هل توافق على إلغاء مجانية التعليم ؟

[kotb88]

السلام عليكم يا معلمين

انا عندي اقتراح تانى خالص انا شايفه في دماغى

اولا لازم وحتما ولا بد يكون التعليم مجانى لان فى ناس مبتلاقيش تاكل وبسبب التعليم ممكن يتنقل ابنهم ويتنقلوا معاه لمستوى افضل وكمان الولد ده ممكن يكون عبقري في يوم من الايام وينقل البلد كلها نقله تانية زي ما نقل العلماء والخترعين العالم كله

بس انا عندى ملاحظة

عند بداية التعليم الثانوى يعني بعد التعليم الاعدادى يكون في لاجنه اسمها لجنة تحديد مستوى الطالب واللجنه دي تكون من ناس علماء وناس مثقفين وعلماء في علم الاطفال والتعامل معاهم ومعرفة مستوى ذكاء كل واحد منهم ومهاراته وسيبكوا شوية من المجموع لان في ناس كتير اهاليهم تجار مخدرات وبيدخلو احسن ثانوى عام وكليات قمه وكل ده يا برشوة ياما بتهديد المراقبين وبلاش نخش في السكه دى كتير المهم اللجنه دي كل مهمتها تقعد مع كل طفل لو ربع ساعه تتكلم معاه تعرف ايه مهاراته الفكرية اليدوية العملية اى حاجه من الحاجات دي وبناء عليه يودوه المكان اللى ينفعه ..... وبنأ على كده يبقا لازم التعليم الفني يتظبط علشان العيال دي لو حد بارع في الكمبيوتر يدخل ثانوى صنايع ومنه على هندسه ويطلع حاجه نضيفه ونبطل ثقافة ان الثانوى الصنايع والتجارى والكلام ده انهم فاشليين لا بالعكس دول متخصصين يا ريت نغير ثقافتنا يا جماعه وافكرنا اللى اكتسبناها من اللى قبلينا بدون التفكير فيها

امريكا دلوقت مبتاخدش بالمجموع قد ما بتاخد بالمهارات والقدرات وعشان كده بقت امريكا

ارجو يكون حد فهم وجهة نظري وياريت محدش يألس علشان بتدايق اوى لما بلاقي حد بيألس مش علشان نفسي لا انا ثقتي بنفسي ملهاش حدود الحمد لله رب العالمين بس بتدايق لانى بحس اننا هنفضل جهاله طول عمرنا علشان مبناقش .... بالعكس كل كلام فالحين نألس عليه وبس

ارجو برضو تكونو فهمتو الفكرة دي كمان

والسلام عليكم مرة تانية يا معلمين

تم تعديل 23 يونيو 2008 بواسطة kotb

[nash]

اهلا يا KOTB

والله أقتراح جديد وجميل...لكن صعب تغيير مفهوم المجتمع ونظرته للتعليم المهني فنحن بلد شهادات في المقام الاول..

بمناسبه امريكا ..نظرة سريعه علي مصانع السيارات او ورش تصليح السيارات ...أو علي عمال البناء في المواقع المختلفه..نجد أن من يطلق عليه صنايعي عندنا يكون عندهم مهندس...وخبراته اكثر بمراحل من مهندسين فقط علي الورق...

وياريت محدش يألس علشان بتدايق اوى لما بلاقي حد بيألس مش علشان نفسي لا انا ثقتي بنفسي ملهاش حدود الحمد لله رب العالمين بس بتدايق لانى بحس اننا هنفضل جهاله طول عمرنا علشان مبناقش .... بالعكس كل كلام فالحين نألس عليه وبس

لا إن شاء الله لن تجد ما يضايقك...ونحن هنا للنقاش وليس لمضايقه بعض....

