هل يستطيع زوجى عمل زيارة لوالدى ووالدتى فى رمضان

[زهرة البحر]

[font="Arial"]السلام عليكم ورحمة الله وبركاته

اخواتى واخوانى المغتربين

اهلا بكم فى الغربة المرة ولو ان الحياة فى مصر حاليا اصبحت اكثر مرارا على ما سمعت

انا عضوة جديدة فى المنتدى وحقيقى منتداكم اكثر من رائع ومفيد وبصراحة اشكركم كثيرا على تعاونكم الجميل مع بعض واتمنى ان تفيدونى فى استفسارى هنا

هل يستطيع زوجى عمل زيارة لوالدى ووالدتى ( حماه وحماته ) مع بعض فى رمضان علشان يقعدوا للحج , مع العلم ان زوجى طبيب فى جدة

اصلى سمعت ان صعب عمل زيارة لابو الزوجة ... طيب ومد الزيارة يعنى لو حصل وربنا كرم والجماعة جم بيبقى بمصاريف وازاى

ياريت تفيدونى

واللى حيقولى حاقول للحاجة تدعيلو فى الحج ان شاء الله

يااااااااااااااارب يوفقهم ويكتبلهم الحج

دمتم بود[/color]

[se_ Elsyed]

الأخت زهرة البحر ... مرحباً بك معنا ( بس هي في زهور بتطلع ف يالمية المالحة بتاعت البحر ؟ )

محسوبك بكالوريوس تجارة تخصص زيارات ... وكل يوم تلاقينا في وزارة الخارجية بأعمل زيارة لحد من العيلة ..

أنا حالياً عندي حمايا وحماتي في الرياض حالياً وعملت لهم زيارة من شهرين تقريباً .. بس هما مسافرين مش هايقعدوا للحج .

في حالة زوجك بقى المطلوب منه الآتي :

1- يدخل على الموقع ده ويقدم زيارة لوالدك ووالدتك www.mofa.gov.sa

الكلام ده قبل ما يدخل شهر رجب ... أحسن من رجب لرمضان بيبتدوا يغلسوا ويقفلوا الزيارة لجيع الأقارب ما عدا الزوجة والأولاد .

2- يطلب زوجك التأشيرة لمدة 3 شهور ..

3- تطلع له موافقة ... يروح باعتها مصر ويصبروا إسبوعين تلاتة ويقدموها للسفارة عشان يضيعوا وقت ... ما فيش مشكلة طالما معاهم موافقة ...

4- التأشيرة على الجواز صالحة لمدة 3 شهور ... يقعدوا لحد نص رمضان او اخر رمضان وييجوا ...

5- بإذن الله ممكن تطلع لهم بشهرين أو حتى شهر من تاريخ وصولهم السعودية ...

6- بعدها يمدد مرة او إتنين يكون الحج جه ..

وإنتوا أساساً في جده يعني فركة كعب لحد مكه ويحجوا ويدعوا لنا أو ممكن نقابلهم هناك لإني طالع السنة دي بمشئية الرحمن .

[زهرة البحر]

السلام عليكم ورحمة الله وبركاته

الاخ سى السيد جزاك الله خيرا على افادتى

فى استفسار بسيط

هل التجديد بيبقى فيه مشكلة ؟وهل له مصاريف معينة وبيبقى التجديد فين بالضبط ؟

وهل يتم تحديد مدة الزيارة من قبلك انت ولا وهم اللى بيحددوها ( عدد الاشهر) مثلا يعنى مدة الزيارة 3 اشهر

وهل بتحدد تاريخ او ميعاد الزيارة ولا بيسيبوها مفتوحة وانت اللى بتختار ميعادها ..

