هـــو إحــنــا لـــيــه .......بقلم بدرورة.!!!

[badroora]

هوإحنا ليه مش نيتنا صافية لبعضنا

هواحنا ليه بندى للظنون فرصة تجرى فى دمنا

هواحنا ليه مش بنخاف على نفسنا

ونفوق قبل ما يضيع الحلم الجميل مننا

هواحنا ليه ........

ليه نبقي اصحاب نضحك نهزر نبتسم

يحصل خناق نلعن نكسر ننتقم

هواحنا ليه

هواحنا ليه مش بنريح مخنا

ونقضى يومنا باللى يسعد نفسنا.

سؤال سألتة .....ومعرفش اجابتة

قولت اطرحة يمكن الاقي ... الاجابة

هواحنا ليه ..

لما بنختلف بننسي كل اللى فات

وميبقاش من الذكرى غير اسوء الذكريات

هواحنا ليه

مش بنكبر ونطور نفسنا

ونساعد بعض ونرتقي كلنا .

هو احنا لية

ليه ندى فرصة للظنون تاكل وتشبع مننا

ويضيع ساعات من وقتنا عشان نثبت حسن ظننا

هو احنا ليه

مافيش بينا كبير يفصل فى الظنون

كنت افتكر جدى لما كان بيعالج الامور

كنت حكيم يا جدي وكلامك كان بيمشي

وكانت بتتحل المشاكل وترجع الماية للنهور

وكل غلطان يعتذر ويتلم الدور

ومكنش يجي ناس تتفرج وتلعب اى دور

هو احنا ليه

مش بيهمنا نراعى بعض

واللى غلطان مننا نديله وعد

اننا نساعده كلنا لاننا ملناش غير بعض

هو احنا ليه

مش احنا بردوا اللى بنقول تعبانين

وجرينا ع النت هربانين

من الزمن وغدر السنين

ليه احنا بقي اللى بنحيي الذكرى كل حين

مش احنا بردوا اللى كنا زهقاينين

ومش احنا بردوا

اللى قولنا ندور على لمة تجمعنا ونكتة تضحكنا ومعلومة تفيدنا

ايه جرى وايه حصل

كل دا اتبدل واصبح المكان مخنوق لا يحتمل

فين البسمة ومين المسئول عن غيابها

البسمة تاهت بين سطور رمادية ولغة مش مفهومة

الكل اصبح يجيدها وكل حين يعدها لحد ماخلاص زهقنا

وبنقولكم ارحمونا

الوقت بيجرى والعمر ضاع

والخلاف بياخد من رصيدنا ويضاعف الارباح

وفى النهاية هنلاقي نفسنا

خسرنا اصدقائنا واحترامنا لنفسنا

يلا نعملها دعوة ونرجع كل اللى فات

الحلو من الذكري نحيه ونحرق الخلافات

دعوة من مخنوقة زهقانة من الدنيا

نفسها فى نسمة بريئة فى حياة افتراضية

تبحث عن جو اسري مليء بالحب والحنية

لما اغلط الاقي اللى ياخد بايدي وينصحنى

ولما افرح اللاقي .. اللى يشاركنى ويسعد لفرحى

ولما احزن الاقي اللى يواسينى ويمسح دموعى بكلمة

يلا بقي تعالوا نبدأ حياة جديدة حتى ولو افتراضية

هو احنا متعبناش من كتر المنهادة

يلا الزمن بيجرى وبتكتر الخلافات

ولو الرصيد نفذ هنتوه فى بحر الظلمات

وهنغرق كلنا ........وساعتها مش هيفيد ندم على اللى فات .....

فضفضة

بدرورة

تم تعديل 27 يونيو 2008 بواسطة Badria Mekkawy

[مصري جدا]

يا سلام عليكي يابدوره....انت يابنتي كنز وكل يوم بيبان أكتر ...أنا معاكي في كل

أمنياتك وده كان سبب بعدي عن النت لفتره...ياريت نرجع لبعضنا ......والحب يملي قلوب البشر

[galaxy]

فكرتيني يا بدور بفيلم ويجا.......لو الناس عايزة تلاقي ميت مبرر تحب بيه بعض هيلاقوا......وبرضه لو عايزة تلاقي مبرر تكرهه وتهاجم بيه بعض برضه هيلاقوا.............