[kotb88]

في حاجه تانية للناس اللى بتقول التعليم الجامعى لازم يكون بفلوس

يا جماعه مفي ناس وعيال كتير اهاليها زى ما قولت قبل كده تاجر مخدرات او حرمية او نصابين ومعاهم فلوس زي الرز ومن الممكن يدخلوه انضف كلية لو بالفلوس

برضو مينفعش نتعامل بالماديات دي

قولنا القدرات العقلية هى اللى هتحدد مين يكون دكتور ومين يكون عامل وطبعا العامل مش شتيمه .... لا خالص بالعكس لان دي اصلحله من انه يطلع دكتور حمار .... انا اسف في الكلمه ونلاقي بأة اكياس دم ملوثه ومستشفيات استثمارية كل همها الربح وبس وطبعا كلنا عارفين القصه

يا جماعه فكرو مرة واحده ربنا خلقلنا العقل ده ليه وميز كل واحد عن التانى في التفكير ليه

مالذكى والغبي معاهم فلوس وبرضو في ذكى وغبي ممعهمش ولا قرش

بالله عليكم شغلو دماغكم شوية ويلا نقوم البلد دي على رجليها ولو معرفناش يبقا يكفينا شرف المحاوله واننا لما نقف قدام ربنا يوم القيامه نقول احنا على الاقل حاولنا يا رب ..... يمكن يرضا عننا

على فكرة انا مش متدين اوى ولا من جماعه معينه انا شاب نفسي اعمل حاجه في دنيتي افخر بيها في اخرتى

تم تعديل 23 يونيو 2008 بواسطة kotb

[kotb88]

على فكرة يا nash احنا لو ظبطنا التعليم الفني صح وخليناه فعلا ليه قيمه ...... وده عن طريق اهتمام الحكومه بيه هتتغير فكرة المجتمع لوحدها لان المجتمع هيشوف ان تم تطوير المدارس دي وتم تدريس مناهج وحجات عملى على اكمل وجه وبتخدم السوق يبقا هيتغير تفكيرنا ولا لا ........... يعني مثلا لو لاقينا بعد تخرج اول دفعه من النظام الجديد ده في التعليم الفني عملين انجزات كويسه والدوله بتكرم منهم ناس اخترعت حاجات وناس منهم بقو اغنيا يبقا غصب عن كل المجتمع فكرته هتتغير ولا لا ..... برضو يا جماعه فكرو في الموضوع وياريت لو حد يعرف يوصله لاى حد مسؤل يا ريت بالله عليكم ............. نفسي اشوف البلد دي حاجه تانية قبل ما اموت ويجي الجيل اللى بعدي يدعي على جيلي

[nash]

كلامك جميل يا قطب..ولكن سيحتاج وقت طويل حتي يقتنع الاخرين بأهميه الموضوع....

وأظن الدوله تملك مفاتيح الموضوع لكن للاسف هي مشغوله في اشياء اخري ... أخرها أهتمامها بالمواطن البسيط....

صدقني وجود شباب مثلك وله هذه الافكار والطموحات والرغبه الملحه في تغيير المجتمع...يبعث في قلوبنا الامل بأن مصر لا زالت فتيه باولادها...

[blbl]

امريكا دلوقت مبتاخدش بالمجموع قد ما بتاخد بالمهارات والقدرات وعشان كده بقت امريكا

حتي في امريكا فية امتحانات والمجموع بيفرق في فرص العمل والدراسة. والا كان كل الناس دخلت بركلى ولا استنفورد.

[kotb88]

يا زعيم انا معاك ان امريكا هى كمان فيها مجموع والكلام الحلو ده كله بس المجموع في ايه والتميز في ايه

في الحاجه اللى الطفل حابب يدرسها مش على قد مجموعك هتخش التخصص الفلانى

انا من صغري كان حلم عمرى اكون مهندس كمبيوتر وكنت حابه جدا واعرف فيه اكتر من كل اللى حوليا كنت مميز فيه بمعني اصح

ومع ذلك دخلت معهد سياحه وفنادق غصب عني وتخيل دخلت قسم ايه كمان .... برضو غصب عني وبعد عراك كبير بيني وبين ادارة المعهد ...... رمونى في قسم مطبخ

