"الاسم المشطوب"

[shawshank]

قصيدة الاسم المشطوب

عبد الرحمن الأبنودي - يناجي عبد العاطي صائد الدبابات

مصر المهيبة بتنحدر للواطي

هل كنت تتخيل في يوم

السرعة دي في الموت ياعبد العاطي؟

حتي وإنت

قصاد صفوف الدبابات؟!

سامحني أنا ماعرفش كام عندك

من الأولاد والبنات

هل كنت تتخيل خيانة الوطن ..

هل كنت تتخيل عبير هذا الزمن

وهوة صاعد للعلا نتن؟

دلوقت إيه اللي مضيّق

صدرك الوسيع؟

وبتفهم إزاي الفروق

بين اشترا الوطن الأسير ..

والبيع ..

النصر تمنه اشتروا بيه قصر ..

تمن الوطن

إذن لدخول السمسرة

ماكانش حرب

ماكانش نصر

واللي دفعناه لأجل نتقدم

حدفنا بعيد ورا ..

ماتقولش زيّي ..

كان وكان

كان حيلة لأجل يموت فقيرها

في طوابير الهوان

وطنك يا صاحبي

كان زمان

واللي إحنا فيه

زمن العفاريت السمان ..

ماعادش داخل الحدود

غير اللي سمسر

واللي قرقر

اللي وفر

واللي باع!

العيد الذي ذهب من قبل بط

عيد بليد

تعرفش بيه غير م الصحف

وأعترف

العيد بييجي

لأجل ما تموت من جديد ..

ولو أن موتك ريح بتغلب الرياح

لكنه ماحركش ليه أسن الحياة؟

ويا صاحبي ..

ماحركش ليه ألم الجراح؟

رفرف العلم العظيم العالي

علي كل الجباه

لكنه ..

ليه من غير حياة! ؟

والنصر ليه علي رقاب كل اللي عملوه

إتّكي؟

إتسحّبت

وإحنا في عز النوم

إتسحبت

في السر وف كام يوم ..

هربت كده علنًا يا عبد العاطي!!

ويكون شعار بلدك:

«بدال ماتبني .. بيع»

هنا تكتشف إن الخراب

هو الربيع ..

بيع المصانع والصحاري واشتري

آخر حدود الأرض والشواطيء ..

اللي هوى الوطن ..

هوى

بالعشق ولّع وانكوى

من قبل ما يفتّح

ذوى

يا أحلي أبناء الوطن

ترحل عليل .. بلا دوا

ترحل وحيد مجهول .. حزين

نرحل سوا !!!

مات الوطن ..

ورجعت الميه تاني تمشي في الواطي

يا بطل زمانه فات

صيّاد الدبابات

يا مجسّد الحسرة

في أسوأ معانيها

ما عادش غير الموت حرية

إرحل يا عبد العاطي

لا أكل ولا ميه

إرحل يا عبد العاطي

لا حلم بالألوفات ولا المية

الحسرة وطنية ..

فارحل حزين مظلوم

إرحل سفيه موصوم

إرحل مريض ساكت

إرحل إلي أبعد بعيد!!

أعداء وطننا

صاروا أحبابه

مستمتعين بالوطن

والوقت خان الوقت

بيسلكوا ..

وكأنهم أصحابه

إنت العدو دلوقت

إنت نشاز اللحن

أمّا إحنا يا بطلي الحزين

فمدّينالهم للحياة

شريان ورا شريان ..

زعيقي وسط الخلق زي سكاتي

وتفاؤلي بقي جزء من إحباطي

إتغيرت كل العقول

وإتبدّلت كل الفصول

وإتعفّرت كل الشموس

وإتغيّرت كل النفوس

وزي ما تقول قول!!

اسمك بهت ..

وكأنه عمره ما كان

إتباع كأنه بضاعة في الدكان

في الانفتاح علي عورة الأوطان

آدي الجناة أبرار ..

وإنت الخاطي

وإنت غلطة الوطن

في صفقة الشيطان

يا عبد العاطي ..!!

الاسم .. كان هوه الهدف

رفرف علي مرمي النيران ..

وكأنه قاصد ينضرب

الاسم ضلّم ..

وإنشطب

ومصر مصرين

مصر إحنا .. وهمّ

بلي

مصر إحنا .. وهمّ

ليهم الغنايم

والبهايم إحنا

صوتهم وجع مسموم

بيسكن العصب

ويلهب اللهب

يا صاحبي موت أرجوك

وموّت الغضب ..

نرحل سوا ..

أنا وإنت والوطن الحبيب

ونسيبها للوطن الغريب

نسيبها للوطن المريب

لديب .. بيحرس الجياع

والوهم إذا كشكش ..

بيزداد اتساع ..

مش دي البلاد

اللي حاربت عشانها

ولا هم دول يا صاحبي

حكامها

ولا مصر دي اللي رفعت أعلامها

ورميت بروحك في خضم الحرب

ونيرانها

فين إحنا دلوقتي يا عبدالعاطي؟

مين اللي وطّي العالي يا صاحبي

وعلّي الواطي؟

مين اشتري بتمنك .. الصحرا والشاطي

وطاطي

فاكرنا وراه .. حنطاطي القاتل. القاتل.. وعادانا

وأدانا ضهره وسابنا ببلاهة

نعدّ قتلانا

وهرب بمصر..

وخبّي عنوانها؟ ؟

وكأن حربك النبيلة

لعبة لعبوها العيال

لعبوها ع الساكت

اتمزعت الصفحة اللي فيها اسمك

حدوتة

وسط الحواديت تاهت

الاسم مشطوب

والتاريخ باهت مافضلشي منه شيء يا عبد العاطي ..

اسمك المشطوب

مازال هناك مكتوب

في قلب سينا في سرّها الدفين

في صدور جميع المخلصين

المرضي زيك بالوطن واللي حيغلبوا المحن

واللي حيجلوا عنه عار الغبار

علشان يشع اسمك كإنه نهار

عارفك مامتّش علّة

متّ تعب

ما هو كام سنة يا صاحبي

يحتمل الحطب

نار الغضب؟

كلّمنا وإنت ع السرير عيان

عن اللي ولّي .. وخان

وعن اللي باع النصر في الدكان

مش ده الوطن

اللي اتفقت معاه يا صاحبي زمان..

تطلق زفير الحزن في النفس الأخير

ولا الشاشات بكيت

ولا المذياع ذاع

فاكشف غطا وجهك ..

ومزَّع القناع

بلا حكومة

بلا رئاسة

بلا معارضة

بلا بتاع!!

تم تعديل 27 يونيو 2008 بواسطة shawshank