طبيب ناجح بالصعيد أفكر فى الهجرة .. أشيروا على

[qenawy]

حبيت اصبح علي الجميع

بعد كر وفر اخيرا لقيت الموضوع

اشكر كل من ساهم وافاد لقد استفدت كثيرا واشكركم جميعا

[jgeorge]

السلام عليكم،

معلش حسأل الاستاذ jgeorge سؤال ، ارجو ان لا تعتبره تدخلا في حياتك الشخصية و لك حرية الاجابة، هل فعلا حضرتك بذلت مجهود كبير في محاولة الحفاظ على اولادك في الخارج، يعني كنت بتحاول تربطهم بمصر و تصر على العودة في الاجازات لمصر علشان يشوفوا اهلهم، هل كنت ديما بتكلمهم في الصح و الغلط ، هل كنت بتصلي امامهم و بتصوم و بتقرا قرآن و بتصر على انهم يشاركوك ده من صغرهم، هل كنت بتحاول تحفظهم قصار السور على الاقل و هم صغار ، هل كنت بتحاول تاخدهم لصلاة الجمعة كل اسبوع و صلاة العيد و غيرها، هل كنت ديما بتحسسهم ان سلوكيات الغربي كويسة و ممتازة و هوه حر فيها و لكن ليست كلها تلائم دينا و عادتنا و لازم نختار الكويس ونسيب الوحش. هل ديما كنت بتقولهم احنا مسلمين ما ينفعش نعمل كده من صغرهم. ولا حضرتك كنت بتحاول و فشلت ، ولا كنت بتحاول بس مش بتصر، و لا مكنتش بتحاول خالص.

معلش الهدف من سؤالي هو، ان لو حضرتك عملت كل ده و برضوا حسيت ان و لادك حيضيعوا يبقى وقتها احس ان ممكن ميكونش في امل ان الواحد يقدر يحافظ على اولاده.

بعد مكتبت لاحظت ان حضرتك قد لا تكون مسلم، و لكن اعتقد ان كلامي ينطبق على المسيحية ايضا، بدل الجامع في الكنيسة و بدل القرآن في الانجيل و في صلاة و صوم اكيد.

كنت بتحاول تربطهم بمصر و تصر على العودة في الاجازات لمصر علشان يشوفوا اهلهم، ايوه

هل كنت ديما بتكلمهم في الصح و الغلط ، ايوه

هل كنت بتصلي امامهم و بتصوم ايوه بس مش كل الصلاوات

و بتقرا قرآن و بتصر على انهم يشاركوك ده من صغرهم، مش دايما لانهم كانوا بيدرسوا المنهج المصرى بما فيه الدين

هل كنت بتحاول تحفظهم قصار السور على الاقل و هم صغار ، ايوه و ايضا منهج الدين المصرى

هل كنت بتحاول تاخدهم لصلاة الجمعة كل اسبوع و صلاة العيد و غيرها، صعب لاننى باصلى فى جامع المستشفى او ما قارب و الاولاد بعيد فى الدرسة لان يوم الجمعة يوم عمل مش اجازة

هل كنت ديما بتحسسهم ان سلوكيات الغربي كويسة و ممتازة و هوه حر فيها و لكن ليست كلها تلائم دينا و عادتنا و لازم نختار الكويس ونسيب الوحش ايوه بس فى المجتمع و التليفزيون و المدرسة اللى انت تقول عليه غلط ها يقولوا صح و العيل بتلخبط جدا و بيقول فى عقل باله لما كل حاجة هنا بيعملوها غلط طب بابا جبنا هنا ليه؟؟؟ يبقى اكيد هما فيه حاجات عندهم صح بس بابا و ماما هما الللى فلاحين

. هل ديما كنت بتقولهم احنا مسلمين ما ينفعش نعمل كده من صغرهم. ولا حضرتك كنت بتحاول و فشلت ، ولا كنت بتحاول بس مش بتصر، و لا مكنتش بتحاول خالص. كنت بقولوهم و لكن المجتمع بيقول العكس مثلا انت تقول ان البنت ما بينفعش تتزوج مسيحى، هما يقول لبنتك انها تتزوج من تحب بدون النظر للدين

و الله العظيم حاولت لكن سن البلوغ سن خطر جدا هو انا ابنى حيكون سيدنا يوسف؟؟؟؟؟؟؟؟؟؟؟؟؟؟

[hosiny]

لان اجتمعت الانس و الحن علي ان ينفعوك بشئ ..............................

صلي استخارة و توكل علي الله في الهجرة و لو ملكش خير فيها ربنا هيبعدها عنك عن تجربة والله

وما خاب من استشار و لكن اجعل الله موجهك الاول

[moheltohamy]

وهيا ان ردى هوا الى مش سخيف لا ... دا العكس

لانى اولا ما كتبتش لحضرتك الرد علشان تتكرم وتعلق عليه انا كتبتة للفاضل ايهاب

يعنى الموضوع بيني وبينه وانا ما علقتش على رد حضرتك

باشمهندس سامح...

كلامي أنا اللي سخيف؟ طيب!

ولم يعجبني التلميح السخيف :

ايهييييييي ..... ايهييييييي هوا فى كدة

على الملاء كدة .... اذا بليتم فسستتروا ..... هل يا ترى حضرتك الى بتذاركلهم ولا

أولاً ، أنا لم أقُل الكلام سخيف ، أنا قلت التلميح هوه اللي سخيف ؛ ما وراء الكلام!

إنتو الى ليه كده؟ :lol:

لية كل مرة تقولو على مصر دى جهنم واطلعو منها وما تعيشوش فيها

لية كل ما واحد يشتكى من حاجة فى مصر اسهل كلمة تقولوهالوة هاجر يابنى دى بلاد الغرب جنة

لية كل واحد يقول كلمة فى حق البلد تعتبروة جاهل

لية كل واحد يبقي عايز يرجع مصر تحبطوة وتحاولو تمنعوة

البلاد الى انتوا فيها دى مش الجنة ......... بالله العظيم عمرك ما هتلاقى واحد زى المصرى الجدع لو لفيت بلاد

بس احنا الى بنكرة بعضينا ....... ما بنحبش بعض

ارحمونا بقي ...........