انا طبعا قررت اتخلا عن مبدأى وقيمي واخلاقي ودي بقولها بصراحه قدام كل مصر ..... اتخليت عن مبدأى علشان اعدى سنتين المعهد دول وادخل كلية سياحه وفنادق اللى هي من 90% من الثانوية العامه واديني دخلتها بس تعرف حضرتك ازاى ...... كنت باخد كورسات مع الدكاترة المبجلين كل دكتور الكورس ب300 جنيه وفي المقابل كان الدكترة المحترمين بيدولى ورقة الامتحان واجابتها كمان ...... انا واصحابي ....اللى معاهم فلوس يدفعوا طبعا ...... وانا طبعا مش هقولك كنت بجيب الفلوس دي ازاى علشان اوصل للى انا فيه دلوقت يعني سيدتك تقدر تقول انى بفلوسي اشتريت مجهود طالب قعد موت نفسه طول السنتين علشان يخش الكلية دي

فالمهم علشان منخشش في سكه طويله احب اقول لسيدتك طول ماحنا الفلوس عندنا بقت اهم من ربنا ومنظرنا قدام الناس اهم من منظرنا قدام ربنا يبقا على مصر السلامه وكمان 1000 سنه ان شاء الله يبقا يفكر الجيل اللى طالع ساعتها يغير البلد دي

يا راجل ده مرة بتكلم مع دكتور من الدكاترة دول قالى عاوز تدخل الكلية ادفع انا مبضربكش على ايدك تاخد كورس بس مش هتدفع مش هتدخل

قاللى كده بالنص ......... تسمح سيادتك بقا ترد عليه

والنبي اسكتو بلاش تخلونا نقلب المواجع والايام السوده وبلاش اقول كلمه تانية ....... استغفر الله العظيم

[Alshiekh]

يا زعيم انا معاك ان امريكا هى كمان فيها مجموع والكلام الحلو ده كله بس المجموع في ايه والتميز في ايه

في الحاجه اللى الطفل حابب يدرسها مش على قد مجموعك هتخش التخصص الفلانى

انا من صغري كان حلم عمرى اكون مهندس كمبيوتر وكنت حابه جدا واعرف فيه اكتر من كل اللى حوليا كنت مميز فيه بمعني اصح

ومع ذلك دخلت معهد سياحه وفنادق غصب عني وتخيل دخلت قسم ايه كمان .... برضو غصب عني وبعد عراك كبير بيني وبين ادارة المعهد ...... رمونى في قسم مطبخ

انا طبعا قررت اتخلا عن مبدأى وقيمي واخلاقي ودي بقولها بصراحه قدام كل مصر ..... اتخليت عن مبدأى علشان اعدى سنتين المعهد دول وادخل كلية سياحه وفنادق اللى هي من 90% من الثانوية العامه واديني دخلتها بس تعرف حضرتك ازاى ...... كنت باخد كورسات مع الدكاترة المبجلين كل دكتور الكورس ب300 جنيه وفي المقابل كان الدكترة المحترمين بيدولى ورقة الامتحان واجابتها كمان ...... انا واصحابي ....اللى معاهم فلوس يدفعوا طبعا ...... وانا طبعا مش هقولك كنت بجيب الفلوس دي ازاى علشان اوصل للى انا فيه دلوقت يعني سيدتك تقدر تقول انى بفلوسي اشتريت مجهود طالب قعد موت نفسه طول السنتين علشان يخش الكلية دي

فالمهم علشان منخشش في سكه طويله احب اقول لسيدتك طول ماحنا الفلوس عندنا بقت اهم من ربنا ومنظرنا قدام الناس اهم من منظرنا قدام ربنا يبقا على مصر السلامه وكمان 1000 سنه ان شاء الله يبقا يفكر الجيل اللى طالع ساعتها يغير البلد دي

