الإحساس ... نعمه

[se_ Elsyed]

الإحساس أو المشاعر الطيبة أو الاخلاق الحسنة ... من الحاجات اللي لازم تكون موجودة Built in في الإنسان .. يعني موجودة فيه بالفطرة ... وبيبقى صعب يتعلمها خصوصاً لو مخه زبالة ...

والإحساس يحتوي على كوكتيل مشاعر وسلوكيات ومنها برضوا الحياء .....

وأكثر ما كان يلفت إنتباهي في سيرة القدوة والرسول الكريم سيدنا محمد هو حياءه وحُسن خلقه مع الناس حتى مع المشركين ... ومن بعده سيدنا عثمان بن عفان اللي الرسول قال عنه إن الملائكة بتستحي منه من كتر حياءه .. ومن قبلهما بكل تأكيد سيرة سيدنا عيسى المسيح .. فهو بالنسبة لي رمز من رموز التسامح وحُسن الخلق ....

لكن بما إن أساس الحياة هو الإختلاف في كل شيء ... فللأسف أحياناً كثيرة يُبتلى الإنسان بمعاملة ناس " جِبلات " جمع جِبلة يعني .. يعني واحد ما عندوش إحساس وتبقى أنت بتتحرق من جواك وهو ولا هنا ...

ما دفعني لفتح هذا الموضوع إننا تلقينا مكالمة من أخت زوجتي بمصر الإسبوع الماضي ... بتشتكي من إن خالها وزوجته زعلانين منها وواخدين جنب وعاملين قصة .... ليه يا ستي ؟ لإن أخت زوجتي حامل وفي شهرها التاسع وحملها زي النيلة وتعبانة جداً وتفاجأ إن خالها جاي يزورها هو واولاده الصغار واللي مصابين بالحصبة والأصابة واضحة على اجسادهم ... وهو عارف وشاف إن الحمل السابق لها لم يُكتمل والست أُجهضت في التاسع المرة اللي فاتت وكانت هاتموت عشان برضوا إتعدت من ناس جبلات زي دول بالحصبة الألماني .. فلما إعتذرت له وقالت له معليش يا خالي مش هاقدر أقعد معاكو عشان ما اتعديش لكن خد راحتك البيت بيتك ... زعل وخد بعضه ومشي وعمل بوليكه ..

مع إنها ممنوع تجلس مش مع اطفاله .. ده معاه هو شخصياً ومع مراته طالما البيت فيه حد مصاب بالحصبى أو بأي مرض مُعدي ويمكن الكبير ما بيانش عليه الإصابة قوي زي الطفل لكن في إحتمال إنه يكون حامل للفيروس ...

وفي أثناء مانا بأكتب الكام سطر اللي فوق دول يا اعزائي ... يجيلي تليفون من مصر منذ دقائق قليلة يبلغوني إن أخت زوجتي الجنين مات في بطنها منذ لحظات وهي في المستشفى وهي في الإسبوع الثاني من الشهر التاسع بالرغم من إن إمبارح ذهبت للطبيبة اللي بتتابع معاها وكان كل شيء تماما ... وأصيبت بألام المخاض في فجر اليوم ... وروحت أنا جري عملت حجز لحماتي عشان تسافر في رحلة الظهر إلى مصر وبمعجزة وبوسايط وكوسة وذلك لتكون جنب بنتها اللي كانت مقرر لها تولد قيصري .. ويادوب الست ركبت الطيارة وهي فرحانة ولسه داخل مكتبي وهاقعد على الكرسي إلا ويتصلوا يبلغوني الخبر ... فحمدت الله إن حماتي ما عرفتش قبل ما تسافر وإلا كانت خدت الرحلة إلى مصر وهي منهارة تماماً ..

ومش عايز أقول إن إصابة الحصبة برضوا هي السبب المرة دي ... لكن كل شيء بإرادة الله .. لكن برضوا الواحد مأمور إنه ياخد بالأسباب ..

وبرضوا أرجع وأقول الإحساس نعمه .. وأتعجب من هذا الزمن اللي بقى فيه الواحد اللي على الحق هو اللي زعلان على مشاعر من هو على الباطل .. وكإن الهرم إتقلب والامور إتبدلت

[nash]

لا حول ولا قوة إلا بالله....