طيب بعد مابتخلص من هنا من السعودية وببعتها على مصر

ايه المفروض يحصل هناك فى مصر

معلش يا استاذ سى السيد اصلى احنا لسة مش كملنا سنة هنا ومش عارفسن الاجاراءات بالضبط

فى انتظار رد حضرتك

[se_ Elsyed]

ولا يهمك .... أسألي براحتك بس اهم حاجه ما تبقاش أسئلة متكررة في موضوعات كتيرة قبل كده

------

هل التجديد بيبقى فيه مشكلة ؟وهل له مصاريف معينة وبيبقى التجديد فين بالضبط ؟

ما فيهوش أي مشكلة ... لكن ده حسب مزاج اللي موجود في إدارة الوافدين وهي المختصة بتمديد الزيارات وتابعة لوزارة الداخلية وفي نفس الوقت هي الجهة المختصة بإلقاء القبض على مخالفي شروط الإقامة وترحيلهم إلى بلادهم عشان كده ساعات بيسموها " إدارة الترحيل " ورسوم التجديد هي 100 ريال عن الشهر الواحد .. ودي عبارة عن شيك بتشترية من بنكي الرياض أو الراجحي وبترفقية مع أوراق وجواز سفر ونموذج التجديد للشخص الزائر .. وإنتي وحظك ممكن واحد يتجدد له 6 شهور متفرقة بحد أقصى 3 شهور للمرة الواحدة وممكن واحد يجددوا له شهر بشهر إلى حين ختم جوازة بالختم الاحمر الخاص بالمغادرة النهائية .. العملية متروكة للنصيب وللـــ

واسطه .... عندك واسطة زي ناس كده أعرفهم - إحم إحم - بتجددي إن شالله سنة ...ولو ما عندكيش ... يبقى إنتي ونصيبك ... وأقصى مدة ممكن تكتبيها في نموذج التمديد هي 3 شهور وهما بيقرروا إما شهر او اتنين او ثلاثة ...

طيب بعد مابتخلص من هنا من السعودية وببعتها على مصر

ايه المفروض يحصل هناك فى مصر

بتعملي برنت أوت من موافقة الزيارة لما بتوصلك على موقع وزارة الخارجية وتبعتيها على مصر بأي طريقة إن شالله بالفاكس او برقم الموافقة حتى فقط ... لإن الأصل بيتبعت من وزارة الخارجية أوتوماتيكلي للسفارة هناك ...

الزائر بقى بيجهز ... جواز سفره .. وصورتين تلاتة ... وتذكرة مؤكدة رايح جاي ..... ويروح يدي ده كله لمكتب من بتوع التسفير وده كتير في مصر ... لإني قلت قبل كده إن ممنوع الان التعامل المباشر للأفراد مع القنصلية السعودية في مصر ... وينتظر بقى إسبوع ولا أقل يلاقي التأشيرة طلعت له .... لازم يقدم الورق ده خلال مدة أقصاها شهرين من تاريخ أصدار التأشيرة من هنا .... وبعدين بعد ما ياخد التأشيرة يبص فيها كويس لإنها تحتوي على مدتين مهمتين وهما :

1- مدة صلاحية التأشيرة داخل مصر وتُحسب من تاريخ ختم التأشيرة على الجواز ... بتتراوح ما بين شهر إلى 3 شهور ولازم ولابد يسافر قبل ما تنتهى المدة دي لإن لو أنتهت بساعة واحدة مش هايقدر يخرج من المطار .

2- مدة الإقامة في السعودية ... برضوا بتتراوح ما بين شهر إلى 3 شهور ... ولازم التأشيرة تتمدد قبل ما تنتهي بثلاثة أيام على الأقل ليس فيهم الخميس والجمعة ..

بالمناسبة ... ربنا ما يحكم على حد ويكون جايب واحد زائر من عائلته وتنتهي تأشيرته بدون ان تُجدد او يكون اخد ختم مغادرة نهائية على جواز سفره وبلطج وقعد ... كنا من شهرين تلاتة بنعمل كده وفي الأخير بترسي على غرامة 100 ريال عن كل شهر ... إنما دلوقت فيها :

1- 10 آلاف ريال غرامة فورية .. ويا الدفع يا الحبس إلى ما شاء الله .

2- ترحيل فوري للزائر - مش مهم ما هو كده كده ماشي - وترحيل فوري لطالب الزيارة ... اللي هو الشخص اللي معاه إقامة في السعودية ودي كارثة بكل تأكيد .. ومعايا ناس دلوقت زوجاتهم وامهاتهم كسروا تأشيرة الزيارة وماشيين في الشارع بيكملوا نفسهم لإن محكوم عليهم بالترحيل ..