الموضوع مش مستاهل بجد ولا الدنيا مستاهله........احنا مع بعض هنا مثلا في عالم افتراضي...يعني لو شفنا بعض في مكان مش هنعرف بعض اصلا :tease: ..........يبقي ياريت نتفادي عيوب العالم الحقيقي اللي بنعيشه من خلافات وغيره ونبدأ بنفسنا احنا........دعوة مش بس للحب ......كمان للاحترام والاخوة الصداقه قبل اي حاجه تانيه..............

يعني الموضوع مننا احنا فعلا.........نصفي بس النيه ونلتمس لبعضنا العذر.........وقبل دا كله نحترم بعض اكتر ونحترم رأي بعض.....مش عشان رايي غير رأيك ولا معتقداتي غيرك تبقي وحشه وانا الحلوة ورأيي هو السديد......مش كل واحد بيقول كلام غيري يبقي بيهاجمني.....وفي مليون طريقه اوصل بيها رأيي من غير ما اجرح او اضايق حد.........هشترك معاكي يا بدور في الدعوة........هنا وكمان بره .....دعوة للحب والصداقه و قبل كل حاجه الاحترام.........تحياتي :sad: :wub: :closedeyes: :closedeyes:

تم تعديل 27 يونيو 2008 بواسطة galaxy

[Folana]

السلام عليكم ورحمة الله....

ايه الجمال ده بس يا بد....بدر..بدور..بدرررر. :sad: ايه الاسم الجديد الصعب ده؟

ايه الجمال ده بس يا بدرورة.....

معانى جميلة وأمنية أجمل....وماشاء الله الموهبة يتصقل كل يوم اكتر من اللى قبله...

لكن اللى أجمل لو السؤال أصبح "هو أنا ليه....."

بمعنى ان لو كل واحد بدأ بنفسه وخطى أول خطوة فى طريق المحبة ولم ينتظر الاخر....الدعوة حتؤتى بثمارها....

وتعالى نخليها دعوة للحب والتسامح والنقاء تحت عنوان " ابدأ بنفسك"...

هايلة يا بدرية بجد...ولك منى باقة ورد على احساسك الجميل.... :blink:

[سليمان بك]

التسلط هو اصل المشكلة

المدير المتسلط

الزوج المتسلط

المشرف المتسلط

هؤلاء كلهم مرضى نفسيون عاشقون للسلطة ضعفاء من داخلهم عاجزون في حقيقتهم ولا يمكنهم التوازن النفسي الا بقهر طرف اضعف منهم دون سبب

هؤلاء هم الذين يؤدون في النهاية الى اثارة التساؤل الذي تثيره مدام بدرية

[مصري جدا]

اثارة التساؤل الذي تثيره مدام بدرية

أنسه لو سمحت

[سليمان بك]

اثارة التساؤل الذي تثيره مدام بدرية

أنسه لو سمحت

سيدي الكريم \

نحن هنا في منتدى ثقافي وفكري يركز على الافكار والاراء

ولسنا في مقهى سياحي يهتم بالشخوص والاحوال الاجتماعية

ونحن جميعا نكتب ونشارك ضمن منظومة متكاملة يقودها احد اهم وابرز مؤسسي المنتديات العربية والمصرية

نحن في جامعة تفرعت عنها العديد من المراكز الثقافية المنتدياتية وفي بؤرة اشعاع ثقافي وافكري وحواري لا نظير لها

لذا فان الالقاب في هذا المكان لا معنى لها

دمت بخير

[badroora]

سووووووووووووء تفاهم

الاخ العزيز .......سليمان بك ........دكتور مصري جدا لا يقصد شيء غير الدعابة

ودا لانى كل ما حد يكتبلي حتى لو موضوع جاد كلمة مدام اسيب كل شيء وامسك فيها واقوله موزموزيل من فضلك :blink:

هزار طبعا والاخ مصري جدا عملها بردوا كهزار عشان انا كنت هادخل اقولك كدا

بليز لا تزعل منه هو لا يقصد شيء غير الدعابة

احنا هنا اخوة واخوات نتعامل باحترام و بلا القاب ولا حتى اى تكلفة ولكن الهزار بينا ممكن

تكون حضرتك بس لسه مش متعود علينا .