والله لا أجد كلمات تصف بشاعه الموقف ولا أحساس الأم وقهرها علي فقد جنينها....

ربي يعوضها بما هو أحسن وافضل منه إن شاء الله....

والموضوع بصراحه لا ينتمي إلي مسئله الإحساس..هو أكبر من ذلك....

وأصلا ايام الحمل الأخيرة لازم الراحه والإستعداد للمولود الجديد..وحتي الزيارات يجب أن تكون في أضيق الحدود ....

لا افهم كيف يقوم الخال بالزيارة ومعه اصلا أولاده ومن سيقوم بواجب الضيافه لهم؟؟..أما موضوع زعله هو فلا أجد مايناسب من التعليق الحقيقه لإني الأن أتميز من الغيظ...

ربي يصبرها ....ويربط علي قلبها...وتستطيع أن تنسي الموقف كله...

[se_ Elsyed]

يا ناش الدكاترة قالوا لها إن الحمل السابق لم يكتمل بالرغم من إنها برضوا أجهضت في التاسع .. لإصابتها بالحصبة من طفل أو شخص حامل للفيروس وخالها ساكن قريب منها وعارف الكلام ده ...

بالمناسبة ... هو إنسان دمث الخُلق جداً وحبوب ... وهو نفسه كان برضوا من أسباب إني كتبت موضوع " عيب يا ولد غلط يا بنت " لإن عنده بنتين 7 سنوات و5 سنوات ... لكنه من سكان الإسكيمو وبارد لأبعد الحدود والعيال في منتهى الدلع ومنتهى الشقاوة المدمرة وهو شايف ومراته سامعه وولا حياة لمن تنادي وولا كلمة تتقال للبنات إن كده غلط وكده عيب ... وياريت التدمير بيبقى في بيتهم بس .. لإنهم أحرار وإن شالله يولعوا في بيتهم بجاز .. لكن يروحوا يدمروا في بيوت الناس ويؤذوهم ليه ؟

[nash]

شوف يا سي السيد....أنا المواضيع دي بتجيبلي ارتكاريا...موضوع الطفل المدلع اللي يروح عند الناس وهاتك يا تنطيط علي الكراسي..ولا سكب العصير علي السجاد والاب والأم ولا هما هنا ....أو غيرة من مناظر تحرق الدم الحقيقه...واقسم بالله وربي شاهد أني وقفت لياسر واحمد وهما اطفال وكلمه لأ يعني لأ مش اقول لأ وارجع بعد شويه اوافق....

واصلا أنا لا اشعر باي حرج...وكل من كان أولاده بهذا المنظر قطعت علاقتي بهم...لما يربوا أولادهم الاول أبأة استقبلهم في البيت...والجميع تقريبا عرف طريقتي والحمدلله...

وبالنسبه للخال الطيب ..لازم بصراحه حد يتكلم معاه ...لإن الموضوع كده خرج عن المنطق..واصبح فيه ضرر واذي غير عادي...

ولا يزال قلبي مع الأم ..وحاسه بعذابها ....

[فــيــروز]

لا حول ولا قوّة إلاّ بالله .. md2:

الواحد قلبه انخلع على هذه الأم الحزينه و زوجها كان الله فى عونهما و يصبّرهم و يعوّض عليهم قريبا جدا إن شاء الله .. :waf: :lol:

الموقف بصراحه و رغم كل ما ذكرته عن دماثة خلق الخال يدل على أنانيه و سماكة جلد لا إنسانيه على الإطلاق !! ناس عاوزين يعملوا زيارات و ينبسطوا مفيش مشاكل بس مش على حساب تعريض أسره أخرى للتعاسه و ضياع الأمل بعد كل التعب و الانتظار ده خاصة حين يكون هناك سوابق لهذا الموقف و معروف حساسية الأم الحامل تجاه أشياء أبسط من كده .. فمش عشان أخرج و أفسّح عيالى الناس تخسر هذه الخسائر الفادحه و أينعم كل شئ بأمر الله و مشيئته بس الإنسان مايحطّش نفسه فى موقف يكون فيه "سبب" من أسباب خسارة شخص آخر و إيلامه بهذا القدر ..

[MZohairy]

الراجل ده المفروض يدفع ديه

[moheltohamy]

مين اللي غلطان؟

هيه طبعاً....