يا راجل ده مرة بتكلم مع دكتور من الدكاترة دول قالى عاوز تدخل الكلية ادفع انا مبضربكش على ايدك تاخد كورس بس مش هتدفع مش هتدخل

قاللى كده بالنص ......... تسمح سيادتك بقا ترد عليه

والنبي اسكتو بلاش تخلونا نقلب المواجع والايام السوده وبلاش اقول كلمه تانية ....... استغفر الله العظيم

ضميرك مستريح كده؟

[رمضان]

انها جلسة ولا اروع من جلسات مجلس الشعب الموقر

[dawn walker]

لا اوافق

[iloveegypt]

طبعا لا اوافق على الغاء مجانية التعليم

انا وزملائى فى كليه الهندسة عملنا مشروع على طلاب هندسة القاهرة من اعدادى للبكلوريوس على نوعية تعليم الطلاب فى الثانوى من حيث كونه حكومى او خاص او تجريبى او لغات او امريكى

واكتشفنا النتائج(طبعا باستخدام بيانات الطلبة اللى موجودة فى شئون الطلبه وادخلنا هذه البيانات الى برنامج كمبيوتر) والتى اثبتت ان افضل نتائج كانت 1-طلاب المدارس الحكومية2-التجريبية الحكومية3-اللغات4-الامريكى

بس ممكن نعمل مدراس حكومية بمصاريف للى عايز ذى المدارس التجريبية

بس حرام نلغى احلى ميزة فى مصر وهىمجانية التعليم د احمد زويل ود اسامة الباز ود مجدى يعقوب كلهم مدارس حكومية

تم تعديل 10 يوليو 2008 بواسطة iloveegypt

[أحمد سيف]

ما فيش حاجه اسمها تعليم مجاني لإن التعليم خدمه لها تكلفة ولازم حد يدفع تكلفتها ... والفلوس اللي الدوله بتصرفها على التعليم مصدرها الأساسي هو الضرائب التي بتاخذها مني ومنك، ففي النهاية إحنا اللي بندفع تكلفة التعليم بطريق غير مباشر. في حاجه اسمها تعليم مدعّم و أنا أوافق عليه على أن يكون دعم مقنن ويخدم هدفا وليس دعم عشوائي وعلى البحري. ودعم التعليم موجود في أكبر الدول الرأسمالية ولكن له ضوابط تجعله يصل لمستحقيه ويحقق أكبر استفادة ممكنة للمجتمع فهو إما يكون مبني على أساس التميز الأكاديمي أو الحاجة المادية، أما عندنا فإن العشوائية في الدعم رغم محدودية الموارد قد وصلت بنا الى مستوى متردي من التعليم وأصبح الناس يدفعون أكثر في الدروس الخصوصية للتحايل على النظام التعليمي الفاشل بدلا من إصلاحه (ودي عاده قديمه عند المصريين، لما الواحد مننا يلاقي حفره قدام بيته يفضل يلف حواليها سنه ولا يفكر إنه يردمها في ساعه).

الحل في رأيي إن الحكومه تدّي الناس الفلوس اللي بتصرفها على التعليم وتخّلي كل واحد يدخل ابنه المدرسه اللي هوا عاوزها وبعدين تعمل امتحان موحد بين كل مرحلة تعليمية والثانية زي SAT أو GRE وتخلي كل جامعة تختار طلابها بناء على نتائج الامتحان ومعايير ثانية تحددها الجامعة نفسها.

طبعا في ناس هاتقول التعليم كدا هايبقى تجاره واللي ها يدفع ها ينجح، أقولك وماله خلي الناس تاخذ شهادات بفلوسها وبعدين لما ييجوا يشتغلوا السوق هوا اللي هايحكم على قيمة شهادتهم. أمريكا فيها 4000 جامعة تقريبا معظمها بيدي بكالوريوس وماجستير بس في جامعات منها مستوى خريجها أعلى مستوى في العالم وجامعات مستوى خريجها أقل من مستوى خريج الثانوية في مصر ، والحكم في النهاية لأصحاب الأعمال اللي بيدوروا على مصالحهم ويهمهم يوظفوا أحسن خريجين. الناس لما تعرف إن التعليم مش الشهادة هيا اللي هاتشغلهم هايبطلوا يشتروا شهادات وهايتعلموا بجد. وفي النهاية لا يصح إلا الصحيح.

