سؤال للأخوة في قطر

[aghanem]

أولا أريد تحيتكم علي كرم أخلاقكم وروحكم الحلوة في المنتدي

وثانيا لي إستفسار

جالي عرض عمل في قطر 6000 ألاف ريال والسكن وتذاكر السفر لي ولأسرتي عليهم

والسؤال

ما تكلفة تعليم الأطفال في المرحلة الإبتدائية في مدرسة لغات في قطر؟

هل صحيح أن تأشيرات العمل للمصريين تتأخر؟

طلبوا في قطر صورة جواز سفري ولم يطلبوا جوازات أسرتي هل معني ذلك أنني سأسافر أولا ثم يتبعوني وهل هذا طبيعي؟

[osmel33]

أولا أريد تحيتكم علي كرم أخلاقكم وروحكم الحلوة في المنتدي

وثانيا لي إستفسار

جالي عرض عمل في قطر 6000 ألاف ريال والسكن وتذاكر السفر لي ولأسرتي عليهم

والسؤال

ما تكلفة تعليم الأطفال في المرحلة الإبتدائية في مدرسة لغات في قطر؟

هل صحيح أن تأشيرات العمل للمصريين تتأخر؟

طلبوا في قطر صورة جواز سفري ولم يطلبوا جوازات أسرتي هل معني ذلك أنني سأسافر أولا ثم يتبعوني وهل هذا طبيعي؟

اخى الكريم أولاً فيه شوية حاجات عايز استفسر عليها منك علشان أقدر أفيدك أولاً الراتب بسيط وتكلفة الحياة هنا صعبة جداً والمعيشة غالية

أما بخصوص تذاكر السفر أولاً تذاكر السفر سنوية ؟ ولا تذاكر ذهاب لأول مرة والعودة النهائية؟ يعنى المحصلة المكان بيدفع فقط تذكرتين لكل فرد ذهاب وعودة لأنها تفرق كتير

طبعاً مسألة السكن دى أفضل مافي الموضوع لأن كل شخص بيحاول يجي قطر بحذره من الموضوع ده لأن السكن مش عارف أقولك أيه ممكن يكون أكثر من الراتب قطر أغلى سكن فى دول الخليج وسؤالى بخصوص السكن هم هايدوك سكن ولا بدل سكن ولو كان بدل سكن كام بالظبط ؟

بالنسبة لتأشيرات المصريين المكان قدملك عليها من امتى علشان نقدر نحكم التأشييرة أتأخرت على الطبيعى ولا لأ

تكلفة التعليم اسمحلى بالكود ده طبعاً هنا فى المدرسة الجميلة المصرية للغات واللى زى بالظبط مدارس الحكومة عندنا فى مصر ونبقى كمان بنظلم مدارس الحكومة مدرسة سيئة جداً بس أفضل حاجة فيها أنها رخيصة يعنى تعملها حوالي من 4000 إلى 5000 ريال فى السنة، أما اذا كنت بتتكلم عن مدرسة دولية فهنا كل المدارس الدولية من كامبردج الأرقم ونيوتن وغيرهم كتير بس مصاريف الكى جى فتبتدى من 10000 ريال فى السنة

بخصوص الإستقدام انت الأول بتيجى لحالك يعنى لوحدك وبعدين انت اللى بتقدم للأولاد على التأشيرة لهم ودى ما فيهاش مشكلة خالص

سؤال أخير حابب أعرف المكان اللى انت رايحه شركة خاصة ولا أيه ؟وأيه طبيعتها علشان ممكن أفيدك بالراتب والإمتيازات المفروض تكون كام، وأخيراً تمنياتى بالتوفيق

[samehelassad]

السلام عليكم ورحمة الله وبركاتة:

الاستاذ ا غانم انا عاوز اقولك ان الحياة في قطر غالية بس المرتب اللي انت جاي علية مش بطال لو هيكون السكن والتذاكر عليهم بس لازم يكون دة في العقد والسكن يكون عائلي يعني شقة اوضتين وصالة والا هتلاقي نفسك في حيص بيص ومش لاقي سكن الا ملحق في فلا اوضة وصالة ومخطط لمطبخ بس فشل وب اربعة الاف ونص وزمايلك بعد ماتقولهم على السكن دة يقولولك برافو عليك والله انك لقيت سكن كدة. واتاكد بالنسبة لتذاكر الولاد السنوية.

بالنسبة للمدرسة المصرية فهي مش للدرجة اللي زميلنا الكريم بيقول عليها وعمموما المدرسة المصرية العربي فتحت فيها قسم للغات يعني دلوقتي في قطر فية مدرستين مصريتين للغات والتالتة عربي والمستوى التعليمي او بالاصح المنهج المصري معروف هنا على مستوى المدارس كلها انة منهج قوي والطالب اللي بيمتحن امتحان قبول في اي مدرسة دولية وبيكون خريج المدرسة المصرية بينجح فكبداية تعتبر بداية ممتازة ولو نويت ترجع مصر لافي معادلة لشاهدتة ولا تغيير في المنهج ولا مشاكل

وفي الاخر استخير الله وتوكل على الله واتاكد من الاسئلة دي وتعالى البلد حلوة وهتتبسط بس الشركة تكون محترمة في كلامها معاك والعقد يبقى في ايدك وتوثقة عشان تعرف تاخد حقق واعرف حاجة واحدة بس ودية تحطها حلقة في ودنك

لا وعود في الخليج اللي بتيجي علية مابيتغيرش فغير من عندك قبل ماتيجي وتزعل او تندم او لامواخذة تاخد بمبة

[aghanem]

شكرا يا جماعة علي ردودكم

أستاذ osmel33

أستاذ samehelassad

هما حتي الأن ماردوش عليه بعد المقابلة وبعد ما طلبوا صورة جواز السفر

ولما إتصلت وسألت قالوا التأخير من التأشيرة والموضوع ده بقالوا 5 أشهر

علي العموم كل شئ نصيب