أيوه هيه... ماهو إذا كان البعيد ما بيحسش ، تبقى هيه اللي تخاف على نفسها! خلي الأدب والذوق ينفعوها!

وهيه عارفة أصلاً ظروفها ، وعارفة إن الحمل متصلّب (مسنود بالعافية يعني) ، وليها سابقة ف الموضوع ده. وخايفة على زعلُه؟! ما يتفلق يا سيدي!

أمثال الخال دول ؛ شكراً ، دول أنا أخليهم يلعبوا على حدود حياتي الخارجية ، من بعيد لبعيد!

وأسهل حاجة ؛ معلش يا خالي ، رايحين عزا ، تعبانة ورايحة للدكتور ، مش هتغلب!

معلش يا سين سين ، أنا بجد دمي اتحرق من الخبر ده md2:

أهو ده اللي بنسميه بريشياص بيبي ، وده أحد الدواعي الطبية للقيصري ، حتى لو كان ممكن الولادة تكون طبيعية! مش هنجازف!

وارجع واقول لك ، إن الغلط منها 90% ! هوه ده طبع الراجل - بِلِط - والمثل بيئول إن طلع العيب .......................

يبقى مسئوليتها تحمي البيبي بتاعها ، وتحمي نفسها من كسرة النفس بتاعة الإجهاض!

إنتا مش متخيل الدمار النفسي من مسألة الإجهاض... دا الست بتتعب وتتبهدل من الولادة ، بس آهو كله فدا عيون البامبينو ، تخيل البهدلة والآلام أثناء الولادة وبعدها ، عشان يطلعولها جنين ميت!

********

يا زميلنا الفاضل من فضلك امسك نفسك شويه وحاسب على الفاظك

سي السيد

الادارة

[~Heba~]

بجد حاجة محزنة md2:

ربنا يعوضها خير و يجعل كل جنين مات شافع لها و لزوجها يوم القيامة

ارى انه فى المستقبل تتواصل مع الخال ده فى حدود ضيقة لكن متقطعش معاه نهائى حتى لا تحمل وزر قطع صلة الرحم

[امانى]

فعلا اخى الكريم الاحساس نعمة لا يتمتع بها الا ما رحم ربى

اشفق على هذه الام واحس بمعاناتها فلقد مررت بتجربتها هذه بعد انجاب ابنى الاول وبسبب عدم الاحساس والامبالاه فقد طفلى

الثانى وكنت فى الشهر الثامن وحضر الينا ضيوفا من عينة الخال واولاده وبسبب دلع اولاد الخال وجريهم ورى بعض انخبطت منهم وبدون مبالاه من الاب والام وقضوا السهرة الممتعة وروحوا وناموا وانا نمت تلك الليلة على سرير بالمستشفى بعد ان تسببت الخبطة فى قتل

جنينى ......... والله افتكر الان تللك اللحظات التى كنت احس فيها بموت جنينى وهو يرفرف زى الفرخة المدبوحة داخل احشائى بعد

هذه الخبطة الملعونة . والله لحد الان لا تعلم هذه الاسرة ان اولادهم السبب فيما حدث لى تلك الليلة

ربنا يعوض على هذه الام الحزينة ويرزقها الزرية الصالحة وياريت يفضل الخال زعلان معاها لحد ما ربنا يفرجها عليها وترزق بمولود عوض

لها عما سبق طالما لا احساس ولا يحزنون

[se_ Elsyed]

ما كنتش ارغب ان الموضوع ينحسر على تلك الام التي فقدت جنينها

ولكن كنت عايز الدايرة توسع شويه ونسلط الضوء على موضوع الاحساس

-----------

انتو عارفين ان جالي مولود جديد والحمد لله جالي الزمايل والاصحاب يهنوا

لكن لاحظت برضوا تصرفات غريبة جداً من ناس متعلمة ومثقفة .. بالرغم من ان في ناس بيبقوا زي النسمة بصراحة ومنهم صديقي هاندي كرافت زميلنا هنا في المنتدى ودي حقيقة

لكن ايه رأيكم في واحد ييجي يزورك ويقعد 4 ساعات متواصلة وانت قاعد هاتنفجر والزوجة قاعدة مع زوجتي في الغرفة الاخرى بتموت هي كمان