أما المسخرة اللي عندنا اللي اسمها تعليم مجاني فدي هتودينا في داهية إن شاء الله.

[haroun]

"عملية التنمية فى أى دولة فى العالم تعتمد على ثلاث أشياء ضرورية هم 1/التعليم 2/ الصحة 3/ الغذاء وبالتالى هذه الأشياء الثلاثة

يجب ان تكون من اولى مهام الدولة ولا تترك للأفراد الذين يسعون الى الربح دون النظر الى الفائدة التى تعود على المجتمع ككل وبالتالى يجب ربط ميزانية التعليم بميزانية 4"]الدولة وتكون من أولى مهامها تطوير التعليم مهما كلفها لأنه فى النهاية سيعود عائد التعليم بالفائدة على الدولةا قبل الأفراد.وعلى فكرة انا كنت أعمل فى الخارج وصرفت اموالى كلها على التعليم الخاص ولم

أستفيد شيئآ أنا وأولادى لا هم اتعلموا كما يجب ولاأنا لم استفيد شيئآ من من مجهودى فى الغربةوالفلوس راحت على التعليم الخاص والدروس الخصوصيةb] n2&(

[أحمد سيف]

الأخ هارون ... أنا لسه مش فاهم ... إنت علمت أولادك بره ولا في مصر ... إذا كنت علمتهم بره فاحمد ربنا لإن التعليم المصري في الحضيض ليس فقط من ناحية الامتحانات والدروس الخصوصية ولكن أيضا من ناحية أسلوب التعليم الذي يعتمد على الحفظ والتلقين وليس على التفكير والفهم وعلشان كدا بيطلع مواطن سلبي وغير مبدع. والمشكله إن احنا فاكرين عندنا أحسن تعليم في العالم (أو في العالم العربي على الأقل) ، وبناخذ الصدمة الكبيرة لما بنشتغل مع جنسيات ثانية.

أنا الحمد لله اتعلمت في مدرسة حكومية برا مصر ولما رجعت مصر علشان أدخل الجامعة (في كلية من اللي بيسموهم كليات القمة) كنت فاكر إني هاتاكل من خريجي الثانوية العامة المصرية، لكن اللي حصل إني طلعت ثاني دفعتي واتعينت معيد بأقل مجهود من غير ما آخد درس واحد في حياتي. وأعرف غيري كثير بالشكل ده. الناس واخذه مقلب جامد في التعليم في مصر، والحقيقه إنه تعليم فاشل في الإسلوب والنتيجه.

[Nonna]

اولا انا مش موافقة على الغاء مجانية التعليم سواء قبل الجامعي_التعليم الاساسي يعني_

او الجامعي نفسه

بالمناسبة انا طالبة لسة و بروح جامعة و بشوف زمايلي و زميلاتي

ربع الكلية طلبة من اسر مقتدرة ماديا جدا جدا

50% متوسطين

و الربع الباقي فقييييييييييير

و الحمد لله ان لسة في مصر طبقة وسطى و ان كنا اوشكنا نبقى زي الهند

يا فقراء خالص يا اغنياء خالص

عندنا في الكلية حاجة كدة اسمها تكافل اجتماعي

على جميع المستويات

طبي تعليمي و مادي كمان

في طلبةفعلا محتاجة و ما بتقدرش تطالب اهلها بأكتر من قدرتها

و الهي موجودين و موجودين جدا كمان

فازاى الغي مجانية التعليم الجامعي بالنسبة للناس ده

علما بان اصلا مافيش كلمة مجانية ده

هو مدعم اه

انما دعم و لا كانه موجود

لك ان تتخيل ان مصروفات الكلية في سنة خامسة قديم _يعني دفعلا خلاص هتمتحن اخر السنة_