عموما دى عندى انا لانى انا اللى كل شوية اعمل كدا ..........مدام ..لا ........موزموزيل لو سمحت :sad:

ها خلاص حضرتك فهمت انه لا يقصد اى حاجة من اللى جت فى دماغك .

خلاص صافي يا لبن ....... :trumpet:

محسوبتك نجفة ام حسنين :hearts:

[مصري جدا]

طب أقول أيه أنا بعد كده ....

[امانى]

يلا نعملها دعوة ونرجع كل اللى فات

الحلو من الذكري نحيه ونحرق الخلافات

دعوة من مخنوقة زهقانة من الدنيا

نفسها فى نسمة بريئة فى حياة افتراضية

تبحث عن جو اسري مليء بالحب والحنية

لما اغلط الاقي اللى ياخد بايدي وينصحنى

ولما افرح اللاقي .. اللى يشاركنى ويسعد لفرحى

ولما احزن الاقي اللى يواسينى ويمسح دموعى بكلمة

يلا بقي تعالوا نبدأ حياة جديدة حتى ولو افتراضية

الاخت العزيزة بدرية كلماتك اثرت فيا اوى حساها بكل معانيها وبكل ما تحمله من رسائل

ياريت نرجع تانى من الاول تانى ونلحق نفسنا ونحاول نبقى كلنا اسرة واحدة بتخاف على بعض وبتتمنى كل خير لبعض

واللى زعلان ينسى زعله واللى مزعل حد يقول خلاص حقكم عليا مش عيب الغلطان يقول اسف والزعلان يغفر ........

تعالو ا نفتح صفحة جديدة ونلبى نداء بدرية ونلحق نفسنا ونجعل من عالمنا الافتراضى ملجأ وملاز من معاناة الحياه

الحقيقية هبدأها بنفسى أنا حاسة انى اتغيرت بس للاسف مش للاحسن ابدا حاسة انى بقيت بدارى شعورى وممكن

ازعل من حد ومقلش له انى زعلانة زى الاول . بعترف انى كنت الاول بصفح واعتزر لما اكون غلطانة دلوقت لا باعترف

ان تهت عن نفسى كتير يا بدرية وكلامك رجعنى ليا . دلوقت اقدر اقول انا اسفة لاى حد زعلان منى وانى مش شايلة

لأى حد حاجة وان كنت بالفعل لا اشيل لاى حد اى حاجة وحشة لانها ليست طبيعتى .

اضم صوتى لصوتك يا بدرية واقول يلا بينا كلنا نبدا من جديد

يلا كلنا نبدا نقرب تانى من جديد

ننسا نصفح يرجع تانى الكون سعيد

ونقول للزعل ابعد عنا خلاص

بقينا حبايب وايامنا كل يوم عيد

اشكرك يا بدرية من اعماق فلبى واحييكى على صفاء نفسك وجدعنتك ومبادرتك الجميلة :blink: :sad: :trumpet:

امانى

[vipwithyou]

ايه يا عم الحاجات الحلوة دى

لا بجد ما شاء الله عليكى

شرُفتى على الابداع يابنتى

انتى عارفة انى مليش فى الشهر فلما انا بالذات اتشد لكلامك يبقى انتى اكيد ابدعتى

هاتى ربع جنيه بقى .. هذار طالما احنا فى منتدى ثقافي وفكري يركز على الافكار والاراء ( اول مرة اعرف تخيلوا )

[مصري جدا]

ماشاء الله يا اماني ....يظهر المواهب بدأت تبان....يلا جمعي رباعياتك في موضوع مستقل

[النيل حبيبي]

الفاضله/بدووورة

ماشاء الله عليكى جمعتِ مواجهات كتيرة

لكن؟

الحياة هى دي الحياة بحلوها ومرها

طباع مختلفه حتى الاخوات اللي من ام واب واحد

[badroora]

طب أقول أيه أنا بعد كده ....