احنا عارفين الى فى البلد ومش ناقصين احباط

أستاذي الفاضل... إحنا ما قلناش أساساً إن البلاد دي جنة! ومش محتاجين نعمل مقارنة بينها وبين مصر ، نبقى بنظلم مصر (وقلت الكلام ده قبل كده) ، دُول دوَل العالم الأول ، واحنا عالم تالت! مفيش مجال للمقارنة أصلاً! ولأنها مش جنة الله في الأرض ؛ لازم هيكون ليها عيوب... وكل واحد هيشوف البلد من منظور مختلف ، ولو حسيت إن البلد ليها عيوب ؛ هترجع وانتا مقتنع وسعيد ، وراضي بمصر، وعيوبها هتكون على قلبك زي العسل ، ولنا في الزميل jgeorge أسوة.

كل اللي قلناه ، روحوا وخوضوا التجربة ، وقارنوا ، وقرار العودة متاح دائماً ؛ مصر مش هتقفل الباب!

وف نفس الوقت ، ما حصلش إننا قلنا إن مصر دي جهنم (بتجيبو الكلام ده منين بس؟!) واللي بيقول كلمة حلوة في حق البلد مش جاهل!

بص يا باشمهندس... حكاية جَت على بالي أحب احكيهالك...

ليا واحد صاحبي كنا بننزل نجري مع بعض ساعة العصاري... كنا بنعدي جمب محطة مياه (اللي هيا جنب فنطاس المياه اللي بيمد البيوت بالمياه). المنطقة هادية بشكل غير طبيعي ، وصاحبي ده كان يتمنى يشتغل شغلانة زي دي ، أو مدرس ابتدائي ، عنده حصة فاضية ، وياخد كرسي وينزل يقعد يتشمس ف الحوش ويشرب له كباية شاي. دي في نظره كانت الحياه اللي يتمناها لنفسه ؛ حياه هادية ما فيهاش استريس ولا تنشنة. هوه شخصيته كده ، هوه حر. واتمناله الحياه اللي تسعده.

إنتا حر في رأيك... أنا باقول رأيي في كندا ، وانتا من حقك تقول رأيك في كندا برضه ، أو في مصر ، أو أي حاجة في الدنيا. بس مش من حقك تقول رأيك فيا أنا!!!

أنا لم أسألك عن رأيك في شخصي المتواضع. ولست أنا شخصية عامة ليحق لك نقدي وإبداء الرأي فيا. وبالمنظر ده تحور الموضوع من النقاش في موضوع عام ، لحوار شخصي ، بين اتنين ما يعرفوش بعض أصلاً ، ولو اتقابلوا ف الشارع ، مش هيعرفوا بعض!

الكلام السابق ده مش موجه ليك يا باشمهندس بالمناسبة ، وهوه ده اللي كنت أقصده بــ "إنتو ليه كده؟"

ليه الحوار والنقاش العام ، بيقلب دايماً لحوار شخصي ، وتجريح ، وتلقيح بالكلام! يمكن عشان احنا مصريين؟!

وقبل ما تعترض ع الجملة الأخيرة دي ، أحب أقول لك إن النائب العام بعد ما غلب ، وزهق من كتر القضايا المرفوعة عشان السب والقذف ، بين الناس وبعضها في مصر ، أصدر بيان بأن الشعب المصري (سليط اللسان) وبالتالي لا تجوز مقاضاته بسبب السباب والألفاظ السيئة! (وصلني الخبر من واحد صاحبي وكيل نيابة)

بس ما تجوش جنب البلد والى بيحصل فيها حتى

انتوا مش مرتاحين والحمد لله مالكمش دعوة بقي بالبلد

احنا مش ناقصين احباط

يا نهار أبيض! مالكمش دعوة بقى بالبلد؟ ليه حاسس إنك - وكتير بيتعاملو بنفس أسلوبك ده - زي ما تكونو سحبتو مننا الجنسية المصرية!

دا الحكومة المصرية - بكل بلاويها - ما فكرتش تعملها ، وتقول لنا مالكوش دعوة بالبلد! دا واحنا ف الغربة ، من حقنا نشارك في انتخابات الرئاسة في سفارات مصر حول العالم!

بص يا باشمهندس...

لما أكون أنا واختي قاعدين نتكلم على بابا أو ماما ، ولو قلت حتى كلمة وحشة في حقهم ، أختي مش هتمنعني أغلط في أبويا وأمي. وصل المعنى؟

مصر دي بلدي ، وأنا حر أقول عليها اللي أنا عاوزه ، بلدنا واحنا حرين فيها! أحبها ، أشتمها ، أضربها ... برضه بلدي. والمفروض إني باتكلم عليها وسط اخواتي. يعني المفروض إن دي قعدة عائلية. مش كده ولا إيه؟

ولما باكون في كندا ، بافتخر إني مصري ، ولعلمك ... الناس اللي في كندا بيحبوا مصر موووت ، آه والله :blink:

لكن لما تلاقي إبن عمنا (الإخوة العرب) بيغلطوا في مصر ، أو حد مش مصري وبيخبّط في مصر ، ساعتها من حقك (وانا معاك) ، نروح نمسح بيه الأرض!

مش بيقولوا: أنا واخويا على ابن عمي ، وانا وابن عمي ع الغريب bv:-

المهم

هل هما بيدرسولهم مفاهيم الحياة الاسلامية

هل هما درسو التربية الاسلامية

هل بنت حضرتك بتروح المدرسة بزى اسلامى علشان نقول انها تربية اسلامية

كندا مش مُطالَبة إنها تشرح التربية الإسلامية لأولاد سعادتك! دي مسئوليتك الشخصية إنك تدبر الموضوع ده. وف نفس الوقت دي مش فرنسا ؛ يعني بنتك تتحجب وتلبس زي إسلامي وهيه رايحة المدرسة ، هيه حرة. وانا قابلت ف الفترة القصيرة اللي قعدتها في تورونتو بنات محجبات ، وزي الفل. طبعاً المغريات والتيار ضدك (ماحنا قلنا دي مش الجنة) ، بس محدش هيقول لك ما تعملش. وهيه دي الحرية ؛ زي ما من حق البنت تئلع ، برضه من حقها تلبس bv:- .