50 جنيه وشوية

و الدفعة الجديدة اللي لسة داخلة سنة خامسة مصروفاتها تبقى الضعف

120 جنيه وشوية

ناهيط طبعا عن اسعار الكتب

اقل كتاب في كلية طب ما يقلش تمنه عن 30 جنيه

و يجبرك بعض الدكاترة كمان عشان تنجح و ما يستقصدكش انك تجيب كتابه

تسال على كتابه تلاقيه بمية وشوية

و لازم اجيبه عشان انجح

انا هقدر و لله الحمد

اهه كتاب و مش هيخسر

انما في مئات الطلبة اهلهم ماعندهمش القدرة المالية ده

فبالتالي خلونا ننسى اصلا الكلمة ده ماعادش في لا مجانية و لا حتى دعم

ثانيا الراي اللي قال اننا نحل اولا الازمة السكانية و زيادة عدد البشر

موافقة بس هتتحل ازاى اصلا في مجتمع اولا عربي ثانيا شرقي

عنده نزعة التكاثر من اجل العزوة و السند و غيرها من الاسباب

ثانيا ده الطبيعة اللى اتخلقنا عليها

نتزاوج نتكاثر نتبادل خبرات نعمل ثقافة فحضارة نبقى أمة تستاهل يبقى لها اسم

المشكلة مش في الاعداد اللي بتزيد بقدر ما هي مشكلة في السلوكيات

سواء للناس نفسها

او في الادارة

بلد زي الصين و اليابان و كوريا

بلاد لها اسمها قامت من تحت الصفر

بلاد يهتز لها عرش دول القوى العظمى

بلاد منتجاتها الهايفة البسيطة الصنع مغرقة بلدنا احنا

الصين بلد تعداد سكانها تجااااااااااااوز المليار

بيحاولوا يقننوا اوك ماشي

انما ما توقفوش على النقطة ده

حاولوا في اتجاه تاني يستغلوا العدد الكتير ده عشان يزيد الانتاج

واحنا لسة بنقول نلغي مجانية او الدعم على التعليم

دولة زي امريكا لا اعتقد ابدا انهم يقدروا يلغوا الدعم الصحي او التعليمي

لان ببساطة زي ما أحد الاعضاء الافاضل قال

التعليم و الغذاء و الصحة التلاتة اساس اي بلد لا يمكن الاستغناء عنهم

و بعدين لحظة كدة

فين مجانية التعليم ده حتى قبل الجامعي في مصر

ده الطالب بيروح المدرسة يلاقي كومة طلبات

جلاد احمر و اصفر و اخضر و بمبى مسخسخ

و تكتات باربي و تويتي و خلاف و خلافه

و كراكريس مية ورقة و صفحة وصفحة و كل مادة اكتر من اربع خمس كراسات

اشي بنك اسئلة

ايش واجب

اشي حصة

و تكمل كمان لما المدرسين يطالبوا الطلبة يجيبوا لوح و زينات للفصل

فين مجانية التعليم اصلا حتى يتم الغاءها !!!!

لا فعلا زي ما استاذ طفشان قال

هو فين التعليم اصلاااااااااااااااا

على اي اساس اصلا بندخل كليات

على اي اساس بيتعين ده مدرس

عشان حفظ الكتاب و عمل دفتر شيك لتحضير الدروس

انما شافوه بيشرح ازاى

صبور و لا لا

ينفع يكون مدرس اصلا

ابدااااااااااااا

بلاش

انا في كليتي دكاترة بيشرحوا ما بيشرحوش

في حين ان في دكاترة محترمة تستحق فعلا انها تدرس

صديقة لي من ثانوي سافرت منحة اليابان لانها متفوقة في دراستها

البنت مش عاوزة ترجع مصر

الناس هناك منظمين

و الاطفال اجباااااااااااااااري يتعلموا

و احنا لسة بنناقش نلغي مجانية التعليم!!!