قول .ربنا يديكى على قد نيتك الصافية يا نجفة ........ :wub:

[badroora]

يا سلام عليكي يابدوره....انت يابنتي كنز وكل يوم بيبان أكتر ...أنا معاكي في كل

أمنياتك وده كان سبب بعدي عن النت لفتره...ياريت نرجع لبعضنا ......والحب يملي قلوب البشر

هو انا اجى ايه جنب حضرتك ....حضرتك ماشاء الله بحر شعر ملوش نهاية :blink:

ويا رب نرجع لبعض ونحب بعض اكتر لانى هو دا اللى دايم .........تحياتى :wub:

[badroora]

يعني الموضوع مننا احنا فعلا.........نصفي بس النيه ونلتمس لبعضنا العذر.........وقبل دا كله نحترم بعض اكتر ونحترم رأي بعض.....مش عشان رايي غير رأيك ولا معتقداتي غيرك تبقي وحشه وانا الحلوة ورأيي هو السديد......مش كل واحد بيقول كلام غيري يبقي بيهاجمني.....وفي مليون طريقه اوصل بيها رأيي من غير ما اجرح او اضايق حد.........هشترك معاكي يا بدور في الدعوة........هنا وكمان بره .....دعوة للحب والصداقه و قبل كل حاجه الاحترام.........تحياتي

طب يلا يا شيكولا ..........ايدك فى ايدينا .........نجتهد ونلصح ويبقي عملنا اللى علينا ......... :wub:

[فالحة هانم]

قلبتي المواجع يا أخت بدرية

هواحنا ليه مش بنريح مخنا

ونقضى يومنا باللى يسعد نفسنا.

سؤال سألتة .....ومعرفش اجابتة

قولت اطرحة يمكن الاقي ... الاجابة

هواحنا ليه ..

لما بنختلف بننسي كل اللى فات

وميبقاش من الذكرى غير اسوء الذكريات

هواحنا ليه

مش بنكبر ونطور نفسنا

ونساعد بعض ونرتقي كلنا .

هو احنا لية

ليه ندى فرصة للظنون تاكل وتشبع مننا

ويضيع ساعات من وقتنا عشان نثبت حسن ظننا

مش عارفة ليه لما قريت المقطع ده حسيت ان المشكلة تكمن في 3 حاجات ( حلوة تكمن دي ؟ ) ;)

هم : عدم اليقين التام بالله - عدم الرضا الكامل - عدم التسامح مع الغير

لو كان عندنا يقين تام بالله مكانش مخنا حيفضل يشتغل ويفكر ويقول : طب اوصل للمنصب ازاي ؟؟ طب اجيب فلوس اكتر منين ؟؟ . . .

لأن في النهاية ربنا كاتب لكل واحد رزقه وعمله ومنصبه وفلوسه وسفره وغربته وجوازه وطلاقه وعياله .... حتى عربيته ( كورولا او مش :P ) لأن ربنا ادانا المخ اللي نفكر بيه في نوع العربية وفي النهاية بنختار نصيبنا ورزقنا ... اللي ربنا كاتبهولنا

أما عدم الرضا الكامل لأن لما الواحد بيوصل لمنصب مثلا بيبص لزميله . . ويقول الله ما انا بأعمل نفس مهام شغله ومش ماسك المنصب ده ... ليه ؟؟

ربنا ممنعناش من الطموح .. بس في النهاية لازم لنا الرضا بما قسمه الله من منصب وخلافه .. ولازم كلمة ( الحمد لله على اللي انا فيه ) والواحد يفوق نفسه بأنه يبص للي اقل منه مش اكتر منه . . لأن اللي اقل منه هو ده الرزق بتاعه على اد كده ... واللي اكتر منه برضه هو ده رزقه ..

