مسافر ألمانيا وعندي أسئلة

[vision]

السلام عليكم

أنا سعيد جدا لأني انضميت لهذا المنتدى وأصبحت فردا من هذا المجتمع المعطاء....

أنا الحمد لله ربنا رزقني وقبلوني في أحدى الجامعات بألمانيا ، وإن شاء الله كل حاجة جاهزة ماعدا حاجتين مهمين جدا:

1- اللغة ، وأنا مابافهمش أي حاجة في الألماني ماعدا كلمتين أوليفر كان ، ومايكل بالاك.

طبعا اللغة مهمة جدا هناك بالرغم من أن الدراسة بالإنجليزي بس أكيد هابقى محتاج الألماني عشان أعرف أتعامل مع الناس واشتغل هناك.

2- الجامعة طالبة مني رصيد في البنك يضمن أني أصرف حوالي 600 يورو كل شهر (مش عارف لمدة كام شهر بس أكيد لمدة سنة "مدة الفيزا")

طيب ، سيبنا من موضوع اللغة دلوقتي ، وخلينا في الفلوس ، المبلغ إللي معايا في مصر دلوقتي ميكفيش إللي همة عايزينه ، تقدروا تقولولي أتصرف إزاي؟

يعني ممكن آخد قرض من البنك وأسدده كدة كل شوية لما أشتغل إن شاء الله ، ولا لو فيه حل تاني ممكن أهل الخبرة يقولولي عليه؟

وإيه رأيكوا أتعلم ألماني ولا أنفض!!!

ولو عندكوا أي نصيحة تانية عايزين تقولوها ياريت ، أهلا وسهلا

طابت أوقاتكم

[capitshino]

بالنسبة للغة ضرورية جدا وممكن تكون شرط اجبارى - تاكد من الموضوع - وحاول تاخد دورات علشان هتفيدك جدا لان فى مدن كتير ماتعرفش انجلش.

فى معه

اسمه جوتا كويس جدا وممكن تاخد دورات مكثفة فيه.

بالنسبة للفلوس ماعنديش معلومات كافية

[adrianocrespo]

اتعلم لغة احسن...........جوته معهد ممتاز

انا سمعت ان الدراسة بلغة البلد بتبقي مجانية

[bentmasria]

اخى الكريم ربنا يوفقك ححاول الخص لك الموضوع ببساطة اللغة نمرة واحد لانك موش حتعرف تشترى عيش لو ما بتعرفش تتكلم اللغة وهناك فيه نظام فى الجامعة دورات مكثفة جنب الكورسات الجامعية بس ممكن يكلفك لو انت موش طالب منحة وبالتالى انصح بجوته القاهرة كبداية والممارسة هناك باذن الله حتساعدك كتير كمان موضوع اشعار البنك حاول تجمع مبلغ كويس من اصحابك مثلا اللى بيثقوا فيك واعمله ايداع فى البنك واطلب كشف حساب لمدة اسبوع مثلا وبعدها اسحب لهم فلوسهم وردها لهم بس المبلغ او الحد الادنى المطلوب لازم يتحقق والا ممكن ما تقدرش تطلع لا قدر الله وطبيعى فرصة انك تشتغل حتتضاعف بمعرفتك وفهمك للغتهم لانك كطالب موش حتلاقى شغل ما يتطلبش التعامل مع الناس او مع الاوراق باللغة الالمانية وممكن تشتغل فى محل مثلا او ماشابه فحتعمل ايه

اتصرف بحكمة فى فلوسك وحاول ما تضيعهاش قبل ما يبقى عندك فرصة عمل حقيقية وركز وحاول تختصر فترة الدراسة باى طريقة شوية مجهود زيادة يمكن بس فرص حلوة ممكن تتوفر لك لو عملت كده كمان لو عندك اى شهادات من مصر ترجمها وارفقها فى ورقك فى السفارة

ربنا يكرمك ويكتب لك الخير

[vision]

كابتشينو ، أدريانوكريسبو ، بنت مصرية

متشكر جدا على هذه المعلومات المفيدة ، وجزاكم الله خيرا

[ريمون]

اللغه شيئ مهم فى التعامل لكن مش ضروري! انا عشت شهرين هناك منحه فى جامعه و محتجتش اللغه اوى.

الشغل بيحتاج لغه غالبا, اسهل ان حد يشغلك لو بيتعرف المانى عن لو متعرفش.

انا اسف معنديش فكره عن موضوع الفلوس ده!

[teto]

بص يا باشا انت اولا لازم اللغه حتى لو هتدرس بالانجليزى عشان يوفقوا عليك

اما الضمان المالى لو ليك حد فى المانيا ممكن هو يضمنك وده يكون افضل وهو مش هيدفع حاجه مجرد ورقه لأنك هتروح هتشتغل مع الدراسه

ولو هتعمل الضمان المالى من هنا يبقى حسب الدراسه بتاعك كام سنه فى الكليه اللى على اساسها هتاخد الاقامه(مثلا لو دراستك 3 سنين هتاخد اقامه 3 سنين) واحسب انت بقى فى الكام سنه دول هتصرف كام

وتعمل بيهم حساب باسمك ...ممكن تستلف وتبقى ترجعهم بعدين من اى حد قريبك

واعرف كل المطلوب منك من الورق عشان ساعات مش بيقولوا فى السفاره كل الورق اللى محتاجه ملفك

ولو انت زبطت اللغه والضمان المالى ..الباقى امره سهل وتبقى انشاء الله معاك التأشيره

[qenawy]

اتمني لك التوفيق واتمني عليك ان تدلني كيف حصلت علي فرصة التعليم هذه حيث اني ارغب في اكما ل دراساتي العليا في الطب هناك لوكن سمعت ايضا شرط اللغه فتراجعت

[vision]

شكرا يا جماعة على كل هذه الردود ، فعلا وفيتم وأفدتوني ، جزاكم الله خيرا

أخ جناوي ، كيف حصلت على فرصة التعليم :

كان معهد الميكرو إليكترونيكس فتح برنامج جديد للدراسة باللغة الإنجليزية ، قدمت فيه وقبلوني الحمد لله ، معرفش بقى إذا كان فيه حاجة زي كده بالنسبة للطب ولا لأ.

أنا ما سمعتش عن شرط اللغة هذا ، ده أنا حتى كاتب في الأبليكاشن عن اللغة الألمانية (no knowledge) لو كان مشروط ماكانوش قبلوني

على العموم دور في جامعات ألمانيا على برنامج دراسة بالإنجليزي ، وربنا يوفقك

الموضوع عايز مجهود شوية في البحث خد الرابط ده:

http://www.arab.de/gunivers.htm

[vision]

طيب بالنسبة لفتح حساب في البنك ، لعمل كشف حساب ، الحساب ده يبقى باليورو ولا بالمصري وأطلب الكشف باليورو؟؟؟؟؟؟

آسف على السؤال ولكني ليس لدي أي خبرة في موضوع البنوك ده :wub:

[ahmed askar]

طيب بالنسبة لفتح حساب في البنك ، لعمل كشف حساب ، الحساب ده يبقى باليورو ولا بالمصري وأطلب الكشف باليورو؟؟؟؟؟؟

آسف على السؤال ولكني ليس لدي أي خبرة في موضوع البنوك ده :wub:

السلام عليكم انا متشكر جدا على قبولى فى هزا المنتدى العظيم