فكل واحد يخلي باله ويحترم انظمة الدولة ..

ده بالإضافة إلى إن هناك دوريات شرطة على أبواب مدينة مكة المكرمة وبيوقفوا الان السيارات والاتوبيسات الداخلة والخارجة وبيلموا الإقامات وجوازات السفر وبيشيكوا على الكمبيوترات الخاصة بهم موقف هذا الشخص ويا ترى عليه احكام أو متبلغ عنه او كاسر تأشيرته ... وفي حالة مخالفته بتوضع الكلابشات في إيده ويُقتاد إلى السجن تمهيداً لترحيله أو تنفيذ الحكم ...

خدي بقى البنبونايه دي ...

بما إن زوج حضرتك طبيب ... فهو إبن الأكابر .. وإحنا ولاد البطة السودا ..

لإن الطبيب مسموح له يعمل زيارة لأبوه وامه في أي وقت .. وكذلك حماته ... ( حماه بقى حسب مزاج وزارة الخارجية بس يُستحسن يعجل دلوقت قبل ما يقفلوها لإن مسموح دلوقت بذلك ) حتى مسموح يعمل الزيارة في رمضان ولكن من خلال إدارة الإستقدام في وزارة الداخلية لإن وزارة الخارجية من رمضان لحد الحج بتستقبل بس طلبات الزيارة للزوجة والأبناء فقط لا غير ... بالمناسبة ده ينطبق على الطبيب وأيضاً والمهندس فقط ( اللي مهنتهم كده في الإقامة إن شالله يكون بيشتغل مكوجي .. اهم حاجة مهنته في الإقامة )

اما باقي المؤهلات فبتيجي لحدهم والزيارة بيُغلق بابها من رمضان إلى العيد الكبير ... إلا للزوجه والاولاد كما سبق وأن ذكرت في احد المداخلات ..

ولكن برضوا الواحد يخليه في الامان ويعمل الحركات دي كلها قبل رمضان سواء طبيب او غيره لإن الواحد ما ضمنش بكره في إيه .

تحياتي ،،،

[زهرة البحر]

الاخ سى السيد

حقيقى عاجزة عن الشكر للتفصيل المدهش والمساعدة الجميلة دى

ربنا يكرمك يارب

بس فيه حاجة بسيطة بس

تفتكر لو قدم زوجى على التاشيرة اخر شعبان وشوفنا واسطة ممكن يوافقو عليها لان اللى سمعتو ان المشكة فى ابو الزوجة مش ام الزوجة ..

وسمعنا ان التجديد بيضربوه هنا فى جدة كل شهر 1100 ريال

طيب لو فعلا قدمنا على التجديد فى المكتب يعنى رسمى وحصل ورفضو يبقى لازم الترحيل وقتها يعنى هم اللى بيسفروهم اجبارى يعنى مفيش مفر من السفر

معلش اسالتى كتيرة بس نفسى والدى ووالدتى يجو السنة دى

جزاك الله خيرا

[se_ Elsyed]

وبعدين يا ست زهرة ... إقرئي الكلام كويس الله يكرمك

قلت لك اخر شعبان إحتمال كبير تترفض .... ولازم يقدم دلوقت .. والتأشيرة صالحة لمدة 3 شهور في مصر من بعد أخد الختم ... وشهر ولا حاجه قبلها .. يبقى انهو احسن ؟ يقدم على الحركرك ولا يقدم في البراح دلوقت ؟

وبإذن الله يتوافق كمان على أبو الزوجة

اما حكاية التجديد أبو 1100 دي ولمدة شهر ... فكتير قوي كده ... لكن لو مضمون يبقى إتوكلوا على الله ... لإنه لو جيتوا تقدموا بنفسكم وأخد ختم خروج نهائي والسفر خلال ثلاثة أيام ولا اسبوع ... يبقى لازم يسافروا تفادياً للعواقب الوخيمة .

[Guest عبد الرازق]

السلام عليكم انا عملت زيارة لزوجتي وخلصت الاوراق وحطو لها التاشيره على جواز السفر بس حجبها بعد العيد معاها صلاحيه ثلاث شهور هل يمكن مايدخلوها عشان الحج ولا عادي الزوجه