لدرجة ان حمايا ولسنه الكبير مصاب بانزلاق غضروفي قديم وما بيقدرش يجلس بنفس الوضع مدة طويلة

الراجل بعد ساعة فيص مننا ودخل نام ما قامش الا الصبح

طب تعمل ايه مع آدمي زي ده ؟

انا مصيبتي اني أتألم في صمت وما بأعرفش ابقى بجح واحرج حد

طب بعد ساعة واتنين من الزيارة الثقيلة دي .. تروح ماسكه من ياقات القميص وفاتح الشباك وراميه ؟

ولا تقوله اطلع بره يا جبار انت وعيالك حرام على اهلك عايزين ننام ننه هوو ؟

والى اللقاء في احساسات اخرى

[galaxy]

كلي اسف لهذا المصاب الاليم.......جعله الله في ميزان حسناتهم واجرهم فيه ابدلهم خيرا منه ان شاء الله.

اتفق معك بالفعل لدينا اعداد لا بأس بها من فاقدي هذا الشعور الفطري...... كثيرين لا يتفهمون حاله من امامهم.....او يراعوا ظروف غيرهم.....المشكله انها تكون بصورة طبيعيه كأنهم جبلوا علي ذلك وان دا هو الطبيعي.......ولا يتخيلوا انه سلوك غير عادي او شاذ....والاقسي من ذلك انهم يستنكروا مجرد ابدائك الاستياء لهذا التبلد......علي اعتبار انها امر طبيعي.....وستجد اخي الفاضل هذا النموذج في كل مكان....كل شيئ اصبح عادي و في النهايه محدش كان قصده حاجه.

تعرضت قريبه لي من قبل لمثل ذلك عند ولادتها .......الكل في المستشفي لم يحرك ساكن علي اعتبار انها واحده بتولد ودا طبيعي حتي الطاقم الطبي الواجب عليهم مراعاتها.........حتي سقطت منا بالفعل...........والاظرف بقي انها عند خروجها كل واحد عايز الحلاوة.........مع ان حتي الترولي الواجب توافره في الموقف دا ......محدش كلف نفسه يجيبه الا لما وقعت بالفعل علي الارض..قد يفسر البعض ذلك انهم اعتادوامشاهده المرض والمرضي وبالتالي لا تؤثر فيم هذه المعاناه...وهو عذر اقبح من ذنب.

في العزاء ايضا تجد مثل هذه الصور........من ناس لا هم لها سوي الرغي والكلام ولا قيمه لاصحاب المصاب والشاهد انهم يقدمون واجب العزاء ويحاولوا التسريه عنهم........وهم ابعد ما يكون عن عمل الواجب.

في وفاه جدتي اتي قريب لنا من محافظه اخري للعزاء وقضي لدينا اليوم كله.......وكان اليوم الاول للعزاء......وبعد انتهاء العزاء كان من الطبيعي مبيته ......واثناءتناول الطعام بدأبالنكت والضحك والتعليق دون مراعاه لمشاعر والدي الذي ذهل من اسلوبه الفج....الا انه ضيف لا نستطيع فعل شيئ.

صور التبلد كثيرة ودوافعهاالغير مقنعه اكثر واكثر.......ولا نملك الا محاوله تجاهل هؤلاء الناس بصورة توضح لهم مدي استيائنا من افعالهم لعلهم يشعروا بمدي اسائتهم لنا.....عذرا للاطاله....تحياتي

[Salwa]

فوجئت فعلا ياسى السيد بموضوعك وفوجئت بما حدث ...

ربنا يصبرها هى وزوجها ويعوضهم عن هذا المصاب الاليم ..

وفى الحقيقة انا احييك جدااا ....لانك طرقت بابا من العسير ومن الصعب جداا ان يعترف بوجوده الاكثرية ..

لا نضعه تحت باب الضيف الثقيل ...بل للاسف...بعض من يعطون لانفسهم صفة الاصدقاء وبعض الاقارب (( بحجة العشم )) من الممكن ان يحيلوا حياتنا الى جحيم ..

لن ابدا فى سرد حوادث كثيرة حدثت لى ...لكنى فقط سوف احكى لك حاجة واحدة .

ليلة ميلاد صغرى بناتى .....كان فيه مصريين اصدقاء لزوجى جايين يتعشوا عندنا .

