي بقي :blink: ...........وانتي عارفاني wst::

تم تعديل 21 يونيو 2008 بواسطة galaxy

[بندق أفندى]

يا دودو .. دلع بدرية .. طالما معاكى المكروييف هأقولك على حاجة بسيطة خالص

جيبى كم بطاطساسية واغسليهم وحطيهم فى كيس من بتوع الماكروييف

وشغلى عليهم كم ديقة مش عارف .. هتبقى مشوية

اعملى صوص عيارة عن زبادى مع معلقة مايونيز مع مسطرده (حسب الرغبة) مع ليمون مع ملح مع كمون مطحون

وكده عندك طبق جانبى سريع جدا

[النجم الثاقب]

يا سلام على المواضيع الجامده ... تسلم ايدك يا بدريه ... اتحفينا بالمزيد من اكلاتك الرهيبه wst::

شكرا يا جماعه على الوصفات اللذيذه .. ممممممم :blink:

والاكلة دي بتتاكل جنب الرز اللي سعادتك بتشترية جاهز ( الطلب بتلاتة ريال يكفي 4 أنفار .. بخاري أو برياني ) لإن حضرتك كل مرة بتعجن الرز ويبقى ملتوت ...

انا عرفت من واحد مصرى كان شغال زمان فى مطعم إن الرز ده بيتطبخ بميه من الحنفيه و دلوقتى هو شغال فى محطة ميه و مفيش و لا مطعم بيطلب منهم ميه .. انا كمان عمرى ما شغت وايت ميه واقف قدام اى مطعم غير مره واحده كان واقف عند مطعم مصرى .. يا ريت لو حد يعرف حاجه عن الموضوع ده يقول .. انا بطلت اشتريه شويه و بعدين الكسل عمل عمايله و مقدرتش ابطل و رجعت اجيبه تانى .. على فكره الطلب بقى بـ 4 ريال :lol:

سورى يا بدريه :blink:

[قائد المدفعيه الهولنديه]

سورى جدا يا جماعه الرد كان تلقائى ليس اكثر

[se_ Elsyed]

يا دودو .. دلع بدرية .. طالما معاكى المكروييف هأقولك على حاجة بسيطة خالص

جيبى كم بطاطساسية واغسليهم وحطيهم فى كيس من بتوع الماكروييف

وشغلى عليهم كم ديقة مش عارف .. هتبقى مشوية

اعملى صوص عيارة عن زبادى مع معلقة مايونيز مع مسطرده (حسب الرغبة) مع ليمون مع ملح مع كمون مطحون

وكده عندك طبق جانبى سريع جدا

يا بندق يا معلم يا طباخ يا قديم

حضرتك اان باكل البطاطس دي في حتة دين مطعم هنا إسمه " ستيك هاوس " ومع الأستيك والحركات بييجي يخيرك ويقول لك عايز مع الأستيك " فرنش فرايز ولا بيكد بوتيتو ؟ " البتاعة الفرايز دي نعرفوها وهي البطاطس المقلية اللي ماما كانت بتعملها لنا عالعشا عشان توفر ... لكن من ساعة قزازة الزيت ما بقى بـ 12 ج .. بقينا ننام خفيف ..

أما البيكد بوتيتو ... فيا مزاجو يا مزاجو يابو أشرف ... زبدة يا أخواتي زبدة ... وخصوصاً مع الصوص الهلامي اللي إنت قلت عليه ده ...

---------------------

بمناسبة المطاعم والأكل إسمعوا النكتة دي ... لسه واصله لي من مصر أولت أمبارح

واحد صياد مصري راح أصطاد سمكة كبيرة وروح البيت وهو فرحان .. فدخل على أم العيال وقال لها :

الصياد : جود نايت عزيزة ... أنا اصطدت سمكة قد الحوت النهادة ... قومي فزي أقليها لنا في شوية زيت .

عزيزة : عريفتوف شكري ... ما فيش عندنا زيت ... من ساعة ما بقى بـ 12 جيني وإنت حلفت بالطلاق ما يدخل بيتنا .

الهانتر : طب قومي إشويها لنا وأقصري الشر .

عزيزة : كيلو الدقيق بقى بأربعة جنيه وإنتي قايلي تحرمي عليه وتبقى زي أمي لو حباية دقيق دخلت البيت .

هانتر : طب إعمليها لنا سوشي .

عزيزة : ما باعرفش ياباني

راح الرجل متضايق وماسك السمكة راميها في البحر .. بصت له السمكة وهي بتعيط زفارة وقالت له ( تحيا جمهورية مصر العربية)

[badroora]

طاجن البامية باللحمة .