طب تخيل معايا كدة انك قاعد جنب بنتك فى المدرسة وفى واحد هلف كدة

قاعد عمال يشرحلهم فى الجنس وقاعدين ولاد على بنات مع بعض موقفك انتا هايكون اية

ودى بقى ما تقارنهاش بالاسلام علشان الاسلام ما قالش ندرس الجنس للألاد وهما اعدين مع البنات

همممم ، لأ دي بصراحة ما جربتهاش! إحنا كنا مبلولين في هدومنا ، والدكتور بيشرح لنا الفروق بين الــ Male and female breast ف المحاضرة ، ولا أول راوند لينا ف الجراحة وكانت الحالة راجل كبير عنده فتق إربي Oblique Inguinal Hernia ، وساعة الكشف ، وأخينا ده زي ما يكون "ما سدّأ" (متعوّده دايماً!)... خلع هدومة و وقف لنا طرزان ، ولا فيه كسووف!

المهم ، كنا طبعاً مكسوفين جداً ، وأكيد البنات زميلاتنا كانو مكسوفين برضه! بس ما ينفعش الكسوف هنا ، لازم تتعامل مع الحالة بدون أحاسيس نهائياً. دي حالة مرضية ، وانتا هتبقى دكتور.

مش متخيل بقى إيه الوضع مع الأطفال! ولا طريقة عرض المعلومة إزاي ، بس أعتقد إنو هيكون أحسن من (إحنا اشتريناكو من عمر افندي)!

ولو مش عاجبك كلام إيهاب ، ولا كأنك قريته! اللي يعجبك خده ، واللي مش عاجبك يا سيدي طنّشه!

هيا للأسف مع احترامى لشخصك المحترم بس دى حاجة ما تخصكش

كلام جميل ، وقمة ف الذوق. بس الكلام ده متروك لكل الأعضاء للاطلاع عليه. لو تحب تبلغ إيهاب بحاجة خاصة (ما تخصنيش) ، إبعتهاله في رسالة خاصة ، ساعتها دي ما تخصنيش بجد.

واللي بيتقال لإيهاب النهارده ، مسيره هيتقاللي بكره!

عموماً ، أعتقد المفروض نفتكر الراجل الطيب صاحب الموضوع (د. قناوي) ، وكان بودي أساعده في كتابة الأبليكيشن ، بس لما قدمت أنا سنة 2004 ، ما كانش فيه الورق ده ، كنت باتقدم بكل أوراقي وإثباتاتي من البداية. بصراحة ، كان نظام أحسن ، وأوضح.

[qenawy]

عموماً ، أعتقد المفروض نفتكر الراجل الطيب صاحب الموضوع (د. قناوي) ، وكان بودي أساعده في كتابة الأبليكيشن ، بس لما قدمت أنا سنة 2004 ، ما كانش فيه الورق ده ، كنت باتقدم بكل أوراقي وإثباتاتي من البداية. بصراحة ، كان نظام أحسن ، وأوضح.

اهيء اهيء بعيط

:blink:

عموما اشكركم برضه انا مستفيد

مش عارف قريت اشاعة والله اعلم ان اللي بيتقدموا من مصر فرصهم اقل من الخليج هل هذا صحيح

ثانيا هل فعلا بيميزوا ولو في الخفاء بين المسلمين وغيرهم بعني اللي اسمه محمد مثلا يبقي كخة وفرصه تقل

وشكرا

[moheltohamy]

عموماً ، أعتقد المفروض نفتكر الراجل الطيب صاحب الموضوع (د. قناوي) ، وكان بودي أساعده في كتابة الأبليكيشن ، بس لما قدمت أنا سنة 2004 ، ما كانش فيه الورق ده ، كنت باتقدم بكل أوراقي وإثباتاتي من البداية. بصراحة ، كان نظام أحسن ، وأوضح.

اهيء اهيء بعيط

bv:-

عموما اشكركم برضه انا مستفيد

مش عارف قريت اشاعة والله اعلم ان اللي بيتقدموا من مصر فرصهم اقل من الخليج هل هذا صحيح

ثانيا هل فعلا بيميزوا ولو في الخفاء بين المسلمين وغيرهم بعني اللي اسمه محمد مثلا يبقي كخة وفرصه تقل

وشكرا

هاهاهاهاهاهاهاها bv:-

لا يا سيدي ما تعيّطش...

كنا فعلاً بنسمع إن فرص المسيحيين أفضل ف الجرين كارد لوتري بتاعة أمريكا...

لكن كندا؟ لأ ... أبسوليوتلي :blink:

محمد سعد... (ومش كخة خالص!)

تم تعديل 4 يوليو 2008 بواسطة moheltohamy

[samehelassad]

اخي العزيز دكتور قناوي: فية راجل فاضل احد اعضاء المنتدي المقيمين في كندا ولا اتذكر الحقيقة اسمة حاليا ولكنة رجل فاضل والحقيقة كان يخبرنا بتجربتة في العمل في كندا وتعبة الشديد وذلك لتصادف ذهابة الي كندا بعد احداث الحادي عشر من سبتمبر وانة كان يبحد عن عمل بجد واجتهاد حتى انة كان يبحد عن طريق شركة توظيف ونظرا الى ان اسمة اسامة وهذا يتطابق مع اسم اسامة بن لادن لم يكن يجد عملا. وذلك بناء على سردة لحكايتة وانة بعدما اشار علية موظف شركة التوظيف بتغير اسمة وفعل قال انة وجد عمل بعد ذلك مباشرة.

واذ بحثت في المنتدى جيدا ستجد هذة المداخلة.

فانا اعتقد احتمالية تدخل الاسماء في تكرار مثل هذا الموقف قد يكون امرا واردا.

والله اعلم. وما الرزق الا من عند الله. واعقلها وتوكل.

[KINANE]

لكن لما تلاقي إبن عمنا (الإخوة العرب) بيغلطوا في مصر ، أو حد مش مصري وبيخبّط في مصر ، ساعتها من حقك (وانا معاك) ، نروح نمسح بيه الأرض!