قبلها بيوم ايضا اتغدوا واتعشوا عندنا ...(( وكان واضح انى على وشك الولادة ....!!!))..

وبما ان زوجى ...(( مخلوق فضائى اتى من كوكب آخر ....لابد يكرم الضيف عشر مرات فى اليوم لحد النوم ))

كانوا تقريبا مقيمين فى بيتى ...يذهبوا الاوتيل بالليل فقط ...مرة ابنتهم عندها تسعة عشر سنة ...قعدت فى الصالون ومدت رجلها على الترابيزة (( آه والله العظيم...ابوها مليونير بقى وفاكرة نفسها فى اى مكان الناس حاتسكت لها ...!!! )) ...وقالت لى ...طوووونط..(( يعنى طنط ....وبينى وبينها مكانش يكمل فرق عشر سنين ))...هاتيلى كوكاكولا ساقعة ...!!!

ماهو كانوا بيتصرفوا وكأنهم فى كافتيريا ...!!!....شايفين الترحيب وفاكرين ان ده بقى اجبار والا احنا هبل ...!!!

قلت لها ...حاضر...جبت لها كوكاكولا...وقلت لها ...لو سمحتى !!!..شيلى رجلك من على الترابيزة ..وارجو انك متزعليش ..ما بحبش كدة ..!! وكمان ما احبش بنتى تشوفك بتعملى كدة وتحاول تقلدك ...ده تصرف مش حلو يعنى ...

و..

انا من النوع (( اللى مش ببين اى الآم ...بسكت كتير يعنى ))...حضرت العشا وكله تمام....

وناديت زوجى وقلت له ...ودينى المستشفى ...

و.....طبعااااااا.....كانت ولادة .

...و...

والله العظيم ماجابوا حتى هدية ......حتى الجرنال المصرى ...اللى بياخدوه ببلاش ..من الطائرة .

طبعاااااا........لاورد حتى ولا غيره ...

محدش مستنى حاجة ولله الحمد ....لكن ؟؟ تستغرب يعنى ....طيب انا كنت فى حالة يعلم بيها ربنا ووقفت اكمل لكم العزومة ....طيب حتى تعالوا قولوا مبروك ومعاكم وردة ....!!!!

يعنى تصرفاتهم عبارة عن استغلال علنى ....رغم ان معاهم ...بس دى ناس واخدة على كدة .

طبعاااااا تلاقيهم بقى قالوا دى حاتقعد فى المستشفى كام يوم ومش فاضية تعزمنا وزوجها مش فاضى يعزمنا برة فى المطاعم علشان مع ولاده ....ههههه....يعنى كدة للاسف ...

بس انا فعلالالالا....قلت لزوجى ....انسى ان الناس دى تدخل بيتنا تانى ..

فيه ناس كتير معندهاش دم ولا احساس ..

مخلوقين وكأنهم مش بشر ..

ربنا يصبرنا جميعا ...

[badroora]

لا حولا ولا قوة الا بالله العلى العظيم .

قدر الله وماشاء فعل ......ربنا مش رايد لها هذه المرة ايضا ان شاء الله يعوض عليها فى

المرة القادمة .

فى بس توضيح بسيط بخصوص الحصبة الالمانى وتأثيرها على الجنين .

خطور الحصبة الالمانى فقط فى الاسابيع الاولى من الحمل لانها قد تنتقل للجنين من

الام المصابة بالعدوى الى الجنين فيؤدى ذلك الى تشوهات خلقية فيما بعد .

وبكن فى الاسابيع الاخيرة من الحمل بيكون الجنين مكتمل تماما وامن من الحصبة لانه

اهم شيء ان الحامل متتعرضش لاى شخص

مصاب خلال الشهور الاولى فقط .

إصابة الجنين بالحصبة الألمانية:

عند إصابة الجنين بالحصبة الألمانية ينتشر الفيروس في الدم، وقد يكون من مضاعفاتِ ذلك إصابة المشيمة، وبالتالي انتقال العدوى إلى الجنين وقد وجد أن نسبة

حدوث ذلك تتراوح بين:

1- 47% إذا حدثت العدوى خلال الأسابيع الأربعة الأولى من الحمل.

2- 22% خلال الفترة من 5 - 8 أسابيع.