المقادير

حلة واحدة فقط وتيفال ....

بوتوجاز .......اشعال ذاتى

معلقة

صلصة طماطم علبة صغيرة

بصلة كبيرة

فلفل و ملح

كيس بامية مجمد

رُبع كجم لحمة لو نفر واحد

مكعب زبدة.

الطريقة

حُط الحلة على البوتوجاز + مكعب الزبدة + اللحمة بعد متقطعها مكعبات صغيرة جدا وهاقولك السبب ايه .

ابصلة خرطها خراخيط على قد معرفتك المهم مش تكون كبيرة اوى

فلفل ملح حسب الرغبة + باكو الصلصة

ادلق كيس البامية المجمد .

اغلق الحلة بالغطاء المحكم المناسب

وهدى النار اوى عليها ومن وقت لاخر ابقي شقر عليها وممكن تبقي تسربلها شوية ماية كل متلاقيها محتاجة .

مميزات هذه الطريقة

عدد الادوات المستخدمة حلة + غطاها+ معلقة + سكينه + طبق تقطع فيه البصل +وتغسل

فيه اللحمة + تغرف تاكل فيه بعد ما تخلص .

الغسيل ......مش كتير لان الحلة مش هتتغسل فى نفس اليوم والمعلقة والسكينة ممكن

تركنهم لما تجمع عليهم كمان طبقين عشان تبقي غسله واحدة.

الوقت ........من 20 الى 30 دقيقة .

وبالهنا والشفا .

تم تعديل 22 يونيو 2008 بواسطة Badria Mekkawy

[badroora]

العزيز التوهامى ........اكلتك جميلة ولو انها طويلة شوية ....طيب هل ينفع بدل شغلانه

البصل دى نعمله عصير فى العصارة ونخلص ولا لازم

يتقطع ويتعصر.!!!

جلاكسي .........منتظرة اختراعاتك ..........

النجم الثاقب ........ولا يهمك نحن الشمعة التى تحترك من اجل سعادة الاخرين انت بس

نفذ الاكل بالطرق المكتوبة وان شاء الله خير ......

..ومافيش داعى تدعيلي احنا اخوات :closedeyes:

س س ........ :) منك لله موتنى على نفسي من الضحك

انت مين بالظبط ؟ بطيخة مرمله ومِش و5 ارغفه لكل نفر .......يا نهار ابيض ونص كيلوا

لحمة تكله لوحدك .!!!

انت فعلا على راى امى اخد بالك من نفسك اوى لاء وتاكل ولازم تحلى كمان .......

على فكرة الكريز فى الاول افتكرتها تفاحة وبعدين ركزت فيها.

يلا فى انتظار ابداعات جديدة بس بمصطلحات عربي انت عارف معظمنا مش دايس فى العلام . :hi:

قائد المدفعية الهولانية ........انت داخل بايدك فاضية ليه ........اشترك حتى ولو بطريقة تقمير العيش ....... :rolleyes:

بندق ........حلوة طريقة البطاطس دى .......عاوزة طريقة الساور سوب برونز .....

ممكن .....سؤال تانى هو انت شيف ولا الطبيخ هواية.

تم تعديل 22 يونيو 2008 بواسطة Badria Mekkawy

[badroora]

بدورة....

تعليقا على الوصفة السريعة للبيض المقلى .....انا فى المرة الوحيدة اللى دخلت فيها المطبخ عملت كده بس بدل السمن حطيت عسل نحل..... أصله شبه السمن.... :hi:

مش عارف ليه طعم البيض كان متغير... :rolleyes:

ودى كانت أول و أخر مرة أدخل المطبخ...

طبعا الطعم لازم يكون متغير..لانك اكيد نسيت تشيك على انتهاء مدة الصلاحية كالعادة ......... :closedeyes:

استاذ هشام عباس .........يلا انزل باختراعاتك بس بليز عامل الوقت والجهد مهم جدا .......... :)

[galaxy]

احنا ليه يا جماعه ناسيين الاسماك.......الseafoodليه عندي معزة خاصه جدا جدا جدا :) ......ما فيش اسهل من تتبيل السمك الفيليه وقليه و.بالهنا والشفا......وبييجي جاهز يا بدريه..مالكيش حجه!!!

الطريقة.....روحي اشتريلك يا بدور كيلو ولا اتنين..........يعني شويه ثوم وملح وفلفل وكمون وكاري وبهارات سمك وحركات....وتتبلي .....وتسيبه شويه معقولين...............وتقلي بقي بالبقسماط او الدقيق براحتك.......بس البقسماط احلي :closedeyes: ...وجنبهم سلطه طحينه او سلطه بطاطس بالمايونيز .......ولا اسهل ولا اروع ولا اجمل من كدا... :rolleyes: ..