مش بيقولوا: أنا واخويا على ابن عمي ، وانا وابن عمي ع الغريب

لا يا دكتور moheltohamy عندك هنا ستوب

انا فلسطيني يعني مكان اقامتي بفلسطين بس لا اكتر والا اقل ,وزي مهي بلدي فهي بلدك انتا و بلد الجميع و نفس الشيء ينطبق على بلدي بردو مصر ,ومتنساش اننا كنا بلد واحد قبل ما الاستعمار يفرقنا و متنساش ان السبب في فرقتنا اليوم هم فقط الحكام وليس اي شيء اخر وزي ما قال نبينا عليه الصلاة و السلام في العصبيه (اتركوها فانها نتنة)

في الحقيقة عجبني ردك و لباقتك يا دكتور بس الحقيقة انا ما بقدر اسكت لما بحس ان احنا انفسنا بنساعد الاستعمار و بنفرق بين بعضينا و بالمناسبة احنا اخوة مش اولاد عم و اولاد عمنا هما اليهود

[samehelassad]

(مش عارف قريت اشاعة والله اعلم ان اللي بيتقدموا من مصر فرصهم اقل من الخليج هل هذا صحيح)

دكتور قناوي:

الفرص واحدة اللي بيعدي ال pointsالمطلوبة يعني لو اوراقة سليمة يبقى مقيول انشاء الله. لكن نظرا لان عدد الطلبات من مصر اكتر من عدد الطلبات من الخليج. ونظرا لان دول الخليج لايوجد فيها سفارة كندية تصدر فيزا للهجرة وانما يصدرو للدراسة والسياحة فقط. فطلبات المقدمين من الخليج ترسل الى سفارة كندا في لندن. وسرعة الانتهاء من الطلبات في لندن اسرع من مصر بحوالي سنة. ولو دخلت على موقع الهجرة الحكومي وهو www.cic.gc.ca وهو موقع رائع وحكومي ومعلوماتة اكيدة 100 في ال 100 ستجد هذة المعلومات في الاحصائيات اللي كندا عملتها عن ال processing timeفي سفارتها حول العالم. انصحك بقرائة المعلومات في هذا الموقع وممكن من خلالة عمل كل شيى بكل ثقة وبدون محامي.

[م.سامح المصرى]

باشمهندس سامح...

كلامي أنا اللي سخيف؟ طيب!

انا ما قلتش كدة

حضرتك اعتقدت كدة لية bv:-

ولم يعجبني التلميح السخيف :

ايهييييييي ..... ايهييييييي هوا فى كدة

على الملاء كدة .... اذا بليتم فسستتروا ..... هل يا ترى حضرتك الى بتذاركلهم ولا

أولاً ، أنا لم أقُل الكلام سخيف ، أنا قلت التلميح هوه اللي سخيف ؛ ما وراء الكلام!

تصدق فعلا سخيف

والكلام على تدريس الجنس للأطفال ولادنا دا الى جميل جدا جدا

ولااااااااااااااااااااااااااااااااااااااااازم يتبروز :blink:

أستاذي الفاضل... إحنا ما قلناش أساساً إن البلاد دي جنة! ومش محتاجين نعمل مقارنة بينها وبين مصر ، نبقى بنظلم مصر (وقلت الكلام ده قبل كده) ، دُول دوَل العالم الأول ، واحنا عالم تالت! مفيش مجال للمقارنة أصلاً! ولأنها مش جنة الله في الأرض ؛ لازم هيكون ليها عيوب... وكل واحد هيشوف البلد من منظور مختلف ، ولو حسيت إن البلد ليها عيوب ؛ هترجع وانتا مقتنع وسعيد ، وراضي بمصر، وعيوبها هتكون على قلبك زي العسل ، ولنا في الزميل jgeorge أسوة.

كل اللي قلناه ، روحوا وخوضوا التجربة ، وقارنوا ، وقرار العودة متاح دائماً ؛ مصر مش هتقفل الباب!

وف نفس الوقت ، ما حصلش إننا قلنا إن مصر دي جهنم (بتجيبو الكلام ده منين بس؟!) واللي بيقول كلمة حلوة في حق البلد مش جاهل!

لا قلتو على الوصف بتاعكم دا تبان انها جنة مفيش قلة ادب كلة محترم

مفيش حاجة هناك حرام او خلافة

وفعلا احنا لو بنعمل مقارنه بينها وبين مصر هانظلم مصر

مصر بلد يسود اغلبها الاحترام وعادات وتقاليد اغلب من فيها تتبع بعض عادات الدين الاسلامى

مش كلهم بس يسود اغلبها

انما المقارنة من حيث العلم والتكنولوجيا فكندا تكسب طبعا

انما لو هانتكلم عن ذكاء الشباب ...... مصر طبعا ودى كلام مش من فراغ

فى دراسة صينية اثبتت ان يعتبر اذكى طفل وشاب

بينولها المصرى حتى عن الصين بس مفيش حد بيقدلا الحكاية دى هنا

حتى اذكى طفل فى العالم من مصر .... وكندا بعتت علشان تتبناة وتعلمة وياخد جنسيتها هوا واهلة

ابوة رفض قال لاء عجبنى جدا لانة اثبتلى ان كندا كانت لية ولابنة slave مش هوا الى slave ليهم

وحصل موقف مع اخويا برضوا .....

واحد ما يعرفش جنسيتة بس باين مصرى

راكب مع اخويا التاكسى (اخويا اساسا سواق تاكسى )

والواحد دا متجوز واحدة صينية او كورية مش فاكر يعنى بس بلد متقدمة

قالة تخيل انهم بيعملو ابحاث عن المصريين هناك لقو ان كل النسب عند المصرى عالية

الذكاء والتحمل وخلافة لدرجة انهم قالو ان الرب كان من مصر -استغفر الله العظيم- انا مش فاكر القصة كويس لانها كانت من فترة

روح حضرتك فى اى كلية او جامعة وشوف مشاريع التخرج بتاعت الطلاب الى مترمية فى الادراج

-------------

وحضرتك لما تعيب فى مصر او تذكر مساؤها دا فى حد زاتة مش كويس لان مفيش واحد كويس يعيب فى اهلة

او يذكر مساؤهم بمعايرة مش بنصيحة عرفت حضرتك انا جيبت الكلام دا منين

إنتا حر في رأيك... أنا باقول رأيي في كندا ، وانتا من حقك تقول رأيك في كندا برضه ، أو في مصر ، أو أي حاجة في الدنيا. بس مش من حقك تقول رأيك فيا أنا!!!