3- 7% خلال الفترة من 9 - 12 أسبوعًا.

4- 6% خلال الفترة من 13 - 16 أسبوعًا.

ثم بعد ذلك يصبح الجنين في الأغلب في مأمن من خطر الإصابة بالحصبة الألمانية.

وقد يكون سبب الوفاة ربما يرجع لاى سبب اخر اختناق او اى شيء

مضاعافات الاصابة بالحصبة الالمانى للجنين :

الاصابة فى الاسابيع الاولى .......تؤدى الى الاصابة بالعمى

الاصابة فى الاسبوع التاسع من الحمل تؤدى الى .... فقدان السمع

االاصابة الفترة ما بين 5- 10 اسابيع .......تشوهات وعيوب خلقيه فى القلب

الاصابة من 6 - 9 اسابيع .... تشوهات بالاسنان

الاصابة فى بداية الاسبوع الاول والتانى تؤدى الى التخلف العقلي والصم ويكتشف عن سن 4 سنوات .

طرق انتقالها .

استنشاق هواء يحتوى على فيروس الحصبة ( الرذاذ)

المتناثرة من الشخص المصاب اثناء العطس او الكحة

او مخاط الانف وافرازات الجهاز التنفسي

او من الام للجنين عن طريق المشيمة

الاعراض

ارتفاع فى درحة الحرارة وتضخم فى الغدد الليمفاوية خلف الاذن والرقية

الام فى المفاصل

وبعدين يظهر الطفح الجلدى

الوقاية

للحامل عدم الاختلاط باى شخص مصاب بالمرض وخصوصا فى الاسابيع الاولى من الحمل .

اخذ التطعيم ضد الحصبة للوقاية منه

عزل الطفل المصاب بعيدا عن جميع اخواته

التخلص من اى افرازات سواء الناتجة عن الكحة عطس خلافة

تهوية المكان تهوية جيدة

عزل ادوات اكل المصاب عن بقية افراد الاسرة .

الكويس هنا ان اى شخص اصيب بالعدوى ستمنحه مناعة طول العمر .

معلش قلبت الموضوع محاضرة بس احنا شغلانتنا ا كدا اى فرصة نلاقيها نقدر نقدم اى تثقيف صحى لازم نقوم به .

والف الف حمدالله على سلامتها

ربنا يعوض عليها ان شاء الله

احفظ الله يحفظك .. احفظ الله تجده تجاهك .. اذا سألت فسأل الله .. وإذا استعنت فاستعن بالله

واعلم أن مااصابك لم يكن ليخطئك .. وما أخطك لم يكن ليصيبك

واعلم أن الأمة لو اجتمعت على أن ينفعوك بشئ .. لم ينفعوك إلا بشئ قد كتبه الله لك

ولو اجتمعت على أن يضروك بشئ .. لم يضروك إلا بشئ قد كتبه الله عليك .

رفعت الأقلام وجفت الصحف

تم تعديل 24 يونيو 2008 بواسطة Badria Mekkawy

[لولا]

فعلا الإحساس بالآخريين نعمه عظيمه جدا..

لو كان الجميع يمتلكها لكانت الدنيا افضل حالا

ولكانت العلاقات بين الناس اكثر رقيا.

لكن عندما يعزل شخص ما نفسه عن الأخرين

ويبدأ بالكيل بمكيال له، ومكيال للآخر

على اساس ان الآخر ادنى منه، او لا يستحق

ما يستحقه هو من حقوق ساعتها سيحدث

حتما خلل ما ، والخلل سؤدى لعواقب

والعواقب ستزع فجوه بين الآنا والآخر.

فهل نحن بحاجه لكل هذا الإنفصال الحسي

عن الآخرين؟؟

هل نحن بحاجه للكيل بمكيالين؟

هل من العدل ان لا نشعر بالآخرين

بظروفهم ، بالآمهم، بمعاناتهم؟

الإحساس بالآخرين جزء من منظومه النفس المؤمنه

فسيد الخلق وصانا ببعضنا ووصف المؤمنين فى توادهم وتراحمهم

بالجسد الواحد،اذا اشتكى منه عضو،تداعى له سائر الجسد

بالسهر والحمى.

اللهم اصلح حالنا، وقوم نفوسنا، واهدنا طريق الصراط

المستقيم.