[النجم الثاقب]

النجم الثاقب ........ولا يهمك نحن الشمعة التى تحترك من اجل سعادة الاخرين انت بس

نفذ الاكل بالطرق المكتوبة وان شاء الله خير ......

..ومافيش داعى تدعيلي احنا اخوات :rolleyes:

يا نهارك ابيض يا بدريه ده انتى خدتى فكره وحشه خالص عن دعواتى ، بس إنتى الخسرانه .. بكره تحتاجى الدعوات دى .. أصل أنا واد مبروك :closedeyes:

[مصري أصيل]

أنا هشارك بأكله من أيام العزوبيه و هي تعتبر من تأليفي . طبعاً ماهو المضطر يطبخ الصعب ..

الأكله هي شبيهه بالبسطرمه بالبيض أو اللانشون بالبيض و خلافه ...

المره دي هنعمل هامبورجر بالبيض...

يتم تقطيع الهامبورجر الي مكعبات صغيره يعني 1 سم x 1 سم تقريباً . ثم يوضع الثمن علي النار ثم يوضع الهامورجر لتحميره ثم يتم إضافة البيض الي الهامبورج نسبة وتناسب .

مع قليل من الملح و البهارات حسب الطلب . أرجوا أنكم تجربوها و خصوصاً العزوبيه ...

[deemuck]

بعمل نفس وجبتك يا مصري أصيل . اطلع "امريكانا" - أحسن مذاق عندي - من الفريزر على المايكروويف على طول لدرجة سوى بسيطة أكملها على النار مع نسبة بسيطة جداً من الزيت وليس السمن مع التقطيع وإضافة البيض على كام شريحة من الطمام

وبعدين زحلقة الكل مرة واحدة في ساندوتش.

[deemuck]

التحضير لعدة طبخات شتى.............لأيام وأسابيع وشهور

اجلب 4 أو 5 أو أكثر كيلو من اللحم (واختار براحتك بدل شغل المطاعم) وضعه مع عدد من قطع البصل والفلفل الأخضر - الكشة - في حلة الضغط لمدة من 10 – 15 دقيقة وتعتمد على نوع اللحم إلي درجة ¾ سوى.

بعد ما الأكل يبرد وزعه على أكياس في حجم أكلة واحدة ثم أدخلهم الفريزر.

لتحضير وجبة سريعة.

قبل ما تروح الشغل طلع كيس واتركه خارجاً ولما ترجع ضع الكيس كما هو في طاسة أو حلة ومعه أي كيس خضار. وتبقى الأكلة انتهت ولا تقطيع ولا غيره ، وفي طاسة واحدة.

[النجم الثاقب]

بصوا بقى الوجبتين دول ينفعوا يبقوا وجبات عشاء :

الوجبة الأولى :

المكونات : بطاطسايه حجم متوسط + علبة تونة مفتتة + كام عود بقدونس + ملح و فلفل ( مهم ) + خبز

الخساير : كسرولة و شوكة وممكن تتاكل فى طبق او فى نفس الكسرولة

الطريقه : نسلق البطاطس و بعدين نقشرها ونهرسها و نضيف عليها التونة و البقدونس بعد ما نقطعه و الملح و الفلفل و بس

المدة : محسبتهاش بس تقريبا مفيش لأن ممكن نسيب البطاطس تتسلق و نروح نعمل اى حاجة تانية و ممكن نسلق كام بطاطسايه عشان نريح دماغنا لو هنعمل الأكله دى تانى .

الوجبة الثانية :

المكونات : عدد 2 كيس إندومى + علبة تونة مفتتة + ممكن بقدونس + فلفل اسود ( مهم )

الخساير : كسرولة و ملعقة وممكن تتاكل فى طبق او فى نفس الكسرولة

الطريقة : قبل ما نفتح أكياس الإندومى .. نكسر الإندومى اللى جوه كويس ، فى نفس الوقت هيكون فى ميه بتغلى على النار نفرغ الكيسين + الإضافات اللى بتيجى معاهم فى الميه و نسيبهم يغلوا لمدة خمس دقايق و بعدين نصفى الميه و نضيف التونه ولو فى بقدونس + الفلفل الاسود و نقلبهم على بعض و بعدين ناكل .

المدة : هما الشوية اللى بيتعمل فيهم الإندومى .

و بالهنا و الشفا