وفي النهاية كل الناس متساويين في كل حاجة . .

عدم التسامح مع الغير ده بأة جزء منه راجع للنقطة اللي فاتت .. إزاي ؟؟؟

لأنك مثلا مثلا لو متخانقة مع واحدة زميلتك أعلى منك في المنصب . . . ممكن يكون الدافع الأساسي لعدم تسامحك معاها مش السبب اللي اتخانقتوا عليه أصلا ولكن السبب انها اعلى منك في المنصب . . وكده مفيش رضا داخلي بالنصيب

حتقولي طيب ولو في منصب زيي مثلا او أقل . . . أقولك ممكن علشان الواحد مش بيحط نفسه مكان الشخص التاني . . . أو لأنه بيطلع كبت عنده من وهو صغير مثلا . . أصل التسامح أو عدم التسامح أعتقد انه مكتسب من البيئة المحيطة . . ولا إنتي إيه رأيك ؟؟؟

يعني انا حاسة ان الحل في اننا نرجع بتصرفاتنا ومعتقداتنا لربنا ونحاول نقرب من ربنا اكتر . . ونطلب منه انه يصلح حالنا جميعا . .

يارب اصلح حالي وحال كل أعضاء المنتدى . . .آآآآآآآمييييين

[badroora]

السلام عليكم ورحمة الله....

ايه الجمال ده بس يا بد....بدر..بدور..بدرررر. :sad: ايه الاسم الجديد الصعب ده؟

ايه الجمال ده بس يا بدرورة.....

وتعالى نخليها دعوة للحب والتسامح والنقاء تحت عنوان " ابدأ بنفسك"...

العزيزة مدام فولانه .......هلا والله :rolleyes:

بخصوص الاسم متشغليش بالك دا تحدى ......لنفسي اللى ماعرفش انطقة فى الواقع اكتبه ع النت :lol:

نادينى بالاسم اللى سهل عليكي ........ :wub:

هى الدعوة عامة وطبعا ممكن كل شخص يجعلها خاصة ...يعنى كل واحد عنده مشاكل مع حد

وبادر بحلها منه هياخد حسنات ومنها القلوب تصفى .....والجو العام هيكون كويس وصحى .

والله يصلح حالنا وحال الجميع ان شاء الله ....... :D

[badroora]

التسلط هو اصل المشكلة

المدير المتسلط

الزوج المتسلط

المشرف المتسلط

هؤلاء كلهم مرضى نفسيون عاشقون للسلطة ضعفاء من داخلهم عاجزون في حقيقتهم ولا يمكنهم التوازن النفسي الا بقهر طرف اضعف منهم دون سبب

هؤلاء هم الذين يؤدون في النهاية الى اثارة التساؤل الذي تثيره مدام بدرية

طيب تفتكر حضرتك نعمل ايه ؟

نستسلم ونكمل الحياة قهرا ؟

ولا نحاول نعدل ونحارب كل مفسدات الحياة ؟

[badroora]

اضم صوتى لصوتك يا بدرية واقول يلا بينا كلنا نبدا من جديد

يلا كلنا نبدا نقرب تانى من جديد

ننسا نصفح يرجع تانى الكون سعيد

ونقول للزعل ابعد عنا خلاص

بقينا حبايب وايامنا كل يوم عيد

الغالية أمانى .........طول عمرى راىي فيكي يا امانى انك نقية جدا وصادقة وكل يوم بتأكديلي دا ....... :rolleyes:

يا ريت كلنا امانى .......فى قلبها ......ونقائها.........وصدقها ........وحنيتها ..........بجد ربنا يبارك فيكي وتظلى كما انتى

ومن الاجمل العودة للحق .....بعد ما نبعد عنه ......والاهم اننا ندرك دا بنفسنا .....ونرجع بردوا بنفسنا ...... :D