أنا لم أسألك عن رأيك في شخصي المتواضع. ولست أنا شخصية عامة ليحق لك نقدي وإبداء الرأي فيا. وبالمنظر ده تحور الموضوع من النقاش في موضوع عام ، لحوار شخصي ، بين اتنين ما يعرفوش بعض أصلاً ، ولو اتقابلوا ف الشارع ، مش هيعرفوا بعض!

اولا انا مبديتش رأى فى حضرتك :lol:

ولا جيت جنب حضرتك من اساسة

ليه الحوار والنقاش العام ، بيقلب دايماً لحوار شخصي ، وتجريح ، وتلقيح بالكلام! يمكن عشان احنا مصريين؟!

لا مش عشان احنا مصريين

لاننا مش عايزين حد يحاسبنا لو غلطنا عرفت بقى حضرتك لية

لاننا صح على طول عمرنا ما بنغلط ولا نرضى حد يناقشنا فى غلطنا ابدا ابدا

والى يمشى معانا يبقي حبيبنا انما الى يعترض على كلامنا يبقي مش كويس ولازم نقيم علية الحد وباقى ايام الاسبوع كمان

أحب أقول لك إن النائب العام بعد ما غلب ، وزهق من كتر القضايا المرفوعة عشان السب والقذف ، بين الناس وبعضها في مصر ، أصدر بيان بأن الشعب المصري (سليط اللسان) وبالتالي لا تجوز مقاضاته بسبب السباب والألفاظ السيئة! (وصلني الخبر من واحد صاحبي وكيل نيابة)

هل دى برضو زى حكاية سيدنا عمر bv:-

يا ريت اثباتات يا باشمهندش

حتى بص

النائب العام ابدى سرورة بالشعب المصرى وقال يا رب يخلونى كدة على طول واصدر بيان ان الشعب المصرى هااااااااااااايل

(وصلنى الخبر من عم عبده البواب- على فكرة دا حبيبى فعلا)

شوفت مفيش اسهل من الكلام

[م.سامح المصرى]

يا نهار أبيض! مالكمش دعوة بقى بالبلد؟ ليه حاسس إنك - وكتير بيتعاملو بنفس أسلوبك ده - زي ما تكونو سحبتو مننا الجنسية المصرية!

دا الحكومة المصرية - بكل بلاويها - ما فكرتش تعملها ، وتقول لنا مالكوش دعوة بالبلد! دا واحنا ف الغربة ، من حقنا نشارك في انتخابات الرئاسة في سفارات مصر حول العالم!

مين قال كدة

هوا حضرتك بترميلي تهم جاهزة

هوا علشان طلبت منكم ما تعيبوش فى البلد بقيت بجور عليكم

حرااااااااااااااااااااااام عليكم بقي ........ دا مفيش كدة ابدا

هوا الافضل لسعتك اية علشان ابقى كويس اجى اشتم فى البلد معاك واقول يا جماعة هاجرو دى بلد بنت ....

انما ما اعقبش على كلام حضرتك قلتة فى حق البلد ...... لا حول ولا قوة إلا بالله العلى العظيم

لما أكون أنا واختي قاعدين نتكلم على بابا أو ماما ، ولو قلت حتى كلمة وحشة في حقهم ، أختي مش هتمنعني أغلط في أبويا وأمي. وصل المعنى؟

مصر دي بلدي ، وأنا حر أقول عليها اللي أنا عاوزه ، بلدنا واحنا حرين فيها! أحبها ، أشتمها ، أضربها ... برضه بلدي. والمفروض إني باتكلم عليها وسط اخواتي. يعني المفروض إن دي قعدة عائلية. مش كده ولا إيه؟

انا عمرى ما اقول كلمة وحشة فى حقهم لانهم ربونى

وعيشت معاهم واصحاب فضل لا يحصى عليا دول كفاية انهم اهلى

ولو اخويا قال كلمة وحشة فى حق وادى او والدتى والله لو كان اكبر منى

هاقدر مقامة واناقشة فى الحكاية دى مع انى عارف اخويا ما تطلعش منه اساسا

بس فى اخوات بينكر فضل اهلهم عليهم عرفت بقى اننا ما بنحبش حد يناقشنا لو غلطنا فى حاجة

---------

مصر دى بلدك وبلدى وبلد كل المصريين

لما تتكلم عنها بحلو فى وشنا ولما تتكلم عليها بوحش برضو فى وشنا

مش معنى انها بلدك تعيب فيها وتذكر مساؤها انا قلت ابل كدة وهافضل اقول احنا الى خليناها كدة

وياريت نحاسب نفسينا ابل ما نحاسبها هيا شخص ادامنا علشان نحاسبها من اساسة

دا المفروض ما نذكرش اسمها بمكروة دى جماد ...... حد بيناقد الجماد

لو فى حد بيناقد الجماد يبقي عايز يعيد تفكيرة من اول وجديد

وبعدين فى حد يضرب جماد وهاتضربها فين فى الصحرا ولا فى النيل :blink:

كندا مش مُطالَبة إنها تشرح التربية الإسلامية لأولاد سعادتك! دي مسئوليتك الشخصية إنك تدبر الموضوع ده. وف نفس الوقت دي مش فرنسا ؛ يعني بنتك تتحجب وتلبس زي إسلامي وهيه رايحة المدرسة ، هيه حرة. وانا قابلت ف الفترة القصيرة اللي قعدتها في تورونتو بنات محجبات ، وزي الفل. طبعاً المغريات والتيار ضدك (ماحنا قلنا دي مش الجنة) ، بس محدش هيقول لك ما تعملش. وهيه دي الحرية ؛ زي ما من حق البنت تئلع ، برضه من حقها تلبس