[kotb88]

ايوة يا محمد ضميري مستريح

لو مريت باللى انا مريت بيه ضميرك هيستريح اوى ....... او ممكن تحس انك مظلوم كمان

[السويفي]

السلام عليكم:

لا يخفي على الجميع جهود الحكومه لاغاء مجانيه التعليم العالي ....

فهي الان تقوم بمجهود جبار للوصول لطريقه لالغاء المجانيه بدون اغضاب المجتمع ...واخرها تعديل نظام الثانويه العامه..بما يتيح لها التحكم بعدد الطلاب

الملتحقين بالجامعات من خلال اختبار للقدرات ...

هل الحكومه تريد ان تتنصل من مسؤلياتها اتجاه المتعلمين ؟؟؟

ام هذا هو الحل الوحيد للارتقاء بالتعليم الاساسي والجامعي....

بعدما اصبح الخريج في مصر غير معترف به في سوق العمل ....مما زاد من البطاله

وبعد ان اصبحت مسأله التحصيل العلمي في الجامعات مستحيله نظرا لتكدس الطلبه

في النهايه

انا مع الغاء مجانيه التعليم الجامعي........ فما رأيك؟؟

[أحمد سيف]

أنا مع ترشيد الدعم المقدم للطلاب في المرجلة الجامعية ... بحيث لا يحصل عليه سوى المجتهدون والمحتاجون وفق ضوابط معينة ... أما الطلاب من غير هتين الفئتين فيدفعون تكاليف دراستهم.

مسألة أخرى هي مراعاة القدرة الاستيعابية للجامعات، فلا يصّح تكديس آلاف الطلاب في الجامعات دون أمكانات تكفي لتعليمهم بصورة جيدة، ولذلك فالحل هو إما تخفيض أعداد الطلاب المقبولين في الجامعات أو زيادة عددها وقدرتها الاستيعابية.

[السويفي]

السلام عليكم:

اعتقادي ان ما يحدث من تكديس للطلبه في الجامعات هو ارضاء للشعب على حساب الشعب

طبعا لن يكون الالغاء على الجميع ..المتفوقون يجب ان يستفيدوا منه ...وتحدث اعاده تقيم للطالب في كل عام على حسب تفوقه

[شاب مصري]

أنا مع انشاء جامعات متطورة حديثة تحصل على اعتراف دولي لان الجامعات في مصر بقت "نوادي اجتماعية" ومفيش تعليم

والخريجين مينفعوش ببصلة

يعني معظم الخريجين بيشتغلوا في مجالات عامة لا علاقة لها بدراستهم

وبالتالي يتلقى عدد كبير تعليم سئ فلا يستفيد أحد

وحتى الخريجين لا يستفيدون ويعملون في مجال آخر

لكن عشان يقدر يتقدم للزواج وهو حامل مؤهل جامعي .. والمشكلة في الطريقة العقيمة لتفكير أولياء الأمور في مصر

لازم يبقى النظام منح دراسية جامعية تعطى مثلا لـ 20% أو 30% فقط من خريجي المدرسة الثانوية بناء على درجاتهم واختبار قدرات بحيث أن الجامعة تقتنع ان استثمارها البشري في الطالب الحاصل على المنحة سيقدم شئ للوطن

ولو خلال الدراسة تعثر الحاصل على المنحة يتم انذاره ثم الغاء المنحة ليتحمل تكاليف تعليمه أو يتم فصله

والباقيين يتم الاختيار من بينهم ليتعلموا بمصاريفهم

وبالتالي محدش هيتعلم عشان يبقى اسمه واخد شهادة .. اللي هيتعلم في الجامعة هو شخص عنده خطة للاستفادة بالتعليم الجامعي

وطبعا تقليل المصاريف ده والموارد المالية الجديدة من دافعي المصروفات هيخلينا نقدر نحسن التعليم ونعمل كليات معترف بها عالميا خلال 10 سنين بالكتير

ياريت :lol: