أقرؤا معي آخر أخبار التلميع الأعلامي .... وأفرحوا

[DARWEEN]

ألف مبروك على أصحاب المشاريع الصغيرة 50% تخفيض في الضرائب لزوم التلميع وأكتساب شعبية للوريث

يالله أفرحوا وأدعوا للبيه الصغير أبن صاحب العزبة

http://www.ahram.org.eg/Index.asp?CurFN=FR...N5.HTM&DID=7734

في اجتماع أمانة السياسات بلجنة الحزب الوطني بالجيزة‏:‏

مشروع لتخفيض‏50 %‏ من ضرائب المشروعات الصغيرة

جمال مبارك

أكد السيد جمال مبارك أمين السياسات في الحزب الوطني الديمقراطي أن الهدف الأساسي من السياسة الاقتصادية للحزب هو زيادة معدلات النمو‏,‏ لزيادة فرص التشغيل والعمل‏.‏ وقال‏:‏ إن أمانة السياسات ناقشت ـ في اجتماعها مع لجنة الحزب الوطني بالجيزة ـ عددا من المشروعات‏,‏ منها مشروع قانون الضرائب الجديد‏,‏ الذي يتضمن مزايا عديدة لقطاع المشروعات الصغيرة‏,‏ حيث يوصي بتخفيض الضريبة بنسبة‏50%‏ علي أرباح الأنشطة الصغيرة‏.‏ وأضاف أنه ـ من خلال المناقشات الموسعة ـ تم تأكيد أهمية استمرار الدعم للسلع التموينية‏,‏ والموارد المتاحة لها في الموازنة‏,‏ مع الحرص علي كفاءة توزيعها‏,‏ بما يضمن وصول الدعم إلي مستحقيه‏.‏ وأشار إلي ضرورة المضي قدما في تنفيذ منظومة الإصلاح التي يتبناها الحزب بأبعادها الاقتصادية والاجتماعية والسياسية‏,‏ مؤكدا أن أي تأجيل لإجراءات الإصلاح سيزيد من تكلفتها في المستقبل‏,‏ ويجعلها أكثر تعقيدا‏.‏

[freefreer]

و كمان فى الصفحة الأولى ..

[Salwa]

ترالام ...ترالام...تارالالالالالام.

ترالام....ترالام....تارالالالالالام.

يابختنا....ياحظنا....اليوم تمت نعمتنا..

ايه الكرم ده؟

صاحب الرفعه أصدر فرمانه..

المحسن المبجل....شعر بشعبه.

أنا رحت بعيد...ودخلت كل الابواب ....اللى بعد الباب ده واللى بعده

واللى بعده....وحاولت ،،شويه ،، اشيل عقلى واحط مكانه أسفجة

وأملأها أى حاجه...هواء مثلا....دخان....ضباب....وبقيت بعيد...

ومقدرتش.؟

ايه...العك...ده؟

وبأى صفة...؟؟ رئيس ايه؟...هيئة ايه...؟من يملك اعطى لمن يستحق؟؟

ده مش باب الأدب...؟؟بس احتمال صح...أصل اللى بيحصل قلة أدب.

أنا أعرف...وبالأسم...كفاءات....عباقرة...وفيهم اللى معاه 2 دكتوراه.

وعلماء....وشافوا الذل علشان ياخدوا ...ملاليم...قرض .لتمويل ابحاثهم

والآخر شوف ازاى؟...معرفوش ياخدوا حاجة...لأ...حرام....أخدوا أكبر

مقلب...وعارفين؟

واحد من الناس دىسافر فرنسا...وهناك مش مصدقين أن بلده..لفظته.

والآخر الأخ فرى فرير عنده حق..ازاى يكتبوها فى أول صفحة؟

ده حق يراد به باطل.

هو ده بقى اللى حايصلح اقتصاد مصر؟

هزلت والله.

ياامة ضحكت من جهلها الأمم.

هو مفيش كبار...خلاص.

كلهههههه بقى فى البنج.

كله بيقول آمين.

ماشى؟...أنا راجعة للأبواب الخلفية....الصدمة أخف هناك.

سلامى.

[ggamal]

لو كنت مكانه سوف ابعد ابنى حتى يستمتع بالفلوس و حتى لا تلعب امريكا به كما تفعل الان ببشار الاسد و اترك خلفى شعب قوى يقوده رجل لا يخاف من امريكا

[fuoeg]

طبعاً واضح إن دي عملية تلميع مكشوفة لكن سؤال: القرار ده هيضر الشعب؟

بالعكس أنا شايف ان القرار ده لو اتنفذ فعلا هيكون من أهم الخطوات لانعاش السوق و التغلب على الركود و حتى لو كان القرار للتلميع فهيكون في مصلحة الشعب ده يخليني افرح بالتاكيد.مش شرط يزود من رصيد السيد جمال مبرك أو لأ.

ده غير سؤال اذا توفى السيد الرئيس من هيكون الرئيس بعده أكيد مش هنجيب واحد من على القهوة لازم يكون شخصية معروفة.

من في مصر معّد لهذا الدور؟

هذا هو السؤال الذي يجب أن نجيب عليه.

و شكراً

[DARWEEN]

بالعكس أنا شايف ان القرار ده لو اتنفذ فعلا هيكون من أهم الخطوات لانعاش السوق و التغلب على الركود و حتى لو كان القرار للتلميع فهيكون في مصلحة الشعب ده يخليني افرح بالتاكيد.مش شرط يزود من رصيد السيد جمال مبرك أو لأ. 

ياأخي الفاضل أذا كان ذلك كذلك ... وإذا كان هذا القرار سينعش السوق قلماذا لم تقم الحكومة بأتخاذ القرار من تلقاء نفسها إذا كانت فعلا تعمل لصالح البلد دون أنتظار توجيهات السيد جمال والأعلان عن ذلك في الصفحة الأولى في أكبر جريدة قومية

يا أخي أن كل قرار سيتم أتخاذه فيه أية فائدة للناس سيعلن أنه من بنان أفكار السيد جمال لتلميعه

هذه هي القضية .... وليس من المستبعد أن ينسب أليه لاحقا نصر أكتوبر لأنه ضحك في وش بابا يوم 6 أكتوبر الصبح وهو نازل من البيت

يا أخي أنها مهزلة وأستخفاف بعقولنا جميعا .... والمصيبة ليست فينا نحن لكن المصيبة في بسطاء الناس الذين يصدقون كل مايرون ويهللون

ياسيدي الموضوع جد خطير أنه مستقبل مصر ... مستقبل أبنائي وأبناؤك ...

ده غير سؤال اذا توفى السيد الرئيس من هيكون الرئيس بعده أكيد مش هنجيب واحد من على القهوة لازم يكون شخصية معروفة. 

من في مصر معّد لهذا الدور؟ 

نقول من تاني ...

ياسيدنا عذع في حد ذاتها كارثة ... أن يرفع من الخدمة كل من يصلح حتى يفسح الطريق أمام جمال باشا فهذه مصيبة

أنهم يفرغون مصر من الكفاءات من أجل عيون الباشا

ياأخي البلد تباع وتورث .. ونحن نعامل كالنعاج أو قطع الأثاث

ياسيدي لماذا لا تكون أنت أو أي مصري آخر ... وما الذي جعل من جمال مبارك شخصية معروفة على آخر الزمان الأغبر ..

ماهي كفاءته ؟؟ ما هي خبراته ؟؟؟ ما الذي يميزه عني وعنك كمصريين سوى أنه أبن رئيس الجمهورية ؟؟؟

سأعيد عليك سؤال سبق أن سألته هنا ولم أتلق عليه أجابة ..

هل أدى السيد جمال الخدمة العسكرية مثلي ومثلك ؟؟ وأين أداها ؟؟ وإن لم يكن أداها فهو لم يؤد للوطن أقل حقوقه ولا يستحق من هذا الوطن أي شيء .

إلى متى سيظل هناك مصريون يؤدون كل الواجبات نحو البلد وآخرون يأخذون كل الأمتيازات لأنفسهم فقط

[الطفشان]

سنظل عبيد و نعاج و قطع أثاث

الى ان نفيق

ثم ندرك انه يجب عمل شئ

الاضراب أم أمريكا أم الجيش أم الظواهري؟ الأختيار لك!

http://www.egyptiantalks.org/phpBB2Plus/vi...opic.php?t=5963

[fuoeg]

السيد داروين/

بالنسبة للجزء الأول المتعلق بالقرار إن الحكومة ما نفذتوش من الأول دي مصيبة إنه يتاخد و يعلن عنه بالشكل اللي حصل فدي بلوى و يكشف عن نوايا كتيييير-لكن ده ما ينفيش انه فيه مصلحة البلد-و اذا كان كل شئ هيبقى من بنات أفكاره فالحل في الجزء الثاني

احنا متفقين انه مش أصلح واحد في الكون لقيادة البلد لكن عامة الشعب و لا عارفين حاجة احنا دايما بنحدد مقاييس القائد المثالي للشعب لكن ما بنحددش ازاي نوجده و اذا كان فعلا موجود- و ده أكيد-ازاي نظهره؟

عمرنا ما بنجاوب على الأسئلة المهمة و دي الكارثة

ده غير الشعب في وادي تاني خالص و احنا ما بنفكرش ازاي نصحيه

على لسان سواق تاكسي "مش مهم أي حاجة المهم رغيف العيش يفضل بشلن"

و دي جملة بليغة جدا بتلخص حال الشعب

و شكراً

[Lancelot]

على لسان سواق تاكسي "مش مهم أي حاجة المهم رغيف العيش يفضل بشلن"

و ديه جملة مش بس علي لسأن سواق التاكسي ... ديه علي لسان كل "مدبولي" في الشعب المصري ... بل أنها بمضمونها و ليس بشكلها تنتقل إلي مستويات أعلي ... و هذا ما يمكن أن نسميه "أزمة الحد الأدني" .... و هي أزمة لا تتضمن عامة الشعب و لا خاصتهم و لا مصر فقط بل تمتد إلي الوطن العربي كله و لا تضم المسائل السياسية و الإجتماعية بل كل المستويات ....

فالحد الأدني لمطالبنا يتراجع يوما بعد يوم ... من توفير حياة هانئة تليق بالبشر إلي أن يكون رغيف العيش بشلن ... و من تقدم إقتصادي إلي تمني ثبات سعر صرف الجنيه ... و من طلب إنسحاب إسرائيلي إلي طلب وقف بناء المستوطنات ... و من حرب علي إسرائيل إلي مبادرة عربية لخطب ودها .... و من تكوين لوبي عربي في أمريكا إلي الدفاع عن الإسلام ... و من حلم الوحدة العربية إلي أمل الحفاظ علي وجود الجامعة العربية ... و من البحث عن عبد الحليم أخر إلي ضرورة منع إنتشار شعبولا ... و من مشاريع النهضة بالسينما إلي الهجوم علي اللمبي ... و من خطط التأهل لكأس العالم إلي عقبة موريشيوس ... و من إلي و من إلي و من إلي ... قائمة طويلة من الأشياء التي لا يبدو للقارئ وجود أي تشابه بين عنصرها ... إلا في نقطة واحدة هي التراجع .....

و هذا التراجع له أسباب كثيرة ... إنعدام الثقة في النفس .. السلبية .. الرضا المبالغ فيه بأي شئ .. اليقين من أن الأمور لا تسير بأمرنا ... عدم المبالاة ... و أسباب أخري يطول ذكرها فما بالك بشرحها ... لكن إختصارا فإن هذا التراجع مدمر للغاية و يكون عادات سيئة للغاية ... فأنت لا تحارب من أجل ما تريد بل تفضل الإنسحاب لخط الدفاع التاني و التالي و الذي يليه و الذي يليهما و هكذا .. إلي أن تجد أن خط الدفاع القادم سيتخطاك .. سيصبح وراءك .. فماذا عساك أن تفعل ... ماذا ستفعل .. هل ستحارب يا من لم تحارب أبدا .. هل ستستسلم ... وقتها لن يمكن لك أن تحارب أبدا ...

إن أول خطوات التخلص من هذا التراجع هو أن تؤمن أنك قادر علي أن تحارب .. نعم هناك خسائر .. لكنك ستنتصر .. لابد أن نؤمن بذلك تماما ... هذه أول خطوة .. و يليها أن تثق بنفسك و هو منطقي في ظل إيمانك بالنصر .. و هو ما سيمنع عنك صفة السلبية و عدم المبالاة .. إنها سلسلة طويلة متصلة تبدأ بقرار تتخذه في قرارة نفسك .....

من أشهر ما قاله نابليون "الهجوم خير وسيلة للدفاع" ... لكن في ظل هذا التراجع ... أعتقد أن التحدث عن تكوين عقيدة كهذه يعد ضربا من المستحيل ...

أرجو ألا أكون خرجت كثيرا عن الموضوع لكن الجملة وحدها أثارت هذا بداخلي ....

شكرا

[الطفشان]

كلام رائع يا لانس

ياريت تفتح له موضوع لوحده عشان نناقشه

لانه مهم جدا

كمت باتناقش مع واحد صديق

فقلت له على الخبر دة

قال لي ان الحل في التنمية مش تخفيض الضرائب 50 % مرة واحده لمناسبة التلميع ولكن اللي عاوز يعمل تنمية فعلا يحل مشاكل الضرائب الحقيقة من تقديرات جزافية خيالية تخلي ناس كثيرة تقفل شغلها وتقعد تتفرغ للمحاكم

و أكد لي انه سمع كذا واحد بطلوا شغل بسبب الموضوع ده

بتوع الضرائب بيحسب عليك الضرائب على اساس انك لازم تكسب المبلغ اللي هو حدده بمعادلات حسابية (الطاقة القصوى للانتاج) مش حسب حالة السوق

يعني مثلا لو انت عندك محل حلاقة فيه 3 كراسي يبقى المحل شغال 10 ساعات كل زبون ربع ساعة كل زبون بيدفع جنية يقوم يضرب كل الارقام في بعض ويطلع الدخل المفروض اللي حايحاسبك عليه

اما اذا انخفض العمل لاي سبب فدي مش مشكلته

يعني لو انت نجار وعندك في الورشة 3 بنش

كنت في يوم من الايام بتستخدمهم في وقت واحد وبعدين ظروف العمل قلت لازم عليك تشيل البنشات اللي مش شغاله من المحل والا يتحسب عليك انها منتجه (شيء مؤسف)

والعكس بالنسبة للي بيرتشوا ويضيعوا على البلد مستحقات

لازم يطهروا الضرائب من الرشوه والمرتشين

اللي بيحصل ان الضرائب (وعلى مقياس اصغر مأمور الضرائب) مطلوب منها دخل محدد ومادام في ناس بتدفع رشاوي ليتم تخفيض ضرايبها فيتم التعويض من الناس الغلابة التانية.

ضروري الكلام ده يوصل للاخ جمال اذا كان هو بتاع السياسات ومستقبل مصر في ايده !!

[DARWEEN]

بتوع الضرائب بيحسب عليك الضرائب على اساس انك لازم تكسب المبلغ اللي هو حدده بمعادلات حسابية (الطاقة القصوى للانتاج) مش حسب حالة السوق 

أخي العزيز الطفشان ...

من واقع خبرتي في هذا المجال (مجال الضرائب والتحليل المالي) فلقد بحثت كجزي من رسالتي للماجستير في أسلوب فرض الضرائب في مصر وذهلت مما وجدت ...

ياأخي الضرائب في مصر تحسب على أساس أنها المتمم الحسابس لعجز الموازنة العامة للدولة ... يعني بمفهوم أبسط ... أفرض عجز الموازنة 3 مليار جنيه ... يروحوا لازقنها على أنها مبلغ الضرائب الواجب تحصيلة ..

هذا المبلغ يتم تقسيمة على مأموريات الضرائب العاملة في مصر بالنسبة والتناسب ... يعني مأموريات الأستثمار عليها كذا تحصله ومأموريات الأرباح التجارية عليها كذا ومأموريات الدمغة كذا .... وهكذا دواليك ... وبناءا عليه يقوم كل مدير مأمورية ضرائب بربط مبلغ مبلغ معين على كل مأمور عنده في المأمورية يلزمه بتحصيله ... وهو ماأصطلح على تسميته بين مأموري الضرائب بمسمى (الورد) بكسر الواو ... وينزل كل مأمور بقى على الممولين اللي عنده يجيب منهم اللي عليه ... وكل مأمور يحصل على مكافأة إذا حصل أكتر من الورد اللي عليه ...

وأديني عقلك موظف مرتبه محدود .. وقدامه حل من أتنين يايدبح الممول ويبقى شاطر وياخد مكافأة يايحسب بالعدل ويتجازى ..

مع الوضع في الأعتبار أن الممولين الكبار هما اللي بيقدروا يجيبوا محاسبين ومحامين ويدفعوا ويجيبوا هدايا واللذي منه

هذا هو يا أخي أسلوب فرض الضرائب في مصرنا المحروسة

هل تعلم أن قانون 157 لسنة 1981 تم تعديله ببنود تفسيرية أكثر من ضعف عدد مواد القانون نفسة ....

ولكم تحياتي

[Proud Muslim]

أنا زقهت من البلد دي بصراحة ..

مفيش فيها أي حاجة صح ؟؟؟؟؟؟؟؟؟؟؟؟؟

:( :( :(

قوانين الضرائب ..

قوانين مكافحة تلوث البيئة أو التلوث الصناعي ..

النظام السياسي و الاقتصادي ..

النظام التعليمي ..

كل حاجة .. كل ما يمس المواطن فيه فساد .. و جهل .. و أخطاء بالكوم ؟؟؟

لن أسأل السؤال المعتاد .. ما الحل !!

مللت من هذا السؤال ..

بل أقول .. هل هناك أمل ؟؟

[DARWEEN]

فالحد الأدني لمطالبنا يتراجع يوما بعد يوم ... من توفير حياة هانئة تليق بالبشر إلي أن يكون رغيف العيش بشلن ... و من تقدم إقتصادي إلي تمني ثبات سعر صرف الجنيه ... و من طلب إنسحاب إسرائيلي إلي طلب وقف بناء المستوطنات ... و من حرب علي إسرائيل إلي مبادرة عربية لخطب ودها .... و من تكوين لوبي عربي في أمريكا إلي الدفاع عن الإسلام ... و من حلم الوحدة العربية إلي أمل الحفاظ علي وجود الجامعة العربية ... و من البحث عن عبد الحليم أخر إلي ضرورة منع إنتشار شعبولا ... و من مشاريع النهضة بالسينما إلي الهجوم علي اللمبي ... و من خطط التأهل لكأس العالم إلي عقبة موريشيوس ... و من إلي و من إلي و من إلي ... قائمة طويلة من الأشياء التي لا يبدو للقارئ وجود أي تشابه بين عنصرها ... إلا في نقطة واحدة هي التراجع ..... 

رائع يالانسلوت ...

طول مافيه شباب زيك في مصر حنفضل نقول عمار يا مصر

هؤلاء هم نماذج الشباب التي يجب على الدولة أحتضانها وتنمية مواهبها وإدراكاتها بدل أن ينصب أهتمام الدنيا كلها على شاب واحد وكل مايتكلموا يقولوا منح الفرص للشباب وهم يقصدون منح الفرص للشاب الأوحد في مصر ...

أمثالك يا لانسيلوت بهذا الفكر هم من يجب منحهم الفرص والتشجيع

أحييك يا أبني .... وصدقني لقد كنت فقدت الأمل في شباب البلد بعد أن رأيت الميوعة والتمييع بدأ يصيبهم ولكن بعد أن قرأت لك ولأخوانك في المنتجى عرفت وتأكدت أن صحيح مصر ولادة

[Salwa]

مش أنا قلت لكم الشباب هنا ما شاء الله حاجة تفرح القلب ..ويمكن ده اللى بيجعلنى متفائلة...سنة الحياة التغيير والبقاء للأصلح..

تعرفوا...حاعترف لكم بحاجة...

انا معرفش حد فيكم شخصيا...لكن بما ان كل انسان بيتولد وفيه ،حاجة ، خاصة بيه هو لوحده متلاقيهاش فى حد تانى.

انا عارفه انا اتولدت بايه؟

اتولدت وعندىزى شفافيه ..واحساس بالناس..ولو فيه انسان سئ

شئ داخلى لا ادريه يجعلنى أبعد.

وصدقونى...

الأيام الى فاتت القيت نظرة على بعض المنتديات....وبعضكم يكتب فيها

ولم استطع...ولم اريد..التسجيل.

احساسى هنا..ان هؤلاء الشباب//حتى من يكتبون هناك // وجدوا

هنا ضالتهم المنشودة...التواصل بين الجيل الأول والثانى..

كتبت الكلام ده هنا لأنى فعلا سعيدةبهم واشعر ان هذا المنتدى هو

// البيت الكبير // ويقينا أن هؤلاء سيكون مستقبلهم أفضل.

وطالما فيه شباب على هذا القدر من الوعى والنضج...والاستيعاب...

مصر بخير ..

سلامى.

[Lancelot]

سيدي الفاضل داروين ... ماما سلوي ... متشكر جدا جدا علي كلامكم الجميل ده ... و أنا بأؤكد لكم إن فيه ناس كتير جدا في سني مثلي و أحسن مني كمان ... أحسن مني بكتير .... كل اللي محتاجينه هو فرصة ... فرصة تظهر معدنهم الأصلي الأصيل ... و شوية إهتمام و حبة تقدير من اللي بأحصل عليه هنا في المنتدي ... و أيضا توجيه بطريقة لطيفة هادئة تصحح ما يملكونه من أفكار خاطئة و تصورات قاصرة تعكس أول ما تعكس خبراتهم القليلة بالحياة ... توجيه يبتعد عن طريقة "هي كده و خلاص" و "إسمع الكلام" و "ما بلاش اللباطة ديه" ..... و حاجات كتير من دي إنتوا عارفينها كويس ....

ربنا يخليكوا ليا يا رب ... و يكتر من أمثالكم علشان البلد ديه ينصلح حالها علي إيديكوا .... و إحنا من وراكوا إن شاء الله ....

أنا بأعتذر عن الخروج عن الموضوع و مش هتتكرر ....

[freefreer]

و الله برافو عليك يا لانسلوت .. برافو حقيقى .. قد ايه الواحد بيطير من الفرحة لما يلاقى شباب واعد .. عنده فكر و حكمة و حسن تحليل للأمور .. ابشر .. ان شاء الله مستقبلك كبير ..

[Lancelot]

متشكر أوي يا أستاذ فري ...

يا جماعة بلاش أوي كده لأحسن أصدق .... :cry: :D

و بناء علي رغبة حضراتكم ... تم فتح موضوع مستقل .. أرجو أن ننتقل للمناقشة هناك .... إتفضلوا (برجلكوا اليمين لو سمحتوا :D :D ) ...

أزمة الحد الأدني

[الطفشان]

لولا ان في اخر اجتماع شافوك و قالوا انك ييجي 20 سنة ماكنتش صدقت

و كنت قلت دة واحد من دورنا - او مثلا 35 او 40 سنة - و عامل فيها صغير!

و شكرا على جعله موضوع مستقل

[Lancelot]

لولا ان في اخر اجتماع شافوك و قالوا انك ييجي 20 سنة ماكنتش صدقت  

و كنت قلت دة واحد من دورنا - او مثلا 35 او 40 سنة - و عامل فيها صغير!

:cry: :D :D :D :D :D :D :D :D :D :D :D

و شكرا على جعله موضوع مستقل

العفو ....

[Mohammad Abouzied]

بل أقول .. هل هناك أمل ؟؟

نعم فيه امل

وكمان أمل كبير

وأذا حبينا نبدأ فلازم نلاحظ انفسنا اولا هل نحن قدوه حسنه لاولادنا

وهل علمناهم صح ؟؟؟؟

ولا تقولي دا مش موضوعنا بل هو لب الموضوع

هي دي البداية والبداية الحقيقية