هما فين دول اولادى

انا لسة اساسا قدامى 5 سنين عقبال ما اتجوز :lol:

طلما كندا مش مطالبة انها تشرح التربية الاسلامية يبقي ما تقولوش اننا هاجرنا للأسلام ولنئمن على دينا وكلام شعارات تحليل الحرام دا

مسافرين لاهداف تخدم المصصالح الشخصية مش اكتر

من كلامكم عن الاحترام والمادة وخلافة

همممم ، لأ دي بصراحة ما جربتهاش! إحنا كنا مبلولين في هدومنا ، والدكتور بيشرح لنا الفروق بين الــ Male and female breast ف المحاضرة ، ولا أول راوند لينا ف الجراحة وكانت الحالة راجل كبير عنده فتق إربي Oblique Inguinal Hernia ، وساعة الكشف ، وأخينا ده زي ما يكون "ما سدّأ" (متعوّده دايماً!)... خلع هدومة و وقف لنا طرزان ، ولا فيه كسووف!

المهم ، كنا طبعاً مكسوفين جداً ، وأكيد البنات زميلاتنا كانو مكسوفين برضه! بس ما ينفعش الكسوف هنا ، لازم تتعامل مع الحالة بدون أحاسيس نهائياً. دي حالة مرضية ، وانتا هتبقى دكتور.

مش متخيل بقى إيه الوضع مع الأطفال! ولا طريقة عرض المعلومة إزاي ، بس أعتقد إنو هيكون أحسن من (إحنا اشتريناكو من عمر افندي)!

طب دا علشان بتدرس حضرتك الطب

ودا مجال حضرتك

انك تشوف بنى ادم قدامك دا علم ولا حياء فى العلم

انما تدريس الجنس للأطفال لية هل هما ملزومين بكدة

هاتلى دليل من الدين يقول كدة

على فكرة دا بيساعد على انتشار الجنس بين الشباب وعلشان كدة النسبة هناك عالية

بس الكلام ده متروك لكل الأعضاء للاطلاع عليه. لو تحب تبلغ إيهاب بحاجة خاصة (ما تخصنيش) ، إبعتهاله في رسالة خاصة ، ساعتها دي ما تخصنيش بجد.

فعلا الكلام متروك لكل الاعضاء

بس مش كل الاعضااء من حقهم يعلقو على كلام عضو وهو بيناقش عضو تانى

وغير كدة العام حاجة والخاص حاجة تانية

لما يتفضل حضرتك ويكتلكم على الخاص لازم طبعا اكلمة على الخاص

انما لما يتكلم على العام لازم اتكلم على العام ... ولا اية رأى حضرتك

واللي بيتقال لإيهاب النهارده ، مسيره هيتقاللي بكره!

فعلا عامل تعامل ولو بعد حين

بس كويس ان حضرتك ما علقتش على الميم الى ابل اسمى :lol:

تعرف حضرتك الفاضل تورنتو

كنت بحترمة جدا جدا

لية بقي علشان كان راجل صادق كان بيقول الحلو والوحش مش بيطلع يتغنى بالحلو فقط

عموماً ، أعتقد المفروض نفتكر الراجل الطيب صاحب الموضوع (د. قناوي)

فعلا كفاية كدا ونحاول نساعد الراجل لما يحبة الله ويرضاة

وسلامى لك استاذى العزيز ودومت بكل خير

خوك الصغير سامح bv:- bv:-

[yassir]

اخي العزيز دكتور قناوي: فية راجل فاضل احد اعضاء المنتدي المقيمين في كندا ولا اتذكر الحقيقة اسمة حاليا ولكنة رجل فاضل والحقيقة كان يخبرنا بتجربتة في العمل في كندا وتعبة الشديد وذلك لتصادف ذهابة الي كندا بعد احداث الحادي عشر من سبتمبر وانة كان يبحد عن عمل بجد واجتهاد حتى انة كان يبحد عن طريق شركة توظيف ونظرا الى ان اسمة اسامة وهذا يتطابق مع اسم اسامة بن لادن لم يكن يجد عملا. وذلك بناء على سردة لحكايتة وانة بعدما اشار علية موظف شركة التوظيف بتغير اسمة وفعل قال انة وجد عمل بعد ذلك مباشرة.

واذ بحثت في المنتدى جيدا ستجد هذة المداخلة.

فانا اعتقد احتمالية تدخل الاسماء في تكرار مثل هذا الموقف قد يكون امرا واردا.

والله اعلم. وما الرزق الا من عند الله. واعقلها وتوكل.

جبت الحكايه دى منين ياعم سامح ....هى المنطقه مراقبه و الا ايه ,الراجل ده ياسيدى صديقى ( و الا يمكن تشابه أسماء ...الله أعلم) و الحمد لله ربنا كرمه و شغال و اشترى بيت جديد و أستقر نهائيا هنا , بس الصراحه أنا لم أوافقه على حكاية تغيير الأسم , هو بس مصبرش شويه علشان أنت عارف المصاريف عاليه و خصوصا للى معاه أولاد كتير ....ماأنا ياسيدى جيت فى نفس التوقيت وكل اللى يعرفنى يقولى مستر عرفات لما فلقونى و لاغيرت أسمى ولا حاجه .....

يادكتور جناوى متفرقش فى مصر بتفرق لما تيجى بالسلامه انشاء الله , أقباط المهجر بيساعدوا بعض , وده مش عيب , أنا أعرف طبيبه مصريه أدعت أنها مسيحيه علشان يساعدوها فى المعادله و الريفريرنس , انشاء الله على ماتيجى يكون المسلمين ربنا قرب ما بينهم و يلاقى اللى يعينك فى غربتك.

[moheltohamy]

لكن لما تلاقي إبن عمنا (الإخوة العرب) بيغلطوا في مصر ، أو حد مش مصري وبيخبّط في مصر ، ساعتها من حقك (وانا معاك) ، نروح نمسح بيه الأرض!

مش بيقولوا: أنا واخويا على ابن عمي ، وانا وابن عمي ع الغريب

لا يا دكتور moheltohamy عندك هنا ستوب

انا فلسطيني يعني مكان اقامتي بفلسطين بس لا اكتر والا اقل ,وزي مهي بلدي فهي بلدك انتا و بلد الجميع و نفس الشيء ينطبق على بلدي بردو مصر ,ومتنساش اننا كنا بلد واحد قبل ما الاستعمار يفرقنا و متنساش ان السبب في فرقتنا اليوم هم فقط الحكام وليس اي شيء اخر وزي ما قال نبينا عليه الصلاة و السلام في العصبيه (اتركوها فانها نتنة)

في الحقيقة عجبني ردك و لباقتك يا دكتور بس الحقيقة انا ما بقدر اسكت لما بحس ان احنا انفسنا بنساعد الاستعمار و بنفرق بين بعضينا و بالمناسبة احنا اخوة مش اولاد عم و اولاد عمنا هما اليهود

أحرجتني Kinane باشا بكلامك...

بس مش ناس زي سعادتك اللي قصدتهم بكلمة (الإخوة العرب)... ومش ناس زيك همه اللي هيغلطوا في مصر!

اللي قصدتهم ، همه معظم السعوديين والخليجيين اللي بيتعاملو إنهم بيشتروا مصر بفلوسهم ، والمصريين دول جايين يشتغلوا عندهم. والمصريين اللي بيشتغلوا ف الخليج يحسوا بالموضوع ده. أنا نفسي ما باشوفش الموقف ده ، لكن أحياناً ، في مواقف معينة بيطلع منهم الحاجات دي!

ولما تلاقي ف مطارات السعودية ، بتوع الجوازات عاملين كذا بوابة... بوابة للمواطنين السعوديين ، بوابة لمواطني مجلس التعاون الخليجي ، بوابة للأجانب! ولما سألت مرة ظابط الجوازات إزاي نبقى أجانب ، وفين أخوة العرب ... البيه آللي : إنتا مش أجنبي بالنسبة لأختي ومراتي؟ بيتذاكى بسلامته!

عموماً ، باعتذر ليك تاني ، وأكرر... أكيد مش اللي زي سعادتك هوه المقصود بكلامي.

[mohagerkadim]

سلام عليكم

لو سمحتم لى اشارك

انا شايف ان كل الاراء اللى اتقالت فى الموضوع ده صح لان الحاجة الاساسية اللى حتحدد نجاح موضوع الهجرة هيا انت حتلاقى شغل فى تخصصك ولا لا وانا حاكلم عن تخصصى كطبيب

باختصار شديد انا اول امبارح بس اخدت رخصة ممارسة المهنة فى اونتاريو بعد وصولى لكندا بعشر سنين بالتمام والكمال مع انى نجحت فى امتحانات المعادلة بسرعة شديدة ومن غير سقوط بس هنا كقاعدة اى تدريب او خبرة خارج كندا لا تساوى شئ ولازم تبدا التدريب كطبيب مقيم من الاول

المشكلة بقى ان كندا الاماكن فيها محدودة جدا للاجانب فى وظائف الاطباء المقيمين وكان على ايامى حوالى سبعين وظيفة ويمكن زادو شوية دلوقتى بس فى الاف بتقدم كل سنة واعرف ناس من سنة 90 بتقدم كل سنة ولغاية دلوقتى شغالين حراس امن وبيتزا دليفرى

المهم يا سيدى عشت اربع سنين فى كندا كانو عجب خلونى ما بقتش اعرف اضحك تانى بس برضه فضلت اذاكر المره دى للمعادلة الامريكية وطبعا فى الفترة دى اشتغلت اشغال تعبانة وسكنت فى بيوت فيها فيران وشهور كثيرة ما يفضلش معايا للاكل الا 60 او 70 دولار وطبعا اى فلوس جايبها معاك من مصر بتروح فى اول سنة خصوصا مع مصاريف الامتحانات و الكتب والكورسات وخلافه

بس ربك كريم ونجحت بمجموع عالى فى المعادلة الامريكية والامريكان ناس بتقدر العلم ورحت طبيب مقيم فى امريكا 5 سنين كانوا فى منتهى الجمال وفرق السما من العمى المهم يا سيدى نجحت فى البورد الامريكى وكمان الزمالة بتاعة الكلية الملكية فى كندا وكان لازم ارجع كندا علشان الدراسة بتاعتى خلصت وبرده الاقى مشاكل فى الترخيص علشان موضوع الخبرة الكندي ولقيت شغل فى مقاطعة بعيدة كملت فيه السنة الخبرة المطلوبة وان شاء الله استلم شغلى فى اونتاريو اخر الصيف

اللى ساعدنى فى القصة الطويلة دى بعد توفيق ربنا ودعا الوالدين انى كنت اعزب ومن غير مسؤلية عائلية وانى كنت مصمم ان الناس دى ماتغلبنيش وخدت العملية على صدرى وقولت لازم اكون احسن من اجدع واحد عندكم

والخلاصة بالنسبة للاطباء فرصة النجاح اصعب بكتير من اللى بيشتغلوا فى مجال الكمبيوتر اللى الدخول فيه سهل نسبيا علشان مافيهوش تراخيص ممارسة مهنة بس برضه الخروج منه سهل وانا شخصيا اعرف 6 بيشتغلو فى 3 شركات مختلفة اترفدوا فى اسبوع واحد عند هبوط بورصة اسهم التكنولوجيا فى 2001 و 4 منهم راحوا الخليج واعتقد لسه هناك اما بالنسبة للدين والتعليم وحياة الاسرة فده حيكون فى مداخلات اخرى ان شاء الله

[KINANE]

أحرجتني Kinane باشا بكلامك...

بس مش ناس زي سعادتك اللي قصدتهم بكلمة (الإخوة العرب)... ومش ناس زيك همه اللي هيغلطوا في مصر!

اللي قصدتهم ، همه معظم السعوديين والخليجيين اللي بيتعاملو إنهم بيشتروا مصر بفلوسهم ، والمصريين دول جايين يشتغلوا عندهم. والمصريين اللي بيشتغلوا ف الخليج يحسوا بالموضوع ده. أنا نفسي ما باشوفش الموقف ده ، لكن أحياناً ، في مواقف معينة بيطلع منهم الحاجات دي!

ولما تلاقي ف مطارات السعودية ، بتوع الجوازات عاملين كذا بوابة... بوابة للمواطنين السعوديين ، بوابة لمواطني مجلس التعاون الخليجي ، بوابة للأجانب! ولما سألت مرة ظابط الجوازات إزاي نبقى أجانب ، وفين أخوة العرب ... البيه آللي : إنتا مش أجنبي بالنسبة لأختي ومراتي؟ بيتذاكى بسلامته!

عموماً ، باعتذر ليك تاني ، وأكرر... أكيد مش اللي زي سعادتك هوه المقصود بكلامي.

انا قبلت اعتذارك يا دكتور و انا اسف اذا كنت هجومي في ردي بس والله لاني بحب كل مسلم و بتمنى نرجع نتوحد مرة تانيه, ربنى يجازي الكان السبب و يريحنى منهم عن قريب و لا بدنا كندا ولا غيرها ,

اما اهل الخليج فانا معاك ربنا يهديهم و على العموم الفلوس غمت على عنيهم بس ما تقلقش بكرى حيصحوا و صدقني حياكلوا ايديهم ندم .

[Automatic]

عموماً ، أعتقد المفروض نفتكر الراجل الطيب صاحب الموضوع (د. قناوي) ، وكان بودي أساعده في كتابة الأبليكيشن ، بس لما قدمت أنا سنة 2004 ، ما كانش فيه الورق ده ، كنت باتقدم بكل أوراقي وإثباتاتي من البداية. بصراحة ، كان نظام أحسن ، وأوضح.

اهيء اهيء بعيط

:blink:

عموما اشكركم برضه انا مستفيد

مش عارف قريت اشاعة والله اعلم ان اللي بيتقدموا من مصر فرصهم اقل من الخليج هل هذا صحيح

ثانيا هل فعلا بيميزوا ولو في الخفاء بين المسلمين وغيرهم بعني اللي اسمه محمد مثلا يبقي كخة وفرصه تقل

وشكرا

للأسف الرد علي سؤالك مش سهل.

الكومه الغبيه بتاعتنا سمحت لوزاره الهجره أنها تخبي بعض المعلومات عن الشعب..........ليه بالظبط محدش فاهم.

مطلوب من وزير الهجره أن يقدم خططهم و العدد الأجمالي الي حيقبلوه من المهاجرين و من رجال الأعما والمسثمرين و غيره.

لاكن مش مطلوب منهم أن ينشرو العدد الي سامحين بيه من كل بلد "Quota"

فلمي تلاقي في مثلآ 100000 Backlog في نيودلهي و مافيش Backlog فش نيو يورك, أحتمال يكون السبب أن عدد المقدمين في نيودلهي أكتر من نيو يورك و أحتمال أن العدد السنوي المسمح به في نيو دلهي أقل بكتر من نيو يورك..............محدش يعرف و لما نسأل يقولولنا مش شغلوكو......ولاد ال bv:-

القانون الي ناويين يطبقوه حيبقي أزفت لأن حاليآ الملف بيعدي علي كذا مرحله و يراجعها كذا Immigration Officer فلو واحد كان عنصري ورفض شخص من غير سبب قانوني اللي بعده حيوافقو عليه والأغلبيه تمشي.

القانون الجديد بيسمح ل Immigration Officer واحد لرفض أو تأخير الملف.

حيبقي عندهم سلطه يستعجلو الملفات اللي تعجبهم و الباقي ينتظر دوره.

تفتكر أنتا حيحصل أيه؟

تفتكر حيقبلو المسلمين اللي منهم يفضلو المعامله مع المسلمين فقط؟

تفتكر حيدخلو المصريين اللي شهادتهم ملهاش قيمه هنا؟

تفتكر حيدخلو الهنود اللي يفضلو يخلفو أولاد و و يعتبرو البنات عبئ عليهم؟

ولا يدخلو الأنجليز والأمريكان والروس والمجريين والبولنديين اللي مش معقدين من ناحيه الشرب والجنس والدين عمومآ و معظمهم بيعيشو في كندا ويحبوها كبلدهم.

أول ما الحكومه تطلب تعمل حاجه في الخفاء حتكون نيتها تخزوق حد ومش عايزه الشعب يعرف مين بالظبط حياخد الخزوق..........

تم تعديل 5 يوليو 2008 بواسطة Automatic

[ايهاب سالم]

تم تعديل 5 يوليو 2008 بواسطة ايهاب سالم

[ايهاب سالم]

اخي العزيز دكتور قناوي: فية راجل فاضل احد اعضاء المنتدي المقيمين في كندا ولا اتذكر الحقيقة اسمة حاليا ولكنة رجل فاضل والحقيقة كان يخبرنا بتجربتة في العمل في كندا وتعبة الشديد وذلك لتصادف ذهابة الي كندا بعد احداث الحادي عشر من سبتمبر وانة كان يبحد عن عمل بجد واجتهاد حتى انة كان يبحد عن طريق شركة توظيف ونظرا الى ان اسمة اسامة وهذا يتطابق مع اسم اسامة بن لادن لم يكن يجد عملا. وذلك بناء على سردة لحكايتة وانة بعدما اشار علية موظف شركة التوظيف بتغير اسمة وفعل قال انة وجد عمل بعد ذلك مباشرة.

واذ بحثت في المنتدى جيدا ستجد هذة المداخلة.

فانا اعتقد احتمالية تدخل الاسماء في تكرار مثل هذا الموقف قد يكون امرا واردا.

والله اعلم. وما الرزق الا من عند الله. واعقلها وتوكل.

الكلام ده صحيح و عملوا عنه فيلم في كندا إسمه

being_osama

الفيلم أخرجه مخرج كندي من أصل عربي و يحكي فيه قصص حقيقيه لسته من الشباب العرب صادفتهم متاعب بعد 11 سبتمبر لأن إسمهم أسامه

وقع إسم أسامه على مسامع الغربيين زي وقع إسم شارون على مسامع العرب

تم تعديل 5 يوليو 2008 بواسطة ايهاب سالم

[ايهاب سالم]

[ايهاب سالم]